Mweya Mutsvene, ndimi wechitatu muUtatu Hutsvene hwaMwari! Ndimi Mweya wechokwadi nohutsvene, munobva munaBaba noMwanakomana, makangoenzana navo muna zvose! Ndinokupfugamirai ndinokudai nomwoyo wangu wose.
Mweya Mutsvene wadiwa, ndinoisa chivimbo murudo rwenyu kwandiri rwakadzama pandiri kuita NOVHENA iyi, kuti kana kuri kuda kwenyu mundipewo izvi …
(Kumbira chaunoda)
Ndidzidzisei kuziva nokutsvaga Mwari akandisika uye wandakasikirwa. Zadzai mwoyo wangu nokutya Mwari uye rudo kwaari. Itai kuti ndirwadziwe kukutadzirai uye ndive nomwoyo murefu. Musandirega ndichiwira murutadzo.
Wedzerai mandiri kutenda, chitarisiro nerudo ndikure mutsika dzakanaka dzinofambirana nezvandiri pakukurarama.
Ndiitei muteveri waJesu akatendeka, mwana anoteerera sangano uye anobatsirana navamwe. Ndipeiwo nyasha dzokuti ndigone kuchengetedza mirau yenyu uye kugamuchira masakaramende ndakakodzera.
Ndipeiwo zvipo zvenyu zvinoera zvinoti; ungwaru, runzwisiso, zano rakanaka, rutsigo, ruzivo, runamato nokutya Tenzi. Wedzeredzai mandiri michero yenyu inoera inoti; rudo, mufaro, mwoyo murefu, mutsa, unaku, mwoyochena, unyoro, kutendeka, kuzvidukupisa, kuzvibata noutsvene.
Ndisvitsei kuutsvene mukurarama daidzo yamakandishevedzera, mugondisvitsawo kumugumo wakanaka wokuzofara muupenyu husingaperi, nomuna Jesu Kristu Tenzi wedu. Amen.
Jesu muzere tsitsi kwazvo, munogarotinzwira ngoni uye munotiregerera, musaringe matadzo edu, asi ringai chete chivimbo chatinoisa muUnaku hwenyu husingaperi. Tigamuchirei mukatikati memwoyo wenyu uzere rudo netsitsi. Pasawanezve anosuduruka pamwoyo wenyu.
Ndinokutetererai izvi kuburikidza nomurudo rwunokubatanidzai naBaba naMweya Mutsvene…
(Taura chaunokumbira)*
Namatirawo vatadzi: Baba musina mugumo, tarirai nameso etsitsi marudzi ose pasi pose, anotarisira kuMwoyo werudo netsitsi weMwanakomana wenyu Tenzi wedu Jesu Kristu. Nomukutambudzika kwake kunoisvosuwisa, ndiitireiwo tsitsi kuti ndigogonawo kupa mbiri kuukuru hwenyu kwemisi isingaperi. Amen.
Zuva 2: Vapristi navapikiri
Zuva 3: Vakatenda vose
Zuva 4: Vasingatendi
Zuva 5: Kubatana kwamakristu
Zuva 6: Vanozvidukupisa navarombo
Zuva 7: Vana
Zuva 8: Mweya iri mupurigatori
Zuva 9: Vakarukutika
Mwana Jesu, ndimi diziro rangu nokuna amai venyu VaTsvene. Ndinokutetererai kuti mundibatsire pane zvandinokumbira nokuti ndinotendera zvizere kuti Umwari hwenyu hunogona kundibatsira. Ndinotarisira nechivimbo kuwana nyasha dzenyu. Ndinokudai nomwoyo wangu wose nomweya wangu wose. Ndiregerereiwo pane zvandakakutadzirai. Jesu makanakisa, ndinokumbira kuti mundipe simba rokukunda matadzo.
Ndinotsidza kusakutadzirai zvakare kana kuita zvose zvisingakufadzei. Ndinoda kukuitirai ndakatendeka. Pamusana porudo rwangu kwamuri Mwari Mwana Mucheche, ndinodawo mumwe wangu sokuda kwandinozviita.
Jesu, Mucheche ane simba kwazvo ndinokutetererai zvakare kuti mundibatsire neizvi… (Kumbira chaunoda)
Mucheche Mwari muna masimba ose, ndinokutetererai nomureverero ine simba yaAmai Vatsvene venyu uye nomutsitsi dzenyu saMwari dzisingaperi, kuti mundipewo mhinduro yakandinakira kumunamato wangu muNOVHENA iyi.
Ndipeiwo nyasha dzokuva nemi kwemisi isingaperi pamwe naMaria naJosefa uye ndizokupfugamirai pamwe naVaTumwa naVaTsvene venyu. Amen.
Novhena kuMwoyo Mutsvene waJesu
Jesu Mwari makati, “Kumbirai muchapihwa; tsvagai muchawana; gogodzai muchazarurirwa.” Onai ndinopfugama patsoka dzenyu, ndakazara nechitendero chipenyu uye chivimbo mune zvakatsidzirwa noMwoyo Mutsvene wenyu. Ndinouya
kuzokumbira izvi…
(Kumbira chaunoda)
Ndinotizira kwamuri Mwoyo waJesu, nokuti mamuri ndinowana nyaradzo pandinorwadziwa, dziviriro pandinoshungurudzwa, simba pandinoremerwa nemiedzo, chiedza pandinokahadzika kana kutibikirwa nerima.
Jesu wadiwa, ndinotenda zvakasimba kuti munogona kundipa nyasha dzezvandinokukumbirai. Muri Mwari wetsitsi uye mwoyo wakatyoka uri pachokwadi hamuurambi. Nditariseiwo nameso etsitsi. Ndinokutetererai kuti mwoyo wenyu wakanaka uone marwadzo noundonda hwangu, sechikonzero chokunzwa munamato wangu.
Mwoyo Mutsvene, ndinogamuchira mhinduro yose yamuchapa kune zvandinokumbira. Ndinotsidza kuti ndicharamba ndichikupfugamirai, ndichikudai, ndichikurumbidzai uye ndichikuitirai. Jesu wangu, fadzwai nokugamuchira izvi sokuzvipira kwangu kwakaruramisa kuita zvinodikanwa noMwoyo wenyu unopfugamirwa. Izvi ndizvowo zvandinoshuwira kuti zvizadziswe mandiri uye nezvisikwa zvenyu zvose nokusingaperi.
Ndipeiwo nyasha dzandinokumbira ndakazvirereka kuburikidza nomuMwoyo Usina mhaka waAmai venyu. Amen.
Munamato
Mwari muna masimba ose, imi makakwevera Jeradhi Mutsvene kwamuri kubvira paudiki hwake kuti ave mutevedzeri wemuenzaniso wemwanakomana wenyu akarovererwa paMuchinjikwa tinokutetererai kuti nokutevedzera zvaiitwa naJeradhi Mutsvene tifanane naiye Jesu Kristu akarovererwa paMuchinjikwa. Izvi tinozvikumbira nokuna Kristu Tenzi wedu. Amen.
Zuva rokutanga
Jeradhi Mutsvene makangogara makazara nechitendero ndiwanireiwo chitendero nemwoyo wangu wose zvose zvandinodzidziswa kutendera nesangano dzvene raMwari kuti ndishingirire kugara upenyu hutsvene kuti ndiwane mifaro youpenyu husingaperi. Kwaziwai Mariya … (x9)
Zuva rechipiri
Jeradhi Mutsvene womwoyochena, kubvira paudiki hwenyu makanga musina hanya nezvinhu zvapasi pano ndibatsireiwo kuti ndiise ruvimbo rwangu nguva dzose muna Jesu Kristu chete uyo anova upfumi hwangu hwechokwadi uye ndiye chete anogona kundipa mufaro zvino nemisi isingaperi. Kwaziwai Mariya x9
Zuva retatu
Jeradhi Mutsvene munobwinya norudo, makakwanisa kuona rudo rwezvapasi samarara. Makapira upenyu hwenyu kushandira Mwari nevamwe muchikudza mbiri yaMwari mukuzvininipisa kwenyu uye maigarobatsira vari mumatambudziko nekunyaradza vanosuruvara. Ndinokumbirawo kuti mundiwanirewo gomborero rokuda Mwari oga anova ndiye runako rwose nokuda vamwe pamusana pake, ndizogara naye mumbiri yake isina mugumo.
Kwaziwai Mariya x9
Zuva rechina
Jeradhi Mutsvene ruva dzvene risina chinongo, namagariro enyu akafanana nengirozi uye upenyu hwenyu hutsvene hwamakararama makagamuchidzwa naamai vedu Mariya Mutsvene pamwe nomwana wavo zvivimbiso zvakanakisisa zvorudo, ndinokumbirawo kuti kurwisana nouipi ndigozowanawo ndaza inowanikwa yakamirira avo vakashinga vari muchokwadi. Kwaziwai Mariya x9
Zuva rechishanu
Jeradhi Mutsvene muenzaniso wekuteerera kutsvene, imi makazvirereka mukazviisa pasi peavo vaive vari pachinzvimbo chaJesu Kristu kwamuri muupenyu hwenyu, nenzira iyi makaeresa mabasa enyu epasi. Ndikumbirireiwo kuna Mwari gomborero rokuzviisa pasi pekuda kwaMwari nguva dzose uye kuti ndiwanewo chipo chekuteerera muna zvose kuti ndigotevera Jesu anova ndiye muenzaniso wangu akateerera kusvika pakufa. Kwaziwai Mariya x9
Zuva rechitanhatu
Jeradhi Mutsvene imi makagona chaizvo kutevedzera Jesu Kristu mununuri wedu aiva nembiri huru yekuzvirereka. Ndikumbirireiwo kuti nokuziva udiki hwangu pamberi paMwari ndigokodzerawo kupinda muumambo hwokudenga uhwo hwakapikirwa vanozvirereka nokuzvidukupisa mumwoyo yavo. Kaziwai Maria x 9.
Zuva Rechinomwe
Jeradhi Mutsvene gamba risina kumbokurirwa nechii zvacho makatirira zvikuru mumatambudziko, imi makawana mbiri muutera hwenyu uye makasangana nemanyepo ane utsinye mukasvorwa asi imi makafara kutambudzika pamwe naKristu, ndikumbirireiwo kutsunga nekuzvipira kwamuri mumatambudziko angu kuti ndigoshinga mukutakura Muchinjikwa wangu uyo unozondiwanira ndaza (chiremba) yembiri isingaperi. Kaziwai Maria x 9.
Zuva Rerusere
Jeradhi Mutsvene mudi wechokwadi waJesu ari musakarAmende kwazvo reyukaristiya imi makapfugama nguva yakareba chaizvo pamberi petabhenakoro apo makaraira mifaro yeparadhiso.
Ndibatsireiwo kuti ndive norudo rusungambofi kuna Jesu uyewo kuti ndigamuchire yukaristiya tsvene kakawanda zuva roga roga ndirambe ndichikura murudo rwake rutsvene ndigowanawo gomborero rokuda Jesu.
Kaziwai Maria x 9.
Zuva Repfumbamwe
Jeradhi Mutsvene mwana akadiwa zvikuru nedenga, imi muchiri mudiki makapiwa mwana Jesu namai Maria, vanova vakauya kwamuri mapfiga maziso enyu murufu. Ndinokumbira mundikumbirirewo kuti nditsvage nokuda amai vakakomborerwa muupenyu hwangu, kuti vave mufaro nenyaradzo yangu mumupata wemisodzi kusvika ndabatana nemi pamberi pechigaro chaMwari ndigorumbidza runako rwake kwemisi isingaperi. Amen. Kaziwai Maria x 9.
