Maitiro okuviga vafi: Paguva

Posted by MC on June 5, 2024
Posted in: Maitiro okuviga vafi. Leave a comment

Rwiyou rwokutanga

M: Muzita raBaba, naMWanakomana, naMweya Mutsvene.

M: Mwari wetarisiro dzavanhu vose ngaakuwanirei rugare ruzere, uye Tenzi vorupenyu ngavave nemi nguva dzose.

V: Ngaave nemiwo.

M: Tichivimba nezita raJesu Kristo, tinouya kuzoviga hama yedu iyi, uye tichiisusukidza kudenga kuna Mwari.

Ngatinamatei kuna Mwari Baba vedu vanopa hupenyu kuzvinhu zvose, kuti vazomutsawo hama yedu iui panomutswa vatsvene vevasande vose.

Dai Mwari vakamutongawo netsitsi, vagomuregererawo matadzo ake ose.

Dai Jesu, Mufudzi Wakanaka, vakamutungamirira kuimba yake tsvene uko achanogara pamwe chete naMwari Baba vedu. Uko anoziva nomufaro usingaperi pamwe chete navasande vose uye naMwari Baba vedu.

V: Amen.

Dama Rakanaka raJesu Kristo romuvhangeri yaJowani (11:21-27).

Nomusi uyo Marita akati kuna Jesu: “Dai mainge muri pano, hanzvadzi yangu ingadai isina kufa. Asika nazvino wose ndinoziva kuti Mwari anokupai chipi nechipi chamunenge makumbira kwaari.” Jesu ndokumuti, “Hanzvadzi yako ichamukazve.” Marita ndokuchitiwo, “Hongu ndinoziva kuti ichazomukazve kana vomuka vafi nezuva remhedziso.”

Jesu akamuti, “Kumuka kwenyu ndini, upenyu hwenyu ndini, uyo anonditendera, Kunyange akafa achava mupenyu; uyezve munhu wose mupenyu, kunge achinditendera, aazofa narini wose. Izvi unozvitendera here?” Iye ndokuchiti, Hongu, Tenzi ndinotenderesa kuti ndimi Kristo, Mwanakomana waMwari, uyo wainzi achauya pasi pano.”

Apa ndipo paperera Dama Rakanaka raKristo ranhasi.

Mushure meizvi mupupriste kana mutungamiri anoparidza. Kana kuti angaverenge mharidzo iyi.

M: Yesu anoti, “Kumuka kwenyu ndini, upenyu hwenyu ndini, uyo anonditendera haazofa narini wose.” “Hama dzadiwa, hama yedu iyi yatorwa naMwari. Mwoyo yedu inorwadza kwazvo kuti mumwe wedu watisiya. Asi savatenderi tinoziva kuti Mwari, musiki wake, amudaidza. Muviri wake unodzokera muvhu mawakabva. Uchazomutswa nesimba raMwari pazuva rokupedzisira sezvakarehwa naKristo. Asi mweya wake uri mumaoko aMwari. Unofanira kunatswa naye kuti upunzwe kumusha mutsva. Saka hama yedu haina kutisiya chose kwete, asi yatitangira isu, tichaitevera rimwe zuva.

Iye uyu watisiya, acharamba achitirangarira nokutichengeta. Anotarisira kwatiri kuti timufunge muminamato yedu, Nokuti mweya wake unotsva neshungu nemikumbiro yedu. Ngatichimbonyararai tichimunamatira nechomumwoyo. Ngatimukumbirewo atiregerere zvatakamukanganisira achiri mupenyu, nesuwo tichikanganwa zvaakambotitadzirawo.

M: Mupeiwo zororo risingaperi, Tenzi.

V: Chiedza chisande chimuvhenekere anarini.

M: Ngaazorore murugare.

V: Amen.

M: Ngatinamatei:

Tenzi Jesu Kristo, makati kwatiri, upenyu hwenyu ndini: kumuka kwenyu ndini; nzira yokudenga ndini.

Hama yedu [Nhingi] yamakafira pamuchinjikwa, yadaidzwa naMwari Baba venyu. Pindai naye muParadhiso achigara narini. Ngaabve munyika munofiwa, apinde musingafiwi. Ropa renyu rakaerera pamuchinjikwa, ngarieredze matadzo ake. Mwoyo wenyu munyoro unyorovese kutongwa kwake. Chipiyaniso chamakatakura chirerutse kurangwa kwake. Agorangwa chete nomuromo, anyenyeredze moto muzhinji nokurwangwa kupi kwomushure mokufa kwedu. Ngaawane mifaro yedenga yamakatsidzira vanozvarwa patsva nemvura naMweya Mutsvene.

V: Amen.

2        Kukomborera Guva

M: Tenzi ngaarumbidzwe.

V: Nemisi isingaperi.

M: Ngatinamatei:

Mwari Tenzi, Ishe wedenga napasi, iyi ndiyo imba yomwana wenyu [Nhingi] yotomuradzika. Vangere venyu ngavaichengete. Vavengi ngavarege kusvika padyo nayo, muzita raBaba neroWManakomana neraMweya Mutsvene.

V: Amen.

M: Ndinomwaya imba iyi nemvura inoera kuti iropafadzwe naMwari, muzita raBaba neroMWanakomana neraMweya Mutsvene.

V: Amen.

M: Ndinopfungaidzira ima iyi kuti inatswe nokuchengetwa naMwari, muzita raBaba neroMWanakomana neraMweya Mutsvene.

V: Amen.

3        Kuiswa kwomunhu muguva

M: Pinda mumba mako umu, uzorore murugare kudzamara umutswe naKristo musi unomutswa vanhu vose muvafi.

4        Zvichemo

M: Tichinamatira mwana wenyu [Nhingi} watiri kususukidza, tinosimbiswa namashoko aTenzi wedu Jesu Kristo anoti: Ini ndini rumuko norupenyu; uyo anonditendera, Kunyange akafa, achava mupenyu; uyezve munhu zose mupenyu, kunge achinditendera, haazofa narini wose.

M: Tenzi wedu Jesu Kristo, ndimi makanyaradza Maria naMarita mukutambudzika kwavo, tikwevereiwo padyo nemi, zvikuru nhasi uno, tichinamatira hama yedu [Nhingi] uyu watiri kukumikidza kwamuri. Tinzweiwo Tenzi.

Imi makachema muri paguva raLazarus, mudikanwi wenyu, tirerutsireiwo mumatambudziko aya. Tinzweiwo Tenzi.

Ndimi Nyakumutsa vafi, pinzaiwo hama yedu iyi [Nhingi] mumuzinda wenyu. Tinzweiwo Tenzi.

[Nhingi] akazvarwa patsva nemvura naMweya Mutsvene; mugamuchireiwo muboka ravatsvene vose. Tinzweiwo Tenzi.

[Nhingi] akariritirwa nomuviri neropa renyu; mupeiwo nzvimbo kumabiko enyu edenga. Tinzweiwo Tenzi.

Tinyaradzeiwo munhamo dzose dzoupenyu; sakisaiwo kuti chitendero chedu chitipe chitarisiro choupenyu husingagumi. Tinzweiwo Tenzi.

Tichisuwira kuuya kwoumambo hwaMwari Baba, ngatinamatei tose tichiti:

V: Baba vedu …

5        Munamato wokupedzisira

Tenzi, taperekedza hama yedu, ngaichisara nemi. Ava wenyu; tamukumikidza kwamuri. Tenzi chengetaiwo mhuri yake yaasiya pano pasi. Munyaradzeiwo (vana vake vose navazukuru vake vose ne-) hama dzose neshamwari dzake dzose, nesu veSangano tiri pano, tirambe takabatana. Iwe [Nhingi] kumbirira mhuri yako iyi, yawasiya pano pasi, kuna Mwari, kuti isawane chainoona.

Gara uchiinamatira kuti kuti idzivirirwe kunjodzi dzose dzapasi nokuzvinhu zvose zvinokuvadza mweya nomuviri. Musi wokufa kwavo uvatambire nokuvaperekedza kudenga kuna Mwari, kumufaro usingaperi.

V: Amen.

Kana kuti

M: Ngatinamatei:

Mwari wetsitsi nengoni, gamuchiraiwo minamato yedu yatinoitira [Nhingi] wamakadaidza. Musaverenge zvakaipa zvake zvose, Nokuti mumwoyo make aivavarira kuita kuda kwenyu. Sokubatanidzwa navanhu venyu kwaakaitwa nechitendero chake pasi pano, itaiwo kuti netsitsi dzenyu ave vamwe navatumwa kudenga. Ndizvo zvatinokumbira nomuna Kristo Tenzi wedu.

V: Amen

6        Chikomborero

M: Vakakomborerwa vakafa vachiita kuda kwaTenzi, ngavachizorora zvavo Nokuti vanoperekedzwa nezvakanaka zvavakaita.

M: Mupeiwo zororo risingaperi Tenzi.

V: Chiedza chisande chimuvhenekere narini.

M: Ngaazorore murugare. Amen.

M: Mweya wake nemweya yavarenderi vose vakafa ngaizorore murugare netsitsi dzaMwari. Amen.

M: Mwari muna masimba ose, Baba namWanakomana naMWeya Mutsvene, ivai nesu vana venyu, mutikomborere, murugare nesu misi yose. Amen.

M: Munamato wedu wapera.

V: Tinotenda Mwari.

1        Final Commendation (Shona-Catholic)

Posted by MC on March 9, 2024
Posted in: Maitiro okuviga vafi. Leave a comment

M: Hama dzinodiwa taungana pano kuzonamatira nokuviga hama yedu [Nhingi] yatisiya. Ngatimunamatirei nemwoyo yedu yose, kuti Mwari akurumidze kumugamuchira.

M: Ngatinamatei:

Mwari, Nyadenga, muridzi wapasi, Baba vane tsitsi, onai taungana pano isu vana venyu, kuzoperekedza mwana wenyu nokumusvitsva kwamuri. Ndimi mamudaidza. Ndimi mamubvisa matiri. Kusave nokumwe kwaandanogara kusina imi. Chimugamuchirai achigara nemi varidzi vake.

Muregererewo zvose zvaakakutadzirai, muchimupinza mumusha wenyu worufaro. Munzwireiwo tsitsi, musamutonge muine hasha, musamurangewo.

Mambo mukatitonga nokutiranga sezvatinofanira kuitwa, ndiani angapunyuke? Mukati murondorodze kutadza kwedu, Mambo, zvichemo zvedu hamungazvinzwi; misodzi yedu mungaishaire hanya.

Maziso edu azere misodzi, asi mwoyo wenyu, imi Mwari, uzere tsitsi. Kudaro, Baba, chipinzai mwana wenyu mumusha wenyu worufaro, achigara nokufara navasande vose, namadzitateguru ake ose, namadzimbuya ake nehama dzake dzose.

Kristo Mambo wedu, tisvitsireiwo chichemo chedu ichi kuna Mwari Baba, imi munogara narini narini. Amen.

Tenzi tinzwireiwo tsitsi.Tenzi tinzwireiwo tsitsi.
Kristo Tinzwireiwo tsitsi.Kristo tinzwireiwo tsitsi.
Tenzi tinzwireiwo tsitsi.Tenzi tinzwireiwo tsitsi.
Mupeiwo zororo risingaperi, Mambo.Chiedza chisande chimuvhenekere.
Ngaazorore murugare.Amen.
Mariya Musande hoyoi mwana wenyu [Nhingi].Endai naye kuna Mwari.
Iwe musande wake, newe mutumwa wake muchengeti, munhu wenyu uyu.Endai naye kuna Mwari.
Imi vangere navasande vose, hama yenyu iyi.Endai naye kuna Mwari.
Imi vechizvarwa chokwababa vake makatisiya muri muna Mwari, mwana wenyu uyu.Endai naye kuna Mwari.
Imi madzibaba ake namadzitateguru ake ose, navose vokurudzi rwokwababa vake makatisiya, muri muna Mwari, mwana wenyu uyu.Endai naye kuna Mwari.
Imi Madzisekuru ake, namadzimbuya ake, navose vokurudzi rwokwaamai vake makatisiya, muri muna Mwari, mwana wenyu uyu.Endai naye kuna Mwari.
Imi hama dzake dzose, neshamwari dzake dzose makatisiya, muri muna Mwari, hama yenyu iyi.Endai naye kuna Mwari.

M: Ngatinamatei:

Mwari Baba, tsime rorupenyu, Mwanakomana wenyu akativimbisa achiti: rupenyu rusingaperi ndiko kukuzivai, imi munova ndimi Mwari mumwe chete wechokwadi, nokuzivawo Jesu Kristo, Nyakutumwa narini.

