Manovhena

NOVENA KUNA MWEYA MUTSVENE

Posted by MC on May 20, 2023
Posted in: Manovhena, Mimamato. Leave a comment

Mweya Mutsvene, ndimi wechitatu muUtatu Hutsvene
hwaMwari! Ndimi Mweya wechokwadi nohutsvene,
munobva munaBaba noMwanakomana, makangoenzana navo muna zvose! Ndinokupfugamirai ndinokudai
nomwoyo wangu wose.
Mweya Mutsvene wadiwa, ndinoisa chivimbo murudo
rwenyu kwandiri rwakadzama pandiri kuita novena iyi,
kuti kana kuri kuda kwenyu mundipewo izvi …

(Kumbira chaunoda)

Ndidzidzisei kuziva nokutsvaga Mwari akandisika uye
wandakasikirwa. Zadzai mwoyo wangu nokutya Mwari
uye rudo kwaari. Itai kuti ndirwadziwe kukutadzirai uye
ndive nomwoyo murefu. Musandirega ndichiwira
murutadzo.
Wedzerai mandiri kutenda, chitarisiro nerudo ndikure
mutsika dzakanaka dzinofambirana nezvandiri
pakukurarama.
Ndiitei muteveri waJesu akatendeka, mwana anoteerera
sangano uye anobatsirana navamwe. Ndipeiwo nyasha
dzokuti ndigone kuchengetedza mirau yenyu uye
kugamuchira masakarAmende ndakakodzera.
Ndipeiwo zvipo zvenyu zvinoera zvinoti; ungwaru,
runzwisiso, zano rakanaka, rutsigo, ruzivo, runamato
nokutya Tenzi. Wedzeredzai mandiri michero yenyu
inoera inoti; rudo, mufaro, mwoyo murefu, mutsa, unaku,
mwoyochena, unyoro, kutendeka, kuzvidukupisa,
kuzvibata noutsvene.
Ndisvitsei kuutsvene mukurarama daidzo
yamakandishevedzera, mugondisvitsawo kumugumo
wakanaka wokuzofara muupenyu husingaperi, nomuna
Jesu Kristu Tenzi wedu. Amen

NOVHENA YE TSITSI DZAMWARI

Posted by MC on March 30, 2019
Posted in: Manovhena, Mimamato. Leave a comment

ZUVA REKUTANGA

Zuva ranhasi uisa kwandiri vanhu vamarudzi ose, zvikuru vatadzi vose uvanyudze mudziva retsitsi dzangu.

Yesu muzere netsitsi, zviri mamuri kutiitira rupfave uye kutiregerera, naizvozvo musatarise matadzo edu asi tarisai ruvimbo rwedu rwatakaisa kuunaki hwenyu husingaperi. Tigamuchirei tose murudo rweMoyo wenyu uzere netsitsi dzine rupfave,uye musatirega tichitiza kubva mauri. Tinoteterera izvi kwamuri nerudo rwenyu runokubatanidzai naBaba naMweya Mutsvene.

Baba musina magumo tendeutsirai meso enyu etsitsi kumarudzi ose zvikuru kuvatadzi, vose vanova vakambundikirwa muMoyo waYesu uzere tsitsi norupfave. Nemapusana pedambudziko rake rinoisvosuwisa tiratidzei tsitsi,kuti tizorumbidza simba risina mugumo retsitsi dzenyu kwemisi isingaperi. Amen.

ZUVA RECHIPIRI

Nhasi uisa kwandiri mweya yavapriste navapikiri uvanyudze muhudzamu hwetsitsi dzangu.

Yesu muzere netsitsi,mamuri munobva zvinhu zvose zvakanaka, wedzerai girasiya renyu kuvanhurume navanhukadzi vakateketerwa kubasa renyu kuti vagoita mabasa etsitsi namazvo kuitira kuti avo vanovaona vagokudza Baba vetsitsi vari Kudenga.

Baba musina mugumo, tendeutsirai meso enyu etsitsi kune mweya yeavo vakasarudzwa kuzoshanda mumunda wenyu – vapriste navapikiri; vazadzeyi nesimba remakomborero enyu. Nekuda kwerudo rwemwoyo weMwanakomana wenyu munova mavakambundikirwa, vapeiwo simba nechiedza kuti vagokwanisa kutungamirira vamwe munzira yeruponeso, uye nezwi rimwechete vaimbe nekurumbidza tsitsi dzenyu kwemisi isingaperi. Amen.

ZUVA RECHITATU

Nhasi uisa kwandiri mweya yose yakazvipira uye yakatendeka, uinyudze mudziva retsitsi dzangu.

Yesu muzere netsitsi, munopa magirasiya enyu akawandisa kune mumwe nemwe uye kuvanhu vose kubva kuupfumi hwetsitsi dzenyu. Titambireiwo murudo rwemwoyo wenyu uzere netsitsi norupfave uye musatirega tichibudamo. Tinokumbira girasiya iri pamusana perudo rwenyu kuna Mwari Baba vekudenga, rwunoita kuti mwoyo wenyu utsve zvinotyisa.

Baba musina mugumo, tendeutsirai meso etsitsi kune mweya yose yakatendeka, senhaka yeMwanakomana wenyu. Pamusana pedambudziko rake rinoisvosuwisa, vapeiwo chikomborero chenyu uye muvadzivirire nguva dzose. Ndiko kuti varege kurasa rudo rwenyu kana upfumi hwechitendero chisande, asi kuti pamwe navangere navasande, vakudze tsitsi dzenyu dzisina mugumo kwemisi isingaperi. Amen.

ZUVA RECHINA

Nhasi uisa kwandiri vose vasingatenderi Mwari naavo vasingandizivi.

Yesu mune tsitsi norupfave muri chiedza chepasi pose. Gamucharai muMwoyo menyu muzere netsitsi norupfave mweya yaavo vasati vatendera Mwari nemweya yaavo vasati vakuzivai. Itai kuti miranzi yamagirasiya enyu ivavhenekere kuti ivowo, pamwechete nesu, vagorumbidza tsitsi dzenyu dzinoshamisa. Musavarega vachitiza panzvimbo iyo inouya mwoyo wenyu uzere netsitsi norupfave.

Baba musina magumo, tendeutsirayi meso enyu etsitsi kune avo vasingatenderi mamuri naavo vasati vakuzivayi, asi vakapfigirwa muMwoyo wa Yesu muzere netsitsi norupfave. Vakwevereyi kuchiedza cheDama Rakanaka. Mweya iyoyi haizive kuti mufaroyi kukudai imi. Itai kuti naivowo vave vanozokudza mwoyochena wetsitsi dzenyu kwemisi isingaperi. AMEN.

ZUVA RECHISHANU

Mhasi uisai kwandiri mweya yaavo vakazvitsaura kubva muKirike.

Yesu muzere netsitsi, muri runako pacharwo, hamurambi kupa chiedza kune vanochitsvaka kwamuri. Gamuchirai mumwoyo wenyu uzere netsitsi norupfave meya yaavo vakazvitsaura kubva muKirike. Vadhonzei nesimba rechiedza chenyu mukubatana neKirike, uye musavarega vachitiza muugaro hweMwoyo wenyu uzere netsitsi dzine rupfave, asi itai kuti naivowo vazorumbidza huwandu hwetsitsi dzenyu.

Baba musina mugumo tendeutsirai meso enyu kune mweya yaavo vakazvitsaura muKirike roMwanakomana wenyu, vakashandisa zvisakarurama magirasiya nemakomborero amakavapa vachishingirira muzvikanganiso zvavo. Musatarise kukanganisa kwavo, asi tarisai pane rudo rweMwanakomana wenyu, uye pamarwadzo ake anosuwisa aakasangana nawo pamusana pavo, nokuti naivowo vakambundikirwa muMwoyo wake uzere rudo netsitsi norupfave. Itai kuti naivowo vagozorumbidza tsitsi dzenyu huru kwemisi isingaperi. AMEN.

ZUVA RECHITANHATU

Nhasi uisa kwandiri mweya yavakazvidukupisa neyevana vadiki uinyudze mutsitsi dzangu.

Yesu muzere netsitsi, imi pachenyu makati ‘Dzidzai pandiri nokuti ndakapfava uye ndakazvidukupisa muMwoyo.’ Gamuchirai muMwoyo wenyu uzere netsitsi norupfave mweya yaavo vakazvidukupisa naavo vakapfava, pamwe nemweya yavana vadiki. Mweya iyi inounza mufaro mukuru kudenga uye inofarirwa naBaba vokudenga. Vanounza munhuwi unonhiwirira pamberi pechigaro chamambo. Mwari pachake anofadzwa nekunhuwirira kwavo. Mweya iyi ine nzvimbo narini narini muMwoyo wenyu uzere nerudo netsitsi norupfave uye inoramba ichiimba rwiyo rwerudo nengoni.

