Mazuva Makuru

Kristo Mambo Gore C

Posted by MC on November 24, 2019
Posted in: Mazuva Makuru, Mharidzo. Leave a comment

1      Mutungamiri anofanira kubvuma mhosva

Bhuku raSamueri rataverenga rinotiudza nezvemadzimambo maviri: Sauro naDhavhiti. Tikaongorora tinoona kuti Sauro anosvorwa nekuti haana kuteedzera gwara raidiwa pakupira mipiro uye akatadza kuuraya mambo Agagi. Dhavhiti Norumwe rutivi aivewo nezvitadzo zvake. Akaita upombwe nemukadzi wemunhu – Bhatishebha – akauraisa murume wake Uraya. Asi zvisinei Nokuti vese vaive nezvikanganiso zvavo, Sauro anobviswa pahumambo Davhiti anorumbidzwa.

Rungano urwu runotidzidzisa kuti vatungamiri vanokanganisa asi zvavanoita mushure mekukanganisa ndizvo zvinosiyana. Sauro anoramba kuteerera Mwari maererano navaAmereki muna1 Samueri 15. Haabvumi zvekare kuti atadza kuteerera. Anopa tsanangudzo dzakawanda dzekuramba mhosva. Norumwe rutivi muna2 Samueri 12:13 Dhavhiti paanosvikirwa naNathani achiudzwa mhosva yake anoti “ndatakatadzira Mwari.” Dhavhiti anobvuma mhosva yake nekureurura. Nokuda kwaizvozvo anoregererwa naMwari ova mutungamirira ane mukurumbira anodiwa navanhu naMwari. Mutungamiri anokanganisa. Mutungamiri chaiye anobvuma mhosva dzake nekureurura zvivi zvake.

2      Vimba naTenzi

Vana veIsraeri vakapopota vakamacha vachiti vanoda mambo wapasi pano sedzimwe nyika dzakakomberedza. Chishuvo chavo chakaitika asi Samueri akavayambira kuti vakada kutemba nemunhu wenyama semutungamiriri wavo mutungamiriri uyu achavapandukira. Akavakurudzira kunamata Mwari kwete munhu wenyama. Mashoko aSamueri akaitika. Dhavhiti anyepa uye aiva noruchiva. Dhavhiti airaradza zvekare. Munhu wenyama anorasira. Unogona kusvika pakuuraya kuti apinde pachigaro asi kana achinge avapo anobva aita upombwe, kuraradza, upenyu hwapamusoro nekunyepa. Vimba naTenzi kwete munhu wenyama.

3      Mambo anozvidukupisa

MuDama Rakanaka tiri kuona Kristo Mambo vanoita kuda kwaMwari nyange vachinyadziswa, vachinyombwa vari pamuchinjikwa. Muhupenyu hwake hwose Jesu haaatsvage kuda kufevherwa nevezvematongerwo enyika kana kuda kufadza vanhu nenhema. Jesu anoita kuda kwaMwari. Isuwo tinofanira kuita kuda kwaMwari nyange zvodii. Tinova vatengesi kana tikatadza kutsiura vamiririri vedu muparamende, vamiririri vedu mukanzuru, vatungamiri vedu kumabasa. Tinova vatengesi kana tikada kunakidza vatungamiri vepasi pano tisingaiti kuda kwaMwari.

Zuva raVaTsvane Vose

Posted by MC on November 2, 2019
Posted in: Gore C, Mazuva Makuru, Mharidzo. Leave a comment

Zuva raVaTsvene Vose: Kuona

Dzimwe nguva tinorarama takavharirwa muhupofu hwedu. Kubva pakuzvarwa tinopihwa mumwe mufananidzo ‘hwehupenyu hwakanaka’. Hupenyu:-

  • hwemotokari dzinodhura,
  • hwenzendo dzekure kune mafaro,
  • hwemadhidhindi,
  • hwedzimba dzakanakisa nezvimwe.

Tinoudzwa kuti upenyu chaihwo hupenyu hwekunge wakasununguka, pasina mitemo inokusungirira uye uchiwana zvose zvaunoda. Tinoratidzwa mufananidzo wokuti hurombo, nzara nokushaya hupenyu hwokutukwa.

