Gore C

Svondo 27 reGore C

Posted by MC on October 1, 2022

Posted in: Gore C, Mharidzo, Mharidzo dzamasvondo. Leave a comment

Pane nyaya inotaurwa pamusoro pemurume akadonha kubva pamusoro pegomo asi ari pakari pekukunguruka akakwanisa kubata bazi remuti. Akarembera pabazi iri kudaro akaona kuti aive munjodzi yokudonha achisvikofa. Akabva awana zano chiripo ripo. Anotarisa kudenga oti, “Kune ariko here uko?” Izwi rinobva kudenga richiti, “Hongu, ndiripo. Ndini Tenzi wako. Unotendera mandiri here?” Murume uya anoti, “Hongu, Tenzi, ndinotendera. Chokwadi chokwadi ndinotendera, Ndapota ndibatsireiwo.” Tenzi anobva ati, “Zvakanaka! Kana uchitendera hauna chekutya. Regedzera bazi rawakabata.” Murume uya anombofunga kwechinguva obva ati, “Hakuna mumwe ariko here uko?”

Murume uyu aitendera kuti kuna Mwari. Aitendera kuti akanamata anodairwa. Aitendera kuti Mwari anogona kumubatsira nokumununura. Asi Izwi raMwari parinomuudza zvekuita haatenderi!

Vazhinji vedu takafanana nemurume uyu. Tinotendera muna Mwari. Asi kana tikasangana nematambudziko, zvinhu zvikatiomera tinosiya Mwari totsvaga rubatsiro kumwe. Tinotendera asi chitendero chedu chishoma.

Tanzwawo kuti chitendero chaVaPositori chaiva chishoma. Vaitendera Jesu uye vaimutevera asi pavakaona mauto achiuya vari mugadheni reGetsemani vakatiza vachisiya Jesu ari oga. Chitendero chavo chaiva chishoma.

Musiyano wavo nesu ndewekuti vakaziva kuti chitendero chavo chishoma vakakumbira rubatsiro: tiwedzereiwo chitendero. Zvinonzi:

Uyo asingazivi asingazivi asi asingazivi kuti haazivi idutye. Asi uyo asingazivi achiziva kuti haazive mungwaru. Vapositori vakaziva kuti havazive vakakumbira kuwedzerwa.

Isu zvii zvatakaita pamusoro pechitendero chedu chishoma? Mugore rapfuura takamboendawo here kuma retreats, makungano echechi, mapoka ekudzidza bhaibheri nezvimwe? Takamboverengawo here zvinechekuita nechitendero chedu?

Vadzidzi pavanokumbira kuwedzerwa chitendero, Jesu anovaudza rungano rwemushandi anodzoka kubva kumunda asina chinhu otanga nekubikira Tenzi chokudya omumirira kusvika apedza kudya. Muranda anozoona nezvezvido zvake agutsikana kuti Tenzi vaguta.

Jesu ari kuedza kuti tinofanira kutungamidza kuda kwaMwari nguva dzose kwete kuda kwedu. Kana tiine chitendero hatipedzi nguva tichinyunyuta nekuchemachema kuti tiri kusvero binduka asi chabuda hapana. Tinozvikangwanwa tichiziva kuti tinofanira kuzviisa mumaoko aMwari tichiita kuda kwake. Iye haatirasise.

Chitendero zvinoreva kuti chero ruponeso rwangu rukasauya izvozvi ndinomira naMwari nokuti anondida uye ane hanya neni. Murume watambotaura nezvake akakanganisa pakuti paakawirwa nedambudziko akafunga kuti Mwari haazvigone. Akada kuzviponesa nokutsvaga ruponeso kumwe. Haana kuvimba norudo raMwari. Mwari anotida zvisina mugumo. Ngatimirei naye nyange zviome sei. Panotoda chitendero chizere.

Pane nyaya inotaurwa pamusoro pemurume akadonha kubva pamusoro pegomo asi ari pakari pekukunguruka akakwanisa kubata bazi remuti. Akarembera pabazi iri kudaro akaona kuti aive munjodzi yokudonha achisvikofa. Akabva awana zano chiripo ripo. Anotarisa kudenga oti, “Kune ariko here uko?” Izwi rinobva kudenga richiti, “Hongu, ndiripo. Ndini Tenzi wako. Unotendera mandiri here?” Murume uya anoti, “Hongu, Tenzi, ndinotendera. Chokwadi chokwadi ndinotendera, Ndapota ndibatsireiwo.” Tenzi anobva ati, “Zvakanaka! Kana uchitendera hauna chekutya. Regedzera bazi rawakabata.” Murume uya anombofunga kwechinguva obva ati, “Hakuna mumwe ariko here uko?”