Baba vasina mugumo, tendeutsirai meso enyu etsitsi kune avo vakazvidukupisa navakapfava pamwe nevana vadiki, avo vakambundikirwa muMwoyo wa Yesu uzere nerudo netsitsi norupfave. Mweya iyoyo yakafanana zvikuru neMwanakomana wenyu. Kunhuwirira kwavo kunosimuka kubva panyika kuchisvika pachigaro chenyu. Baba vetsitsi neunaki ndinokumbirisa kwamuri pamusana perudo rwamunarwo kumweya iyi, uye nemufaro wamunowana kubva pairi; komborerai pasi rose kuti mweya yose pamwechete iimbe nekukudza tsitsi dzenyu kwemisi isingaperi. AMEN.

ZUVA RECHINOMWE

Nhasi uisa kwandiri mweya yose inonyanya kukudza nekurumbidza tsitsi dzangu uvanyudze mutsitsi dzangu.

Yesu muzere netsitsi, Mwoyo wenyu rudo pacharwo, gamuchirai mumwoyo wenyu uzere netsitsi norupfave, mweya yoseinonyanya kukudza nekurumbidza hukuru hwetsitsi dzenyu. Mweya iyi yakazadzwa nesimba raMwari pachake. Pakati pamatambudziko neminyama, inofambira mberi iine ruvimbo netsitsi dzenyu. Zvakare yakabatana nemi, Jesu wangu, inotakura vanhu vamarudzi ose pamafudzi ayo. Mweya yose iyi haizotongwi zvinorwadza asi tsitsi dzenyu dzichaigumbatira apo inenge yobva murupenyu rwapasi pano.

Baba musina mugumo, tendeutsirai meso enyu azere netsitsi kumweya ino remekedza nekukudza zvakakosha pamuri zvekuva nemwoyo uzere netsitsi, uye uye yakavharirwa mumwoyo waJesu uzere norudo netsitsi norupfave. Mweya iyi ndiyo Dama Rakanaka mhenyu. Maoko ayo azere namabasa etsitsi dzenyu uye mweya yavo ichifashukira norudo vanoimba rwuyo rwekurumbidza tsitsi dzenyu, imi Vokumusoro! Ndinokuteterera, Mwari wangu, varatidzei tsitsi dzenyu pamusana pechitarisiro neruvimbo zvavakaisa mamuri. Itai kuti chitsidzo chaYesu, chizadzikiswe mavari, apo akati kwavari, panguva yeupenyu hwavo asi zvikuru panguva yekufa kwavo; mweya yose inoremekedza tsitsi dzake, iye pachake achaimirira semudziviriri. AMEN.

ZUVA RECHISERE

Nhasi uisa kwandiri Mweya yose yakamirira iri muPurugatoriyo uinyudze mugomba retsitsi dzangu.

Yesu muzere netsitsi, imi pachenyu makataura kuti munoshuvira tsitsi, zvino ndinouisa muMwoyo wenyu uzere netsitsi norupfave, mweya yose iri muPurigatoriyo, mweya yamunodisa kwazvo, asi inofanira kuripira kuruenzaniso rwenyu. Dai waro ropa nemvura zvakayerera zvichibva kuMwoyo wenyu zvadzima marimi emoto wePurigatoriyo, kuti ikowo, emoto unochenesa kuti simba retsitsi dzenyu rirumbidzwe ikokowo.

Baba musina mugumo tendeutsirai meso enyu azere netsitsi kumweya iri kutambudzika iri muPurigatoriyo iyo yakambundikirwa muMwoyo waYesu uzere netsitsi norupfave. Ndinokutetererai kuti nepamusana pedambudziko raJesu Mwanakomana wenyu rinosuwisa nekurwadziwa kakwe kukuru kwakazadza Mwoyo wake Musande zadzai tsitsi dzenyu kumweya yose iri pasi peruongororo rwenyu.

Musavatarire neimwe nzira asi atarisei chete kuburikidza nemumaronda eMwanakomana wenyu wadiwa, nekuti tinotendera kuti runako netsitsi zvamuinazvo hazvina mugumo. AMEN.

 ZUVA RECHIPFUMBAMWE

Nhasi uisai kwandiri mweya yose inodziya, muinyudze mugomba retsitsi dzangu.

Yesu mune tsitsi dzizere, muri rupfave pacharwo. Ndinouyisa mweya inodziya muMwoyo wenyu une tsitsi norupfave. Mumoto uyu werudo rwenyu rwusina tsvekwa, itai kuti mweya iyi yakadziya, inoita kunge zvitunha, yakakuzadzai nekusema kukuru, izadzwe zvakare nemoto wenyu. O Mambo Yesu mune rupfave rukuru, ratidzai simba nerudo rwenyu, mugoikwevera kumunhuwi werudo rwenyu, mugoipa chipo cherudo rutsvene nekuti kwamuri hakuna chisingagoneke.

Baba musina mugumo, tendeutsai meso enyu etsitsi kumweya yakadziya asi iyo yakambundikirwa muMwoyo waYesu uzere tsitsi norupfave. Baba vetsitsi, ndinokutetererai pamusana pedambudziko reMwanakomana wenyu nekurwadziwa uko kwaakaita kwamaawa matatu ari pachipiyaniso. Itai kuti naivowo vakudze, varumbidze udzamu hwetsitsi dzenyu. Amen

Novhena yaJeradhi Mutsvene

Posted by MC on March 27, 2019
Posted in: Manovhena, Mimamato. Leave a comment

Munamato

Mwari muna masimba ose, imi makakwevera Jeradhi Mutsvene kwamuri kubvira pauduku hwake kuti ave mutevedzeri wemuenzaniso wemwanakomana wenyu akarovererwa pachipiyaniso tinokutetererai kuti nokutevedzera zvaiitwa naJeradhi Mutsvene tiifanane naiye Jesu Kristo akarovererwa pachipiyaniso. Izvi tinozvikumbira nokuna Kristo Mambo wedu. Amen

Zuva rokutanga

Jeradhi Mutsvene makangogara makazara nechitendero ndiwanireiwo chitendero nemwoyo wangu wose zvose zvandinodzidziswa kutendera nesangano dzvene raMwari kuti ndishingirire kugara upenyu utsvene kuti ndiwane mifaro youpenyu husingaperi.

Kwaziwai Mariya…….. (x9)

Zuva rechipiri

Jeradhi Mutsvene womwoyochena, kubvira pauduku hwenyu makanga musina hanya nezvinhu zvapasi pano ndibatsireiwo kuti ndiise ruvimbo rwangu nguva dzose muna Jesu Kristo chete uyo anova upfumi hwangu hwechokwadi uye ndiye chete anogona kundipa mufaro zvino nemisi isingaperi.

Kwaziwai Mariya x9

Zuva retatu

Jeradhi Mutsvene munobwinya norudo, makakwanisa kuona rudo rwezvapasi samarara. Makapira upenyu hwenyu kushandira Mwari nevamwe muchikudza mbiri yaMwari mukuzvininipisa kwenyu uye maigarobatsira vari mumatambudziko nekunyaradza vanosuruvara. Ndinokumbirawo kuti mundiwanirewo gomborero rokuda Mwari oga anova ndiye runako rwose nokuda vamwe pamusana pake, ndizogara naye mumbiri yake isina mugumo.

Kwaziwai Mariya x9

Zuva rechina

Jeradhi Mutsvene ruva dzvene risina chinongo, namagariro enyu akafanana nengirozi uye upenyu hwenyu hutsvene hwamakararama makagamuchidzwa naamai vedu Mariya Mutsvene pamwe nomwana wavo zvivimbiso zvakanakisisa zvorudo, ndinokumbirawo kuti kurwisana nouipi ndigozowanawo ndaza inowanikwa yakamirira avo vakashinga vari muchokwadi.

Kwaziwai Mariya x9

Zuva rechishanu

Jeradhi Mutsvene muenzaniso wekuteerera kutsvene, imi makazvirereka mukazviisa pasi peavo vaive vari pachinzvimbo chaJesu Kristo kwamuri muupenyu hwenyu, nenzira iyi makaeresa mabasa enyu epasi. Ndikumbirireiwo kuna Mwari gomborero rokuzviisa pasi pekuda kwaMwari nguva dzose uye kuti ndiwanewo chipo chekuteerera muna zvose kuti ndigotevera Jesu anova ndiye muenzaniso wangu akateerera kusvika pakufa.

