Minamato yaMazuva Ose

Posted by MC on January 6, 2016
Posted in: Mimamato, Uncategorized. 2 Comments

Muzita

Muzita raBaba, neraMwanakomana neroMweya Mutsvene. Amen.

Baba Vedu

Baba vedu muri kudenga zita renyu ngarinamatwe, umambo hwenyu ngausvike, kuda kwenyu ngakuitwe pasi sokudenga. Tipeiwo nhasi kudya kwedu kwezuva. Mutiregererewo zvatakakutadzirai, sokuregerera kwatinoita vakatitadzira. Musatirege tichiwira mune zvinotiedza, asi mutinunure kune zvakaipa. Amen

Kwaziwai Mariya

Kwaziwai Maria muzere nyasha Tenzi anemi, makakomborerwa panavakadzi, akakomborerwa mwana wemimba yenyu Jesu. Maria Mutsvene amai vaMwari, mutireverere isu vatadzi zvino napanguva yokufa kwedu. Amen.

Vakudziwe Baba

Vakudziwe Baba noMwanakomana naMweya Mutsvene Sezvakanga zviri pakutanga, zvino nakare kose nemisi isingaperi. Amen.

Angere (Mutumwa) waTenzi
M: Mutumwa waTenzi akaparidza kuna Maria.
D: Maria akava amai vaJesu nesimba raMweya Mutsvene.
Kwaziwai Maria…..
M: Onai ndiri murandakadzi waTenzi.
D: Ngazviitwe kuneni sezvamareva.
Kwaziwai Maria……
M: Izwi akava munhu;
D: Akagara nesu
Kwaziwai Maria….
M: Tireverereiwo, Amai Vatsvene vaMwari,
D: Kuti tikodzereswe kuwana zvatakapikirwa naKristu.
M: Ngatinamatei
Tinokumbira Tenzi, kuti mudire nyasha dzenyu mumwoyo yedu, kuti isu takaziviswa nomutumwa, zvokuva munhu kwaKristu Mwanakomana wenyu, tigoneswe namarwadzo noMuchinjikwa wake kumuka nokuenda naye kuupenyu husingaperi. Tenzi wedu Jesu Kristu, tisvitsireiwo izvi kuna Mwari Baba. D: Amen.

Hosi yedenga chifarai
(Tinonamata mumwaka wePasika tichiti:)
M: Hosi yedenga, chifarai, areruya.
D: Nokuti uyo wamakakodzera kubereka, areruya,
M: Wakamuka sokureva kwaakamboita, areruya.
Vose: Mutireverere kuna Mwari, areruya.
M: Farai nokufara, Maria Mhandara Tsvene, areruya,
D: Nokuti Tenzi akamuka chokwadi, areruya.
M: Ngatinamatei
Vose: Mwari, imi makada kufadza pasi pose nokumuka kwoMwana wenyu, Jesu Kristu, Tenzi wedu. Tinokumbira nokuna amai vake Maria Mhandara Tsvene, kuti mutipewo mifaro isingaperi kudenga. Tenzi wedu Jesu Kristu, tisvitsireiwo izvi kuna Mwari Baba. D: Amen.

Rangariro
Rangarirai imi Maria Mhandara Tsvene izere nyasha, kuti hazvina kumbozikanwa nakare kose kuti makarambira avo vakatizira kwamuri vachida kubatsirwa kana kurevererwa nemi. Muchokwadi ichi, ndinotizira kwamuri imi Mhandara Tsvene, yemhandara tsvene dzose, imi amai vangu. Ndinouya ndichimira pamberi penyu, ndichirwadziwa namatadzo angu. Amai vaMwari, Izwi akava munhu, inzwaiwo kudemba kwangu, mundiitirewo tsitsi, mundidairewo. Amen.

Ndinotendera Mwari

Ndinotendera Mwari Baba vana masimba ose, musiki wedenga napasi. Ndinotendera Jesu Kristu, Mwanakomana wake mumwechete Tenzi wedu. Akazvarwa naMaria Mhandara Tsvene nesimba raMweya Mutsvene. Akatongerwa kutambudzika naPonziyo Piratu, akarovererwa paMuchinjikwa, akafa, akavigwa, akaenda kuvafi. Akamuka nezuva retatu. Akwira kudenga kwaagere kurudyi rwaMwari Baba vana masimba ose. Achabvako kuzotonga vapenyu navafi. Ndinotendera Mweya Mutsvene, Sangano dzvene Katorike, kubatana kwaVaTsvene, kuregererwa kwamatadzo, kumuka kwomuviri, noupenyu husingaperi. Amen.

Ndinobvuma panemi
Mwari Baba munamasimbaose,
napanemiwo hama dzangu,
kuti ndakatadza kwazvo mukufunga,
mukureva, mukuita nomukuzengurira;
zvose izvi imhosva yangu huruhuru.
Naizvozvo ndinokumbira imi,
Maria Mhandara Tsvene,
nemi VaTumwa naVaTsvene vose,
nemiwo hama dzangu,
kuti mundireverere kuna Mwari Baba vedu. Amen.

Kupfidza
Jesu Tenzi wangu makandifira paMuchinjikwa. Ndichitarira Muchinjikwa ndinoda kurega kutadza chose. Jesu wangu ndiregereri. Ndinokumbira kuti mundinzwirewo tsitsi handidi kukutadzirai pakare. Amen.