Murume uyu aitendera kuti kuna Mwari. Aitendera kuti akanamata anodairwa. Aitendera kuti Mwari anogona kumubatsira nokumununura. Asi Izwi raMwari parinomuudza zvekuita haatenderi!

Vazhinji vedu takafanana nemurume uyu. Tinotendera muna Mwari. Asi kana tikasangana nematambudziko, zvinhu zvikatiomera tinosiya Mwari totsvaga rubatsiro kumwe. Tinotendera asi chitendero chedu chishoma.

Tanzwawo kuti chitendero chaVaPositori chaiva chishoma. Vaitendera Jesu uye vaimutevera asi pavakaona mauto achiuya vari mugadheni reGetsemani vakatiza vachisiya Jesu ari oga. Chitendero chavo chaiva chishoma.

Musiyano wavo nesu ndewekuti vakaziva kuti chitendero chavo chishoma vakakumbira rubatsiro: tiwedzereiwo chitendero. Zvinonzi:

Uyo asingazivi asingazivi asi asingazivi kuti haazivi idutye. Asi uyo asingazivi achiziva kuti haazive mungwaru. Vapositori vakaziva kuti havazive vakakumbira kuwedzerwa.

Isu zvii zvatakaita pamusoro pechitendero chedu chishoma? Mugore rapfuura takamboendawo here kuma retreats, makungano echechi, mapoka ekudzidza bhaibheri nezvimwe? Takamboverengawo here zvinechekuita nechitendero chedu?

Vadzidzi pavanokumbira kuwedzerwa chitendero, Jesu anovaudza rungano rwemushandi anodzoka kubva kumunda asina chinhu otanga nekubikira Tenzi chokudya omumirira kusvika apedza kudya. Muranda anozoona nezvezvido zvake agutsikana kuti Tenzi vaguta.

Jesu ari kuedza kuti tinofanira kutungamidza kuda kwaMwari nguva dzose kwete kuda kwedu. Kana tiine chitendero hatipedzi nguva tichinyunyuta nekuchemachema kuti tiri kusvero binduka asi chabuda hapana. Tinozvikangwanwa tichiziva kuti tinofanira kuzviisa mumaoko aMwari tichiita kuda kwake. Iye haatirasise.

Chitendero zvinoreva kuti chero ruponeso rwangu rukasauya izvozvi ndinomira naMwari nokuti anondida uye ane hanya neni. Murume watambotaura nezvake akakanganisa pakuti paakawirwa nedambudziko akafunga kuti Mwari haazvigone. Akada kuzviponesa nokutsvaga ruponeso kumwe. Haana kuvimba norudo raMwari. Mwari anotida zvisina mugumo. Ngatimirei naye nyange zviome sei. Panotoda chitendero chizere.

Svondo 6 rePasika

Posted by MC on May 21, 2022

Posted in: Gore C, Gore C, Mharidzo, Pasika. 1 Comment

CHIPO CHORUGARE

Rugare ndicho chipo chikurusa chinodiwa nemunhu wose anoshuvira budiriro. Rugare runodiwa nenyika dzose dzinoshuvira budiriro. Ndaramo pachayo inosakiswa norugare ndosaka Jesu ari kupa vadzidzi vake chipo chorugare.

Chinorwadza ndechekuti tikatarisa mativi mana ose eppasi rose tinoona kuti hakuna rugare. Munyika zhinji mune hondo. Muzere mhirizhonga nekuurayana. Mhuri zhinji hadzina rugare. Mutauro uri kutaurwa mudzimba zhinji mazuva ano mutauro wemhirizhonga nekupesana.

Nhasi Jesu ari kuti ndinokupai chipo chikuru chorugare. Ndinokupai rugare kwete runowanikwa mumatare edzimhoswa asi runouya kuburikidza naMweya Mutsvene. Imi chenyu munofanira kupa Mweya mukana wokukusvitsai chipo ichi chorugare murupenyu rwenyu. Munodaro kuburikida nokuda Mwari nemirairo yake.

