Novhena yaMai voRubatsiro-1

Posted by MC on January 9, 2016
Posted in: Manovhena, Uncategorized. Leave a comment

©Musako novhena iyi nechinangwa chokutsvagisa mari musina mvumo

A. Novena yaMai voRubatsiro Rusingagumi pasina Misa
Mucherechedzo unopindwa nawo uchinoturikwa nokupfungaidzirwa nechipfungautsi (incense) pachi-imbwa.

Kwaziso
Mutungamiri: Nyasha dzaTenzi wedu Jesu Kristu norudo rwaMwari Baba noruwadzano rwaMweya Mutsvene ngazvive nemi mose.
Vose: Ngazvive nomweya wenyu.

Mhinzo
Mutungamiri: Hama taungana semhuri yaVakristu Kukudza
Mwari Baba vakatikomborera nemakomborero ose emweya nomuna Kristu. Tinoshuvirawo kuremekedza Mariya amai vaKristu naamai veduwo voRubatsiro Rusingagumi.
Vose: Tinotizira kurubatsiro rwenyu Amai Vatsvene vaMwari, musafuratire mikumbiro yedu pane zvatinoshaya asi tidzikinurei munjodzi dzose imi mhandara yakakomborerwa ine mbiri.
Mutungamiri: Ngatinamatei
Vose: Baba verudo, tinokutendai nomuenzaniso wechitendero noururami wamunotipa nguva dzose kuburikidza nevatsvene venyu. Tinokutendai naMariya anogara akagadzirira kutibatsira. Isu, saiye, ngatigarovavarira kuita kuda kwenyu kuti pamwe naye tizopinda mumbiri youmambo hwenyu; nomune Mwanakomana wenyu Jesu Kristu anogara nemi makabatana naMweya Mutsvene nokus-ingaperi. Amen.

Chiverengo
(Chiverengo chinoteverwa nenguva yorunyararo)

Mharidzo kana kugoverana shoko

Kusuma mikumbiro
(Vose vanopfugama)
Mikumbiro inogona kuverengwa kubva mune yaiswa parukuva.

Munamato weNovhena

(Unoitwa navanhu vose)
Mai voRubatsiro Rusingagumi makanyaradza Mwanakomana wenyu Jesu paaive atarisana namarwad-zo ake. Tava vana venyu vanodanwa kuti vatevere Jesu mudambudziko rake, rufu nekumuka kuupenyu utsva. Tinyaradzeiwo mutibatsire kuwana simba roMweya wake/ kuti tivake humambo hwake pakati pedu. Paanodzokazve mumbiri ngatipembererei nomufaro upenyu huzere pamwe nemhuri yaMwari nokusingaperi. Amen.

Detembo kuna Amai Mariya
Tenzi tinzwireiwo Tsitsi … Tenzi tinzwireiwo tsitsi
Kristu tinzwireiwo tsitsi … Kristu tinzwireiwo tsitsi
Tenzi tinzwireiwo Tsitsi … Tenzi tinzwireiwo tsitsi
Kristu tinzweiwo … Kristu tidavireiwo norupfave
Mwari Baba muri kudenga … Tinzwireiwo tsitsi
Mwari Mwanakomana Mununuri wapasi … Tinzwireiwo tsitsi
Mwari Mweya Mutsvene … Tinzwireiwo tsitsi
Utatu Hutsvene, Mwari Mumwechete … Tinzwireiwo Tsitsi
Mariya Mutsvene … Tirevereiwo
Mariya chiringiro chechitendero …
Mariya muyenzaniso wechitarisiro …
Mariya muyenzaniso worudo …
Chitarisiro chavarombo …
Simba ravakapfava …
Nyaradzo yavanochema …
Mubairo wavane tsitsi …
Kupenya kwavakachena pamwoyo …
Hurudziro yevasakisi vorugare …
Tsigiro yavanoshungurudzwa …
Amai veSangano …
Amai veparishi yedu …
Amai vemhuri yedu …
Amai vevana vedu …
Amai vevabereki …
Amai vanababa vezvomweya nemadhikoni …
Amai vevanhu-kadzi nevanhu-rume vakapikira …
Amai vorubatsiro rusingagumi …
Hwayana yaMwari munobvisa matadzo apasi … tiregereiwo Tenzi
Hwayana yaMwari munobvisa matadzo apasi … tidavireiwo norupfave Tenzi
Hwayana yaMwari munobvisa matadzo apasi … tinzwireiwo tsitsi Tenzi

Mutungamiri: Ngatinamatei
Vose: Tenzi Jesu verudo, makatipa kuti tiremekedze mucherechedzo waamai venyu vakakombo-rerwa zvikuru une zita rakakosha rokuti ‘Rubatsiro Rusingagumi,’ tipeiwo nenyasha dzenyu kuti pakati peshanduko dzose dzerwendo rweupenyu hwedu tidzivirirwe nerubatsiro nechengetedzo inogara iripo yaMariya Mhandara isina Mhaka, kuti tikodzere kuwana mibayiro yoruponeso rusingagumi, imi munogara nokutonga naMwari Baba makabatana naMweya Mutsvene nokusingaperi. Amen.

Kukomborera vanorwara

Mutungamiri: Baba tinounza vose vari kurwara, mupfungwa kana mumuviri, zvikuru ava vatava kunamatira (…domai mazita avo…) komborerai vose nave mitoro inorema kuti mukucheneswa namarwadzo avo vawane kurapwa netsitsi dzenyu, nomunaKristu Tenzi wedu.
Vose: Amen.

Mutungamiri: Tinokutendai nebasa raJesu rekurapa richirimo muSangano. Tinonamatira vose vari pano vanoda kurapwa mupfungwa kana mumuviri.
Vose: Ngavazive simba rokubata kwake kunorapa.
Mutungamiri: Tinounza kwamuri vose vari kurwara vakakumbira minamato yedu, navose vanotambura vane mitoro inorema.
Vose: Ngavawane zororo muna Jesu Mwanakomana wenyu.
Mutungamiri: Tinonamatira zvikuru vane hurwere huchavasvitsa muchishamiso cherufu. Vose: Nga-vawane rugare muna iye anogara nemi nokusingaperi makabatana naMweya Mutsvene, Mwari, narini narini. Amen.