Tinokumbira kuti muratidze mbiri yenyu neyuoMwanakomana wenyu kuna [Nhingi] hama yedu, kuti aonane nemi uso nouso. Muregerereiwo zvaakakutadzirai zvose, afare nemi, navangere navakarurama vose, nehama dzake dzose dzakatungamira.

Baba, Nyangoni, mumaoko enyu tinoisa hama yedu [Nhingi] iyi, tiine chokwadi nechitarisiro chekuti iye, pamwechete navose vakafa muna Kristo, vachamuka pamwe naKristo pazuva remhedziso.

Tinokupai Rutendo pamusoro pezvikomborero zvamakapa [Nhingi] achiri pano pasi. Zvikomborero izvi zviratidzo zvorunako rwenyu kwatiri, uyezve zviratidzo zvokubatana kwedu navasande muna Kristo.

Tenzi Nyakunzwira tsitsi, tendeukirai kwatiri munzwe minamato yedu. Vhurirai muranda wenyu musuo wokuparadhiso mubatsire isu tasara kunyaradzana muchitendero kusvikira tazosangana tose nemi naKristo, uye nehama yedu iyi kuupenyu husingaperi. Amen.

2        Kumwaya mvura

M: Ndinokumwaya mvura inoera, kuti ucheneswe naMwari, muzita raBaba neroMwanakomana neraMweya Mutsvene.

V: Amen.

3        Kupfungaidzira

M: Ndinokupfungaidzira kuti iwe unatswe nokuchendetwa naMwari. Kunhuhwira uku ngakudzinge vavengi vosve nemweya yakaipa, muzita raBaba neroMWanakomana neraMweya Mutsvene. Amen.

4        Maendero okuguva

M: Hama dzadiwa, maitiro edu okunamatira hama yedu apera. Ngatichimuperekedzai kunzvimbo yake yorugare.

Rwiyo rwokupedzisira

1        Maitiro okuviga vafi (Catholic Church)

Posted by MC on March 9, 2024
Posted in: Maitiro okuviga vafi, Muteuro weMisa. 1 Comment

If the body is brought to the church immediately before Mass, the priest vested for Mass, may receive the funeral at the Church door, offering his sympathy to the relatives and sprinkling the coffin with holy water.

Then the body is carried into the Church, followed by the people and the priest. A cross maybe placed on the coffin, and lighted candles may be placed at its side, or the paschal candle alone may be placed at the head of the deceased.

2        Introductory rites

After the people have assembled, the priest and the ministers go to the altar while the entrance song is sung. At the altar, the priest makes the customary reverence with the ministers, and (if incense is used) incenses the altar. Then, with the ministers, he goes to the chair, and facing the people, greets them with these or similar words:

M: Muzita raBaba, naMwanakomana namweya Mutsvene.

M: Kwaziwai vatenderi vadiwa.

V: Kaziwai.

M: Hama, rupenyu rwaMambo wedu Jesu Kristo norudo rwaMwari Baba noruwadzano rwaMweya Mutsvene ngaruve nemi mose.

V: Ngaruve nemiwo.

The priest, deacon, or other suitable minister may very briefly introduce the Mass.

3        Penitential Rite

The priest addresses the people with these or similar words:

M: Tinokumbira rubatsiro rwaMwari, Baba naMwanakomana naMWeya Mutsvene, kuti tinyatsopira muteuro wedu wanhasi. Saka ngatipfidzei matadzo edu.

Brief silence

M: Ndinobvuma

V: Panemi Mwari Baba vanaMasimbaose napanemiwo hama dzangu kuti ndakatadza kwazvo mukufunga mukureva mukuita nomukuzengurira … naizvozvo ndinokumbirawo kunemi Maria Muvirigo, nemi vangere navasande vose nemiwo hama dzangu kuti mundireverere kuna Mwari Baba.

M: Mwari muna masimba ose, tiitireiwo tsitsi, tiregerereiwo matadzo edu, muzotisvitsawo kuupenyu husingaperi.

V: Amen.

4        Kyrie

Tenzi tinzwireiwo Tsitsi … Tenzi tinzwireiwo tsitsi.

Kristo tinzwireiwo tsitsi … Kristo tinzwireiwo tsitsi.

Tenzi tinzwireiwo Tsitsi … Tenzi tinzwireiwo tsitsi.

5        Gloria

Mwari Ngaarumbidzwe pasi pano vagarike vaakanzwira tsitsi.

Tinokukudzai; tinokuimbirai; tinokupfugamirai; tinokurumbidzai.

Tinokutendai pamusana pamabasa enyu makuru anoshamisa.

Tinokuomberai Mwari Mambo imi Mambo wedenga

Mwari Baba wamasimba ose.

Tinokuomberai Mambo Yeso Kristo.

Mwanakomana mumwechete.

Mwari Mambo hwayana yaMwari mwanakomana waBaba.

Imi munobvisa matadzo apasi tinzwireiwo tsitsi.

Imi munobvisa matadzo apasi donzwaiwo zvichemo zvedu.

Imi mugere kurudyi rwaBaba tinzwireiwo tsitsi.

Nokuti ndimi moga musandesande ndimi moga Mambo.

Ndimi moga mukurukuru Yesu Kristo imi naMweya Mutsvene.

Ndimi mune mbirii pamwe naMwari Baba. Amen.

6        Opening Prayer

6.1     Outside the Easter Season

M: Ngatinamatei

Mwari Baba, Mupi woupenyu, Tinotendera kuti Mwanakomana wenyu Yesu Kristo akatifira pachipiyaniso, akamuka muvafi nezuva retatu. [Nhingi] muKristo watiri kunamatira nhasi, aitenderawo kuti Kristo watiri kunamatira nhasi, aitenderawo kuti Kristo akamufira pamuchinjikwa, akamuka. Tinokutetereraiwo kuti muzomutsa [Nhingi] mwana wenyu muvafi nokumuwanisa upenyu utsva hwaKristo, anogara achitonga nemi pamwe naMweya Mutsvene kwemisi isingaperi. Amen.

6.2     During the Easter Season

Mwari, Baba mune tsitsi, inzwaiwo minamato yedu. Makamutsa Mwana wenyu Yesu muvafi. Saka tinotarisira kuti muchamutsawo mwana wenyu [Nhingi] muvafi, sezvamakaita Kristo. Ndimi Mwari mune tsitsi dzisingaperi. Amen.

7        Zvirerengo

  • e.g. Ungwaru 3:1-9; VaRoma 8:14-23; Jowani 14:1-6
  • Izaya 25:6a, 7-9; Mariro 3:17-26; 2 VanaMakabhi 12:43-45
  • VaRoma 14:7-9, 10b-12; 1 VaKorinde 15:20-28; 1 VaTesaronika 4:13-182 Timoti 2:8-13
  • Mateo 25:31-46; Mariko 15:33-39; Ruka 23:33, 39-43; Ruka 23:44-49; 24:1-6a; Jowani 6:37-40; Jowani 11:17-27; Jowani 11:32-45

8        Profession of Faith

M: Ndinotendera Mwari,

V: Baba ana masimba ose, Musiki wedenga napasi, Tinotendera Yesu Kristo, mwanakomana wake mumwe chete, mambo wedu, akazvarwa naMariya muvirigo nesimba raMweya Mutsvene akatongerwa kutambudzika naPonsiyo Pirato, akarovererwa pachipiyaniso, akafa akavigwa, akaenda kuvafi, zuva retatu, akamuka. Akakwira kudenga, kwaagere kurudyi rwaMwari Baba ana masimba ose; achabvako kuzotonga vapenyu navafi. Tinotendera Mweya Mutsvene; Kirike sande katorike, kubatana kwavasande, Kuregererwa kwamatadzo, kumuka kwomuviri Noupenyu husingaperi. Amen.

9        Zvichemo

M: Hama dzadiwa, hatirasi mwoyo mukutambudzika kwedu savanhu vasina chitarisiro, asi tinovimba naMambo wedu Jesu anova ndiye akakunda rufu nokumuka kwaakaita muvafi. Naizvozvo ngatiisei mikumbiro yedu kwaari.

M: Mambo Jesu Kristo, ndimi kumuka kwedu, ndimi upenyu hwedu. Tarisaiwo mwana wenyu uyu [Nhingi] akatisiya, mumugamuchire norupfave, kuti azogara nevamwe vake, uye naVaTsvene venyu. Tinzweiwo Tenzi.

V: Tinokumbira kuti mutizwe.

M: Ropa renyu, Tenzi, risuke matadzo ake ose awane rugare rwenyu. Tinzweiwo Tenzi.

V: Tinokumbira kuti mutizwe.

M: Ipai hama yedu iyi [Nhingi] nevamwe vose vakatiitira zvakanaka mubayiro usingaperi. Tinzweiwo Tenzi.

V: Tinokumbira kuti mutizwe.

M: Gamuchiraiwo vatenderi vose vakafa muchiedza chisingagumi. Tinzweiwo Tenzi.

V: Tinokumbira kuti mutizwe.

M: Isai zvichemo zvenyu pachenyu

M: Tenzi wedu Jesu, imi makati “Ndinoziva hwai dzangu, uye hakuna achadzibvuta muruoko rwangu.” Onai Tenzi, mwana wenyu [Nhingi] tinomuisa mumaoko enyu kuti agare achichengetwa nemi. Donzwaiwo zvichemo zvedu izvi, mutireverere pana Mwari Baba. Amen.

10    Preparation of the Gifts

Meanwhile, the ministers place the corporal, the purificator, the chalice and the altar. The priest raises the paten with the host and says quietly:

M: Mwari Baba, tinokurumbidzai nokuti ndimi makasika zvinhu zvose, mukatipawo chingwa ichi chinotipa rupenyu rutsva.

The priest pours wine and little water into the chalice, saying quietly:

M: Mwari Baba, diraiwo rupenyu rwenyu matiri sokudira kwatiri kuita mvura muwaini iyi.

The priest raises the chalice and says quietly:

M: Mwari Baba, tinokurumbidzai nokuti ndimi makasika zvinhu zvose mukatipawo waini iyi yatinosuma kwamuri. Yava kuva chokunwa chinotipa rupenyu rutsva.

He then bows saying quietly:

M: Mwari Baba, tinozvipira kwamuri takazvirereka tichikumbira kuti mugamuchire mupiro wedu uyu.

At the side of the altar, he washes his hands saying quietly:

M: Mwari, ndigezeiwo uipi hwangu. mundibvise matadzo angu.

He then addresses the people with these words.

M: Hama dzangu, namatai kuti mupiro wedu ugamuchirwe naMwari, Baba vana masimba ose.

V: Dai Mambo angogamuchira mupiro watiri kupira kuti Zita rake rikudzwe, rirumbidzwe, ugobatsira isu nevamwe vose veKirike rake Sande.

11    Prayer over the Gifts

11.1 Outside the Easter Season

M: Mwari Baba vedu. Gamuchiraiwo gamuchiraiwo zvatinopira kunemi izvi tichinamatira [Nhingi] atisiya. Tinomukumbirira kuti mumunzwirewo tsitsi Nokuti akagara achivimba naKristo, Mambo wedu noMuponesi wedu, anogara achitonga nemi kwemisi isingaperi. Amen.

11.2 During the Easter Season

Mwari Baba vedu, gamuchiraiwo zvatiri kupira izvi tichinamatira hama yedu [Nhingi] atisiya. Tinokumbira kuti mumugamuchire mumuzinda wenyu, kuti agare achifara nemi pamwe naKristo kwemisi isingaperi. Amen.

12    Preface for the dead

12.1 Option 1

M: Mambo ngaave nemi.

V: Ngaave nemiwo.

M: Ipai mwoyo yenyu kuna Tenzi.

V: Tatoipa kwaari.

M: Ngatitendei Mwari

V: Ngatimutendei.

M: Zvechokwadi ngatimutendei, nokuti ndizvo zvinofanira kuitwa ndizvo zvinotisvitsawo kuupenyu: Mwari Baba, imi muna masimba ose, Nyakugara narini, tinokutendai misi yose.

Ndimi makatitsidzira kuti tichamuka noupenyu utsva howkudenga, kuti avo vanosuruwara nokutya rufu vanyaradzwe nechitsidzo choupenyu husingaperi.

Kuna vanovimba nemi, Tenzi, rufu kusandurwa chete, hakusi kurova. Upenyu hwedu pano pasi hukange hwaguma, tinotanga umwe utsva husingarovi kudenga.

Naizvozvo, imi Mwari Baba, tinokuimbirai misi yose, pamwe nengirozi navasande vose, tichiti:

Musande, Musande, Musande, Mambo Mwari samasimba. Denga napasi zvizere nembiri yenyu. Ngaarumbidzwe asi kumusoro-soro. Ngaarumbidzwe samutumwa waMwari. Ngaarumbidzwe ari kumusoro-soro.