Jeradhi Mutsvene
Jeradhi Mutsvene mumwe weavo vane mukurumbira wokuita zvishamiso munhoroondo yeSangano Katorike. Paiwongororwa kuti aitwe Mutsvene zvishamiso zvakawanda zvakaratidzwa zvakaitwa kuburikidza nekuna Jeradhi Mutsvene.
Kubvira musi wokuzvarwa kwake 6 Kubvumbi 1726, kusvikira musi waakafa ave nemakore makumi maviri ane mapfumbamwe Jeradhi Mutsvene aiva ndonda. Pamusana paizvozvo akarambwa katatu kutambirwa muupenyu hwokupikira. Mushure mokunge agamuchirwa muchita cheMununuri (maRedemptorist) nokuratidza undonda hwake pachiso chake zvakazoonekwa kuti iye ari oga aikwanisa kuita basa raiitwa nevanhu vana. Mushure mekutambirwa saBhudhi (brother) muchita ichi akafamba mumaruwa emuItari somuparidzi weshoko raMwari akazove mudziyo wokuti masimba aKristu okurapa aibuda nemaari. Kunyangwe nanhasi uno nokureverera kwake anoenderera mberi achibatsira vatenderi vanokumbira minato yake.
Hakuna munhu akakwanisa kutsanangura zvinogutsa kuti pamusana pei Jeradhi Mutsvene achitorwa somurevereri wanamai. Muupenyu hwake muzviitiko zvakawanda munamato wake wakaponesa upenyu hwamai nemwana wavo achangobva mukuzvarwa. Mushure mekufa kwake zvakaonekwa kuti tsika huru yaive nemukurumbira muupenyu hwake yaive yokuti, “Ruvimbo mune zvinobva kuna Mwari.” Pamusana paizvozvi vanhu vakawanda vakakweverwa kukumbira nekwaari. Aiwanzofarira kutaura achiti, “Mwari achatipa” zvinova zvinopikisana nemararamiro, mafungiro nokutya kwevanhu vanofunga nezvepasi pano.
Kwapfuura makore mazana maviri apo Jeradhi Mutsvene akamboti, “Kana paine munhu asingakwanisi kutakura matambudziko anobva kuna Mwari, kumbira kwandiri kuti ndikubatsire kana kuti ndikanzwa nezvemunhu ane dambudziko irori ndinomunamatira kuti Mwari amupe girasiya rokutambira kuda kwaMwari.
Zuva raJeradhi Mutsvene rinopembererwa musi wa16 Gumiguru.
Ritani kuna Jeradhi Mutsvene
Tenzi tinzwireiwo tsitsi … Tenzi tinzwireiwo tsitsi
Kristu tinzwireiwo tsitsi … Kristu tinzwireiwo tsitsi
Kristu tinzweiwo … Kristu tidavireiwo
Mwari Baba muri kudenga … Tinzwireiwo tsitsi
Mwari mwanakomana mununuri wapasi … Tinzwireiwo tsitsi
Mwari Mweya mutsvene … Tinzwireiwo tsitsi
Utatu usnde Mwari mumwechete … Tinzwireiwo tsitsi
Maria Mutsvene Amai voRubatsiro Rusingagumi … Tireverereiwo
Josefa Mutsvene muchengeti waKristu …
Arifonzo Mutsvene mutangi wechita choMununuri Mutsvene Kwazvo…
Jeradhi Mutsvene akapihwa makomborero anoshamisa kubvira paudiki hwake ….
Jeradhi Mutsvene mushandi akarurama akavimbika …
Jeradhi Mutsvene muenzaniso wechiedza kuvashandi vose …
Jeradhi Mutsvene mudi mukuru werunamato nekushanda … Jeradhi Mutsvene mupfugamiri mukuru wesakaramende tsvene kwazvo reatari …
Jeradhi Mutsvene muenzaniso muupenyu wemununuri akarovererwa paMuchinjikwa …
Jeradhi Mutsvene akazvipira zvikuru kune Mhandara …
Jeradhi Mutsvene chiringiro cheutsvene nokuzviranga …
Jeradhi Mutsvene muenzaniso unoyemurika wokuteera …
Jeradhi Mutsvene akatambudzwa nenyadziswa muchinyararire …
Jeradhi Mutsvene mukuru pamberi paMwari mukuzvidukupisa kukuru …
Jeradhi Mutsvene mungwaru wechokwadi mukuzvirereka somwana muduku …
Jeradhi Mutsvene makavhenekerwa nesimba raMwari muzvimisterio zvouMwari …
Jeradhi Mutsvene wechisuwo chimwechete chekufadza Mwari …
Jeradhi Mutsvene mukurudziri wokupinduka kwavatadzi …
Jeradhi Mutsvene mubatsiri anohungwaru pakusarudza zvoupenyu mukushandira Mwari …
Jeradhi Mutsvene mutungamiri akavhenekwa pakutungamirira zvemweya …
Jeradhi Mutsvene shamwari yakanaka yevarombo nevatamburi … Jeradhi Mutsvene diziro yavanorwara nevakasuruvara … Jeradhi Mutsvene mudziviriri anoshamisa wevana vasina kuombekwa …
Jeradhi Mutsvene murevereri ane nyasha mudambudziko ripi zvaro …
Jeradhi Mutsvene wakasimudzirwa naMwari mukuita zvishamiso zvinkatyamadza …
Jeradhi Mutsvene chishongo nembiri yechita cheMununuri …
Hwayana yaMwari munobvisa matadzo apasi … Tidzivirireiwo Tenzi
Hwayana yaMwari munobvisa matadzo apasi … Tinzweiwo Tenzi
Hwayana yaMwari munobvisa matadzo apasi … Tinzwireiwo tsitsi
Tireverereiwo Jeradhi Mutsvene kuti tikodzere kuwana zvatakapikirwa naKristu
Ngatinamatei
Mwari munaasimbaose makakwevera kwamuri Jeradhi Mutsvene kubvira paudiki hwake, makaita kuti afanane nemwanakomana wenyu akarovererwa paMuchinjikwa, tinokukumbirai kuti tichitevedzera muenzaniso wake tifananewo nemwanakomana wenyu nokuna Kristu Tenzi wedu. Amen.
Munamato woUmai
Jeradhi Mutsvene ane mukurumbira murevereri ane simba kwazvo pamberi paMwari uye mushandi anoshamisa wanhasi. Ndinoya kwamuri ndichikumbira rubatsiro rwenyu. Imi makazadzisa kuda kwaMwari nguva dzose muchiri pasi pano, ndibatsireiwo kuita kuda kwaMwari kutsvene. Ndikumbirireiwo kuvaridzi voupenyu kunobva huBaba hose kuti vandipewo mbereko uye kuti ndigorera vana vanofadza Mwari muupenyu huno vagozovewo vagari venhaka muUmambo hwedenga. Amen.
Munamato Wokudzivirirwa Jeradhi Mutsvene mukuru, muranda mudiwa kwazvo waJesu Kristu, mutevedzeri mutsvene womununuri wenyu munyoro nyakuzvidukupisa, uye mwana akazvipira wamai vaMwari, tungidzaiwo mumoyo mangu kamoto kedenga kemoto werudo uyo wakapfuta mumoyo menyu ukakuita ngirozi yorudo. Jeradhi Mutsvene wembiri nokuti apo makapomerwa mhosva musina mhaka, makatirira saTenzi venyu vokudenga, hamuna kunyunyuta kana kupopota kunhema dzevaipi, Mwari vakakusimudzirai somurevereri nomudziviriri wamadzimai akazvitakura ndidzivirireiwo kunjodzi nemarwadzo makuru anonzwika pakusunuguka. Dziviriraiwo mwana wandakatakura kuti agokwanisa kuona chiedza chezuva uye agowanawo mvura yebhabhatisimo inochenesa nokupa upenyu nokuna Kristu Tenzi wedu. Amen. Kaziwai Maria x 9
Kutenda Kudzivirirwa
Jeradhi Mutsvene wakanaka “Murevereri wamadzimai” ndibatsireiwo mukutenda Mwari nechipo chikuru choumai. Nguva yandakanga ndakazvitakura ndakadzidza kukumbira nokwamuri uye ndakaisa kuchengetedzwa kwemwana wangu nekwangu mukudzivirirwa kwenyu kune simba. Dzidziso yenyu huru yekuvimba naMwari yakandisimbisa; mutsara (motto) wenyu wekuti, “Mwari vachapa”, yakava tarisiro yangu. Nditendereiwo Mwari pamusana pemwana ane utano uye akasvika uyewo utano hwangu hwakanaka. Ndibatsireiwo kukoshesa chipo chikuru ichi choumai uye ndiwanirewo kuna Mwari nyasha dzokurera mwana wangu semwana waMwari. Mukutenda kwangu ndicharamba ndichikumbira nekwamuri uye ndichitaurira vamwe vana amai nezve murevereri wavo neshamwari yakakosha. Amen.
Munamato wokugadzirira
Jesu muponesi wedu vadiwa, zvino tavakupinda muuvepo hwokutambudzika kwenyu kunoera. Tibatsirei kunzwisisa kuti kutambudzika kwatinoita muupenyu, kuendesa mberi kutambudzika kwenyu. Tinokumbira simba kuti mweya yedu igone kupinda mukutambudzika uku, tiine mweya mumwechete sowenyu.
ChimisoChokutanga
Jesu anotongerwa kufa
M: Tinokupfugamirai Kristu, tinokurumbidzai.
D: Zvamakanunura vanhu vose noMuchinjikwa wenyu Mutsvene.
Jesu akabuda mumba maKefasi maakanga atukwa uye mumba maHerodhi maakanga asekwa. Zvino anozvuzvurudzwa pamberi paPirato, musana wake uri maronda okurohwa uye musoro wake wakagadzwa ndaza yeminzwa. Iye achazotonga vapenyu navafi pazuva remhedziso, ndiye anotongerwa rufu runonyadzisa.
Munamato:
Jesu wadiwa makatambudzikira isu. Zvitadzo zvedu ndizvo zvakakupondai. Itai kuti tiseme rutadzo kubva pasi pomwoyo yedu, nenzira iyi tipinduke nokuwana tsitsi nokuregererwa nemi.
M: Tenzi tinzwireiwo tsitsi
D: Tinzwireiwo tsitsi
Chimiso Chechipiri
Jesu anotakudzwa Muchinjikwa
M: Tinokupfugamirai Kristu, tinokurumbidzai.
D: Zvamakanunura vanhu vose noMuchinjikwa wenyu Mutsvene.
Muchinjikwa unorema wakagadzikwa pamapendekete akakuvara aJesu. Anougamuchira norupfave uye kutsunga nokuti ndiwo uchava nzira yokununura pasi nokuzadzisa basa raakatumwa naBaba vake vokudenga.
Munamato:
Jesu, nokuda kweMuchinjikwa wenyu chitigonesai kugamuchira norupfave uye tisingatsutsumwi matambudziko atinosangana nawo muupenyu. Tigare takagadzirira kutakura michinjikwa yedu tichikuteverai.
M: Tenzi tinzwireiwo tsitsiD: Tinzwireiwo tsitsi
Chimiso Chechitatu
Jesu anowa kekutanga nokuremerwa noMuchinjikwa
M: Tinokupfugamirai Kristu, tinokurumbidzai.
D: Zvamakanunura vanhu vose noMuchinjikwa wenyu Mutsvene.
