Mharidzo

Mharidzo dzasvondo – Mwaka yakasiyana-siyana
Mharidzo dzepakati pevhiki – Mwaka yakasiyana-siyana
Mharidzo dzakasiyana-siyana – mharidzo dzezviitiko zvakasiyana-siyana

Svondo 6 rePasika Gore A

Posted by MC on May 14, 2023
Posted in: Gore A, Pasika. Leave a comment

1      Kutarisirwa pasi

MaSamariya aivengwa navanhu vose. VaRoma navaGiriki vaivazvonda nokuti vaingofunga kuti rimwe boka ravaJudha. VaJudha vaivavenga nokuti vaivatora somusanganiswa usina ropa rakachena.

Makore akawanda Kristu asati azvarwa, vanhu veAsiriya vakapamba chamhembe cheIziraeri ndokuendesa vagari vemo kuhupoteri kuAsiriya. Vazhinji vakasara munzvimbo iyi vakatanga kuroorana nevechirudzi vainamata zvimwe zvimwari. Kubva ipapo vakatanga kuonekwa savanhu vane ropa rakasviba. VaIziraeri vaiva muhupoteri pavakadzoka vave kuda kuvaka tembere patsva, vakanzi tokubatsirai nemaSamariya vakaramba. VaJudha vaitendera kuti ruponeso harufi rwakauya kumaSamariya. MaSamariya vaitarisirwa pasi.

2      Vakaona zviratidzo kuburikidza naFiripi

Firipi akapinda muguta reSamariya. Akavataurira nezvaMesiya, Jesu weNazareta. VaSamariya vakagamuchira Dama Rakanaka. Kuburikidza naFiripi vakaona zviratidzo zvaMesiya nameso avo:

  • Zvirema zvakafamba;
  • Madhimoni akaburitswa;
  • Zvose zvakavimbiswa navaPorofita zvakaitika kwete kuvaKristu vechiJudha chete asi kuvaKristu vechiSamariya;
  • Vakagamuchira Jesu nomufaro;
  • Vakanga vasisiri vokunze asi nhengo dzizere dzenzira dzaKristu.

3      Pita naJowani vakavashanyira

Pita naJowani pavakanzwa nezvebasa raFiripi kuvaSamariya, vakaenda kuSamariya. Vakavanamatira vakakumbira Mwari kuti aburutsire Mweya Mutsvene wake pavari. Zvakava pachena kuti vaSamariya vakaenzana navaJudha pachitendero mumhuri yaKristo, vanowanawo ruponeso.

Wakambonzwa here seusingakodzere pamberi paTenzi? Chiverengo ichi chinotidzidzisa kuti tose takakosha mumaziso aMwari. Anotinatsa. Rufaro rwavaSamariya ndirwo Rufaro rwedu. Tinodiwa naMwari. Akatipa upenyu hwake. Akatipa mweya wake.

4      Mazvionero tichikura

 Vazhinji vedu tiri kudzvanyirirwa nemaonero ataizviita tichikura. Pada taizviona sevanhu pasina. Pada tine nguva dzataizvitarisa mugirazi tisingaoni Ms Zimbabwe kana Mr. Universe.

5      Maonerwo ataiitwa nevamwe

Chinosuwisa ndechekuti mamwe maonero atinozviita akabva kuna vanhu vaitibata huyanga, zvisina chiremera. Pamwe takaudzwa kuti tiri zvinyadzo kuvabereki vedu, kumaticha edu, kuna vatinoshandira kana kuti savanhu vari muwanano tiri zvinyadzo kuvadikanwi vedu nokuvana vedu.

6      Usatendera pfungwa dzakashata kuti dzikuparadze

Hongu tiri vanhu venyama tinotadza, asi hatifanire kubvumidza pfungwa dzokuzvidzikisira kutiparadza. Takakosha mumaziso aMwari.

7      Usazvienzanisa nevamwe

  • Hazvina kunaka kuzvienzanisa nevamwe chero zvodii hazvo.
  • Vabereki musazvienzanisa nevamwe vabereki.
  • Vanababa musazvienzanisa nevamwe anababa.
  • Madzimai musazvienzanisa namamwe madzimai.
  • Vechidiki musazvienzannisa nevamwe vechidiki.
  • Usazvienzanisa nomukoma kana munin’ina wako.

Uri munhu akazvimirira woga kwete fotokopi yemumwe. Hazvina kunaka kufunga kuti haubatsire chinhu. Mwari anotida sezvatiri kwete zvatinofunga kuti tinofanira kuva. Mwari anotida somusikiro waakatiita. Takasikwa nomufananidzo waMwari. Hatisi marara. Takakosha mumaziso aMwari.

8      Tivi vagari voHumambo

MuDama Rakanaka Jesu anoti, “Ndiri munaBaba, uye ndinemi.“ Hatisi nherera bodo. Hatisi toga panyika. Tiri vagari vohumambo hwedenga.

9      Tinofanira kuva zvapupu

 Takagamuchira nyasha. Mwari akatiratidza rudo rwake. Zvino anotidaidza kuti tive zvapupu zvaKristo pasi rose. Tinozvigona. Tinogona kuparidzira Kristo muhupenyu hwedu. Tiri vana vaMwari.