12.2 Option 2

M: Mambo ngaave nemi.

V: Ngaave nemiwo.

M: Ipai mwoyo yenyu kuna Tenzi.

V: Tatoipa kwaari.

M: Ngatitendei Mwari

V: Ngatimutendei.

M: Zvechokwadi ngatimutendei, nokuti ndizvo zvinofanira kuitwa ndizvo zvinotisvitsawo kuupenyu: Mwari Baba, imi muna masimba ose, Nyakugara narini, tinokutendai misi yose, tichirevererwa naKristo muromo wedu, akabvuma kufa kuti anunure vanhu vose kurufu, uyezve kuti tive vanhu venyu narini.

Naizvozvo, imi Mwari Baba, tinokuimbirai misi yose, pamwe nengirozi navasande vose, tichiti:

Musande, Musande, Musande, Mambo Mwari samasimba. Denga napasi zvizere nembiri yenyu. Ngaarumbidzwe asi kumusoro-soro. Ngaarumbidzwe samutumwa waMwari. Ngaarumbidzwe ari kumusoro-soro.

13    Eucharistic Prayer

13.1 Eucharistic Prayer II

Zvechokwadi Mwari Baba, muno usande hwakakomba, usande hwose hunobva kwamuri.

CC: Tumaiwo Mweya wenyu azonatsa zvatiri kupira izvi zvive muviri + neropa RaJesu Kristo, Tenzi wedu.

Musi waakazvipira kurufu akabata chingwa, akakutendai ndokuchimedura, akachipa vadzidzi vake achiti:

Gamuchirai mose mudye: uyu muviri wangu unopirirwemi.

Vapedza chirariro, akabatawo mukombe, akatendazve ndokuupa vadzidzi vake achiti:

Gamuchirai mose munwe: uyu mukombe weropa rangu rechitenderano chitsva chisingaperi rinoteurirwemi navanhu vose kuti matadzo aregererwe. Garai muchiita izvi kuti mundiyeuke nazvo.

M: Ngatipembererei Mununuri wedu:

V: Tinokurumbidzai Tenzi imi makatifira, imi makamuka, muchazouyazve.

CC: Mwari Baba, tinopira kwamuri mupiro uyu wechingwa choupenyu nomukombe woruponeso. Tinoupira tichiyeuka kutifira nokumuka kwakaita Kristo. Tinokutendai imi maita kuti tive pano pamuri kuzopira mupiro uyu. Tumaiwo Mweya wenyu azoita kuti vose vanogamuchira muviri neropa raKristo vave vamwechete.

C: Tariraiwo Papa wedu [Nhingi] nomubhishopi wedu [Nhingi] navapristi, nesu tose tiri pano, navatenderi vesangano renyu vari pasi pose. Tipeiwo tose rudo runotiumba kuti tive vamwe.

C: Tinokumbirirawo mwana wenyu [Nhingi] wamakadaidza, akatisiya (wamadaidza nhasi, atisiya). Mutambireiwo azogara nemi. Akaitwa nhengo yaKristo norubhabhatidzo. Saka itaiwo kuti azomukawo muvafi sokumuka kwakaita Kristo.

C: Zaruriraiwo denga vatenderi vakafa vachitarisira kuzomutswa nemi, navamwewo vose vakafa, vazofara nemi vachikuonai.

Tinzwireiwo tsitsi isu tose tiri pano, kuti tizogara upenyu husingaperi, pamwe naMariya muvirigo, amai vajesu Kristo, Mwari Mwanakomana, pamwe navapostori venyu nevamwe vose vezvizvarwa nezvizvarwa, vakaita kuda kwenyu, kuti tose pamwe chete tizokurumbidzai, tichikupembererai, tiri nhengo dzajesu Kristo, Mwanakomana wenyu.

CC: Tinokurumbidzai, Mwari Baba, nomuromo waKristo! Tinokummbidzai, Mwari Baba, tiri nhengo dzaKristo! Tinokurumbidzai, Mwari Baba, naMweya anogaramatiri! Tinokurumbidzai, Mwari Baba, kwemisi isingaperi! Amen.

13.2 Eucharistic Prayer III

(M— Main celebrant, C— one of the concelebrants, CC = all concelebrants)

M: Zvechokwadi Mwari Baba muno usande hwakakomba!

Ndimi munokodzera kurumbidzwa nezvisikwa zvose, nokuti imi noMwana wenyu Yesu Kristo munoraramisa nokunatsa zvose zvamakasika nesimba raMweya Mutsvene.

Ndimizve munogara muchiti kuvanhu: Uyai muve vangu, mugare muchipira kwandiri mupiro mutsvene muzvimbo dzose.

CC: Naizvozvo, tinokukumbirai, Mwari Baba, kuti mutume Mweya wenyu kuzonatsa izvi zvatauya nazvo kuzopira kwamuri, Zvive muviri + neropa roMwanakomana wenyu, Mambo wedu Yesu Kristo, akasiya atiudza kupira mupiro uyu.

Usiku hwaakaiswa mumaoko avavengi vake, akabata chingwa, akakutendai, akateketera, ndokuchimedura, akachipa vadzidzi vake achiti: (bow slightly)

Gamuchirai mose mudye: Uyu muviri wangu unopirirwemi.

Vapedza chirairo akabata mukombe, akakutendai, akateketera, ndokuupa vadzidzi vake achiti: (bow slightly)

Gamuchirai mose munwe: uyu mukombe weropa rangu rechitenderano chitsva chisingaperi rinoteurirwemi navanhu vose kuti matadzo aregererwe. Garai muchiita izvi kuti mundiyeuke nazvo.

M: Ngatipembererei Mununuri wedu.

Anamnesis: Tinokurumbidzai Mambo imi makatifira, imi makamuka, muchazouyazve.

CC: Mwari Baba, tiri kuyeuka kutifira kwakaita mwana wenyu nokumuka kwake kunoshamisa nokukwira kwake kudenga. Takamirirazve kudzoka kwake. Nokudaro tinokutendai nomupiro mutsvene uyu watinopira kwamuri.

Chigamuchiraiwo mupiro uyu woMwana wenyu, Hwayana yakatiwadzanisa nemi, unopirwa kwamuri nesangano renyu. Itaiwo kuti tose tigogamuchira muviri neropa rake tizadzwe naMweya Mutsvene, tibatanidzwe naKristo, tive mhuri imwe Chete inodanana sehama nehama.

C1: Tumaiwo Mweya wenyu atinatse kuti tive venyu narini, tizofara kudenga nemi pamwe naMariya muvirigo. amai vaYesu Kristo, Mwari Mwanakomana, pamwe naJosefa Musande, pamwe navapostori navamatiri navasande vose, vatinovimba kuti vanotireverera.

C2: Mwari Baba vedu, ipaiwo vanhu vose ruwadzano norugare nesimba romupiro uyu wakatiwadzanisa nemi. Ipaiwo isu vana vesangano renyu tichiri parwendo, chitendero chakasimba norudo rwakasimba. Ipaiwo zvakare chitendero chakasimba norudo rwakasimba Papa wedu Francis, nomubhishopi wedu [Nhingi] namabhishopi ose navapristi navanhu vose vakaitwa vana venyu naKristo.

Baba, inzwaiwo minamato yedu, isu mhuri yenyu yamati iungane pano. Tinokukumbirai kuti isu navamwe vana venyu vari pasi tibatane, tive vamwe.

C3: Zaruriraiwo denga vatenderi venyu vakafa navamwe vose vakafa vaiita kuda kwenyu, vafare nemi vachikuonai. Tinotarisira kusvitswa ikoko naYesu Kristo, Mambo wedu, nyakutisvitsa zvinhu zvose zvakanaka.

CC: Tinokurumbidzai, Mwari Baba, nomuromo waKristo! Tinokummbidzai, Mwari Baba, tiri nhengo dzaKristo! Tinokurumbidzai, Mwari Baba, naMweya anogaramatiri! Tinokurumbidzai, Mwari Baba, kwemisi isingaperi! Amen.

14    Communion Rite

M: Muponesi wedu pachake ndiye akatirayira, akatidzidzisa chinamato ichi: kudaro ngatinamatei, tichiti:

V: Baba vedu muri kudenga, zita renyu ngarinamatwe; umambo hwenyu ngahusvike, kuda kwenyu ngakuitwe pasi sokudenga. Tipeiwo nhasi kudya kwedu kwezuva, mutiregererewo zvatakakutadzirai sokuregerera kwatinoita vakatitadzira, musatirege tichiwira mune zvinotiyedza, asi mutinunure kune zvakaipa.

M: Tinunureiwo, Baba kune zvakaipa zvose. Tinzwireiwo tsitsi, kuti tigarike murupenyu rwedu, mutibatsire nguva dzose, kuramba tichinzvenga matadzo nokukunda matambudziko, takatarisira kuuya kwoMuponesi wedu, Yesu Kristo.

M: Nokuti ndimi Mambo,

 V: Ndini Samasimba, mune mbiri narini narini.

M: Mambo wedu Yesu Kristo, makati kuna vapostori venyu; Ndinokusiyirai rugare, ndinokupai rugare rwangu; regai kuringa matadzo edu, muringe Chete chitendero cheSangano renyu, mupe vana varo vose rugare nokugarisana sehama nehama: Imi Mwari, munogara muchitonga kwemisi isingaperi.

V: Amen

M: Rugare rwaMambo ngaruve nemi narini.

V: Ngaruve nemiwo.

The priest takes the host, breaks it over the paten, and places a small piece in the chalice, saying quietly:

M: Mambo wedu Yesu Kristo, tibatsireiwo isu tose tava kugamuchira muviri neropa renyu kusvika kuupenyu husingaperi.

15    Agnus Dei

Hwayana yaMwari, munobvisa matadzo apasi, tinzwireiwo tsitsi.

Hwayana yaMwari, munobvisa matadzo apasi, tinzwireiwo tsitsi.

Hwayana yaMwari, munobvisa matadzo apasi, tipeiwo rugare.

The priest says quietly, with hands joined:

M: Mambo wangu Yesu Kristo, ndava kugamuchira muviri neropa renyu,ini munhuwo zvangu. Regai kundirasa, asi garai neni muchindichengeta.

The priest genuflects, raising the host slightly over the paten, he faces the people and says aloud:

M: Onai Hwayana yaMwari, onai nyakubvisa matadzo apasi. Zvavo avo vakakokwa kumabiko eHwayana.

V: Mambo, handikodzeri kuti mupinde muneni, ingotaurai izwi chete, mweya wangu uponeswe.

Hes say quietly:

M: Muviri waKristo ngaundichengete kusvikira kurupenyu rusingaperi.

He reverently consumes the body of Christ; meanwhile, the communion song is begun.

Taking the chalice, the priest says quietly:

M: Ropa raKristo ngarindichengete kusvikira kurupenyu rusingaperi.

He reverently drinks the blood of Christ.

He then goes to the communicants and says:

M: Muviri waKristo.

V: Amen.

16    Prayer after Communion

16.1 Outside the Easter Season

M: Ngatinamatei

Mwari Baba vedu, tagamuchira muviri neropa roMWana wenyu Jesu Kristo. Tinokutendai. Tinokumbira kuti hama yedu [Nhingi}, aidya nesu mbuva iyi akurumidze kusvika kumabiko okudenga aakafanogadzirirwa. Ndicho chichemo chedu kwamuri Baba, Mupi wemifaro isingaperi. Amen.

16.2 During the Easter Season

M: Ngatinamatei

Mwari Baba vedu, tanga tichipira kwamuri muteuro unotiyeuchidza kufa nokumuka kwoMwana wenyu Jesu Kristo, tichinamatira hama yedu [Nhingi]. Tinokumbira kuti mumubvise murufu mumupinze muupenyu, mumubvisewo murima, mumupinze muchiedza, mumubvisewo mumatambudziko, mumupinze murugare. Ndicho chichemo chedu kwamuri Baba, mune tsitsi dzisingaperi. Amen.

Announcements should be made now. Before the final commendation and farewell, a family or church member may be invited to say a few words. When burial follows immediately after mass, the blessing and dismissal are omitted, and the final commendation and farewell takes place immediately.