Mupriste/mudhikoni
(Achitambanudza maoko ake akananga gungano)
Tenzi Jesu Kristu ngaave nemi kuti akudzivirirei; ave mamuri kuti akuraramisei;
pamberi penyu kuti akutungamirirei;
pashure penyu kuti akuchengetedzei;
pamusoro penyu kuti akukomborerei;
+Muzita rababa neroMwanakomana neraMweya Mutsvene.
Vose: Amen.

Kuremekedza mucherechedzo
(Rwiyo rwaMariya (papeji —) rungaimbwe mucherechedzo uchipfungaidzirwa)

Munamato wokukomborera
(Pamunamato wekukomborerwa Sakaramende Dzvene ringa ringaburitswe nokupfugamirwa vanhu vozokomborerwa naro. Kana pasina pfugamiro munamato unotevera wekukomborerwa ungaitwe.)

(Vose vanopfugama.)

+ Mwanakomana waMwari akazvarwa naMariya Mhandara yakakomborerwa kuti anunure marudzi avanhu. Zadzwai neupfumi hwemakomborero ake. Amen.
+ Nomuna Mariya mavambo ohupenyu hwose akakauya kwamuri. Rudo rwemwoyochena wake ngarwukumbundikirei nguva dzose. Amen.
+ Mauya semhuri kuzoremekedza Mariya pasi pano. Mweya womufaro ngauvenemi munzira yokuen-da kumusha usina muguma. Amen.
+ Mwari vanamasimba ose ngavakukomborerei, Baba neMwanakomana naMweya Mutsene. Amen.

Mitemo Gumi neyeSangano

Posted by MC on January 8, 2016
Posted in: Mitemo Gumi neyeSangano. Leave a comment

© Musakope dzidziso idzi nechinangwa chokutsvagisa mari musina kukumbira mvumo

Mitemo yaMwari ine Gumi

Mitemo mitatu yokutanga ndeyokuna Mwari pachake; imwe minomwe ndeyedu nevamwe vedu.

  1. Ndini Tenzi Mwari wako, usava navamwe vamwari pamberi pangu
  2. Usadana nhando zita raMwari Tenzi wako, Rangarira zuva reSabata urichengete uriite chisi chako
  3. Kudza Baba naMai vako.
  4. Usauraya namazwi kana zviito
  5. Usaita choupombwe, mundangariro kana muzviito.
  6. Usaba.
  7. Usapupurira umwe wako zvenhema
  8. Usachiva mukadzi kana murume womumwe.
  9. Usachiva nhumbi kana zvinhu zvavamwe

Mitemo mikuru yesangano

  1. Remekedza masvondo namazuva anoera akarayidzwa neSangano uchienda kuMisa nokusabata
  2. Usadye nyama namazuva anorambidzwa; zvinyimewo namazuva okuzvinyima.
  3. Usapfuura gore rose usina kuita rupinduko
  4. Usapfuure mwaka wePasika usina kugamuchira Komuniyoni tsvene
  5. Bisa mugove wako wokubatsira mubhishopi navapristi vako nokuita mudeme mudeme.
  6. Usachate nomunhu ano ukama hwakarambidzwa.

Masakaramende Manomwe

Posted by MC on January 8, 2016
Posted in: Masakaramende Manomwe. Leave a comment

© Musakope zvidzidzo izvi nechinangwa chokutsvagisa mari musina kukumbira mvumo

RUOMBEKO

Runoita munhu kuti ave imba inogara Mweya Mutsvene. Petrosi Mutsvene akati:- ‘Pindukai mumwe nomumwe weyu, mubhabhatidzwe nezita raJesu Kristo, kuti muregererwe matadzo enyu, mugozogamuchirawo chipo, chinova ndiye Mweya Mutsvene’. (Zviito 2:38)

CHISIMBISO

Mweya Mutsvene anotumwa kwatiri naKristo kuti tiraramire Kristo akatifira. Nechisimbiso tinokomborerwa naMweya Mutsvene nesimba chairo. Vatenderi vanobva vasungirwa kuti vaparidzire nokudzivirira chitendero mumazwi avo nezviito zvavo sevapupuri chaivo vaKristo.

YUKARISTIYA

Mweya Mutsvene anotipa upenyu muyukarastia tsvene. Chionai kuti pamberi pekonsekrasiyone tinoti:- Tumaiwo Mweya wenyu azonatsa zvatiri kupira izvi zvine muviri neropa raJesu Kristo, Tenzi wedu.
Uye, mushure mekonsekrasiyone tinoti:- Tumaiwo mweya wenyu azoita kuti vose vanogamuchira muviri neropa raKristo vave vamwe chete.

RUWADZANO

Mweya Mutsvene ndiye anotipa upenyu nesakaramende roruwadzano. Kristo akati :- Gamuchirai Mweya Mutsvene. Kana mukaregerera vanhu zvavakadzira Mwari vanobva varegererwa matadzo avo (Jn 20:23). Kristo akatuma Mweya Mutsvene kuti azopedzisa basa rake rokununura vanhu nokutiita vana vanofadza Baba vedu.

CHIZORWA CHAVARWERE

Sakaramende rechizorwa chavarwere harisi sakaramende raavo voga vanokarofa, aiwa. Kana mutenderi upi zvake otanga kurwara zvinotyisa ndiyo nguva yaanofanira kupiwa sakaramende iri.

UGADZO

Isakaramende rinopiwa vabhishopi, vapristi navadhikoni pakugadzwa kwavo; rinovapa nyasha rokugara zvitsvene nokuita mabasa avo muSangano.