Svondo 27 reGore C

Posted by MC on October 1, 2022
Posted in: Gore C, Mharidzo, Mharidzo dzamasvondo. Leave a comment

Pane nyaya inotaurwa pamusoro pemurume akadonha kubva pamusoro pegomo asi ari pakari pekukunguruka akakwanisa kubata bazi remuti. Akarembera pabazi iri kudaro akaona kuti aive munjodzi yokudonha achisvikofa. Akabva awana zano chiripo ripo. Anotarisa kudenga oti, “Kune ariko here uko?” Izwi rinobva kudenga richiti, “Hongu, ndiripo. Ndini Tenzi wako. Unotendera mandiri here?” Murume uya anoti, “Hongu, Tenzi, ndinotendera. Chokwadi chokwadi ndinotendera, Ndapota ndibatsireiwo.” Tenzi anobva ati, “Zvakanaka! Kana uchitendera hauna chekutya. Regedzera bazi rawakabata.” Murume uya anombofunga kwechinguva obva ati, “Hakuna mumwe ariko here uko?”

Murume uyu aitendera kuti kuna Mwari. Aitendera kuti akanamata anodairwa. Aitendera kuti Mwari anogona kumubatsira nokumununura. Asi Izwi raMwari parinomuudza zvekuita haatenderi!

Vazhinji vedu takafanana nemurume uyu. Tinotendera muna Mwari. Asi kana tikasangana nematambudziko, zvinhu zvikatiomera tinosiya Mwari totsvaga rubatsiro kumwe. Tinotendera asi chitendero chedu chishoma.

Tanzwawo kuti chitendero chaVaPositori chaiva chishoma. Vaitendera Jesu uye vaimutevera asi pavakaona mauto achiuya vari mugadheni reGetsemani vakatiza vachisiya Jesu ari oga. Chitendero chavo chaiva chishoma.

Musiyano wavo nesu ndewekuti vakaziva kuti chitendero chavo chishoma vakakumbira rubatsiro: tiwedzereiwo chitendero. Zvinonzi:

Uyo asingazivi asingazivi asi asingazivi kuti haazivi idutye. Asi uyo asingazivi achiziva kuti haazive mungwaru. Vapositori vakaziva kuti havazive vakakumbira kuwedzerwa.

Isu zvii zvatakaita pamusoro pechitendero chedu chishoma? Mugore rapfuura takamboendawo here kuma retreats, makungano echechi, mapoka ekudzidza bhaibheri nezvimwe? Takamboverengawo here zvinechekuita nechitendero chedu?

Vadzidzi pavanokumbira kuwedzerwa chitendero, Jesu anovaudza rungano rwemushandi anodzoka kubva kumunda asina chinhu otanga nekubikira Tenzi chokudya omumirira kusvika apedza kudya. Muranda anozoona nezvezvido zvake agutsikana kuti Tenzi vaguta.

Jesu ari kuedza kuti tinofanira kutungamidza kuda kwaMwari nguva dzose kwete kuda kwedu. Kana tiine chitendero hatipedzi nguva tichinyunyuta nekuchemachema kuti tiri kusvero binduka asi chabuda hapana. Tinozvikangwanwa tichiziva kuti tinofanira kuzviisa mumaoko aMwari tichiita kuda kwake. Iye haatirasise.

Chitendero zvinoreva kuti chero ruponeso rwangu rukasauya izvozvi ndinomira naMwari nokuti anondida uye ane hanya neni. Murume watambotaura nezvake akakanganisa pakuti paakawirwa nedambudziko akafunga kuti Mwari haazvigone. Akada kuzviponesa nokutsvaga ruponeso kumwe. Haana kuvimba norudo raMwari. Mwari anotida zvisina mugumo. Ngatimirei naye nyange zviome sei. Panotoda chitendero chizere.

Pane nyaya inotaurwa pamusoro pemurume akadonha kubva pamusoro pegomo asi ari pakari pekukunguruka akakwanisa kubata bazi remuti. Akarembera pabazi iri kudaro akaona kuti aive munjodzi yokudonha achisvikofa. Akabva awana zano chiripo ripo. Anotarisa kudenga oti, “Kune ariko here uko?” Izwi rinobva kudenga richiti, “Hongu, ndiripo. Ndini Tenzi wako. Unotendera mandiri here?” Murume uya anoti, “Hongu, Tenzi, ndinotendera. Chokwadi chokwadi ndinotendera, Ndapota ndibatsireiwo.” Tenzi anobva ati, “Zvakanaka! Kana uchitendera hauna chekutya. Regedzera bazi rawakabata.” Murume uya anombofunga kwechinguva obva ati, “Hakuna mumwe ariko here uko?”

Murume uyu aitendera kuti kuna Mwari. Aitendera kuti akanamata anodairwa. Aitendera kuti Mwari anogona kumubatsira nokumununura. Asi Izwi raMwari parinomuudza zvekuita haatenderi!

Vazhinji vedu takafanana nemurume uyu. Tinotendera muna Mwari. Asi kana tikasangana nematambudziko, zvinhu zvikatiomera tinosiya Mwari totsvaga rubatsiro kumwe. Tinotendera asi chitendero chedu chishoma.

Tanzwawo kuti chitendero chaVaPositori chaiva chishoma. Vaitendera Jesu uye vaimutevera asi pavakaona mauto achiuya vari mugadheni reGetsemani vakatiza vachisiya Jesu ari oga. Chitendero chavo chaiva chishoma.