Rugare hazvirevi kuti hapana kupesana pakati pedu. Kupesana kunowanikwa muvanhu. Rugare zvinoreva kugadzirisana. Rugare zvinoreva kukunda kwerudo kana kuti kukurirwa kwemweya woruvengo nokutsivana. Rugare rwunounzwa nekutaurirana nekugamuchirana tichinzwanana.

Muchiverengo chokutanga taona paine kusanzwanana pakati pavadzidzi vaJesu zvekuti sangano raigona kuparara. Vamwe pakati pavo vaidzidzisa kuti vatendeuki vechirudzi vanofanira kutevera mitemo yechiJudha yakaita sekuchecheudzwa. Izvi zvakaita kuti pave nekukakavadzana kukuru. Asi nouchenjeri hwavo vakuru vesangano vakadaidzira dare vakataurirana murudo, vakawirirana donzo rokutora.

Rugare runounzwa nerudo, kutaurirana nekuteererana. Vatenderi vokutanga vakava norugare nokuti vaidanana. Kudanana kwavo kwakaita kuti vataurirane nokunzwana. Tikava vanhu vanotaurirana panova norugare pakati pedu.

Mhuri zhinji dzizere nokupesana nekuti hapana rudo pakati padzo. Hukama hwavo hauna kumira mushe nokuti havadi kutaurirana murudo. Pada munyika yedu chaimo mamwe matambudziko atiri kusangana nawo anokonzerwa nokuti hatidi kutaurirana muzvakanaka. Nhasi Kristo ari kutikoka kuti tive vasakisi vorugare. Rugare urwu runotangira pakuva noukama hwakadzama naMwari. Kana tava nogurare urwu tinobva tapinda muguta idzva rinoera reJerusarema rataurwa muchiverengo chechipiri.

Zuva raVaTsvane Vose

Posted by MC on November 2, 2019

Posted in: Gore C, Mazuva Makuru, Mharidzo. Leave a comment

Zuva raVaTsvene Vose: Kuona

Dzimwe nguva tinorarama takavharirwa muhupofu hwedu. Kubva pakuzvarwa tinopihwa mumwe mufananidzo ‘hwehupenyu hwakanaka’. Hupenyu:-

hwemotokari dzinodhura,
hwenzendo dzekure kune mafaro,
hwemadhidhindi,
hwedzimba dzakanakisa nezvimwe.

Tinoudzwa kuti upenyu chaihwo hupenyu hwekunge wakasununguka, pasina mitemo inokusungirira uye uchiwana zvose zvaunoda. Tinoratidzwa mufananidzo wokuti hurombo, nzara nokushaya hupenyu hwokutukwa.

Orijeni wokuArekizanda akati ‘hutsvene kuona namaziso aKristu’.

Terihadhi dhi Chadhini akatiwo donzvo rake somuKristu nderekubatsira vanhu kuti vaone.

Tomasi Akwainai akataura achiti chinangwa chikuru chohupenyu hwechiKristu kuona.

Mumwe mudzidzisi wechitendero chechiJudha anonzi Harodhi Kushina anonyora mubhuku rake achiti ‘Hwaro hwechitendero hausi muunganidzwa weminamato kana mitorododo yemipiro. Chikuru pachitendero kuona. Izvi hazvishandure nyika yatinogara asi zvinoshandura maonero atinoita zviripo uye izvozvi ndizvo zvinoita kuti pave nomusiyano.’

Vasande vanhu vanoona nokuita zvimwe zvinhu pamusoro pezvavanenge vaona. Vanhurume navanhukadzi vanoona nemaziso aKristu. Nemaitiro aya vanoona zvakakosha, zvinofanira kukosheswa uye minongedzo yoururami.

Svondo 4 Mwaka woKutsanya C

Posted by MC on March 30, 2019

Posted in: Gore C, Mwaka woKutsanya. Leave a comment

Pane mumwe murume aiva nemukurumbira wokuimba anonzi Marvin Gaye. Akafa rufu rwunorwadza musiwa 1 Kubvumbi muna 1983. Akaita zvekupfuurwa nababa vake.

Upenyu hwaMarvig Gaye achikura hwakanga hwakaoma. Baba vake vaimushungurudza zvisingabviri. Mumwe munyori anoti, ‘Mavin Gaye aitendera munaJesu zvikuru, asi aitadza kurarama dzidziso yaJesu yokuti aregerere baba vake. Pekupedzisira izvi zvakauraya iye pamwe nababa vake!