NOVENA KUNA MWEYA MUTSVENE

Posted by MC on May 20, 2023
Posted in: Manovhena, Mimamato. Leave a comment

Mweya Mutsvene, ndimi wechitatu muUtatu Hutsvene
hwaMwari! Ndimi Mweya wechokwadi nohutsvene,
munobva munaBaba noMwanakomana, makangoenzana navo muna zvose! Ndinokupfugamirai ndinokudai
nomwoyo wangu wose.
Mweya Mutsvene wadiwa, ndinoisa chivimbo murudo
rwenyu kwandiri rwakadzama pandiri kuita novena iyi,
kuti kana kuri kuda kwenyu mundipewo izvi …

(Kumbira chaunoda)

Ndidzidzisei kuziva nokutsvaga Mwari akandisika uye
wandakasikirwa. Zadzai mwoyo wangu nokutya Mwari
uye rudo kwaari. Itai kuti ndirwadziwe kukutadzirai uye
ndive nomwoyo murefu. Musandirega ndichiwira
murutadzo.
Wedzerai mandiri kutenda, chitarisiro nerudo ndikure
mutsika dzakanaka dzinofambirana nezvandiri
pakukurarama.
Ndiitei muteveri waJesu akatendeka, mwana anoteerera
sangano uye anobatsirana navamwe. Ndipeiwo nyasha
dzokuti ndigone kuchengetedza mirau yenyu uye
kugamuchira masakarAmende ndakakodzera.
Ndipeiwo zvipo zvenyu zvinoera zvinoti; ungwaru,
runzwisiso, zano rakanaka, rutsigo, ruzivo, runamato
nokutya Tenzi. Wedzeredzai mandiri michero yenyu
inoera inoti; rudo, mufaro, mwoyo murefu, mutsa, unaku,
mwoyochena, unyoro, kutendeka, kuzvidukupisa,
kuzvibata noutsvene.
Ndisvitsei kuutsvene mukurarama daidzo
yamakandishevedzera, mugondisvitsawo kumugumo
wakanaka wokuzofara muupenyu husingaperi, nomuna
Jesu Kristu Tenzi wedu. Amen

Dai

Posted by MC on May 15, 2023
Posted in: rufu. Leave a comment

Vazhinji vedu kana tichinge tawirwa nenhamo tinofarira kuti ‘dai’. Tinofunga kuti dai takaita zvinhu neimwe nzira nhamo yakatiwira ingadai isina kutiwira. Tinofunga kuti tingadai takaita zvinhu nemamwe maitiro.

  • Dai ndakakurumbidza kuenda navo kuna chiremba zvingadai zvakaenda nepamwe.
  • Dai ndakakurumbidza kuvaona.
  • Dai ndakavanavo kwenguva yakati rebei.
  • Dai ndakanamata kupinda zvandakaita.

Asi chokwadi ndechekuti kana nguva yakwana yakwana zvisinei nezvatingadai takaita.

Maria naMarita muShoko rakanaka varikudemba mushure mokunge varasikirwa nehanzvadzi yavo. Pakati pokushushika kwavo vanobvunza mubvunzo wokuti ‘dai?’ asi mubvunzo wavo hausikunangana naivo pachavo, mubvunzo wavo uri kunangana nomumwe. Vari kunangana naJesu. Jesu dai wainge uri pano hanzvadzi yedu ingadai isina kufa.

Nhasi isu taunganira XX. Pada tine mibvunzo. Maria naMarita vakabvunza mibvunzo pamusoro pehanzvadzi yavo, asi isu tiri kubvunza mibvunzo pamusoro pehama yedu. Tiri kuti Jesu inga takakudai wani tikakuteverai nokuedza kuita zvose zvamunoda ko sei makatirasa panguva yakakosha kudai?

Asi ngatirangarirei kuti pakati perima rokusurikirwa, Jesu anouya kuzonyaradza Maria naMarita. Anovayeuchidza chitendero chavo.

Svondo 6 rePasika Gore A

Posted by MC on May 14, 2023
Posted in: Gore A, Pasika. Leave a comment

1      Kutarisirwa pasi

MaSamariya aivengwa navanhu vose. VaRoma navaGiriki vaivazvonda nokuti vaingofunga kuti rimwe boka ravaJudha. VaJudha vaivavenga nokuti vaivatora somusanganiswa usina ropa rakachena.

Makore akawanda Kristu asati azvarwa, vanhu veAsiriya vakapamba chamhembe cheIziraeri ndokuendesa vagari vemo kuhupoteri kuAsiriya. Vazhinji vakasara munzvimbo iyi vakatanga kuroorana nevechirudzi vainamata zvimwe zvimwari. Kubva ipapo vakatanga kuonekwa savanhu vane ropa rakasviba. VaIziraeri vaiva muhupoteri pavakadzoka vave kuda kuvaka tembere patsva, vakanzi tokubatsirai nemaSamariya vakaramba. VaJudha vaitendera kuti ruponeso harufi rwakauya kumaSamariya. MaSamariya vaitarisirwa pasi.

2      Vakaona zviratidzo kuburikidza naFiripi

Firipi akapinda muguta reSamariya. Akavataurira nezvaMesiya, Jesu weNazareta. VaSamariya vakagamuchira Dama Rakanaka. Kuburikidza naFiripi vakaona zviratidzo zvaMesiya nameso avo:

  • Zvirema zvakafamba;
  • Madhimoni akaburitswa;
  • Zvose zvakavimbiswa navaPorofita zvakaitika kwete kuvaKristu vechiJudha chete asi kuvaKristu vechiSamariya;
  • Vakagamuchira Jesu nomufaro;
  • Vakanga vasisiri vokunze asi nhengo dzizere dzenzira dzaKristu.

3      Pita naJowani vakavashanyira

Pita naJowani pavakanzwa nezvebasa raFiripi kuvaSamariya, vakaenda kuSamariya. Vakavanamatira vakakumbira Mwari kuti aburutsire Mweya Mutsvene wake pavari. Zvakava pachena kuti vaSamariya vakaenzana navaJudha pachitendero mumhuri yaKristo, vanowanawo ruponeso.

Wakambonzwa here seusingakodzere pamberi paTenzi? Chiverengo ichi chinotidzidzisa kuti tose takakosha mumaziso aMwari. Anotinatsa. Rufaro rwavaSamariya ndirwo Rufaro rwedu. Tinodiwa naMwari. Akatipa upenyu hwake. Akatipa mweya wake.

4      Mazvionero tichikura

 Vazhinji vedu tiri kudzvanyirirwa nemaonero ataizviita tichikura. Pada taizviona sevanhu pasina. Pada tine nguva dzataizvitarisa mugirazi tisingaoni Ms Zimbabwe kana Mr. Universe.

5      Maonerwo ataiitwa nevamwe

Chinosuwisa ndechekuti mamwe maonero atinozviita akabva kuna vanhu vaitibata huyanga, zvisina chiremera. Pamwe takaudzwa kuti tiri zvinyadzo kuvabereki vedu, kumaticha edu, kuna vatinoshandira kana kuti savanhu vari muwanano tiri zvinyadzo kuvadikanwi vedu nokuvana vedu.

6      Usatendera pfungwa dzakashata kuti dzikuparadze

Hongu tiri vanhu venyama tinotadza, asi hatifanire kubvumidza pfungwa dzokuzvidzikisira kutiparadza. Takakosha mumaziso aMwari.

7      Usazvienzanisa nevamwe

  • Hazvina kunaka kuzvienzanisa nevamwe chero zvodii hazvo.
  • Vabereki musazvienzanisa nevamwe vabereki.
  • Vanababa musazvienzanisa nevamwe anababa.
  • Madzimai musazvienzanisa namamwe madzimai.
  • Vechidiki musazvienzannisa nevamwe vechidiki.
  • Usazvienzanisa nomukoma kana munin’ina wako.

Uri munhu akazvimirira woga kwete fotokopi yemumwe. Hazvina kunaka kufunga kuti haubatsire chinhu. Mwari anotida sezvatiri kwete zvatinofunga kuti tinofanira kuva. Mwari anotida somusikiro waakatiita. Takasikwa nomufananidzo waMwari. Hatisi marara. Takakosha mumaziso aMwari.

8      Tivi vagari voHumambo

MuDama Rakanaka Jesu anoti, “Ndiri munaBaba, uye ndinemi.“ Hatisi nherera bodo. Hatisi toga panyika. Tiri vagari vohumambo hwedenga.

9      Tinofanira kuva zvapupu

 Takagamuchira nyasha. Mwari akatiratidza rudo rwake. Zvino anotidaidza kuti tive zvapupu zvaKristo pasi rose. Tinozvigona. Tinogona kuparidzira Kristo muhupenyu hwedu. Tiri vana vaMwari.

Ngano nenyambo

Posted by MC on May 14, 2023
Posted in: Ngano, Nyambo. Leave a comment

1      Mainini vakabikira babamunini datya

Maiguru vaigara nababamudiki, bofu. Zvino rimwe zuva maiguru ava vakabika hove. Pavaida kupakura vakaona kuti hove paizoshota yemunhu mumwe chete. Saka mumoyo mavo vakati rega ndibikire babamunini umwe muriwo. Sezvo vasingaoni, havazozivi kuti vamwe vadya nehove. Vari mushishi kuti vobikirei babamunini, vakaona dafi kwakuriuraya ndokubva vabikira babamunini vavo. Pakupakura mundiro dzevamwe, vakaisa hove asi mundiro yababamunini bofu vakaisa datya.

Babamunini pakudya vakaseva muto wedafi vachibva vakanda mukanwa ndokutsenga nokumedza. Zvinoita sokunge muto wedatya wakabva wanosvinudza maziso avo. Vakakwakuka nemufaro ndokudaidzira, ‘Maiguru ndavakuona.’  Zvikanzi, ‘Maoneiko,’ namaiguru. Babamunini ndokuti ‘Pandangodya muto uyu maziso angu avhurwa. Ndiri kutoona kuti vamwe vari kudya nehove ini ndine dafi. Ah! Maiguru maita basa marapa maziso angu.’

Vadikani paunoitirwa chakaipa ziva kuti chikomborerochaunenge uchipiwa naMwari. Maiguru vakaita chakaipa asi vakaropafadzisa babamunini. Kubanha dafi kuriyambutsa. Saka ndinoti kwamuri ivai nomufaro bedzi kana muchipinda mukuedzwa, muchiziva kuti miedzo iripo kuitira kuti mutsungirire panaShe wedu.

Dzidziso: Miedzo, utsinye, makomborero.

2      Tamuka anowedzera kukura kwepoto asingawedzere mvura

Tamuka aigara nambuya vake. Yakati yasvika nguva yokubika, iye ndokugadza poto yevanhu vaviri.   Isati yamboti yadii, ‘gogogoi,’ pakasvika vaenzi vaviri. Mbuya vakamuti achiisa poto yavanhu vana, akaita saizvozvo. Pasina nguva pakasvika vamwe vanhu vatatu. Mbuya vakarairazve, mwanasikana akagadza poto yavanhu vanomwe.

Hapano sadza raibva, chakashamisa ndechokuti raingokwana vanhu vaviri bedzi. Chii chakanga chaitika? Musikana aingochinja poto chete asi asingawedzeri mvura!

Zvino hoyo mubvunzo kwauri mutendi, nhasi uno. Hausi kungoshandura dzikereke navafundisi uchipedza nyika here asi usiri kuwedzera kunamata kwako? Haisi nyaya yekuchinja poto chete asi zviri mukati mepoto?

Shanduko ngaitangire mumoyo mako!

Dzidzo: kushandisa pfungwa, kushandura unhu, kusandura maitiro.

3      Hwindi nemwana vanotsvaga nzvimbo yechikoro

⁠⁠⁠Hwindi anoenda pachikoro nemwana wake, pachikoro chepadyo kunotsaga nzvimbo yenhanho yokutanga.  Mukuru wechikoro anoti ‘Ndine urombo pakazara.’ Mwana anobva azevezera achiti ‘Dhedhi, vaudzei kuti ndinodzidza ndiri pakadoma.’

4      Kundiso

⁠⁠⁠Shadhireki, Misheki naAbhedhinigo havana kunamata kuti moto usabatidzwe. Minamato yavo yaisava yokuti dambudziko  risauye asi yokuti moto ngaubatidzwe, Mwari vagoonekwa mukati mawo. Ini hangu handinamati kuti ndisasangana namatambudziko muupenyu asi ndinoti ‘Pakuuya kwamatambudziko Tenzi onekwai.’

Dhanyeri haana kuita munamato wokuti shumba dzife kana kuti asakandwe mugomba asi akati Tenzi nemugomba imomo mune shumba simba renyu ngarionekwe.

Vanhu vangakukanda mumakomba, vangakurongera zvakaipa asi tina Tenzi anozviratidza. Vakakukanda ivavo ndivo vachakuburitsa muzita raJesu.

Pauro naSirasi, vasungwa, vari mujeri; havana kuita minamato yokuti majeri aondomoke asi vakangorumbidza Mwari pamwechete nekuimba nziyo.

