Ndinamatireiwo ndapota, mangwana ndiri kuenda kuchipatara kunoitwa oparesheni yemaziso. Zvakatanga nezuro masikati. Ndirikuti ndikatarisa muchikwama changu hapana chandiri kuona.
Archives
All posts for the month December, 2017
Amai: Hevo, Anesu makadii nemhuri?
Anesu: Tinofara muchembere makadiiwo?
Amai: Tiripo, ndatika mvura yanaya iyi ko mukadzi wako haasi kuuya here kuzorima?
Anesu: Aizve muchembere ndakaroora gejo here nhai?
Rendi: Wamboona kufarisa kwaita vanhu nhasi here shamwari?
Mari yechikoro: Ndazviona, haa vanhu vane dzungu nemari wena.
Rendi: Rega zvakadaro apa manje manje vanofanira kutiendesa kuvaridzi. Ini handiende ndega ndinotoperekedzwa nemari yemvura nemagetsi.
Mari yechikoro: Kana ini panoda mabhuku, mapenzura nemayuniformu. Apa munhu ndopanodya mari kunge zuva rekupedzisira panyika.
Rendi: Iko kufara kudai ukazomuona mnaNdira unonzwa tsitsi. Kana mari yebhazi anenge asisina.
Mari yechikoro: Ko chikafu chinenge chava kudyiwa? Tichaonerera makabhiji nematemba zvisina kana mafuta. Kkkk. Kushaya uchenjeri kwakadi kwakangofanana nekufa?
Rendi: Taura hako zvimwe zvacho ndezvekungotarisa. Ndosaka nhamo nevakapusa zvisingasiyane.
Nhanganyaya
Nguva yakakodzera yewanano inosiyana kumunhu wese ineenderana nemamiriro ezvinhu. Zvinoenderana kuyaruka kwemunhu zvakasanganikwa nemunhu pakukura kwake. Vamwe vanhu vanenge vakagadzirira kuroorana pa18, uye vamwe vanenge vasina kumbogadzirira.
zivanai
Vanotarisira kuroorana vanofanira kuve nechokwadi kuti vanozivana zvakanaka. Vanofanira kuzivana maonero avo pamusoro pe:
- kuroorana,
- mari,
- hama,
- kurera vana,
- unhu,
- mabasa anoitwa nomurume kana nomudzimai pamusha
- mumwe chete wavo here kana vose vari vaviri vachange vachishanda kunze kwemusha,
- kukura kwemumwe pamweya.
Vazhinji vachitora shoko remumwe wavo sezvariri paanoti ndiri muKristu kana kuti izvi ndozvandiri vozotoziva pava paya kuti vainyeperwa.
Kuroonarana chibvumirano naMwari
Kuroorana hakusi kungozvipira chete asi isungano naMwari. Chivimbiso chekugara nemumwe munhu kwehupenyu hwako hwose zvisinei kuti akapfuma, murombo, ane hutano, anorwara, vanodarikaakafutisa, akawondoroka kana kuti anobhowa here. Imba yechiKristu inofanira kutsungirira munazvose kusanganisira kurwisana, kutsamwa, kuparadzwa, njodzi, kuora mwoyo, kusuruvara uye kusurukirwa. Muchato haufaniri kupindwa nepfungwa yokuti tinogona kurambana nyange zvakaoma.
Wagadzirira kuroorana kana:
- usisatsvage mudiwa akarurama – Hakuna munhu akarurama. Munhu wose ane zvikanganiso. Hapana munhu mumwechete anopfuura muupenyu asingasangani namatambudziko. Kusatoti waziva chokwadi ichi ucharamba usina kuroorwa kana kuroora (kana kana kuti uchapinda mumuchato usina mufaro).
Handisi kuti unofanira kusiya tsika dzako uye zvaunokoshesa. Hapana chakaipa kutsvaka mudzimai akanaka uye ane rudo neutano. Asi tarisira zvinoitika, usazvinyepere.
Muchato hakusi kuzvisungirira paururami (perfection). Muchato kupira upenyu hwako pamunhu asina kururama – munhu waunoda makatarisana nehondo, maronda, zvikanganiso nokusarurama.
- usisatarisire kuti mumwe wako agutse zvido zvako zvose – Kunyange zvazvo Mwari akatisika kuti tive noukama (Genesi 2:18), haana kutisika kuti tiwane kuzadzika kwose mune mumwe munhu. Pane zvakawanda zvatinofanira kuita isu pachedu kuti tiwane rugare uye kugutsikana. Uye pane zvimwe zvinogona kukutswa naMwari chete.
- wakagamuchira dzokororo yehupenyu mazuva ose – Upenyu haisi pati nguva dzose. Pane zvikwereti zvinoda kubhadharwa, ndiro dzinoda kusukwa, pasi panoda kutsvairwa, mari inoda kushandirwa, uye vana vanoda kuyarutswa. Anoda kumukirwa, urwere hunouya usina kugadzirira, uye pane nhengo dzemhuri dzinoshungurudza. Chokwadi ndechokuti nguva zhinji hapana chitsva mupenyu zvizhinji kudzokorora chete. Chokwadi ichi hachizochinja nokuti watora mhiko dzomuchato.