Kutendera
Mwari wangu ndinotendera imi chaizvo nazvose zvandinoraidzwa kutendera neSangano Katorike Apostorike nokuti imi makatiudza izvi munoreva zviro kwazvo. Amen.

Kutarisira
Mwari wangu ndinotarisira kwazvo kuti muchandipa nhasi uno nyasha dzenyu dzatakawanirwa naJesu Kristu kuti tigozofara nemi kudenga tafa. Ndinotarisisra izvi nokuti imi makatiudza izvi munoita zvamakatitsidzira. Amen.

Kuda
Mwari wangu ndinokudai nemwoyo wangu wose, ndinokudai kupinda zvose nokuti makanaka munokodzera kudiwa kwazvo. Nokuda kwenyu ndinoda vamwe sokuda kwandinozviita. Amen.

Munamato wamangwanani
Jesu wangu, kuburikidza nokumwoyo usina mhaka waMaria, ndinokupai minamato, mabasa, mifaro nokutambudzika kwangu kwanhasi, mukuzadzisa zvinodiwa noMwoyo wenyu Mutsvene, pamwe neMipiro Inoera yeMisa iri kuitwa pasi rose kuripira matadzo, uyezve kuzadzisa zvinodiwa namasangano edu, zvikurusei zvinodiwa naPapa vedu. Amen.

Kuzviteketera kuna Maria
Hosi yangu naamai vangu, ndinozvipa kwamuri zvizere. Kuratidza kuzvipira kwangu, ndinoteketera kwamuri nhasi uno, maziso nenzeve dzangu, muromo nomwoyo wangu nazvose zvangu zviripo. Zvino amai sezvo ndiri wenyu, ndichengetei mundidzivirire pamwe nazvose zvandinazvo.

Munamato kune Mutumwa Muchengeti
Mutumwa waMwari, muchengeti womweya, hana nomuviri wangu, ndichengetei nokundidzivirira kunjodzi dzose nokurwiswa nasatani. Nditungamirei munzira yoururami, mugondireverera pamberi pechigaro chaMwari nguva dzose. Musandisiya ndiri ndoga kunyangwe kwechinguvana. Ndibatei maoko ndigone kusvika kudenga zvakanaka.
Mutumwa muchengeti wangu, itai kuti ndive nehanya, mundisimbaradze muutera hwangu, mundirambidze kuita zvakaipa, muzarure meso angu aone Mwari, muvhare nzeve dzangu kuti dzisanzwe miedzo yowakaipa. Nditarisirei pandinomuka uye pandinorara, itai kuti rimwe zuva ndizova nemi kudenga kwemisi isingaperi. Amen.

Kunamatira kuswera zuva zvakanaka
Amai Maria mudikani azere norudo, ndichengetedzei mudziviriro yenyu inoera. Dzivirirai hana, mwoyo namapangiro angu kuti zvisasvibiswe rutadzo. Natsai zvandinofunga, zvandinodisa, zvandinotaura nokuita kuti zvifadze imi naJesu naMwari wangu, kuti pamwe nemi, ndizosvika kudenga. Jesu naMaria ndipeiwo gomborero renyu dzvene. Amen.

Munamato pakupera kwezuva
Mwari wangu ndinokupfugamirai uye ndinokudai nomwoyo wangu wose. Ndinokutendai kuti makandisika mukandiponesa nenyasha dzenyu uye mandichengetedza muswere wezuva ranhasi. Ndinokumbira kuti mugamuchire zvakanaka zvandaita sezvenyu mugondiregererawo zvose zvakaipa zvandaita. Ndidzivirireiwo usiku hwanhasi, uye nyasha dzenyu ngadzive neni pamwe navadikani vangu. Amen.

Munamato wamanheru
Jesu Kristu Mwari wangu, ndinokupfugamirai ndichikutendai nenyasha dzose dzamandipa nhasi. Ndinokupai kurara kwangu nousiku hwose ndichikumbirisa kuti mundichengete ndisina rutadzo. Naizvozvo ndinozviisa parutivi penyu panoera ndakafukatidzwa nekwiriti yaMai venyu, naamai vanguzve.
Itai kuti VaTumwa venyu VaTsvene vandirinde nokundichengetedza murugare; chikomborero chenyu chive pandiri. Amen.

Munamato kuna Josefa Mutsvene
Josefa Mutsvene baba muchengeti weMhandara Tsvene, imi makasarudzwa naMwari kuti muchengete Jesu Kristu ari mwana Mutsvene, pamwe naMaria amai vake Mhandara Tsvene. Zvino ndinokumbira kuti mundisvitsirewo chichemo changu kuna Jesu, chokuti ndicheneswe chose, ndifunge zvakanaka zvoga, ndiite zvakanaka zvoga, ndigozoitira Mwari nomwoyo Mutsvene. Ndibatsirei nguva dzose kugaroitira Jesu naMaria muutsvene. Amen.

Munamato kune Murevereri wangu Mutsvene
Murevereri wangu muri kudenga, mune zita randakaremekedzwa kutumidzwa, ndikumbirirei kuna Mwari nguva dzose; ndigamuchirei mukutenda kwangu, mugondisimbaradza mutsika dzakanaka nokundidzivirira muhondo dzoupenyu. Kuti ndichinge ndazokurira mhandu yomweya wangu, ndikodzere kuwana mubairo wembiri isina mugumo. Amen.