Hapana dambudziko rine simba rekukuchemedza. Kuti bara riende mberi tiriga inofanira kudhonzerwa shure. Nyange muupenyu hwako, kuti utore nhanho nhatu dzekuenda mberi zvinogona kutora nhanho imwehete yokudzokera shure. Kunyange dombo rerekeni kuti riende mberi rinotanga radhonzerwa kumashure.

Kubva nhasi ziva kuti chese chichakudhonzera kumashure chinenge chichitokupa simba rekuenda mberi. Hapana chichakuwisira pasi. Uchazanzisa zvinangwa zvako. Uchakunda muupenyu. Uri mukundi. Zvinouya ngazviuye asi Tenzi achakukundisa mazviri zvose muzita raJesu.

5      Jaya remubhucha nechidhakwa

Chidhakwa chakapinda mubhucha ndokuti tanga kutaura nejaya raivemo:

Chidhakwa: Huku imarii mfana?

Jaya: Tinoisa pachikero toona kuti imarii?

Chidhakwa: Ndiisire huku yose.

Jaya rakaenda seri kufiriji ndokuona inga kwasara huku imwechete yakazara. Akaitora ndokusvikoiisa pachikero:

Jaya: Yaita $6 mdhara.

Chidhakwa: Yaita diki, tsvaga zihombe pane dzese.

Jaya rakatora huku iya ndokudzokera nayo richinyepedzera kunge ririkunotora yakati kurei. Akadzoka nehuku imwecheteyo ndokuiisa pachikero:

Jaya: Zvaita Mdhara, huku iyi yaita $7,50.

Chidhakwa: Huku dzako idiki mfana. Zvisinei, chindipa dzose dziri mbiri

Chokwadi chichakusunungura!

Dzidziso: chokwadi, nhema, utsotsi, kuvimbika.

6      Ziva maitiro anodiwa pakafanira

Mwana akatengerwa bhutsu dzakakurisa. Akanochema kuna baba vacho kuti bhutsu ihombe, asi vakati, ‘Usazvinetsa, unoisa matishu kana kuti mapepa kumberi.’ Mwana akaita saizvozvo zvikashanda. Pava paya mwana akatengera mudhara

wake mapata-pata akakurisa zvikanzi nababa, ‘Hauone here kuti handikwane mapata-pata aya?’ mwana ndokuti, ‘Musazvinetsa baba, munoisa matishu kana kuti  mapepa kumberi.’

Dzimwe nguva pane nzira dzatinoshandisa tichibudirira, asi dzigotadza kushanda pane dzimwe nguva nezvimwe zviitiko.

Hadzizi shangu dzese dzinoiswa matishu kana mapepa. Ziva pokutsanya, pamwe panoda kuti uendese girosari kuna baba namai vako. Ziva pokunamata, kumwe kunetsana kunoda kuongorora matauriro aunoita, mapinduriro aunoita mumwe wako. Ziva maitiro okushandisa pakafanira.

Iva noungwaru hwokunzwisisa mhinduro inodiwa. Ziva chipanera chinomononora bhaudhi rauri kuda kwete kuti chipanera chebhasikoro ndicho chinokumura mabhaudhi epavhiri regonyeti!

7      ⁠⁠⁠Gore dzva

Hama dzangu ndinamatireiwo. Ndiri kuenda kunovhiyiwa ziso nachiremba. Dambudziko rangu rakatanga mushure megore dzva. Ndiri kuti ndikatarisa muchikwama changu hapana chandirikuona.

Dzidziso: kufashura mari, nhamo, gore dzva.

8      Musikana nemukomana wake

Shamwarisikana: Hausati wambonyemwerera kubva zvatatanga kudanana; sei?

Mukomana: Handiti ndiwe wakati uri kuda ‘serious relationship.’

Dzidziso: muchato, mufaro, kutsamwa.

9      Kadhinari Nyumeni

Mwari akandisikira chinangwa

Akandipa basa raasina kupa mumwe munhu.

Ndinechinangwa changu muupenyu.

Ndiri pakati pomubatanidzwa wavanhu.

Naizvozvo ndichavimba naMwari.

Kana ndiri muurwere, urwere hwangu huchaitira Mwari.

Kana ndiri parumananzombe, izvozvo zvichaitira Mwari.

Mwari haana kundisikira nhando.

Anoziva zvaakandisikira.

10  Chinangwa

Ukapa munhu uta nomuseve womuti ‘Shudha!’ anokanuka agovhiringika achibvunza kuti ‘Ndipfuure chii?’ anodaro nokuti kana pasina chokushudha hazvibatsire, hapana chikonzero chokukanda miseve, kungatova kutambisa miseve.

Asi kana ukati kumunhu uri kuona shiri iyo ndinoda kuti uinange, uipfuure, panenge patova nomusiyano. Watomupa charenji yokuti aratidze unyanzvi hwake, ava nechinomuonesa kugona kwake kana kukundikana kwake. Ava kuziva pokupedzera simba nenguva.

Chinangwa chakakosha muupenyu hwomunhu. Chinoshandura maonero edu. Iwe neni takapiwa upenyu naizvozvo mubvunzo wokutanga ndowekuti ndoitei noupenyu uhu chinangwa changu ndechipi?

11  Nhaka

Pokupedzisira chakakoshesesa muupenyu hazvisi zvatakatenga asi zvatakavaka; hazvisi zvatiinazvo asi zvatakagoverana;

hakusi kuburirira kwedu asi kukosha kwedu;

hazvisi zvatakadzidza asi zvatakadzidzisa;

hausi unyanzvi hwedu asi unhu hwedu;

hakusi kuti ucharangarirwa nguva yakadii asi kuti nani uye nechikonzero chei. Pafunge.

12  Kudzimurira

Unogona kutadza kudzimurira zviitiko zvose zvoupenyu, asi unogona kudzimurira maonero namagamuchiriro aunozviita.

13  Rusununguko

Iva zvauri utaure zvaunonzwa, nokuti vasina hanya havana basa, vane basa havana hanya nazvo

14  Uri mukundi

Kana uchinyunyuta kugona kwako

Rangarira kwawakabva.

Yeuka zvawakasangana nazvo.

Tondera hondo dzose dzawakakunda.

Funga kutya kose kwawakakurira.

Rangarira.

15  Rudo

Zviri nyore kuda vanhu vari kure kure.

Zvakaoma dzimwe nhambo kuda vari padyo nesu.

Zviri nyore kubatsira vari mhiri,

zvinogozha dzimwe nguva kuva nemuvakidzani anosurikirwa.

Ndiri kuti zviri nyore kuda vari chinhambwe,

Asi zvakaoma kuda vari mudhuze.

Kristu anonyatsotarisira here kuti ndide

Muvakidzani uya ane guhwa rinoshura mare,

Ndide fusa rinondifemba kubasa mazuva ose,

Ndide hwindi uya anogara akati kwindi,

Ndide uya weruzha,

Ndide foromani wedzungu nehasha,

Ndide nhunzwatunzwa dzemuvakidzani dzisina kurairwa …?

Dai vari kure kuChaina kana kuIndiya

Zvaiva nyore kubatsira nokuda.

Asi vadzoka voita vepadyo, pasuwo rangu.

Asi, ivava ndovatinonzi naKristu tide.

Tinofanira kutanga kuda vari padyo.

Mudhuze munofanira kutangira rudo rwedu.

Asika hazvifanire kugumira ipapo.

16  Mufaro

Vazhinji vanopesanisa purezha nomufaro,

Asi pane musiyano mukuru pakati pazvo.

Ukasaziva musiyano wacho,

Unenge usati watanga kurarama.

Vakaraidza mufaro wechokwadi vanonyumwa vakaona purezha,

Nokuti nguva zhinji purezha mucherechedzo worufu rwomufaro.

Mufaro kupinda murudo noupenyu.

Mufaro kubvira nomoto worudo navari kumucheto munzira youpenyu.

Mufaro musanganiswa wokuseka nemisodzi.

Mufaro kugoverana navamwe.

Mufaro kunakidzwa muzvinhu zvidiki tisingangomirira zvikuru.

Mufaro kushandisa zvizere mukana wazvino,

Uchitapirirwa nezviripo.

Mufaro rudo rurikututumira muupenyu.

Asi chinoshamisa ndechekuti mufaro unogarisana nemarwadzo.

Gaya!

17  Upenyu

Unofanira kuziva kuti upenyu haururami nguva dzose. Hatiwani zvatinoda nguva dzose. Nyange zvichirwadza, zvaifanira kuitika zvakaitika. Aifanira kutisiya akatisiya. Chinokurasira kure kazhinji chinokudzosa paunofanira kunge uri.

18  Budiriro

Kuti uende mberi unofanira kutanga.

19  Shanduko

Hazvinei kuti uri ani.

Hazvinei kuti wakabvepi.

Hazvinei kuti wakamboitei.

Unogona kuva nani kupinda zvauri.

20  Mhingidzo

Mhingidzo hadzifanire kukudzivisa.

Ukatarisana nemudhuri, usaramwa.

Tsvaga nzira nzokuenda napamusoro,

Kupinda napamudhuri,

Kana kutenderera.

21  Kutirira

Usashamisika kana uchisangana namatambudziko.

Kana mhepo ikavhuvhutira pamuti, midzi inotatamuka yosimba.

Iwewo usave ndonda inokurirwa nekamhepo kose kanovhuvhuta.

Simba pamweya utirire.

22  Rudo haruna kururama.

Rudo harusi ngano harusi nyore.

Rudo kukurira mhingidzo.

Rudo kutarisana namatambudziko.

Rudo kuita chirwirangwe.

Rudo kubatirira usingaregedzi.

Rudo kavara kapfupi kari nyore kuperetera,

Asi rudo kavara kakaoma kutsanangura.

Rudo kanhu kakaoma kurarama usina.

Rudo ibasa rinoshandirwa.

Rudo inguva

Kuita mushandira pamwe awa roga roga,

mineti yoga yoga, sekondi yoga yoga.

23  Mutungamiri wechokwadi

Mutungamiri wechokwadi,

Ane chitendeseko chokumira oga.

Ane chivindi chokuita zvisungo zvakaoma.

Ane ngoni dzokuteerera zvido zvavamwe.

Haaronge kuva mutungamiri

Asi anova mutungamiri kuburikidza nemhando yezviito zvake

Uye nechiremera chourongwa hwake.

24  Mutungamiri

Utungamiri,

Kuva nesimba kwete kuvirima

Kupfava kwete kuva mutera

Kuva nechivindi kwete kushusha

Kufunga vamwe kwete kuva nenungo

Kuzvidukupisa, kwete kuva mutyutyu

Kudada kwete kuzvida

Kuva netsetswa kwete kuita upenzi.

25  Nhetembo yezuva rokuzvarwa

Nhasi izuva rako rokuzvarwa

Naizvozvo zuva ranhasi

Ndinoda kuti uzive

Kuti uri munhu akakoshesa

Akabata nokukurudzira moyo yavakawanda

Kusanganisira ini.

Ndinoda kuti uzive zvekare

Kuti ndinokuyemura zvakadii.

Makorokoto ezuva rokuzvarwa.

26  Marwadzo

Ukasatana kugumbuka

Ukagodorwa netunhu tuduku

Ukaona kunge uri kunangwa nguva dzose

Uchawedzera marwadzo ako

Uchawedzera kutambura kwako.

27  Hasha

Kusimba kuziva utera

Kunaka kuziva kushata

Kusatya kuziva zvinotyisa

Kungwara kuziva kukoniwa

Kuda kuziva ruvengo

Kuseka kuziva kusuwa.

28  Zvaunotadza kuita

Handi zvaunoita,

Asi zvaunosiirira,

Zvinokutemesa musoro

Parinovira zuva.

Izwi nyoro raunokanganwa,

Tsamba yausina kunyora;

Chipo chausina kutumira,

Ndozvipoko zvinokushungurudza mauro.

Mabwe aungadai wasudurutsa

Munzira yomumwe;

Izwi rinovaka

Rawatadza kutaura nokushaya nguva.

Ndozvidhoma zvinokuonesa ndondo uvete.

Kupuruzira mumwe,

Kazwi kanyoro kakapfava;

Zvawashaira nguva kana kusafunga nezvazvo,

Nokuti wanga uine dzako nhamo.

Ndochikopo chinokudzokera urere.

29  Kurera mwana

Kana mwana akakudzwa nenyadziso

Anodzidza kusweeredza

Kana mwana akakudzwa neruvengo

Anodzidza kurwa

Kana mwana akakudzwa netsverudzo

Anodzidza kuzvipa mhosva.

