Mwaka woKutsanya

Svondo 4 Mwaka woKutsanya C

Posted by MC on March 30, 2019
Posted in: Gore C, Mwaka woKutsanya. Leave a comment

Pane mumwe murume aiva nemukurumbira wokuimba anonzi Marvin Gaye. Akafa rufu rwunorwadza musiwa 1 Kubvumbi muna 1983. Akaita zvekupfuurwa nababa vake.

Upenyu hwaMarvig Gaye achikura hwakanga hwakaoma. Baba vake vaimushungurudza zvisingabviri. Mumwe munyori anoti, ‘Mavin Gaye aitendera munaJesu zvikuru, asi aitadza kurarama dzidziso yaJesu yokuti aregerere baba vake. Pekupedzisira izvi zvakauraya iye pamwe nababa vake!

Dambudziko raiva pana Marvin Gaye nababa vake ndiro dambudziko ratekeshera mazuva ano. Vanhu vava kuremerwa nekuregererana. Dambudziko rekusada kuregerera riri kunyanyoonekwa pavanhu vanenge varambana.

Pane vamwe vari kupedzera simba ravo nemari yavo pakuda kusota murume kana mukadzi akavaramba. Vazhinji vacho vava namavanga makuru kudarika avakapihwa nanyakuvaramba anokonzerwa nehasha. Veduwee siyanai nehasha, dzinokuparadzai. fambirai mberi nohupenyu hwenyu.

Svondo 3 Mwaka woKutsanya C

Posted by MC on March 24, 2019
Posted in: Gore C, Mwaka woKutsanya. Leave a comment

Rimwe bepa nhau raive nemifananidzo yavasungwa vaive vatumwa kunoita basa muguta. Vasungwa ava vaigadzirisa imba yakanga yanzi navakuru vekanzuru iputsve nokuti yasakara. Mumazuva akatevera, mumwe wavasungwa vakabuditswa mupepanhau iri akanyorera mupepeti wenhau achiti:

‘Ndinokutendai zvikuru nokundibuditsa mupebanhau renyu … Ndakanga ndapedzisira kubuditswa mupepanhau musi wandakatongerwa kugara muchitorongo … saka ndakava nomufaro mukurusa bandakabuda ndichiita zvinhu zvakanaka. …

Pandakapinda mujeri makore maviri adarika, ndakanga ndakafanana nemba yatakanzi tigadzirise … Asi Mwari vakandigamuchira vakandiumbiridza kuti ndive chisikwa chitsva.’

MuDama Rakanaka tanzwa nezvemuti wemuzambiringa wakanga wakadyarwa muminda yemivhaini. Muti wemuzambizinga wainyatsokura zvakanaka mumumda wemuvhairi Nokuti maiwanzova nevhu rakanaka. Waiti ukaona muti womuzambiringa watadza kukurira mumunda wemuvhaini woziva kuti hapana kumwe kwaungaita zvakanaka.

Muzamiringa unotora makore matatu kuti usvike. Kana ukatadza kubereka michero panguva iyoyi, kazhinji hauzobereka zvachose.

Ndosaka muridzi womuzambiringa akaudza mushandi wake kuti achitema muzambiringa uyu Nokuti wakanga usisina basa. Asi kunze kwekuita zvizvozvo mushandi anokumbira kuti muti uyu upihwe mumwe mukana. Anoti, ‘ndipei rimwe gore. Ndichautimbira ndigouisa manyowa.’

Jesu aitaurira rungano urwu chekutanga kuvaIziraeri. Aivaudza kuti Mwari akavapa chinhano chikuru muhurongwa hwake akavabata sezai. Asi ivo vakatadza kubereka michero. Anoti zvisinei nokukoniwa kwavo, Mwari achavaitira mwoyo murefu, achavapa mumwe mukana.

Rungano urwu rwunotidzidzisawo zvekare. Mwai akatipa chinhano chikuru muhurongwa hwake, uye akatiitira zvakanaka. Mwari anotarisira kuti tibereke michero. Kana tikatadza kubereka michero savanna veIziraeri, Mwari anotipa mumwe mukana zvichibva pasi pemwoyo wake. Kana tikatadza kutendeuka tinoparara.

Murungano rwatatanga narwo musungwa nemba zvakapihwa mumwe mukana. Imba yakanga yanzi nevakuru vekanzuru haisisina basa ngaiputswe asi pane akakumbira kuti ipihwe mukana, igadziriswe.

Musungwa akanga atongerwawo mhoswa ava kunzi haana kukodzera kugara muvanhu ngaaende kuchitorongo. Kunyange vanhu vakanga vamutongerwa, Jesu akamupa mumwe mukana. Semushandi watanzwa muDama Rakanaka Jesu akadiridzira nokutimbira mweya wake kusvikira ava chisikwa chitsva.

Pane vanhu vakawanda munharaunda yedu vakafanana nemuzambiringa, nemba uye nemusungwa wandataura nezvake nhasi. Vanhu ava vanogona kurambwa asi Mwari anovanzwira nyasha. Isuwo semba iya, semusungwa uye semuzambiringa tinopihwa mumwe mukana.

Ngatipeiwo vamwe vakatikomberedza mukana.

Svondo 2 Mwaka woKutsanya – Kushandurwa kwaJesu

Posted by MC on March 16, 2019
Posted in: Gore C, Mwaka woKutsanya. Leave a comment

Tanzwa kuti Jesu akashandurwa. Urwu harungori rungano rwekushandurwa kwaJesu chete, asi kuti rungano rweduwo. Tose tinogonawo kushandurwa tichijeka sezvakaitika kwaari. Hongu tinosangana namatambudziko. Hongu tinezvakawanda zvakaipa zviri kuitika muhupenyu hwedu. Asi zvakadaro tinofanira kuziva kuti tiri hama dzaJesu akashandurwa. 1 Jowani 3:2 inoti:

Vadikanwi tiri vana vaMwari. Zvatichava hazvisati zvava kuonekwa. Asi zvatinoziva ndezvekuti kana iye ozviratidza, tichange tafanana naye nokuti tichamuona sezvaari.