MUCHATO

Mwari pachake Musiki wemuchato. Kubudirira kwavachati nokubudirira kwavanhu vose kunoda kuti chisungo chomuchato chive chisingabvi dakara pakufa kwavachati.
Murume achasiya baba vake naamai vake ndokuva chiname nomukadzi wake, vaviri vachiva nyama imwechete, nokudaro havachiri vaviri, asi vava nyama imwe chete. Ndosaka izvo zvakasunganidzwa naMwari zvisasunungurwe nomunhu. (Mk 10:7-9)

Kunamatira kudzivirirwa

Posted by MC on January 7, 2016
Posted in: Mharidzo. Leave a comment

MUNAMATO WOKUDZIVIRIRWA
(Paunoverenga Nziyo 91, nyatsotenda kuti zvirikutoitika kwauri)
Mwari mudziviriri wedu (Nziyo 91)
Munhu anogara mudumba roWokumusorosoro, anogara mumumvuri waSamasimbaose, anogona kuti kuna Tenzi, “Ndimi diziro rangu nhare”.
Nokuti achakununura kumunhu anokuteya zvakaipa uye kudenda rinoparadza.
Achakufukidza neminhenga yake uchiwana pokuhwanda mumapapiro ake. Kutendeka kwake inhowo yakatenderedza.
Zvinotyisa zvousiku hauzozvitya kana museve unokandwa masikati.
Kana mharadzi dzinofamba murima, nyange zvinoparadza masikati machena.
Kurutivi rwako kungawire zvako churu kurudyi kwako kugowira gumi rezviuru asi iwe hapana chinokusvika.
Uchangozvitarisawo nameso kuti uone mubayiro wavakaipa.
Nokuti unenge wati Tenzi ndiye mudziviriri wangu waita musha wako muna Wokumusorosoro.
Hapana chakaipa chinokuwira kana denda rinosvikawo pamusha pako.
Nokuti achapa vatumwa vake basa rokukuchengeta panzira dzako dzose.
Vachakubata mumaoko kuti urege kugumbura tsoka yako pabwe.
Uchatsika zvako pamusoro peshumba nechiva. Shumba, ino chaiyo, yechidiki nenyoka, uchazvitsika-tsika pasi petsoka dzako.
Pamusana pokuti anoita chiname neni, chichamununura rudo. Ndichamudzivirira nokuti anoziva zita rangu.
Akadana kwandiri ndichamupindura; ndichave naye munhamo; ndichamununura ndichimuremekedza.
Ndichamugutsa noupenyu hurefu ndigoita kuti aone ruponeso rwangu.

Kudzivirirwa neRopa Rakakosha raJesu

Jesu muponesi naMwari wangu,
ndishambidzei pamwe navadikani vangu
uye nazvose zvandinazvo,
muropa renyu rakakosha.
Tidzivirirei uye mutizadze
norudo rwenyu rwusina mugumo.

Munamato wokudzikinurwa

Nomuzita raJesu Kristu Tenzi, kumbiri yaBaba,
ndinokumbira ropa rinoera raJesu Kristu,
rakateurwa paKarivhari
kuti rindidzivirire pamwe navadikani vangu vose,
shamwari dzangu dzose
uye munhu wose ari muno mumba.
Nomuzita raJesu Kristu neropa rake rakakosha,
ndinosunga masimba ose omweya yakaipa iri mumhepo,
panyika, mumvura,
pasi penyika neiyo inobva kunyika yavashakabvu.
Neropa rinoera raJesu,
ndinoisa chidhindo muimba ino,
napamusha uno,
kuti simba rowakaipa risambopinde
kana kuti kanganisa njere.
Ndinokutendai Jesu. Ndinokurumbidzai Jesu.
Namata nechemumwoyo)

MUNAMATO WEHONDO YOMWEYA

Baba Vokudenga, ndinokudai, ndinokurumbidzai, ndinokunamatai. Ndinokutendai nokunditumira Mweya wenyu Mutsvene anondisimbaradza nokunditungamirira kuupenyu uzere. Ndinokutendai nokundipa Maria amai vangu vokudenga, vanogarondireverera pamwe navatumwa navatsvene vose.