Orijeni wokuArekizanda akati ‘hutsvene kuona namaziso aKristu’.

Terihadhi dhi Chadhini akatiwo donzvo rake somuKristu nderekubatsira vanhu kuti vaone.

Tomasi Akwainai akataura achiti chinangwa chikuru chohupenyu hwechiKristu kuona.

Mumwe mudzidzisi wechitendero chechiJudha anonzi Harodhi Kushina anonyora mubhuku rake achiti ‘Hwaro hwechitendero hausi muunganidzwa weminamato kana mitorododo yemipiro. Chikuru pachitendero kuona. Izvi hazvishandure nyika yatinogara asi zvinoshandura maonero atinoita zviripo uye izvozvi ndizvo zvinoita kuti pave nomusiyano.’

Vasande vanhu vanoona nokuita zvimwe zvinhu pamusoro pezvavanenge vaona. Vanhurume navanhukadzi vanoona nemaziso aKristu. Nemaitiro aya vanoona zvakakosha, zvinofanira kukosheswa uye minongedzo yoururami.

Zuva raVaTsvene Vose: Kuona

Posted by MC on November 2, 2018
Posted in: Mazuva Makuru, Mharidzo, Svondo raVatsene Vose. Leave a comment

Dzimwe nguva tinorarama takavharirwa muhupofu hwedu. Kubva pakuzwarwa tinopihwa mumwe mufananidzo ‘hwehupenyu hwakanaka’. Hupenyu hwemotokaari dzinodhura, hwenzendo dzekure kune mafaro, hwemadhidhindi, hwedzimba dzakanakisa nezvimwe. Tinoudzwa kuti upenyu chaihwo hupenyu hwekunge wakasununguka, pasina mitemo inokusungirira uye uchiwana zvose zvaunoda. Tinoratidzwa mufananidzo wokuti hurombo, nzara nokushaya hupenyu hwokutukwa.

Continue Reading

Svondo raVatsvene Vose – Zvapupu zvorudo

Posted by MC on November 2, 2018
Posted in: Mazuva Makuru, Mharidzo, Svondo raVatsene Vose. Leave a comment

Vasande vanhu vakava nechivindi chokurarama upenyu hweChiKristu. Upenyu hwavo ikurudziro huru kwatiri. Asi zviri nyore kurasika pakutevedzera vasande ava. Tinogona kuvashandura kuvazvimwari. Tikadaro kuvatevera kunova mhingidzo kwete rubatsiro muchitendero. Continue Reading

Svondo raVaTsvene Vose – Hunhu hunotarisirwa

Posted by MC on October 30, 2018
Posted in: Svondo raVatsene Vose. Leave a comment

Mumakomborero ari kududzwa naJesu pavadzidzi vake tinoona hunhu hwaanoshuvira pavari. Mashoko aya anoshandura maonero namafungiro amazuva ose.

Nyika inoti ‘Vakakomborerwa vapfumi, nekuti vane zvese zvavanoda.’ Asi Jesu anoti, ‘Vakakomborerwa varombo pamweya.’ Kana achiti ‘varombo pamweya’ anoreva avo vanovimba naMwari kwete nemari; avo vanoziva kuti hausi huwandu hwemari yavainayo hunovapfumisa asi hunhu hwavo.

Nyika inoti ‘Vakakomborerwa vanorarama mutambaara tede.’ Asi Jesu anoti ‘Vakakomborerwa vanochema.’ Vanhu vanerudo ndivo chete vanogona kuchema. Ukazarurira mwoyo wako kune vamwe watovhua mukana wekugoverana navo mitoro yavo nekusuwa kwavo.’ Kurarura mwoyo wako ndiko kuvamba upenyu.

Nyika inoti ‘Vakakomborerwa vakasimba vane simba.’ Asi Jesu anoti ‘Vakakomborerwa vakapfava.’ Kupfava hazvirevi kuva neutera sezvinofungwa navazhinji. Kupfava kunoreva simba guru rakanaka. Pane zvikuru zvakawanda zvinogonekwa nerupfave bedzi.

Nyika inoti, ‘Vakakomborerwa vanenzara yesimba, zvinzvimbo, nembiri.’ Asi Jesu anoti ‘Vakakomborerwa vanenzara yoururami.’ Kurarama zvakarurama ndozvinoreva upenyu. Vanozvikoshesa sekukoshesa kwavanoita kudya nekunwa racharaiddza mufaro wechokwadi.