Musiyano wavo nesu ndewekuti vakaziva kuti chitendero chavo chishoma vakakumbira rubatsiro: tiwedzereiwo chitendero. Zvinonzi:

Uyo asingazivi asingazivi asi asingazivi kuti haazivi idutye. Asi uyo asingazivi achiziva kuti haazive mungwaru. Vapositori vakaziva kuti havazive vakakumbira kuwedzerwa.

Isu zvii zvatakaita pamusoro pechitendero chedu chishoma? Mugore rapfuura takamboendawo here kuma retreats, makungano echechi, mapoka ekudzidza bhaibheri nezvimwe? Takamboverengawo here zvinechekuita nechitendero chedu?

Vadzidzi pavanokumbira kuwedzerwa chitendero, Jesu anovaudza rungano rwemushandi anodzoka kubva kumunda asina chinhu otanga nekubikira Tenzi chokudya omumirira kusvika apedza kudya. Muranda anozoona nezvezvido zvake agutsikana kuti Tenzi vaguta.

Jesu ari kuedza kuti tinofanira kutungamidza kuda kwaMwari nguva dzose kwete kuda kwedu. Kana tiine chitendero hatipedzi nguva tichinyunyuta nekuchemachema kuti tiri kusvero binduka asi chabuda hapana. Tinozvikangwanwa tichiziva kuti tinofanira kuzviisa mumaoko aMwari tichiita kuda kwake. Iye haatirasise.

Chitendero zvinoreva kuti chero ruponeso rwangu rukasauya izvozvi ndinomira naMwari nokuti anondida uye ane hanya neni. Murume watambotaura nezvake akakanganisa pakuti paakawirwa nedambudziko akafunga kuti Mwari haazvigone. Akada kuzviponesa nokutsvaga ruponeso kumwe. Haana kuvimba norudo raMwari. Mwari anotida zvisina mugumo. Ngatimirei naye nyange zviome sei. Panotoda chitendero chizere.

Svondo 6 rePasika

Posted by MC on May 21, 2022
Posted in: Gore C, Gore C, Mharidzo, Pasika. 1 Comment

CHIPO CHORUGARE

Rugare ndicho chipo chikurusa chinodiwa nemunhu wose anoshuvira budiriro. Rugare runodiwa nenyika dzose dzinoshuvira budiriro. Ndaramo pachayo inosakiswa norugare ndosaka Jesu ari kupa vadzidzi vake chipo chorugare.

Chinorwadza ndechekuti tikatarisa mativi mana ose eppasi rose tinoona kuti hakuna rugare. Munyika zhinji mune hondo. Muzere mhirizhonga nekuurayana. Mhuri zhinji hadzina rugare. Mutauro uri kutaurwa mudzimba zhinji mazuva ano mutauro wemhirizhonga nekupesana.

Nhasi Jesu ari kuti ndinokupai chipo chikuru chorugare. Ndinokupai rugare kwete runowanikwa mumatare edzimhoswa asi runouya kuburikidza naMweya Mutsvene. Imi chenyu munofanira kupa Mweya mukana wokukusvitsai chipo ichi chorugare murupenyu rwenyu. Munodaro kuburikida nokuda Mwari nemirairo yake.

Rugare hazvirevi kuti hapana kupesana pakati pedu. Kupesana kunowanikwa muvanhu. Rugare zvinoreva kugadzirisana. Rugare zvinoreva kukunda kwerudo kana kuti kukurirwa kwemweya woruvengo nokutsivana. Rugare rwunounzwa nekutaurirana nekugamuchirana tichinzwanana.

Muchiverengo chokutanga taona paine kusanzwanana pakati pavadzidzi vaJesu zvekuti sangano raigona kuparara. Vamwe pakati pavo vaidzidzisa kuti vatendeuki vechirudzi vanofanira kutevera mitemo yechiJudha yakaita sekuchecheudzwa. Izvi zvakaita kuti pave nekukakavadzana kukuru. Asi nouchenjeri hwavo vakuru vesangano vakadaidzira dare vakataurirana murudo, vakawirirana donzo rokutora.

Rugare runounzwa nerudo, kutaurirana nekuteererana. Vatenderi vokutanga vakava norugare nokuti vaidanana. Kudanana kwavo kwakaita kuti vataurirane nokunzwana. Tikava vanhu vanotaurirana panova norugare pakati pedu.

Mhuri zhinji dzizere nokupesana nekuti hapana rudo pakati padzo. Hukama hwavo hauna kumira mushe nokuti havadi kutaurirana murudo. Pada munyika yedu chaimo mamwe matambudziko atiri kusangana nawo anokonzerwa nokuti hatidi kutaurirana muzvakanaka. Nhasi Kristo ari kutikoka kuti tive vasakisi vorugare. Rugare urwu runotangira pakuva noukama hwakadzama naMwari. Kana tava nogurare urwu tinobva tapinda muguta idzva rinoera reJerusarema rataurwa muchiverengo chechipiri.

Svondo 3 reMwaka wokuuya (Advent) Year C

Posted by MC on December 10, 2021
Posted in: Mwaka woKuuya C. Leave a comment

Todii?