Jesu akadembedzwa nomutoro woMuchinjikwa, anotangisa rwendo rwokuenda kuKarivhari ari mukati mokutukwa nokutsvinyirwa navanhu. Shungu dzomumunda dzarukutisa muviri wake; muviri wose wavaronda rimwe nokurohwa kwaaitwa; haasisina simba; anowira pasi nomutoro weMuchinjikwa unomutsitsirira.
Munamato:
Jesu, napamusana pematadzo edu makatakura mutoro unorema wakakupunzirai pasi. Pfungwa yokutambudzika kwenyu ngaitigonese kugara takarinda kuti tizviponese mukuwira murutadzo rwenjodzi.
M: Tenzi tinzwireiwo tsitsi D: Tinzwireiwo tsitsi
Chimiso Chechina
Jesu anosangana namai vake
M: Tinokupfugamirai Kristu, tinokurumbidzai.
D: Zvamakanunura vanhu vose noMuchinjikwa wenyu Mutsvene.
Jesu anoenderera mberi nerwendo akatakura mutoro weMuchinjikwa, kupunzika kwaaita kwamuwedzera kukuvara. Anosangana namai vake. Uku kusangana kwavaviri kunobata mwoyo! Ibakatwa ramarwadzo makuru rinobaya mwoyo wamai! Mwana akatambudzika zvikuru kuona amai vake vatsvene vachirwadziwa zvakadai.
Munamato:
Jesu, pamusana petsitsi dzamakanzwira amai venyu, tinzwireiwo tsitsi mutipewo reverero yamai venyu. Maria amai makanyanyo rwadziwa, tirevererei kuti nomukutambudzika kweMwanakomana wenyu, tidzikinurwewo kurufu nokusingaperi.
M: Tenzi tinzwireiwo tsitsi D: Tinzwireiwo tsitsi
Chimiso Chechishanu
Jesu anobatsirwa naSimiyoni kutakura Muchinjikwa
M: Tinokupfugamirai Kristu, tinokurumbidzai.
D: Zvamakanunura vanhu vose noMuchinjikwa wenyu Mutsvene.
Jesu apera simba, agomberwa haachakwanisa kuenderera mberi saka masoja anomanikidza Simiyoni weSarini kutakura Muchinjikwa wake. Mutsa weMuchinjikwa, unosandura mwoyo waSimiyoni kuti basa raamanikidzwa rive gomborero nomufaro.
Munamato:
Tenzi Jesu, daiwaro ravewo gomborero redu kutakurawo Muchinjikwa wenyu. Tisatsvage mbiri kune chimwezve chinhu, noMuchinjikwa wenyu nyika ngairovererwe kwatiri nesuwo kwairi. Dai tikasazeza kutambudzika asi kufara mukutambira matambudziko savanhu vanokodzera kutamburira zita renyu.
M: Tenzi tinzwireiwo tsitsi D: Tinzwireiwo tsitsi
Chimiso Chechitanhatu
Vheronika anopukuta Uso hwaJesu
M: Tinokupfugamirai Kristu, tinokurumbidzai.
D: Zvamakanunura vanhu vose noMuchinjikwa wenyu Mutsvene.
Jesu paanoenderera mberi nerwendo, umwe mukadzi anetsiyo nyoro anoveveredza nomukati mavanhu kunopukuta uso hwake nedhuku yake. Somubairo werunamato hwake, Jesu anomutusa nokuita kuti mufananidzo weuso hwake usare wakadhindika padhuku yake.
Munamato:
Jesu, dai kupindawo kwedu muuvepo hwokutambudzika kwenyu kwatipa mutsa wakadzama unotigonesa kuvenga rutadzo nokuvesa moto worudo kwamuri mumwoyo yedu. Mufananidzo weuso hwenyu ngaudhindwe muhana dzedu kusvikira tasandurwa tichifanana nemi.
M: Tenzi tinzwireiwo tsitsi D: Tinzwireiwo tsitsi
Chimiso chechinomwe
Jesu anowa nokutsitsirwa noMuchinjikwa kechipiri
M: Tinokupfugamirai Kristu tinokurumbidzai
D: Zvamakanunura vanhu vose noMuchinjikwa wenyu Mutsvene
Marwadzo amaronda uye kurasa ropa nenhanho yose yaarikuita munzira, zvinoita kuti Jesu ashaye simba. Anowira pasi kechipiri.
Munamato:
Jesu makaputsika kechipiri nokuda kwemutoro wamatadzo edu uye kuda kwenyu kutitambudzikira. Kanganiko katinoramba tichiwira murutadzo! Ngatisarudzei hedu kufa pane kukutadzirai zvakare!
M: Tenzi tinzwireiwo tsitsi D: Tinzwireiwo tsitsi
Chimiso Chechisere
Jesu anonyaradza madzimai eJerusaremu
M: Tinokupfugamirai Kristu tinokurumbidzai
D: Zvamakanunura vanhu vose noMuchinjikwa wenyu Mutsvene
Mamwe madzimai erunamato pavakaona kutambudzika kwaJesu, vakabatwa mwoyo vakaungura kuchema vanhu vachiona. Jesu, nokuziva zvaizowira Jerusaremu pamusana pokumuramba, anotendeukira kwavari achiti: “Madzimai eJerusaremu, musandicheme asi zvichemei imi navana venyu.”
Munamato:
Tenzi Jesu, tinochema uye tichachemera imi nokuzvichemera pachedu; kutambudzika kwenyu kwakasakiswa namatadzo edu. Tidzidzisei kuchema kuti tipinduke nokuponeswa kubva kumugumo weavo vanokurambai, imi Mwari wavo newevanhu vose.
M: Tenzi tinzwireiwo tsitsi D: Tinzwireiwo tsitsi
Chimiso Chechipfumbamwe
Jesu anowa nokutsitsirwa noMuchinjikwa kechitatu
M: Tinokupfugamirai Kristu tinokurumbidzai
D: Zvamakanunura vanhu vose noMuchinjikwa wenyu Mutsvene
Jesu zvino asvika pamusoro peKarivhari. Asi haasati asvika panzvimbo yavanoda kumuroverera. Simba rose rapera, anowira pasi kechitatu.
Munamato:
Tenzi Jesu tinokutetererai napamusana pokuwa kwenyu kechitatu kunorwadza, kuti mutiregererewo kugarowira kwedu murutadzo nokusindimara marwuri. Kufunga nezvekutambudzika kwenyu, ngakuite kuti tirambe tichivenga matadzo edu zvakanyanya.
M: Tenzi tinzwireiwo tsitsi D: Tinzwireiwo tsitsi
Chimiso Chegumi
Jesu anokatanurwa hanzu dzake
M: Tinokupfugamirai Kristu tinokurumbidzai
D: Zvamakanunura vanhu vose noMuchinjikwa wenyu Mutsvene
Zvino Jesu azosvika paGorogota; Vanogadzirira kumurovera paMuchinjikwa. Vanomukatanura hanzu dzake dzose vachimunyomba.
Munamato:
Tenzi Jesu, tinokumbira kuti mutikatanure unyengedzi hose houkuru, manyepo nokuzvitutumadza. Tigonesei muupenyu huno, kuzvidukupisa sezvamakaita, kuti tigozogoverana nemi mumbiri yenyu muupenyu huchauya.
M: Tenzi tinzwireiwo tsitsi
D: Tinzwireiwo tsitsi
Chimiso Chegumi
Nechekutanga Jesu anoroverwa paMuchinjikwa
M: Tinokupfugamirai Kristu tinokurumbidzai
D: Zvamakanunura vanhu vose noMuchinjikwa wenyu Mutsvene
Muchinjikwa unogadzikwa pasi; Jesu anoyanikwa pauri seuriri hwepaachazofira. Nokudzikama koUmwari, anovaregerera nokubvuma kuti vamuroverere paMuchinjikwa. Sando dzezvipikiri dzinoroverwa zvine mutsindo! Ropa rinopfachuka!
Munamato:
Jesu makakarovererwa paMuchinjikwa, sungirirai Muchinjikwa wenyu pamwoyo yedu, kuti tigone kubatana nemi kusvika tazvipa zvizere kwamuri.
M: Tenzi tinzwireiwo tsitsi D: Tinzwireiwo tsitsi
Chimiso Chegumi Nechechipiri
Jesu anofira paMuchinjikwa
M: Tinokupfugamirai Kristu tinokurumbidzai
D: Zvamakanunura vanhu vose noMuchinjikwa wenyu Mutsvene
Jesu akarembera namaoko akabaiwa kwemaawa matatu; Ropa rake rakaerera pamuviri wake senzizi richipinda muvhu; Mukati mokutambura kukuru, anoregerera mhondi dzake achipazve denga kugororo rakanaka nokupa amai vake kune mudzidzi wake. Basa rake rerudo razadzikiswa. Anokotama musoro, opa mweya wake kuna Mwari.
Munamato:
Jesu, tinogamuchira nokugumbatira nokutenda, Muchinjikwa woruponeso wamakatifira kuti tiwane upenyu. Tinokudza Muchinjikwa wenyu tichigamuchirawo norudo michinjikwa yedu. Tibatsirei kuita izvi.
M: Tenzi tinzwireiwo tsitsi
D: Tinzwireiwo tsitsi
Chimiso Chegumi Nechechitatu
Muviri waJesu unoturunurwa paMuchinjikwa
M: Tinokupfugamirai Kristu tinokurumbidzai
D: Zvamakanunura vanhu vose noMuchinjikwa wenyu Mutsvene
Gurumwandira riya ravanhu zvino rabva pachikomo cheKarivhari. Panosara pasina munhu kunze kwemudzidzi wapamwoyo, madzimai orunamato namai vaJesu. Josefa weArimatia naNikodhimasi vanoturunura muviri waJesu paMuchinjikwa, vachiuradzika mumaoko amai vake.
Munamato:
Maria amai vaJesu, makapinda mumarwadzo makuru okushaya chokuita muchiona nzira youmhondi yakauraiwa Mwanakomana wenyu nayo. Kufa nokumuka kwake kwakatiita vana vaMwari nomunaJesu. Tibatsirei nokutireverera kuti tifanane naJesu Mwanakomana wenyu. (Kwaziwai Maria…)
M: Tenzi tinzwireiwo tsitsi D: Tinzwireiwo tsitsi
Chimiso Chegumi Nechechina
Jesu anoradzikwa muguva rinoera
M: Tinokupfugamirai Kristu tinokurumbidzai
D: Zvamakanunura vanhu vose noMuchinjikwa wenyu Mutsvene
Muviri weMwanakomana wavo wadiwa unotorwa kubva mumaoko amai vake navadzidzidzi, vachinouradzika muguva. Guva rinopfigwa, muviri usina upenyu wosara kusvikira nguva yokumuka nembiri.
Munamato:
Tenzi, kutambudzika kwenyu kwapera; makunda, kunyangwe zvazvo mumaziso avanhu zvichiita semakundikana. Chitadzo, rufu negehena zvakurirwa. Nyika ndeyenyu; ini ndiri wenyu. Ivai mambo wemwoyo wangu. Ndinozviturira kwamuri kuti muite sokuda kwenyu. Umambo hwenyu ngausvike.
M: Tenzi tinzwireiwo tsitsi D: Tinzwireiwo tsitsi
Munamato wokupedzisa
Baba vokudenga, tapinda muuvepo hweMwanakomana wenyu Jesu ari munzira yoMuchinjikwa, tiine Mweya waakatipa sechipo.
Tinogamuchirawo nzira yedu yoMuchinjikwa. Tinoziva kuti ichatisvitsawo kwayakamusvitsa; kumuka kwedu pamwe naye. Tinokutendai nomufaro womuono uyu wechitendero.