Dambudziko raiva pana Marvin Gaye nababa vake ndiro dambudziko ratekeshera mazuva ano. Vanhu vava kuremerwa nekuregererana. Dambudziko rekusada kuregerera riri kunyanyoonekwa pavanhu vanenge varambana.

Pane vamwe vari kupedzera simba ravo nemari yavo pakuda kusota murume kana mukadzi akavaramba. Vazhinji vacho vava namavanga makuru kudarika avakapihwa nanyakuvaramba anokonzerwa nehasha. Veduwee siyanai nehasha, dzinokuparadzai. fambirai mberi nohupenyu hwenyu.

Svondo 3 Mwaka woKutsanya C

Posted by MC on March 24, 2019

Posted in: Gore C, Mwaka woKutsanya. Leave a comment

Rimwe bepa nhau raive nemifananidzo yavasungwa vaive vatumwa kunoita basa muguta. Vasungwa ava vaigadzirisa imba yakanga yanzi navakuru vekanzuru iputsve nokuti yasakara. Mumazuva akatevera, mumwe wavasungwa vakabuditswa mupepanhau iri akanyorera mupepeti wenhau achiti:

‘Ndinokutendai zvikuru nokundibuditsa mupebanhau renyu … Ndakanga ndapedzisira kubuditswa mupepanhau musi wandakatongerwa kugara muchitorongo … saka ndakava nomufaro mukurusa bandakabuda ndichiita zvinhu zvakanaka. …

Pandakapinda mujeri makore maviri adarika, ndakanga ndakafanana nemba yatakanzi tigadzirise … Asi Mwari vakandigamuchira vakandiumbiridza kuti ndive chisikwa chitsva.’

MuDama Rakanaka tanzwa nezvemuti wemuzambiringa wakanga wakadyarwa muminda yemivhaini. Muti wemuzambizinga wainyatsokura zvakanaka mumumda wemuvhairi Nokuti maiwanzova nevhu rakanaka. Waiti ukaona muti womuzambiringa watadza kukurira mumunda wemuvhaini woziva kuti hapana kumwe kwaungaita zvakanaka.

Muzamiringa unotora makore matatu kuti usvike. Kana ukatadza kubereka michero panguva iyoyi, kazhinji hauzobereka zvachose.

Ndosaka muridzi womuzambiringa akaudza mushandi wake kuti achitema muzambiringa uyu Nokuti wakanga usisina basa. Asi kunze kwekuita zvizvozvo mushandi anokumbira kuti muti uyu upihwe mumwe mukana. Anoti, ‘ndipei rimwe gore. Ndichautimbira ndigouisa manyowa.’

Jesu aitaurira rungano urwu chekutanga kuvaIziraeri. Aivaudza kuti Mwari akavapa chinhano chikuru muhurongwa hwake akavabata sezai. Asi ivo vakatadza kubereka michero. Anoti zvisinei nokukoniwa kwavo, Mwari achavaitira mwoyo murefu, achavapa mumwe mukana.

Rungano urwu rwunotidzidzisawo zvekare. Mwai akatipa chinhano chikuru muhurongwa hwake, uye akatiitira zvakanaka. Mwari anotarisira kuti tibereke michero. Kana tikatadza kubereka michero savanna veIziraeri, Mwari anotipa mumwe mukana zvichibva pasi pemwoyo wake. Kana tikatadza kutendeuka tinoparara.

Murungano rwatatanga narwo musungwa nemba zvakapihwa mumwe mukana. Imba yakanga yanzi nevakuru vekanzuru haisisina basa ngaiputswe asi pane akakumbira kuti ipihwe mukana, igadziriswe.

Musungwa akanga atongerwawo mhoswa ava kunzi haana kukodzera kugara muvanhu ngaaende kuchitorongo. Kunyange vanhu vakanga vamutongerwa, Jesu akamupa mumwe mukana. Semushandi watanzwa muDama Rakanaka Jesu akadiridzira nokutimbira mweya wake kusvikira ava chisikwa chitsva.

Pane vanhu vakawanda munharaunda yedu vakafanana nemuzambiringa, nemba uye nemusungwa wandataura nezvake nhasi. Vanhu ava vanogona kurambwa asi Mwari anovanzwira nyasha. Isuwo semba iya, semusungwa uye semuzambiringa tinopihwa mumwe mukana.