Kwaziwai Mariya x9

Zuva rechitanhatu

Jeradhi Mutsvene imi makagona chaizvo kutevedzera Jesu Kristo mununuri wedu aiva nembiri huru yekuzvirereka. Ndikumbirireiwo kuti nokuziva huduku hwangu pamberi paMwari ndigokodzerawo kupinda muumambo hwokudenga uhwo hwakapikirwa vanozvirereka nokuzvidukupisa momwoyo yavo.

Kaziwai Maria x 9.

Zuva Rechinomwe

Jeradhi Mutsvene gamba risina kumbokurirwa nechii zvacho makatirira zvikuru mumatambudziko, imi makawana mbiri muhutera hwenyu uye makasangana

nemanyepo ane hutsinye mukasvorwa asi imi makafara kutambudzika pamwe naKristo , ndikumbirireiwo kutsunga nekuzvipira kwamuri mumatambudziko angu kuti ndigoshinga mukutakura muchinjikwa wangu uyo unozondiwanira ndaza(chiremba) yembiri isingaperi.

Kaziwai Maria x 9.

Zuva Rerusere

Jeradhi Mutsvene mudi wechokwadi waJesu ari musakaramende kwazvo reyukaristiya imi makapfugama nguva yakareba chaizvo pamberi petabhenakoro apo makaravira mifaro yeparadhiso. Ndibatsireiwo kuti ndive norudo rusungambofi kuna Jesu uyewo kuti ndigamuchire yukaristiya sande kakawanda zuva roga roga ndirambe ndichikura murudo rwake rutsvene ndigowanawo gomborero rokuda Jesu.

Kaziwai Maria x 9.

Zuva Repfumbamwe

Jeradhi Mutsvene mwana akadiwa zvikuru nedenga,

imi muchiri mudiki makapihwa mwana Jesu namai Maria , vanova vakauya kwamuri mapfiga maziso enyu murufu. Ndinokumbira mundikumbirirewo kuti nditsvage nokuda amai vakakomborerwa muupenyu hwangu, kuti vave mufaro nenyaradzo yangu mumupata wemisodzi kusvika ndabatana nemi pamberi pechigaro chaMwari ndigorumbidza runako rwake kwemisi isingaperi. AMEN.

Kaziwai Maria x 9.

Pfugamiro paNovhena yamai voRubatsiro

Posted by MC on January 9, 2016
Posted in: Manovhena, Uncategorized. Leave a comment

©Musakope munamato uyu nechinangwa chokutsvagisa mari musina mvumo

Maitiro pfugamiro
Rwiyo runoimbwa Mupristi kana mudhikoni achitora Sakaramende Rakakomborerwa tabhanekoro.

Vose vanopfugama
Munamato kuSakaramende Dzvene
Tenzi wangu Jesu Kristu,
Nokuda kwerudo rwamunarwo kwatiri,
Munoramba muri musakarAmenide iri siku nesikati,
Muchidana nokugashira vose vanouya kusokushanyirai,
Ndinotendera kuti murimo muSakarAmenide rebisiro (Atari).
Ndinokunamatai kubva kutsi kweunhando hwangu,
Uye ndinokutendai nezvipo zvose zvamakandipa,
Zvikuru nokundipa imi pachenyu musakarAmenide iri,
Nekundipa mai venyu vatsvene zvakanyanya semurevereri
Nokundishevedza kuti ndikushanyirei mukereke ino.
Jesu wangu, ndinokudai nomwoyo wangu wose,
Ndine urombo nokutadzira kwandakaita unaku hwenyu husingaverengeki.
Ndinotsidza kusambokutadzirai zvekare munguva inotevera,
Uye zvino, nyange ndisingakodzeri,
Ndinozvipa zvachose kwamuri.
Ndinorasa zvido zvangu,
zvidakadaka zvangu,
Zvipango zvangu (madiro),
nazvose zvandinazvo.
Kubva zvino zvichienda mberi ndinhadzirei,
nazvose zvose zvandinazvo, samadiro enyu.
Chandinongokukumbirai uye chandinosumba
Rudo rwenyu rutsvene, utsungi hwakaperera
nokuzadzisa kuda kwenyu zvizere. Amen.
(Arifonzo Rigori)

Mira unamate muchinyararire

Mupriste kana mudhikoni anopfugama pamberi peatari vanhu vachiimba Tantum ergo. Mushure merwiyo anoita munamato okomborera vanhu achiita mucherechedzo wemuchinjikwa neSakarambende dzvene.

Tantum ergo
Tantum ergo Sacramenitum Veneremur cernui:
Et antiquum documentum Novo cedat ritui:

Præstet fides supplementum Sensuum defectui.
Genitori, Genitoque
Laus et jubilatio,
Salus, honor, virtus quoque Sit et benedictio:
Procedenti ab utroque Compar sit laudatio.
Amen.

Mutungamiri: Makavapa chingwa chokudenga (Areruya)
Vose: Chine unaku hwose (Areruya)
Mutungamiri: Mwari makatisiyira sakaramende rinoshamisa kuti rive chiyeuchidzo chokutambudzika kwenyu; tigonesei kuremekedza muviri neropa renyu, kuti murambe muchitiraramisa, imi munogara nokutonga kwemisi isingaperi.
Amen.

Madetembo takomborerwa
Ngatirumbidzei Mwari.
Ngatirumbidzei zita rake dzvene.
Ngatirumbidzei zita raJesu.
Ngatirumbidzei mwoyo wake mutsvene kwazvo.
Ngatirumbidzei ropa rake rakakosha kwazvo.
Ngatirumbidzei Jesu musarakAmenide dzvene kwazvo reatari.
Ngatirumbidzei mweya waMariya wakasikwa usina mhaka.
Ngatirumbidzei kukwidzwa kwaMariya kudenga.
Ngatirumbidzei zita raMariya, mhandara namai.
Ngatirumbidzei Josefa Mutsvene, murume waMariya.
Ngatirumbidzei Mwari mukurumbidza kwatinoita vatumwa navatsvene vake.

Rwiyo rwokupedzisira

Novhena yaMai voRubatsiro-6

Posted by MC on January 9, 2016
Posted in: Manovhena, Uncategorized. Leave a comment

©Musakope vovhena iyi nechinangwa hcokutsvagisa mari musina mvumo

F. MINAMATO YENOVENA MUSHURE MEMISA

Hama dzadiwa, taungana pamberi pomufananidzo waAmai voRubatsiro Rusingagumi kuti tinamate nokutenda Mwari Baba vedu vokudenga. Mwari akatiitira zvinhu zvikuru nomuna Mariya. Tinopupu-rawo Mariya nezvizvarwa zvose sanyakukomborerwa kwazvo.

Mariya akagamuchira nyasha dzaMweya Mutsvene akadavira nokutendeka kuna Mwari. Isu norumwe rutivi hatina kutendeka kurudo rwaMwari nokuda kokutadza kwedu. Norubatsiro rwake tinotsvaga ruyamuro rwokukurira matadzo edu.

Munamato womhuri yaVakristu
Vose: Mai voRubatsiro Rusingagumi, noruvimbo rukurusa tinouya pamberi pomufananidzo wenyu mutsvene kuti tikurudzirwe nomuenzaniso weupenyu hwenyu. Tinokufungai panguva iya, zvamakanga muzere nechitendero noruvimbo (kunyinda), mukagamuchira daidzo yaMwari yokuva amai voMwanakomana wake. Tibatsirei isu, vana venyu, kugamuchira norufaro daidzo yedu muupenyu.

Pamakaziva kuti hama yenyu Erizabeti anoda rubatsiro makachimbidzoenda kunomubatsira. Tipei nyasha dzokubatsira vamwe tisingazvifunge sezvamakaita imi.

Panyasi pomuchinjikwa, makararama marwadzo oMwanakomana wenyu, mazuva matatu aitevera makazogoverana naye mufaro wokukunda kwake rutadzo norufu. Tibatsirei, amai, kugamuchira noushingi matambudziko namarwadzo oupenyu nekuvavarira tisinganete kuti tiwane mufaro woku-kunda chivi nekusangana zvinetso zveupenyu. Amen.

Mikumbiro yemhuri yaVakristu
Mutungamiri: Mumwe nemumwe wedu anounza zvinangwa zvake nezvido zvake. Ngatizvibatanidzei kuti zvinyatsonamatirwa nokupirwa kuna Jesu Kristu kuburikidza nokurevererwa naamai vake Mariya vakakomborerwa.