Zvinangwa zvaPapa …
Baba vedu … (kamwechete) Kwaziwai Maria … (kagumi)
Vakudziwe … (kamwechete)
Chiito chokupfidza
Mwari wangu, ndinokumbira kuregererwa zvose zvandakakutadzirai. Ndinopfidza matadzo angu ose, ndinoasema kupinda zvose, nokuti anokodzera chirango chenyu chinobvundisa, nokuti akasakisa kuti muponesi wangu Jesu Kristu, anondida, arovererwe paMuchinjikwa. Asi zvikuru, nokuti ndakakutadzirai imi, makanaka zvisina mugumo.
Ndinotsunga zvakasimba ndichibatsirwa nenyasha dzenyu, kurega kukutadzirai pakare, nokunzvenga zvose zvinondifurira kukutadzirai. Amen.
Munamato weKutangisa Rusariro
Hosi yoRusariro, makafadzwa nokushanyira Fatima neMachigori, kwamakazviratidza kune vana vatatu vaive vafudzi, nokunezve vamwe vatanhatu vakaona chiratidzo chenyu. Makavaratidza upfumi hwenyasha dzakachengetedzwa muRusariro. Pinzai mumwoyo wangu rudo rwechokwadi rwokuzvipira kunamata Rusariro, kuti nomukufunga nokunamata zvakadzama zvarwunotiyeuchidza nezveZvakaratidzwa zvokununurwa kwedu, ndigone kuwanira nyika rugare, vatadzi vatendeuke uye ini ndiwanewo zvandinokumbira izvi … (isa mikumbiro yako). Ndinokumbira izvi mumbiri huru yaMwari, kuti imi muremekedzwe uye kuti vanhu vose pamwe neni, tiitirwe zvakanaka. Amen.
Muzita raBaba neraMwanakomana neroMweya Mutsvene, Amen.
Chipupuriro cheChitendero Chavapositori
Ndinotendera Mwari Baba vanamasimba ose, musiki wedenga napasi. Ndinotendera Jesu Kristu, Mwanakomana wake mumwechete Tenzi wedu. Akazvarwa naMaria Mhandara Tsvene nesimba raMweya Mutsvene. Akatongerwa kutambudzika naPonziyo Pirato, akarovererwa paMuchinjikwa, akafa, akavigwa, akaenda kuvafi. Akamuka nezuva retatu. Akwira kudenga kwaagere kurudyi rwaMwari Baba vanamasimbaose. Achabvako kuzotonga vapenyu navafi. Ndinotendera Mweya Mutsvene, Sangano dzvene Katorike, kubatana kwavatsvene, kuregererwa kwamatadzo, kumuka kwomuviri, noupenyu husingaperi. Amen.
Baba vedu muri kudenga, zita renyu ngarinamatwe; umambo hwenyu ngausvike, kuda kwenyu ngakuitwe, pasi sokudenga. Tipeiwo nhasi kudya kwedu kwezuva, mutiregererewo zvatakakutadzirai sokuregerera kwatinoita vakatitadzira, musatirege tichiwira mune zvinotiedza, asi mutinunure kune zvakaipa.
Kwaziwai Maria muzere nyasha, Tenzi anemi, makakomborerwa pana vakadzi, akakomborerwa Mwana wemimba yenyu Jesu, Maria Mutsvene, amai vaMwari, mutireverere isu vatadzi, zvino napanguva yekufa kwedu. Amen.
Maria mutsvene amai voMwanakomana wadiwa, wedzerai chitarisiro chedu
– 1 Kwaziwai Maria
Kwaziwai Maria, temberi inopenya yaMweya Mutsvene dzamisai rudo matiri
– 1 Kwaziwai Maria
Vakudziwe Baba naMwanakomana naMweya Mutsvene, sezvakanga zviri pakutanga nazvino nakare kose nemisi isingaperi. Amen.
ZVAKARATIDZWA ZVECHITENDERO ZVEMIFARO
1. Mutumwa Gabhurieri akaparidza kuna Maria
(Munamato uyu unoitwa musi weMuvhuro, Mugovera, MaSvondo ose okugadzirira Kuuya kwoMuponesi [Advent], uye maSvondo kubvira Kuzviratidza kwaJesu kune vokunze (Epiphany) kusvika pamwaka woKutsanya (Lent)
Ngatipindei muuvepo hwezvakaratidzwa zvechitendero, apo Mutumwa Gabhurieri anokwazisa amai vedu vakakomborerwa nezita rokuti: “Muzere nyasha”, nokuvaparidzira zvokuva munhu kwaTenzi wedu Jesu Kristu.
Kwaziwai Maria, muzere nyasha, makabvuma zvakanakisisa uye zvizere, kushanda pamwe naMwari. Amai Maria, tiwanireiwo simba rokuti tigone kuti “hongu” kuurongwa hwaMwari.
1 Baba vedu … 10 Kwaziwayi Maria … 1 Vakudziwe …
Munamato wepaFatima: Jesu wangu, tiregerereiwo matadzo edu, mutidzivirire kumoto muzhinji, itai kuti mweya yose iende kudenga, zvikuru iyo inoda tsitsi dzenyu kwazvo.
2. Maria akashanyira hama yake Erizabheti (Ruka 1: 39-43)
Ngatipinde muuvepo hwezvakaratidzwa apo Maria Mhandara Tsvene, mushure mokuziviswa nomutumwa nezvepamuviri pehama yake Erizabheti, anoenda kunogara naye kwemwedzi mitatu.
Amai muzere nyasha, pamakakwazisa Erizabheti, iye nomucheche aive munhumbu make vakabva vazadzwa naMweya Mutsvene. Tipeiwo gomborero rokuti tigamuchire Mweya Mutsvene.
1 Baba vedu … 10 Kwaziwayi Maria … 1 Vakudziwe … (Munamato wepaFatima) …
3. Maria akapona Jesu (Ruka 2:7)
Ngatipinde muuvepo hwezvakaratidzwa, apo nguva yokuti Maria Mhandara Tsvene asununguke yakakwana. Akapona Mununuri wedu Jesu Kristu pakati pousiku, ndokumuradzika muchidyiro chezvipfuwo nokuti pakanga pashaikwa imba yavaenzi kuBheterehemu.
Amai Maria, makapona Jesu mudanga nokuti makanga mashaiwa imba. Ndinamatirei kuti ndisazomboda mumwe munhu kupfuura Jesu.
1 Baba vedu .. 10 Kwaziwayi Maria … 1 Vakudziwe … (Munamato wepaFatima) …
4. Jesu akagamuchidzwa mutemberi (Ruka 2: 22-33)
Ngatipinde muuvepo hwezvakaratidzwa, apo Maria Mhandara Tsvene akaenda nomucheche Jesu kutemberi kundomuchenura. Simiyoni akanga akarurama, anotora mucheche mumaoko ake, achitenda nokurumbidza Mwari.
Sokugamuchidza kwamakaita Jesu mutemberi, tigamuchidzeiwo isu pamwe navadikani vedu kuna Baba, kuti tigogarawo tichirumbidza Mwari wedu.
1 Baba vedu … 10 Kwaziwayi Maria … 1 Vakudziwe … (Munamato wepaFatima) …
5. Jesu akawanikwa mutemberi (Ruka 2: 41-52)
Ngatipinde muuvepo hwezvakaratidzwa, apo Maria Mhandara Tsvene mushure mokurasikirwa noMwanakomana wadiwa kwamazuva matatu, anozomuwana ari mutemberi agere pakati pavadzidzisi, achiteerera zvavaitaura nokuvabvunzawo mibvunzo kunyangwe zvazvo aingova namakore gumi namaviri okuberekwa.
Mushure mokufamba rwendo rwomuswere wezuva, makashaya Jesu mukati mehama neshamwari mukadzokera kunomutsvaga. Amai, itai kuti isuwo tigare takamuchengetedza kuti tikazomushaya, tichimbidze kumutsvaga nokumuita wedu nokusingaperi.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
ZVAKARATIDZWA ZVECHITENDERO ZVECHIEDZA
(China choga mukati megore rose)
1. Kuombekwa kwaJesu (Mateu 3:13-17)
Ngatipinde muuvepo hwezvakaratidzwa apo Jesu anoombekwa murwizi Jorodhani; matenga akazaruka Mweya Mutsvene akaburukira paari. Ichi ndicho chakava chiratidzo kuna Johani kuti Uyu ndiye aiuya kuzoombekwa naMweya Mutsvene.
Tenzi Jesu, tizodzeiwo naMweya Mutsvene.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
2. Chiratidzo chaJesu pamuchato wekuKana (Johani 2:1-12)
Ngatipinde muuvepo hwezvakaratidzwa, apo Jesu akaita chishamiso mushure mokukumbirwa naamai vake, kuitira kuti vachati vasanyadziswe nokuperevedza kwewaini.
Tenzi Jesu, tinokutendai kuti makatipa amai venyu kuti vave amai nomurevereri wedu.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
3. Jesu anoparidza umambo hwaMwari (Mateu 4:17)
Ngatipinde muuvepo hwezvakaratidzwa hweShoko raMwari rakaratidzwa muupenyu hwaJesu.
Tenzi Jesu, apo patinopinda muuvepo hweShoko renyu rinogara nokusingaperi, tipeiwo nyasha dzinotiita zvapupu zveUmambo hweyu.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
4. Jesu anosanduka pagomo (Ruka 9: 28-35)
Ngatipinde muuvepo hwezvakaratidzwa apo Jesu akakwira navadzidzi vake mugomo maakanozviratidza kwavari.
Tenzi Jesu, itai kuti tose tive neukama hwakadzama nemi. Tikuonei, tikunzwei uye tikubatei kuti mutisimbaradze kuitira mazuva achauya.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
5. Jesu chingwa choupenyu (Ruka 17: 17-20)
“Hakuna rudo runopfuura urwu rwokuti munhu anofira shamwari dzake.” (Johani 15:13)
Ngatipinde muuvepo hwezvakaratidzwa hwerudo rukuru rwaJesu pakutipa muviri neropa rake sechokudya chedu.
Jesu ndimi upenyu nesimba rangu. Hamuna kuzvinyima asi murudo rwenyu makazvipa zvizere kwandiri. Ndibatsirei kuti iniwo ndigone kuitira vamwe.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
ZVAKARATIDZWA ZVECHITENDERO ZVINOISVOSUWISA
(Ita musi weChipiri, Chishanu uye mazuva ose kubvira pazuva reChitatu Chamadota kusvika pazuva rokumuka kwaJesu)
1. Jesu anotandadza mumunda (Ruka 22: 39-44)
Ngatipinde muuvepo hwezvakaratidzwa, apo Tenzi Jesu Kristu anotirwadzirwa mumunda weGetsemani zvokuti muviri wake unochururuka dikita reropa.
Jesu, Tenzi noMudzidzisi wangu, imi makanamata kuna Baba kuti vabvise mukombe wokutambudzika kwenyu, asi makachimbidzazve kuti “asi kusave kuda kwangu asi kuda kwenyu ngakuitwe.” Tenzi ndidzidzisei kuti kana ndichinge ndapindawo mumarwadzo ndinamate sezvamakaita uye ndigamuchire kuda kwaBaba.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
2. Jesu akapurwa pamutsigo (Mariko 15: 15)
Ngatipinde muuvepo hwezvakaratidzwa apo Tenzi wedu Jesu Kristu anoturirwa kuna Pirato, uyo anobva amuisawo mumaoko amasoja ake ane utsinye. Masoja anosungirira Jesu pamutsigo pavanomupura pamadiro.
