Nyaurwa

Rendi zvinorevei?

Posted by MC on March 16, 2021
Posted in: Nyaurwa. Leave a comment

Musi weChitatu cheMadota, vatenderi vose pasi rose vanotaridza huma dzavo kuti vaiswe micherechedzo yechipiyaniso namadota. Mucherechedzo uyu unoitirwa kutiyeuchidza kuti hatirarame nokusingaperi pamwe nokutitondedza kutsvaga upenyu hutsva kuburikidza nokutendeuka. Madota aya mucherechedzo wokuti Mwaka weKutsanya watanga, mwaka wokuzvinyima zvinotifadza kuti tipe mweya mutsvene mukana wokupinda muhupenyu hwedu.

Asi ngatitauriranei chokwadi. Vamwe vedu vanofarira mwaka uyu nokuti vanoutora somukana wedieting. Ndakati ndichitaura neimwe shamwari yangu rimwe zuva zvikanzi “Mufunge ndiri kufara kuti gore rino rendi yedu ine Covid nelockdown. Izvi zvinoreva kuti ndichanyatsodieta, ndanga ndanyanya kufuta.”

Hatingati yedu pane chakaipa pakuvavarira kuonda. Ichokwadi kuti nguva yerendi inotipa imwe discipline yakakosha. Asi nhasi ndinoda kupindura mubvunzo wenyu wamakandipo wokuti “Rendi yakatikosherei.” Mubvunzo uyu unopindurwa navanhu vakasiyana-siyana napakawanda. Ini nhasi ndiri kuti batai pokuti ZVAKAKOSHA KUNGWARIRA KWETE ZVINOPINDA MUMUKANWA MEDU CHETE ASIWO ZVINObUDA MUMUKANWA MEDU. Saka rendi ino ngatimboongororei zvinobuda mumukanwa medu.

Chekutanga zvinyadzi. Zvinyadzi mazuva ano zvatekeshera kwese kwese. TV yakuremera kubatidza pane vanyarikani. Ukashanyirwa nemuenzi kana rhedhiyo chaiyo ino rema kubatidza nokuti vashamarari vamazuva ano vanongoerekana vakanda zvinyadzi ukashaya pokutarisa. Chero kuti uridze rwiyo rwevaimbi vechidiki vamazuva ano, mashoko acho zvinyadzi zvoga zvoga. Rimwe zuva ndakanakirwa nekambo kanoti “kanjiva.” Ndakatanga kuimba zvikanzi “Nemi anababa vezvomweya munotoimbawo izvozvo?” Zvinyadzi zvazara muhurukuro dzedu dzose. Chinoshamisa ndechekuti chero vatungamiri vehurumende, vakuru-vakuru vakungokanda zvinyadzi zviri pachena. Vatungamiri vechechi chaivo havachazezi kunyadzisira. Ndakashaya pokutarisa rimwe gore mai veChita vachifananidza mumwe wavo nenhengo dzomunhurume. MumaWhatsApp Group umu mazuva ano unonzwiririra. Hanzi navamwe baba, Father mwana wangu anotidadisa. Haasati ambotinyadzisa. Nguva zhinji anenge achiverenga bhaibheri rake. Apa mwana wacho ane zita rinonyadzirisa paTwitter uye anenge achingotumira zvinyadzi nemifananidzo yavanhu vasina kupfeka. Ndakashaya kuti ndovaudza sei kuti mwana wenyu igamba rezvinyadzi ku social media.

 Ko dzidzo yedu yakaendepi? Nhai madzimai, kana nemiwo here chokwadi kushama miromo yenyu muchinyadzisira munoti vana vanodzidzei? Hona zvino mumigwagwa umu vana vakungotaura zvinonyadzisira sevari kuti ndinokumbirawo mvura yokunwa.

Mukaona mashoko anofanirwa kutaurwa muchivande avakungomwaiwa pachena zivai kuti mwoyo yedu yaomarara, chimiro chaicho hapasisina. Kana muchifunga kuti zvinoreva kuti hamuna kusaririra, zivai kuti tatogamuchira chivi sezvachiri, chatotikurira. Zvinyadzi hazvifanire kuva nenzvimbo mupfungwa nomuhupenyu hwomuKristo.

Imwe mhuri yaive yakomba tafura vachidya nagogo vaive vashanya kubva kumusha. Mwana akadonhedza ndiro yechikafu nemistake chikamwararikira pasi. Mai vake vakatanga kupopota. Vakataura zvakawanda vachinyadzisira. Mbuya vaya vakatarisa mwana wavo aipopotera muzukuru zvikanzi “Keresenziya rangarira kuti muromo wako uchada kudya komunioni sande.”

Saka zano rangu nderekuti ngwarirai zvinobuda mumikanwa yenyu mese, vakuru navadiki. Ngwarirai zvinobuda mumikanwa yenyu nokuti zvinobudamo zvinogona kutiratidza zviri mamuri. Rangarirai kuti muri vana vaKristo musade kuzviita magen’a nevanhu vasina hunhu.

Chechipiri, rendi inguva yokusarutsa mashoko ekutongera vamwe. Ndinonzwisisa kuti izvi zvonogona kuremera kuita munguva yose yerendi, asi hamungazotadzawo kuwana zuva rimwechete zvaro ramunoti pazuva iri handidi kutaura mashoko ekutongera vamwe. Ndinofunga kuti chishanu chegachega chakanaka nokuti ndiro zuva rakarovererwa Kristo pamuchinjikwa, Saka tinenge tichiti musi wechishanu handidi kuroverera vamwe sokurovererwa kwakaitwa Jesu. ChiShanu ndirowo zuva zvekare rakanzi kumbavha iya naKristo “Nhasi chaiye uchange uineni muparadhiso.” Saka kunze kwekutongera vamwe tinovashuvira zvakanaka.

Ndinoziva kuti Rendi yave kutopfuura asi  zvinenge zvakanaka kuti ChiShanu choga-choga tisatongere vamwe. Tisavazivire zvavanofunga, tisavatongere unaku nohuipi hwavo, kuwana kwavo, mhosho dzavo, rudzi rwavo, mushando wavo, zvikanganiso zvavo. Ngatingoonei munhu wose semwana waMwari, akafirwa naKristu.

Chechitatu, rendi inguva yokuedza kuzvidzora panhau yokusvora vamwe. Inguva yokuzama kusataura mashoko oruvengo, okudzikisira, okugodora, okutuka, okusvora, okuseka, okunyeya, kana okusvibisa mazita avamwe. Ndinoziva zvekare kuti zvinogona kurema kuita izvi munguva yose yeRendi asi hamungazotadza kuwana zuva rimwechete ramunovavarira kuzviita. Zuva randinoona serakanaka Chitatu nokuti zvinonzi ndiro zuva rakatengeswa Jesu naJudasi.

Vamwe mai mukugoverana kwedu vakanditi vakati vapedza kudzidzira kupinda muchita ndokuenda kune imwe parishi muguta rapamusoro kwavakasvikonopekedzwa nokugamuchirwa muchita naBaba veZvomweya. Muparishi iyi nhengo dzechita dzose dzaizivana uye dziratidza kuti hadzina ruremekedzo nemunhu wavanoti akabva kumarukesheni. Asi zvakadaro amai ava vaingotendera kuti zvichapfuura vanhu vachasvika pakuvagamuchira.

Asi rimwe zuva vari seri kwemba yaiitirwa musangano vakanzwa vachinyeyiwa nevamwe. Paitaurwa mashoko akaipisisa pamusoro pavo. Vaiti chakanyanyakufuta chichasiiwa nemurume. Iwo mahobi acho nekuzotadza kana kusekerera. Munhu ungabva waita ganda rakasviba kunge shato kudaro. Idzo hapwa kunhuwa kuti kutu. Mai havana sense yefashoni vaya.

Mai ava vanoti  ndakaremerwa kupinda mumba maiitirwa musangano ndichiziva kuti vose varimo vachanditarisa vachiseka nechemumwoyo.  Ndakashaya kuti sezvo vaive vazondiona vachati kudii vachiziva kuti ndazwa zvavanga vachitaura. Muhana yangu ndakaziva kuti chaiva chita chavo uye ndaisadiwa. Ndakazviudza kuti handisiyi chita nokuti handidi kuti chivi chikunde. Ndakakumbira simba kunaMwari rokukunda. Nhasi uno ndava mutungamiri wechita.

Mashoko anobaya. Vavarirai kusataura mashoko anogodora Chitatu chogachoga.