(Mimwe mikumbiro yakafanogadzirwa inosumwa)

Vose: Mai voRubatsiro Rusingagumi, onai vana venyu tapfugama pamberi penyu. Munonyatsoziva kuti Mwanakomana wenyu anoda kugoverana nesu zvakadii michero yoRusununguko. Naizvozvo tinoku-kumbirai kuti murambe muchireverera vanhu vose kuti vagamuchire zvipo zvorugare neruwadzano. Mai vakakomborerwa, Mwanakomana wenyu akakupai kwatiri saamai veduwo. Makasarudza kuti tiku-tii Mai voRubatsiro Rusingagumi. Norutendeseko rwokureverera kwenyu kune simba tinotarisira ku-gamuchira rudo rwenyu ruzere saamai dakara zuva raticharumbidza Mwari narini wose takabatana nemi navatumwa navatsvene. Amen.

Madetembo
Mutungamiri: Mariya Mutsvene mwanasikana wadiwa waBaba.
Daviro: Tireverereiwo
Mutungamiri: Mai vaJesu
Daviro: Tireverereiwo
Mutungamiri: Imba inoera yaMweya Mutsvene
Daviro: Tireverereiwo
Mutungamiri: Mai veSangano
Daviro: Tireverereiwo

Vose: Tenzi Jesu verudo, makatipa kuti tiremekedze mucherechedzo waamai venyu vakakomborerwa zvikuru une zita rakakosha rokuti ‘Rubatsiro Rusingagumi,’ Itai kuti nenyasha dzenyu, pakati pe-shanduko dzose dzerwendo rwoupenyu hwedu, tidzivirirwe norubatsiro nechengetedzo inogara iripo yaMariya Mhandara isina Rutadzo, kuti tikodzere kuwana mibayiro yoruponeso rusingagumi, imi mu-nogara nokutonga naMwari Baba makabatana naMweya Mutsvene nokusingaperi. Amen.

Kukomborerwa kwavarwere
MuPristi: Rubatsiro rwedu rwuri muzita raTenzi Daviro: Vakasika denga napasi.
MuPristi: Tenzi inzwaiwo minamato yedu.
Daviro: Kuchema kwedu kusvikewo kwamuri.
MuPristi: Tenzi ngaave nemi.
Daviro: Ngave nomweya wenyu.
MuPristi: Tenzi tarirai norupfave varanda venyu vanotambudzwa nourwere hwomuviri, pfungwa nomweya. Vanyaradzei mukutambura kwavo vagobatsirika nako kuburikidza nokuziva kuti nyasha dzenyu dzinorapa nekuponesa. Tinokukumbirai izvi nomune Mwanakomana wenyu Jesu Kristu, Tenzi wedu, anogara nokutonga pamwe nemi naMweya Mutsvene nokusingaperi. Amen.

Chikomborero chokupedzisira
Tenzi Jesu Kristu ngaave nemi kuti akudzivirirei;
ngaave mumwoyo yenyu kuti akukurudzirei;
ngaafambe nemi kuti akudzivirirei;
ngaakudururirei makomborero ake.
+Muzita raBaba neroMwanakomana neraMweya Mutsvene. Amen.

Novhena yaMai voRubatsiro-5

Posted by MC on January 9, 2016
Posted in: Manovhena, Uncategorized. Leave a comment

©Musakope novhena iyi nechinangwa chokutsvagisa mari musina mvumo

E. NOVENA YAMAI VORUBATSIRO RUSINGAGUMI KUNZE KWEMISA

Munamato kuna Amai voRubatsiro Rusingagumi
Mai voRubatsiro Rusingagumi zita renyu pacharo rinokurudzira. Tinouya pamberi pomufananidzo wenyu mukurumbidza nokutenda Mwari, tichitsvaga kurevererwa nemi kuna Jesu Mwanakomana wenyu, pazvipango zveupenyu hwedu nhasi. Tinopemberera umai hwenyu hutsvene patinopupura Jesu Kristu Tenzi neMununuri wedu.

Makapindura pamakadaidzwa kuva amai vaTenzi wedu. Tiwanireiwo nyasha dzokuva vapenyu mushevedzo yedu yekuombwekwa, zvikuru sei kumbundira Shoko roupenyu nokuremekedza upenyu hwose hwapasi.

Makashamiswa mwanakomana wenyu achikura muungwaru, ruzivo nemunyasha. Tireverereiwo kuti tigogamuchira Shoko raMwari muupenyu hwedu tigova vasvitsi veShoko Rakanaka kuvanhu vose.

Makafadzwa Mwanakomana wenyu zvaairapa varwere. Revereraiwo varwere vedu kuti vagamuchire utano hwakanaka, uye vagozovawo varapi kune vamwe.

Makanakidzwa norugave Mwanakomana wenyu Mwanakomana wenyu zvaainyaradza vane dam-budziko. Revererai vose vanotambura vagoziva kuti tinotakura mitoro yavo pamwe navo, uye nenzira iyi tinochengeta murau waKristu.

Makapembera Mwanakomana wenyu zvaairegerera matadzo. Tiwanireiwo kuregererwa kwamatadzo edu mugotitungamirira kutsudzunura vamwe nekuvasunungura.

Makatambudzika nokuda kwemaronda akatirirwa noMwanakomana wenyu kuti atiponese. Tibatsirei kusunga vane mwoyo yakavhunika nekupa chitarisiro kune vanotsikirirwa.

Makapembera mukumuka kwoMwanakomana wenyu. Tiwanireiwo nyasha dzekutsunga munzira yake mazuva ose eupenyu hwedu tigopiwa nzvimbo kudenga.

Ndimi wekutanga pavadzidzi navatsvene vose. Tinovimba norudo nehanya dzenyu saamai. Tiwanirei-wo nyasha dzose dzatinopanga kuti tizadzise urongwa hwaMwari muupenyu hwedu.

Rangariro
Rangarirai imi Mariya mhandara tsvene izere nyasha, kuti hazvina kumbozikanwa nakare kose kuti makarambira avo vakatizira kwamuri vachida kubatsirwa kana kurevererwa nemi. Muchokwadi ichi, ndinotizira kwamuri imi mhandara tsvene, yemhandara tsvene dzose, imi amai vangu. Ndinouya ndi-chimira pamberi penyu, ndichirwadziwa namatadzo angu. Amai vaMwari, Izwi akava munhu, inzwaiwo kudemba kwangu, mundiitirewo tsitsi, mundidavirewo. Amen.

Kwaziwai Mariya…

Minamato yaVatendi
Mutungamiri: Tenzi Jesu Kristu, nezwi rakabva kuna Mariya, amai venyu, makasandura mvura ikava waini paKana muGarireya. Inzwai minamato yedu mugoguurira minyengetero yatiri kuita tichiremekedza Amai vedu voRubatsiro Rusingagumi.
Mutungamiri: Ipai ungwaru neutsungarari kuvapikiri vose, vashandi vehurumende, Baba Vanoera (Pa-pa) N….., mabhishopu edu navamwe vose vanotitungamirira, tinonamata:
Vose: Tinzweiwo, Tenzi, nomuna Mariya Amai vedu
Mutungamiri: Ipai rugare, kubatana negoho rakanaka pasi pose, zvikuru munzvimbo dzine kupokana, hondo, gwandangwa neushayi, tinonamata:
Vose: Tinzweiwo, Tenzi, nomuna Mariya Amai vedu
Mutungamiri: Ipai vakawanana nyasha dzeSakarAmenide ravo, madzimai navarume rudo runovasun-ganidza, vabereki nyasha dzekugamuchira nekukoshesa vana vavo, dzimba dzinemubereki mum-wechete kubatana nesimba, uye rugare nemakomborero mudzimba dzedu dzose, tinonamata:
Vose: Tinzweiwo, Tenzi, nomuna Mariya Amai vedu
Mutungamiri: Ipai vechikuru vedu vasiri muwanano kugutsikana mushevedzo yavo, kune vechidiki bu-diriro muvavariro dzavo nechivindi chekuita vafakazi vechitendero chavo, kuva vakwegura vedu simba, kuchengetedzwa nekugutsikana mumazuva avo, uye kune vakapatsanurana kana kurambana nyasha dzaMweya wenyu, tinonamata:
Vose: Tinzweiwo, Tenzi, nomuna Mariya Amai vedu
Mutungamiri: Ipai vashandi chitendeseko mubasa ravo, chiremera muzvikwaniso zvavo, mufaro mune zvavanoita, muripo une ruenzaniso unoraramisa, uye vasina musevenzo vapei basa rinobhadhara, ti-nonamata:
Vose: Tinzweiwo, Tenzi, nomuna Mariya Amai vedu
Mutungamiri: Ipai Sangano renyu vashandi vaunza goho – vapriste, vapikiri-kadzi, vapikirirume na-vatendi vasina kupikira vakarurama – vanozozvipira upenyu hwavo kuvatendi venyu, tinonamata:
Vose: Tinzweiwo, Tenzi, nomuna Mariya Amai vedu
Mutungamiri: Ipai upenyu husingaperi vashakabvu vose nenzvimbo mukubatana kwavatsvene, uko kuchapukutwa misodzi yose tichizokuonai, imi Mwari wedu, uso neuso, tinonamata:
Vose: Tinzweiwo, Tenzi, nomuna Mariya Amai vedu
Mutungamiri: Ipai mumwe nemumwe wedu nyasha dzekuita ruenzaniso, rudo, tsitsi nekufamba nemi takazvirereka zuva roga roga roupenyu hwedu, nokuti chipi nechipi chatinoitira mumwe wehanzvadzi, mukoma kana munin’ina tinoitira imi, tinonamata: Vose: Tinzweiwo, Tenzi, nomuna Mariya Amai vedu
Mutungamiri: Ngatinamatei
Vose: Mai voRubatsiro Rusingagumi, isu vanodaidza zita renyu rine simba guru, tinokutendai nenyasha dzatakagamuchira kuburikidza nokurevererwa nemi uye nekunzwa kwamunoita minamato yedu nhasi: ‘nokuti Mwari samasimba akaita zvinhu zvikuru nemunemi, uye nyasha dzaMwari dzinogara nokus-ingaperi kune vanomutya.’ Amen.