- wakagadzirira kuda – Nguva zhinji tinogamuchira rudo. Vabereki vanotiitira zvizhinji. Shamwari dzinotigamuchira, dzinoita kuti tinzwe kudiwa uye kukosha. Vamwe vanokosha vanotisimbisa vachitizadza nomufaro. Kunyange zvazvo pasina chakaipa neizvi, hazvisi mufananidzo zakazara worudo. Rudo rusingaperi haruna divi rimwe. Kune mativi maviri. Muwanano – kana hukama hupi zvahwo- vanhu vaviri vanofanira kugamuchira nokupa rudo. Muuchato hamufanire kuva nemutauro wokungodiwa chete.
- wayaruka – Kukura kwako pachako, uye kwomumwe wako, kucharatidza kuti munogona sei kushanda pamwe chete muwanano uye kuti uchatsungirira here kana kuti uchakundikana. Saka mumwe nomumwe wenyu anofanira kuongorora upenyu hwake parizvino:
- hwekunamata,
- manzwiro,
- mararamiro,
- zvemari,
- nyaya yekuzidzora,
- ruremekedzo kuvanyamasimba,
- zvikwereti zvine mumwe,
- ukama hwemumwe wako navamwe vanhu.
- muine chitendero chimwe – Zvinonetsa kupinda muwanano nemunhu asiri muKristu iwe uri muKristu nokuti anopedzisira ave kudhonzera divi rausingadi. Usazvinyengedza kufunga kuti unokwanisa kukwevera munhu asingatendi pedyo naJesu; kazhinji iye ndiye angatokukwevera kure naJesu. Rangarir kuti unogona kuwira murudo nemunhu upi zvake waunofarira, asi hazvirevi kuti unofanira kuroorwa naye.
- mataura nezvemari – Puda pachena kune waunoda kuroorana naye maererano nemari yako uye iye anofanira kukubudirawo pachena maererano nemari yake uye kuti anoiwana sei. Tauriranai kuti mumwe nomumwe wenyu anoronga kuwana mari sei, kuishandisa sei, kuichengetedza sei uye kuigovera sei kana maroorana. Kana ukaona kuti mumwe wako haana hurongwa hwakajeka maererano nemari ngwarira kuzvisorera matambudziko mava muwanano.
- wazvipira – Kuroorana paChiKristu kunoda kuzvipira kwoupenyu. Saka iwe nemunhu waunenge uchifunga nezvekuroorana naye munofanira kutaurirana nyaya dzinotyisa dzakaita sokuti munezenge muchigadzirisana sei uye muchange muchipedza matambudziko amunozosangana nawo sei akaita seurwere nekushaya mabasa. Ona kuti muri vaviri makagadzirira here kuvamba upenyu hutsva, kusarambana zvachose, uye kutendeukira kuna Mwari.
- muchipindirana – Rangarira kuti nekuda kwekuti iwe unoda munhu hazvirevi kuti munhu iyeye anopindirana newe. Nyatsoongorora unhu namaitiro emunhu iyeye uone kuti munhu waungagarisane naye here kwamakore akawanda. Nyange hazvo usiri kutsvaga munhu akarurama siyana nemunhu asingapindirane newe nekuti anozokutemesa musoro.
Kana kuti Matanho 13 kune vanoda upenyu hwenhamo
Nhanganyaya
Pane vamwe vanhu vasingadi kurega hasha. Vamwe vanotonakidzwa nokushatirwa. Vanhu ava vanoziva kuti kushatirwa kunovagonesa kutyisidzira vamwe, kuzvitsaura, uye kushandisa vamwe. Kunyange zvazvo vanhu vakawandisa vasingaone hasha sechinhu chinokomborera pane vamwe vanoona sevanobatsirika nehasha dzavo.
Hasha unogona kuva muraramiro okusarudza. Mwari akasika munhu mumwe nomumwe nerusununguko rwokusarudza. Izvi zvinoreva kuti vanhu vanogona kusarudza nzira yavanoda kutevera muupenyu hwavo. Munhu wose anorarama upenyu hwehasha anenge asarudza kuita saizvozvo. Hapana munhu anobatirwa pfuti kuti ashatirwe. Vamwe vangati kutsamwa kwavo kune chekuita mashandiro asina kugadzikana emupfungwa. Vamwe vachataurawo kuti hasha dzavo dzinobva munhoroondo yemhirizhonga yemumhuri. Hongu hazvo, asi ichi hachisi chokwadi chizere. Sevanhu vakuru, tine simba rokusarudza kana kuramba tichichengeta kana kusiya zvakaipa zvatakadzidza tichikura. Zviri pachena, kuti tiri zvatinosarudza kuva.