Chechina, ndechekukwanisa kuti kwete nemiromo yedu. Izwi rokuti “kwete” rinoratidza zvatiri. Jesu pachake aiziva kushandisa izwi iri. Paakaporesa murume aiva namadhimoni, murume uyu aida kuramba achimutevera asi iye akati, “Enda kumba kushamwari dzako unovaudza zvawaitirwa naTenzi, nyasha dzaakuratidza.” Kwete, usanditevera asi enda unobatsira vaunogara navo.

Pirato paakabvunzurudza Jesu, Jesu akazunguza musoro achiramba kumupindura nokuti aiziva kuti Pirato haana hanya nechokwadi. Jesu akarambawo mushonga unopedza marwadzo zvaaive pamuchinjikwa nokuti zvaizomutadzisa kuzadzisa chinangwa chake. Jesu akatiwo kwete kunaSatani aida kumunyengedza kushandura matombo kuti ave chingwa.

Nguva ino yeRendi ngatiti kwete kune zvinodhaka, kwete kuhupombwe, kwete kuhunyengedzi, kwete kumanyepo, kwete pakudyisa.

Ngatitii hongu mukutaura chokwadi, hongu mukukurudzira vamwe, hongu mumabasa etsitsi, hongu mukunamata, hongu mukupa mhuri dzedu nguva, hongu kuna Jesu.

Hama dzadiwa, ngatingwarirei kutaura zvinyadzi, ngativavarirei kusatongera vamwe, ngatiedzei kusagodora vamwe uye ngatidzidzei kuti kwete. Tikagadzirisa zvinobuda mumikanwa yedu tichapa mweya nzvimbo muhana dzedu. Tichatanga kutaura zvinovaka, kukurudzira uye kunamata nomwoyo wose.

Clement Mutsvene

Posted by MC on March 14, 2020
Posted in: Nyaurwa, Zvinyorwa. Leave a comment

1.1 Ritarake rokubhabhatidzwa

Zita rake rokubhabhatidzwa rainzi Jowani.

1.2 Kwaakaberekerwa

Akaberekerwa kunzvimbo inonzi Tasiwitsi iri kuMoravia kvava kunzi Czech Republic. Akaberekwa musi wa26 Zvita mugore ra1751.

1.3 Mhuri yake

Clement aibva mumhuri yavarombo. Akanga ari mwana wechipfumbamwe (9) uye akashaikirwa nababa vake achiri mudukusa asati adzidza.

1.4 Hupenyu hwake pahudiki

Clement aishuvira kuva mupriste kubva pahudiki hwake asi vabereki vake vakamushaira mari yokuti aende kuchikoro. Akazoguma ava kuseenza mubhekari pane imwe imba yavapikiri (monastery) yainzi Norbertine. Ari ipapo akabvumidzwa kuita zvidzidzo zveRatini.

Mukuru wepamba yavapikiri iyi paakafa Clement akabva amboedza kurarama upenyu hwekuzvitsaura pana vamwe uchinamata (Hermit). Asi achangotanga upenyu uhu Mambo Joseph II akadzika mutemo unorambidza mahermits ose. Izvi zvakaita kuti Clement adzokere kubasa rake remubhekari kuVienna.

1.5 Hupriste

Rimwe zuva Clement achibatsira pamuteuro wemisa muCathedral yaStefani Mutsvene, akaona madzimai maviri ainaiwa nemvura ndokumabatsira. Mukukurukurirana kwavo vakaziva kuti aida kuva mupriste asi akanga asina mari yekuenda kuchikoro. Madzimai aya akabva abatsira Clement pamwe neshamwari yake ainzi Thaddeus nemari yekuti vaende kuseminari kunodzidza. Vaviri ava vakaenda kuRome uko kwavakanofarira upenyu hwaArifinso mutsvene pamwe nechita chemaRedemptorists. Vaviri ava vakazosvika pakugadzwa mugore ra1785.

1.6 Upenyu muVienna

Clement akatora mhiko dzake dzohupikiri aine makore 34. Apa ndipo paakasiya zita rokuti Jowani akatanga kudaidzwa kuti Clement Mary.

Vachangotora mhiko, iye naTadheyosi vakadzokera kuVhiena. Asi muVhiena maisagarika nekuti chiKristo chaisatambirwa uye zvematongerwo enyika zvakanga zvisina kumira zvakanaka. Saka vaviri ava vakabva vaenda kuPorendi muWoso. Imomo vakasangana nevaKristo vaitaura chiJerimani asi vakanga vasina mufudzi nekuti maJezuiti akanga arambidzwa kushandira muPorendi. Vakatanga nokuparidzira varombo avo vaiungana panze. Vakazowana chechi yemusande Bheno pavakashumira kwamakore anosvika 9. Ipapo vaiita mharidzo shanu (5) muchiJerimani nenhatu (3) muchiPorishi pazuva, vachitendeutsa vanhu vakawanda. Vaibatsirawo vanhu nezvekudya nezvekupfeka. Vakavamba imba yekuchengetera nherera uye chikoro chevana vakomana.

Clement naTadheyo vakakurudzira vana vakawanda kupinda muchita chemaRedemptorist. Vanhu vakawanda vakapinda muchita, vamwe vakapedzisira vavakutimirwa kunoparidzira kunzvimbo dzakaita sePorendi, Jemeni, neSwitsarendi.

Chinosuwisa ndechekuti nzvimbo dzose dzakavambwa munyika dzakasiyana-siyana idzi dzakapedzisira dzaparara nekuda kwekusamira zvakanaka kwezvematongerwo enyika. Mushure memakore makumi maviri (20) ekuomerwa nebasa, Clement pachake akasungwa akadzingwa munyika. Akazosvika kuVhiena kwaakashanda kwemamwe makore gumi namaviri (12) asati afa. Akapedzisira ava kuzivikanwa se “Mutumwa weVhiena”. Ainzwa rupinduko rwavapfumi navarombo, aishanyira varwere, aiyananisa vamwe, achibatsira varombo.

Mukushanda kwake Clement akashungurudzwa zvikuru. Vatungamiri vezvenyika vaisada mukurumbira wake zvekuti vakamboedza kumumisa kuita basa nekuparidza zvikaramba. Utsvene hwake hwakatekeshera nenyika. Kudzvanyirirwa kwavakaitwa kwakatobatsira kuti maRedemptorist aite mukurumbira. Nekushingairira kwake, chita chakakura zvikuru kusvika pakufa kwake mugore ra1820.

Clement akaitwa musande mugore ra1909. Mhemberero yake iriko musi wa15 Kurume.

1.7 Ndangariro

Upenyu hwaClement hwaiva hwakaoma. Udzvanyiriri hwezvematongerwo enyika hwakaita kuti basa rake kuJemeni, Porendi neSwitsarendi riparare. Clement pachake akadzingirwa kuhupoteri. Izvi zvinotidzidzisa kuti muteveri waJesu nyakurovererwa pachipiyaniso anofanira kuva nechitarisiro kunyange pose paanokanganiswa kuita basa rake.  

Rimwe gore Clement ari pazororo kuWoso akapihwa nhindi yenyama. Achangopedza kudya akabva azvibata kuti yanga yakaiswa muchetura wakauraya vamwe vaaigara navo. Clement apona akakwanisa kuregerera avo vaida kumuuraya akaenderera mberi nebasa rake rokuparidza nokuparadzira rudo.

1.8  Munamato kuna Clement

Mwari vane rudo, Mwari vane hanya netsitsi kuvanhu, makazadza Clement Mary Hofbauer nechido chakanyanya chokuritira vanhu zvikuru sei varombo nevanotambudzika pamweya. Nomuna Clement makaratidza huwandi hworudo nenyasha dzenyu.

Kuburikidza nekurevererwa naye, tibatsirei kuramba takamira nechitendero chechokwadi cheChikatorike chaakadzidzisa nomazvo. Itai kuti tifambe munzira yatakaratidzwa noupenyu hwaClement. Tinzwei mutipindure, Mwari, nomunaKristu Tenzi wedu. Ameni.

KURIRITIRA VAPRISTE

Posted by MC on April 16, 2019
Posted in: Nyaurwa, Zvinyorwa. Leave a comment

NAMATIRAI VAPRISTE

Chinhu chinonyanya kukosha chinokona kuitirwa mupriste nemutenderi kumunamatira.
Zvakanaka kuziva kuti vapriste vanotinyengeterera zuva rega-rega. Hapana chakaipa kuitira mupriste rusariro, pfugamiro, chipirwa kana kumutsanyira. Unogonawo kumutumira kadhi uchimuvimbisa kuti uchamunamatira kuti zvishuvo zvake zviitike.