Nyika inoti ‘Vakakomborerwa vasingaratidze tsitsi.’ Jesu anoti ‘Vakakomborerwa vanoitira vamwe tsitsi.’ Vanhu vanonzwisisa kukoniwa kwavamwe vachawana mufaro, vanhu vakadai vanochipo chekuregerera. Vanhu vakadai vanoitirwa nyasha naMwari pazvivi zvavo.

Nyika inoti ‘Vakakomborerwa vane nzara, mazino neganda rakachena.’ Jesu anoti ‘Vakakomborerwa vane mwoyo yakachena.’ Mumwoyo medu ndimo munobva pfungwa, mazwi nezviito zvakanaka. Kana mwoyo wakachena zvose zvinobva mauri zvinenge zvakachena.

Nyika inoti ‘Vakakomborerwa vanokonzera mhirizhonga nevanovamba hondo.’ Jesu anoti ‘Vakakomborerwa vasakisi vorugare.’ Vakakomborerwa vanoparadzira kunzwisisana pakati pavanhu, vanogamuchira vatorwa, vanoshandira nyika ineruenzaniso. Vanhu ivavo vana vechokwadi vaMwari.

Nyika inoti ‘vakakomborerwa vanonyepa nekubiridzira.’ Jesu anoti ‘Vakakomborerwa vanomirira ururami.’ Kana vakashushirwa zvavanomirira, mavanga avanowana mavanga echiremera.

Makomborero mucherechedzo wokuva mudzidzi chaiye waJesu. Makomborero ndiwo mwero weutsvene. Zvinomiririrwa neMakomborero zvakakosha zvikuru – rugare, unaku, mufaro, rupfave, mwoyo munyoro, nyasha, chiremera … Munhu anorarama maererano nemakomborero ari kutorarama muhumambo hwedenga.

Svondo reMirara B

Posted by MC on March 25, 2018
Posted in: Mazuva Makuru, Mharidzo, Svondo reMirara. 1 Comment

Kwemakore matatu Jesu aipinda mumaruwa akasiyana-siyana achiita mabasa akanaka, achidzidzisa vanhu chitendero, uye achirapa vanhu. Mhomho dzavanhu dzaimumomotera dzichimuteerera. Vanhu vaiuya vachida zvakasiyana-siyana kwaari. Panguva iyoyo Jesu aiva nesimba pamusoro poupenyu hwake.

Asi paakaturirwa mumaoko avavengi vake mubindu reGetsimani zvose zvakasvika kumugumo. Akatanga kutambura. Akanga asisina simba pamusoro poupenyu hwake. Zvinhu zvakatanga kuitika kwaari. Akasungwa. Akandundurudzirwa kuna Kaifasi, kuna Herodhi nekuna Pirato. Akabvunzurudzwa nokuzvindikitwa. Akagadzwa ndaza yeminzwa. Akatakudzwa muchinjikwa. Akakururwa hanzu dzake. Akarovererwa pamuchinjikwa. Akanyombwa … pokupedzisira akauraiwa.

Dzimwe nguva upenyu hwedu hunoumbwa nezvinoitika kwatiri kwete zvatinoita. Tine kutambura kwedu kwakafanana nekwaJesu. Sevana dzimwe nguva pane zvakawanda zvinoitwa kwatiri navabereki zvinotitambudza. Savanhu vakuru tinoitirwa utsinye nevamwe vanhu. Tinorasiswa nevamwe vanhu. Tinoita munyama. Tinowirwa nourwere hunosiririsa. Tinorasikirwa neshamwari. Ukama hwedu navadikanwi vedu hunokundikana. Tinoodzwamwoyo navadikanwi vedu nyange navana. Vadikanwi vedu vanofa vachitisiya. Tinoitirwa utsinye hwakaomarara kumabasa kwatinoshanda.