Mazano anotevera anokubatsira kana uchida kugara wakatsamwa. Ukateedzera izvi nomazvo uchashatirwa semadiro ako:
Iva Nenhongwa
Dada nekuva anoda zvakaruramisa. Vamwe vevanhu vane hasha dzinobvira moto vanoda zvakaruramisa. Chii chakarurama pano pasi? Hapana chinhu chenyama chakarurama. Nokudaro, vanhu vanotarisira zvakaruramisa kubva kune vamwe vanotoodzwa mwoyo chete. Munhu ane nhongwa anoda kusi chinhu chimwe nechimwe nyange kaduku kose chiitwe zvakaruramisa. Vanhu vakadai vane mufananidzo wakanaka, wakajeka wekuti nyika inofanira kuva yakaita sei, uye havagoni kuwana mufaro kusvikira zvose zvaitwa nenzira yavanoti yakaruramisa. Munhu akadai achatsamwa achiedza zvakanyanya kuita kuti nyika ive yakaruramisa.
Usateerera Kufunga Kwavamwe
Mukukurukurirana, zvifunge iwe nemaonero ako pachako. Chimwe zvinhu zvikuru zvinoita kuti ugare wakatsamwa kusateerera zvakanaka. Tose tinoziva kuti kuterera kwakakosha pakutaurirana. Kana pane kugoverana kwakasimba mukukurukura panova nokunzwana nokudzikama. Oliver Mtukudzi anoti ‘Iwe wotaurawo ini ndichiteerera, ini ndotaurawo iwe uchiteerera … tichinzwana.’ Saka kana munhu achivavarira kutsamwa, hafaniri kubvumi kugoverana mukukurukurirana. Vamwe pavanenge vachidawo mukana wokutaura iye anenge akati takarasima nokuzvidzivirira. Achasimbiirira kuti hapana mumwe anoziva zvaari kutaura nezvazvo iye. Haafi akabvuma kuti zviri kutaurwawo navamwe zvine musoro. Ane chinangwa chimwe chete muhurukuro dzose: haazoregi kutaura kusvika apedza maonero ake ose, maonero acho haapedzi kutaurwa.
Svora Munhu Asingapindirane Nechitendero Chako
VaKristu vakawanda vane chokwadi chimwe. Vanoziva kuti vakarurama mune zvavanotenda. Vakawana chokwadi chakakwana. Izvi zvinogona kureva kuti munhu ane mamwe mafungiro ari kukanganisa. Vanhu vanoda kushatirwa vanoona vamwe vachirarama mararamiro avanoti akaipa vovazvidza. Panzvimbo pokuratidza rudo nokushivirira, vanhu vanovavarira kutsamwa vanozvidza. Vanoda kusava nechokuita vanhu vakadai vanonzi vatadzi.
Dada Nokuti Hauite Zvenhando
Usaseka kana kuva nenguva yakanaka. Sunga chiso. Zvitori nyore kugara wakasunga kumeso uye kuwana zvinhu zvekutsamwira. Nguva inotevera pauchange uri muhurukuro inofadza pinza mazwi anorwadza akaita sekuoma kwehupfumi hwenyika. Uye kana izvozvo zvisingadzinge mufaro taura nezvekuwanda kwaita mhosva kana kusanaya kwemvura kana kuipa kwemunhu waunoziva. Kana ukanangana nezvose zvinoshungurudza hapazove nokunyemwerera.
Vanhu vane hasha vanofunga bedzi nezvezvakaipa zvehupenyu. Vanoshushikana nezvezvikwereti zvose zvinoda kubhadharwa. Vanoda kukurukura nezvekupararira kwehuipi mudzimba, muchechi mumabasa, munyika. Kana munhu akataura nyambo kana kanyaya kanonakidza vanozunguza musoro nehasha nokuti vanozvitora sezvinhu zvisina maturo. Vanoona vanhu vakadai sehonzeri inoita kuti nyika isabudirire nokuti vanonangana nezvinosekesa vachisiya zvematambudziko ehupenyu.
Zviwanzire Basa
Tose tinoziva kuti nguva neveukama uye yekuzorora zvinogona kutiwanisa rudekaro mupfungwa. Nokudaro, munhu ari kuvavarira upenyu hwehasha anofanira kuzviwanzira basa, kushanda zvakapfurikidza. Zvinogona kuratidzika sokunge zvakaringana asi manyepo. Vanhu vanozadza nguva yavo yokuzorora nemabasa havatani kuchema-chema kuti vari kuregererwa uye kupomera vamwe hunungo. Kazhinji vanopedzisira vasisina tariro. Uyezve, nenyaya yokugara vakabatikana, vanorasikirwa nehope dzakawanda. Izvi zvinotutsira pahasha dzavo nokuti munhu wose asingarare zvakakwana haatani kutsamwa.