MUBIKIRE CHOKUDYA ZVIKURU MAZUVA AANENGE AKABATIKANA

Chingava chinhu chakanaka kana iwe semutenderi ukava nechokwadi chokuti mupriste wako awana chokudya zvikuru mazuva ezororo paanenge asina mubiki. Zvakangonakawo kuti apedza zuva rose achiriritira vanhu pamazuva makuru adzoke kumba achiwana chokudya asingatangi kubika patsva. Ziva kuti mupriste wako anofarira kudyei womugadzirira. Usangoita chete kuchitarisira kuitirwa chimwe chinhu.


PEMBERERA MAZUVA MAKURU OMUPRISTE WAKO

Kupemberera zuva rekuberekwa kwemupriste wako kana zuva rougadzo hwake ipfungwa yakanaka zvikuru. Zvinongofadza kuyeukwa pazuva rawakagadzwa.

WANZA KUNAMATA UITE KUNYUNYUTA KUSHOMA

Hurukuro zhinji dzinowanzotenderera pakunyunyuta pamusoro pomupriste, parishi, vamwe vatenderi, vaimbi, zvisina kumira zvakanaka mumba yaMwari, sarudzo dzaitwa nezvimwe. Kashoma kunangana nezvechitendero. Iwe usawanze kunyunyuta.


ZVIPIRE KUBATSIRA

Usamirira kuti ubvunzwe! Vapristi vakagadzirwa kupa, uye zvakavaomera kukumbira zvinhu. Pira nguva yako kuparishi sechiratidzo chekutsigira nokushandira kwako. Funga kuwedzera chegumi chako kuratidza kutsigira kwako parishi nemupristi.


ENDA KUMISA UYE / KANA KUREURURO

Hapana chinofadza mupriste kupinda kuona mutenderi achiuya kureururo kana kumisa. Kana wapinda mumisa enda mberi unoimba nevamwe uchiratidza kutsigira zviri kuitwa.


MUNYORERE KAGWARO KEKUTENDA

Kagwaro kumupriste, zvikuru wawava nenguva usingaone, uchimuudza kuti upriste hwake hwakashandura upenyu hwako kanesimba.

Tsamba kubva kumutenderi inonakidza kugamuchira. Kwete kadhi rine mazwi mashoma. Makadhi akanaka zvawo, asi tsamba inoreva zvakawanda. Zvinobata mwoyo kunzwa mutenderi achinyatsorondedzera kuti zvakaitwa nomupriste zvakamubatsira sei. Zvinofadza mutenderi paanotaura kana kutumira gwaro rokutenda: ‘Ndinotenda nekuda kwehupriste hwenyu’, ‘Ndinotenda nekuda kwekuve mushumiri wedu.’ ‘Ndinotenda nekupindura foni yangu.’.
Muudze kuti akaunza mutsauko muupenyu hwako. Munyorere gwaro rokutenda. Mashoko mashoma chaiwo anoreva zvakawanda kumupriste mazuva ano. Mashoko ekuvonga pashure pemariro uye michato kana mharidzo yagonekwa akakosha.


TENDA

Rumbidzai mupriste mushure memuteuro wose weMisa. Kunyange usingadi mupriste, masi ine chekuita nokuvapo kwaJesu. Unogona kungoti kumupriste mushure mereururo, ‘Ndinokutendai nokuda kweushumiri hwenyu uye ndichakunyengetererai.’ Izvi zvinoreva zvakawanda. Gadzira vhidhiyo raunenge uchibvunza vatenderi chinhu chimwechete chavanofarira pamupriste womuratidza.


MURUMBIDZE

Tsvaga mikana yekurumbidza mupriste wako kunyange uya wausingadi zvikuru. Mupriste anonzwa manyunyunyuku paanonzi ‘Misa iyi yanga ichinakidza zvikuru, Baba.’


RIRITIRA UTANO HWAKE

Kurudzirai muprista kuti atore nguva yokuzorora.


USAMUSHUNGURUDZE

Dzivisa makuhwa pamusoro pemupriste neparishi. Usaite makuhwa kana kutsoropodza asi kuti ipa rubatsiro runovaka. Vangani vakatadza kupikira nokuti vakanzwa vapriste vachishorwa nokuda kwetunhu nhando.


MUITE KUTI AZIVE KUTI UNOMIRA NAYE

Paunoona mumwe munhu achiomesera kana kunetsa mupriste, ratidza mupriste kuti wazviona womuratidza tsitsi.


UMBA UKAMA NAYE

Usatanga nokumuudza zvausingadi kana kari kekutanga kusangana naye. Mukwazise usati wamuudza zvakashata.


USATARISIRA ZVISINGAGONEKI

Zvichida haasi puramba, saka usatarisira kuti agadzire paipi iri kubvinza. Mufungire zvakanaka nguva dzose uchiziva kuti haana chinya newe. Kupa pfungwa dzako kunobatsira. Asi kutsoropodza nekunyunyuta kunopiwa pasina kuzvininipisa uye rudo rwechokwadi kunosveta.


USAITE TSIKA YOKUUNGANIDZA NOKUFURIRA VAPRISTE

Usafunga kuti unofanirwa kuva nemupristi Svondo roga roga uye pazvose zvaunoda. Usatarisira kuva shamwari yemupristi – mufundisi wako saka ukama hwenyu hunofanira kuva nemiganhu. Usadada kune vamwe vaunonamata navo kuti ‘Ndiri padyo nababa nhingi’ nekuti zvinosika ruvengo negodo – maitiro iwayo anoshungurudza mupriste, kumuvengesa kana kuvhiringa basa rake.


MUTSIGIRE

Kana pakaitika chiitiko chinonetsa muparishi rutsigiro kumupriste rwakakosha. Anogona kupomerwa mhosva yeutsinye kana kuita chimwe chinhu chinopedzisira chava mumapepa nhau. Panguva yakadai anoda mashoko netsamba dzerutsigiro dzakawanda dzinobva kuvatenderi.


MUPE NGUVA YAKE

Dzimwe nguva zvakanaka kuti mupriste awane nguva yake oga. Usaite mwoyochena usina humwoyochena uchifunga kuti baba vakasurikirwa, vari kushungurudzika kana kuti vari kuodzwa mwoyo ivo vasiri. Pamwe chavanenge vachingoda chete kuva voga vachizorora.


MUKOKE

Zvakanaka kana vatenderi vakafunga kukukoka mabiko emhuri: mazuva ekuberekwa, mazuva ekurangarira zuva remuchato, kudya kwepazororo. Dzimwe nguva mupriste anogona kuti haakwanisi nokuti anenge aine zvakamubata asi kukoka kunenge kwakangonaka.


VAVARIRA HUTSVENE

Chikurusa ndechekuti Mwari anoda kuti tive vatsvene. Hapan chinofaddza mupriste kupinda kuona utsvene muhupenyu hwevatenderi vaanoshumira.

Mhedziso

Ndinovimba mashoko aya achakubatsirai. Rangarirai kuti vapriste vanosiyana. Vamwe vanoda zvekukokwa mudzimba vamwe vanosarudza kudyira kumba kwavo. Iwe ukaziva zvaanoda wana mabatsiriro aungamuite.

Vechidiki muBhaibhiri

Posted by MC on May 1, 2018
Posted in: Nyaurwa, Zvinyorwa. Leave a comment

© Musakope nhaurwa iyi usina mvumo

Dhavhiti

Kurwa kwakaita Dhavhiti naGoriyati kwakaratidza mafungiro aDhavhiti. Paakarwisana naGoriyati, Dhavhiti aiva chikomana chidiki chine simba rohudiki, Goriyati ari munhu mukuru akasimba aneruzivo ruzere maererano netsivo. Goriyati aiva nenhoroonho huru yemhirizhonga nekutyisidzira vamwe. Dhavhiti akaona kuti haakwanise kukurira Goriyati achirwa samarwiro amazuva ose.

Akaita sei?

  • Akatarisa dambudziko.
  • Akaona zvaanogona nezvaasingagoni.
  • Akakumbira rubatsiro rwaMwari.
  • Akafunga kuti angashandisa sei unyanzvi hwaaiva nahwo.

Simba rake raiva pai?

  • Kufunga zvakati twasa.
  • Uropi hunopinza.
  • Kukwanisa kushandisa mudhayi nehunyanzvi
  • Kugona kusarudza zvombo
  • Kufunga zvitsva kwakamubatsirawo kuita gamba.

Chidzidzo?

Usakanda mapfumo pasi paunenge woita sewokurirwa. Tose tinotombosvika pakukurirwa pane zvimwe zvinhu. Funga unyanzvi hwauinahwo woona zvaungaite maererano nezvaunenge wakatarisana nazvo. Shandisa tarenda rako kupukunyuka.

Rugwaro rweBhaibheri

1 Samueri 17: 38-51

Josefa, mwanakomana waJakobho

Josefa, mwanakomana waJakobhu, aiva rimwe ramagamba eChitenderano Chakare. Akanga akangwara, akachenjera uye aishamisa pakugona kwake. Aigona kutarisana namamiriro ezvinhu chero akaita sei agoashandisa kuti abudirire. Asi izvozvo zvakaitika pava paya.