Pirato akashaya mhosva pamuri asi zvakadaro akatuma masoja ake kuti akurovei. Makanga musingakodzeri izvi asi makagamuchira kurangwa uku. Isuwo tikarangwa uye kunyombwa pasina chatatadza, Tenzi tipeiwo simba rokugamuchira nokupira matambudziko edu madiki aya, pamwe nokutambudzika kwenyu, kuti pasi rose riponeswe.
1 Baba vedu … 10 Kwaziwayi Maria … 1 Vakudziwe …(Munamato wepaFatima) …
3. Jesu akagadzwa ndaza yeminzwa (Mateu 27: 29-30)
Ngatipinde muuvepo hwezvakaratidzwa, patinoona vashandiri vasatani vane utsinye vachiruka ndaza yeminzwa dzakatesvera nokuidzika pamusoro unoera waTenzi vedu Jesu Kristu.
Jesu, imi ndimi mambo wedenga napasi anokodzera kupfeka ndaza yematombo akakosha uye anodhura, asi makabvuma kugadzwa ndaza yeminzwa mumusoro wenyu. Tenzi makabvuma kunyadziswa kwose uku, muchiitira ini. Itai kuti ndirege kukurwadzisai zvakare nokurwadzisa kana kunyomba vamwe.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
4. Jesu anotakura Muchinjikwa (Ruka 23: 23-25)
Ngatipinde muuvepo hwezvakaratidzwa, apo Tenzi wedu Jesu Kristu anotongerwa kufa, asi nomwoyo murefu unoshamisa, anobvuma kutakura Muchinjikwa unogadzikwa paari unova rwadzo guru nekunyadziswa.
Muchinjikwa wamaive musingakodzeri wakaiswa pamuri. Ndipeiwo simba rokugamuchira nomufaro matambudziko andisingakodzeri.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
5. Jesu akarovererwa paMuchinjikwa (Johani 19:17)
Ngatipinde muuvepo hwezvakaratidzwa, apo Tenzi wedu Jesu Kristu anokatanurwa hanzu dzake dzose, maoko netsoka dzake zvichirovererwa noutsinye paMuchinjikwa, apo paanofa mumaziso maamai vari mukurwadziwa.
Tenzi Jesu, makataura nokududza pachena kuti “zvapera”. Tenzi tipeiwo simba raMweya Mutsvene kuti tigonewo kupedza basa rinoturirwa kwatiri, tigodzokororawo mazwi enyu tichiti, “Tenzi zvapera”.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
VAKARATIDZWA ZVECHITENDERO ZVEMBIRI
(Musi weChina uye musi weSvondo gore rose)
1. Jesu Kristu akamuka muvafi (Mateu 28: 1-7)
Ngatipinde muuvepo hwezvakaratidzwa apo Tenzi wedu Jesu Kristu anokunda rufu, achimuka nezuva retatu aine mbiri nomuviri usingafi.
Tenzi makamuka muvafi, tibatsirei kuva pamusoro pezvatinofunga, kuona kana kunzwisisa, kuitira kuti nyangwe pachiratidza sepasina chiri kuitika, titendere kuti zvose zviri kutoitika.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
2. Jesu Kristu akakwira kudenga (Mabasa 1: 9-11)
Ngatipinde muuvepo hwezvakaratidzwa apo Tenzi Jesu Kristu mushure memazuva makumi mana amuka kuvafi, anokwira kudenga amai vake vatsvene, vapositori navadzidzi vachiona.
Tenzi makadzokera kumusha wokudenga kuti munotigadzirira nzvimbo. Tibatsirei kugara munyika ino takaringa pamuri.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
3. Mweya Mutsvene akaburukira pana vapositori
(Mabasa 2: 1-12)
Ngatipinde muuvepo hwezvakaratidzwa, apo Tenzi wedu Jesu Kristu agere kurudyi kwaMwari, anotumira Mweya Mutsvene kuvapositori sokuvimbisa kwaakange aita. Mushure mokukwira kwake kudenga, vapositori vakanga vadzokera kuJerusaremu uko kwavakaramba vachinamata nokuteterera vari pamwe naMaria Mhandara Tsvene, kuti vagamuchire zvavakavimbiswa.
Mweya Mutsvene, burukirai patiri sezvamakaita pazuva rePendekosti, mutisandure zvizere kuti tive vadzidzi venyu kunosvika kunyangwe kumiganhu yapasi.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
4. Maria mutsvene akakwidzwa kudenga
(Zvakadzikwa musangano musi wa 1 Mbudzi 1950 naPapa Payasi XII)
Ngatipinde muuvepo hwezvakaratidzwa, apo Maria Mhandara Tsvene ine mbiri, mushure memakore mazhinji Mwanakomana wake akwira kudenga, iyewo akamutevera achibuda pano panyika. Muviri nomweya wake zvakapinzwa kudenga achiperekedzwa navatumwa vatsvene.
Amai Maria tireverereiwo, mutiwanire kuchena pamuviri, hana nomweya.
1 Baba vedu … 10 Kwaziwayi Maria … 1 Vakudziwe …
(Munamato wepaFatima) …
5. Maria mutsvene akagadzwa uHosi hwedenga
(Zvakaratidzwa 12:1)
Ngatipinde muuvepo hwezvakaratidzwa, apo Maria Mhandara Tsvene ine mbiri, akapinzwa mumhemberero yomufaro nokusimudzirwa nechita chedenga, Mwanakomana wake achimupfekedza ndaza yembiri inobwinya, vatsvene vose vachipembera mumufaro wake.
Hosi yedenga napasi, tikumbirirei kune Mwanakomana wenyu Jesu kuti pasi rose risvike pakutenda maari.
1 Baba vedu … 10 Kwaziwayi Maria … 1 Vakudziwe … (Munamato wepaFatima) …
KWAZIWAI HOSI TSVENE
Kwaziwai, Hosi Tsvene, Amai vetsitsi, rupenyu, runako, nechitarisiro chedu, kwaziwai! Tinochema kunemi, tiri vana vakatandwa vaEvha. Tinokutetererai, tichigomera, tichichema, tiri mumupata wemisodzi. Tinzweiwo imi, murevereri wedu, mutiringewo nameso enyu etsitsi. Mutiratidze tafa, Mwana akakomborerwa wemimba yenyu, Jesu. Maria Mhandara Tsvene, makapfava, makanaka, makanakisisa.
M: Tireverereiwo, amai vatsvene vaMwari.
V: Kuti tikodzereswe kuwana zvatakapikirwa naKristu.
Ngatinamatei
Mwari Baba, tipeiwo simba rokuti tirambe tichifunga upenyu, kufa nokumuka muvafi kwaTenzi wedu Jesu Kristu, nokuti izvi ndizvo zvatinorangarira nguva yose yatinonamata rusariro rwamai vedu Maria Mhandara Tsvene. Uyezve tinokumbirawo simba rokutevera gwara raTenzi kuti tigowana makomborero aakatitsidzira. Kristu Tenzi wedu tisvitsireiwo izvi kunemi. Amen.
Mainini vakabikira babamunini datya
Maiguru vaigara nababamudiki, bofu. Zvino rimwe zuva maiguru ava vakabika hove. Pavaida kupakura vakaona kuti hove paizoshota yemunhu mumwe chete. Saka mumoyo mavo vakati rega ndibikire babamunini umwe muriwo. Sezvo vasingaoni, havazozivi kuti vamwe vadya nehove. Vari mushishi kuti vobikirei babamunini, vakaona dafi kwakuriuraya ndokubva vabikira babamunini vavo. Pakupakura mundiro dzevamwe, vakaisa hove asi mundiro yababamunini bofu vakaisa datya.
Babamunini pakudya vakaseva muto wedafi vachibva vakanda mukanwa ndokutsenga nokumedza. ZVinoita sokunge muto wedatya wakabva wanosvinudza maziso avo. Vakakwakuka nemufaro ndokudaidzira, ‘Maiguru ndavakuona.’ Zvikanzi, ‘Maoneiko,’ namaiguru. Babamunini ndokuti ‘Pandangodya muto uyu maziso angu avhurwa. Ndiri kutoona kuti vamwe vari kudya nehove ini ndine dafi. Ah! Maiguru maita basa marapa maziso angu.’
Vadikani paunoitirwa chakaipa ziva kuti chikomborerochaunenge uchipiwa naMwari. Maiguru vakaita chakaipa asi vakaropafadzisa babamunini. Kubanha dafi kuriyambutsa. Saka ndinoti kwamuri ivai nomufaro bedzi kana muchipinda mukuedzwa, muchiziva kuti miedzo iripo kuitira kuti mutsungirire panaShe wedu.
Dzidziso: Miedzo, utsinye, makomborero.
Tamuka anowedzera kukura poto asingawedzere mvura
Tamuka aigara nambuya vake. Yakati yasvika nguva yokubika, iye ndokugadza poto yevanhu vaviri. Isati yamboti yadii, ‘gogogoi,’ pakasvika vaenzi vaviri. Mbuya vakamuti achiisa poto yavanhu vana, akaita saizvozvo. Pasina nguva pakasvika vamwe vanhu vatatu. Mbuya vakarairazve, mwanasikana akagadza poto yavanhu vanomwe.
Hapano sadza raibva, chakashamisa ndechokuti raingokwana vanhu vaviri bedzi. Chii chakanga chaitika? Musikana aingochinja poto chete asi asingawedzeri mvura!
Zvino hoyo mubvunzo kwauri mutendi, nhasi uno. Hausi kungoshandura dzikereke navafundisi uchipedza nyika here asi usiri kuwedzera kunamata kwako? Haisi nyaya yekuchinja poto chete asi zviri mukati mepoto?
Shanduko ngaitangire mumoyo mako!
Dzidzo: kushandisa pfungwa, kushandura unhu, kusandura maitiro.
Hwindi nemwana vanotsvaga nzvimbo yechikoro
Hwindi anoenda pachikoro nemwana wake pachikoro chepadyo kunotsaga nzvimbo yegiredhi yokutanga. Mukuru wechikoro anoti ‘Ndine urombo pakazara.’ Mwana anobva azevezera achiti ‘Dhedhi, vaudzei kuti ndinodzidza ndiri pakadoma.’
Kundiso
Shadhireki, Misheki naAbhedhinigo havana kunamata kuti moto usabatidzwe. Minamato yavo yaisava yokuti dambudziko risauye asi yokuti moto ngaubatidzwe, Mwari vagoonekwa mukati mawo. Ini hangu handinamati kuti ndisasangana namatambudziko muupenyu asi ndinoti ‘Pakuuya kwamatambudziko Tenzi onekwai.’ Dhanyeri haana kuita munamato wokuti shumba dzife kana kuti asakandwe mugomba asi akati Tenzi nemugomba imomo mune shumba simba renyu ngarionekwe.
Vanhu vangakukanda mumakomba, vangakurongera zvakaipa asi tina Tenzi anozviratidza. Vakakukanda ivavo ndivo vachakuburitsa muzita raJesu.
Pauro naSirasi, vasungwa, vari mujeri; havana kuita minamato yokuti majeri aondomoke asi vakangorumbidza Mwari pamwechete nekuimba nziyo.
Hapana dambudziko rine simba rekukuchemedza. Kuti bara riende mberi tiriga inofanira kudhonzerwa shureNyange muupenyu hwako, kuti utonhe nhano nhatu dzekuenda mberi zvinogona kutora nhanho imwehete yokudzokera shure. Kunyange dombo rerekeni kuti riende mberi rinotanga radhonzerwa kumashure. Kubva nhasi ziva kuti chese chichakudhonzera kumashure chinenge chichitokupa simba rekuenda mberi. Hapana chichakuwisira pasi. Uchazanzisa zvinangwa zvako. Uchakunda muupenyu. Uri mukundi. Zvinouya ngazviuye asi Tenzi achakukundisa mazviri zvose muzita raJesu.