Tarisira Kuti Vanhu Vazadzise Zvido Zvako Zvose
Tinodzidziswa mumachechi edu kuti hupenyu hwechiKristu hunosanganisira kudzidza kuva norudo nehanya. Iwe unogona kufunga kuti izvi zvinhu zvakanaka. Asi usazviita kana uchida kubudirira pakuva nehasha. Pane kuedza batsira vanhu nekuita kuti upenyu hwavo huve nani, iva noudyire. Iva netarisiro huru yokuti vamwe vakuitire zvido zvako. Somuenzaniso, sababa vemusha pota uchiyeuchidza mhuri yako zvavanofanira kukuitira kuti hupenyu huve nyore kwauri. Kana uri mukadzi, chema-chema zvikuru kana mhuri yako ikakanganisa uye ikatadza kuita zvaunotarisira. Pota uchiyeuchidza vamwe zvavanofanira kuita uye mitoro yavanofanira kutakura.
Tungamida Kodzero Dzako Nguva Dzose
Iri nderimwe rematanho makuru aunofanira kutora kana uchida kuita hasha. Yeuka kuti Bhaibheri rinosimbisa mabasa aunofanira kuita kupinda kodzero. Iwe usazvinetsa – tsvaka kodzero dzako chete chete. Usawane chekuita neupenyu hwavamwe vanhu, namabasa anofanira kuitwa, ingovavarira kuwana kudzero dzako chete chete. Pota uchisvora vamwe kuti havakuoni. Shora vamwe nokuti vanokubatirira.
Ita Dambe Nezvinhu Zvakaita Sorudo Nerupfave
Izvi zvinogona kuva nyore kuti vanhurume vaite. Kana mudzimai wako navana vachida kuenda kuChechi ita kuti vaende voga. Vabudire pachena kuti ibasa remadzimai kuita zvorudo, kutora nguva nevana kana kutengera hama kadhi rezuva rokuzvarwa. Zvifunge iwe chete nebasa raunoti nderevarume chaivo uye zvikudze somumhu akaoma.
Taura Nezwi Riri Pamusoro Kana Uchida Kuti Vamwe Vakunzwe
Itoita zvokudanidzira. Nzwisiso yakajeka inotitaurira kuti kutaura nenzwi roruremekedzo zvinobatsira kuumba mamiriro orunyararo. Sezvo chinangwa chako chakasiyana, ungada kuedza kutyisidzira namatauriro aunoita nevanhu. Mukukurukurirana, kana vamwe vanhu vasingabvumirane newe pakarepo vapopotere. Izvi zvinoshanda zvikuru kunyanya kunhengo dzemhuri. Hazvikonzere kukakavara bedzi, asi zvinovadzidzisawo muenzanisira wemaitiro avanofanira kuita. Nokupa muenzaniso uyu, zvichida vana vako kana mumwe wako achadzidza kutyisidzira.
Namata Mari Nezvinhu Zvinokosha
Funga kuti kune zvinhu zvakakosha kupfuura hukama nevanhu. Kana uchida kutsamwa tungamidza zvinhu. Ona vanhu semudziyo yokuwana zvaunoda. Izvi zvinoreva kuti kushandisa vanhu kuwana pfuma yose yaunoda. Kana wawana zvaunda chirega kuva nechokuita navo. Hasha, anzwiro ako. Saka kana uchida kuzviwanira hasha dzakakwana unofanira kuramba uchirarama mararamiro okutungamidza zvido zvako kubva kune vamwe.
Usasiva Utera Hwako Nepawakasimbira
Usaedza kuzvivandudza iwe pachako. Munhu wose anonyatsotarisa zvohupenyu hwake agonona kuwana dzekukura zvakanyanya. Izvi zvinopesana nezvinangwa zvako. Kana mumwe munhu akakuudza pamusoro pezvikanganiso zvako munyararidze. Usaverenga Bhaibheri kana kuteerera mharidzo. Ukadaro unogona kubatwa mwyo ukachinja. Kuti usashandura utera hwako usatombobvira wabvuma kuti une utera.
Usanzwira Vanotambura
Uri munhu akazvigadzira upenyu. Wakashanda nesiba kuti uve zvauri nhasi. Munhu wose anofanira kuteedzerawo. Mumafungiro ako, hapana chikonzero chinoita kuti vanhu vakundikane. Vose vane nungo vanongoda kuitirwa zvinhu vagere. Hazvinei kuti vamwe vakakura upenyu hwakaoma. Hazvinei kuti vamwe Havana kukura vachikurudzirwa kuvimba nezvavari. Kwauri zvavanopa zvinongova zvikonzero zvokusada kushanda nesimba nokukunda matambudzio ohupenyu huno.
Shusha noKushora
Ona zvakaipa muna vamwe wonangana naizozvo. Paunoona vamwe vachikanganisa, vanongedzere zvitadzo zvavo nenzira inovanyadzisa. Usamboedza zvachose kuvabatsira. Funga chete zvaunogona kuita kuti vazive zvikanganiso zvavo.
MATANHO OKUTORA
Nhanga nyaya
Mazuva ano mitengo yezvinhu iri kungoramba ichikwira. Mari inohorwa kubasa iri kuderedzwa. Iro basa racho riri kuperera vazhinji. Mari chaiyo kuwana inokwana kubva kubhenji inyaya. Saka ndinoda kukupai nzira dzokupona munguva dzakaoma dzohupfumi.