Sejaya akaita zvikanganiso zvakakomba, uye zvimwe zvacho kwaiva kushungurudza vakoma vake kwakamupinza muna taisireva.

Pane zvikonzero zviviri zvakakonzero kuti vakoma vake vose zvavo vamuvenge zvakanyanya kusanganisira Rubeni akazama kumununura. Zvinoita sokunge Josefa aisada vanhu venyama vaanotarisira pasi. Aigona zvakawanda asi akanga ari muduku pane vakoma vake.

  • Ko Josefa angadai akashandisa mamiriro ezvinhu zviri nani here?
  • Aigona kuva akaratidza kugona kwake nounyanzvi hwake asingagumburise hama dzake here?
  • Tinoshandisa sei zvipo zvedu nenzira inobvumira vamwe vanhu kuti vapenyewo?

Josefa akatengeswa nehama dzake muuranda (Mavambo 37). Pakupera kwechitsauko tinonzwa kuti Josefa aishanda mumba maPotifa, mukuru wehurumende uye mutungamiriri wemauto (Mavambo 37:36). Kushanda kwaJosefa mumba maPotifa kwairatidza kuti akanga avimbwa naye zvikuru natenzi wake. Josefa aizviona somunhu apiwa utariri pamusoro pezvose zviri mumba kunze kwomudzimai waPotifa (Mavambo 39: 9).

Mudzimai waPotifa akwezva Josefa asi Josefa akanzvenga rukwezvo urwu zvine ungwaru. Kunyange zvazvo akaramba zvakachenjera, akapomerwa nhema. Chigumisiro chaiva chokuti Josefa akaiswa mujeri (Mavambo 39: 11-20).

Nyaya yaJosefa muenzaniso wakanaka wekuti tikaita zvakanaka, hazvirevi kuti ticharumbidzwa nekuda kwazvo pakarepo. Zvisinei, pakuguma akaremekedzwa naMwari uye akacheneswa pamberi pevanhu kuti akamira neururami kunyange zvakanga zvisiri nyore.

Shoko raTenzi

Mavambo 37

Samueri

Samueri achiri mucheche mai vake vakanga vamutsaurira kuna Mwari, uye aigara munzvimbo yeTemberi, umo maakawana dzidzo yake.

Humwe husiku chinhu chinoshamisa chakaitika kwaari. Akanzwa kudana kwaibva kuna Mwari kwakamuratidza pachena kuti aiva nechinangwa chakakosha chaakatsaurirwa.

Vanhu vaiva vakamupoteredza vakanga vasinganzwi izwi raMwari, asi iye airinzwa – uye rakasvika kwaari murunyararo rwousiku. Rakamudaidza katatu – kusvikira apindura uye arinzwisisa.

Chii chatingadzidza kubva munyaya iyi?

  • Tinodzidza kuti Mwari ane izwi rakadzikama rinogona kungonzwika murunyararo, kana tati zii uye tadzikama.
  • Tinodzidza kuti Mwari acharamba achishevedzera kusvikira tazomunzwa.
  • Tinodzidza kuti tinosungirwa kuteerera izwi raMwari.
  • Nzira yakanakisisa yekunzwa inzwi raMwari ndeyekunge tanyarare uye tadzikama. Edza kuisa imwe nguva yezuva rako parutivi yaunoshandisa kuteerera zviri kutaura Mwari kwauri.

Shoko raTenzi

1 ​​Samueri 3

Ishimaeri

Ishimaeri aiva mwanakomana wedangwe waAbrahama nemuranda womudzimai wake ainzi Haga. Akakura achitarisira kugara nhaka yohushe hwababa vake. Asi izvi hazvina kuitika. Mudzimai mukuru wababa vake, Sara, akapona mwanakomana asingatarisiri Ishimaeri paaiva ava namakore gumi nemana (maererano namafungiro enguva iyoyo aiva atova murume mukuru).

Haga naSara vaugarisana zvenhema mumwoyo vazere nokufungirana. Nguva yokuti vachipemberera kuyaruka kwemwanakomana waSara yasvika pakaitwa mhemberero huru. Ishimaeri akanga achitamba nemunin’ina wake chimwe chinhu ndobva chaitika. Hatizivi kuti chii, asi chakatsamwisa Sara. Sara akakumbira kuti Ishimaeri naamai vake vadzingwe mudunhu. Sezvo aiva mudzimai mukuru, aida kuva nechokwadi chokuti mwanakomana wake aizova mugari wenhaka yaAbhurahama, kwete Ishimaeri.

Abhurahama aida Ishimaeri, asi akateerera zvaidiwa naSara. Zuva rakatevera akatuma Haga naIshimaeri kuenda mugwenga rakaoma kuti papata. Vaviri ava vaiva voga uye vakararirirwa. Haga akanga aberekerwa muIjipita saka akaenda kumaodzanyemba kwakadziva kuIjipita aine chushuviro chekuti kune tariro. Asi pakanga pasina mukana zvachose wokuti vachakunda. Pasina kumbopera nguva tumvura twavaiva natwo twakapera vakanzwa nenyota inotyisa.

Ishimaeri ndiye akatanga kukurirwa (pada nokuti aipa mvura yakawanda kuna mai vake iye osara asina).  Haga akamukwevera pasi pemumvuri wegwenzi, ndokubva aenda, kuitira kuti asarwadziwa nokuona mwana wake achifa. Asi Ishimaeri akanga asiri mukomana anokanda mapfumo pasi zviri nyore. Akanyengetera sezvakaitwawo naamai vake, uye Mwari akavanzwa. Ngirozi yakaonekwa ikaudza Haga panowanikwa mvura vose vari vaviri vakaponeswa.

Dzidzo yenyaya iyi?

Usakanda mapfumo pasi, kunyange zvinhu zvisina chitarisiro zvachose. Hauzombofa wakaziva zvawakachengeterwa naMwari.

Shoko raTenzi

Genesisi 21: 8-21

Rute

Rute naOpa vaiva vakadzi vaviri vechiMoabhi vechidiki vakaroorana mumhuri yaNaomi, mukadzi wechiIziraeri. Munguva yenzara murume wechidiki waRute akafa, pamwe nababa vaRute nehanzvadzi yakewo. Vakadzi vatatu ava vakasara voga uye vasina rudziviriro. Zvavaingova nazvo kwaiva kubatana.

Varoora ava vose vari vaviri vaiva vechiMoabhi, kwete vaIziraeri, saka Naomi akavaraira kudzokera kumhuri dzavo. Opa akasarudza kuita izvozvo, asi Rute akati kwete. Akanga agoverana kusurukirwa, kuzvidya mwoyo uye kushungurudzika naNaomi, uye akaona kuti chembere iyi yaizosara yoga, naizvizvi Rute akasarudza kusasiya Naomi. Akataura mashoko  makukutu ari mundima iri pazasi achiudza Naomi kuti haafi akamusiya.

Rute akaziva kuti akanga ari murombo, mutorwa, uye muduku – uye hupenyu hwaizomuomera muBhetrehema. Asi akanga akavimbika kumukweguri uyu, uye akanga asingade kumusiya kuti atarisane nematambudziko aya oga. Naomi akaratidza kufara kwake nokurongera musikana uyu muzvinabhizimusi wemuBheterehema.

Rute akateerera zano raNaomi akazova nerudo runoyemurika nemurume waakanga arongerwa – ushingi nekuvimbika kwakakunda mumamiriro ezvinhu akaoma. Rute akabereka mwanakomana ainzi Obedhi, uyo akazova tateguru waMambo David.

Rute akakosha kuvaKristu: Muevhangeri yaMateu, ari pavakadzi vana vakaiswa pakati pemadzitateguru aJesu (Mateu 1: 2-17).

Dzidzo yenyaya yaRute ndeipi?

  • Edza kuona mazano akanaka kana uchinge waanzwa.
  • Usaora mwoyo kunyange zvinhu zvichiita sezvisingafi zvakanaka. Zvinhu zvakanga zvisina kumira zvakanaka kuna Rute, asi akadzikama uye akavimba naMwari akazokapiwa mubayiro nokuda kwekunzwisisa kwake.
  • Wana waunogoverana naye rudo womira naye nyange zviome sei.
  • Koshesa hushamwari sezvakaita Rute naNaomi vakaramba vari pamwechete zvisinei nematambudziko avakasangana nawo uye vanhu vatsva vaisangana nomumwe nomumwe wavo.