Jaya remubhucha nechidhakwa Chidhakwa chakapinda mubhucha ndokuti tanga kutaura nejaya raivemo:
Chidhakwa: Huku imarii mfana?
Jaya: Tinoisa pachikero toona kuti imarii?
Chidhakwa: Ndiisire huku yose.
Jaya rakaenda seri kufiriji ndokuona inga kwasara huku imwechete yakazara. Akaitora ndokusvikoiisa pachikero:
Jaya: Yaita $6 mdhara. Chidhakwa: Yaita diki, tsvaga zihombe pane dzese.
Jaya rakatora huku iya ndokudzokera nayo richinyepedzera kunge ririkunotora yakati kurei. Akadzoka nehuku imwecheteyo ndokuiisa pachikero:
Jaya: Zvaita Mdhara, huku iyi yaita $7,50.
Chidhakwa: Huku dzako idiki mfana. Zvisinei, chindipa dzose dziri mbiri
CHokwadi chichakusunungura!
Dzidziso: chokwadi, nhema, utsotsi, kuvimbika.
Ziva maitiro anodiwa pakafanira
Mwana akatengerwa bhutsu dzakakurisa kuna baba vacho kuti bhutsu ihombe, asi baba vacho vakati, ‘Usazvinetsa, unoisa matishu kana kuti mapepa kumberi.’ MWana akaita saizvozvo zvikashanda. Pava paya mwana akatengera mudhara
wake mapata-pata akakurisa zvikanzi nababa, ‘Hauone here kuti handikwane mapata-pata aya?’ mwana ndokuti, ‘Musazvinetsa baba, munoisa matishu kana kuti mapepa kumberi.’ Dzimwe nguva pane nzira dzatinoshandisa tichibudirira, asi dzigotadza kushanda pane dzimwe nguva nezvimwe zviitiko.
Hadzizi shangu dzese dzinoiswa matishu kana mapepa. Ziva pokutsanya, pamwe panoda kuti uendese girosari kuna baba namai vako. Ziva pokunamata, kumwe kunetsana kunoda kuongorora matauriro aunoita, mapinduriro aunoita mumwe wako. ZIva maitiro okushandisa pakafanira.
Iva noungwaru hwokunzwisisa mhinduro inodiwa. Ziva chipanera chinomononnora bhaudhi rauri kuda kwete kuti chipanera chebhasikoro ndicho chinokumura mabhaudhi epavhiri regonyeti!
Mufaro
Vazhinji vanopesanisa purezha nomufaro,
Asi pane musiyano mukuru pakati pazvo.
Ukasaziva musiyano wacho,
Unenge usati watanga kurarama.
Vakaraidza mufaro wechokwadi vanonyumwa vakaona purezha,
Nokuti nguva zhinji purezha mucherechedzo worufu rwomufaro. Continue Reading
MINAMATO KUNA MWEYA MUTSVENE
Veni Creator Spiritus
Uya Mweya Mutsvene, uyai Musiki
kubva kuchigaro chenyu chedenga chinobwinya.
Uyai muve muridzi womweya yedu,
muiite yenyu yose.
Imi munoinzi Munyaradzi
chipo chikuru chaMwari ari kumusoro,
tsime mhenyu, moto mupenyu
chizorwa chakanaka norudo rwechokwadi.
Imi mune nyasha dzakapetwa kanomwe,
munwe woruoko rwaMwari rworudyi;
Vimbiso yake inodzidzisa vaduku
kutaura nokunzwisisa.
Tungamirai pfungwa dzedu nechiedza chenyu chakaropafadzwa,
zadzai mwoyo yedu norudo;
uye nesimba renyu risingafi rakaora,
batsirai mitumbi yedu inofa.
Dzingirai kure nesu vavengi vedu vanotyisa;
unzai matiri rugare rwechokwadi;
uye titungamirei muchitidekadza munjodzi dzose
tiri pasi pemapapiro enyu anoera.
Nomamuri ngatizive Baba,
Nomamuri ngatizive Mwana,
ngatizivewo imi Mweya wavo vose,
Utatu Hutsvene Humwechete.
Mbiri yose kuna Baba,
noMwanakomana akaenzana navo;
nekwamuriwo imi Mubatsiri mukuru
nemisi isingaperi.
Veni Sancte Spiritus
Uyai Mweya Mutsven, uyai!
Kubva kumuzinda wenyu wedenga
muritsai miseve yomwenje wenyu!
Uyai baba vavarombo!
Uyai,mabviro ezvichengetwa zvedu!
Uyai mupenye mumwoyo yedu.
Imi munyaradzi mukuru;
Imi mueni mukuru womweya.
Museredzero unonakidza pano pasi.
Zororo rinofadza mukushanda kwedu;
Matendo anotonhodza mukutsva;
Nyaradzo padambudziko.
Chiedza chikuru choUmwari
Vhenekerai mwoyo yavenyu
muzadze mukati-kati medu!
Musipo hapana chatinacho.
Hatina chakanaka muzviito nomukufunga,
Hatina chisina mhororodzi yourwere.
Rapai maronda edu, vandudzai simba redu;
Pakuomarara kwedu dirai dova renyu;
sukai mhororodzi dzemhosva.
Tyorai moyo yedu nepfungwa dzedu dzakaomarara;
Nyungudutsai zvakatonhora, dziisai zvinekachando;
tungamirirai tsoka dzinorasika.
Pavatendi vanoremekedza nokutenda mamuri,
chipo chenyu chakapetwa kanomwe burutsirai.
Vapei mubairo wounaku;
Vapei ruponeso rwenyu, Tenzi;
Vapei mifaro isingaperi. Amen.
Munamato kuna Mweya Mutsvene
Mutungamiri: Uyai Mweya Mutsvene, zadzai mwoyo yavenyu muvese moto wechido mavari.
Vhesi: Tumai Mweya wenyu, zvinobva zvasikwa.
Daviro: Muchitobazve mavandudza pasi.
Ngatinamatei:
Mwari makadzidzisa mwoyo yavenyu nechiedza chaMweya Mutsvene; itai kuti nechipo chaMweya iyeyu , tiwanerunzwisiso rwechokwadi munazvose uye tigare mumufaro wekutinyaradza kwaanotiita, nomuna Kristu Tenzi wedu. Amen.
NOVHENA KUNA MWEYA MUTSVENE
(Mukati memazuva mapfumbamwe kubvira pakukwira kwaTenzi vedu kudenga kusvikira pakuuya kwaMweya Mutsvene chipo chaakavimbisa, vadzidzi vaJesu vainge vakaungana vachinamata pamwe naMaria amai vaJesu)
Uyai Mweya Mutsvene, pindai muzadze mwoyo yavatendi venyu; muvese moto wechido chenyu mavari. Tumai Mweya wenyu zvose zvinobva zvasikwa; Imi munobva mavandudza pasi.
Vakudzwe Baba …
Panotevera munamato wezuva kozouya zvinotevera:
Rudo rwaMwari rwakadururirwa mumwoyo yedu naMweya Mutvene anogara matiri.
Mwari makadzidzisa nechiedza chaMweya Mutsvene, mwoyo yavanotenda mamuri. Itai kuti nechipo chaMweya iyeyu tigare muchokwadi choungwaru nomufaro wokunyaradza kwaanotiita, nomuna Kristu Tenzi wedu. Amen.
Tenzi, itaiwo kuti simba raMweya Mutsvene matiri, richenese mwoyo yedu nokutidzivirira kunjodzi dzose; nomuna Kristu Tenzi wedu. Amen.
Munamato: Zuva rokutanga
Uyai Mweya Mutsvene,
Imi munyaradzi akanakisa wemwoyo inosurikirwa, diziro munjodzi, mudziviriri mumatambudziko.
Uyai Mweya Mutsvene,
Imi munochenesa mweya nokubvisa tsvina uye munoporesa pose pane ronda.
Uyai Mweya Mutsvene, simba revakaneta, rubatsiro rwevarikuputsika.
Uyai Mweya Mutsvene, mudzidzisi wemwoyo inozvininipisa; munodukupisa vanozvitutumadza mumwoyo.
Uyai Mweya Mutsvene,
Baba venherera, tarisiro yavarombo, mudzidzisi wavanoshaya.
Uyai Mweya Mutsvene,
Nyenyedzi inotungamirira vapenyu vose, ruponeso rwavakarofa.
Uyai Mweya Mutsvene,
Ndinzwireiwo tsitsi.
Munamato: Zuva rechipiri
Ndifemereiwo Imi Mweya Mutsvene, kuti ndifunge zvitsvene.
Shandai mandiri Imi Mweya Mutsvene, kuti mabasa angu ave matsvene.
Kwezverai mwoyo wangu Imi Mweya Mutsvena, kuti ndide chete zvinhu zvitsvene.
Ndisimbaradzeiwo Imi Mweya Mutsvene, kuti ndirwire zvitsvene zvose.
Ndichengetedzei Imi Mweya Mutsvene, kuti ndigare ndiri mutsvene.
Munamato: Zuva rechitatu
Mweya Mutsvene kwazvo murevereri, onai ndinozvivanzaridza pamberi penyu. Ndinokupfugamirai norudo rwakadzama. Ndinokutendai zvikuru nokukurumbidzai pamwe nechita chikuru chavavatumwa vaserafi vanomira pamberi pechigaro chenyu.
Iniwo ndino danidzira ndichiti, “Munoera, Munoera, Munoera”. Ndinotsidza kutenda kuti Imi muri Mwari muhumwe naBaba naMwanakomana. Ndinotarisira kuti murunako rwenyu, muchandinatsa uye muchaponesa mweya wangu.
Ndinokudai Imi Mwari Rudo nomwoyo wangu wose uye kupinda zvose zviri panyika, nokuti imi moga ndimi runako rusina mugumo, munokodzera kudiwa kwazvo.
Muupofu uye kusatenda kwangu, ndinogaro kukanganisirai nezvitadzo zvangu. Ndinokumbira kuti mundiregererewo. Ndinokupai mwoyo wangu uyu wakasviba usina rudo, ndichikumbira kuti muuvhenekere nechiedza chenyu uye muudziise nemoto worudo rwenyu.
Munamato: Zuva rechina
Mweya Mutsvene mupi worudo, imi makaburukira pana vapositori muri mumhepo ine simba nemumoto, makazadza imba yavaive mukavapa chipo chendimi kuti vaparidze kushamisa kwaMwari, chiburukiraiwo muneni.
Ndizadzei nemweya wenyu mundiite tembere yenyu yamunogara. Vhurai muromo wangu kuti ukurumbidzei, ukumbire kutungamirirwa nemi uye usarudze rudo rwenyu. Chiedza chitsvene, mwenje mutsvene, simba risingagumi, jekeserai pfungwa dzangu kuti dzikuzivei; zadzai mwoyo wangu kuti ukudei; simbisai chido changu kuti ndikutsvagei nekukuwanai.
Ivai kwandiri femo mhenyu raMwari rinondipa upenyu, rinondipa mweya wandinofema, denga rangu rinotandarira mweya wangu.
Munamato: Zuva rechishanu
Mweya Mutsvene, Mweya waMwari wechiedza norudo, ndinoteketera kwamuri, runzwisiso rwangu, mwoyo wangu, kuda kwangu nazvose zviri mandiri zvino nokusingaperi.