Chokwadi, tine nguva yedu yokufara nenguva yorugare. Asiwo dzimwe nguva tinosangana nezviitiko zvatisina simba pamusoro pazvo. Tinogona kushaya simba kana zvinhu zvichiitika kwatiri asi chakakosha ndechekuti tinoita sei. Zviitiko izvi zvinogona kutimedura kana kutisimbisa. Jesu akaramba akasimba. Isuwo hatifaniri kubvumidza kurasikirwa, dambudziko kana kuti nhamo dzoupenyu huno kutiwisira pasi.

Jesu akagamuchira kutambudzika kwake akakushandura kukava kukunda nokuponeswa kwavanhu. Pokupedzisira akava murume anerufaro norugare noruregerero. Isu tinogona kuita saizvozvo.

Zvatinodzidza panaJosefa Mutsvene

Posted by MC on March 24, 2018
Posted in: Josefa, Mazuva Makuru, Mharidzo, Uncategorized. Leave a comment

Aiteerera

Josefa Mutsvene akaita kuda kwaMwari kwoupenyu hwake hwose. Mutumwa waMwari paakauya kwaari, achimuudza shoko rakaoma rokuti mudiwa wake Maria achapona Mwanakomana ivo vasati vazivana, Josefa akabvuma kutora Maria somudzimai wake. Josefa akateererawo paakanzi atungamirire mhuri yake kudiaspora kuIjipita kuitira kuti mwana asauraiwe naHerodhi akanga avamba kuuraya tusvava twose muBheterehema. Josefa akateererawo zvekare paakanzi chidzokera kuIziraeri. Haana kumbonyunyuta kuti mava kundimbeyesa.

Kangani katinotadza kuteerera Mwari nokuda kwokuzvikudza nokuzvitungamidza?

Aisazvifunga

Pana Josefa tinoona murume aifunga mhuri yake yaMaria naJesu nokuvariritira asingangozvifunga iye pachake. Aitora nguva nemhuri yake munzvimbo yeNazareta. Mhuri yake yaikurira mumusha wakanaka. Musha wakanaka chipo. Musha wakanaka una baba vakanaka igomborero. Hanzi nomumwe, ‘Baba vakanaka vanodarika chiuru chemaheadmaster.’ Baba vakanaka vane zvitarisiro zvine musoro uye zvinozadzisika kuvana vavo.

Kuzvipira kwake kumhuri yake muenzaniso wakanaka chose kunana baba vose zvikuru vanobvumidza zvinhu zvapasi pano kuvatsautsa pamhuri dzavo.

Aitungamira noruenzaniso

Hapana shoko rimwe zvaro rakataurwa naJosefa rakanyorwa muBhaibheri. Tinongonzwa pamusoro pezviito zvake chete kuti aive murume ane ruenzaniso, ane rudo nemhuri yake uye akatendeka kumhuri yake. Kazhinji tinofunga kuti chikuru kutaura, uye mashoko ndiwo anoshandura zvinhu tisingazivi kuti vanhu vanotarira zviito zvedu. Ngatiitei saJosefa anorangarirwa pamusoro pezviito zvake zvakanaka kwete mashoko akashama.  

Aiva mushandi

Josefa akararama openyu nhando. Aiva muvezi achizviraramira nebasa rake rokuveza. Ainzwisisa nharaunda yaaigara. Ainzwisisa matambudziko avanhu vaaigara navo. Akadzidzisawo Jesu kukosha kwekushandisa maoko ake.

Isu nevavariro yedu yokuti ana vedu vabudirire vararame upenyu hwakanaka dzimwe nguva hativapi mukana wokunzwisisa matambudziko oupenyu hwakavakomberedza. Tinovavarira kuvapa dzidzo yapamusoro, zvokuti dzimwe nguva havafi vakaziva kutamburira dzidzo kunoita vamwe (tinovaendesa kunyika dzokunze. Ikoko dzimwe nguva vanoenda vasinganzwisisi tsika namagariro avo). Tinovavarira kuvapa chokudya chakanakisisa zvokuti dzimwe nguva havazivi nezvenzara iri mudzimhuri dzakavakomberedza. Tinoda kuvaitira zvakanaka zvose zvokuti dzimwe nhambo havanzwisisi kutambura kuti munyika. Rimwe zuva vachaita saMarie Antoinette mambokadzi wokuFrance.