Kana mwana akakudzwa nekurudziro

Anodzidza vavariro

Kana mwana akakudzwa nerumbidzo

Anodzidza kuvimba nezvaari

Kana mwana akakudzwa neruremekedzo

Anodzidza rukudzo

Kana mwana akakura netsigiro

Anodzidza chiremera

Kana mwana akakura nerusununguko

Anodzidza kuzvimirira

30  Zuva rokuzvarwa remushandi pamwe

Mashoko angu

Ndeemunhu wandinoziva kuti anoita basa nomazvo

Mazwi angu aya

ndeemunhu wandinoziva kuti anoshanda nesimba

Dama rangu iri

Ndere munhu wandinoziva kuti anounza mufaro pose paari

Mashoko angu aya

Ndeemunhu wandinoziva kuti anokodzera kunzi makorokoto ezuva rokuzvarwa.

Makorokoto ezuva rokuzvarwa.

31  Kumirira

Ukadzidza kumirira kwenguva ndefu

Uchaona mubairo womwoyo murefu

Uchayemura mubairo wokumirira

Kana nguva yokuturira

Nokuti pane chose chakakosha

Kumirira kwakakosha

32  Mufaro

Resipi yomufaro:

Iva norupfave

Zvidukupise

Iva namadanha

Nyemwerera

Iva norudo

Shanya pawakwanisa

Usamira kudzidza

Tenda nguva dzose

33  Zviudze kuti:

Zvose zvichaita

Zvinhu zvichanaka

Wakakosha

Uri ngoda

Unodikika

Ino ndiyo nguva

Asi nguva ichapfuura

Unogona kuva zvaunyatsori

Zviri nani zviri mberi

Wakasimba

unozvigona

34  Micherechedzo yorugare

Kunakidzwa noupenyu

Uchiziva kuti hunokupa mukana wokuda, kushanda nokutamba.

Kugutsikana nezvauinazvo

Asi usingadekare kusvika wazvishandisa nomazvo.

Kusazvidza zvose zvapasi

Kunze kwezvenhema nenhando.

Kusatya manga-manga

Kunze kwezvinotyisa.

Kutungamirirwa nezvaunoyemura nokuda

Kwete zvaunozvonda.

Kusachiva zvemuvakidzani

Kunze kwerupfave rwake nounyoro hwake.

Kusazvidyamwoyo nezvevavengi vako

Asi kutondera shamwari dzako.

Iyi ndiyo micherechedzo

Yokuti uri mugwara

Munzira yorugare.

35  Nhaka

Tose tinofa.

Chinangwa hachisi chokurarama narini,

Asi kusiya nhaka inorarama nokusingaperi.

36  Kushanda nesimba

Kutsvaka budiriro

Usingashande nesimba

Kwakafanana nekuzama kukohwa

usina kudyara.

37  Kuzvipira

Zvicharwadza

Zvichatora nguva

Zvichada kuzviturira

Zvichada kuzvipira

Pachaita miedzo

Asi paunosvika pachinangwa

Uchaona kuti zvanga zvakakodzera.

38  Uri zvakakukomberedza

Uri mubhuku aunoverenga

Uri mafirimu aunoona

Uri mimanzi yaunoteerera

Uri vanhu vaunoshamwaridzana navo

Uri zviroto zvaunorota

Uri hurukuro dzaunokurukura

Uri zviitiko zvakakukomberedza

Uri nyika yakakukomberedza

Zvikomberedze noruzivo

Zvikomberedze nezvinopa upenyu

Zvikomberedze nezvinopa chitarisiro

Zvikomberedze nounaku

39  Upfumi

Upfumi hukuru utano

40  Mufaro

Muraro ibasa romauri

41  Simba

Simba harina kunaka kana mwene waro asina unaku.

Zita rakanaka rinopinda upfumi.

Hapana bakatwa ringarivhiya.

Hapana bote ringarisungirira.

42  Kurongeka

Tanga warongeka, pasaita manyongori.

Kurongeka hakusi kushaya chinongo.

Kurongeka kuita zvinhu nomazvo

Kurongeka kunodzora kubandika nokupararira.

Kurongeka kunosevha nguva nemari

Kurongeka kunonatsurudza mhando youpenyu.

43  Nguva yepamhepo

Mumwe munhu anditumira nguva yepamhepo ‘airtime’ ye $1 ndokubva awana basa raanga achitsvaga kwemakore mashanu. Mumwewo anditumira nguva yepamhepo ye$2 akaporomotwa kubasa. Mumwe zvekare anditumira ye$10 akawana vhiza rokuenda kuAmerika. Zvishamiso zvichiri kutoitika kutaura kuno. Edza rombo rako. Tenga nguva yapamhepo.

44  Kufungira vamwe

Kiti yakanga yakatendeka zvokuti mudzimai uyu aigona kuisiira mwana wake igosara ichimubata zvakanaka. Nguva yose paaidzoka aiwana mwana akadzipfodora, achiridza ngonono kiti yakamutarira norupfave.

Rimwe zuva pakaita chiitiko chinosiririra. Mudzimai uya akasiya mwana wake mumaoko mekiti yakatendeka samazuva ose ndokuenda kumagirosa. Paakadzoka akaona zvinotyisa, zvakanga zvisingatarisiki. Jasi remwana rakanga riri koko; manapukeni ake nehanzu dzake zvakanga zvabvarurwa bvarurwa zvichijuja ropa. Panositandarira mwana pakanga pazere ropa. Mudzimai akavhunduka ndokutanga kutsvaga mwana ari pakati pokuyuwira.

            Ari pakati pokutsvaga kiti yakanyuka kubva pasi pomubhedha. Yakanga izere ropa ichinanzvira nanzvira sokunge yakanga ichangopedza kudya machikichori. Mudzimai akaviruka nehasha nokuti mupfungwa dzake mwana akanga atodyiwa nekiti. Akatora danda ndokuponda kiti kusvika yafa. Akaenderera mberi nokutsvaga mwana. Akashamiswa nezvaakaona. Mwana akanga aripo pasi pomupedha, asi parutivi pake paiva nezinyoka rakati rabada, rakanga rabvarurwa-bvarurwa. Akabva aziva kuti paita hondo inotyisa pakati penyoka nekiti kusvika nyoka yakurirwa, mwana akaponeswa. Asi nguva yakanga yamutiza. Nokuda kwehasha, nokuda kwekushaya mwoyo murefu akangaauraya kiti yakatendeka.

Chidzidzo: Kangani katinokurumbidza kupa vamwe mhosva tovabvarura bvarura namashoko edu anogodora nezviito zvedu tisingatore nguva yokunyatsoongorora zvaitika? Urwu ndorutadzo rwokufungira. Kufungira zvinhu tisingatoredambudziko rokutsvaga chokwadi chezvaitika. Kushaya mwoyo murefu kunotikonzera kuita mamisteki akawanda muupenyu. Ndiani waungangodaro uri kupa mhosva yaasina nhasi uno? Usafungira vamwe zvisizvo. Hazvina kunaka kutongera vamwe. Tora nguva uchitsvaga chokwadi.

45  Macharenji

Muupenyu hwako ukaona uchiita chinhu usingatarisane nemacharenji funga kaviri.

Munhandare yebhora ane bhora ndiye anomakwa, hakuna sabhu inomakwa iri pabhenji.

Muti une mango ndiwo unokandwa matombo navana. Muupenyu ukaona vanhu vakuita godo nekutaura taura chibva watoziva kuti wabata panorwadza,

Vamwe vanogodoka nemuchato wako, mari yako kana budiriro yemumhuri menyu. Vanofara vachikuona uchichera mbeva ende vanoita kutokunongedzera panetumwena twembeva twese asi kana upenyu husvinu-svinu husina matambudziko hunongova mutserendende chete.

Kana uchida mari itaka sitiresi yemari kuti mari ndoiwanepi, ungagoda upenyu husina sitiresi chete sei iwe uchiida mari.

Chiri kuita kuti uite sitiresi yemurume kana mukadzi wako inhau yekuti unomuda dai usingamude usina sitiresi.

Ukaona parikukuitisa sitiresi ipapo ndipo pane goridhe.

Iti ‘’Mwari handikusiyei kusvika mandiropafadza.’

Rarama uchiziva kuti mitoro yedu yese tinoiisa kuna Mwari.

Kunamata hazvireve kuti hauchapindi mumatambu dziko asi zvinoreva kuti simba rekukunda matambudziko wava naro.

46  Ziva Chekurasa Urarame!

Pakaita masaisai Jona achienda kuNinivha, varidzi vebhoti vakatanga kurasa zvinhu zvavo kuti bhoti ireruke asi masaisai haana kumira. Kurasa kwokuburutsa Jona vakarasa zvinhu. 

Vamwe tanzwa nekurasirira huku, mbudzi, mbiya, machira, mazai chero mombe nekuti takaudzwa kunzi ndiko kuti munyama upere. Warasa hako asi warasa zvinhu zvisizvo. Unofanira kurasa uipi wogamuchira Jesu somununuri wako.

Danga rinopera iri, huku yechibhoi dzinopera. Bikai tidye, regai kurasa. Machira sonesai hembe tipfeke. Mazai furayai tiise pachingwa.

Nyaya yako haidi zvese izvi asi inoda Jesu. Kandai Jona mumvura kwete zvimwe zvese izvo. Rasai hutsvina sisi kanabhudhi muroorwe kana kuroora. Rasai hunyope mukoma mubudirire. Rasai rusaruro amai kana baba mhuri ibatane. Rasai kunamata maporofita enhema Afurika ubudirire nokupona. Kurambana haisi anza, asi rasai kudhererana motanga kuremekedzana somurume nomukadzi. Tendeuka pane mabasa erima munyama wako upere kwete kupedza pfuma yawakawana watambura.

47  Chihera ka one.

Hanzi aChihera vakaroorwa mushe-mushe. Saka paiitwa majuti ekuenda kuchigayo nengoro. Munhu anejuti aibva angotora chibage chemusha wose opedza hafu yezuva ari kutaundi. Saka achihera pakanga vakamirira chibage chichigaiwa, vakatora ngoro yaatezvara ndokuenda nayo panemurume anoita zvekupenda zvikanzi, ‘Mukuwasha ndinokumbirawo mundipendere ngoro yangu. Murume uye akati, ‘Ndinonyora kuti chii?’ Zvikanzi naChihera, ‘Nyorai kuti Chihera “special”.’

Atezvara vakapererwa vachiona ngoro yaakuuya yakanyorwa. Usadherere Chihera!

48  Mariko 10:48

Matatya mashanu akawira mugomba. Ari pakati pokunetseka kubuda mugomba mwe matatya akawanda akasvikokomberedza gomba.Matatya aya akatanga kudaidzira achiti,’Gomba iri ranyanyodzika, hapabudiki apa. Musatomboedza zvenyu. Garai imomo. Musatambise nguva. Matofiramo imi.’

4 of the frogs stopped trying but one little frog tried harder and harder and to everyone’s amazement it jumped out. When this little frog was out it said to the frogs which were outside the pit “thank you for encouraging me”.

Matatya mana akaora mwoyo. Haanakuramba achiedza nesimba kubuda mugomba. Asichakashamisa matatya aive kunze ndechekuti rimwechete rakajamba rikabuda. Rabuda rakanyora pasi richiti kumatatya aive panze, ‘Ndinotendanekurudziro yenyu.’ Vaya vakazotarisa ndokuona kuti datya iri imatsi, harinzwi. Harina kunzwa zvavaisheedzera. Mamwe akafira mugomba iro rakapona.

Bhatimeyo akavhara nzeve dzake kune zvaitaurwa navanhu. Dzimwe nguvamuupenyu unofanira kuvhara nzeve kumashoko akaipa anotaurwa navanhu.

Zvaiva nyore kuvanhu kuti vakanyudze Bhatimeyo nokuti vaisaziva zvazvinoreva kuva bofu. Vaisaziva zvazvinoreva kurarama parutivi pomugwagwa. Dzimwe nguva havasi vose vanonzwisisa dambudziko rako.

Bhatimeyo nedatya varikutidzidzisa kuti usatendera vanhu vasinganzwisisa matambudziko ako kukukanyudza. Iwe ndiwe unoziva zvawakatarisana nazvo, macharenji aurikusangana nawo. Ndiwe unozivadambudziko rako.

Usakanyudzwa nevane babereki vose vari vaviri nokuti dzimwe nguva havanzwisisi chinonzi kuva nherera.

Usakanyudzwa nevachine mudikanwi wavo nokuti dzimwe nguva havanzwisisi chinonzi kuva shirikadzi kana kurambwa kana kurambana.

Usakanyudzwa nevazinganzwisisi chinonzi kuva mvana.