Daiwaro ndaisa runzwisiso rwangu pasi pezvose zvandinonyeverwa nedenga uye zvandinodzidziswa neSangano dzvene iro rinemi somutungamiri kuchokwadi. Itaiwo kuti mwoyo wangu ugare uine moto wechido kuna Mwari wangu nokunevamwe. Kuda kwangu, kugarowirirana nokuda kwaMwari.
Daiwo upenyu hwangu hwose, hukatodza nokutendeka, upenyu netsika dzakanaka dzaTenzi nomuponesi wedu Jesu Kristu uyo anogara achikudzwa nokurumbidzwa pamwe naBaba, kwemisi isingaperi. Amen.
Munamato: Zuva rechitanhatu
Mweya Mutsvene, munogara pamwe naBaba naMwanakomana, itai kuti denga napasi rose zviteketerwe kwamuri uye kuti mumwoyo yose yamugere imi rudo, itongwe norugare nohumwe.
Mweya Mutsvene musiki, tarisai norupfave sangano, nesimba renyu rokudenga mugoripa simba nekurichengetedza parinorwiswa nemhandu. Vandudzai muchido nenyasha mweya yavaranda venyu vamakazodza kuti vape mbiri kwamuri pamwe naBaba noMwanakomana wavo mumwechete oga.
Mweya Mutsvene, Mweya wechokwadi, uyai mupinde mumwoyo yedu muvhenekere marudzi ose nechiedza chenyu kuti tose tive nechitendero chimwechete chinokufadzai.
Munamato: Zuva rechinomwe
Mweya Mutsvene, rudo rusina mugumo rwaBaba naMwanakomana, nomuna Maria nepaatari yomwoyo waJesu, ndinokupai Tenzi, mabasa angu amazuva ose. Mashongedzei nomweya worudo rwepaMuchinjikwa.
Ndinokupai upenyu hwangu, kufa, musoro nemaoko angu, nhano yose yandinofamba, femo rangu rose, rudo rwose rwemweya wangu, kurova kwehana yangu, ndichitsidza nokutenda kuti ndichagaroteerera izwi renyu munazvose nokuita kuda kwenyu.
Munamato: Zuva rechisere
Ndinopfugama pamberi penyu Imi Mweya unogara narinhi, chita chose chedenga chichiona, ndichikupai muviri nomweya wangu. Ndinopfugamira mbiri yenyu huru. Ndinofara mukupenya kweukuru hwenyu uye chishamiso chesimba rorudo rwenyu.
Ndimi chiedza nesimba romweya wangu. Mamuri ndinogara nokurarama. Ndinoramba kuzokurwadzisai nokusatendeka kunyasha dzenyu. Ndinokumbira kuti mundichengetedze ndisakutadzirei. Itai kuti nditendeke kwamuri muna zvose nguva dzose. Muitezve kuti ndinzwe izwi renyu nokuteerera zvamunoda kuti ndiite.
Ndinokumbira kuti mundigonese kugara ndakatarisira kuchiedza chenyu nokubvuma kutungamirwa nenyasha dzenyu. Ndinozvidzemetedza pamuri ndichikumbira kuti mutsitsi dzenyu, mundichengetedzewo kuutera hwangu.
Munamato: Zuva rechipfumbamwe
Mweya Mutsvene, Mweya waJesu, makamuzodza pamusi wokuombekwa kwake naJohani, makazodza sangano rinova ndiro muviri wake nomoto pakuburukira kwenyu zuva rePendekosti, zvino burukiraiwo pasangano renyu uye napane avo vakateketerwa kwamuri, vose vakakugamuchirai pavakaombekwa, vose vakabatwa nemi pakusimbiswa, naavo vose vamakatsaura kutivavevapristi vanoshandira Mwari navanhu vose.
Tivandudzei nenyasha dzose dzatakanatswa nadzo, mutishambidze kuzvivi zvedu, tigova temberi dzenyu dzinokodzera kuti mugare. Itai kuti tikudei norudo rwunodirwa mumwoyo yedu nokuuya kwenyu kwatiri.
MUNAMATO KUNA MWEYA MUTSVENE
Mweya Mutsvene, ndimi wechitatu muUtatu Hutsvene hwaMwari! Ndimi Mweya wechokwadi noutsvene, munobva munaBaba noMwanakomana, makangoenzana navo munazvose! Ndinokupfugamirai ndinokudai nomwoyo wangu wose. Ndidzidzisei kuziva nokutsvaga Mwari akandisika uye wandakasikirwa. Zadzai mwoyo wangu nokutya Mwari uye rudo kwaari. Itai kuti ndirwadziwe kukutadzirai uye ndive nomwoyo murefu. Musandirega ndichiwira muchitadzo.
Wedzerai mandiri kutenda, chitarisiro norudo ndikure mutsika dzakanaka dzinofambirana nezvandiri pakukurarama. Ndibatsireizve kukura mumadzimai etsika dzakanaka (ururami, uchenjeri, usimbarari, kuzvibata), uye zvipo zvenyu zvinomwe nemichero yazvo.
Ndiitei muteveri waJesu akatendeka, mwana anoteerera sangano uye anobatsirana navamwe. Ndipeiwo nyasha dzokuti ndigone kuchengetedza mirau yenyu uye kugamuchira masakaramende ndakakodzera.
Ndisvitsei kuutsvene mukurarama daidzo yamakandishevedzera, mugondisvitsawo kumugumo wakanaka wokuzofara muupenyu husingaperi, nomuna Jesu Kristu Tenzi wedu.
Mweya Mutsvene, mupi wazvose zvakanaka, kuti zvakakodzera rukudzo nembiri yenyu, uye zvichindibatsirawo ini, ndinokumbira kuti mundipewo …
(Taura chaunokumbira).
Vakudzwe Baba …
Uyai Mweya Mutsvene, bvisai kushushikana kuri matiri mutizadze nezororo renyu rinoera.
Bvisai dutu riri matiri mutizadze nerunyararo rwenyu rwunoera.
Bvisai kusagadzikana kuri matiri mutizadze nechivimbo chenyu.
Bvisai kutya kuri matiri mutizadze nechitendero chakasimba.
Bvisai kuvava kuri matiri mutizadze nekutapira kwenyasha dzenyu.
Bvisai rima riri matiri mutizadze nechiedza chenyu chakapfava.
Bvisai kutonhora kuri matiri mutizadze nemadziya erudo rwenyu.
Bvisai usiku huri matiri mutivhenekere nomwenje wenyu.
Bvisai chando muupenyu hwedu mutipewo madziya.
Titwasanudzei kuti nzira dzedu dzakatsveyama dzishaye basa’
Gomeresai kuzvida kwedu murodze kuzvininipisa kwedu. Vesai moto worudo matiri mudzime marimi oruchiva.
Itai kuti tizvione sekutiona kwamunotiita, kuti tigokuonai sekuvimbisa kwamakaita mumashoko enyu okuti: “Vakakomborerwa vakachena pamwoyo nokuti vachaona uso hwaMwari”.
Uyai Mweya Mutsvene, pindai muzadze mwoyo yavenyu.
Tumai Mweya wenyu zvose zvinobva zvasikwa,
Imi munobva mavandudza pasi.
Uyai Mweya Mutsvene, uyai …
Ngatinamatei
Mwari makadzidzisa nechiedza chaMweya Mutsvene, mwoyo yavanotenda mamuri. Itai kuti nechipo chaMweya iyeyu tigare muchokwadi choungwaru nomufaro wokunyaradza kwaanotiita, nomuna Kristu Tenzi wedu. Amen.
Kukumbira ungwaru kuna Mweya Mutsvene
Mweya Mutsvene, pakutanga, pasi pasati panyatsoumbwa, pasina chinhu, imi muina Baba naMwanakomana, maidzengerera pamusoro pemvura. Makasika zvinhu zvose mukafemera upenyu kune chisikwa chose chipenyu. Zvino chidzikai muuye kubva kuchigaro chenyu chembiri chokudenga. Uyai.
Imi munoziva zvose, saka nditungamirirei ndive nouchenjeri munezvose zvandinoshanda uye mundidzivirire nembiri yenyu. Kuti nenzira iyi chete, zvose zvandinoita zvigamuchirwe nemi.
Kunamatira kuwana zvipo zvinomwe zvaMweya Mutsvene
Tenzi Jesu Kristu, musati makwira kudenga, makavimbisa kutumira Mweya Mutsvene kuti azopedzisa basa renyu mumweya yaVapositori navadzidzi venyu. Ndinokumbira kuti munditumirewo Mweya Mutsvene iyeye kuti aruramise mumweya wangu, basa renyasha norudo rwenyu.
Ndinokumbira kuti mundipewo Mweya woungwaru ndigone kusema zvinhu zvisina maturo zvapasi pano, nokuvavarira chete zvinhu zvisina mugumo.
Ndinokumbira kuti mundipewo Mweya woRunzwisiso, kuti uvhenekere pfungwa dzangu nechiedza chechokwadi chenyu.
Ndinokumbira kuti mundipewo Mweya weZano Rakanaka, kuti ndisarudze zvakanaka nzira yokufadza Mwari nokupinda denga.
Ndinokumbira kuti mundipewo Mweya woRutsungo, kuti nditakurewo pamwe nemi Muchinjikwa wangu ndiine chivindi chokukunda zvinhingamipinyu zvoruponeso rwangu.
Ndinokumbira kuti mundipewo Mweya woRuzivo, kuti ndizive Mwari uye ndizvizive pachangu, kuti ndigone kukura mukunaka mumeso aMwari.
Ndinokumbira kuti mundipewo Mweya woRunamato, kuti ndinakidzwe nokufadzwa mukuitira Mwari.
Ndinokumbira kuti mundipewo Mweya woKutya Mwari, kuti ndizadzwe norudo rwokumuremekedza nokutya kumutadzira.
Tenzi wadiwa, ndiiseiwo rupawo rwechiratidzo chavadzidzi venyu vechokwadi, Mweya wenyu uonekwe mandiri mukuita kwangu muna zvose. Amen.
Sakaramende roRuwadzano
Rangarira kuti kutangira zvose sakaramende iri chiito chorudo rwaMwari. Inguva yokupinda muukama hworudo naMwari. Hachisi chindoitawo kana marwadzo anofanira kutirirwa, asi kuti inzira yokuzvivandudza inoitika mumunhu wose.
Unokokwa maererano norudo rwaMwari kuti uone rutadzo ruri muupenyu hwako, upfidze nomwoyo wose nokuva nechinangwa chizere chokuda kurega kutadza zvakare.
Zvinhu zvakakosha paReururo yakanaka
Kuti tiite Reururo yakanaka tinofanira:
1. Kutanga tanamata, tichikumbira rubatsiro rwaMari.
2. Kubvunza hana nomwoyo wose kuti tione matadziro atakaita kubva patakapedzisira kureurura.
3. Kureurura matadzo edu pachena, takazvirereka nokuvimbika.
4. Kupfidza matadzo edu nomoyo wose ‘nechinangwa chizere chokuvandudzwa’, tiine vavariro yokuti tichanzvenga nguva yokuedzwa.
5. Kuzvipira kuteedzera chirango chatinenge tapiwa nokunamata tichitenda mafashamu erudo nengoni dzaMwari.
Munamato tisati taita Reururo
Mwari munaMasimbaose neNgoni, mandiunza pano muzita roMwnakomana wenyu kuti ndigamuchire tsitsi nenyasha dzenyu panguva yakafanira.
Zarurai maziso angu aone uipi hwandaita.
Batai mwoyo wangu munditendeutsire kwamuri.