Munamato pamberi poMuchinjikwa
Onai Jesu makanakisa, makapfavisa,
ndapfugama namabvi panyasi penyu.
Kana ndichitarisa nokurangarira maronda enyu mashanu,
ndinofungazve mazwi akamborehwa naDhavidhi muporofita
okuti, ‘Vakaboora maoko angu netsoka dzangu,
vakaverenga mapfupa angu ose’.
Dhindai mufananidzo wenyu mandiri.
Zadzisai zvinosuvirwa nemwoyo wangu.
Ndinokutetererai nomwoyo wangu wose
kuti mundipe chitendero,
nechitarisiro nechido chakadzika. I
tai kuti ndipfidze matadzo angu
nomwoyo wangu wose nokundisimbaradza
kuti ndigare upenyu hwakanaka
hwokuitira vamwe zvine rudo neremekedzo. Amen.

Kutodzana naKristu (Anima Kristi)
Mweya waKristu, ndinatseiwo,
Muviri waKristu, ndiponeseiwo,
Ropa raKristu, ndigutiseiwo,
Kurwadziwa kwaKristu ndisimbiseiwo,
Jesu makanaka ndidavireiwo,
Mumaronda enyu ndivanzeiwo.
Regai kubvuma kuti ndiparadzane nemi,
Kumuvengi wakaipa ndidzivirireiwo,
Pamusi wokufa kwangu ndishevedzeiwo,
Ndidaneiwo ndiuye kwamuri,
Kuti ndikuimbireiwo navasarudzwi venyu,
Misi isingaperi. Amen.

Munamato pamberi pokudya
Tenzi tikomborerei pamwe nezvipo izvi zvatava kugamuchira zvichibva kumwoyochena wenyu. Nomuna Kristu Tenzi wedu. Amen.
Mushure mokudya
Tinokutendai Mwari nezvipo zvose zvamatipa nomwoyochena wenyu. Tenzi chitibatsirai nokutipa simba rokugara tichikurumbidzai.

Kuombekwa kwavatendi
Basa rokuombeka ndere mabhishopi nemapristi uye madhikoni muSangano reChiratini. Ani naani angaombeke munhu ari panjodzi yokufa kana mupristi asipo. Anoombeka anosungirwa kudzidzisa zvoUtatu Hutsvene, nezvaJesu muponesi, uye zvekuombekwa kuti inzira inomuwanira ruponeso. Zvakanaka kutaura zvishoma-zvishoma munamato wo‘Kutendera’ uye wo‘Kupfidza’, kuitira kuti manzwi anyure mumwoyo memunhu ari kuombekwa.
Maitiro: Ari kuombeka anotora mvura oidira katatu pamusoro pemunhu achireva manzwi aya okuti:
“N. ndinokuombeka muzita raBaba naMwanakomana naMweya Mutsvene. Amen.”

Rusariro rwoKurunungurwa

Posted by MC on January 5, 2016
Posted in: Minamato yoKuzvipira, Rusariro rwoKusunungurwa. Leave a comment

© Musakope munamato uyu musina kutanga makumbira kodzero

(Kusunungurwa muHuranda)
(Tinonamata seRusariro rwaMaria)

Patsanga hombe tinoti:
Tenzi tinzwireiwo tsitsi,
Kristu tinzwireiwo tsitsi

Munamato:
Jesu Mwanakomana waDhaviti tinzwireiwo tsitsi mumatadzo edu uye kushurikirwa kwamadzinza kwatakagamuchidzwa. Ivai netsitsi pakuzvitutumadza kwedu, kukarira upfumi, mhangwa dzomuviri, hasha, mweya wokuruta, usimbe, godo, kushaya chitendero, kutya, kusuruwara, kuzvipa mhosva, kuzvikwidziridza, kushushikana, uye mweya wokuda kutora upenyu hwedu pachedu.

Patsanga diki kagumi tinoti:
Nezita rine simba raJesu uye nesimba reshoko raMwari pamwe norunako rweropa rakakosha raJesu, uranda hwose ngaubve, misungo yose ngaidimbuke uye maronda ose ngaarapike.

Rusariro rwoKuremekedza Uso HwaJesu

Posted by MC on January 5, 2016
Posted in: Rusariro-Uso hwaJesu. Leave a comment

© Musakope munamato uyu musina kutanga makumbira kodzero

(Tinoshandisa Rusariro rwaMaria)

Ndinotendera Mwari …
Baba vedu …
Kwaziwai Maria …
Uso Hunoera kwazvo, tinoramba tichidaidza kwamuri kusvikira manzwa minamato yedu. Mwari munoera, Mwari samasimba, imi munogona kutibatsira zvinoshamisa. Mwari munogara nokusingaperi, tinzwireiwo tsitsi isu nepasi rose. Tendeutsirai Uso hwenyu kwatiri kuti tiponeswe.

Patsanga hombe tinonamata tinoti:
Baba vokudenga tinokupirai takazvidukupisa uye tiine mwoyo unobvira nechido, runako rusina mugumo nokutambudzika kwoUso Hunoera hwaJesu, ropa rake rakakosha, maronda ake ose uye misodzi yake, kuti mutinzwe mutibatsirewo.