Tanga kurarama upenyu hwakachipa
Nhanho yekutanga yekugadzirisa upenyu hwako ndeyekutarisa zvinhu zvaunotenga whiki roga-roga. Nyora pasi chinhu chimwe nechimwe chaunotenga (zvokudya, zvinwiwa, nezvimwewo) wokanzura zvinhu zvose zvaungagona kurarama usina. Kana mwana anga achienda kuchikoro chinodhura muise pachikoro chakachipa. Dzimwe nhambo zviri nani kuroja murukesheni pane kusimbirira kumasabhabha anodhura. Ukaita izvi nomazvo unosevha mari shoma asi inozokuyamura.
Tsvaga mari nedzimwe nzira
Tsvaga dzimwe nzira dziri nyore dzinokuwanisa maari. Mazuva ano vamwe vanongoenda paYoutube voturika vhidhiyo rikaonekwa nevanhu vakawanda votoita mari. Zvinogona kutanga zvakaderera asi nekufamba kwenguva iwewo wadzidza zvakawanda zvotanga kubhadhara. Zama kushanda uchibva pamba. MuZimbabwe mune zvinhu zvakawanda zvisati zvaedzwa zvakaita segasi rinoshandisa marara, kutengesa marara acho nezvimwewo zvisingadi mari. Handiti kuita kunongedza asi chikuru ndechekuti usangomirira kutsvaga basa asi shandisa maoko ako kuita zvaunokwanisa. Hazvinei ukawana tumari tushoma.
Imbomira kubuda
Sezvandambotaura unofanira kurarama upenyu hwakachipa nekuona nzira dzkuwana tumari tushoma. Asiwo unofanira kuzvipira kurasikirwa nezvimwe zvinhu.
Unogona kurarama upenyu hunofadza usingaendi kumafaro, kugochigochi, kubhawa kana kurestorendi. Ukazvinyima mafaro aya unosevha tumari.
Hazvisi nyore kurega kahupenyu kemudenga kaunenge wajaira. Saka unopedzerepi samba rawaipedzera kumafaro? Unoita izvi nekusarudza mutambo wokuita. Unogona kuita zvekujoga kana kuchovha bhasikoro chaiko. Mitambo yakaita seiyi inowanzoita kuti ude kudya zvineutano zvisingadhuri. Kana uri munhu anoda zvekubuda unogona kuenda kumakembi, kunoraura kana kuita zvimwe zvisingadi mari.
Zvokudya Zvaunotenga
Usatenga zvokudya muchitoro chese chese. Enda kuzvitoro zvinohodhesa. Tenga sipo dzako dzemwedzi yakati kuti uye mafuta, matemba kana chimwe chikafu chaunoda chemwedzi yakati kuti. Kana mari yako yakashomesesa unogona kubatana nevamwe motenga pamwechete. Vanohodhesa kazhinji kacho vakachipa kupinda zvitoro zvemumaraini. Chinhu che$5.00 chinogona kuita $2.00.
Zvaunodya
Vamwe vanoti pazuva munhu wose anotarisirwa kudya chikafu chinokarosvika 2400 makarori. Asi ini tsvagurudzo dzangu dzakandidzidzisa kuti unogona kurarama upenyu hune utano uchidya chikafu chine makarori anobvira pa1000 kusvika pa1200. Unogona kusevha mari kana ukabvisa zvokudya zvose zvine makarori akawandisa anotokufutisa futi. Somuenzaniso unogona kubvisa zvinhu zvine shuga yakawanda kana kutorega shuga yacho zvachose. Uchatobatsirika nokudzora muviri wako wova nohutano zvekuti kana kuchipatara hauendi-endi.
Tenga mota isingadyi mafuta kana kushandisa makombi
Vazhinji tinofarira kumukira kutaundi kubasa. Asi dzimwe nguva kuzviitira uri pamba kunosevha mari yekufambisa. Asi kana zvakaoma uye uchitofanira kuenda kutaundi kana kubasa kure zvinogona kuva zvakakodzera kuti utengese mota inodya mafuta kana kutoshandisa makombi chaiwo. Reawo kutenga zvinhu nechikwereti. Parizvino unogona kunge usingakwanisi kugadzirisa mararamiro ako asi zviri nani kutanga kutora matanho kusvika wakunda. Ukaedza uchaona kuti unosevha mari yakawanda.
Tenga zvipfeko zvomubhero kana zvepamusika wepanze
Rega kutenga zvipfeko muzvitoro zvinodhura. MuZimbabwe makazara vanhu vanotengesa hembe dzakanaka dzemubhero nevamwewo vane misika inotengesa hembe dzakanaka asi dzakachipa. Zhinji dzinembenge dzakapfekwa asi hazvitombooneka.