 

Vanhu zvavairatidzira vachiita mhirizhonga mbambokadzi akabvunza kuti bongozozo raiva rei akanzi, ‘Vanoda chingwa.’ Iye ndokupindura achiti, ‘Kana vasina chingwa vapei nyama.’ Mambokadzi vairarama upenyu hwemutambaratede zvokuti vakatadza kunzwisisa kuti sei vamwe vari kuchema nhamo.

Isu savana baba tinofanira kudzidza kubva pana Josefa kuti basa ramaoko rakakosha. Ngatishandisei maoko edu kuitira kuti mbiri yaMwari iendeswe mberi uye kuitira kuti mhuri dzedu dzirarame.

Aiva mutungamiri

Hutungamiri hwaJosefa hwasiyana nehwatinoziva. Akatungamirira mhuri yake norudo sezvatinoona paakatsvagira Maria imba yokuponera Jesu mushure mokunge vashaiswa nzvimbo mune mamwe mahotera emuBheterehema. Akatungamira mhuri yake kuti ive nechitendero kuburikidza nokuteerera Mwari munazvose zvikuru sei kugamuchira Maria, kuenda nokudzoka kuIjipita. Akatungamira mhuri yake kuti izvishandire kuburikidza nokuishandira achiipa chokudya nopokurara. Akatungamirira Jesu nokumudzidzisa kushandisa maoko nokuzviraramira.

 

Svondo rokufambiswa kwamashoko

Posted by MC on September 24, 2017
Posted in: Mazuva Makuru, Mharidzo. Leave a comment

© Musakope mharidzo iyi musina kupiwa mvumo.

Kutekeshera kwemidzio yokufambiswa kwamashoko kunoita kuti ruzhinji rwavanhu rukwanise kugoverana mashoko chiriporipo uye kunoita kuti mashoko apararire kunzvimbo dziri kure. Nhasi dzinogoverwa dzinogona kuva dzakaipa uye dzinogona kuva dzananaka.

Vatenderi vokutanga vaiedzanisa pfungwa dzemunhu neguyo. Zviri kune uyo anokuya kuti chichakuyiwa neguyo chii – upfu hwakanaka kana kuti marara? Pfungwa dzedu dzakafanana neguyo uye dzinogara dzichikuya, asi zviri kwatiri kusarudza zvinokuyiwa paguyo repfungwa dzedu.

Nhasi zura iri rokufambiswa kwamashoko rinobata vapepeti venhau vakadzidzira basa ravo nesu tose nokuti tinofambisawo mashoko. Tose takafanana nemakuyo, tinokuya mashoko anozogamuchidzwa kuvanhu. Tinofanira kukuya mashoko nenzira yokuti anovaka, anokurudzira chokwadi, kwete nenzira yokuti anokurudzira rusarura.

Isu savafambisi vemashoko tinofanira kuputsa tsika iriko mazuva ano yokutyisidzira vanhu nokungoburitsa chete nhau dzakaipa (hondo, matororo, zvinyadzo nekukoniwa kwakasiyana-siyana). Hatisi kuti musataure chokwadi bodo. Hatisi kuti musadura zvakaipa zvamunoona bodo. Tiri kuti musashandisa mashoko kukurudzira zvakaipa nokutyisa vanhu. Vamwe vanoti nhau dzakanaka hadzitengeseke. Chinotengeseke inhau dzematambudziko nedzezvinhu zvinotyisa.

Tinofanira kukurudzira kufambiswa kwamashoko kusingarumbidzi chivi asi kunotsvaga nokuratidza vanhu mhinduro.

Kazhinji zvinhu zvinoenderana namaonero, namagirazi atinenge takapfeka. Isu ngatipfekei magirazi anoita kuti tione chakanaka tichifambise.

Mariko anotanga Dama rake achiti ‘uku ndiko kutanga kwenhau dzakanaka dzaJesu Kristu, Mwanakomana waMwari.’ (Mk 1:1). Nhau idzi dzakanaka kwete nokuti hapana matambudziko asi nokuti matambudziko aya anoonekwa neziso rechakanaka. Shoko raMwari ishoko rinoti ‘musatya’ (Is 43:5). Ishoko rinoti ‘Ndinemi’. Ishoko rechitarisiro, chitarisiro chisingarasise (Rom 5:5)….