Munamato pakurwiswa

Tenzi Jesu Kristu, ndinozviisa pasi poMuchinjikwa wenyu ndichikumbira kuti mundishongedze neropa renyu rakakosha rakateuka kubva mumwoyo wenyu mutsvene kwazvo uye mumaronda enyu matsvene kwazvo. Tenzi Jesu, ndivhenekereiwo nechiedza chenyu chinoera.
Baba vokudenga, itai kuti mvura inoporesa yandakaombekwa nayo, iyerere zvakare nomuzvizvarwa zvekwa amai nezvekwababa vangu, ichenese mhuri, hama namadzitateguru angu. Ivasunungure kubva muhuranda hwesimba romuipi wavaikumbira rubatsiro, vasingazive kuti uku kwaiva kutadzira imi nomwanakomana wenyu Jesu Kristu.
Nomuzita raJesu rinoera ndinotora zvakare chiri chose changu chakabiwa nasatani, ndichichiisa pasi poumambo hwaJesu Kristu.
Baba, nesimba raMweya Mutsvene wenyu, ndiratidzei vanhu vandinofanira kuregerera uye matadzo andakasiya andinofanira kupfidza. Ndiburitsireiwo pachena Baba, zvinhu zvose zvisingakufadzei muupenyu hwangu, nzira kana mukana wandakapa satani kuti apinde muupenyu hwangu.
Baba, ndinokupai kusada kuregerera kwangu, matadzo angu nenzira dzose dzakasakisa kuti satani apinde muupenyu hwangu, Ndinokutendai Baba nokundiratidza izvi. Ndinokutendai nokundiregerera uye rudo rwenyu rwunodzikinura.
Tenzi Jesu, nomuzita renyu rinoera, ndinosunga mweya youipi iri mumhepo, mumvura, muvhu, pasi penyika neiri munyika yavashakabvu.
Zvakare nomuzita raJesu, ndinosunga vatumwa vose vanobva kumuzinda wasatani, ndichikomekedza ropa rakakosha raJesu kuti ritonge pamusoro pemhepo, mvura, ivhu nemichero yaro yakatikomberedza, pasi penyika uye kunyika yavashakabvu,
Baba vokudenga, zvino chibvumirai kuti Mwanakomana wenyu Jesu auye kuzondidzivirira, akabatana naMweya Mutsvene pamwe naMaria Mhandara Tsvene, vatumwa navatsvene kuti ndisawire munjodzi yokurwiswa nomweya yakaipa ingade kutsiva.
(Dzokorora mutsara unotevera uyu katatu kuti upe mbiri kuna Baba, Mwanakomana naMweya Mutsvene)
Nomuzita rinoera raJesu, ndinozvidhinda neropa rakakosha raJesu ini (… zita …), hama dzangu, musha uno, motokari, nzvimbo, zvishandiswa zvose nekwazvinobva.
(Kuti ukwanise kudimbura nokuparadza zvidhindo zvasatani, dzokorora katatuzvinotevera izvi kuti upe mbiri kune Utatu Hutsvene, nokuti zvidhindo zvasatani zvinokarirwa katatu zvichituka Utatu Hutsvene)
Nomuzita rinoera raJesu, ndinodimbura nokuparadza kushurikirwa kwose, misungo nemiteyo, manyepo, zvipingaidzo, kurasiswa, urwere, kusashanda namazvo, mviromviro dzokukanganisa nokutadza kwangu.
Nomuzita raJesu ndinodimbura magamuchidzanwa emhiko dzasatani, hukama, zvitenderano namabasa ake.
Nomuzita raJesu ndinodimbura nokuparadza zvose zvine chokuita nokushopera, masvikiro, kuporofita kunoshandisa nyenyedzi, uroyi, zvemudzimu, neimwe mweya namaitiro asatani ounyenyengedzi.
Nomuzita raJesu, ndinoparadza nokushaisa simba maitiro ose okunamata nokupira asingapi remekedzo uye mbiri yechokwadi kuna Jesu Kristu.
Mweya Mutsvene, nomushoko roruzivo, ndiratidzeiwo mweya yakaipa yakadzemeterana kana kuhakira pandiri nedzimwe nzira dzandisingaoni ndoga.
(Nyarara kwechinguva uchimirira kunzwa mashoko anouya kwaari, seanoti: hasha, pfini, ruvengo, utsinye, upenzi, unyengedzi, ruchiva, kutya, godo, kusagadzikana, kuzvitutumadza, makuhwa. Zvino namatira umwe nomumwe wemweya iyi yawaratidzwa nenzira inotevera)
Nomuzita raJesu, ini ndinokudzinga iwe mweya we … Zvino ndinokuti enda kuna Jesu. Usazviratidze zvakare kana kukuvadza ini kana umwe munhu. Iye Jesu anoziva zvokuita newe, maererano nokuda kwake.
Baba vokudenga, ndinokutendai norudo rwenyu. Ndinokutendai Mweya Mutsvene mandipa simba rokurwisa satani nemweya yakaipa. Ndinokutendai Jesu mandidzikinura. Ndinokutendai amai Maria mandireverera muri pamwe navatumwa navatsvene.
Tenzi Jesu, ndizadzeiwo norudo, mwoyochena, kutendeseka, unyoro, chitarisiro, kuzvidukupisa, mutsa, rufaro, chiedza, tsitsi, kutsiga, rugare, kuchena, kuzvibata, utsvene.
Ndibatsirei ndifambe muchiedza chenyu uye chokwadi, kuti ndavhenekerwa naMweya Mutsvene, ndibatane nemi kurumbidza, kutunhidza nokupa mbiri kuna Baba zvino nokusingaperi. Sezvo imi Tenzi Jesu muri “… Nzira, chokwadi noupenyu” (Johani 14:6). “Ndakauya kuti vanhu vawane upenyu, uye kuti vawane upenyu uzere” (Johani 10:10).
Tarisai muone, Mwari ndiye ruponeso rwangu, ndinovimba naye handichatyi nokuti iye Tenzi Mwari, ndiye simba rangu, ndiye rwiyo rwangu ndiye ava ruponeso rwangu. (Izaya 12:2)
Areruya … Amen.