MuDama Rakanaka ranhasi, vanhu vari kuunganira Jowani vachimubvunza mubvunzo wokuti “Todii?”

  • Havasi kuti vamwe vanhu vangadii kuti vagadzirire humbambo hwedenga
  • Havasi kuti hurumende ingashanduke sei ichigadzirira humambo hwedenga
  • Havasi kuti tingashandure manamatiro emutembere sei kuitira kugadzirira humambo hwedenda.

Mubvunzo wavo uri pachena uye uri nyore: isu pachedu tingaite sei kugadzirira humambo hwedenga?

Mumhinduro yake,

  • Jowani anovati tambanudzai maoko enyu muchipa vamwe zvikuru varombo pakati penyu.
  • Anoti kuvateresi mirai pachokwadi murege zvekushandisa zvigaro zveku kuzviunganidzira hupfumi nenzira dzehuori.
  • Anoti kuma soja mirai zvekushungurudza vanhu nekuvatyisidzira.
  • Anoti kugurumwandira ravanhu ivai norudo.

Jowani anotaura nesuwo zvekare pazuva ranhasi. Anotiudza kuti tive nemafungiro matsva, mafungiro azere nokuzvipira uye norudo. Rudo ruchaonekwa muhupenyu hwedu nevamwe ndiwo mucherechedzo wokuti humambo hwedenga hwava padyo. Pauro Musande anoti kuvaFiripi “Itai kuti rupfave rwenyu rwuzivikanwe navose nokuti Tenzi wava padyo.” Zvii zvatiri kunzi tiite?

1.1     Mabatiro atinoita vamwe

Chekutanga tinofanira kuongorora mabatiro atinoita vamwe tovavarira kuva nomwoyo munyoro, kufunga vamwe uye kuratidza vamwe rudo.

1.2     Kukumbira ruregerero

Chechipiri tinofanira kukumbira rubatsiro rwaMwari kuti tikwanise kukumbira ruregerero kuna vose vatakarwadzisa kana kutadzira. Kirike rinotipa sakaramende reruregerero ratinokwanisa kushandisa munguva ino yokuuya kwaTenzi. Sakaramende iri mukana wokuti “Ndinogamuchira mhosva yangu uye ndinokumbira kuregererwa naMwari pamwe navandakatadzira.”

1.3     Kuregerera

Tinofanirawo kuregerera vamwe vakatitadzira. Nguva yeKuzvarwa kwaTenzi (Kisimusi) inogona kuva nguva izere nohunyengedzi, nguva yatinopemberera kuuya kwanyakuregerera asi isu tisina rugare mumwoyo yedu. Tinogona kuva vanhu vanodzorera chituko nechituko, chigumbu nechigumbu, utsinye neutsinye.

1.4     Kushanduka

John aidaidzira kuti vanhu vashanduke zvizere muhupenyu hwavo. Dzimwe nhambo tinobvumidza mafaro ekisimusi nezvese zvinenge zvichiitika kuti zvitidzimaidze tisanzwe shoko raJowani rokuti shandukai. Kisimusi inguva yokushanduka nokuchinja hunhu hwedu. Inguva yokukanganwira, kubvisa zvigumbu nokubatsira vamwe.

Kunamata

Tinofanirawo kukura muhupenyu hworunamato. Tinofanira kuzvipa nguva yokutaura naMwari, angava maminitsi gumi namashanu zvawo. Vamwe vedu tingati, “Baba hamumboziva kuomerwa kwandakaitwa. Ndine zvakawandisa zvekuita nguva yacho iri kutondinetsa.” Asi kana chinhu chakakukoshera unochipa nguva. Hazvinei nekuti wakawandirwa zvakadii. Tinofanira kupa Mwari nguva nyange zvakaoma sei

Svondo 22 reGore B

Posted by MC on September 26, 2021
Posted in: Gore B, Mharidzo dzamasvondo. 1 Comment

Vadzidzi vakagumbuka nokuti pane munhu asiri mumwe wavo ari kudzinga mweya yakaipa muzita raJesu. Vaizviona savanhu vane chinhanho chisina vamwe chokuva pedyo naJesu. Pazuva iri vaive vapihwa simba rokudzinga mweya yakaipa saka vaisatarisira kuti mumwe munhuwo zvake aite pasa rakakosha iri.

Saka pavanoona Mutorwa achidzinga mweya yakaipa vanozadzwa nehasha. Vanotoedza kumisa murume uyu asi Jesu anovati “Musamumise: hapana angagone kuva mhandu yangu achishanda muzita rangu. Wose asingatipikisi ndewedu.”

Nhasi uno musangano muzere mapoka evanhu vanoona sokuti vane chisina vamwe. Vanoona sokuti ivo voga ndivo vanoziva chokwadi kana kuti ndivo vachaponeswa. Vanhu vakadai vanopedzera simba ravo mukuedza kuratidza kuti vamwe vose havazivi. Asika tikadaro zvinoreva kuti tichadzivisa vanhu vakawanda kuita basa raMwari.

Munyika nomuhurumende muzere vanhu vanorarama upenyu hwechokwadi vachivavarira kuita Mabasa akanaka. Tinana chiremba, magweta, maticha, vanamuzvinabhizimusi nevamwe vanovavarira kuita zvakanaka. Chakakosha ndechekuti vanhu vose ava vari kuita basa raMwari nyange vasiri musangano redu. Isuwo tinotongwa namabasa edu kwete nezita rokuti muKristu.