Patsanga gumi dzokutanga tinoti:
Uso Hunoera hwakakuvadzwa tinzwireiwo tsitsi isu tinodana kwamuri.

Patsanga gumi dzechipiri tinoti:
Uso Hunoera hwakatsvuka neropa tinzwireiwo tsitsi isu tinodana kwamuri.

Patsanga gumi dzechitatu tinoti:
Uso Hunoera hunosvimha misodzi yorudo rusina mugumo, tinzwireiwo tsitsi isu tinodana kwamuri.

Patsanga gumi dzechina tinoti:
Uso Hunoera hwakanyombwa nokurohwa huchisvipirwa mate tinzwireiwo tsitsi isu tinodana kwamuri.

Patsanga gumi dzechishanu tinoti:
Uso Hunoera hwakagamuchira muchinyararire kusvorwa nokudyiswa zvinonhuwa tinzwireiwo tsitsi tinodana kwamuri.

Ngatinamatei
Tinokupfugamirai Uso Hunoera hwaTenzi wedu Jesu Kristu. Runako rwenyu haruna mugumo uye tsitsi dzenyu hadziereki. Dai waro maita kuti tiregererwe matadzo edu uye tive nokutendeuka kwechokwadi. Ngatinyaradze Uso Hunoera nekurarama upenyu hwakachena tiri vapupuri vasingatyi muchitendero chedu uye tiine rudo rwakadzama.

Rusariro rweMisodzi

Posted by MC on January 5, 2016
Posted in: Rusariro rweMisodzi. 2 Comments

© Musakope munamato uyu musina kutanga makumbira kodzero

(Namata nokukurudzira Rusariro rweMisodzi. Satani anotiza pose panoitwa munamato uyu)
Panzvimbo yeChipupuriro, tanga nomunamato uyu:
Jesu makaroverwa paMuchinjikwa! Ndinozvivanzaridza patsoka dzenyu, ndichikupai misodzi yerudo yaamai venyu vakafamba pedyo nemi munzira inorwadza yoMuchinjikwa. Mudzidzisi makanakisa, tigonesei kuchengeta chidzidzo chitinowana kubva kumisodzi yaamai venyu vatsvene kwazvo, kuti tigokwanisawo kuzadzisa kuda kwenyu pano pasi, nokutikodzeresa kuti tizokutunidzai nokukurumbidzai kudenga kwemisi isingaperi.

Panzvimbo ya“Baba vedu…”, ita munamato uyu:
Mutangamiri: Jesu tarirai misodzi yeropa youyo akakudai kupinda vose zvamaive panyika.
Daviro: Ndiyezve anokudai norudo rwakadzamisa kudenga.

Panzvimbo ya“Kwaziwai Maria…”, namata kanomwe uchiti:
Mutungamiri: Jesu! Inzwaiwo kuchema kwedu
Daviro: Napamusana pemisodzi yeropa yaamai venyu vatsvene kwazvo.

Pokupedzisira, dzokorora katatu mashoko aya:
Mutangamiri: Jesu tarirai misodzi yeropa youyo akakudai kupinda vose zvamaive panyika.
Kudavira: Ndiyezve anokudai norudo rwakadzamisa kudenga.

Ngatinamatei:
Maria, ndimi amai vorudo, amai vamarwadzo naamai vetsitsi! Tinokutetererai kuti mubatanidze minamato yenyu neyedu, kuti Jesu Mwanakomana wenyu waMwari watinokumbira, anzwe mikumbiro yedu nomuzita remisodzi yenyu amai. Pamwe nenyasha dzatinokumbira, tigonesei kuzowana mubairo woupenyu husingaperi.
Amai vamarwadzo, paradzai utongi hwasatani nemisodzi yenyu yeropa. Jesu musungwa nomuranda, norupfave rweuMwari hwenyu, dzivirirai pasi rose kumanyepo anoda kuriparadza. Amen.

Rusariro rweTsitsi dzaMwari

Posted by MC on January 5, 2016
Posted in: Rusariro. Leave a comment

© Musakope munamato uyu musina kutanga makumbira kodzero

Tinoshandisa rusariro rwaMaria (rwatajaira) sezvizvi:
Patsanga diki nhatu dzokutanga tinoti:
Baba vedu muri kudenga …
Kwaziwai Maria …
Ndinotendera Mwari …

Patsanga hombe tinoti:

Baba vedu vari kudenga ndinokupirai muviri, ropa, mweya nouMwari hwomwanakomana wenyu wapamwoyo, Tenzi wedu Jesu Kristu achiripira matadzo edu, neayo avanhu vose pasi rose.

Patsanga diki gumi tinoti:

Napamusana pokutambudzika kwake kunosuwisa – Tinzwireiwo tsitsi isu napasi rose
Pokupedzisira tinoti katatu: Mwari munoera, munoera samasimba ose, munoera munogara nokusingaperi, tinzwireiwo tsitsi isu navanhu vose pasi rose

MUNAMATO KUNA KRISTU MAMBO WAZVOSE
Imi Kristu Jesu, ndinokuzivai nokukugamuchirai samambo wedenga napasi. Zvose zvakasikirwa imi. Tongai pamusoro pangu.
Ndinodzokorora patsva mhiko dzangu dzokuombekwa; Ini ndinorasa satani, mabasa nokunyengedza kwake kwose. Ndinovimbisa kugara upenyu sezvinodiwa neshoko renyu uye kusakisa nokukurudzira sokugona kwangu kwose ruenzaniso, rudo muna zvose zvandinotaura kana kuita mukushanda kwangu.
Ndifemereiwo Mweya wenyu Mutsvene; Ndishandisei kuunza rugare, mufaro norudo panyika yava dongo nokuda kwamakaro, ruvengo nokurwisana. Onai ndauya kuzoita kuda kwenyu. Ndibatsirei kukuita. Amen.