Munamato wokurwisa

Baba vokudenga ndinokotama ndichikunamatai nokukurumbidzai. Ndinozvishongedza neropa rakakosha raTenzi Jesu Kristu sechidziviriro changu panguva ino yandiri kunamata. Ndinozviturira kwamuri zvizere, pamwe nazvose zvine chokuita noupenyu hwangu.
Panguva ino ndinoramba nokurasa mabasa ose asatani angandipingaidza kunamata. Ndinozvipa chete kuna Mwari mupenyu wechokwadi, ndichiramba zvachose kuti satani ave nechokuita mumunamato wangu.
Nomuzita raJesu ndinoti satani bvirakure neni, iwe pamwe nemweya yako yose yakaipa. Ndinodzika ropa rakakosha raTenzi Jesu pakati pangu newe. Baba vokudenga ndinokunamatai, ndinokurumbidzai. Ndinoziva kuti munokodzera kuti mugamuchire mbiri, kuremekedzwa nokurumbidzwa. Ndinodzokorora kuzvipira kwamuri patsva ndichikumbira kuti Mweya Mutsvene andisimbiradze panguva ino yokunamata.
Ndinokutendai Baba vokudenga nokuti makandida kubvira pakutanga kwenguva, mukatuma Tenzi Jesu Kristu kuti afe pachinzvimbo changu, kuti ini ndinunurwe.
Ndinotenda kuti nomuna Tenzi Jesu Kristu akauya kuzondimirira, Imi makabva mandiregerera zvizere mukandipa upenyu husingaperi.
Nokundipa ururami husina kana netsvekwa hwaTenzi Jesu Kristu, makandisunungura kubva kuchirango chorutadzo. Ndinotenda kuti nomaari, makandiita munhu zvizere uye munozvipa pachenyu kwandiri kuti muve simba rangu.
Baba vokudenga, uyai muzarure meso angu ndione hukuru hwenyu uye ndione kuti matondigadzirira zvizere zvezuva idzva. Nomuzita raJesu Kristu, ndinogara panzvimbo yangu naKristu kudenga, ndakaisa pasi petsoka dzangu utongi hwose namasimba erima nemweya yose yakaipa.
Ndinotenda kuti kukunda kwandakaitirwa naTenzi Jesu Kristu paMuchinjikwa, uye kumuka kwake muvafi, kwaita kuti ndipihwewo chigaro pamwe naye kudenga. Naizvozvo, nomuzita raTenzi Jesu Kristu utongi hwose nemasimba erima nemweya yakaipa, zviri pasi pangu.
Ndinotenda zvombo zvekurwa hondo zvamakandipa, naizvozvo ndinozvisunga chiuno nechokwadi sebhandi, ndakapfeka demautare paditi rokururama, mutsoka dzangu shangu dzorugare, mumusoro ruponeso senguwani, ndakabata nhoo yechitendero nebakatwa reShoko raMwari.
Ndinosimudza nhoo yechitendero kudzima miseve yose yomoto yewakaipa nokutora bakatwa raMweya rinova ndiro Shoko raMwari randinoshandisa kurwisa masimba omuipi muupenyu hwangu. Ndinopfeka zvose zvekurwisa nazvo ndichigara upenyu hwokunamata nokuvimba nemi Mweya Mutsvene.
Ndinokutendai Baba vokudenga kuti Tenzi Jesu Kristu akakunda mweya ine ukuru ukuru, neino ushe nemweya inotonga pasi pose namasimba, achizviratidza pachena kukunda kwake pamusoro payo. Nhasi, ini ndinotora kukunda uku muupenyu hwangu, sokukundawo kwangu muna Kristu.
Ndinorasa kubva muupenyu hwangu, kufurirwa, kupomerwa mhosva nokuedzwa nasatani. Ndinotsidza kuti Shoko raMwari ichokwadi chandinosarudza kurarama nhasi uye rinondivhenekera somwenje. Baba vokudenga, ndinosarudza kugara ndichikuteererai uye ndiri muukama hwepedyo-pedyo nemi.
Zarurai meso angu, ndione zvinhu zvisingakufadzei muupenyu hwangu. Pindai muupenyu hwangu muite kuti pasambova nomukana wokuti satani atonge pamusoro pangu. Ndiratidzei nzvimbo dzine utera pandiri. Ndiratidzei pakamonyoroka muupenyu hwangu pamunoda kuti ndigadzirise kuti ndikufadzei. Nhasi ndinokugamuchirai muna zvose uye basa raMweya Mutsvene muupenyu hwangu.
Nokutenda uye nechivimbo, ndinokatanura munhu wakare ndichitora kukunda kwaTenzi Jesu Kristu paMuchinjikwa apo pavakachenesa umunhu hwakare. Ndinobvisa umunhu hwangu hwomugariro wakare hwakaodzwa nehavi dzounyengedzi, ndichivandudzwa patsva mumweya nomupfungwa. Ndinopfeka unhu hutsva hwakasikwa hwakatodzana naMwari muururami noutsvene huri pachokwadi.
Nokudaro, nhasi ndinokanda pasi unhu wakare wamakaro noundingoveni, ndichipfeka munhu mutsva worudo. Ndinokanda pasi munhu wakare azere kutya, ndichipfeka munhu mutsva ane ushingi, uye munhu wakare ane utera nehavi dzounyengedzi, ndichipfeka munhu mutsva woururami nokuchena.
Ndinogamuchira kukunda, kukwira kudenga nokupiwa mbiri kweMwanakomana waMwari kwaanogara achitonga zvinhu zvose. Ndinotora chinzvimbo changu nomuna Kristu, kukunda mhandu dzomweya wangu dzose. Utatu Hutsvene, uyai mundizadze. Pindai muupenyu hwangu muparadze ukama nezvimwari zvenhema uye mudzingire kure muvengi wose.
Baba vokudenga ndinokutendai nokundizivisa kuda kwenyu muupenyu hwangu zuva roga-roga, kuburikidza nomuShoko renyu. Nokudaro kuda kwaMwari ngakuitwe mandiri nhasi.
Ndinokutendai kuti nomunaJesu Kristu, mandipa makomborero ose omweya kunzvimbo dzokudenga. Ndinotenda kuti mandibara patsva muchitarisiro chipenyu chokumuka muvafi kwaJesu Kristu. Ndinotendazve kuti nhasi mafanondigadzirira kuti ndigare ndakazadzwa noMweya waMwari worudo, mufaro nokuzvidzora muupenyu hwangu.
Ndinocherechedza nokugamuchira kuda kwenyu mandiri, saka ndinorasa nokuramba kufurirwa nokuvhevhetedzwa kwose kwasatani nemweya yake yakaipa, inoda kundibira nokunditadzisa kuita kuda kwaMwari. Ndinozvidzivirira nenhoo yechitendero, ndichivhika kunenedzerwa nokufurira kwose kunoiswa mupfungwa dzangu nasatani.
Nomuzita raTenzi Jesu Kristu, ndinozviturira zvizere kwamuri Baba vokudenga, somupiro mupenyu. Ndinoramba zvandinodiwa kuti ndive nenyika, ndichisarudza kusandurwa nokuvandudzwa mafungiro. Ndinokumbira kuti mundiratidze kuda kwenyu uye mundibatsire kufamba nhasi ndiri mukuda kwaMwari zvizere.
Ndinokutendai Baba vokudenga, nokuti zvombo zvokurwisa zvamakatipa hazvisi zvepanyama, asi Mweya waMwari unotigonesa kuparadza mizinda yose yakaipa kana mafungiro anoratidza seakanaka anorwisana noruzivo rwaMwari, kuitira kuti pfungwa nokuteerera kwose kupihwe kuna Tenzi Jesu Kristu.
Naizvozvo, nhasi ini ndinoparadza utongi hwasatani muupenyu hwangu, uye urongwa hwake hwose hwokundirwisa. Ndinoparadza utongi hwasatani pamusoro pehana yangu, kuti pfungwa dzangu dzive pamurichete imi Utata Hutsvene. Baba vokudenga, ndinotsidza kuti zviro kwazvo hamuna kutipa mweya wokutya, asi mweya wesimba, rudo nehana dzakadzikama.
Nhasi ndinoparadza simba rasatani nazvose zvaandirongera pamusoro pemamapangiro angu, ndinozvipa kwamuri kuti kuda kwenyu kuitwe uye ndisarudze zvakanaka nokutendera. Ndinoparadza utongi hwasatani pamusoro pomuviri wangu, ndichiupa kwamuri nokucherechedza kuti itemberi yenyu. Ndinofara mutsitsi nokunaka kwenyu.
Baba vokudenga, ndinokumbira kuti mundidzikamise murunyararo muzuva rose ranhasi, mundiratidze kupingwa, kuedzwa, kunyeperwa nokuvanzirwa chokwadi muupenyu hwangu kwandiri kuitwa nasatani.
Itai kuti ndive munhu anokufadzai. Ndipei kushinga nokutirira pakunamata. Ndirodzeiwo njere kuti mafungiro angu afanane nemafungiro enyu, kuitira kuti ndikupei nzvimbo yenyu yakakodzera muupenyu hwangu.
Ndinozvishongedza zvakare neropa rakakosha raTenzi Jesu Kristu, ndichikumbira imi Utatu Hutsvene kuti muunze muupenyu hwangu mabasa ose okurovererwa paMuchinjikwa, kumuka muvafi, kutunhidzwa nembiri, nokudzika kwaMweya mutsvene. Ndinoisa upenyu hwangu mumaoko enyu. Ndinoramba kudzokera shure.
Ndimi Mwari wechitarisiro chose. Makaratidza simba renyu nokumutsa Jesu Kristu kubva kuvafi, nokudaro mukava mukundi pamusoro pemasimba ose asatani. Ndinokunamatai nokukutendai nomuzita raTenzi Jesu Kristu. Amen.