Usakanyudzwa nevane madzimai kana varume vakatendeka nekuti dzimwe nguva havanzwisisi chinonzi kuchitwa.

            Usakanyudzwa navasina vane vana nokuti dzimwe nguva havanzwisisi chinonzi kushaya mbereko.

Usakanyudzwa navase vana vanoteerera nokuti dzimwe nguva havanzwisisi chinonzi kurera nhunzvatunzva.

Usakanyudzwa. Iwe ndiwe uri mudambudziko iri. Iwe ndiwe unonzwisisa dambudziko iri. Daidzira kuna Jesu kusvika akudzwa akudaidza.

49  Sarudzo

Ndinosarudza,

Kusarudza zvandinoda muupenyu pane kurarama nje;

Kushandura zvinoshandurika pane kugarodemba;

Kuva nechido nezvandinoita kwete kundenderedzwa;

Kuzvikoshesa kwete kushandiswa;

Kuva neshungu yokubudirira kwete kuita mukundo;

Kuvimba nezvandiri, kwete kuzvisvora;

Kuteerera izwi romukati, kwete mazwi ose ose.

50  Kudzimurira

Kurira zvaunokwanisa

Usashaiswa hope nezvausingakwanise kukurira

Nokuti pakupera kwezuva haukwanise kuzvikurira.

51  Zvide

Mira kuzvivenga nokuda kwezvausiri

Zvide nokuda kwezvauri

52  ⁠⁠Kutsanya

Zvamavakuvamba Mwaka unoera dai mawana chirevo chizere choMwaka woKutsanya, kuburikidza nokusiya zvakaipa zveshure muchivavarira ramangwana rizere nechitarisiro.

Kutsanya kune mutsauko:

Kazhinji kutsanya kunechekuita nokurega chokudya kana zvinhu zvakaita sechivhitivhiti. Asi pane dzimwe nzira dzakachenjera dzokugamuchira nadzo Kristu. Hedzino dzimwe nzira dzacho dzamunogona kutevedzera:

  1. Tsanya hasha noruvengo. Ipa mhuri yako rudo rwakapetwa zuva roga roga.
  2. Tsanya kutongera vamwe. Usati wapa vamwe mhosva rangarira kuregererwa kwatinogaroitwa naJesu.
  3. Tsanya kuora mwoyo. Batirira pavimbiso yaJesu yokuti ane urongwa hwakajeka noupenyu hwako.
  4. Tsanya kunyunyuta. Ukaona woda kunyunyuta tsinzinya urangarira nguva dzomufaro dzawakapiwa naJesu.
  5. Tsanya godo nouturu. Edza kuregerera vose vakakutadzira.
  6. Tsanya kupfachura mari. Edza kutapudza mari yaunoshandisa kakapetwa kakumi wopa yaunenge wangengeta kuvarombo.

Ndinokushuvirai rugare, rudo nomufaro munguva ino yoMwaka woKutsanya.

53  Kuenderera noupenyu

Vanhu vanoshanduka

Kutadza kunowanikwa

Kukanganisa kuri muvanhu

Asi upenyu hunoenderera mberi.

54  Tarira mberi

Zviri nani kusiyana nezvimwe

Zviri nani kuvamba zvitsva

Pane kuzviisa mujeri rezvakapfuura

Kuzvisungirira nezvisachasanduka

55  Zuva rokuzvarwa

Makajeka papfunga

Makarongeka pamafungiro

Munotaura zvakati twasa.

Handingati upenyu hwenyu hwaive huzere pfumvu

Nyange nedzenyu mhingidzo

Upenyu hwenyu makaedza sokugona kwenyu

Makava nenguva youtano nomufaro.

Dai marambopiwa simba noutano.

Pachivanhu vanoti masvika pamudya ndigere

Ndinoti masvika pakudya muchishanda!

Muchishandira Mwari wenyu.

Itai kuti makore ari mberi ave mufaro woga.

Makorokoto ezuva rokuzvarwa!

56  Zuva rokuzvarwa

Hazvinei kuti upenyu hwakatikanda kunzvimbo dzakasiyana

Hazvinei kuti pava namakore tisati taonana

Ndangariro dzoushamwari hwedu dzakadzika

Ndangariro idzi dzakanyorwa mukati kati memwoyo wangu

Wakakosha kwandiri

Makorokoto ezuva rokuzvarwa

57  Zuva rokuzvarwa

Ndanga ndichisekerera

Kusekerera nokuda kwendangariro

Ndangaariro dzenyemwerero

Nyemwerero yako

Yako tichikura kumaraini

KUmaraini kare

Kare tirati tapesaniswa

Asi zvakadaro handiregi kuti

Makorokoto ezuva rokuzvarwa sahwira mukuru

58  Zuva rokuzvarwa

Hanzvadzi ndinokufarira zvisingabviri

Ndiri kungoda kuti uzive

Kuti unoreva zvakadzama kwandiri

Uyo anomwoyo wakafanana nowako chete

Ndiye anoumba ushamwari,asina humbimbindoga

Panogona kuva pasina zvizhinji zvatakagoverana

Panogona kuva pasina nguva zhinji yatakava tose

Asi kuvapo kwako muupenyu hwangu

Kunoita kuti ndizive zvakadzama

Zvokuti rudo, hanya hazvina kure, hazvina muganhu

Nyange tiri kure nakure, nyange paine gungwa pakaati pedu

Ndinofara kuva newe muupenyu hwangu

Ndinofara kuva nehanzvadzi yakaita sewe

Makorokoto ezuva rokuzvarwa

59  Kutendeuka

Kusendeka kana kupaka bhasikoro mugaraji hakufe kwariita motokari. Kugara muofisi yabhosi wako asipo hakukuite bhosi. Hazvinei kuti wapaka motokari yako panyandare yendege nguva yakareba sei, hazviishandure kuva ndege. Ndozvimwechete nokuenda kuchechi kwamakore akawanda. Izvozvo hazvife zvakakuita Mukristu. Chinokuita muKrisu kugamuchira Kristu wacho nokushandura unhu hwakaipa hwakare. Usangova munhu anoenda kuchechi asi iva muKristu akatendeuka zvamazvirokwazvo.1 Jowani 2v 15-17

60  Une basa

Hapana kasango kasina basa. Dzimwe nguva ukatenderera pedyo neguta unoona kamwe kasango kaunofunga kuti ungarimira chibage chako uchiti hakana basa. Ngatiti unobva wobva waenda kunoona vekanzuru. Uchingosvika kukanzuru uchivaudza nyaya yekanzvimbo kaya kasina basa kawaida kurimira chibage chako. Unoona votora bepa mushure mechinguva, unonzwa votaura kuti kanzvimbo ikako kauri kutaura pane urongwa hwokuvaka chikoro. Vanhu vakakutarisa vanoona kunge urikasango kasina basa, asi kanzuru yekudenga ine mapepa akakwana anotaridza kuti denga rine urongwa hwakanaka newe. Rega vanomhanya mhanya vachifunga kuti vanogona kuita madiro newe vambomhanya asi pauri pane basa guru. Uri munhu mukuru iwe.

Hurungudo dzakanhongwa naDhavhiti zvimwe mumwe musi dzakatombopotsa njiva. Denga richingoti usazvinetsa urongwa hwedu huri kuti muchauraya hofori. Zvimwe Dhavhiti akamborwadziwa nekusara vamwe vachienda kuhondo; semasariro awakaita vamwe vachiita zvinhu; semasariro akaita nzvimbo yauri kupoterera, isina kuvakwa. Ndiani aimboziva kuti Rute, chirikadzi ingaroorwa naBhowazi. Ndiani aimboziva kuti vemapere mbudzi vangaita maungira vakananga kumisasa yevaSiriya. Ndiani aimbotenda kuti mbuya Sara vangaita mwana. Iwe unazvo zvakanaka zviri muurongwa hwaMwari. Urikasango kane basa iwe.

61  Musatisetsa takafa kudai!

‘Mbavha iyooo! Mbavhaaaa!!!!’ Mbavha inotizira mumochari yopinda musherefu yayowo sechitunha. Mapurisa anopinda achitsvaga mbavha achitarisa mafesi evafi. Vanoona musikana akanaka voti, ‘Umm dai waiva mupenyu ndaipinda machena.’ Mbavha inobatwa nesetswa yoti, ‘Ofisa musatisetse takafa kudai, mapurisa akabuda riribara mbavha kumashure ichidaidzira, mira ndikupe nhamba dzepamba yake yekudenga kwaave!’

62  Rimwe rangu rimwe rako (rufu)

Vakomana vaviri vakaba mabhegi maviri emaorenji pamba pemuvakidzani ndokuenda kunogovana nepakati.

Mumwe wavo akapa zano rokuti vaende kumakuva epadyo. Pavainguno svetukira seri kweghedhi kuti vapinde mumarinda, maorenji maviri akadonha kubva mubhegi asi havana kuita hanya dzokumira kuti vanhonge sezvo vaive neakavakwanira mubhegi.

Mushure mechinguvana, chidhakwa chaipfuura nepamakuva chichibva kubhawa chakanzwa mazwi avanhu vaviri achiti, ‘Bodzi kwandiri bodzi kwauri. Bodzi kwandiri bodzi kwauri.’

Akaita sobha ndokumhanyira pachechi yaiva padyo namakuva akanoti kumupriste, ‘Baba uyai muone shura. Satani naMwari vari kugoverana zvitunha kumakuva!’

Vakateedzana vonanga kumakuva. Vava pagedhi mazwi aya akaenderera: ‘Bodzi kwandiri bodzi kwauri. Bodzi rangu bodzi kwauri!’ Pakarepo mwazwi aya akati ziro ndokuzoti: ‘Ko ari pageghi?’ Pakamhanyiwa zvisina mukare akamboona navarume vaiva pagedhi.

63  Gondo harirwiri nenyoka pasi

Gondo harirwi nenyoka pasi. Rinosimudza nyoka roenda nayo mudenga richichinja pokurwira. Mudenga nyoka inovhiringika, haina simba. Haibatsire chinhu, inorukutika, inodherereka zvisingaitike kana ichinge iri pasi. Kana iri pasi inenge iine simba nouchenjeri uye inotyisa.

Endesa hondo yako munhandare yomweya. Ukadaro Mwari anobva aita yondo iyi hondo yake. Usarwe nomuvengi panzvimbo yaajaira. Shandura pokurwira sezvinoita gondo woita kuti Mwari ave uto rako. Ukadaro unechokwadi chokukunda.

64  Binzi dzinosarurwa ndidzo dzinoberekana

Usati wabika bhinzi unotanga wadzisarudza. Bhinzi dzose dzinenge dzakuora kana kushata kazhinji unodzirasira seri kwemba. Bhinzi dzose dzakanaka unodzibika wodya uchifara zvopera zvakadaro. Asi kana kwanaya, bhinzi dziya dzanga dzichinzi dzakaora nokushata dzakarasirwa seri kwemba ndodzinomera dzichikura nokuita mazhizha namaruva. Nenguva isipi dzinobereka dzimwe bhinzi dzakawanda dzinounza maguta.

Munhu mumwechete iyeye akambodzitongera nokudzirasa ndiye anomhanya kunotanha mazhizha nebhinzi kuitira kudya kwakanaka. Unogona kutongerwa nokushorwa nokuraswa asi vanhu vamwechete vanokushora vachatendeukira kwauri vachida rubatsiro. Nguva yako ichasvika, Mwari vachakukudza. Uchaita zvinhu zvikuru.

65  Wadhi wadhi

Ndarwara ndiri kuno kuchipatara. Manesi anga aronga kuti ndipihwe mubhedha saka ndazovati mubhedha ndinawo ndipei zvenyu wadhiropu. Saka zvinenge zvaita. Ndiri kunzwa vachingotaura kuti wadhi, wadhi kudii woye. Ndinofunga kuti iwadhiropu yavari kutaura nezvayo. Mozonditumirawo ngoro yokuitakurisa.

66  Tekinoroji

Nekuuya kwakaita tekinoroji zvinhu zvichachinja. Manje manje panenge pasisina chikonzero chokuungana munhu achiroorwa. Vanhu vanongogadzira boka/grupu paapu ‘Kuroorwa kwachipo.’ Adhimini Tezvara nemunyai. Panenge pachingorohwa maEcocash emutengapamwe. Matekenyandebvu $100, mukasha ari kunyora (typing) …‘Yawandisa ndine $10.’ Tezvara vari kunyora … kkkkkk ita siriyasi. Ambuya varamwa, ‘Ambuya left.’