Munamato kuUso Hunoera

Posted by MC on January 4, 2016
Posted in: Minamato yoKuzvipira. Leave a comment

Jesu, imi makatambudzika zvinosuwisa, “makasvorwa nokurambidzanwa navanhu, mukava munhu wokutambura, munhu anoziva nhamo uye munhu wokuti vanhu vakamutarisa vanotomufuratira zvavo.” Ini ndinopfugama nokuremekedza Uso Hwenyu Hunoera hwaimbopenya norunako nokutapira kwaMwari Baba, zvino hwakutaridzika kwandiri seuso hwomunhu ane maperembudzi! Asi kunyangwe chiso chenyu chisisataridziki, ini ndinocherechedza rudo rwenyu rwusingaperi ndichibva ndatsva nechishuvo chokukudai uye chokuti mudiwe nomunhu wose. Misodzi yakazadza maziso enyu matsvene inoita kwandiri sezvicherwa zvamatombo akakosha anodhura andingade kuunganidza kuti nditenge mweya yavatadzi varombo.
Jesu, imi Uso hunokodzera kupfugamirwa, hunovhevhetedza mwoyo wangu, ndinokutetererai kuti mudyare mandiri Mufananidzo weUso wenyu hunoera, muvese moto wechido kuti ndikodzere kuzoonana neUso hwenyu hunembiri kudenga.
Jesu, Uso hwenyu hunopfugamirwa hunovhevhetedza mwoyo wangu. Ndinokutetererai
Kuti mudzike mandiri mufananidzo weUso hwenyu hwaMwari, muvese moto worudo
Mandiri kuti ndizowanikwa ndakakodzera kuonana neUso hwembiri kudenga. Amen.

Minamato yakaSiyana-siyana

Posted by MC on January 4, 2016
Posted in: Uncategorized. Leave a comment

Kunamatira imba (musha)
Tenzi, fadzwaiwo nomusha wedu uyu. Huvepo hwenyu ngautidzivirire nokudzingira kure mhandu nemweya yose yakaipa ingatirwisa nokutikuvadza. Tichengetedzeiwo pamuviri mweya nomwoyo yedu. Daiwaro mutumwa wenyu anoera, agara mumusha wedu kuti tigogarawo murugare uye musha wedu ugova diziro rerudo nomufaro. Daiwaro chikomborero chenyu chagara pamusoro pedu nguva dzose. Tinokumbira izvi nokuna Tenzi wedu Jesu Kristu. Amen.

Kunamatira chipo chemwana
Mwari Baba vedu, ubereki hose hunobva kwamuri. Chiitai kuti tigoveranewo nemi simba renyu rokusika munhu, tione mumwana wamuchatitumira, chiratidzo chipenyu chouvepo hwenyu muimba yedu. Komborerai rudo rwedu rwubereke izwi idzva rinobatana nesu mukukurumbidzai, mwoyo mutsva unokudai uye upenyu hutsva huchakupupurai. Amen.

Kunamatira vabereki
Mwari ndinokutendai pamusana pavabereki vangu vadiwa, vakandida nokundiriritira. Ivai navo muvavhumbamire nohuvepo hwenyu. Zarurai mwoyo yavo vagone kuvimba nemi nguva dzose. Ndibatsirei ndigone kuvaratidza kutenda kwangu zvose zvavakandiitira. Ndiregerereiwo nguva dzose dzandakava shungurudza. Vakomborerei noutano hwakanaka uye mufaro. Ndinovaisa mumaoko enyu kuti muvachengetedze nerudo rwune upfave. Vachengetedzei vari pamwe muupenyu huno nehuchatevera. Amen.

Kunamatira vana
Mwari Baba vedu, makatikomborera nechipo chevana, tinokutendai nezvipo izvi zvakakosha zvinoshongedza imba yedu. Kuseka kwavo kunotipa mufaro uye chiedza muupenyu hwedu. Ndivo zvapupu zvouvepo hwenyu mukati memusha wedu. Kukura nokuyaruka kwavo kunoratidza chakavandika chorudo rwenyu. Daiwaro vakurawo murudo rwehuvepo hwenyu nomuungwaru. Ramangwana revana vedu riri mumaoko enyu, asi isuwo tine basa rokuvaumba. Tibatsirei mukugamuchira nokuita basa iri muchokwadi kuti tivabatsire kudavira kwamuri nokuvaita zvamunoda imi kuti vazova. Amen.

Kunamatira hama neshamwari
Baba, nesimba roMweya wenyu, makazadza mwoyo yavanotenda mamuri, nezvipo zvekudanana sehama nehama, chinzwaiwo minamato yandinokumbirira hama neshamwari dzangu. Vapeiwo utano pamweya napamuviri kuti vagogona kukuitirai murudo rwakaruramisisa. Amen.