Kunamatira kupiwa simba

“Kana ndichinge ndasimudzwa, ndichakwevera vanhu vose kwandiri”.
(Tangisa zuva roga-roga nokuita Jesu Tenzi wezuva rako)
Jesu, ndimi Tenzi wezuva idzva ranhasi, ndimi Tenzi wenguva yangu yokunamata, Tenzi wedambudziko iri kana chipingaidzo ichi, wemusangano uyu, werwendo urwu … Ndimi Tenzi wangu zuva ranhasi!
Munamato wokukumbira simba rokukunda zvinorwisa umambo hwaTenzi

Nomuzita raJesu, ndinogamuchira simba uye ndichisunga masimba ose ari mumhepo, panyika, mumvura, pasi penyika, ari munyika yavashakabvu, muzvisikwa neari mumoto. Ndimi Tenzi wedenga napasi ndinokupai mbiri nokuti ndimi musiki wezvose.
Nomuzita renyu, ndinosunga masimba ose adhiabhori ari kutirwisa isu pamwe nemhuri dzedu. Ndinoisa patiri tose rupawo rwokudzivirirwa neropa renyu rakakosha rakateurwa paMuchinjikwa.
Maria amai vedu, tinokumbira kudzivirirwa nokurevererwa kuMwoyo Mutsvene waJesu isu nemhuri dzedu, mutikomberedze nehanzu yorudo rwenyu, muvengi atizire kure nesu.
Mikaeri Mutsvene, mutumwa muchengeti wedu, uyai kuzotirwira isu nemhuri dzedu, muhondo nowakaipa uyo anofamba-famba panyika.
Saka zvino nomuzita raJesu, ndinosunga nokukarira masimba ose owakaipa kuti atizire kure nesu, misha yedu, nyika nemabasa edu. Ndinokutendai Tenzi Jesu, nokuti muri Mwari akatendeka uye azere norudo. Amen.
Kwaziwai Maria …

Kukomborerwa nezvipo zvinomwe zvinobatsira zvaMweya Mutsvene

Muzita raBaba neMwanakomana naMweya Mutsvene. Amen.
Tenzi Baba vedu vokudenga, titarireiwo nenyasha isu varanda venyu. Pamusana peropa rakakosha raJesu, ndiitireiwo nyasha ndiwane zvipo zvaMweya Mutsvene kuti ndigone kukuzivai zvakajeka, ndikudei zvakadzama nokukuteverai nguva dzose. Dzingirai kure nomuranda wenyu, njodzi dzinounzwa nowakaipa.
Mweya wakaipa, iwe wakarambwa naMwari, ndinokukarira iwe navateveri vako, kuti utize izvozvi! Ndinobvisa nokuparadza uturu hwemuchetura hwakaiswa mandiri usadzokezve kana kuva nesimba pamusoro pangu. (Tora Muchinjikwa usimudze mudenga)
Tarira Muchinjikwa waTenzi; tizai imi mweya yakaipa. Ndinokukarirai somwana weSangano Dzvene Katorike. Nomuzita raBaba neroMwanakomana naMweya mutsvene. Amen.

Mwari apindire

Posted by MC on January 7, 2016
Posted in: Uncategorized. Leave a comment

Kunamata kuti Mwari apindire

Tenzi Mwari wedu, munonzwa minamato yavaranda venyu pavanodana kwamuri, nhasi inzwaiwo munamato wangu, pandinosuma vararanda venyu ava kwamuri … (taura mazita avo). Ndinokumbira mwoyochena wenyu kuti muitirewo tsitsi nemutsa kuna … (zita). Mutungamirei kurugare norudekaro rworudo rwenyu. Mwari worudo netsitsi, munoziva zvinodiwa nevatendi, chibatsirai varanda venyu ava … (zita), mugovadzikinura kunjodzi dzingavawane. Ndinokumbira zvose izvi nomuzita raBaba neraMwanakomana neroMweya Mutsvene, zvino nokusingaperi. Amen.

Kuzvipira kunaMweya Mutsvene

Posted by MC on January 7, 2016
Posted in: Uncategorized. Leave a comment

© Musakope musina kutanga makumbira kodzero

Munamato kuna Baba pamusoro pechipo chamweya

Tenzi, zadzai pfungwa nemwoyo yedu nomoto waMweya Mutsvene kuti tigokuitirai takachena mwoyo, nomuna Kristu Tenzi wedu.
Tenzi, itai kuti iye wamakatuma achibva kwamuri avhenekere pfungwa dzedu, atisvitse kuchokwadi chakavimbiswa noMwanakomana wenyu, nomuna Kristu Tenzi wedu.
Tenzi, itai kuti Mweya Mutsvene, nokuuya kwake, achenese hana dzedu kuitira kuti panozouya Mwanakomana wenyu Tenzi wedu Jesu Kristu, awane nzvimbo yaakagadzirirwa matiri, nomuna Kristu Tenzi wedu.