Dama Rakanaka ranhasi riri kupa yambiro kuna vaya vanodzivisa vamwe kuita basa raMwari. Hanzi urwu rutadzo rukurusa. Imhingidzo inogubura vamwe munzira yechitendero.

  • Ndiri chigumbuso here kuna vanotsvaga Jesu?
  • Kana vanhu vachindiona nemararamiro andinoita nematauriro andinoita vangada here kuva vaKristu?
  • Unopa chimiro chakaita sei chechiKristu kuvanhu?
  • Tinopa chimiro chakaita sei savabereki, vadzidzisi, vashandirwi, vatungamiri?

Saka nhasi tiri kutaura zvinhu zviviri zvakakosha. Tinofanira kudzidza chokwadi chekuti Mwari anogona kuita basa rake kuburikidza navanhu vakasiyana-siyana. Chidzidzo Chechipiri chiri kuti “Pose pane rudo panaMwari.” Izvi zvinoreva kuti isu handisu varidzi vaMwari nokuti Mwari anowanikwa pose pane rudo.

Chichipiri, SomuKristu, kuburikidza norupapatiso, ndakadaidzwa kuti ndive Kristu kuvanhu. Kunze kwokuti ndive munhu ane godo, ndinofanira kuparadzira rudo. Mozisi anoti “Dai vanhu vose vaMwari vava vaporofita, Mwari avapa mweya wake.” Mozisi haana godo nevanhu asi kuti anoda kuti vose vaite basa raMwari.

Svondo 15 reGore A

Posted by MC on July 11, 2020
Posted in: Gore A, Mharidzo. Leave a comment

Chiverengo choKutanga

Vana veIziraeri vaiva muhutapwa kuBhabhironi kwamakore akawandisa zvokuti vakatanga kufunga kuti havafi vakadzokera kunyika yavo yechizvarwa. Vaive vaneta nokunamata uye vaive vave kuodzwamwoyo. Rimwe zuva Mwari akamutsa muporofita pakati pavo uyo akaparidza shoko rokuti rusununguko rwava pedyo. Vanhu vachinzwa shoko iri vakatanga kumirira nechitarisiro asi mamwe makore akadarika vimbiso iyi isina kuzadziswa. Vakaodzwa mwoyo zvekare.

Panguva iyi muporofita akasimbisa vanhu vachivataurira kuti Shoko raMwari rinozadzisa vimbiso dzaro. Hapana mhingidzo initadzisa kuzadziswa kwevimbiso yaMwari. Mushure memamwe makore vimbiso yaMwari yakatanga kuzadziswa apo vana veIziraeri vakavamba kudzokera kunyika yavo vachibva Bhabhironi.

Vadiwa, muhupenyu mune nguva dzokuti tinotadza kuvimba neShoko raMwari zvikuru kana takatarisana nematambudziko makukutu, kana tisingaone shanduko muhupenyu hwedu. Asi nhasi zviri kunzi shoko raMwari hariwiri pasi, rinozadziswa.

Chiverengo cheChipiri

Tikacherechedza tinoona kuti takakomberedzwa nokutambura kukuru. Vanhu vazhinji havasisina chitarisiro nohupenyu, vazere nokusurikirwa. Muedzo ndewekuona izvi sedambudziko risingagadzirisiki, risingaperi. Zvinoita sokunge tangomirira kuparadzwa.

Pauro ari kuti hatifaniri kushaya chitarisiro. Ari kushandisa mufananidzo womudzimai ave kubara. Mudzimai uyu anotambudzika, azere namarwadzo, anochema. Vanomunzwa vanoti zvimwe ava kufa, asi handizvo. Kuchema kwake ndekunopa hupenyu. Ave padyo nokutipa upenyu utsva, munhu mutsva. Nenguva pfupi misodzi yamaradzo ake inova misodzi yomufaro.

Pauro ari kuti kwatiri tose ivai nechitarisiro. Ichokwadi kuti munyika mune kutambudzika kukuru. VaKristo havagoni kuita sokunge nyika haisi kugomera namatambudziko. Asiwo havafaniri kushaya chitarisiro. Vanofanira kuziva kuti nyange zvinhu zvichiita sokunge zvisingafi zvakanaka zvichanaka chete.

Dama Rakanaka

MuDama Rakanaka Jesu anotaura rungano rwomukushi. Anotaura rungano urwu panguva yaanenge achangodzingwa mumusha maakakurira, panguva yaanenge achangobva mukubatwa sesasikamu muKepanaume. Panguva iyi vaFarisiya vaida kumupfuudza, vadzidzi vake vainge vachimutiza mumwe nomumwe. Kushumira kwake kwaiita sokunge kuri kuwira pamatsi. Zvinhu zvaive zvisina kumira zvakanaka uye shoko rake raiita sokunge rave padyo nokuparara.

Zvisinei, Jesu akaramba achidzidzisa kunyange aisangana nezvidingamupini. Aiziva kuti shoko rake richabereka michero nokuti rine simba risingadziviswe nomunhu wenyama.