Isa mari yako muzvinhu zvinobatika
Kana uri kutya kuti dhora rinogona kudonha kana kuti pane zvingangoitika nemari tenga zvinhu zvinobatika zvakaita samba, zvipfuyo nemidziyo. Hapana anonyatsoziva kuti chii chichaitika munyika yedu saka tamba wakachenjera.
Chengetedza mari pazvishanziswa zvepamba
Chivhitivhiti – Kune vane madhishi eZvivhitivhiti akaita seDSTV bhadharai machaneri mashoma nekuti munogona kubhadhara akawanda amusingaoni. Kana wakaroora kana kuroorwa uye mose muri vaviri mumwe wenyu anogona kumbodzima yake foni kuti musevhe mari. Muchashamisika muchitosevha $50.00 chaiyo kana kudarika. Mafoni anobatsira zvikuru asi anodya mari yakawandisa. Kana uchitenga tengawo foni yakachipa kana kambudzi chaiko kasingadyi mari. Hazvibatsire kushamirira nefoni inodhura iyo ichikudyira mari.
magetsi- Tarisa bhiri rako remagetsi. Ungarideredze sei? Munguva yechando pfeka hembe dzinodziya kana kuvirikudza majuzi pane kubatidza hita. Kana zvanyanya tenga hita yegasi yakachipa. Batidza hita iyi panunenge uchiishandisa chete. Dzima zvakare michina yose yemagetsi isina kukosha. Izvi zvinokubatsira kuderedza mari yaunoshandisa.
Chiedza – Tsvaga tumari twekutenga magirobhu anochengetedza moto. Isa magirobhu aya mudzimba dzose. Asiwo natsa kuti unobatidza magirobhu pakafanira nokuadzima paunenge usingaade.
Chema-chema kune vanokutengesera zvinhu
Munguva yakaoma yehupfumi,taura nevanokutengesera uchivaudza kuti upenyu hwakakuomera uye mari yako ishoma. Iva wakatendeseka uye taura chokwadi uine mwoyo murefu nemunhu wose waunenge uchitaurirana naye. Kumbira nguva yakarebha yokubhadhara zvishoma nezvishoma. Kumbira mutengo wakaderera. Kana waita izvi natsa kuti wabhadhara uye nenguva kuitira kuti vanhu vavimbe newe.
Rega Kupedza Mari
Izvi zviri pachena. Kazhinji tinotadza kurega kushandisa mari. Nguva zhinji panotonyuka chimwe chinhu chinoda kutengwa kunyanya nemhuri. Asi funga zvinoitika kana uchangopedza mari. Iwe unorega kushandisa mari. Tsvaga chikonzero chokunzvenga nyaya iyi nokuti nyange ukasashandisa mari nyika ichaenderera mberi. Haisi mhosva kuti wakabhuroka uye hauna mari. Kana uiine hcinhu chaunodisa usina mari usafonere hama uchikwereta kana kukumbira. Tsvaga nzira dzokupunyuka. Rarama nezvauinazvo.
ZVOKUITA SOMUKRISTU
Iva nekutenda.
Dzimwe nguva kutenda kunogona kunetsa kuita. Nzisisa kuti Mwari ane simba rekuchinja chero mamiriro ezvinhu akakupoteredza. Asi iwe tanga kutendera muninga remwoyo wako Anokwanisa uye achazviita. Iwe unofanirwa kubatirira pachitendero chako zvisinei nokuti mamiriro ako ezvinhu akaoma sei. Mwari anogara achitonga. Iye anoti, ‘… Handichazokusiyi, handingatongokusiyi’ (VaHeberu 13: 5).
Ramba Uine Maonero Akanaka.
Kana iwe uchitarisira kuti Mwari apindire usachema-cheama, kunyunyuta, kana kupedza nguva uchipomera mhosva. Apo uchitaura nezvematambudziko ako emari, taura zvakanaka uye zvinechitarisiro. Kusagadzikana kunoratidza kusava nekutenda. Chinobva parurimi rwako chiratidzo chezvauri mumweya wako. Siyana nokusagadzikana.
Wana chaungaita
Mwari anokomborera chiito. Paunoita zvose zvaunogona kugadzirisa mamiriro ako ezvinhu, Mwari anozviziva uye anobvumira zvimwe zvinhu zvakanaka kuti zviuye kwauri. Kumirira mari kuti idonhe kubva mudenga hakushandi. Mwari anobatsira avo vanozvibatsirawo, saka shanda nesimba kuti uwane kuti upunyuke mudambudziko rako remari asi uchivimba naye kuti akuratidze nzira.
Iva nemwoyo murefu.
Zviri nyore kuti uore mwoyo kana zvinhu zvisingaitiki nokukurumidza sezvaunoda iwe. Yeuka kuti nguva yaMwari inogara yakarurama. Nokuda kwekuti iwe hausi kugutsikana nemafambiro ezvinhu, hazvirevi kuti Mwari haasi kupindira.
Ramba Uchinyengetera.