Shoko raTenzi

Bhuku raRute 1: 16-17

Chisikana chiduku cheIsraeri

Pane nyaya inoshamisa muna2 Madzimambo 5 yokuponeswa kwaNaamani aiva namaperembudzi. Murungano urwu mune munhu watisinganyatsozivi, murandakadzi wechidiki. Musikana uyu aiva neshungu yokuti vanhu vakamupoteredza vazive Mwari.

Musikana uyu akanga ari mutorwa munyika yaaigara. Akanga ari munyika iyi kwete nokuda kwake. Zvisinei aida vanhu ava vaaiva pakati pavo uye aiva neshungu dzokuti vazive Mwari wechokwadi.

Paakaziva kuti Tenzi wake Naamani akanga ane maperembudzi, akamuudza nezvemuporofita waMwari Erisha uye kuti Mwari akashanda sei kuburikidza nemurume uyu. Naamani akaenda kuna Erisha nokuti akavimba nemurandakadzi wechidiki uyu. Naamani, mukuru weuto reSiriya, akavimba nemashoko emukadzi wechidiki uyu (2 Madzimambo 5: 1-3).

Naamani akaenda kunoona Erisha uye akaporeswa maperembudzi ake. Hatizivi chimwe chinhu pamusoro pemukadzi wechidiki uyu, asi tinoziva kuti aida Tenzi uye vanhu vaakaiswa pakati pavo naMwari kuti avashumire. Aivawo muranda akatendeka uye vimbika.

Dhanieri neshamwari dzake

Pane imwe nyaya inofadza pamusoro pevarume vana vechidiki munaDhanyieri chitsauko chokutanga. Vaifanira kuva vaive nemakore 8 apo vakamiririra chitendero chavo. Vakapiwa zvokudya nekumwa zvakanga zvisingapindirani nechitendero chavo chechiJudha. Vakanga vafarirwa nevatapi vavo pavakati vanoda chikafu chavajaira. Vakamiririra zvavanotenda kunyange vaiva vadiki.

Mugumisiro wesarudzo yavo yekukudza Tenzi nemadyiro avo ndeyokuti Mwari akavapa ruzivo uye unyanzvi mukudzidza nekuchenjera (Dhanieri 1:17). Mundima iyi tinonzwawo kuti Dhanyeri akapiwa simba rokunzwisisa zviroto uye zviratidzo.

Chikomana chaiva nembuva

MuChitenderano Chitsva mune nyaya yemukomana wechidiki akabvuma zvaakanga akumbirwa naJesu. Kristu akanga akakombwa nevanhu vakawanda vaidarika 5000 tisingasanganisire madzimai navana (Johani 6). Jesu akatendeukira kuvadzidzi vake kuti vagadzirise dambudziko rechikafu sezvo vanhu vazhinji vakanga vave nenzara.

Jesu akabvunza Firipi kwavaizowana chingwa chakakwana chokupa boka revanhu vaivapo. Firipi akanga asingazivi, asi akakahadzika kuti zvaigoneka sei netushoma twavakanga vainatwo. Enduru akatsvaka mhinduro. Akawana jaya raiva nezvingwa zvebhari zvishanu netuhove tuduku tuviri.

Chikomana ichi chingadai chakaramba nembuva yacho. Chingadai chakasarudza kutiza. Chaigona kunge chakasarudza kutiza Jesu paakauya achikumbira. Asi chikomana ichi chakabvumidza Jesu kuti atore mbuva yacho. Chakavimba naKristu nezvinhu zvacho kunyange zvazvo chakanga chisingazivi kuti aida kuita sei netunhu tushoma kudaro.

Jesu akatora chingwa uye akatenda Mwari. Akagovera chikafu kuvadzidzi vakatora chikamu chimwe nechimwe chavakapiwa ndokutanga kuchipa kuvanhu vaiva vakavapoteredza. Chakashamisa ndechekuti paiva nezvokudya zvakakwana. Vanhu vose pavakapedza kudya, vadzidzi vakaunganidza zvimedu zvezvokudya zvakasara vakadzosa kunaJesu. Vakaunganidza mabhasikiti gumi azere nezvokudya (Johane 6: 10-13).

Tinofanira kutodzana nemukomana uyu kuburikidza nokupa Tenzi chipi nechipi chaanokumbira kwatiri. Tinogona kusaziva kana kusaona zvaachaita nazvo, asi kana tikavimba naye nezvinhu zvedu uye neupenyu hwedu achaita chimwe chinhu chinoshamisa sezvaakaita nechingwa chishoma.

Abrahamu

Abhurahamu akaudzwa kuti aifanira kuuraya nekupira mwanakomana wake zai regondo se chibayiro. Abhurahamu ainge akazvipira kupira mwana wake sechibayiro ngirozi ikamumisa. Akazopira gondohwe, akaponesa upenyu hwaIsaka mwanakomana wake. Nhoroondo yaAbhurahamu inoratidza simba rechokwadi rekuzvipira, uye kuti pane dzimwe nguva zvauri kutsvaga uye zvaunoda kuzadzikisa zvinogona kuitika nedzimwe nzira dzausingafungiri.

Jona

Haugoni kutiza nokuda kwokutya. Jona akatumwa kuvanhu veNinivha kuti avaparidzire shoko rokutendeuka. Asi haana kuita saizvozvo. Akaguma ava mugungwa pakati pedutu. Akawisirwa mugungwa akapona ndokumedzwa nehove. Rungano urwu rwunotidzidzisa kuti kutiza zvinotyisa hakushandi. Unofanira kuzama kukunda.

Esita

Esita akasarudzwa kuti ave mambokadzi wavaJudha. Esita akafumura urongwa hwokuuraya mambo zvinova zvakabatsira kuponesa upenyu hwavana veIziraeri vazhinji. Ugamba hwake ndihwo hwakaita kuti pave nemhemberero dzePurim Jewish Holiday. Kugona kwake kumira oga achiramba kuteerera huori hwavanyamasimba kunoratidza kuti hatifanire kutya kana tichityisidzirwa nevaipi vane simba – mari noupfumi hazvifanire kutitadzisa kumiririra chokwadi.

Kurera nhubu yemwana

Posted by MC on April 26, 2018
Posted in: Nyaurwa, Zvinyorwa. Leave a comment

© Mukakope nhaurwa iyi musina mvumo

rude child

Mitemo

Dzika mitemo mishoma uye yakajeka pamusoro pehunhu nekukurukurirana anotarisirwa mumba menyu. Unogona kuti, ‘Mumba muno munotaurwa noruremekedzo uye atisvotesane namazita’.

Zvinobatsira kana mukagadzira mitemo iyi muri pamwechete nemwana nokuti anozorangarira kuti akabatsira pakugadzirwa kwemitemo iyi uye akabvumirana nayo.

Nangana nemaitiro chete

Kana uchitsiura mwana nangana nemaitiro ake uye nezvaunonzva pamusoro pamaitiro aya. Rega kutaura pamusoro pezvaari. Kunze kwokuti ‘Uri nhunzvatunzva’ edza kuti ‘Ndinorwadziwa paunotaura sezvizvi kwandiri’. Budawo pachena maererano nezvaunozwa asi uchitaura zvakanaka. Somuenzaniso ‘Ndiri kunzwa kukutsamwira parizvino. Iwe uri kunzwa sei?’

Dzikai migumisiro mishoma yamaitiro asingagamuchirwe, akaipa. Unogona kuva nemigumisiro yemaitiro ekusvotesa, kunyomba kana kutaura zvakaipa kune vamwe.

Dzikama

Zvakakosha zvikuru kudzikama kana mwana wako achinyenama pamunoedza kukurukurirana. Mira, tura befu wozoenderera mberi nezvawanga uchida kutaura wadzikama.

Nyevenuka

Kusekedzana kunonyevenutsa zvinhu, kunounza maonero matsva uye kunorerutsa mafambiro ehurukuro. Kunyevenuka kunobatsirawo kupodza zvinhu – asi usait seuiri kuusaswereredza, kuseka kana kusvotesa.

Furatira zvimwe

Usacherechedza kuzunza mapendekete, kufinyamisa kumeso netumwe twakadaro kana mwana wako achiratidza unhu hwakanaka nguva zhinji.

Tarisa kunzwisisa kwako

Dzimwe nguva mwana anotadza kuremekedza asina chinangwa chokusakuteerera. Zvinobatsira kutaura naye sezvizvi: ‘Mashoko ako aratidza kusaremekedza. Ndizvo zvawanga uchireva here?’

Rumbidza mwana wako paanotaura zvine ruremekedzo. Kana ataura zvakanaka muudze. Muratidze kuti unoziva kukosha kwemaonero ake.

Iva muenzaniso wakanaka.