Kunamatira vapristi
Tenzi Mwari wedu, munotungamira vanhu venyu nebasa ravapristi. Vachengetedzei vakatendeka mukukuitirai kuti upenyu nebasa ravo, zvikupei mbiri nomuna Kristu. Tinokumbira izvi nokuna Tenzi wedu Jesu Kristu Mwanakomana wenyu, anogara nokutonga pamwe nemi makabatana naMweya Mutsvene muUmwari humwechete kwemisi isingaperi. Amen.

Kunamatira kukunda bvunzo
Tenzi namavambo ezvipo zvose, musiki nyakugara pamusoro penzvimbo nenguva, ndinokurumbidzai nokukutendai pamusana pechipo chenguva. Chidimbu chose chenguva yamunopa upenyu hwangu chakakosha zvikuru. Tenzi, nhasi ndinoda kukutendai pamusana paavo vose vakagoverana neni nguva yavo yakakosha. Ndino yeuka vabereki vangu navadzidzisi. Ndinoda kukutendai nokundipa mukana wokuti ndidzidze. Zvino nguva yasvika yokuti ndiratidze pachena chokwadi changu mune zvose zvandakavavarira kudzidza. Tenzi, ndinodaira kuti ndakaita zvose sokugona kwangu kwose. Tenzi, zvino chindibatsirai kutondera zvose zvandakadzidza uye mugondipa ushingi pakupindura mibvunzo yose. Mweya Mutsvene wenyu ngauve mwenje, simba nomutungamiri wangu. Amen.

Kusakisa rugare
Tenzi ndinochemera kuitwa mudziyo worugare, pane ruvengo ndikushe rudo.
Pane kunyunyuta chitendero
Pane kurasa mwoyo chitarisiro
Pane rima chiedza
Pane kuchema mufaro
Haiwa Tenzi Mutsvene
Itai kuti ndide kunyaradza pane kunyaradzwa
Kunzwisisa vamwe pane kunzwisiswa
Kuda vamwe pane kudiwa
Ndikapa ndinopihwawo
Ndikaregerera ndinoregererwa
Uye murufu ndimo munobuda upenyu usingaperi. Amen.

Kunamatira vari kufa
Jesu Nyatsitsi nomudi wemweya yavanhu, ndinokumbira nomumarwadzo eMwoyo Mutsvene kwazvo wenyu uye waAmai vasina mhaka, kuti muchenese neropa renyu, vatadzi pasi rose vari mumarwadzo uye vakatarisana nenjodzi yokufa zuva ranhasi. Amen.

Kunamatira rufu rwakanaka
Josefa Mutsvene makakomborerwa nokufira mumaoko aJesu naMaria, ndinokutetererai kuti mundiwanirewo nyasha dzerufu rwakanaka. Panguva yokufa, apo panotyisa uye kutambudzika kukuru, ndibatsirei nesimba renyu mundidzivirire kuvavengi voruponeso rwangu. Jesu, Maria naJosefa ndinoisa mweya wangu mumaoko enyu. Amen.

Kunamatira mufi
Tenzi mupeiwo zororo risina mugumo, chiedza chisingaperi chimuvhenekere. Ngaazororo zvake murugare. Amen.

Munamato wemurume kana mudzimai
Mwari Baba muna masimba ose musina mugumo, tinotenda nokurumbidza zita renyu rinoera. Makasika munhurume nomunhukadzi mukakomborera wanano yavo muchiita kuti vagarobatsirana nokutsigirana. Tirangarireiwo nhasi uno, mutiringe nemutsa mugoita kuti tidanane zvakaperera sezvakaita chipo chorudo chakapiwa naKristu kuSangano rake. Tipeiwo makore mazhinji okugara tiri pamwe mumufaro norugare tichikurumbidzai nomwoyo wose, nomuna Jesu Kristu Mwanakomana wenyu. Amen.

Munamato wababa kana amai
Baba vavavanhu vose, ndimi makandipa vana ava muchivaturira kuti ndivachengete nokuvarera nenzira inokufadzai mukuvagadzirira upenyu usingaperi. Ndibatsireiwo nenyasha dzenyu dzedenga kuti ndikwanise kuzadzisa basa iri rinoera. Ndidzidzisei zvandinofanira kuvapa nenguva yakafanira, uyewo pandinotsiura nepandino nyarara. Itai kuti ndive norupfave asi ndakatsiga, mwoyo wokugamuchira uye hanya dzokuchengetedza vana ava. Nomuna Kristu Tenzi wedu. Amen.

Munamata waAmai vakazvitakura
Baba, ndinokutendai nechipo chenyu chakanakisisa chokundibvumira kugoverana nemi mubasa renyu reubereki. Munguva ino yokumirira, ndinokumbira kuti mudzivirire nokuriritira upenyu hutsva hwavamba mandiri. Itai kuti mwana wangu auye nokupinda muchiedza chenyika zvisina njodzi, uye aponenwe patsva neruombeko. Amai vaMwari, ndinoturira mwana wangu kumwoyo wenyu werudo. Amen.