Kunyengetera pamusoro pematambudziko ako emari zvinoreva kuti kugara uri pamwe naMwari. Mwari anoda kuti ubatane naye nguva dzose uye mumamiriro ezvinhu ose. MunaJohani 15: 1-8 anoti ‘Kana ukaramba uri mandiri, kumbira zvaunoda uye zvichaitika kwauri.’ Anoda kuti urambe uchibatana naye. Kana iwe ukaswedera pedyo usingaendi kure, Mwari anokusimudzira uye anokuita kuti ubereke michero yakawanda.
Shandisa mari nohuMwari
Tsumo 27: 23-27, ‘Ngwarira uzive mamiriro ezvipfuwo zvako, uye chengetedza mombe dzako; nekuti pfuma haigari nokusingaperi; korona haigari kusvikira kumarudzi namarudzi. Kana uswa hwakakora hwabviswa, uye uswa hutete hwozviratidza, uye miriwo yamakomo yaungwanidzwa, makwayana achapa zvipfeko zvako, uye mbudzi mutengo wemunda; iwe uchava nemukaka wembudzi yakakwana, uve mbudzi dzichapa zvokudya zvako, uchava ne zvokudya zvakakwana mumba mako nezve zvevarandakadzi vako.’
Mwari anotikurudzira kuti tishande nesimba mubasa redu uye kuti tichengetedze upfumi hwedu nemari yedu. Kana tikadaro, hupenyu hwedu hauzotiomera.
CHERECHEDZA
NB* Chinangwa chechinyorwa chino hachisi chokuita kuti vashandi vave nhubu. Hachisi chokusvora vashandirwi vose. Chengetedza basa rako. Iva neukama hwakanaka nevaunoshandira. Usashungurudza vanokutungamirira. Chinangwa chechinyorwa chino ndechekukubatsira kana uri panguva yaChimbetu, nguva yakaoma pabasa.
Yambiro
Hapana nzira inganzi iri nyore kuti ukunde kana uchishanda nabhosi ane hutsinye. Dzimwe nguva zviri nani kufanofunga kuti ukasiiswa basa unoendepi. Dzimwewo nhambo mamiriro ezvinhu anongoda kuti usasiye basa asi uyedze kuwana nzira dzekurarama zvakaoma kudaro. Kunyange usina zvakawanda zvaunogona kuita zvishoma zvinotevera zvinogona kukubatsira.
Rangarira kuti vatungamiri vazhinji vanoshusha inyanzvi pakunyengedza, kutsvetera uye kutamba nepfungwa dzavanhu. Inyanzvi pakushungurudza mupfungwa, kutyisidzira (kuti unopererwa nebasa, mari yako inoderedzwa …) uye vanowanzoshandisa utera hwako kukudonhedza kana kukusiya wameduka usisavimbe nezvauri. Vatungamiri vakadai vanogona kushandisa mashoko nomutowo unokudzikisira nokukushungurudza. Kazhinji kwavari rinenge riri dambe rokuti kana vazodhinhiwa vanobva vakusvipa.
Funga nezvekutsvaga rimwe basa
Unogona kutsvaga mukana wokuchinja kambani. Asi ngwarira kuti bhosi wako ari kukushungurudza anogona kuva nesimba rokukuvhiringira zvinhu. Rangarira kuti nyange ukabva pakambani yaari anogona kutevera nerwesei achikukanganisira upenyu hwako.
Zano: Unofanirawo kuzvibvunza kuti kambani inobvumira mutungamiriri akadai kuti arambe ari pachinzvimbo chine chiremerera haina dambudziko here? Mhinduro yako inofanira kukuudza zvakawanda pamusoro pegadziriro yaunofanira kuita muupenyu hwako kana uchida upenyu hwokusashungurudzwa.
Muudze zvaunonzwa
Edza kuenda kuna bhosi wako anokushungurudza wotaura naye zvakajeka uchinanga pamusoro wenyaya usingatenderere uye usingawanzi hasha. Taura noruremekedzo zvichibva mukati memwoyo wako. Mabhosi anoshungurudza kazhinji anoshandisa utera hwako hwakaita sehasha saka iwe taura navo wakadzikama uye nehunyanzvi.
Edza kupinda naye muhurukuro dzinovaka
Edza kuita hurukuro nabhosi wako dzine chinangwa chokuronga zvinotarisirwa, zvinangwa uye mashandiro akanaka anotarisirwa mudhipatimendi raunoshandira mukambani. Zvakakoshawo kuti uedze kunzwisisa kana paine zvaunofanira kugadziriswa maererano namashandiro ako nokuti pamwe pane zvaunenge uchikanganisawo zvechokwadi. Unogona kukumbira kubatsirwa nemazano ekuti ushande zvakanaka uye kukumbira kuudzwa zvaunofanira kushandura nekugadzirisa. Vanhu vazhinji havaedze hurukuro nokuti vanenge vachishungurudzwa zvokuti havaone kukosha kwehurukuro.