Paunenge uine mwana wako, edza kutaura pamwe nokuita zvaunoda kuti ataure nokuita kwauri. Kana uchitaura zvinyadzi kakawanda mwana wako anogona kutadza kunzwisisa kuti sei iye achirambidzwa iwe uchizviita.

Musakakavadzana

Kukakavadzana nemwana hakuwanzoshanda. Kana tikatsamwa, tinogona kutaura zvinhu zvatisingarevi uye zvatinodemba. Zvinobatsira ndezvekuzvipa iwe nemwana wako nguva yekudzikama.

Kana wakatsamwira kana kuti uri pakati pekukakavadzana, zvakaoma kugadzirisana zvakanaka nokuudza mwana wako zvauri kuda wakadzikama. Zvinobatsira ndezvekuudza mwana wako kuti unoda kutaura naye mowirirana nguva.

kuzvichenesa hakuwanzobatsiri.

Edza kusatora zvinhu sezvakanangana newe nguva dzose. Pamwe unozoona kuti mwana wako ari kuedza kuzvimiririra.

Kunyangwe uine ruzivo rwakawanda maererano nohupenyu kupinda mwana wako, kunyanyomutsanangurira kunomusvibisa mwoyo agosvika pakurega kukuteerera. Kana uchida kuti mwana wako akuteerere unofanira kupedza nguva uchimuteererawo.

Kusimbirira zvinhu hakuna zvakunobatsira. Kunondowedzera kushungurudzika kwako, uye mwana wako anogona kungoisa zvigunwe munzeve.

Kusvotesa

Kusvotesa mwana kunoita kuti akuvenge uye aswedere kure newe.

Kushungurudzika

Posted by MC on April 21, 2018
Posted in: Nyaurwa, Zvinyorwa. Leave a comment

Stress

Usashungurudzike

Munhu wese anotosvika pakutambura nekushungurudzika, uye vaKristu havasiiwe nezvinetso nematambudziko ehupenyu.

Kushungurudzika kunowanzokonzerwa nekuneta, kurwara, kuva panzvimbo yausina kujaira nezvimwe. Paunotora mabasa akawanda, panguva dzekutambura nenjodzi, uye apo zvinhu zvapidiguka unonzwa kushungurudzika. Kana zvaunoda zvisingawaniki, unonzwa kushushikana.

VaKristu vazhinji tinotendera kuti Mwari ndiye changamire uye anotonga upenyu hwedu. Tinotenda kuti anotipa zvose zvatinoda kuti tirarame. Saka, kana tichishungurudzika zvikuru tinopedzisira tisisavimbe naMwari.

Kushungurudzika uye kuzvidya mwoyo kwemuKristu kunogona kuitika nenzira dzakasiyana-siyana. Zvinogona kuratidzika nekuswedera kure naMwari kana kuvhiringika kukuru.

Zvisinei kuti zvaitika sei, kushungurudzika kunotikundikanisa panyama, mumweya nemupfungwa. Tinofanira kushonga zvombo zvinotibatsira. Haano mazano angatibatsira

1.    Ziva Dambudziko.

Kana waziva kuti pane zvisina kumira zvakanaka nzira yekukurumidza yekugadzirisa zvinhu ndeyekubvuma kuti une dambudziko.

Dzimwe nguva hazvisi nyore kubvuma kuti wangobatirira nepadiki uye kuti zvinhu hazvina kukumirira zvakanaka.

Kuziva chinetso kunoda kutendeseka pakuzviongorora uye kunoda kuzvininipisa. Nziyo 32:2 inoti,

“Akakomborerwa munhu asingaverengerwi zvakaipa naTenzi; asina kunyengera pamweya wake.”

Kana tikakwanisa kutarisana nokutendeseka nedambudziko redu,  tinotanga kutsvaga rubatsiro.

2.      Zvipei zororo wotsvaga rubatsirwa.

Rega kuzvisvora. Ziva kuti: uri munhu. Unorarama munyika ine matambudziko asingadzivisiki. Chinonyanya kukosha ndechekuti tinofanira kutendeukira kuna Mwari uye kune vamwe kuti tibatsirwe.

Zvaunenge waona dambudziko rako unochigona kutora matanho ekuzvibatsira nekutsvaga rubatsiro rwakakodzera. Kana iri nyaya yokuti hausi kuwana zororo, tora nguva yekudzoreredza muviri nenyama yako. Idya kudya kwakakodzera, simbisa muviri nguva dzose, tanga kudzidza kushanda zvine mwero. Unogona kutsvaga rubatsiro kubva kushamwari dzinomira newe uye dzinokunzwisisa zvauri kusangana nazvo.

Kana uri kurwara, kana kuti uchangobva mukurasikirwa kana kuva nerimwe dambudziko, unogona kumbodzora mashandiro ako. Zvipe nguva nemukana wekupora.

Kushungurudzika kwako kunogona kuva kuchikonzerwa nemakemikari kana zvimweyo zviri munyama yako. Pakadaro unogona kunoona chiremba kuti akubatsire kuona pane dambudziko nezvingaitwe.

Idzi inzira dzinobatsira dzekuedza kupedza kushungurudzika muupenyu hwako. Asi usakanganwa rutivi rwemweya.

3.      Tendeukira kunaMwari mumunyengetero

Paunokundwa nekuzvidya mwoyo, kushushikana, nekurasikirwa unofanira kutendeukira kuna Mwari.

Anogara akamirira kukubatsira munguva dzekutambudzika. Bhaibheri rinokurudzira kuturira zvose kwaari mumunamato.

Ndima yemunaVaFiripi inopa vimbiso inonyaradza yokuti patinonyengetera, pfungwa dzedu dzichawana runyararo rusingaverengeki:

Musafunganya pamusoro pechinhu chimwe; asi pazvinhu zvose, mikumbiro yenyu ngaiziviswe Mwari nokunyengetera nokukumbira, pamwe chete nokuvonga.  Zvino rugare rwaMwari runopfuvura kunzwisisa kwose, rucharinda moyo yenyu nemifungo yenyu munaKristu Jesu (VaFiripi 4: 6-7).

Mwari anovimbisa kutipa rugare rwatisinganzwisise. Anopikirawo kuunza runako kubva kumadota ehupenyu hwedu apo tinoona kuti tariro inouya kubva mukurasikirwa uye kuti mufaro unobva pakutambura (Isaya 61: 1-4).

4.      Ita ndangariro neShoko raMwari

Bhaibheri rakazara nevimbiso dzinoshamisa kubva kuna Mwari.

Kufungisisa pamusoro pemashoko aya evimbiso kunogona kubvisa kushungurudzika kwedu, kusava nechokwadi, kutya, uye kushushikana. Heino mimwe mienzaniso mishomanana yezvinyorwa zveBhaibheri zvinoderedza kufungisisa ndima:

2 Pita 1: 3

nokuti nesimba rovuMwari hwake takapihwa zvose zvinodikanwa pavupenyu napakunamata Mwari, nenzira yokumuziva iye wakatidana nokubwinya kwake nokunaka.

Mateo 11: 28-30

Vuyai kwandiri imi mose makaneta makaremerwa. Ini ndichakuzorodzai. Muise joko rangu pamusoro penyu, mudzidze kwandiri nokuti ndiri munyoro. Ndinomoyo unozvininipisa kuti muwane zororo pamweya yenyu. Nokuti joko rangu rakanaka, nomutoro wangu unoreruka.

Johani 14:27

Ndinokusiyirai rugare; ndinokupai rugare rwangu handikupiyi sokupa kwenyika. Moyo yenyu irege kumanikidzwa, irege kutya.

Nziyo 4: 8

Ndicharara pasi nerugare, ndibatwe nehope; Nokuti ndimi moga Jehovha munondigarisa pakasimba.

5.      Shandisa Nguva yako kutenda nekurumbidza

Mumwe akati, “Hazvigoneki kushungurudzika nekurumbidza Mwari panguva imwechete.” Kurumbidza nekutenda kuchabvisa pfungwa dzedu kubva pamatambudziko edu, kuchitinangisa pana Mwari. Patinotanga kurumbidza nekunamata Mwari, matambudziko edu anoita semadiki atarisana nehukuru hwaMwari.

Ushamwari

Posted by MC on April 20, 2018
Posted in: Nyaurwa, Zvinyorwa. Leave a comment

1.    Kusarudza

Chokutanga unofanira kusarudza.

“Munhu ane shamwari zhinji anoparadzwa; Asi iriko shamwari inonamatira kupfuura hama.” (Tsumo 18:24).

Chirevo ichi chinotiyeuchidza kuti munhu wose haagoni uye haafaniri kuva hama yako yepadyo. Unaku hunofanira udarika huwandu panhau yeushamwari. Sarudza shamwari dzako nohuchenjeri uye wobva ramba uinavo.