Chokomborero chokupedzisira
Tenzi Jesu Kristu, Mwanakomana waMariya mai voRubatsiro Rusingagumi ngaave nemi kuti akudzi-virirei;
mamuri kuti akuraramisei;
mberi kwenyu kuti akutungamirirei;
shure kwenyu kuti akuchengetedzei;
napamusoro penyu kuti akukomborerei mazuva ose oupenyu hwenyu.
+Muzita raBaba neroMwanakomana neraMweya Mutsvene. Amen.

 

Novena yaMai voRubatsiro-4

Posted by MC on January 9, 2016
Posted in: Manovhena, Uncategorized. Leave a comment

©Musakope novhona iyi nechinangwa chokutsvagisa mari musina mvumo

D. NOVENAYAMAI VORUBATSIRO RUSINGAGUMI MUMISA

Rwiyo rwedairo
(Mushure mechiverengo chokutanga)

Mutungamiri: Ngatichirumbidzai nekutenda Mwari namazwi akaiswa pamuromo paMariya.

Ini ndinokurumbidzai Tenzi nomwoyo wangu wose, mweya wanguwo unopemberera Mwari muponesi wangu,
Nokuti akatarisa netsiye nyoro murandanhando wake,
Chionai, kubvira zvino marudzi ose achanditi munatswi,
Nokuti Samasimba akandiitira zvinhu zvikuru,
zita rake rinoera.
Anonzwira tsitsi avo vanomutya,
kubvira chizvarwa nechizvarwa,
Anoita zvina masimba noruoko rwake,
anoparadza vanozvikudza nendangariro dzemwoyo yavo.
Anobvisa vanyamasimba pazvigaro zvavo,
achisimudzira vanhunhando.
Vane nzara anovagutsa nezvinhu zvakanaka,
vapfumi anovaendesa vasina.
Akabatsira Isiraeri muranda wake,
sezvaakatsidzira madzibaba edu.
Akayeukawo tsitsi dzake kuna Abhurahamu nokuna vedzinza rake nemisi isingaperi.

 

Mikumbiro yakasiyana-siyana
Tinokumbira Mariya kuti abatane nesu, patinotendeukira kuna Mwari mumunamato, tichifunga nez-vezvido zvedu, zvido zveSangano nezvido zvevanhu vose vaMwari.
Dairo: Mariya Mhandara ngaatireverere
Mutungamiri: Tinozvinamatira kuti tive nechivindi mukushungurudzika kwedu. D.
Tinonamatira mhuri dzedu kuti dzimba dzedu dzive nzvimbo dzekugamuchirwa, kudiwa nekunzwisiswa. D.
Tinonamatira parishi yedu kuti tishandise zvipo zvedu kushandira Sangano. D.
Tinonamatira Sangano redu kuti riropafadzwe navapristi navapikiri vakanaka. D.
Tinonamatira pasirose kuti umambo hwaMwari hweruenzaniso, rugare nerufaro hupfakachire kwose kwose. D.
Tinonamatira zvinangwa zvedu pachedu (ngatinamatei muchinyararire kwekamukowoko (kwe-kanguva]). D.

Munamato weNovena
Mutungamiri: Pamwechete ngatiitei munamato weNovena.
Vose: Mai voRubatsiro Rusingagumi, noruvimbo rukurusa tinouya pamberi pomufananidzo wenyu mutsvene kuti tikurudzirwe nomuenzaniso weupenyu hwenyu. Tinokufungai panguva iya, zvamakanga muzere nechitendero noruvimbo (kunyinda), mukagamuchira daidzo yaMwari yokuva amai voMwanakomana wake. Tibatsirei isu, vana venyu, kugamuchira norufaro daidzo yedu muupenyu.

Pamakaziva kuti hama yenyu Erizabeti yaida rubatsiro, makaenda pakarepo kunomubatsira. Tibatsirei-wo, semi, kuitira vamwe hanya.

Tinofunga nezvenyu, Amai, muri munyasi moMuchinjikwa. Moyo wenyu unofanira kuva wakabuda ropa muchiona mwanakomana wenyu achigungudzika. Asi mufaro wenyu waiva mukuru zvaakamuka muvafi, akunda huipi.

Mai Vamarwadzo, tbatsirei mumiedzo nemukuodzwamoyo kwedu. Tibatsirei tisakondokwa. Ngatigoverane nemi noMWanakomana wenyu mufaro wokunge tatsungarara pakutarisana nembo-nano dzeupenyu. Amen.

Munamato Wokutenda
Munamato uyu unoitwa mushure meMisa, parutumba rweMbenembe Yedu.
Vose: Mwari, Musiki wedu, tinokutendai nechipo cheupenyu nezvipo zvose zvomuzvarirwo wedu: pfungwa dzedu, njere dzedu, matarenda edu nerukwaniso rwedu. Tinokutendai nekutisika nomuen-zaniso nemufananidzo wenyu uye nekutipa pasi rino kuti tipashandise nokupabudiririsa, ku-paremekedza nekupakoshesa.

Zvisinei nekukundikana kwedu, munoramba muchitiratidza rudo rwenyu nhasi nekuwedzera upenyu waMweya matiri patafura yeYukaristiya.

Chekupedzisira, Baba, tinokutendai nokutipa Mariya amai voMwanakomana wenyu kuti vave Amai vedu voRubatsiro Rusingagumi, uye nokuda kwezvinhu zvose zvinofadza zvamakatiitira, zvikuru kutipa Mwanakomana wenyu Jesu kuti ave mununuri (mudzikinuri) wedu.

Tinovonga nemutsa wose watakagamuchira nokuda kwekutireverera kwavo. Tinonamata kuti ngoni dzose dzatakaratidzwa dzitikurudzire kuva noruvimbo rukuru rwenyasha dzerudo rwenyu nekutsvaga rutsigiro rwaAmai voRubatsiro Rusingagumi. Amen.

Novhena yaMai voRubatsiro-3

Posted by MC on January 9, 2016
Posted in: Manovhena, Uncategorized. Leave a comment

©Musakope novhena iyi nechinangwa chokutsvagisa mari musina mvumo

C. NOVENA MUSHURE MEMISA

(Vose vanopfugama )

Mutungamiri: Ngatibatanei naVakristu venguva dzose mukurumbidza Mariya nokuzvipira kurudziviriro rwake.
Vose: Tinobhururukira kurubatsiro rwenyu, Amai Vatsvene vaMwari, susaramba zvichemo zvedu mu-binduko redu, asi tisunungurei kunjodzi dzose, imi mhandara ine mukurumbira yakakomborerwa.
Mutungamiri: Tinamatirei, amai vatsvene vaMwari.
Vose: kuti tikodzere kuwana zvatakatsidzirwa naKristu.
Mutungamiri: Ngatinamatei
Vose: Tenzi Jesu Kristu, makatipa amai venyu, Mariya, kuti vave amai vedu, vakagadzirira kutibatsira nguva dzose: Itai kuti patinonamata pamberi pomufananidzo wavo, titendeke nguva dzose kunyasha dzatakawaniswa norufu nokumuka kwenyu. Upenyu hwazvinotiunzira ngaupe mbiri kwamuri pasi pano nekutipa isu rufaro rusingaperi kudenga! Amen.