Hanzi ‘tichafanana naye’ zvichirefa kuti tichagoverana naye mukushandurwa kwake. Mutenderi wose haafanire kuva nepfungwa yokuti hazvifi zvakanaka. Hongu tinosangana nematambudziko makukutu asi ngatisakanganwe kuti tinogoverana naKristu mumbiri yake.

Vadzidzi vaJesu vakaona kushandurwa kwake vakazodzika pamusoro pegomo paive pazere mufaro vavakudzokera kunoenderera mberi nohupenhu hwavo hwamazuva ose asi havana kukanganwa chiitiko chokushandurwa. Savadzidzi, muhupenyu hwedu hwamazuva ose tinofanira kurangarira kuti Mwari achatiitira zvinhu zvikuru. Ngatisava nepfungwa yokuora mwoyo kunyange tikava pakati pamatambudziko makukutu.

‘Hazvigoneki’ – Ruka 18:27 ‘Zvisingagoneki mumaziso avanhu zvinogoneka panaMwari.’

‘Ndaneta’ Mateu 11:28 ‘Huyai kwandiri imi makatakura mutoro unorema ndigokuzorodzai.’

‘Hapana anondida’ – Jowani 3:16 ‘Mwari akada pasi zvakanyanya zvokuti akapa Mwanakomana wake mumwechete.’

‘Handichagona kuenderera mberi’ – ‘Nyasha dzangu kwauri dzakakwana: muhutera hwako ndimo mune simba rako’ (2 VaKorinde 12:9)

‘Zvinhu zvose hazvina kundijekera’ – Tsumo 20:24 ‘Mwari anotungamira tsoka dzedu.’

‘Handizvigone’ – VaFiripi 4:13 ‘Ndinoita zvose nemuna iye anondisimbisa.’

‘Ndinotya’ – 2 Timoti 1:7 ‘Mweya waMwari waisava mweya wokutya asi mweya wesimba nekuzvidzora.’

‘Ndinogarotya nekushungurudzika’ – 1 Pita 5:7 inoti ‘Dururira kushungurudzika kwako kuna Mwari, iye achakutarira.’

‘Handina kunyatsochenjera’ – 1 VaKorinde 1:30 ‘Mwari akakuitai mhuri yaKristu Jesu uye ndiye uchenjeri.’

‘Ndinosurikirwa’ – VaHebheru 13:5 inoti ‘Handifi ndakakurasisa kana kukusiya.’

Svondo 1 Mwaka woKutsanya C

Posted by MC on March 9, 2019
Posted in: Gore C, Mwaka woKutsanya. Leave a comment

Miedzo yaJesu inotitondedza zvaiitika pavanhu veIsrael mugwenga mushure mokunge vabva muIjipita.

Chekutanga tinoyeuchidzwa apo vana veIziraeri vakasangana nenzara vakatanga kuzevezera vachinyunyuta. Mwari akataura navo akavapa chokudya (Mutemo 8:3). Jesu anotitondedza chiitiko ichi nokuyeuchidza muedzi nesu tose kuti Shoko raMwari chete ndiko kudya kwechokwadi (Ruka 4:4).

Mutemo wokutanga wakapihwa vana veIziraeri wanga uri wokuti vasanamate vamwe vaMwari kunze kwaMwari oga (Mutemo 5:9-10). Asi muedzo mukuru kwavari waiva wokufunga kuti vamwe vamwari vevavakidzani vanesimba kudarika Mwari wavo saka vaipota vachitizirako (Kubuda 32; 1 Madzimambo 17). Jesu aigona kushandisa rimba rake rokuita minana kuti azviwanire mbiri asi anoyeuchidza muipi kuti Mwari chete ndiye anofanira kunamatwa (Ruka 4:8; Mutemo 6:13). Simba muedzo mukuru. Vazhinji tinotsvaga simba. Asi tinofanira kuziva kuti simba rose nderaMwari uye rinobva kwaari.

Mumwe muedzo mukuru wakaitwa kunaJesu ndewekuti ape chiratidzo nekujamba kubva pamusoro petembere nekuti Mwari aizomudzivirira. Mazuvaano tinoedzwa kuti tiite minana. Pane vanoti vanogona kurapa AIDS, kumira hondo, kumutsa vafi, kuwanisa mabasa chiripo-ripo. Havanei nekuti matambudziko anokonzerwa nei vanovimbisa minana. Jesu anotiyeuchidza kuti tisaise Mwari pakuedzwa (Ruka 4:11; Mutemo 6:16).

Miedzo yaJesu inotiratidza kuti tinofanira kuita sei panguva yekuedzwa. Tinofanira kuvimba neshoko raMwari, kunamata Wmari oga, uye kusatemba neminana.

Svondo 4 roMwaka woKutsanya B

Posted by MC on March 11, 2018
Posted in: Mharidzo, Mwaka woKutsanya, Uncategorized. Leave a comment

Mwari akatumira Mwanakomana wake kuti asimudzwe pachipiyaniso kuitira kuti ani naani anomutarira nechitendero awane upenyu husingaperi.

Asiwo muchinjikwa wataurwa uyu mucherechedzo wokupikisa. Kristo nyakuuraiwa ndiye nyakutonga pasi rose. Saka zvinoita sokunge kukundwa kutova kunda nokuti kuzvipira kwaakaita kwakavamba umambo hwaMwari. Muutera hwaKristo ndimo mune simba rake. Zvose zviri pasi pesimba raMwari. Mwari anoshandura kukurirwa kuchiva kukunda kuna vanovimba naye.