Continue Reading

Kunamatira Vafi

Posted by MC on January 6, 2016
Posted in: Uncategorized. Leave a comment

©Musakope minamato iyi nechinangwa chetsvagisa mari musina kukumbira mvumo

Munamato womupriste akatisiya
Mwari, makadaidza muranda wenyu [Nhingi] kuupriste hunoera hwaJesu Kristu maererano negovero raMerikezedheki. Makamudaidza mukamupa simba guru rokupira Mupiro Usingagumi kuti aunze Muviri neRopa roMwanakomana wenyu Jesu Kristu pabisiro nokuregerera matadzo avanhu muzita renyu. Tinokutetererai kuti mutuse kutendeka kwake nokumukangamwira matadzo ake. TInokumbirawo kuti mumugamuchire nokukasika muUvepo hwenyu Hunoera, kuti agofara nokusingaperi nomubairo webasa rake. Tinokutetererai izvi nokuna Jesu Kristu Mwanakomana wenyu, Tenzi wedu. Amen.

Kunamatira vabereki vakatisiya
Mwari wenyasha, makati remekedza baba vako namai vako, nzwiraiwo tsitsi baba namai vangu, muvaregerere matadzo avo. Ndinokumbira kuti mugondisanganisa navo muchiedza chisingagumi. NomunaKristu Tenzi wedu. Amen.

Minamato yePakati Pezuva

Posted by MC on January 6, 2016
Posted in: Minamato yePakati peZuva. Leave a comment

Angere waTenzi
Vhesi: Mutumwa waTenzi akaparidza kunaMaria.
Daviro: Maria akava amai vaJesu nesimba raMweya Mutsvene.
Kwaziwai Maria …
Vhesi: Onai ndiri murandakadzi waTenzi.
Daviro: Ngazviitwe kuneni sezvamareva.
Kwaziwai Maria … Izwi akava munhu;
Akagara nesu Kwaziwai Maria …
Vhesi: Tireverereiwo, amai VaTsvene vaMwari,
Daviro: Kuti tikodzereswe kuwana zvatakapikirwa naKristu.
Ngatinamatei:
Tinokumbira Tenzi, kuti mudire nyasha dzenyu mumwoyo yedu, kuti isu takaziviswa nomutumwa, zvokuva munhu kwaKristu Mwanakomana wenyu, tigoneswe namarwadzo nomuchinjikwa wake kumuka nokuenda naye kuupenyu husingaperi. Tenzi wedu Jesu Kristu, tisvitsireiwo izvi kuna Mwari Baba. Amen. (Munguva yepasika Angere tinoita Hosi yeDenga Chifarai)

Minamato yaMwangwanani

Posted by MC on January 6, 2016
Posted in: Minamato yaMangwanani. Leave a comment

Vesi:Tenzi, vhurai miromo yedu.
Daviro: ticharumbidza zita renyu .. (Areruya)
Rwiro runoenderana nenguva yezuva kana mhemberero runogona kutevera.

Nziyo 100 (99)
(Nziyo iyi kana imwewo inogona kuitwa)
Pururudzirai TENZI
imi nyika dzose
shandirai TENZI, norufaro,
uyai pamberi pake
muchiimba.

Zvizivei kuti TENZI
ndiMwari,
ndiye akatisika
uye kuti tiri vake.
Tiri vanhu vake,
hwai dzake dzaanochengeta.

Pindai pamisuo yake mikuru
muchitenda
mupinde muminda yake
muchirumbidza,
zita rake.

Nokuti TENZI akanaka,
mwoyochena wake hauperi,
kutendeka kwake kunosvika
kuzvizvarwa nezvizvarwa.

Vakudziwe Baba …

Chiverengo
(Imwewo ndima inogona kushandiswa)
Munoziva kuti inguva yakadii; kuti nguva yakwana zvino yokuti muchimuka muhope. Usiku hwaenda kare, kwava kuda kuedza. Saka ngatichikandai pasi mabasa erima tipfeke demautare rechiedza. Ngatizvibatei sezvatinoita masikati. (VaRoma 13:11-13)

Benedictus [Ngaarumbidzwe] (Ruka 1: 68-79)
Ngaarumbidzwe Tenzi Mwari wavaIziraeri,
nokuti akashanyira vanhu vake, akavanunura;

akatimutsira Muponesi ane simba
mumba maDhavhiti muranda wake,
sokutaura kwaakaita nemiromo
yavaporofita vake VaTsvene vakare,

kuti atinunure kumhandu dzedu,
nomumaoko avose vanotivenga,
kuri kuratidza tsitsi
sokutsidza kwaakamboita
kumadzitateguru edu,
nokuyeukawo Chitenderano chake chitsvene,

nechitsidzo chaakaita
kuna baba vedu Abhurahamu,
chokwadi kana tanunurwa
mumaoko emhandu dzedu,
timushandire tisingatyi,
tichiita mabasa edu tiri VaTsvene
vakarurama pamberi pake mazuva edu ose.