Chiverengo

Rwiyo rwaMariya
Mutungamiri: Ngatichirumbidzai nokutenda Mwari namazwi akaiswa pamuromo paMariya.
Ini ndinokurumbidzai Tenzi nomwoyo wangu wose, mweya wanguwo unopemberera Mwari muponesi wangu,
Nokuti akatarisa netsiye nyoro murandanhando wake,
Chionai, kubvira zvino marudzi ose achanditi munatswi,
Nokuti Samasimba akandiitira zvinhu zvikuru,
zita rake rinoera.
Anonzwira tsitsi avo vanomutya,
kubvira chizvarwa nechizvarwa,
Anoita zvina masimba noruoko rwake,
anoparadza vanozvikudza nendangariro dzemwoyo yavo.
Anobvisa vanyamasimba pazvigaro zvavo,
achisimudzira vanhunhando.
Vane nzara anovagutsa nezvinhu zvakanaka,
vapfumi anovaendesa vasina.
Akabatsira Isiraeri muranda wake,
sezvaakatsidzira madzibaba edu.
Akayeukawo tsitsi dzake kuna Abhurahamu nokuna vedzinza rake nemisi isingaperi.

Mutungamiri: Ngatinamateri
Vose: Amai Vatsene vaMwari, Mhandara inogara yakaropafadzwa, Mariya musina rutadzo, tinamat-ireiwo, musaramba kutibatsira.tine ruvimbo, uye tinoziva pachokwadi, kuti munowana zvose zvamu-noda kubva kuMwanakomana wenyu, Tenzi wedu Jesu Kristu, mambo wenguva dzose, anogara naba-ba naMweya Mutsvene, nokusingaperi. Amen.

Mharidzo

Minamato yeNovena nguva ino
Tenzi Jesu Kristu, nezwi rakabva kuna Mariya, amai venyu, makasandura mvura ikava waini paKana muGarireya. Teererai vanhu venyu vaunganira kuzoremekedza amai vedu voRubatsiro Rusingagumi. Gamuchirai matendo edu orupfave. Mai vorubatsiro Rusingagumi, tinodana zita renyu rine simba zvakanyanya. Muri muchengeti (murindi) wavapenyu noruponeso rwavachakarofa. Zita renyu rinogara pamiromo yedu, zvikuru panguva yemiedzo napanguva yokufa kwedu. Zita renyu chitendeseko nesimba. Ngosigadzi yakakomborerwa, tibatsirei pose patinokudaidzai. Hatimbogutsikana nokungodenengudza zita renyu. Mararamiro edu mazuva ose achaparidza kuti muri Amai vedu voRu-batsiro Rusingagumi zvechokwadi.

Rangariro
Rangarirai imi Mariya mhandara tsvene izere nyasha, kuti hazvina kumbozikanwa nakare kose kuti makarambira avo vakatizira kwamuri vachida kubatsirwa kana kurevererwa nemi. Muchokwadi ichi, ndinotizira kwamuri imi mhandara tsvene, yemhandara tsvene dzose, imi amai vangu. Ndinouya ndi-chimira pamberi penyu, ndichirwadziwa namatadzo angu. Amai vaMwari, Izwi akava munhu, inzwaiwo kudemba kwangu, mundiitirewo tsitsi, mundidavirewo. Amen.

Mutungamiri: Makaitirwesu, ngosikadzi, diziro
Vose: mubatsiri muzvido zvedu nemumatambudziko edu.
Mutungamiri: Ngatinamatei
Vose: Tenzi vamasimba netsitsi, makatipa kuti tiremekedze mucherechedzo waamai venyu vakakomborerwa zvikuru une zita rakakosha rokuti “Rubatsiro Rusingagumi,” tipeiwo nenyasha dzenyu kuti pakati peshanduko dzose dzerwendo rweupenyu hwedu tidzivirirwe nerubatsiro nechengetedzo inogara iripo yaMariya Mhandara isina Mhaka, kuti tikodzere kuwana mibayiro yoruponeso rusingagumi, imi munogara nokutonga naMwari Baba makabatana naMweya Mutsvene/ nokusingaperi. Amen.

Zvinangwa zvapapa
Baba vedu … Kwaziwai Mariya … Vakudziwe baba …

Chikomborero nemunamato wavarwere
Mutungamiri: Ngatinamatei
Vose: Tenzi, tarirai varanda venyu vanodzvenda nokuda kweutera hwomuviri. Koshesai nokudzidzi-mura mweya yamakasika kuti, tacheneswa namatambudziko edu, tigochimbidzorapwa netsitsi dzenyu nomunaKristo Tenzi wedu. Amen.

Mupriste anotambanudza ruoko rwake rworudyi akananga varwere Mupriste:

Tenzi Jesu Kristu ngaave nemi kuti akudzivirirei; ave mamuri kuti akuraramisei;
pamberi penyu kuti akutungamirirei;
pashure penyu kuti akuchengetedzei;
pamusoro penyu kuti akukomborerei
+Muzita rababa neroMwanakomana neraMweya Mutsvene. Amen.

Chikomborero neyukaristiya

Rwiyo rweyukaristiya

Novhena yaMai voRubatsiro-2

Posted by MC on January 9, 2016
Posted in: Manovhena, Uncategorized. Leave a comment

©Musakope novhena iyi nechinangwa chokutsvagisa mari musina mvumo

B. NOVENA YAMARI VORUBATSIRO RUSINGAGUMI NEMUNAMATO WAMANHERU

Rwiyo
(Mucherechedzo unopindwa nawo uchinoturikwa nokupfungaidzirwa nechipfungautsi (incense) pa-chiimbwa.)

Mutungamiri: Mwari, uyai kuzotibatsira.
Vose: Tenzi, chimbidzai kuzotibatsira
Mutungamiri: Vakudziwe Baba noMwanakomana naMweya Mutsvene
Vose: sezvakanga zviri pakutanga, zvino nakare kwose nokusingaperi. Amen.

Nziyo

Daviro 1: Makakomborerwa imi Mariya, ruponeso rwapasi rwakabva nekwamuri; zvino mavakupe-mebera mumbiri muri pana Tenzi, tireverereiwo kumwanakomana wenyu (Areruya.)

Nziyo 113 (112)

Imi veranda vaTenzi rumbidzai,
rumbidzai zita raTenzi!
Zita raTenzi ngarirumbidzwe
Kubvira zvino kusvikira nokusingaperi!
Kubvira kubuda kwezuva kusvika pakudoka kwaro,
Zita raTenzi ngarirumbidzwe!
Tenzi ari pamusoro pamarudzi ose,
Mbiri yake inorumbidzwa kumosoro kwamatenga. Ndiani akaita saTenzi Mwari wedu Kumusoro ndokwaagere?
Anoita zvokukotamira pasi Kuti aone matenga napasi.
Anobvisa varombo muhuruva
Achisimudza vasina chavanacho kubva mudota
Achivagarisa namachinda,
Namachinda avanhu vake
Anopa mudzimai asina mbereko musha Achimuita amai vavana vanofara.
Vakudziwe Baba noMwanakomana naMweya Mutsvene
Sezvakanga zviri pakutanga,
zvino nakare kwose nemisi isingaperi. Amen.
Daviro 1: Makakomborerwa imi Mariya, ruponeso rwapasi rwakabva nekwamuri; zvino mavakupe-mebera mumbiri muri pana Tenzi, tireverereiwo kumwanakomana wenyu (Areruya.)

Daviro 2: Ndimi mbiri yeJerusaremu! Ndimi rufaro rweIziraeri! Ndimi ruremekedzo rwapamusoro-soro rwerudzi rwedu! (areruya).

Nziyo 147

Rumbidza Tenzi Jerusaremu; Rumbidza Mwari wako iwe Zioni.
Nokuti anosimbisa zvihuri zvemisuwo yako makuru Anokomborera vana vari mauri.
Anopa nyika yako rugare,
Anokugutsa nembeswa dzakanakisisa.
Anotuma chirevo kunyika,
Shoko rake rinobva ramhanya nokukasika.
Anounza mazaya echado sewuru;
Anoparadzira mazaya echando chamangwanani sedota. Anokanda chimvura mahwe samavhinga; Ndi-ani angatirire chando chake.
Anongotaura izwi chete zvichibva zvanyungudika Anovhuvhutisa mhepo yake mvura ichibva yaerera. Akataura mazwi ake kune vekwaJakobho Nemirao nezvirevo zvake kuvaIziraeri. Haana kumboita zvakadai Norumwe rudzi.
Hazivi zvirevo zvake.
Vakudziwe Baba noMwanakomana naMweya Mutsvene
Sezvakanga zviri pakutanga,
zvino nakare kwose nemisi isingaperi. Amen.
Daviro 2: Ndimi mbiri yeJerusaremu! Ndimi rufaro rweIziraeri! Ndimi rure-mekedzo rwapamusoro-soro rwerudzi rwedu! (Areruya).