Zano: Vamwe vakaita izvi zvikavashandira upenyu hukaita nani. Asi vamwewo vakazviita zvikaramba vakatsvaga kumwe kwekushandira. Fungisisa usati waita zvaunoita.
Tanga kuunganidza umboo
Vashandi vazhinji vanoshaya zvombo zvokurwisa kana bhosi wavo anovashungurudza akatanga kushandisa murau wekambani kuvheneka mashandiro avo achibatsirwa neboka rinoona nezvemashandiro avashandi. Pose paunoshungurudzwa tora bepa unyore manotsi. Ita zvose izvi wakachenjera, usabatwe. Tsvaga zvapupu muchinyararire. Mumanotsi ako tsanangura hunhu hwabhosi, zuva razvaitika uye maitikiro azvaita. Paunonobvunzurudzwa pota uchikumbira kujekeserwa. Teerera, dzokorora mashoko anenge achangotaurwa nabhosi kuitira kuti uve nechokwadi chokuti wanyatsomunzwa.
Endesa nyaya kuboka rinoona nezveukama navashandi mukambani
Dzimwe nguva zvakanaka kuti uendese nyaya yako kuboka rinoona nezveukama pakati pavashandirwi navashandi mukambani yenyu. Danho iri rinogona kushanda asi rinogona kukupandukira zvakare. Kana zvirizvo zvawazofunga kuita nyatsodoma kushungurudzwa kwako zvakajeka uye usingatenderere. Manotsi ako nezvapupu zvako zvinogona kukubatsira. Asi ngwarira kuti unenge wavamba chimurenga pazvinongosvika munzeve dzamaneja wako (paanoturirwa). Zvakadaro chinangwa chako ngachive chokuti kushungurudzwa kwako kupere kwete kuti iye adzingwe basa kana kumuitira utsinye.
Shandisa simba reboka
Kana udzvanyiriri hwamaneja huri pachena uye huchiitirwa munhu wose mukamumukira pamwechete zvinogona kuita kuti paitwe ongororo navakuru vakuru. Asi kana pakatanga kutsvagwa muroyi zvinogona kukuipira. Simba rako riri pakutaura wakatendeka uchingotaura chokwadi chete uye chinangwa chako chiri chokuti kushungurudzwa kupere kwete kuitira bhosi wako utsinye.
Tsvaga kuti mutemo unotii
Nyange hazvo paine zvakawanda zvinogona kunetsa pakushandisa mutemo, pamwe mutemo unogona kukununura ukanyatsoongorora kodzero dzako. Taura nenyanzvi inoona nezvemitemo yavashandi. Asi ziva kuti kana watora nzira iyi wamutsa chimurenga chinogona kupera zvisiri izvo. Unogona kukurirwa. Edza sokugona kwako kusashandisa nzira iyi asi woishandisa chete kana waiswa kumadziro.
Wedzera ruzivo rwako
Zvakaoma kana uri pakati pokushungurudzwa kuti ushande nesimba. Asi unofanira kugara uchiwedzera ruzivo rwako mubasa rako. Hazvinei kuti uri kufara here kana kwete, kuwedzera zvikiri zvako, ruzivo rwako nekuumba ushamwari zvinokubatsira kurarama mubasa rako. Kushanda nesimba kunobhadhara.
Siyana nazvo
Kana zvanyanya ziva kuti utano hwako hwakakosha kupinda basa. Mikana haiperi muupenyu. Unogona kuzowana basa risina kunaka serauinaro asi unowana basa. Funga zvokusiya kuitira kuti uchengetedze utano hwako. Basa rinokuparadza pamweya dzimwe nguva harisi rekusimbirira.
Hama makadii? Ndati ndikuziviseiwo kuti kisimusi tirikuuya ikoko ini nevana vangu vashanu nemurume wangu. Munin’ina wangu ati anoda kundiperekedza nevana vake vashanu nemurume wake uye mbuya vangu vanoda kukuzivaiwo saka vati touya tose nevana vavo vana nemurume wavo zvekare. Musikana wangu ati haana kwekuenda saka ndongouya naye ane vana vake vaviri. Ndichapfuura ndichitora mainini nevana vavo vana nemurume wavo uye ndaita dambudziko rekuti imbwa dzangu ndashaya wekudzisiira. Ishanu chete. Ndichauya nadzo. Asi hatinawo mari yekudzokesa motigadzirirawo ndatenda.
Ndini uyo ndiripadheni nevana vangu. Ndakaona munhu we chikwereti achiuya asi kuti nditize zvanga zvisingaiti. Ndakabva ndazvikwidibira nezidhishi!. Munhu wechikwereti akabvunza ‘Baba varipo here?’ Zvikanzi, ‘Havapo’ iye ‘Kana vauya muvaudze kuti ndatora dhishi.’
Hapana munhu ane ruremekedzo semunhu akuda kukwereta mari. Anogona kutaura nembwa yako achiti, ‘Zvisei sei Bhingo? Mukudziya mushanaka mukoma, iko kurikutonhora mazuvano VaBhingo.’