Tinofanira kubata mashoko aya mumatambudziko atinosangana nayo muupenyu. Muutera hwedu tinobatanidzwa nemuchinjikwa waKristo, tinopihwa simba. Hongu tingava nekurwadziwa kukuru, asi tinenge takasimba.

Zvichida wakarasikirwa nomudikanwi:

Mwanakomana, Mwanasikana, sisi, bhudhi, amai, baba, sekuru, ambuya…

Kuchema kwacho kukuru uye kunoita sedutu. Munguva ino uri kuvhiringika, munguva inotevera hauchanyaradziki. Paunosangana nechiitiko chakadai ndapota tendera muna Mwari. Dana kwaari. Mupe marwadzo ako. Uchaona kuti achakutakurira kusuwa kwako. Kushushika kwako kuchashanduka kuchiva munamato. Uchava nesimba nokuti Mwari achaisa zvinhu zvose pasi pesimba rake.

Pamwe wakaodzwa mwoyo zvikuru.

Basa rawaifunga kuti harifi rakapera rakapera.

Korichi yawanga uchifunga kuti ichakugamuchira haina kukugamuchira kana kuti mhuri yako haikwanisi mari inodiwako.

Ukama hwako hwakaparara, ungava muchato wako kana ushamwari hwako hwawaikoshesa kwamakore.

Pamwe zvinhu hazvisi kufamba sezvawaitarisira.

Musande Teresa wokuKarikata akati, ‘Kana uchida kuti Mwari anyemwerere, muudze urongwa hwako.. Zviri nyore kuodzwa mwoyo nenyika. Asi une sarudzo, sarudzo yokubvumidza kuti misodzi ikunyudze kana kuvimba naMwari kuti ape chirevo kunhamo yako. Ita kuti iye aise zvose pasi pesimba rake. Achaita saizvozvo.

 

Upenyu hwakaoma haungahugoni woga. Unoda rubatsiro. Mwari haadi kuti urwe woga. Anoda kukurapa nerudo rwake. Vimba naye. Mwari ane simba rokuisa zvinhu zvose pasi pesimba rake.

 

Kana ukaziva kuti haugoni kuita zvose woga wodana kuna Mwari kuti akubatsire uchava nesimba. Hapana chichazombokukurira nyange chine simba rakakura sei.

 

Nhasi namatira simba rokuzvidukupisa nokushinga kuvimba nesimba raMwari.

KUKOSHA KWENZIRA YOMUCHINJIKWA

Posted by MC on March 5, 2018
Posted in: Mwaka woKutsanya, Nyaurwa, Zvinyorwa. Leave a comment

Nhanganyaya

Nzira yeMuchinjikwa itsika yechinyakare muChechi yeKatorike inodzokera mazana mana emakore Kristo abva mukuberekwa ap vanhu vaienda kuNyika inoera kunofamba nzira yakafambwa naJesu.

Maitiro edu eNzira yoMuchinjikwa anogona ku va akapfuma, aneudzamu, uye anobatsira, asi tinogonawo kukanganwa kukosha kwayo tigotadza kuirarama muhupenyu hwedu.

Pane zvikonzero zvisere zvokuita Nzira yoMuchinjikwa zvandinoda kukusiirayi

1. Inotiita kuti tivimbe naMwari

Muchinjikwa waKristu une rudo rwose rwaMwari. Pauri tinowana tsitsi dzake dzisingaverengeki. Pauri tinoisa kuvimba kwedu kose nokutenda kwedu kwose. Ngatizviisei mumaoko aJesu, haambofa akatirasisa.

2. Inotipinza murungano rwaJesu

Mushure mokuita nzira yoMuchinjikwa unoziva waunoda kutodzana naye – Pirato? Simioni? Maria? Jesu anenge akakutarisa achibvunza: Unoda here kundibatsira kutakura muchichikwa? Imi nesimba ramuinaro (zvikuru sevechidiki) muchapindura muchiti kudii?

3. Inotiyeuchidza kuti Jesu anotambura pamwe nesu

Muchinjikwa waKristu unotakura kutambura uye zvivi zvavanhu, kusanganisira zvedu pachedu. Jesu anobvuma zvose izvi nemaoko akatambanuka, achitakura michinjikwa yedu pamapfudzi ake achiti: ‘Shinga! Hautakuri muchinjikwa wako woga! Ndinotakura newe. Ndakakunda rufu uye ndakauya kuzokupa tariro, kuti ndikupe hupenyu.

  1. Inotisungira kuita

Muchinjikwa waKristo unotikurudzirawo kuti tizvibvumire kuputirwa nerudo rwake. Unotidzidzisa nguva dzose kutarisa vamwe netsitsi uye neunyoro, kunyanya avo vanotambudzika, avo vanoda kubatsirwa, neavo vanoda shoko kana kushandirwa.

5. Inotibatsira kusarudza kumira kana kusamira naKristo

Muchinjikwa anoratidza kuti mukutonga kwake mMwari anotida. Ngatiyeukei izvi: Mwari anotiratidza rudo rwake mukutitonga kwake. Kana ndikabvuma rudo rwake ndinoponeswa, kana ndikaruramba, ndinotongwa, kwete naiye nokuti haandipe mhoswa, asi kuzvitonga ini pachangu.

6. Inoratidza mhinduro yaMwari kuzvivi zvapasi

Muchinjikwa izwi raMwari raakapindura uipi hwapanyika. Dzimwe nguva zvinogona kuratidzika sokuti Mwari hapana zvaanoita maererano neuipi. Asi Mwari akataura, akapindura, uye mhinduro yake ndiyo Muchinjikwa waKristu: shoko rinova rudo, tsitsi nokukanganwirwa.