Ngatipeiwo vamwe vakatikomberedza mukana.

Svondo 2 Mwaka woKutsanya – Kushandurwa kwaJesu

Posted by MC on March 16, 2019

Posted in: Gore C, Mwaka woKutsanya. Leave a comment

Tanzwa kuti Jesu akashandurwa. Urwu harungori rungano rwekushandurwa kwaJesu chete, asi kuti rungano rweduwo. Tose tinogonawo kushandurwa tichijeka sezvakaitika kwaari. Hongu tinosangana namatambudziko. Hongu tinezvakawanda zvakaipa zviri kuitika muhupenyu hwedu. Asi zvakadaro tinofanira kuziva kuti tiri hama dzaJesu akashandurwa. 1 Jowani 3:2 inoti:

Vadikanwi tiri vana vaMwari. Zvatichava hazvisati zvava kuonekwa. Asi zvatinoziva ndezvekuti kana iye ozviratidza, tichange tafanana naye nokuti tichamuona sezvaari.

Hanzi ‘tichafanana naye’ zvichirefa kuti tichagoverana naye mukushandurwa kwake. Mutenderi wose haafanire kuva nepfungwa yokuti hazvifi zvakanaka. Hongu tinosangana nematambudziko makukutu asi ngatisakanganwe kuti tinogoverana naKristu mumbiri yake.

Vadzidzi vaJesu vakaona kushandurwa kwake vakazodzika pamusoro pegomo paive pazere mufaro vavakudzokera kunoenderera mberi nohupenhu hwavo hwamazuva ose asi havana kukanganwa chiitiko chokushandurwa. Savadzidzi, muhupenyu hwedu hwamazuva ose tinofanira kurangarira kuti Mwari achatiitira zvinhu zvikuru. Ngatisava nepfungwa yokuora mwoyo kunyange tikava pakati pamatambudziko makukutu.

‘Hazvigoneki’ – Ruka 18:27 ‘Zvisingagoneki mumaziso avanhu zvinogoneka panaMwari.’

‘Ndaneta’ Mateu 11:28 ‘Huyai kwandiri imi makatakura mutoro unorema ndigokuzorodzai.’

‘Hapana anondida’ – Jowani 3:16 ‘Mwari akada pasi zvakanyanya zvokuti akapa Mwanakomana wake mumwechete.’

‘Handichagona kuenderera mberi’ – ‘Nyasha dzangu kwauri dzakakwana: muhutera hwako ndimo mune simba rako’ (2 VaKorinde 12:9)

‘Zvinhu zvose hazvina kundijekera’ – Tsumo 20:24 ‘Mwari anotungamira tsoka dzedu.’

‘Handizvigone’ – VaFiripi 4:13 ‘Ndinoita zvose nemuna iye anondisimbisa.’

‘Ndinotya’ – 2 Timoti 1:7 ‘Mweya waMwari waisava mweya wokutya asi mweya wesimba nekuzvidzora.’

‘Ndinogarotya nekushungurudzika’ – 1 Pita 5:7 inoti ‘Dururira kushungurudzika kwako kuna Mwari, iye achakutarira.’

‘Handina kunyatsochenjera’ – 1 VaKorinde 1:30 ‘Mwari akakuitai mhuri yaKristu Jesu uye ndiye uchenjeri.’

‘Ndinosurikirwa’ – VaHebheru 13:5 inoti ‘Handifi ndakakurasisa kana kukusiya.’

Svondo 1 Mwaka woKutsanya C

Posted by MC on March 9, 2019

Posted in: Gore C, Mwaka woKutsanya. Leave a comment

Miedzo yaJesu inotitondedza zvaiitika pavanhu veIsrael mugwenga mushure mokunge vabva muIjipita.

Chekutanga tinoyeuchidzwa apo vana veIziraeri vakasangana nenzara vakatanga kuzevezera vachinyunyuta. Mwari akataura navo akavapa chokudya (Mutemo 8:3). Jesu anotitondedza chiitiko ichi nokuyeuchidza muedzi nesu tose kuti Shoko raMwari chete ndiko kudya kwechokwadi (Ruka 4:4).