Daviro 3: Makakomborerwa imi, Mwanasikana naTenzi Mwari wenyu; nemamuri tinogoverana hu-penyu huzere (areruya).

Vakorose 1: 12-20

Nomufaro, tendai Baba, vakatikodzeresa kuva nomugove wavarurami, muchiedza.
Vakatinunura kuumambo hwerima vakatiendesa muumambo hwomwanakomana wavo wapam-woyo.
maari ndimo matakawana ruponeso rwokuregererwa zvitadzo.
Ndiye mufananidzo waMwari asingaonekwi. Dangwe-rume rechisikwa chiri chose,
zviri pasi nezviri kudenga, zvinoonekwa nezvisingaonekwi, kunyange vezvigaro zvokutanga kana voumambo kana kuti vane ukuru-ukuru kana madzishe. Zvinhu zvose zvakasikwa nemaari Uye ndiye wazvakasikirwa. Nziye nyakutungamira zvinhu zvinobatanidzwa zviri mumaoko ake. Ndiye musoro womuviri, musoro wesangano.
Ndiye wokutanga dangwe-rume rakabva kuvafi, kuti muna zvose ave ndiye wokutanga-tanga Nokuti maari umwari huzere hwakafadzwa kuita musha wahwo. Uye nemaari, ayananise zvinhu zvose naye. achizviwadzanisa nemuchinjikwa wake, zvingae zviri pasi pano kana zviri kudenga.
Vakudziwe Baba noMwanakomana naMweya Mutsvene
Sezvakanga zviri pakutanga, zvino nakare kwose nokusingaperi. Amen.
Daviro 3: Makakomborerwa imi, Mwanasikana naTenzi Mwari wenyu; nemamuri tinogoverana hu-penyu huzere (areruya).

Chiverengo

Mharidzo kana kugoverana shoko

Rwiyo rwaMaria
(Panenge pachiimbwa rwiyo rwaMariya mucherechedzo wake ungaremekedzwa)

Daviro. Makakomborerwa imi Mariya nokuti makatendera kuti zvinhu zvose zvakataurwa kwamuri naTenzi zvichazadziswa (areruya).

Ini ndinokurumbidzai Tenzi nomwoyo wangu wose, mweya wanguwo unopemberera Mwari muponesi wangu, Nokuti wakatarisa netsiye nyoro murandanhando wake,
Chionai, kubvira zvino marudzi ose achanditi munatswi, Nokuti Samasimba akandiitira zvinhu zvikuru, zita rake rinoera.
Anonzwira tsitsi avo vanomutya, kubvira chizvarwa nechizvarwa, Anoita zvina masimba noruoko rwake, anoparadza vanozvikudza nendangariro dzemwoyo yavo. Anobvisa vanyamasimba pazvigaro zvavo, achisimudzira vanhunhando.
Vane nzara anovagutsa nezvinhu zvakanaka, vapfumi anovaendesa vasina.
Wakabatsira Isiraeri muranda wake, sezvaakatsidzira vadzibaba vedu.
Akayeukawo tsitsi dzake kuna Abhurahamu nokuna vedzinza rake nemisi isingaperi.

Vakudziwe Baba noMwanakomana naMweya Mutsvene
Sezvakanga zviri pakutanga, zvino nakare kwose nokusingaperi. Amen.
Daviro. Makakomborerwa imi, Mwanasikana naTenzi Mwari wenyu; nomunemi tinogoverana hupenyu huzere (areruya).

(Mutungamiriri anozivisa vanhu chinangwa cheparishi)

Mutungamiri: Ngatirumbidzei Mwari Baba vakasarudza Maria saamai veMwanakomana wavo vaidawo kuti zvizvarwa zvose zvimuti nyakukomborerwa. Nechivimbo ngatinamatei:
Vose: Mhandara Mariya ngaatireverere.
Mutungamiri: Baba, makatarisa Mhandara Mariya mukamuita amai vetsitsi. Vose: Vose vari munjodzi ngavazive udzamu hwerudo rwake.
Mutungamiri: Makadaidza Mariya kuti ave amai vemumba maJosefa naJesu.
Vose: Kuburikidza neminamato yavo batsirai vabereki vose kuti vaite dzimba dzavo nzvimbo dzerudo neutsvene.
Mutungamiri: Makapa Mariya simba rekumira munyasi memuchinjikwa mukamupenyesa nemufaro wekumuka muvafi.
Vose: Mutsai vanosuruvara mushandure upenyu hwavo nechitarisiro.
Mutungamiri: Mariya akanga ari murandasikana akatendeka akapfumbira mashoko enyu mumwoyo make.
Vose: Noruenzaniso rwake nokutireverera kwake itai kuti tive vadzidzi vechokwadi veMwanakomana wenyu, vakazvipira kumushandira.
Mutungamiri: Baba, makasimudzira Mhandara Mariya mukamugadza huhosi hwedenga Vose: Itai kuti vafi vapinde muhumambo hwenyu vagofara navatsvene venyu nokusingaperi.

Munamato weNovena
(Unoitwa navanhu vose)
Mai voRubatsiro Rusingagumi makanyaradza Mwanakomana wenyu Jesu paaive atarisana namarwad-zo ake. Tava vana venyu vanodanwa kuti vatevere Jesu mudambudziko rake, rufu nekumuka kuupenyu utsva. Tinyaradzeiwo mutibatsire kuwana simba roMweya wake kuti tivake humambo hwake pakati pedu. Paanodzokazve mumbiri ngatipembererei nomufaro upenyu huzere pamwe nemhuri yaMwari nokusingaperi. Amen.

Kukomborera Vanorwara
Mutungamiri: Baba tinounza vose vari kurwara, mupfungwa kana mumuviri, zvikuru ava vatava kunamatira (…domai mazita avo…) komborerai vose nave mitoro inorema kuti mukucheneswa namarwadzo avo vawane kurapwa netsitsi dzenyu, nomunaKristu Tenzi wedu.
Vose: Amen
Mutungamiri: Tinokutendai nebasa raJesu rokurapa richirimo muSangano. Tinonamatira vose vari pano vanoda kurapwa mupfungwa kana mumuviri.
Vose: Ngavazive simba rokubata kwake kunorapa.
Mutungamiri: Tinounza kwamuri vose vari kurwara vakakumbira minamato yedu, navose vanotambu-ra vane mitoro inorema.
Vose: Ngavawane zororo muna Jesu Mwanakomana wenyu.
Mutungamiri: Tinonamatira zvikuru vane urwere huchavasvitsa muchishamiso cherufu. Vose: Nga-vawane rugare muna iye anogara nemi nokusingaperi makabatana naMweya Mutsvene, Mwari, narini narini. Amen.

Mupriste/mudhikoni
(Achitambanudza ruoko rwake pamusoro pegungano)
Tenzi Jesu Kristu ngaave nemi kuti akudzivirirei; ave mamuri kuti akuraramisei;
pamberi penyu kuti akutungamirirei;
pashure penyu kuti akuchengetedzei;
pamusoro penyu kuti akukomborerei
+Muzita rababa neroMwanakomana neraMweya Mutsvene.
Vose: Amen.

Munamato waTenzi
Baba vedu muri kudenga
zita renyu ngarinamatwe,
umambo hwenyu ngausvike,
kuda kwenyu ngakuitwe
pasi sokudenga.
Tipeiwo nhasi kudya kwedu kwezuva.
Mutiregererewo zvatakakutadzirai,
sokuregerera kwatinoita vakatitadzira.
Musatirege tichiwira mune zvinotiedza,
asi mutinunure kune zvakaipa. Amen.

Munamato weNovena
Vose: Tenzi Jesu verudo, makatipa kuti tiremekedze mucherechedzo waamai venyu vakakombo-rerwa zvikuru une zita rakakosha rokuti ‘Rubatsiro Rusingagumi,’ tipeiwo nenyasha dzenyu kuti pakati peshanduko dzose dzerwendo rweupenyu hwedu tidzivirirwe nerubatsiro nechengetedzo inogara iripo yaMariya Mhandara isina Mhaka, kuti tikodzere kuwana mibayiro/ yoruponeso rusingagumi, imi munogara nokutonga naMwari Baba makabatana naMweya Mutsvene nokusingaperi. Amen.