7. Inoita kuti tisanyunyute rudo rwaMwari

Muchinjikwa wakapei kune avo vakauringa neavo vakaubata? Muchinjikwa wakasiira mumwe nemumwe wedu chii? Unopa hupfumi husingagoni kupihwa naani zvake: chokwadi cherudo rwakatendeka rwaMwari kwatiri.

 8. Inotitungamirira kubva pamuchinjikwa kusvika

O Jesu, tititungamirire kubva pamuchinjikwa kusvika pakumuka muvafi mutidzidzise kuti zvakaipa hazvina izwi rekupedzisira, asi rudo, ngoni nekuregererwa. O Kristo, tibatsirei kuti titizve: ‘Nezuro ndakarovererwa pamwe naKristu; nhasi nzasimudzirwa pamwe naye. Nezuro ndakafa pamwe naye, nhasi ndinorarama pamwe naye. Nezuro ndakavigwa pamwe naye, nhasi ndamutswa pamwe naye.

Mazano munguva yeRendi

Posted by MC on February 1, 2018
Posted in: Mwaka woKutsanya. Leave a comment

Nhanganyaya

Mwaka weRendi inguva yekuzvipenengura nokudzamisa ukama hwako naMwari. Kune vazhinji mwaka uyu unouya pamberi pePasika une masvondo akawanda avano rega zvimwe zvinhu zvavanofarira somucherechedzo wokuripira zvikanganiso zvavo. Vamwe vachapedza nguva yakawanda mukunamatira uye kunyengeterera zvinangwa zvavo. Vamwewo vashoma vachatakura muchinjikwa muhomwe dzavo sechiyeuchidzo chechibayiro chavakaitirwa naJesu. Vanhu vachaita zvinhu zvakawanda zvakasiyana-siyana.

Chinyorwa chino chine dzimwe nzira dzokurarama mwaka weRendi.

1. KUMBIRA RUREGERERO KUNE MUMWE MUNHU

Rendi iguva yekupfidza. Kazhinji tinofunga zvekukumbira Mwari kuti atiregerere zvivi zvedu, asi izvi hazvina kukwana. Zvivi zvizhinji zvinosanganisira kurwadzisa vamwe vakatikomberedza. Jesu akanga asingadi kuti vamwe varwadziswe. Aisidzidzisa kuti kana uri pakati pokunamata ‘ukayeuka kuti munin’ina/muoma wako kana hanzvadzi yako ane chinongo newe … Tanga wayanana naye wozodzoka kuzopa chipo chako’ (Mateo 5: 23-24). Rendi inguva yakanaka yekutsvaka kukanganwirwa neavo vatakarwadzisa.

2. ITA MABASA AKASIYANA-SIYANA OMUTSA

Ratidza rudo rwako kuna Jesu kuburikidza nekuda vamwe. Unogona kuita izvi nokubhadharira munhu ari shure kwako mumutsara wepatiri muchitoro (akavarairwa) kana kushamisa murombo anenge ari pedo newe murestorendi nokumutengera chokudya. Unokwanisawo kupa mari iri nani kune munhu anenge akushandira panzvimbo inodyirwa. Torawo mukana wokubvunza waunenge uchipfuudzana naye kuti ari sei womira nokuteerera mhinduro yake. Muchidimbu, govera rudo rwauinarwo kuna Jesu nenzira dzaunokwanisa munguva ino yeRendi.

3. VERENGA BHAIBHERI

Vandudza chitendero chako nekuziva Bhaibheri zvakanaka. Riverenge kakawanda uchitora ndima pfupi panguva yoga-yoga. Tsvaga zvinyorwa pamusoro paro pamwe nokufungisisa pamusoro paro uchibatsirwa nemahuku anoritsanangudza. Nyengetera kuburikidza naro. Gugura mharidzo pamusoro paro. Tsvaga nziyo dzinechekuita nebhaibhiri. Mumavhiki matanhatu eRendi une mukana wokunzwisisa bhuku iri roupenyu.

4. KUSHUMIRA VANOSHAIWA

Tsvaga sangano rinobatsira kana kuriritira vanoshaya raungada kushanda naro. Zvizvipire kushanda nesangano iri munguva yose yeRendi pasina mubhadharo. Rangarira kuti Jesu paakashambidza tsoka dzevadzidzi vake paChirairo chekupedzisira akavadzidzisa kuti takadanwa kusashumirwa, asi kushumira (Johani 13: 1-17). Naizvozvo ipa nguva yako kuitira vasina dzimba, vasina chokudya nevamwe vane matambudziko akasiyana-siyana.

5. SHANYIRA VANOSURUKIRWA

Jesu akadzidzisawo vadzidzi vake kuti vabate vamwe semabatiro atinomuita iye. Izvi zvaisanganisira kushanyira vanorwara uye vari mumatirongo (Mateo 25: 31-36). Taura nevedzimba dzinochengeterwa vakwegura ukumbire kuita chimwe chinhu chakaita sokubatsira kuvageza kana kuti kurukura nevedzimba dzinochengeterwa nherera uwane mabatsiriro aungaite. Zvipire kushumira vari mumajeri kana vari nzvimbo ipi zvayo ine vanoda rubatsiro. Unogona kuunza nyemwerera nenzira dzakaita souk tamba navo, kuvataurira nhau nenyambo, kuvaratidza mifananidzo yohudiki hwako kana imwe, nekuteerera mimanzi pamwe navo. Jesu anoti, ‘kana wavaitira, ndini wakare wawaitira.’

6. UDZA VAMWE KUTI UNOVADA

Vamwe vedu vanonetseka kutaura mazwi matatu madiki asi akakosha. Sei? Pada tinofungidzira kuti vamwe vanotoziva kare zvatinonzwa. Pamwe tinofunga kuti tinoratidza rudo rwedu nezviito saka hapana chikonzero chokududza mazwi aya. Zvichida tinofunga kuti hatizodzorerwa rudo urwu rwatinenge tapa. Rwisa kutya kwako uku uti ‘Ndinokuda’, ‘Ndine urombo’, ‘Ndatenda’ kushamwari, mhuri pamwe nokuna vose vaunoda. Unogona kuita izvi kunyange kamwechete zvako munguva ino yeRendi.