Mutemo wokutanga wakapihwa vana veIziraeri wanga uri wokuti vasanamate vamwe vaMwari kunze kwaMwari oga (Mutemo 5:9-10). Asi muedzo mukuru kwavari waiva wokufunga kuti vamwe vamwari vevavakidzani vanesimba kudarika Mwari wavo saka vaipota vachitizirako (Kubuda 32; 1 Madzimambo 17). Jesu aigona kushandisa rimba rake rokuita minana kuti azviwanire mbiri asi anoyeuchidza muipi kuti Mwari chete ndiye anofanira kunamatwa (Ruka 4:8; Mutemo 6:13). Simba muedzo mukuru. Vazhinji tinotsvaga simba. Asi tinofanira kuziva kuti simba rose nderaMwari uye rinobva kwaari.

Mumwe muedzo mukuru wakaitwa kunaJesu ndewekuti ape chiratidzo nekujamba kubva pamusoro petembere nekuti Mwari aizomudzivirira. Mazuvaano tinoedzwa kuti tiite minana. Pane vanoti vanogona kurapa AIDS, kumira hondo, kumutsa vafi, kuwanisa mabasa chiripo-ripo. Havanei nekuti matambudziko anokonzerwa nei vanovimbisa minana. Jesu anotiyeuchidza kuti tisaise Mwari pakuedzwa (Ruka 4:11; Mutemo 6:16).

Miedzo yaJesu inotiratidza kuti tinofanira kuita sei panguva yekuedzwa. Tinofanira kuvimba neshoko raMwari, kunamata Wmari oga, uye kusatemba neminana.

Svondo 5 reGore C

Posted by MC on February 9, 2019

Posted in: Gore C. Leave a comment

Zvakaitika kuna Pita navamwe vake zvinowanzoitikawo muupenyu hwedu. Zvinoitika apo isu savadikanwi, sevabereki, seshamwari, sevatungamiri vesangano, sevashandi tichinzwa kuti tashanda nesimba asi tashandira pasina.

Asi pane nguva dzokuti Mwari anotitumira Jesus kuti atiti dzikisai usvasvi. vambai munzira tsva, nzira inotyisa. Mashoko aya anouya nenzira dzakasiyana-siyana dzakaita sekuverenga bhuku, kuona chivhitivhiti, kuteerera nhau. Dzimwe nguva Jesu anotaura nesu nenzira dzinorwadza dzakaita sokukundikana kwatinenge taita, kurambwa, kuwira murutadzo kana kupepuka tichiona kuti tava kuraradza nokushandisa zvinodhaka nenzira dzisidzo.

Mumwe nemumwe wedu ane dziva rake raanofanira kudzikisira usvasvi. Pamwe dziva rako munhu wauri kutadza kuregerera wawava nemakore usina kutaura naye. Pamwe dziva rako kushanda navarombo, kubatsira nharaunda. Pamwe dziva rako kudzokera kuchikoro. SaPita tinogona kuti ‘Tabinduka usiku hwose …’ ‘Ko kana zvikasashanda…’ ‘Takambozvizama zvikasashanda…’ Asi tinofanira kuzama, zvinoshanda. Tikazama ukama hwedu hunoshanduka, mabasa edu anochinja, matambudziko edu haazotikurira, tinokunda.

Svondo 2 reGore C – Zvipo zvakasiyana-siyana

Posted by MC on January 19, 2019

Posted in: Gore C, Gore C, Mharidzo, Mharidzo dzamasvondo. Leave a comment

“Charisma” zvinoreva kuti “Zvipo zvinobva kuna Mwari.” Chiverengo chokutanga chinotiudza kuti muboka ravaKorinde zvipo izvi zvaisakisa kuti pave nenyonga-nyonga. Kunze kwekuti zvipo zvishandiswe kuitira sangano zvaishandiswa kuonererwa zvichizobva zvakonzera shanje, godo neruvengo.

Chipo chaiyemurwa navazhinji chaiva chekutaura nendimi. Pane vamwe vaikwanisa kutaura nemutauro usinganzwikwi panguva yemunamato. Vamwe vaiedza kuteedzera izvi zvichiramba votanga kuzvitarisira pasi. Avowo vaigona kutaura nendimi vaizvitutumadza.

Pauro anoti pane zvipo zvakawanda. Zvipo izvi zvinobva kuna Mwari. Anoti kana zvipo izvi zvichikonza kupesana nekurwisana, zvinenge zvava midziyo yohuipi.