Unofanira kusarudza ushamwari zvakanaka nokuti shamwari dzakaipa dzinounza matambudziko.

“Fambidzana navakachenjera, ugova wakachenjerawo; Asi shamwari yamapenzi inoshatiswa.” (Tsumo 13:20).

Unhu hunobatira pamwe nokudzidziswa.

“Usashamwaridzana nomunhu anotsamwa; Usafambidzana nomunhu ane hasha; Kuti urege kudzidza tsika dzake, Uteyire mweya wako musungo” (Tsumo 22: 24-25).

2.    Tsvaga wapadhuze

Ukama hunosimba kana muri pedyo. Kuva kure nekure kunoita kuti ushamwari huome. Unoda shamwari dzinogara pedyo newe.

“Usasiya shamwari yako neshamwari yababa vako; Usaenda kumba kwomunun’una wako nezuva renhamo yako; Wokwako, ari pedo, anopfuura munun’una uri kure” (Tsumo 27:10).

Izwi rokuti “muvakidzani” rinoshandura shoko rimwechete rechiHebheru se “shamwari.” Izvi zvinotiyeuchidza kuti ushamwari hunechekuita kwete nekugovana zvido chete asi kuva panzvimbo imwechete. Kana shamwari dzikasava pamwechete dzinoramba dzichiswedera kure nakure.

3.    Miganhu

Iva nemiganhu. Ziva nguva yekumbosiya shamwari yako iri yoga. Dzidza kupa shamwari yako mukana wokuva pachake.

“Rutsoka rwako ngarurege kuwanza kupinda paimba yowokwako; Arege kuzoneta newe, akakuvenga.” (Tsumo 25:17).

4.    Humwe

Munofanira kuva nezvinokubatanidzai. Ushamwari hunoumbwa navaviri. Muushamwari hwechokwadi, mose munogoverana. Mumwe nomumwe anoita pake, munobatsirana. Kuti uve neshamwari, unofanira kuva shamwari.

“Mafuta nezvinonhuwira zvinofadza moyo; Ndizvo zvinoitawo kunaka kwoushamwari hwomunhu kunobva pakuyanana kwemweya.” (Tsumo 27: 9).

“Simbi inorodza simbi; Saizvozvo munhu anorodza chiso cheshamwari yake.” (Tsumo 27:17).

Ushamwari hunoda kupindirana nekugoverana zvinhu zvimwechete. C. S. Lewis anotsanangura kusiyana kworudo noushamwari:

Tinoona mufananidzo wevanodanana vakatarisana asi shamwari dziri parutivi-neparutivi; maziso avo akatarira mberi … CHinoita kuti tiwane shamwari ndechekuti panezvatinofanira kuda kunze kwoushamwari … Ushamwari hunofanira kuva hwechimwe chinhu … avo vasina chinhu Havana chokupa; avo vasina kwavari kuenda havana vafambidzani.

Ichi ichokwadi. Ushamwari hunoumbwa nechimwe chinhu chakaita sekufarira mabhuku, mimanzi, mafirimu, mitambo imwechete, daidzo imwechete zvichingodaro. Shamwari yako inogona kusafarira zvose zvaunofarira asi mune chimwe chinhu chinokubatanidzai.

Shamwari inofanirawo kuva inokurodza. Simbi dzinorodzana. Shamwari yakanaka haisi iyo inongogoverana newe zvekufarira chete asi inokuita kuti ufunge zvitsva, utange zvitsva; inokubatsira kugadzirisa utera hwako.

5.    Ruremekedzo

Ushamwari hunoda ruremekedzo. Ruremekedzo ndiyo nheyo yehukama hwakanaka. Imwe yenzira dzinokosha dzatinoratidza ruremekedzo ndeyokuti tinotaura sei neshamwari dzedu kana dzisiri pedo.

“Rangana nowakaipa pamusoro pemhosva iri pakati penyu, Asi usareurura zvakavanzika zvomumwe; Kuti mumwe anozvinzwa arege kukutuka, Gungwa rako rikasaguma.” (Tsumo 25: 9-10).

Neimwe nzira, usatarisira kuchengetedza shamwari kana uchiinyeya isipo. Shamwari yakanaka inoziva nguva yokutaura uye nguva yokunyarara.

“Anoninipisa wokwake anoshaiwa uchenjeri; Asi munhu ane njere anoramba anyerere.” (Tsumo 11:12).

6.    Buda pachena

Ruremekedzo runoenderana nokubudirana pachena.

“Kurairwa pachena kunopfuura Rudo rwakavanzwa. Mavanga anotemwa neshamwari angatendwa, Asi kutsoda kwomuvengi kunonyengedza.” (Tsumo 27: 5-6).

Shamwari yechokwadi inokubaya nemberi. Tsvaka shamwari dzinozotendeseka kwauri, kunyange dzichizokurwadzisa norudo.

7.    Ruregerero

Hapana ushamwari hunorarama pasina kukanganwirana.

“Munhu anofukidza kudarika kwomumwe, anotsvaka rudo; Asi anoramba achimutsa shoko, anoparadzanisa shamwari dzinodana” (Zvirevo 17: 9).

Izvi zvinotidzidzisa kuva nerupo pakupa chipo chekuregerera kushamwari dzedu, nekufukidza zvikanganiso zvavo. Shamwari yechokwadi inononoka kuona zvikanganiso zvako. Shamwari yechokwadi haikurasire kure nokuda kwetunhu tudiki twamunenge manetsana.

8.    Kuramba muchidana

Shamwari yakanaka inoramba iinewe.

“Shamwari inoda nguva dzose; Hama inoberekerwa kuti ibatsire pakutambudzika. 18 Munhu anoshaiwa njere, ndiye anozvisunga noruoko rwake, Achizviitira wokwake rubatso” (Zvirevo 17:17).

Mwoyo wehushamwari kuramba muri murudo. Chiyero chikuru cherudo kuzvipira.

“Hakunomunhu unorudo rukuru kunourwu, kuti munhu arashire hama dzake vupenyu bwake” (Johani 15:13).

Izvi ndizvo zvakataura neshamwari huru, Jesu pachake, shamwari yevatadzi, uyo ane kukanganwira kusingaperi, ane rudo rusingambofi.

Mitemo Gumi

Posted by MC on April 10, 2018
Posted in: Nyaurwa, Zvinyorwa. 1 Comment

© Musakope nhaurwa iyi musina mvumo.

Sei tichipiwa mitemo?

Mutemo wakapihwa kuvana veIziraeri kuti vave nouchenjeri. Vakaupihwa kuti usimbise ukama hwavo naMwari uye kuti vagarisane zvakanaka munharaunda yavo pamwe nemusangano ravo rokunamata.

Mitemo iyi inoitirwa kuti itibatsire kuva sangano dzvene, sangano rinonamata Mwari mumweya nomuzvokwadi, sangano rinogara muruenzaniso nomurudo. Tinoitirwa kuti tiremekedze vavakidzani vedu uye tiremekedzane isu pachedu. Pokupedzisira tinotarisirwa kuziva, kuremekedza nokunamata Mwari musiki wedu.

Mitemo gumi mazano makumi.

1.     Anotiratidza zviri Mwari

Anotiratidza uyo anoda kutivaka, anotidzidzisa kuti kuba kwakaipa, upomwe hwakaipa etc. Havasi vakawanda vanovimbika zvokuti vanoda kutivaka. Vazhinji vanouya kwatiri vachida kutirasisa, kutibira nokutinyepera. Iye anouya nomwoyo munyoro achitivaka.

2.     Anotitsiura

Mitemo gumi mazano anotiratidza zvatiri. Iwe uri munhu akaita sei? Uri munhu here anofanira kuyeuchidzwa kuti remekeddza Mwari, midziyo yavamwe, upenyu hwavamwe etc? Mazano aya anotiti tisabe, tisaitire vamwe utsinye, tibate vamwe noruenzaniso.

3.     Anotidzidzisa

Mitemo gumi mazano anotidzidzisa. Tinodzidziswa kuvamba nzira itsva, kufamba nenzira yenyasha dzaMwari. Mitemo yose iyi inotidzidzisa kupa pane kutorera, ruenzaniso pane utsinye, kuvimbika pane kunyengedza, kuzvidzora, kubhadhara zvikwereti nenguva, kuita zvinhu nomwoyo wose, kuita vimbiso dzisiri dzemanyepo etc.

4.     Vimbiso

Mitemo gumi zvivimbiso. Mwari anovimbisa kuti achanyora mitemo mitsva mumwoyo yedu. Anobvisa mitemo yake mupapepa ezvinyorwa zvinoera achiudzika mumwoyo yedu. Isu tinova vanhu vanoremekedza mitemo gumi kana ikasava mazwi atinoverenga chete asi atinorarama uye agere mumoyo medu.