7. KANDIRA MUNHU WESE KAMHEMBERERO

Jesu kazhinji aishandisa mufananidzo wemabiko kutsanangura Umambo hwaMwari. Akataura nezvemabiko emuchato nemamwewo uye aiwanzobatana nevamwe pamabiko makuru. Ita mabiko akowo ehumambo kuburikida nekubikira vavakidzani, hama kana vamwe vaunoenda navo kuchechi. Pemberera navamwe nechinangwa chokuvafadza kunyange uchizoita mazuva okutsanya.

8. SHANDIRA MUKUNAMATA

Kereke yako inokuda. Batana nevaimbi vepachechi. Batana nevanogamuchira vevaeni nevabatsiri vevanhu pachechi. Zvipire kuverenga muchechi. Shanda nevanoona nezvemakombiuta nemapurojekita. Kana paine mai vakatakura ruswava vabvunze kana paine chavanoda kubatsirwa. Muchidimbu tsvaga nzira dzokushandira sangano rako. Usamirira mumwe munhu kukukumbira kushandisa zvipo zvako zvawakapiwa naMwari. Zvipire pachako kushandira kirike rako mwaka uno.

9. ITI ‘NDATENDA.’

Ita katsika kokutenda vabereki, nhengo dzemhuri, vaumbiridzi, vadzidzisi, vanyori, vafudzi, vadzidzisi vechitendero, nevamwe vakakuumba. Vhiki yoga-yoga munguva yeRendi, tumira tsamba yekuonga kune mumwe wavo. Vaudze kukosha kwavaikuitira uye kuti vakakukurudzira sei. Funga nezvekuvapa kachipo kadiki. Kunyange usingavazive nezita ingonyora tsamba yemagetsi uchivatenda.

10. Tsanya

Jesu akataura achiti: ‘Kana iw usina kutendeuka uchaparara.’ Rega chimwe chinhu chaunoda kuratidza rudo rwako naMwari uye nekuponeswa kwemweya yavazhinji. Nokuti ‘Kwete’ kuzvido zvako unenge uchiti ‘hongu’ kuna Mwari kuti apinde mumwoyo mako. Kumbira Mweya Mutsvene kuti akuvhenekere uone chaunofanira kurega mumwaka uno weRendi.

11. Funga nezvekutsanya imwe mhando yeruzha

Vazhinji vedu hatigadzikane nerunyararo. Tinotiza zviri kuitika mupfungwa dzedu nekuzaddza upenyu hwedu nemidziyo yetekinoroji. Murendi ino edza kuzvipa nguva yaunofamba wakadzima rediyo yemumota, yaunombomira kuteerera mimhanzi yepafoni, yaunomborega kupinda padandemutande uye yaunomborega kuona chivhitivhiti. Tora nguva yorunyararo yaunonamata.

12. Tsanyira mumwe munhu pazuva

Unogona kutsanyira mudiwa wako, vana vako kana hama yakafa. Izvi zvinokupa mukana wokunamatira vadikanwi vako uye zvinoita kuti uunze shanduko yakanaka kune vakakukomberedza.

13. Tsanya pamweya

Zvinyime godo, nungo, hasha, rudado nezvimwe. Tsvaga munhu mumwechete mumhuri kana pavanhu vakakutenderedza akaoma mwoyo womuitira mwoyochena nomwoyo munyoro. Edza kuteerera vamwe munhaurwa dzako. Tsanya makuhwa woedza kurumbidza vamwe zvakanyanya. Zvipire kuita mabasa akanaka usingagunun’une.

14. Enda kumisa kakawanda

Kunze kwekungoenda kumisa musi weSvondo chete edza kuenda kunyange pakati pevhiki. Usarega kuenda kumisa pamazuva akakosha akaita seChitatu cheMadota, China Chitsvene neChishanu Chakanaka..

15. Enda kureururo

Reururo mukana wokupfidza matadzo, kutanga patsva pamwe nokuyanana naMwari navanhu. Usaramba uchifamba wakaremerwa. Tura mutoro uri kukuremera. Mumaparishi mazhinji vane nguva dzokuita rupinduka. Kana kwenyu vasina kumbira kusangana nomupriste kuti upiwe sakaramende roruwadzano naMwari.

Chishanu Chakanaka – Zvapera

Posted by MC on March 25, 2016
Posted in: Mwaka woKutsanya. Leave a comment

@ Musakope mharidzo iyi musina mvumo

Musi weChishanu Chakanaka tinorangarira rungano rwamarwadzo namatambudziko aJesu Kristo. Tikaongorora rungano urwu sekunyorwa kwarakaitwa naJowani tinoona kuti Jesu ari pamuchinjikwa anorereka musoro wake mweya wobuda maari obva ataura shoko rake rokupedzisira achiti ‘Zvapera, (tetelestai)’ (Jn 19:30). Makambozvibvunza here kuti izwi irori rekuti zvapera rinorevei? Kuti tinzwisise zvinoreva izwi iri tinofanira kudzokera kuGiriki kwarakabva maererano nekushandiswa kwarakaitwa muBhaibhiri.