Munamato wokukomborerwa
(Pamunamato wekukomborerwa SakarAmenide Dzvene ringa ringaburitswe nokupfugamirwa vanhu vozokomborerwa naro. Kana pasina pfugamiro munamato unotevera wekukomborerwa ungaitwe.)

(Vose vanopfugama)

+ Mwanakomana waMwari akazvarwa naMariya Mhandara yakakomborerwa kuti anunure marudzi avanhu. Zadzwai neupfumi hwemakomborero ake. Amen.
+ Nomuna Mariya mavambo ohupenyu hwose akakauya kwamuri. Rudo rwemwoyochena wake ngarwukumbundikirei nguva dzose. Amen.
+ Mauya semhuri kuzoremekedza Mariya pasi pano. Mweya womufaro ngauvenemi munzira yokuen-da kumusha usina muguma. Amen.
+ Mwari vanamasimba ose ngavakukomborerei, Baba neMwanakomana naMweya Mutsene. Amen.

Maitiro epfugamiro

Rwiyo rwekupedzisira

Novhena yaMai voRubatsiro-1

Posted by MC on January 9, 2016
Posted in: Manovhena, Uncategorized. Leave a comment

©Musako novhena iyi nechinangwa chokutsvagisa mari musina mvumo

A. Novena yaMai voRubatsiro Rusingagumi pasina Misa
Mucherechedzo unopindwa nawo uchinoturikwa nokupfungaidzirwa nechipfungautsi (incense) pachi-imbwa.

Kwaziso
Mutungamiri: Nyasha dzaTenzi wedu Jesu Kristu norudo rwaMwari Baba noruwadzano rwaMweya Mutsvene ngazvive nemi mose.
Vose: Ngazvive nomweya wenyu.

Mhinzo
Mutungamiri: Hama taungana semhuri yaVakristu Kukudza
Mwari Baba vakatikomborera nemakomborero ose emweya nomuna Kristu. Tinoshuvirawo kuremekedza Mariya amai vaKristu naamai veduwo voRubatsiro Rusingagumi.
Vose: Tinotizira kurubatsiro rwenyu Amai Vatsvene vaMwari, musafuratire mikumbiro yedu pane zvatinoshaya asi tidzikinurei munjodzi dzose imi mhandara yakakomborerwa ine mbiri.
Mutungamiri: Ngatinamatei
Vose: Baba verudo, tinokutendai nomuenzaniso wechitendero noururami wamunotipa nguva dzose kuburikidza nevatsvene venyu. Tinokutendai naMariya anogara akagadzirira kutibatsira. Isu, saiye, ngatigarovavarira kuita kuda kwenyu kuti pamwe naye tizopinda mumbiri youmambo hwenyu; nomune Mwanakomana wenyu Jesu Kristu anogara nemi makabatana naMweya Mutsvene nokus-ingaperi. Amen.

Chiverengo
(Chiverengo chinoteverwa nenguva yorunyararo)

Mharidzo kana kugoverana shoko

Kusuma mikumbiro
(Vose vanopfugama)
Mikumbiro inogona kuverengwa kubva mune yaiswa parukuva.

Munamato weNovhena

(Unoitwa navanhu vose)
Mai voRubatsiro Rusingagumi makanyaradza Mwanakomana wenyu Jesu paaive atarisana namarwad-zo ake. Tava vana venyu vanodanwa kuti vatevere Jesu mudambudziko rake, rufu nekumuka kuupenyu utsva. Tinyaradzeiwo mutibatsire kuwana simba roMweya wake/ kuti tivake humambo hwake pakati pedu. Paanodzokazve mumbiri ngatipembererei nomufaro upenyu huzere pamwe nemhuri yaMwari nokusingaperi. Amen.

Detembo kuna Amai Mariya
Tenzi tinzwireiwo Tsitsi … Tenzi tinzwireiwo tsitsi
Kristu tinzwireiwo tsitsi … Kristu tinzwireiwo tsitsi
Tenzi tinzwireiwo Tsitsi … Tenzi tinzwireiwo tsitsi
Kristu tinzweiwo … Kristu tidavireiwo norupfave
Mwari Baba muri kudenga … Tinzwireiwo tsitsi
Mwari Mwanakomana Mununuri wapasi … Tinzwireiwo tsitsi
Mwari Mweya Mutsvene … Tinzwireiwo tsitsi
Utatu Hutsvene, Mwari Mumwechete … Tinzwireiwo Tsitsi
Mariya Mutsvene … Tirevereiwo
Mariya chiringiro chechitendero …
Mariya muyenzaniso wechitarisiro …
Mariya muyenzaniso worudo …
Chitarisiro chavarombo …
Simba ravakapfava …
Nyaradzo yavanochema …
Mubairo wavane tsitsi …
Kupenya kwavakachena pamwoyo …
Hurudziro yevasakisi vorugare …
Tsigiro yavanoshungurudzwa …
Amai veSangano …
Amai veparishi yedu …
Amai vemhuri yedu …
Amai vevana vedu …
Amai vevabereki …
Amai vanababa vezvomweya nemadhikoni …
Amai vevanhu-kadzi nevanhu-rume vakapikira …
Amai vorubatsiro rusingagumi …
Hwayana yaMwari munobvisa matadzo apasi … tiregereiwo Tenzi
Hwayana yaMwari munobvisa matadzo apasi … tidavireiwo norupfave Tenzi
Hwayana yaMwari munobvisa matadzo apasi … tinzwireiwo tsitsi Tenzi

Mutungamiri: Ngatinamatei
Vose: Tenzi Jesu verudo, makatipa kuti tiremekedze mucherechedzo waamai venyu vakakombo-rerwa zvikuru une zita rakakosha rokuti ‘Rubatsiro Rusingagumi,’ tipeiwo nenyasha dzenyu kuti pakati peshanduko dzose dzerwendo rweupenyu hwedu tidzivirirwe nerubatsiro nechengetedzo inogara iripo yaMariya Mhandara isina Mhaka, kuti tikodzere kuwana mibayiro yoruponeso rusingagumi, imi munogara nokutonga naMwari Baba makabatana naMweya Mutsvene nokusingaperi. Amen.

Kukomborera vanorwara

Mutungamiri: Baba tinounza vose vari kurwara, mupfungwa kana mumuviri, zvikuru ava vatava kunamatira (…domai mazita avo…) komborerai vose nave mitoro inorema kuti mukucheneswa namarwadzo avo vawane kurapwa netsitsi dzenyu, nomunaKristu Tenzi wedu.
Vose: Amen.

Mutungamiri: Tinokutendai nebasa raJesu rekurapa richirimo muSangano. Tinonamatira vose vari pano vanoda kurapwa mupfungwa kana mumuviri.
Vose: Ngavazive simba rokubata kwake kunorapa.
Mutungamiri: Tinounza kwamuri vose vari kurwara vakakumbira minamato yedu, navose vanotambura vane mitoro inorema.
Vose: Ngavawane zororo muna Jesu Mwanakomana wenyu.
Mutungamiri: Tinonamatira zvikuru vane hurwere huchavasvitsa muchishamiso cherufu. Vose: Nga-vawane rugare muna iye anogara nemi nokusingaperi makabatana naMweya Mutsvene, Mwari, narini narini. Amen.

Mupriste/mudhikoni
(Achitambanudza maoko ake akananga gungano)
Tenzi Jesu Kristu ngaave nemi kuti akudzivirirei; ave mamuri kuti akuraramisei;
pamberi penyu kuti akutungamirirei;
pashure penyu kuti akuchengetedzei;
pamusoro penyu kuti akukomborerei;
+Muzita rababa neroMwanakomana neraMweya Mutsvene.
Vose: Amen.

Kuremekedza mucherechedzo
(Rwiyo rwaMariya (papeji —) rungaimbwe mucherechedzo uchipfungaidzirwa)

Munamato wokukomborera
(Pamunamato wekukomborerwa Sakaramende Dzvene ringa ringaburitswe nokupfugamirwa vanhu vozokomborerwa naro. Kana pasina pfugamiro munamato unotevera wekukomborerwa ungaitwe.)

(Vose vanopfugama.)

+ Mwanakomana waMwari akazvarwa naMariya Mhandara yakakomborerwa kuti anunure marudzi avanhu. Zadzwai neupfumi hwemakomborero ake. Amen.
+ Nomuna Mariya mavambo ohupenyu hwose akakauya kwamuri. Rudo rwemwoyochena wake ngarwukumbundikirei nguva dzose. Amen.
+ Mauya semhuri kuzoremekedza Mariya pasi pano. Mweya womufaro ngauvenemi munzira yokuen-da kumusha usina muguma. Amen.
+ Mwari vanamasimba ose ngavakukomborerei, Baba neMwanakomana naMweya Mutsene. Amen.