Zuva Guru raPita naPauro

Posted by MC on June 29, 2016
Posted in: Mazuva Makuru, Uncategorized. Leave a comment

© Musakope mharidzo iyi musina mvumo.

Pita aiita basa rei asati ava mudzidzi waJesu? Aiva muredzi wehove. Vanamuzvinafundo vazhinji vanoti aibva kuKapenaume munyasi megungwa reGareriya.

 

Pita akava mumwe waJesu kubva mazuva okutanga kwebasa rake rohushumiri. Akawona zvizhinji zvaiitwa naJesu akanzwa zvakawanda zvaaitaura. Aiziva kuti Jesu mwana waMwari. NOkuda kwaizvi Pita akasarudzwa naMwari kuti ave mutungamiriri wehwai dzake pano pasi.

 

Zvii zvatinoziva pamusoro paPauro? Pauro aiva muFarisiya uye muzvinafundo wemitemo nechitendero chavaJudha. Aigara muguta reTasusi. Haana kumbobvira asangana naJesu. Pakutanga Pauro aive neshungu dzokuchengetedza mitemo netsika dzavaJudha naizvozvo akasungisa vateveri vaJesu vazhinji vaaifunga kuti havasikuremekedza mitemo netsika.

 

Rimwe zuva Pauro ari murwendo rwokuenda kuDhamasika kunosunga nokushusha vamwe vaKristu, Mwari akazviratidza kwaari mukubwinya akamuti rega zvokushusha vateveri vaJesu. Pauro akateerera akashandura maitiro ake. Akabva pakuva muvengi weChiKristu achiva noushamwari hwakadzama neChiKristu.

 

Pauro naPita vaizivana here? Hongu vakazosvika pakusangana vakava nousahwira hukuru. Vakashanyira nzvimbo dzakawanda vachiparidza Shoko Rakanaka raJesu nokugoverana chitendero navazhinji.

 

Pita naPauro ndovakuru vane mukurumbira kubva pamavambo eSangano. Vakapedza upenyu hwavo vachibindukira Kristu. Vose vakashushirwa chitendero. Vose vakakandwa mumajere akasiyana-siyana. Vose vakanyora tsamba dzinodzidzisa nezvechitendero. Nhasi tinovarangarira nokuda kwoushingi nechitendero chavo. Tinovatendawo zvekare nokugoverana nesu shoko raKristu.

Zuva roMuviri neRopa raKristu

Posted by MC on May 25, 2016
Posted in: Mazuva Makuru, Muviri neRopa raKristu. Leave a comment

©Musakope mharidzo iyi musina mvumo

Nhasi tiri kupemberera zuva guru remuviri neropa raKristo. Ini ndinoda kuongorora zuva iri ndakanangana neMisa. Pamisa tine chiitiko chakakosha chatinoti Konzekiresioni. Pachiitiko ichi muPriste anotaura akamirira Jesu kuti ‘Torai mudye uyu muviri wangu, torai munwe iri iropa rangu.’

Uyu muviri wangu

Pachirairo chokugumisira Jesu akabata chingwa akatenda ndokuti ‘Uyu muviri wangu, torai mudye.’ Izwi rokuti ‘muviri’ harireve nhengo yemunhu kwete asi rinoreva munhu wese sezvaari kana kuti upenyu hwose hwomunhu. Naizvozvo kana Jesu achiti ‘Uyu muviri wangu, torai’ anoreva kuti ndinokupai upenyu hwangu hwose. Ndinokupai dikita rangu, ndinokupai rufaro rwangu, ndinokupai matarenda angu. Ndinokupai zvose zvandiri.

Iri iropa rangu

Jesu akazobatawo mukombe uzere newaini ndokutendazve akaupa kuvadzidzi vake achiti ‘iri iropa rangu, torai munwe.’ Ropa haingori nhengo yomuviri chete, asi rinomirira rufu. Kudeuka kweropa, zvinoreva rufu. Naizvozvo kana Jesu achiti ‘Torai, iri iropa rangu’ anoreva kuti ndinokupai zvose zvinomirira rufu muupenyu hwangu. Ndinokupai kunyadziswa kwangu, ndinokupai kusvorwa kwangu, ndinokupai kusekwa kwangu namarwadzo angu.

Muchidimbu pamisa tinopira chishamiso choupenyu norufu rwaKristo.