Ana mazvikokota vebhaibhiri vakatanga kunzwisisa zvinoreva izwi iri pavakaenda kuIziraeri, uko kwakararama Jesu, vakanoita tsvagurudzo. Vanhu ava vanonzi maarcheologists vanoita basa rokufukunura dzimba dzakare kana kuti matongo vakasanganidzana neimba yairatidza kuti yaimbove hofisi yemuteresi makore zviuru zvadarika. Mumba umu makaonekwa marekodzi akanga asati akanganisika evanhu vaimbova nezvikweteti. Marekdzi aya akanga akanyorwa nechepamusoro kuti “tetelestai”, zvichireva kuti chikwereti chapera. Munhu uyu ane marekodzi aya haasisina chikweteti chabhadharwa chose, chapera, tetelestai. Zvino kana shoko raJesu rokupedzisira ari pamuchinjikwa riri rokuti tetelestai zvinomboreveri? Zvinoreva kuti kana ukatarisa marekodzi ako oupenyu mune zvikwereti zvorutadzo zvakanga zvirimo asi nokuda komuchinjikwa zvikwereti izvi zvapera, zvabhadharwa, tetelestai.

Kana tikatarisa mubhaibhiri tinoona kuti munguva yaJesu rutadzo chikwereti kuna Mwari. VaJudha vaiona rutadzo sechikwereti kuna Mwari. Jesu paanouya anoshandisa mutauro iwoyu wavaJudha wokuti rutadzo ‘chikwereti’ kuna Mwari. Pane imwe nguva Jesu paakataura rungano rwemurume akaregererwa chikwereti chake chakawanda iye ndokutanga kunetsera mumwewo chikwereti chishoma-shoma.

Hanzi Mumwe murume akanga aine mazana amadhora ezvikwereti kuna mambo wake. Mambo uyu akada kuti amutengese kuuranda aita hasha, asi murume wechikwereti paakakumbira ruregerero akabva anzwirwa tsitsi. Ari munzira kuenda akasangana nemunhu aive nemadhora mashoma-shoma ezvikwereti naye ndokumuitira hasha achibva amusungisa. Izvi zvakashatirisa mambo akambenge amuregerera. Munyaya iyi Jesu aida kutidzidzisa kuti kana munhu uchinge waregererwa chikwereti chako chikuru chorutadzo naMwari unofanira kuregerera vamwe tukwereti twavo twezvavakakutadzira.

Jesu anotiddzidzisa munamato zvekare maanoti namata uchiti ‘tiregerereiwo zvikwereti zvedu sokuregerera kwatinoita vanezvikwereti zvedu.’ Neimwe nzira tiregerereiwo matadzo edu sokuregerera kwatinoita vakatitadzira. Matadzo chikwereti kuna Mwari. Naizvozvo Jesu paakataura izwi rokupedzisira achiti tetelestai aireva kuti chikwereti chako chorutadzo chapera, ndachibhadhara neropa rangu radeuka pamuchinjikwa. Matadzo ako ose aregererwa.

Zvino iwe woita sei zvawakanzi naJesu tetelestai, chikwereti chako chorutadzo chapera? Chokutanga tendera kuti izvi zvakataurwa ndezvechokwati, Jesu aitorevesa. Jesu haana kuti ndinovimbisa, matadzo ako acharegererwa akati ‘matadzo ako aregererwa.’ Jesu haana kupa zviga kuti ndichakuregerera kana waita chakati, akati tetelestai, matadzo ako aregererwa. Unotendera izvi here? Unofanira kutendera kuti matadzo aya ari kurehwa kwandiri ini. Hazvinei kuti matadzo angu akakura sei, ndaregererwa. Hazvinei kuti matadzo ako akakura segungwa, waregererwa.

Chechipiri unofanira kutenda Jesu nezvaakakuitira. Iti kuna Jesu ‘ndinokutendai Jesu.’ Svondo roga-roga raunouya kuno kuchechi tenda Jesu nezvaakakuitira. Yukaristiya tsvene pachezvayo muteuro wokutenda. Unofanira kushandisa mukana iwoyo kutenda.

Chechitatu unofanira kuita zvawakaitirwa. Jesu akakuda saka iwe unofanira kudawo vamwe. Kana Jesu akakuda nenzira yakakura zvakadai ko iwe chinokutadzisa kuda vamwe chii? Unofanira zvakare kuedza kusema rutadzo. Kana iwe wakamboregererwa chikwereti chako chorutadzo unogorambirei uchiunganidza chimwe chikwereti.

Pazuva iri tinoenda kunopfugama pamberi pomuchinjikwa tichichiremekedza. Paunomira pamberi pochipiyaniso rangarira zvakataurwa naJesu kuti tetelestai, zvapera. Mutende. Vimbisa kuti hauzombomurasisa.

Svondo reMirara – Ziso raJesu!

Posted by MC on March 17, 2016
Posted in: Mwaka woKutsanya. Leave a comment

@ Musakope mharidzo iyi musina mvumo

Rungano rwavarume vaviri vanotarisana…

Zviverengwa zvedu zvanhasi zvine matingindira akawanda. Asi tinoda kunangana nezvakaitika pakati pavarume vaviri. Varume ava vaiwirirana zvikuru uye vakanga vatsidzirana kuti hatizombofa takarasisana. Zvino mumwe wavaviri ava akasungwa, ndokutanga kutinhwa achiendwa naye kunouraiwa. Mumwe wake akanga ari pakati pokudziya moto nemhandu. Uyo aidziya moto akabvunzwa kuti ‘Ko murume arikunouraiwa haisi shamwari yako here?’ Iye nokutya akati tana kuramba, ‘Kwete, bodo, handitombomuziva zvangu ndinopika.’ Achingobva mukuramba sahwira wake wake kudaro jongwe rakabva rakukuridza, ndokuti pengenu achinosanganidzana maziso neshamwari yake yaakanga aramba ndokubva ati chitsoka ndibereke achinosvimha misodzi yenyadzi. Murume akaramba mumwe ndiPita, murume aienda kunourayiwa ndiJesu.