Munamato womurwere
Mwari samasimba, ndinokupai urwere hwangu ndichiubatanidza nokutambudzika kwakaita Mwanakomana wenyu. Muviri unoera waJesu wakarwadziswa zvinosuwisa kuri kuda kwenyu kuti nomukutambudzika kwake, vanhu vawane ruponeso. Kutambudzika kwangu kunowanawo pfundutso kana ndichikubatanidza nekwaJesu kuti ini navanhu vose vaponeswe.
Mwoyo Mutsvene waJesu, ndinokumbira kuti mutsitsi dzenyu, mundipewo simba rokugamuchira urwere hwangu. Kana kuri kuda kwenyu, mugondidzorerawo kuutano nokuchimbidza. Tenzi wadiwa, imi makarapa ambuya vaPita, ndirapeiwo kuti ndigone kusimuka nokuita basa rangu, kana kundipawo kuzvininipisa mukugamuchira rubatsiro rwavamwe. Ndipeiwo nyasha dzokuona mutsa nomwoyochena wenyu mune zvose zvinoitika muupenyu hwangu. Amen.

Munamato panguva yokusuwa
Mwari imi muri Mwari worugare zvino ini ndiri mukusuwa. Bvisai kusuwa kwangu mundipewo rugare rwenyu. Ndibatsirei kuti ndisapedze nguva nokufunga zvinhu zvandisina simba pamusoro pazvo, ndigone kuzvigamuchira nokuita sokugona kwangu kuti ndikunde.
Tenzi ndipeiwo usiku une runyararo uye hope dzakanaka. Amen.

Munamato womukoti
Tenzi, ivai neni pazuva ranhasi pandichange ndichichengetedza varwere vangu. Itai kuti mashoko angu ave nomutsa nokuti izvi zvakakosha kwandiri. Mugoitazve kuti maoko angu agone kuporesa varwere. Rudo rwenyu ngarupenye nomune zvose zvandinoita kuitira kuti vanoda rubatsiro vakuonei nokukunzwai nomandiri. Amen

Munamato womudzidzisi
Tenzi, ndibatsirei kunzwisisa mwana woga woga. Ndibatsirei kuona kukosha kwemweya yavana ava, ndigotungamira umwe nomumwe wavo munzira yorufaro rwechishamiso cheruzivo – kwete munzira inovatyisa.
Baba wadiwa, sokutarisira kwavo kwandiri kuti ndiva tungamirire munzira yechokwadi yeChikristu, iniwo ndinozvirereka ndichikumbira kuti mundidzidzisewo. Amen.

Munamato womushandi
Tenzi ivai neni mubasa rangu, muite kuti vamwe vashandi vaone kuti ndimi munonditungamira nzira yandinoshanda nayo. Nditungamirirei mukuzvibata nomukutaura uye muzvinhu zvinoita kuti ndiseke. Ndibatsirei kusava nenungo kana kusaita basa rangu namazvo. Daiwaro Kristu awonekwa mandiri naavo vose vanosangana neni. Itai kuti ndigone kubata vamwe vashandi nemutsa uye remekedzo. Ngandimire pachokwadi ndichishanda basa rangu ndisingazezi kana kutya. Daiwaro ndazivikanwa kuti ndiri Mukristu nenzira yandinoita basa rangu. Amen.

Munamato womunhu ari parwendo
Baba, mukufamba kwangu nzendo mazuva ano, ndichengetedzeiwo murudo rwenyu. Ndidzivirirei kunjodzi dzose uye matutu anotyisa. Ndipeiwo ungwaru nouchenjeri kana ndiri mumvura, mumasango kana mumakomo. Ndibatsirei kuremekedza zvinhu zvamakasika kuti ndisazvishore kana kushatisa runako rwazvo. Itai kuti ndizodzoka kumusha ndiine kutenda nemutsa wakawanziridzwa uye ndicherechedze nokuyemura makomborero enyu. Ndinokumbira kuti mukomborero vamwe vose vari parwendo nedziviriro nomutsa mumwechetewo. Ndinokumbira izvi zvose nomuzita raJesu. Amen.

Munamato pazuva rokuberekwa
Mwari ndinokutendai nokundipa rimwe gore reupenyu. Ndinokutendai pamusana pavanhu vose vandirangarira zuva ranhasi vachindikorokotedza nezvipo, mashoko netsamba dzokundishuvira zvakanaka. Ndinokutendai pana zvose zvamakandigonesa kuita nokuva mugore rapfuura. Ndinokutendai pamusana pazvose zvandakasangana nazvo mugore rapera; ndangariro dzokukunda dzinondipa mufaro nguva dzose; nguva dzandakakundikana, dzinondiyeuchidza kuti hapana chandinogona kuita nokwangu, asi ndinotoda rubatsiro rwenyu; nguva yomufaro pandainzwa madziya ezuva; nguva yokusuwa, yandaitizira kwamuri. Amen.

Chiedza tungamira nomutsa
Chiedza nditungamirirei zvinyoronyoro,
Kunyangwe ndakakombwa nokusuwa,
Nditungamirei ndiende mberi!
Usiku irima rakatikwirindindi,
Uye ndiri kure nokumusha,
Nditungamirei ndiende mberi!
Chengetedzai tsoka dzangu;
Handikumbiri kuona zviri kurekure,
Nhano imwechete yakandikwanira.
-Cardinal Newman

Kuombekwa kwaJesu

Posted by MC on January 3, 2016
Posted in: Mwaka weKisimusi. Leave a comment

Mhinzo
Nhasi tiri kupemberera kuombekwa kwaJesu. Rungano rwacho rwakafamba sezvizvi. Jesu akamira mumutsara kuti abhabhatidzwe naJowani. Chijana chake chasvika denga rakazaruka, Mweya Mutsvene ndokuburuka paari senjiva izwi ndokunzwikwa richibva kumusoro richiti: ‘Iwe ndiwe Mwanakomana wangu wapamwoyo, ndiwe unondifadza.’ Pakuombekwa kwaJesu Mwari akadura pachena, vanhu vose vachinzwa; kuti Jesu Mwana wake, anofadzwa naye, uye anomuda.