Iwe mwana, uchanzi muporofita wokumusoro,
nokuti uchafanoenda mberi kwaTenzi
kunomugadzirira nzira dzake,

kupa vanhu vake ruzivo rworuponeso
ruri mukuregererwa kwamatadzo avo,
pamusana petsiye nyoro dzaMwari wedu,
apo tichabudirwa neZuva richibva kumusoro,

kuzovhenekera vagere murima
nomumumvuri worufu,
nokutitungamirira tsoka dzedu
munzira yorugare.
Vakudziwe Baba …

Reverero
(Reverero idzi kana dzimweo dzinogona kushandiswa)
Ngatinamatei kuna Kristu Tenzi wedu, zuva rinojekesera vanhu vose –
Tenzi Mununuri wedu, tipei upenyu!
(Unogona kudzokorora mushure momutsara woga woga)
Tinokutendai nechipo chezuva rino idzva –
Mweya Mutsvene ngautitungamirire kuita kuda kwenyu –
Tibatsirei kuratidza rudo rwenyu kuna vose vatinosangana navo –
Mutsurudzai zvipo zvenyu matiri. Ngatiendei norugare –
Baba vedu …

Munamato wokupedzisira
Mwari vanamasimbaose, matipa zuva ranhasi; tisimbisei nesimba renyu nokutidzivirira kusawira murutadzo kuitira kuti chipi zvacho chatinotaura, kufunga kana kuita chive chinokushandirai nokusakisa Ushe hwenyu. Tinokumbira izvi nomunaKristu Tenzi wedu. Amen.
+Tenzi ngaatikomborere atikutidzivirira kuuipi hwose nokutisvitsa kuupenyu husingaperi. Amen.

Mimwe minamato yokuzviitira inogona kusanganisira:
Baba vedu. Kwaziwai Mariya.Vakudziwe. Ndinotendera.

Muteuro
Mwari wangu, ndinokupai kufunga kwangu kwose, mazwi angu ose, zviito zvangu zvose namatambudziko angu ose; uye ndinokutetererai kuti mundipe nyasha dzenyu kuitira kuti ndisakutadzirei nhasi uno, asi kuti ndikushandirei nokuita kuda kwenyu munazvose. Ndinozvipa zvizere kutsitsi zvenyu dzisina mugumo, nhasi nenguva dzose.

Tenzi mandiunza kumavambo ezuvadzva. Ndinunurei nesimba renyu kuitira kuti ndisawira murutadzo rupi zvaro. Zvose zvandinotaura nazvose zvandinoita ngazvitungamirirwe kusakisa rugare rwenyu nomunaKristu Tenzi wedu.

Tenzi zvose zvandinoita ngazvitange nekurudziro yenyu, zvienderere norubatsiro rwenyu nokusvika kumugumo pasi petungamiro yenyu.

Muteuro wamanganani
TenziJesu nomumoyo mutsvene kwazvo waMariya ndinokupai minamato yangu yose kufunga kwangu kwose, mabasa angu ose namatambudziko angu ose anhasi kuitira zvinangwa zvose moyo chena wenyu kwazvo.
Moyo mutsvene kwazvo waJesu, ndinoisa ruvimbo rwangu rwose mamuri.
Moyo mutsvene kwazvo waJesu, ndinoisa ruvimbo rwangu rwose mamuri.
Moyo mutsvene kwazvo waJesu, ndinoisa ruvimbo rwangu rwose mamuri.

Minamato yaVarwere

Posted by MC on January 6, 2016
Posted in: Minamato yaVarwere. Leave a comment

© Musakope minamato iyi nechinangwa chokutsvagisa mari musina kukumbira mvumo

Mwari we-e, ndinorwara, handifari, asi ndinoda kutanga kukutendai pamusana pezvinhu zvose zvandinazvo, nyangwe ndichirwara. Ndinogona kuterera nokunzwa, ndinogona kutaura, ndinogona kufunga, ndinogona kunamata, ndine nguva zhinji yokunamata.
Nyangwe zvakadaro, Mwari baba, handigoni kugara ndisingabatsirwi nemi.

Mundichengete kuti ndifare, nyangwe kangave kashomanana hako:
Nditi fakanya, nyangwe ndichirwara. Musaite kuti nditsamwe nokutuka nokukumbira zvinhu zvose kuna vamwe.
Mundibatsire kuti ndikutendei pamusana pezvinhu zvose zvandinoitirwa navamwe vanhu, vanondibatsira. Komborerai varapi navanhu vose, vane hanya neni; muvabatsire kuti vawane mitoo yokundiporesa.
Chengetaiwo mwoyo wangu nomweya wangu, kuti ndisarase rupenyu rusingaperi, rwamakandipa kuti ndive narwo narini.

Mariya,Mai makapfava, tarirai kwatiri isu varwere varombo. Imi makasarudzirwa pagomo reKarivari nyasha guru guru ramarwadzo.
Isu takasarudzawo.
Saizvozvo tinoda kuzadzisa marwadzo aJesu Kristo, tichiitira muviri wake kireke.
Saka tinozvipira isu namatambudziko edu.
Muzviise paatari yemuchinjikwa yoMwana wenyu zvive wokuripira dzedu.

Mai vamarwadzo, gamuchirai kuzvipira kwedu uku. Simbisai chitarisiro chomwoyo yedu kuti sezvatinogoverana mumarwadzo aJesu Kristo zvino nomurupenyu rusingaperi.

Kunamatira murwere

Mwari muna masimba ose, mupi woupenyu, dodzokerariwo simba kumuranda wenyu kuti agokushumirai nomuviri wakasimba. Imi murapi mukuru, tirapireiwo hama yedu sokurapa kwamakamboita vana venyu vaya vamaperembudzi.
Ipaiwo murwere uyu mwoyo unotenda kana abatsirwa nomwoyo unotirira marwadzo kuti agone kupira kurwara uku kwamuri nomuna Kristo Tenzi Muponesi wedu.

Kana kuti
Baba, tarirai netsitsi mwana wenyu anotambura nokurwadziwa.
Mupei kuti anaye sokuda kwenyu.
Musimbisei, musimudzei.
Tinoziva kuti hamuna kutikanganwa, zvamakatipa kutambura.
Dururai Mweya wenyu mumwoyo yedu, nokuti ndiye Mweya wesimba nowenyaradzo.
Kuda kwenyu ngakuitwe.
Mutiratidze kuti muri padyo nesu.

Kunamatira Mwana anorwara

Jesu, imi munoda vana, tinokumbira kwamuri nokuzvininipisa
Kuti mutarire netsitsi mwana uyu anorwara, wakabhabhatidzwa mizita renyu,
Anodikanwa nesu zvikuru.
Mumutsei nesimba renyu, agoraramira imi, akudze imi nokuita mufambiro wakanaka pakati pavanhu.