Rungano urwu runotidzidzisa kuti ChiKristu chii? ChiKristu hakusi kungoteedzera mitemo, kana kuuya kuchechi, ChiKristu kufamba naJesu. ChiKristu hakusi kubvisa mugove svondo roga roga kana kupfeka yunifomu. ChiKristu kuumba ukama hwakadzama naKristu. ChiKristu kuchengeta mhiko yaunenge wakapika kuti ndinoda kurasa Satani namabasa ake ose noushe hwake hwose, handizombofa ndakakurasisa iwe Jesu. ChiKristu kuumba ukama hworudo, ukama hwekuvimbana, ukama hwekutendeka naJesu.

Pita akati atarisana namatambudziko ndokutyora ukama neshamwari yake Jesu. Pita akasiya shamwari yake ichitambudzika achinodziya moto nemhandu dzaJesu, ndokuramba Jesu achida kunzi munhu akanaka. Shamwari yake payakazopfuura nepaaive ari ikamutarisa akabva aziva kuti zvaaita zvakaipa, arasa mumwe wake kuti agamuchirwe navatorwa. Muchiitiko ichi tinoona kuti Pita akanga asina kutyora mitemo, akanga achiri muteveri waJesu asi akatyora mhiko yekutendeka nokuvimbika nomumwe wake munhamo nemumatambudziko. Izvi ndizvo zvakamuita kuti asvimhe misodzi yenyadzi. Zvisinei, Jesu akazouya kwaari mushure mamasvondo asingamupe mhosva asi achiti ‘Simoni mwana waJona unondida here?’ Kureva kuti unoda kuti ukama hwedu hudzokere pakare here?

Chiitiko ichi chinorevei muupenyu hwedu? Vazhinji vedu tiri vanhu vanoedza kuchengeta mitemo yaMwari nemitemo yeSangano. Tinoedza kuuya kuchechi svondo roga-roga. Tinoedza kubvisa migove yedu uye kupfeka mayunifomu edu ezvita. Asi charenji iripo ndeyekuti uneukama hworudo here naKristu? Unochengeta mhiko yawakapa paRuombeko here yokuti ndinotsidza kurasa satani namabasa ake ose noushe hwake hwose? Ini ndinofunda kuti pane dzimwe nguva dzatinoita saPita, nguva dzatinorasa Jesu nokuda kwekuti tinenge tichida kunzi vanhu vakanaka. Pane nguva dzatinodziya moto wezvenyika tichisiya Jesu ari oga. Moto wekuba. Moto wamakuhwa. Moto weshanje.

Zvino kuti tisapinde mukuedzwa ngatizivei kuti chinhu chokutanga chinotisvitsa murutadzo kuva panzvimbo isiri iyo. Iyi ndiyo misiteki huru yakaitwa naPita, akanga ari panzvimbo isiri iyo. Pita aidziya moto navanhu vasingawirirane naKristu, mhandu dzaKristu. Vanhu ivavo ndivo vakamufurira. Aitya kuvaudza chokwadi nokuti vakanga vasingagamuchire chokwadi. Iwe chenjera kutamba navanhu vasiri ivo. Usatamba nemhandu dzaKristu, vanhu vasingade kunzwa chokwadi chinobva kunaKristu. Usatamba nezvidhakwa zvisina gwara, usatamba navanhu vanofarira kuona mifananidzo inonyadzisira.

Ukatamba navanhu vakadai unovarairwa ukasvika pakutadza. Pita akavarairwa akasvika pakutaura mashoko akaipa okuramba shamwari yake Jesu. Ukatamba nezvidhakwa zvisina gwara unovarairwa ukasvika pakufurirwa kuita zvinhu zvakaipa. Ukatamba navanhu vasingaende kuchechi unovarairwa ukasvika pakuita zvinhu zvakaipa zvakare.

Pita zvaakatamba navanhu vasirivo, akavarairwa, akataura mashoko akaipa Jesu akamutarisa. Jesu haana kumutarisa achiti hokoyo kwete, asi akamutarisa neziso rorudo ziso rinokwevera, ziso rinoshuvira kuti daiwadzoka. Iwe saPita unogona kutamba navanhu vasiri ivo ugovarairwa, ugoita chinhu chakaipa asi ziva kuti Jesu anokutarisa neziso rerudo ziso rinokuita kuti ubatwe nenyadzi. Unogona kuva chidhwakwa chamakoko, Jesu ouya achikutarisa usisina sendi, nhamo dzakumomotera. Anogona kukutarisa kuburikidza nourwere kana rufu chairwo. Anogona kukutarisa muzvakanaka kuburikidza neshamwari kana kuti muvakidzani. Jesu anoshandisa nzira dzakawanda kukutarisa neziso rinodzora, ziso rinokwevera.
Kubva nhasi tarisa uone kutariswa kwauri kuitwa neshamwari yako Jesu…

Svondo 5C roMwaka woKutsanya – Vatongi venhema

Posted by MC on March 13, 2016
Posted in: Mwaka woKutsanya. 1 Comment

© Musakope mharidzo iyi musina mvumo

Vakuru vanoti hapana zuru risina nyoka. Hapana munhu asina chinongo muupenyu hwake. Tingati pane vane munyama vane unhu hwavo hunobuda pachena kwoita vane rombo rakanaka vasingafumurwe zviito zvavo. Mubhishopu Fulton Sheen vakashanyira rimwe jeri ndokutaura navasungwa vakanga vakaungana vachiti, ‘Musiyano uripo pakati pangu nemi ndowekuti imi makabatwa ini handina kubatwa.’ Bhishopu vakanga vasingakurudzire kuti vanhu vapare mhosva kana vasingabatwi asi vaisimbisa kuti vazhinji tine rombo rakanaka rokuti zvitadzo zvedu hazvina kufumurwa.