Isu tiri vapriste

Jesu akati itai izvi kuti mundiyeuke nazvo. Tinopirawo upenyu norufu rwedu pamwe naye. Mupriste paanoti ‘Torai mudye uyu muviri wangu, torai munwe iri iropa rangu’ anofanira kureva zvaanenge achitaura. Anofanira kupa upenyu hwake kuvatenderi, nokufa pazvido zvake achizvipira kuvatenderi.

Isu takaitwawo vapriste nepapatisimo. Tinogona kuita muchinyararise kuti ‘uyu muviri wangu, torai’ tichitopira upenyu hwedu sezvo tati muviri unomirira upenyu hwose hwemunhu. Panguva iyoyo unofanira kupira nguva yako, midziyo yako, mhuri yako, utano hwako, matarenda ako, simba rako, kugona kwako. Unofanira kupira zvose zvinechekuita neupenyu hwako.

Unofanira zvakare kubatana nomupriste uchiita muchinyararire kuti ‘iri iropa rangu.’ Sezvo ropa richimirira rufu unofanira kupira zvose zvinomirira rufu muupenyu hwako. Unofanira kupira kunyadziswa kwako, kukoniwa kwako, urwere hwako, kunyeyewa kwako. Unofanira kupira zvose zvinomirira rufu muupenyu hwako.

Ita sezvawareva pamisa

Kana uchinge wazvipira zvechokwadi pamisa sezvizvi unofanira kuti uchibuda muMisa wonozvipira zvechokwadi. Ngazvirege kuperera pamuromo. Jesu paakati kuvadzidzi vake ‘torai uyu muviri wangu, torai iri iropa rangu’ haana kuzombopedza nguva akabva aenda kunoita zvaareva. Akabva aenda kunopira upenyu hwake nokudeura ropa rake pamuchinjikwa.

Iwe unofanirawo kuti uchipedza kuti ‘torai mudye, torai munwe’ wobuda muchechi woenda kunozvibvumidza kudyiwa navamwe vanhu, zvikuru sei vavengi vako kana kuti vausinganzwisisane navo. Jesu anoti iye muna Mateo 5:46-47, ‘ko kana muchida vanokudai, munowana mubairo wei, ko vateresi havaite saizvozvo here? Ko kana muchingokwazisa hama dzenyu chete, chii chamunokunda vamwe nacho ipapo?’

Iginashiyasi wekuAndioku akatongerwa rufu rwokudyiwa neshumba, akati ari munzira ndokuti, ‘ini ndiri tsanga yaKristo yakamirira kugaiwa nezvikara kuti igova chingwa chakatsetseka chaKristo.’ Iwe ukazvitarisa unogona kutaura kuti pane mazino akapinza ari kunditsenga. Mazino eruvengo, mazino ekupikiswa. Nyange zvakadaro zvibvumidze kugaiwa nemazino iwayo, zviite yukaristiya. Dzimwe nguva vanhu vanokupikisa vakakosha muupenyu hwako kupinda avo vanokureverera. Ignitius anonyora mune imwe tsamba zvakare achiti ‘vanhu vanondireverera vachindirumbidza vanondirova neshamhu.’

Kurarama Yukaristiya

Kana tikatanga kurarama Yukaristiya nematsananguriro andaita upenyu hwedu hunotanga kushanduka. Kana baba vagere muno muchechi vakati ‘torai mudye, torai munwe’ voenda kumba kwavo vonodyiwa nevana vavo, vonoitwa Yukaristiya nemudzimai wavo, nehama dzavo upenyu hwavo hunenge hwava misa. Kana ini somupriste ndikati ‘torai mudye, torai munwe’ ndoenda kunoita basa rangu, ndichinamata, ndichiparidza, ndichiita maconfessions, ndichiona vanhu, ndichitara varwere upenyu hwangu hunenge hwava Yukaristiya, hunenge hwava misa. Hanzi nemurume anonzi Oliviant ‘Pamisa yamangwanani ini ndinenge ndiri mupriste, Kristo anenge ari chibayiro. Asi pakati pezuva Kristo anenge ari mupriste, ini ndinenge ndiri chibairo.’ Ngativei yukaristiya, ngativei chibayiro kune vamwe.