Munhu wose ane chipo chake chaainacho. Zvipo zvedu hazvifanane. Zvingaita here kuti pachechi tive navatenderi vane chipo chimwechete chekuridza ngoma pasina anogona kuimba? Ingava nyika inofadza here ine miti yemumango chetechete pasina imwe miti?

Kukosha kwechipo hakuonekwe nembiri yachiinacho asi nekubatsira kwachinoita boka ravatenderi. Pauro anodoma zvipo zvakawanda zvakasiyana-siyana pana 1 Vakorinde 12:8-10. Zvipo izvi zvaanodoma handizvo zvega asi kuti akangotaura zvaienderana nevanhu vaaitaura navo. Pane zvipo zvinosvitsa paruzivo rwaMwari, uchenjeri noruzivo rwunoita kuti munhu agone kunzwisisa chitendero. Pane chitendero chinogona kufambisa makomo nokuita minana. Pane zvipo zvokurapa nokuporofita. Panewo chipo chekutaura nendimi dzakasiyana-siyana. Muchidimbu kune zvipo zvakawanda. Munhu wose ane chipo chake. Zvipo zvedu hazvifanani.

Mwari haana rusaruro

Posted by MC on January 12, 2019

Posted in: Gore C, Mharidzo, Mharidzo dzamasvondo. Leave a comment

Mazuva ayo Jesu akanga achangobva kumuka muvafi, vadzidzi vari pakati pokuparidza Dama Rakanaka, Pita akaona mufananidzo wemhuka dzakan’ora nedzisina. Akanzwa izwi richimuti idya nyama yakan’ora. akamboedza kuramba asi izwi iri rakamuti, ‘Zvinenge zvacheneswa naMwari usazviti zvakan’ora.’

Pita aifunga nezvehope idzi, shoko parakasvika kwaari richiti mumwe mukuru wezana ramauto echiRoma ainzi Koniriyasi aida kuombekwa naye. Akambotanga nekuzengurira nokuti Koniriyasi aive mutorwa uye mumwe weuto ravapambepfumi. Pfungwa dzake dzaimuti munhu akadai hazviite kuti adaidzwe naMwari. Asi Pita akatondera hope dzake, akaziva zvadzaireva akati, ‘Chokwadi Mwari haana rusaruro.’ Naizvozvo Pita akagamuchira mutorwa uyu akamupapatisa.

Tinodzidza zvinhu zviviri parungano urwu. Chekutanga, tose tiri vanaKoniriyasi. hatina kuchena, tiri vatadzi, tine mhosho dzedu, kukoniwa kwedu. SaPita, tinogona kufunga kuti hatikodzere kuva varurami asi vamwe ndivo vanokodzera. Tinogona kufunga kuti makomborero aMwari haakodzerane nesu.

Mumwe murume akabvunza mudzidzisi wechitendero achiti, ‘Sei Mwari akasarudza chigwenzi chemunzwa pane zvimwe zvose kuti azviratidze kuna Mhozisi?’ Mufundisi akati, ‘Chero Mwari dai akasarudza gwenzi raunoti riri nani ungadai usina kugutsikana, asi sezvo uri kuda mhinduro ziva kuti Mwari akasarudza chigwenzi chemunzwa kuti akudzidzise kuti hapana nzvimbo isina huvepo hwaMwari kusanganisira gwenzi remunzwa.’

Rungano urwu runotiudza uti tose tinokodzera huvepo hwaMwari. Mwari anoda kuuya mutuupenyu twedu tunenge chigwenzi chemunzwa. Inga Jesu anotaura wani kuti ‘Ndakauya kwete kuzoporesa vatano asi vanorwara.’

‘Zvechokwadi ndadzidza kuti Mwari haana rusaruro’ akadaro Pita. Izvi zvinoreva kuti mhosho dzedu, matadzo edu, kusarurama kwedu zvose izvi hazvifanire utitadzisa kugamuchira makomborero aMwari. Chero munhu asina kururama anowana mweya waMwari.

Chechipiri tinodzidza kuti zvipo zvedu zvisina kururama zvinofanira kubataidza nezvevamwewo zvisina kururama kuitira kuti zvirurame. Tose tine kukoniwa kwedu. Asi ichi hachisi chikonzero chokuti tingoti go. Zvipo zvedu zvinofanira kubatanidzwa nezvevamwe kuitira kuti tiite zvinhu zvikuru.