Kune imwe parishi kune vamwe mai vekwaya vaipomerwa mhosva yokudanana navarume vavanhu. Mai ava vakagarirwa dare namamwe madzimai epaparishi ndokukwevewa voendwa navo kuna baba vezvomweya. Vanhu vakataura zvakawanda. Vamwe ndovakati ngaakururwe bachi, vamwe vakati ngaabviswe mukwaya, vamwe ngaabviswe pazvigaro zvose. Vamwe vakatoti ngaadzingwe pachechi. Mai ava vakadaidzwa namazita akawanda, vakashungurudzwa zvikuru.

Mupriste akati atanga kutonga nyaya iyi, ndokupa mai vaya mukana wokutaura. Vapiwa mukana wokutaura vakati ‘Baba, ini mhosva yangu handisi kuiramba. Makasununguka kuita zvamunoda neni. Asi musati mandiranga ndinoda kuratidza simba randinaro rokuti muti womumango udyarwe uchimera, kukura nokubereka michero nezuva rimwechete. Mhodzi yomuti uyu inofanira kudyarwa nemunhu asina kumbobvira aita mhosva yakafanana neyangu.’ Baba vezvomweya vakati pakanaka chiregai mai mukuru vave ivo vanotanga kudyara mbeu muti uyu. Mai mukuru vakaramba vakati ini ndine dzandakapara. Chisveru chakaiswa pamutungamiri wekwaya asi akaramba achiti ndine dzangu. Vakatenderedzana vose mumwe nemumwe pakashaya akakwanisa kudyara muti uyu nokuti vose aive netwavo! Pokupedzisira vakaona kuti vose vatadzi asi zvomudzimai uyu ndizvo zvakanga zvabuda pachena.

Tose tiri vatadzi. Shoko Rakanaka harisi kuti regai vanotadza vachitadza, musavabvunze. Shoko raMwari riri kuti tinofanira kushandura mafungiro edu kana takatarisana navanhu vane mhosva dzavo. Hanzi pana VaGaratiya 6:1, ‘Kana mumwe wenyu akanganisa , imi vanamati … mudzorei zvakapfava zvinyoro’ Muchidimbu hazvisi kunzi musadzorane asi kuti musave vatongi venhema. Tsika yakadai yakaipa sezvatiri kuona muShoko Rakanaka.

Vatongi venhema havana mwoyo, havakendengi kuti mumwe anonzwa sei. Tanzwa nezvevarume vakuru vari kuweva mukadzi mukuru asina kusimira, vachifamba naye mumasendiraini, vopinda naye muchechi muzere vanhu vomumisa mberi akadaro, vomupomera mhosva vachimufumura namazwi ari pamusoro. Havana hanya kuti mudzimai uyu ari kunzwa sei. Havanei nechimiro chake mumaraini – havana mwoyo.

Vatongi venhema havana mutsigo. Vanoda kutaura chaizvo nezvemutemo, kuti mutemo watyorwa. Hanzi mutemo unotidzidzisa kuti vakadzi vakadai vanofanira kutakwa namatombo. Asi tinoziva kuti inhema. Mutemo haudaro. Mutemo unoti murume nomukadzi vanobatwa nemhosva yakadai vanekodzero yokuendeswa kudare vaine zvapupu. Asi vanoenda vose, kwete mukadzi chete. Zvino tinoona kuti vanonyepa nokuti murume vamusiya, haana kutiza nokuti havana kudaro, vamuregera achienda ndokuti sika-sika nemukadzi uyu.

Jesu anovaonesa kusviba kwomwoyo wavo nounyengedzi hwavo. Vanonyara voenda mumwe nemumwe kusvikira Jesu asara nomudzimai uyu vari vaviri. Anotendeukira kumudzimai oti enda zvako asi usatadze zvekare. Chinangwa chaJesu hachisi chokumukurudzira kuita zvakaipa, asi hachisi chokumupa mhosva. Chinangwa chake hachisi chokumufumura. Chaanongoda ndechekuti mudzimai uyu atendeuke, awanirwe nyasha, aregererwe. Hanzi ainyora muvhu kureva kuti anonyora matadzo muvhu maanopupurutswa nemhepo kwete padombo.

Jesu anotaura nomudzimai uyu norupfave. Vanhu vose vane mwoyo ndozvavanoita. Tinozviona pana Nathani. Dhavhiti akapara rutadzo rukuru. Asi Nathani haana kumufumura. Akaenda kwaari akamubudira pachena, akamutsiura. Dhavhiti atendeuka nokukumbira ruregerero, Nathani akamuregerera muzita raMwari. Chinangwa chake chaisava chokupa mhosva asi chaiva chokudzora murudo, chokuitira nyasha.

Isu tiri vanhu vakaita sei? Takafanana nomudzimai uyu here anopomerwa mhosva? Takafanana navatongi venhema here vanopa vamwe mhosva? Kana kuti takafanana naJesu anerupfave? Pane vamwe pakati pedu vazere noufarisiya. Vanhu vanodhonza vamwe vachivaendesa kunababa vezvomweya kana kunana mai mukuru vachiti nhingi ane mhosva dzake dzakawandisa. Variko vari pamapoka eWatsapu vanogarotumira mhosva dzavamwe. Kupomerana kurimo mudzimba: mudikani wangu akazodai, mudikani wangu wangu anotambisa mari, mwana wangu haanzwi.

Nhasi ngatitendeukei. Ngativavarire kusava vatongi venhema. Vanhu vanotonga vamwe pamusoro pounaku hwavo, urema hwavo, ruvara rwavo, basa ravo, kana zvikanganiso zvavo.
Ngativavarire kusava vatongi venhema vanotuka, vanogodora, vanotsoropodza, vanonyomba, vane makuhwa vanotaura zvoruvengo. Ngative vanhu vanotaura zvakanaka zvoga pamusoro pavamwe:
Rwiyo: ‘Tifunge zvakanaka zvoga, tiite zvakanaka zvoga…’