Kuuya kwaMesiya kwaisava nemheremhere. Paiva panyika haana kumboita mukurumbira unoshamisira. Jowani mubhabhatidzi akatova nemukurumbira kudarika Jesu. Jesu aiita ekatsanga kemasitadhi, adukuduku, kasina kukosha, kasinganyatsooneki asi kanokura kusvika kavakushamisa vanhu. Dama rake rakapinda munyika zvinyoronyoro uye nhasi uno mazwi emurungao rwemukushi ari kuzadziswa. Shoko ratekeshera.

Dzimwe nguva tinozvibvunza kuti zvinobatsirei kuparidzira Dama Rakanaka kunyika iino izere nohuori. Tinotaurirei nevanhu vasingadi kuteerera, vanhu vakaoma mwoyo, vanhu vanongozvifunga? Hatisi kutambisa nguva here? Nhasi rangarira kuti Shoko raMwari rakafanana netsanga yemasitadhi inesimba risingakurumbidzi raonekwa!

Hama, pakati pedu pane mwoyo yanzwa nekutsokodzerwa: mwoyo isisakwanise kuchengeta mbeu yeShoko raMwari. Vanhu vanonzwa Shoko vasingarinzwisisi nokuritendera. Tine mwoyo inebvepfe asi isingatani kudzokera shure. Shoko rinomera mavari asi hatirani kusvava. Tinewo mwoyo inotambudzika inokuriraw nezvepasi zvakaita semari. Zvinhu izvi zvinoita kunge minzwa inovhunga shoko raMwari. Asiwo tine vanhu pakati pedu vanemwoyo yakanaka inobvumidza Shoko raMwari kubereka michero yakawanda.

Saka tine mhando ina dzevhu dziri mumwoyo memumwe nemumwe wedu. Mune mumwe nemumwe wedu mune minzwa, matombo, nzira dzakatsokodzerwa nevhu rakanaka. Tinofanira kuziva izvi toedza kuzviumba kuti tive ivhu rakanaka tinochengeta, kurera nokukudza Shoko raMwari.

Svondo 14 reGore A

Posted by MC on July 10, 2020
Posted in: Gore A, Mharidzo dzamasvondo. Leave a comment

Chinhu chikuru muhupenyu hwemumwe nemumwe wedu mubvunzo wokuti INI NDINI ANI? Kana zvimwe zvose zvinoshanduka, zvichipfuura zvabviswa ini NDINI ANI. Mukuzvipoda-poda kwedu, mukuzvishongedza kwedu nezvimwe zvose tinotambudzwa nomubvunzo wokuti INI NDINI ANI?

Mubvunzo Uyu unopindurwa napakasiyana-siyana. Unogona kuti NDIRI ZVANDINOITA. Ichi ichokwadi. Kana ndichiita zvine pundutso ndinodada nazvo. Asi kana ndikati ndiri zvandinoita hapaite dambudziko here kana ndikakundikana munezvandinoita? Hapaite dambudziko here ndikachembera ndisisakwanise kuzviitira kana kuti ndikarwara? Hapasiripo here pandinozosurikirwa nekusavimba nezvandiri?

Vamwe vanopindura mubvunzo wokuti ndini ani vachiti NDIRI ZVINOTAURWA NAVAMWE PAMUSORO PANGU. Iyi ipfungwa yakanaka uye yakakosha pane dzimwe nguva. Kana vanhu vachitaaura zvakanaka pamusoro pangu ndinonzwa kufara nekusununguka. Asi chii chinozoitika kana vanhu vakatanga kutaura zvakaipa pamusoro pangu? Hapasiripo here pandinotanga kusurikirwa nekunyunyuta kugona kwangu? Ukafunga kuti uri zvinotaurwa navamwe pamusoro pako unogona kupedzisira wava nehunhu hunoshanduka-shanduka uchieddza kufadza vanhu. Asi kana ukadai unenge wavakutorarama manyepo.

Vamwewo vanhu vanopindura vachiti NDIRI ZVANDIINAZVO. Mumwe anogona kuti ndakakomborerwa nekuti ndiri muSouth African handisi muZimbabwean. Ndine vabereki vane mari. Ndakadzidza. Ndine hutano handina shuramatongo kana kuti Covid 19. Ndine hembe dzakawanda. Ndine Midziyo yemumba yakawanda. Ndine motokari dzakanaka. Asi kana ukazviona sezvizvi paunorasikirwa nezvinhu zvose – nemudikani, nehutano upenyu hwako – hunotibikirwa nerima. Kana ukarasikirwa nezvinhu iwe uchifunga kuti ndozvauri vanhu havazokuona sechinhu, vaikuremekedza vanogona kutanga kukutarisira pasi.

Nguva zhinji tinopedzera simba pakuda kunzi ndiri zvandinoita, ndiri zvinotaurwa navamwe, ndiri zvandiinazvo. Asi kana vanhu vakataura zvakanaka pamusoro pako, ukava nezvinhu zvaunoshuvira, ukaita basa rinokufadza unogona kunzwa zvakanaka ugozadzwa nomufaro. Dambudziko rinouya paunorasikirwa nezvinhu zvose izvi, vanhu pavanenge vasingatauri zvakanaka pamusoro pako nepaunorasikirwa neshamwari. Upenyu hwako hunotanga kurema uye hunoshaya chirevo.