Mashoko aya mashoko akataurwa kwauri pawakaombekwa. Mashoko akataurwa kwandiri pandakaombekwa. Mwari akakuita Mwana wake, akafadzwa newe, uye anokuda. Tinofanira kupabatisisa ipapo. Kubva nhasi rwiyo rwako runofanira kuti: Ndiri Mwana waMwari! Mwari anondida sezvandiri! Ndakakosha pamberi paMwari!

Kusvorwa navamwe
Hama dzadiwa kune vamwe vasiri kurarama sevanhu vakaombekwa. Kune vamwe vasiri kurarama sevana vaMwari, vasingaone kukosha kwavo. Vanhu vanoteerera zvakaipa zvinotaurwa pamusoro pavo navamwe. Mupfungwa dzavo havana zororo nokuti vanonzwa vamwe vachiti ‘haubatsire chinhu’ vobva vazviti ‘handibatsire chinhu.’ Vanonzwa mazwi anoti ‘unonyadzisa’ ivo vorarama izvozvo. Vamwe vacho vanotozvisvora ivo pachavo: ‘Zvechikoro hazvisi zvangu. Ndiri dofo,’ ‘Ndinemapundu-mapundu. Ndakashata,’ ‘Zvoupenyu ndakazvikoniwa’.

Kusvora vamwe
Tine vamwe zvakare pakati pedu vane miromo isingamharwe nenhunzi. Ana maziva zvose vanoona kunatsa nekutadza kwaMwari. Varipo vatongi pakati pedu; vanopedzera nguva yavo kutonga vamwe. Hanzi ‘nhingi akazoti-akazoti.’ ‘Nhingi idofo.’ ‘Nhingi chidhakwa.’ ‘Nhingi ipfambi.’ Kana uri munhu akadaro ziva kuti izwi rako haribve kuna Mwari rinobva kuna Dhiyabhori nokuti izwi raMwari harisi rokushora ndererudo.

Mwari anotida sezvatiri
Kunewe urimuno nhasi ziva kuti Mwari anokuda sezvauri. Unogona kuva wakatadza kudzosera zvikwereti zvavamwe vachirwadziwa pamusoro pako, asi Mwari anokuda zvakadaro. Unogona kuva uri munhu wemakuhwa, murevi wenhema, nyakusvibisa mazita avamwe asi Mwari anokuda zvakadaro. Hazvina mhosva kuti une godo kana shanje. Haukurudzirwe kuita zvakaipa, asi Mwari anokuda.

Mwari akasiyana navanhu venyama. Vanhu venyama havakanganwire. Vanhu venyama havagamuchire nyore kutadzirwa kwavo; ukangomutadzira munotochekana hukama. Asi ziso raMwari iziso remwoyochena, iziso rinoona kukosha kwako kwete mavanga ako orutadzo.

Unofanira kufadza Mwari
Zvino, hama dzadiwa, sevanhu vanodiwa tinofanira kufadza Mwari. Inga mubereki anoda mwana wake anofara wani kana mwana achimuteerera. Mwana mwana chero akatadza sei anoramba ari mwana. Ukama haugezwe nesipo setsvina. Asi mubereki anofara kana mwana achiteerera. Izvi ndozvina Mwari. Tiri vana vaMwari, Mwari anotida sezvatiri, takakosha pamberi paMwari. Asi Mwari anofadzwa nesu kana tichimuteerera tichiita kuda kwake.

Kuteerera Mwari kunouya kana tichichengeta mhiko dzedu dzeruombeko. Kuteerera Mwari kunouya kana tikava chiedza munyika. Inga musi watakaombekwa takanzi nomupriste: ‘gamuchira mwenje waKristo. Ngaurambe uchipfuta.’ Zvino zvauri mwenje unofanira kuita zvinoita mwenje. Mwenje hauvanzike unoonekwa nemunhu wose. Mwenje unotungamirira vanhu kuti vaone nzira. Kune vakawanda vari kutsvaga gwara rekufamba naro rakanaka. Mwenje unopa yambiro. Unofanira kuita kuti vanhu vazive zvakanaka nezvakaipa.

Kuzvipira kuTsitsi dzaMwari

Posted by MC on January 2, 2016
Posted in: Manovhena. Leave a comment

Munamato wenguva dzetatu (3 O’Clock)
Ropa nemvura zvakapfachuka kubva pamwoyo waJesu, sechitubu chetsitsi kwatiri, ndinovimba nemi.
Baba vedu vari kudenga, ndinokupirai muviri, ropa, mweya nohumwari hweMwanakomana wenyu wepamwoyo, Tenzi wedu Jesu Kristu, achiripira matadzo edu neevanhu vose pasi rose.
Tinzwireiwo tsitsi isu navanhu vose pasi rose.
Mwari munoera, munoera samasimba ose, tinzwireiwo tsitsi isu navanhu vose pasi rose. Amen.