Mararamiro evana vaMwari

Mitemo Gumi inotidzidzisa mararamiro anofanira kuita Mwana waMwari.

  1. Mwana waMwari anofanira kunamata Mwari oga kwete zvimwe zvinhu zvakaita sevaimbi, vezvematongerwo, vafundisi, mari, zviwanikwa, bonde nemotokari dzinoshamisira. Mwari ndiye anofanira kuva wokutanda muupenyu hwovana vake.
  2. Mwana waMwari anoziva kukosha kwamazita saka haadane nhando zita raMwari. A brand is important and must be protected all the time.(Econet)
  3. Mwana waMwari anosiira Mwari zuva resabata nokuenda kumisa uye kurega kutungamidza mamwe mabasa nezvimwe zvinhu. (attention)
  4. Mwana waMwari anoremekedza vabereki vake nevamwewo vakuru vake vakaita savadzidzisi, mapurisa, vafundisi etc.
  5. Mwana waMwari anoremekedza upenyu sechipo chinobva kunaMwari pachavo.
  6. Mwana waMwari anoremekedza mhiko dzomuchato dzaakaita nokusaita upombwe.
  7. Mwana waMwari haabe kana kunyengedza.
  8. Mwana waMwari haanyepi nokuti anoziva kuti Satani ndiye zibaba remanyepo ose.
  9. Mwana waMwari haarwadzirwe kubudirira kwavamwe asi anototenda Mwari kuti vakamutenderedza vari kubudirira.

Kusarudza mudikani

Posted by MC on March 8, 2018
Posted in: Muchato noUkama, Nyaurwa, Zvinyorwa. Leave a comment

Nhanganywaya

Vamwe vanhu vanetsika yokudhonza vanhu vasingaite vachipinda navo muukama hworudo. Havagoni kukweva vanhu vasvinu. Haano mazano anokubatsirai kutsvaga munhu akafanira:

  1. Usaita sarudzo nekuda kwekutya. Kazhinji vanhu vanosarudza mudiwa wavo kana kuramba vari muukama husina mufaro nokuda kwekutya. Kutya kuva woga kana kusiyana nemumwe wako. Asi zviri nani kuva woga nekumirira munhu chaiye pane kuita sarudzo inotungamirirwa nokutya. Kuita sarudzo nokuda kokutya kunokonzera kuvhiringidzika nokuzvidya mwoyo.
  2. Ngwarira kujambira muukama wobva watozvipira chiriporipo. Muedzo ndewekuda kumhanyira kupinda muhukama hwakagadzikana nokukurumidza paunosangana nemunhu anokubata mwoyo asi usinganyatsomuziva. Nekufamba kwenguva unogona kuzoona zvimwe zvinhu zvausingafarire paari kana kuti hamupindirane zvachose. Nekuda kwekuti unenge wakurumbidza kuperera paari zvinokurwadza zvakasimba. Usamhanyire kuperera, tora nguva yako uve nemwoyo murefu usati wasarudza kuperera pane munhu.
  3. Ipa mukana kumunhu waungangodaro usingapi mukana. Usakurumbidza kuti uyu haaite nekuti ‘haisi type yangu’. Rangarira kuti rudo runokura nokufamba kwenguva pamunotanga kuzivana unhu hwenyu zvakadzama. Vamwewo vanhu vanotora nguva yakarebesa vachida kuziva munhu vasingatore mukana wekupinda murudo. Mvura yakanyarara kazhinji yakadzika saka dzimwe nguva ukasatora mukana haumbofa wakaziva udzamu hwemunhu.
  4. Usatarisira zvakawandisa. Vazhinji vane hunhu nezviito zvakawanda zvavanotarisira pane anozova mudiwa wavo. Ukanyanyosimbisa zvitarisiro zvako dzimwe nguva uchapfuurwa nemunhu akanaka. Hazviiti kuwana munhu akarurama.
  5. Cherechedza unhu hunoratidza kuti munhu anoita mudiwa akanaka asi usave nenhongwa. Ongorora kuti ane tsitsi, akavimbika, akatendeseka, ane mutsa uye anogamuchira pfungwa dzevamwe here. Kana munhu aine unhu uhwu edza kuswedera padyo naye kunyange achiratidza sokunge asiri mhando yako. Pane zvimwewo zvaunogona kutarisa zvakaita se ‘mweya wekuseka’, ‘kuenda kunyika dzakawanda’ , ‘kugona kutamba’ asi zvinhu izvi hazvina kukoshesesa.
  6. Usatungamirirwe neruchiva. Vazhinji vanotirira zvinhu zvenhando kubva kune mumwe munhu nekuti vakaperera. Havi dzakanaka asi hadzigare dziripo. Usapesanise kunzwira munhu havi nekupinda murudo chairwo. Nyange uchinyatsonzwira munhu funga nezveramangwana.
  7. Tsvaga munhu waunosununguka kuva padyo naye. Kuva nemunhu asingakutonge anokugamuchira chinhu chakanaka uye chinokupa rusununguko. Zvinooma dzimwe nguva muupenyu kuwana munhu anokuita kuti uve zvauri. Ukama hunofanira kuita kuti unzve kuchengetedzwa nekudekara pane kurarama upenyu hwemanyepo.
  8. Usamirire kuti munhu ashanduke nekuti hazviitike. Ukaramba uri muukama hwaunonyatsoziva kuti haushande unenge uchitozvivharira mukana nemunhu akakufanira. Iva nechokwadi nezvaunogamuchira uye zvausingatambire. Kana uchinyatsoziva zvaunoda zviri nyore kubuda muukama ukaona kuti hapana kwahuri kuenda.
  9. Ukasazviomesera unova nomufaro, unosununguka uye unodhonza munhu akakufanira.
  10. Kazhinji munhu anokuudza zvaari – unofanira kuteerera! Kana munhu akati ndinombomudhura kana kuti handigone kuva nemunhu mumwechete teerera. Usati pamwe achachinja.
  11. Tsvaga munhu anemwoyo munyoro nerudo. Zvinobatsirawo kuita hama dzemumwe wako vanemwoyo wakanaka, zvinoita kuti upenyu hureruke.
  12. Wana munhu waunogona kukurukura naye. Nekufamba kwenguva unhu hwemunhu hunokosha kudarika chimiro chake kana chigaro chaainacho. Unogona here kutaura nemumwe wako nokuchemera pabendekete rake?
  13. Natsa kuti munopindirana pane zvimwe zvinhu zvakakosha. Kana iwe uchida vana mumwe wako asingadi zvinogona kunetsa. Kusiyana kwechitendero nezvematongerwo kwakakosha. Zera rinofanira kutariswawo zvekare.
  14. Ngarira munhu anoda kuti muroorane chiriporipo. Zviri nani kutora kanguva kekuziva munhu pane kuzodemba.
  15. Tsvaga munhu anoita kuti useke anokufadza. Kana munhu achiudza nyemwerero paunenge wakasuwa chinhu chikuru ichocho.

 

UNOONA SEI KUTI URI KUSHUNGURUDZWA?

Posted by MC on March 7, 2018
Posted in: Muchato noUkama, Nyaurwa, Zvinyorwa. Leave a comment

Dzidza kuona kana runoita se‘rudo’ kuri kushungurudzwa. Dzimwe nguva vanhu vanochengera vachishandisa manzwiro erudo emumwe wavo. Kushungurudzwa kunouya nenzira dzakawanda, as iwe unofanira kugona kuona yambiro yacho ugobatsirika.

  • Nzira inowanzoshandiswa ndeyekupiwa rudo zvine miko, kudiwa maererano nezvawaita kana kusaita. Izvi zvinogona kuratidzwa nemashoko kana maitiro akaita sokuti, ‘Dai waindida chaizvo wai …’ kana kuti ‘Ndinokuda asi …’
  • Imwe nzira inoshandiswa pakushungurudza ndeyokutyisidzirwa kurambwa kana kurega kudiwa kana ukasaita zvinodiwa. Somuenzaniso, Kana ukasa … ndinokuramba, handichazokudizve.’
  • Vashungurudzi vanogonawo kutamba nekutya kwako kukuita kuti uteerere zvavanoda. Somuenzaniso vanogona kukuudza kuti ‘hapana munhu achakuda semadiro andinokuita.’ Kana kuti ‘hapana munhu achakuda kana ndikakusiya.’

Kana ukaitirwa chimwe chezvinhu izvi muukama hwako ziva kuti ungangodaro uchishungurudzwa. Kushungurudzwa hakufanire kuitika. Wakasikirwa zviri nani. Taura nomupriste ubatsirwe.