Nhasi ndinoda kuti tizive kuti mafungiro ose aya haana kunaka. Dhimoni rakamboedza Jesu kuti azvione nemaonere iwaya. Rakauya kwaari rikati “Shandura matombo aya ave chingwa uratidze nyika kuti pane zvaunogona kuita.” “Svetuka kubva pamusoro petemberi kuti vanhu vakugamhe vagotaura zvakanaka pamusoro pako.” “Ndipfugamire ndigokupa zvose zvaunoshuvira muhupenyu.” Asi Jesu akati “Uri kutaura manyepo. Ndinoziva zvandiri nekuti mweya ndiwo wandituma kuti ndiyedzwe newe. Mweya waMwari wauya kwandiri ukati ‘Uri mwanakomana wangu wadiwa anondivadza.’”

Tinoona kuti Jeesu akaedzwa asi akaramba akabatiriria pachokwadi chezvaari. Vanhu vaimurumbidza vamwe vachimuramba vamwe vaimbuimbira “Hosana” vamwe vachisheedzera “Ngaarovererwe.” Zvose izvi zvaisava nebasa nekuti aiziva chokwadi chekuti chero zvaitika NDIRI MWANA WADIWA WAMWARI. Izvi ndizvo zvandichava nguva dzose. Chokwadi ichi ndicho chinokugonesa kurarama munyika ino ine hunyengedzi ine vanhu vanosekerera, vanopemberera nokuimbira asi vazere noruvegno muhana dzavo. Uri mudiwa kwete nokuti vanhu vanokurumbidza asi nokuti Mwari baba ndivo vanodaro.

Hama, chinhu chandinoda kuti ubatisise ndechekuti uri mwanakomana kana mwanasikana wadiwa waMwari. Izvi ndizvo chaizvo-izvo zvauri. Izvi ngazvipinde munzeve dzako, mumwoyo mako nemuhupenyu hwako hwose. Zvimwe zvinhu zvose zvinoshanduka asi chokwadi chokuti uri mudiwa waMwari hachichinje. Nhaizvozvo nguva dzose dzaunofunga kudzokera kumashure, dzaunoshatiriswa, zvinhu pazvinenge zvisina kumira zvakanaka ziva kuti uri waMwari.

Rungano

Rimwe zuva vanhu vazhinji vaive mumutsara webhanga wakakurisa. Mumwe murume aiva shure kwemutsara akatanga kupopota achiti anoda cheya yekumbogara pasi nekuti aive amira kwenguva yakareba. Akati “mudenge ndinokwira first class ini.” Mahobho aironganisa vanhu akaedza kutsanangura kuti paive nedambudziko raive rava padyo nekugadziriswa asi baba vaya vakaramba vachipopota vakati “Unomboziva kuti ndinonzi ani here iwe?” Mahobho akabva ati kune vamwe vose “Pamusoroi vabereki pana baba vasiri kuziva kuti vanonzi ani. Kana paine anovaziva huyai mberi mutibatsire!”

Unombonzi ani iwe? Usavimba nezvinopfuura.

Svondo 7 reGore A

Posted by MC on February 23, 2020
Posted in: Mharidzo, Mharidzo dzamasvondo. Leave a comment

Muri maKristu here? Musati mapindura imbozvibvunzai kuti: Ndinoda vavengi vangu here? Ndinoitira zvakanaka vanondivenga here? Mhinduro kumibvunzo iyi ndiyo inotaridza kuti tiri maKristo zvechokwadi here kana kuti kwete.
MuDama Rakanaka tiri kuudzwa zvinhu zvina zvinotsaura muKristo kubva kune asiri muKristo.
1 IVAI NENYASHA
Hanzi ida vavengi vako, itira zvakanaka kune vanokuvenga, komborera vanokutuka, namatira vanokubata huyanga.
Mwari vanogara vachitiitira nyasha kunyange tichivatadzira kuburikidza namaitiro edu. Tikarangarira nyasha dzatinoitirwa tichava vanhu vanoregerera vasingachengete zvigumbu.
2 IVAI VANHU VAKAPFAVA
Hanzi kana munhu akakurova mbama padivi mupe rimwe divi, akakutorera hanzu yako mupe zvimwe.
Rupfave ndirwo rwunotonga hasha. Nyange pakakodzera kuti munhu ushatirwe ukava norupfave uchaita kuti pasava nenyonga-nyonga nokuparadzwa. Usatsividze. Kana tikava norupfave ticharwisa muvengi chaiye akakodzera kurwiswa kwete kurwisana isu pachedu, muvengi uyu ndiSatani. Zano rasatani nderekushandisa hasha kuputsa mhuri dzedu.
3 TAMBANUDZA MAOKO
Hanzi ipa kune wose anokukumbira, uye kana paine vanokutorera zviri zvako vasiye vakadaro.
Kazhinji hatitani kushatirwa kana vanhu vakatitorera nguva, zvipo kana hupfumi hwedu. Asi isu savaKristu tinofanira kusununguka kupa matarenda edu. Mwari vanotiitira zvakawanda isu tinofanira kuitira vamwe zvakanaka.
4 RUENZANISO
Zvanzi itira vamwe zvaunoda kuti vakuitirewo.
Kana tichida nyika ine rugare zvinofanira kutangira patiri. Dzidza kubata vamwe zvakanaka. Itira vamwe nyasha, mwoyo murefu uye vabate noruenzaniso. Ukaitira vamwe hutsinye uchakohwa hutsinye.