67  ⁠⁠⁠Dzimba dzakaoma

Dzimba dzakaoma veduwee. Ndakazviwanira zvangu bhebhi rangu raive rakatsiga ndikati regai ndiroore. Takabva taita kamwana kedu. Sezvo mari yainetsa mukadzi akati otsvaga basa tibatsirane. Pasina nguva ndakanzwa mukadzi oti awana basa pane imwe resitorendi. Zvakadaro takabva tatama kubva pamba yevabereki tave kunoroja kweduwo sezvo mari yakanga yave kubatana. Dambudziko rakazouya pandakati regai ndirovere chipikiri chekuisa furemu remufananidzo. Aaa ndakatambura nekuti madziro ainge akaoma iwayo . Ndipo pandakaona kuti dzimba dzakaoma. Muchinyanya kuda nyaya kutovhura nzeve. Tsvatu nhasi handina nyaya ini.

68  Svetuka

Tora dadya woisa mupoto izere mvura wogadzika pamoto. Mvura painenge ichiwedzera kuppisa, dadya rinotangawo kudziirwa. Asi rinovarairwa kusvika mvura yava kubhoira. Parinozoda kuti risvetukire panze zvinenge zvisisachaita. Rinenge risisina simba. Datya rinosvika pakufa. Chii chauraya datya. Pafunge! Vazhinji vedu tingati chauraya datya imvura iri kubhoira. Asi chokwadi ndechekuti datya rakavarairwa nemvura yaidziya. Pane vanhu vanounza madziya akasiyana-siyana nezvinhu zivnounza madziya. Asi tinofanira kuchengera kuziva pokusvetuka tichifambira mberi tisati tatsva. Pane dzimwe nguva dzatinofanira kuita zvinofanira kuitwa, tikabvumira vanhu kuti shandisa panyama, pamweya, paupfumi nepapfungwa tinogona kusvika pakutadza kuzvisunungura. Unofanira kuziva pokusvetuka. Svetuka pachine nguva. 

69  Kutengeserwa zveginya

Ndakatenga hangu furitizi kune kamwe kamupfana kaitengesa mafuriziti ari mubhegi repurasitiki pamusika weMbare.  Zvino ndaive ne$2 yakabatana, kakati ‘Mudhara madii kungotora ese nokuti kwasa 20.’ Ndikati mayazi ndirikuda.’ Kakati hoo, ‘Chindibatirawo mafuriziti angu aya ndimhanye kuno tsvaga makoini.’ Ndikati ‘Pakanaka.’ Kakabva katsakatika nemumabhazi hakana kuzodzoka.  Ndikaona kuti inga ndatotengeserwa mafuriziti 20 zveginya.

70  ⁠⁠⁠Dhongi reJerusarem

Madhongi maviri aifamba muJerusarema rimwe parakati kune rimwe racho, ‘Nezuro chaiye ndakanga ndakatakura Jesu vanhu vachiimba vachidaidzira vachindikandira micheka yokutsika pakufamba, asi nhasi hapana kana andiziva.’ Rimwe rakapindura richiti, ‘Ndozvazviri shamwari, pasina Jesu hapana zvatiri.’

⁠⁠⁠BE A POT THAT COOK FOR A TEAM

71  Nhimbe

Ndoga ndinotaura asi pamwechete tinokurukura

Ndoga ndinofara asi pamwechete tinopemberera

Ndoga ndinonyemwerera asi pamwechete tinoseka

Matarenda anokunda mitambo asi nhimbe inpoa ushaha

Uhu ndounaku hwoukama

Ungaedza zvose tisina vanhu asi

Unogona kuva mudzidzisi kana paine vadzidzi

Unogona kuva mutungamiri kana paine vatungamirwi

Unogona kuva mutengesi kana paine vatengi

Yemura vanhu vakakukomberedza uchengetedze shamwari dzakanaka

Usabata vanhu sevasina kukosha nyange vachiita sevasina simba

Mwari chete ndiye anomira oga, isu tinomira navamwe

72  Usatarisira munhu pasi

Reza inocheka asi haicheki muti

Demo rakapinda asi harigeri ndebvu

Munhu nemunhu ane zvaakakoshera maererano nemuzvarirwo wake

Usatarisira munhu pasi kusatoti uchitarisa shangu dzake

Ngano dzerufu

Posted by MC on May 11, 2023
Posted in: rufu. Leave a comment

1      Kuchema

Kamwe kasikana kakatumwa kuchitoro kakanzi namai vako udzoke kumba nekukurumbidza. Kakaenda kakachona mai vako vakashungurudzika.

‘Wanga uri kupi?’ vakapupa amai.

‘Ndine urombo mhamha. Ndinoziva ndanonoka asi shamwari yangu yapwanya chidhori chayo saka ndamira kuti ndimubatsire.’

‘Waizomubatsira sei?’ vakabvunzurudza amai.

‘Hapana zvandaigona kumubatsira nazvo asi ndagara naye ndikamubatsira kuchema.’

2      Zvozodii?

Mumwe pfupfana wechidiki aidzidza akauya kunaMusande Firipi Neri akamuudza kuti aida kudzidza Mutemo. Akati, ‘Ndiri kufara zvikuru ndavakuzova munhu akadzidza.’

‘Zvozodii?’ Firipi Neri akabvunza.

‘Ndozova gweta nokuva nemukurumbira.’

‘Zvozodii?’

‘Ndozova nemari yakawanda ndovaka zimba ziguru-guru.’

‘Zvozodii?’

‘Ndoroora nekurarama upenyu hwakanaka hurefu.’

‘Zvozodii Franzisi?’

Franzisi akafunga ndokuzoti, ‘Ndozofa savamwe vose.’

‘Zvozodii?’

Franzisi akavhiringika ndokuzoti, ‘Ndozomirira kutongwa kwangu.’ Haana kuzogona kupindura futi. Izvi zvakaita kuti ashandure urongwa hwake. Tose tinofa.

3      Gadzira ramangwana

Pane vamwe mai vekudhiyasipora vaida kuita mabasa etsitsi. Rimwe gore vakaona kutambura kwaiita hama yavo. Vakamushevedza vakamukumbira kuti avavakire imba. Vakati, ‘Ndinoda kuti uvake imba svinu inoyevedza. Ishandise zvinhu zvemhando yepamusoro chete, uye ushandise vanhu vanonyatsogona kuvaka. Usatya hako maererano nemutengo.’ Mai vaya vakabva vadzokera kuEngland ndokutanga kutumira mari yekuti basa riitwe.

Hama yakasara yakaona mukana. Akatenga zvinhu zvekushandisa zvakachipa ndokushandisa vanhu vasina ruzivo kuvaka nekupenda kuitira kuti adye imwe mari. VekuEngland pavakadzoka vakamuunzira makii emba vakati, ‘Chinangwa changu chaiva chokukuvakira imba. Tora makii aya imba ndeyako.’ Uya paakanzwa izvi akaita seachazviuraya nokuti akanga avaka kamba kasina maturo. Akati dai ndakaziva ndakavaka imba yakanaka yokuti ndigare ini nemhuri yangu.

Mwari vanotipa zvipo zvakawanda kuti tizvigadzirire ramangwana. Dzimba dzatichanogara kudenga dzinoenderana namashandiro atakaita. Manyumbu apedza pake, isu tiri kuvaka dzimba dzakaita sei?

4      Dama Rako

Dama Rakanaka raMateo, Mariko, Ruka naJowani anoverengwa navakati kuti.

Asi dama rinoverengwa navazhinji vachitaura nezvaro, idama rinonyorwa newe.

Unonyora dama zuva roga-roga, unonyora chitsauko zuva roga-roga

Kuburikidza nezvinhu zvaunoita uye namazwi aunotaura.

Vanhu vanoverenga zvaunonyora, zvingava zvokunyepa kana zvechokwadi.

Dama raunonyora rakaita sei? Vanhu vanoverenga rudo rwako nechokwadi chako here muupenyu hwako? Kana kuti vanhu vanoverenga utsinye?

Upenyu hwako hunotaura uipi here kana kuti chokwadi?

Dama raunonyora idama rakaita sei?

5      Mwari anogonesa

NdiMwari anokugonesai kunyemwerera zvisinei nemisodzi yenyu;

Anokugonesai kuenderera mberi pamunenge mava kuora mwoyo;

Anokugonesai kunamata pamunenge mopererwa namazwi;

Anokugonesai kuda nyange mwoyo yenyu yarwadziswa;

Anokugonesai kudekara chero moda kukanda maoko mudenga nokushungurudzika;

Anokugonesai kunzwisisa nyange zvinhu zvichishaya chirevo;

Anokugonesai kuteerera pamunenge muchinzwa zviri nani kusanzwa;

Zvose zvinoita nokuti Mwari anokugonesai. Vimbai naye.

Tichararama nokusingaperi

Posted by MC on May 11, 2023
Posted in: rufu. Leave a comment

Mushure mekunge, Martin Luther King Jr, uyo airwira kodzero dzavanhu vatema muAmerika, auraiwa musi wa4 April mugore ra1968 mutumbi wake wakaiswa paruzhinji kuti vamupe ruremekedzo. Zviuru zvavanhu zvakaungana zvikauya zvichimupa ruremekedzo rwegamba.
Vamwe mbuya vakauya netuzukuru twavo twuviri. Vakabata maoko avo ndokuti zii kwekanguva vakatarisa chitunha. Vakaenda pane muzukuru wokutanga ndokuzevezera munzeve, muzukuru ndokutanga kuridza mhere. Vakaenda pane muzukuru wechipiri ndokuzevezera munzeve mwana ndokuridza mhere.

Vanhu vakanga vakatarisa zvose izvi zvichiitika. Vakamhanyira kuna mbuya vaya zvikanzi tiudzei kuti matii chachemedza vana. Mbuya vaya ndokuti handina zvakawanda zvandavaudza ndangoti “Muzukuru, nyatsocherechedza murume arere apa uyu. Murume uyu akakufira.”

Nhasi tiri kuyeuka shamwari yedu yakatisiya. Pandangariro dzedu tinofanira kucherechedza Jesu nokuti iye wakatifira tose. Iye akakufira iwe, iye akandifira ini, iye akafira hama yedu iyi. Akatifira kuti tiwane upenyu. Naizvozvo ungano ino haisi yekushaya chitarisiro, asi kuti izere nechitarisiro nokuziva kuti takafirwa.
1 DAMA RAKANAKA: UYAI KWANDIRI
Inga Dama Rakanaka ranhasi rataura wani rikati “Uyai kwandiri imi mose makaremerwa ndigokuzirodzai.” Nhasi tiri kunzi sarendai misodzi yenyu kwandiri, sarendai marwadzo enyu kwandiri. Uyai kwandiri ndikuzorodzei. Hama yedu iyi takairadzika. Takaviga nyama yake asi tinoziva kuti nemashoko aJesu hama yedu iri kuwaniswa upenyu utsva.

2 CHIDZIDZO CHEKUTANGA: MABIKO
Upenyu utsva uhwu hwakaita sei? Chidzidzo chekutanga chemuporofita Izaya chiri kuti “Mwari ana masimba ose achaita mabiko avanhu vose, mabiko ane zvokudya zvakawanda.” Zvakare Mwari achaparadza rufu zvachose. Achapukuta misodzi pamatama edu. Vimbiso iyi yakatozadziswa naKristo akatiratidza nzira yorufu; kuti ukafa wakabatana naye unomuka wowana upenyu husingaperi.
3 CHIDZIDZO CHECHIPIRI: CHITARISIRO
Chidzidzo chechipiri chizere nechitarisiro. Hanzi chitarisiro hachitinyengedze nekuti rudo rwaMwari rwakadururirwa rwose mumwoyo yedu naMweya watakapihwa. Takanga tisina chitarisiro patakafirwa naKristo. Chinoratidza kuti Kristo anotida ndechekuti akatifira pachipiyaniso. Kungatova kusaziva kuchema vafi vedu. Tinofanira kuvasarenda mumaoko ababa vanovada. St Ambrose anoti “mumeso amapenzi rufu uipi hwokupezisira, asi kuvangwaru rufu izororo mumaoko aMwari.”
4 TOSE TICHAFA
Tose tichafa. Takamirira rufu rwedu tinofanira kuitira zvakanaka kune mumwe wavaduku ava. Jesu anoti chipi nechipi chawakaitira mumwe wava duku ava ndini wakare wawakaitira. Mushure mekuuraiwa kwake Martin Luther King akasiya apa shoko rokuti musandiyeuke nemenduru kana mibairo yandakawana pano panyika. Ingotaurai chete kuti aipa vane nzara chokudya, aipfekedza vasina nhumbi, uye aibatsira nokuratidza rudo kune vamwe. Paguva rake pakazonyorwa kuti “Free at last, free at last, thank God Almighty I am free at last.”