Pandapatsanurwa nemi norutadzo,
rudo rwenyu ngarundibatanidze nemi zvakare:
Paunzwa utera norutadzo,
simba renyu ngatirape nokusimbisa;
paunzwa rufu norutadzo,
Mweya wenyu ngaape upenyu utsva.
Ndipei mwoyo mutsva wokuti ndikudei,
kuitira kuti upenyu hwangu hutaridze mufananidzo woMwanakomana wenyu.
Pasi ngapaone mbiri yaKristu inoratidzwa neSangano renyu,
pagoziva kuti ndiye wamakatuma: Jesu Kristu Mwanakomana wenyu, Tenzi wedu. Amen.
Ndinobvuma
Ndinobvuma panemi Mwari Baba vanaMasimbaose napanemiwo hama dzangu kuti ndakatadza kwazvo mukufunga mukureva mukuita nomukuzengurira … naizvozvo ndinokumbirawo kunemi Maria Mhandara, naVaTsvene naVaTumwa vose nemiwo hama dzangu kuti mundireverere kuna Tenzi Mwari wedu.
Chiito chokupfidza
Mwari wangu, ndinokumbira kuregererwa zvose zvandakakutadzirai. Ndinopfidza matadzo angu ose, ndinoasema kupinda zvose, nokuti anokodzera chirango chenyu chinobvundisa, nokuti akasakisa kuti muponesi wangu Jesu Kristu, anondida, arovererwe paMuchinjikwa. Asi zvikuru, nokuti ndakakutadzirai imi, makanaka zvisina mugumo. Ndinotsunga zvakasimba ndichibatsirwa nenyasha dzenyu, kurega kukutadzirai pakare, nokunzvenga zvose zvinondifurira kukutadzirai. Amen.
Kupenengura Hana
Zvakakosha kugadzirira namazvo kana tichida kunyatsobatsirika pakusangana kwedu Baba voKudenga vane rudo. Wana nguva yaunova woga muchinyararire uchifunga nezvoupenyu hwako, noukama hwako naMwari navamwe. Kupenengura hana kunotiwanisa zvokutaura muNzvimbo yeReururo. Kana tikasazvipa nguva yokuzvipenengura Reururo yedu iri munjodzi yokusanyatsokwana.Pane nzira dzakawanda: imwe ndeye kushandisa ndima yeShoko Rakanaka, zvikuru imwe yendima dzezvishamiso zvokurapwa kana zviitiko zvoruregerero (somuenzaniso: Ruka 15: 11-32; Johani 4:4-42; Mt 18:21-35; Ruka 18:9-14). Zvione semunhu ari kurapwa kana kuregererwa naJesu. Anotaura newe! Unoti kudii?
Imwe nzira ndeyekuona kuti Jesu akapfupisa nokudzamisa Mitemo Gumi kuburikidza nemitemo miviri mikuru (Mariko 12:28:42): Ida Mwari nomuvakidzani wako.
Rutadzo runouraya rutadzo rukurusa runoitwa munhu achinyatsoziva uye achinyatsoda (Katekisimo 1857). Tinofanira kureurura matadzo ose anouraya. Hatisungirwe kureurura matadzo madiki.
Tinopara matadzo madiki patinotadza nenzira duku, kutevera zvinoraidzwa nomutemo weunhu, kana kuti patinoramba kuteerera mutemo weunhu nezira huru asi tisingazivi kana kuti tisingadi (Katekisimo 1862). Kureurura matadzo madiki chiito chekuzvipira. Hatifanire kuzvidyamoyo tichida kuareurura ose asi kuti tinogona kungonangana nenzvimbo dzoupenyu hwedu dzinoda nyasha dzaMwari.
Maitiro anotevera okupenengura hana anogona kutibatsira kuongorora upenyu hwedu maererano nedzidziso iri pachena yaKristu. Tinofanirawo kuongorora zvimwe zvakatitadzisa kurarama daidzo yaKristu zvizere.
Kutadzira Mwari
Ndakaramba chitendero changu, ndichiramba kutsvaga zvizere pamusoro pacho here?
Ndakakanganwa minamato yangu yamazuva ose kana kuiita zvisakafanira here?
Ndakaita zvemashavi kana kuvimba navafemberi venhema here?
Ndakazvidza Mwari kana kushandisa mutauro usina kufanira here?
Ndakatadza kuremekedza zvinhu zvitsvene, nzvimbo tsvene kana vanhu vatsvene here?
Ndakapotsa Misa musi weSvondo kana mazuva anoera nokuda kokutadza kwangu here?
Ndakazvivhiringika kana kuvhiringa vamwe pamuteuro weMisa here?
Ndakagamuchira Komunione Tsvene ndiine rutadzo runouraya here?
Ndakagamuchira Komunione Tsvene ndisinganyatsoremekedza, kuratidza hanya kana kutenda here?
Kuzvitadzira nokutadzira vamwe
Ndakaita chinya, hasha kana shanje here?
Ndakavira nokuda kwamaronda kana kuramba kuregerera here?
Ndakabatsira kana kukurudzira kubvisa pamuviri, kuzviuraya kana imwe nzira yokupfudza upenyu hwomunhu here?
Ndakaita mhirizhonga mukutaura nomukuita here?
Ndakaita rusaruraganda mupfungwa, mazwi nezviito here?
Ndakarwadzisa vamwe nokutaura zvakaipa pamusoro pavo here?
Ndakachera vamwe pasina chikonzero kana kuvafumura kuti ndivatsvatise here?
Ndakaita wara rokutonga vamwe here?
Ndakararadza kana kushandisa zvinodhaka zvisiri pamurau here?
Ndakatyaira zvine njodzi kana zvisina ruremekedzo here?
Ndakataura zvinonyadzisira here?
Ndakaona mifananidzo, mafirimu kana mabhuku anonyadzisira here?
Ndakaita hunhu hwakasviba pachangu kana nomumwe here?
Ndakavirima, kudada, kuzvifunga kana kuita umbimbindoga here?
Ndakanyepa kuti ndizvitsaure, kurwadzisa vamwe kana kuzviita sendakakosha kupinda vamwe here?
Ndakaba here?
Ndakatadza kubvisa mugove wangu ndichitsigira Sangano zvinoenderana nokuwana kwangu here?
Ndakatadza kuteerera, kuremekedza, kana kukudza vakuru vangu here?
Ndakaginya vashandi kana vashandirwi vangu here?
Ndakashandisa zvisiri izvo kana kukuvadza midziyo yavamwe here?
Ndakakonza mwoyo wangu kukara kukumba zvinhu here?
Ndakava chigumburo kana muenzaniso wakaipa here?
Ndakaita nungo pamusevenzo, padzidzo kana pabasa rangu rapamba here?
Ndakaitira vamwe shanje nokuda kwechimiro, mukurumbira kana basa ravo rakanaka here?
Ndakakurudzira vamwe kutadza nenzira ipi zvayo here?
Vawanani
Ndakatsondora kuchengetedza madziya orudo nechidakadaka nomudikani wangu here?
Ndakarera besano kuburikidza nepfundipfundi kana kutadza kukumbira ruregerero ndirini ndatadza here?
Ndakatadza kubata mudikani wangu zvakanaka mukutaura, mumweya napanyama here?
Ndakashandisa nzira dzisidzo dzokuronga mazvariro here?
Ndakatadza kuvimbika kumudikani wangi nenzira ipi zvayo here?
Vabereki
Ndakatadza kudzidzisa vana vangu kunamata here?
Ndakatadza kufundisa vana vangu chitendero here?
Ndakatadza kuunza vana vangu kuMisa musi weSvondo here?
Ndakakakavadzana nemudikani wangu pamberi pavana here?
Ndakatadza kunyatsocherechedza zvinoverengwa, kuonekwa pachivhitivhiti kana padandemutande navana vangu here?
Ndakaitira mukundo kana kunyandukira vana vangu here?
Ndakatadza kuriritira mhuri yangu here?
Vechidiki
Ndakatadza kuteerera vabereki vangu here?
Ndakatadza kubatsira pamba here?
Ndakatadza kuvavarira kunzwisisa vabereki vangu nokutaurirana navo here?
Ndakavhiringa rugare rwapamba pedu nokuzvifunga kwangu here?
Ndakatadza kuzvidzora here pandaive nehasha?
Ndakapfundumwarira kana kusvotesa kunze kwokukumbira rubatsiro here?
Ndakatadza kushanda nomazvo kuchikoro here?
Ndakatadza kuremekedza varairidzi navamwe vechikuru here?
Ndakatadza kutamba zvakanaka navamwe pamitambo nemikundano here?
Ndakarwisana navamwe here?
_______________
Kuenda kuReururo
Gamuchiro
Mupriste anogamuchira mureururi norupfave. Mureururi nomupriste vanotanga nokuita mucherechedzo womuchinjikwa vachiti + Muzita raBaba neroMwanakomana, neraMweya Mutsvene. Amen. Mupriste anokukoka kuti uvimbe muna Mwari. Unogona kugoverana nomupriste zviri maererano noupenyu hwako kana chipi zvacho chinomubatsira mubasa rake semureururisi.
Shoko RaMwari
Mupriste anogona kukuti urangarire pamusoro pendima yemuShoko raMwari Rinoera inotaura nezvetsitsi dzaMwari nedaidzo yekutendeuka.
Maitiro eSakaramende roruwadzano
Pane maitiro akawanda akasiyana siyana. Pano ticharatidza maitiro mamwechete.
Maitiro okutanga
Unozotaura namazwi ako pachako kana kuti unoti:
Baba ndipeiwo chikomborero ndakatadza. Kwapfuura (mwedzi … masvondo … edza kutaura nguva yadarika usina kuita Reururo) ndisina kuita Reururo. Matadzo angu ndiwo aya.
Taura matadzo ako namazwi ako pachako, usingatenderere. Zivisa mupriste kana wapedza. Unogona kupedzisa namazwi anotevera kana uchida:
Ndine urombo nokuda kwamatadzo aya namamwe andinodaro ndakanganwa.
Nyatsoteerera zano romupriste nokumukumbirira kuna Mweya Mutsvene kuti ataure zvinonyatsokubatsira kuti ukure muupenyu hweChikristu. Unokwanisa kumubvunza mibvunzo kana uchida. Mupriste anogona kukupa chirango chinofanira kukubatsira kupfudza upenyu hwakare, kutanga upenyu utsva nokushonongora utera hwako. Chirango ichi chinogona kuva munamato, kuzviramba kana kushandira muvakidzani kana kuita mabasa etsitsi.
Mupritse anozokukoka kuti uite munamato wokupfidza (Chiito chokupfidza) sokuti:
Mwari wangu, nokuti makanakisa ndineurombo nokukutadzirai, uye norubatsiro rwenyasha dzenyu handidi kukutadzirai pakare.
Mira mupriste aite munamato ‘Wokuregerera’ (apo Kristu anoregerea matadzo ako ose). Ita mucherechedzo woMuchinjikwa mupriste paanoti:
Ndinokuregerera matadzo ako Muzita raBaba + neroMwanakomana neraMweya Mutsvene. Amen.
Mupriste anogona kutaura mashoko mashona ekurudziro paunenge woenda.
Mushure mereururo
Tora chinguva murunyararo (muKereke) uchirangarira nezve nyasha dzesakaramende roRuwadzano nokutenda Mwari nokuda kwetsitsi dzake noruregerero rwake. Houno munamato wokutenda:
Baba, norudo rwenyu mandibvisa muuipi mukandiisa murudo, mukusuwa muchindiisa mumufaro. Kuburikidza nomumakomborero enyu ndipeiwo ushingi hwokutsungirira. Amen.
Minyengetero 