Kristo Mambo Gore C

Posted by MC on November 24, 2019
Posted in: Mazuva Makuru, Mharidzo. Leave a comment

1      Mutungamiri anofanira kubvuma mhosva

Bhuku raSamueri rataverenga rinotiudza nezvemadzimambo maviri: Sauro naDhavhiti. Tikaongorora tinoona kuti Sauro anosvorwa nekuti haana kuteedzera gwara raidiwa pakupira mipiro uye akatadza kuuraya mambo Agagi. Dhavhiti Norumwe rutivi aivewo nezvitadzo zvake. Akaita upombwe nemukadzi wemunhu – Bhatishebha – akauraisa murume wake Uraya. Asi zvisinei Nokuti vese vaive nezvikanganiso zvavo, Sauro anobviswa pahumambo Davhiti anorumbidzwa.

Rungano urwu runotidzidzisa kuti vatungamiri vanokanganisa asi zvavanoita mushure mekukanganisa ndizvo zvinosiyana. Sauro anoramba kuteerera Mwari maererano navaAmereki muna1 Samueri 15. Haabvumi zvekare kuti atadza kuteerera. Anopa tsanangudzo dzakawanda dzekuramba mhosva. Norumwe rutivi muna2 Samueri 12:13 Dhavhiti paanosvikirwa naNathani achiudzwa mhosva yake anoti “ndatakatadzira Mwari.” Dhavhiti anobvuma mhosva yake nekureurura. Nokuda kwaizvozvo anoregererwa naMwari ova mutungamirira ane mukurumbira anodiwa navanhu naMwari. Mutungamiri anokanganisa. Mutungamiri chaiye anobvuma mhosva dzake nekureurura zvivi zvake.

2      Vimba naTenzi

Vana veIsraeri vakapopota vakamacha vachiti vanoda mambo wapasi pano sedzimwe nyika dzakakomberedza. Chishuvo chavo chakaitika asi Samueri akavayambira kuti vakada kutemba nemunhu wenyama semutungamiriri wavo mutungamiriri uyu achavapandukira. Akavakurudzira kunamata Mwari kwete munhu wenyama. Mashoko aSamueri akaitika. Dhavhiti anyepa uye aiva noruchiva. Dhavhiti airaradza zvekare. Munhu wenyama anorasira. Unogona kusvika pakuuraya kuti apinde pachigaro asi kana achinge avapo anobva aita upombwe, kuraradza, upenyu hwapamusoro nekunyepa. Vimba naTenzi kwete munhu wenyama.

3      Mambo anozvidukupisa

MuDama Rakanaka tiri kuona Kristo Mambo vanoita kuda kwaMwari nyange vachinyadziswa, vachinyombwa vari pamuchinjikwa. Muhupenyu hwake hwose Jesu haaatsvage kuda kufevherwa nevezvematongerwo enyika kana kuda kufadza vanhu nenhema. Jesu anoita kuda kwaMwari. Isuwo tinofanira kuita kuda kwaMwari nyange zvodii. Tinova vatengesi kana tikatadza kutsiura vamiririri vedu muparamende, vamiririri vedu mukanzuru, vatungamiri vedu kumabasa. Tinova vatengesi kana tikada kunakidza vatungamiri vepasi pano tisingaiti kuda kwaMwari.

Zuva raVaTsvane Vose

Posted by MC on November 2, 2019
Posted in: Gore C, Mazuva Makuru, Mharidzo. Leave a comment

Zuva raVaTsvene Vose: Kuona

Dzimwe nguva tinorarama takavharirwa muhupofu hwedu. Kubva pakuzvarwa tinopihwa mumwe mufananidzo ‘hwehupenyu hwakanaka’. Hupenyu:-

  • hwemotokari dzinodhura,
  • hwenzendo dzekure kune mafaro,
  • hwemadhidhindi,
  • hwedzimba dzakanakisa nezvimwe.

Tinoudzwa kuti upenyu chaihwo hupenyu hwekunge wakasununguka, pasina mitemo inokusungirira uye uchiwana zvose zvaunoda. Tinoratidzwa mufananidzo wokuti hurombo, nzara nokushaya hupenyu hwokutukwa.

Orijeni wokuArekizanda akati ‘hutsvene kuona namaziso aKristu’.

Terihadhi dhi Chadhini akatiwo donzvo rake somuKristu nderekubatsira vanhu kuti vaone.

Tomasi Akwainai akataura achiti chinangwa chikuru chohupenyu hwechiKristu kuona.

Mumwe mudzidzisi wechitendero chechiJudha anonzi Harodhi Kushina anonyora mubhuku rake achiti ‘Hwaro hwechitendero hausi muunganidzwa weminamato kana mitorododo yemipiro. Chikuru pachitendero kuona. Izvi hazvishandure nyika yatinogara asi zvinoshandura maonero atinoita zviripo uye izvozvi ndizvo zvinoita kuti pave nomusiyano.’

Vasande vanhu vanoona nokuita zvimwe zvinhu pamusoro pezvavanenge vaona. Vanhurume navanhukadzi vanoona nemaziso aKristu. Nemaitiro aya vanoona zvakakosha, zvinofanira kukosheswa uye minongedzo yoururami.