© Musakope musina kutanga makumbira kodzero
Munamato kuna Baba pamusoro pechipo chamweya
Tenzi, zadzai pfungwa nemwoyo yedu nomoto waMweya Mutsvene kuti tigokuitirai takachena mwoyo, nomuna Kristu Tenzi wedu.
Tenzi, itai kuti iye wamakatuma achibva kwamuri avhenekere pfungwa dzedu, atisvitse kuchokwadi chakavimbiswa noMwanakomana wenyu, nomuna Kristu Tenzi wedu.
Tenzi, itai kuti Mweya Mutsvene, nokuuya kwake, achenese hana dzedu kuitira kuti panozouya Mwanakomana wenyu Tenzi wedu Jesu Kristu, awane nzvimbo yaakagadzirirwa matiri, nomuna Kristu Tenzi wedu.
Munamato kuna Jesu pamusoro pechipo chamweya
Tenzi Jesu, pausiku hwechirariro chokugumisira, makavimbisa kuti muchakumbira Baba kuti vatume mumwe murevereri, Mweya wechokwadi anozogara nesu nokutitungamirira.
Mushure mokukwira kwenyu kudenga, makadururira pamusoro pavapositori venyu Mweya wokuva vana vakatengwa neropa renyu. Tenzi Jesu, titumirei Mweya wenyu – Mweya weungwaru norunzwisiso, zano, ruzivo, simbararo nokutya Tenzi, iye Mweya mumwechete akaburukira pamuri achikuzodzai kuti munoparidza shoko rakanaka kuvarombo. Tenzi tibatsireiwo naMweya iyeyu kuti tive nehanya kune vamwe vanoda rubatsiro. Tiratidzei vakaitwa vana vaMwari, vagari venhaka pamwe nemi makabatana naMweya Mutsvene.
Uyai Mweya Mutsvene, musungo wokubatana norugare, chimbidzai kubatanidza vanhu vose muna Kristu; bvisai matiri denda rehondo, mugobvisazve mumwoyo yedu zvose zvinokonzera hondo nokurwisana.
Uyai Mweya Mutsvene, uyai …
Uyai Mweya Mutsvene, burukirai pane avo vakaombekwa muna Kristu; paradzai zvipingaidzo zvose zvinotipesanisa, simbisai misungo yokubatana kwedu. Tiitei vamwe mukutenda uye murudo.
Uyai Mweya Mutsvene, uyai …
Uyai mweya Mutsvene, nomutsa wenyu rapai vanorwara, gamuchirai vakarofa, batsirai vasingatendi, nyaradzai varasa tariro. Mwoyo yedu yose ngaizorore mamuri.
Uyai Mweya Mutsvene, uyai …
Tenzi ivai nenyasha kwatiri, mudurure Mweya wenyu Mutsvene mumwoyo yedu isu vaakasika muungwaru hwake uye vaanodisa nokugarobatsira. Nomuna Kristu Tenzi wedu. Amen.
Novhena neminamato kuna Mweya Mutsvene
(Mukati memazuva mapfumbamwe kubvira pakukwira kwaTenzi vedu kudenga kusvikira pakuuya kwaMweya Mutsvene chipo chaakavimbisa, vadzidzi vaJesu vainge vakaungana vachinamata pamwe naMaria amai vaJesu)
Uyai Mweya Mutsvene, pindai muzadze mwoyo yavatendi venyu; muvese moto wechido chenyu mavari. Tumai Mweya wenyu zvose zvinobva zvasikwa; Imi munobva mavandudza pasi.
Vakudzwe Baba …
Panotevera munamato wezuva kozouya zvinotevera:
Rudo rwaMwari rwakadururirwa mumwoyo yedu naMweya Mutvene anogara matiri.
Mwari makadzidzisa nechiedza chaMweya Mutsvene, mwoyo yavanotenda mamuri. Itai kuti nechipo chaMweya iyeyu tigare muchokwadi choungwaru nomufaro wokunyaradza kwaanotiita, nomuna Kristu Tenzi wedu. Amen.
Tenzi, itaiwo kuti simba raMweya Mutsvene matiri, richenese mwoyo yedu nokutidzivirira kunjodzi dzose; nomuna Kristu Tenzi wedu. Amen.
Munamato: Zuva rokutanga
Uyai Mweya Mutsvene,
Imi munyaradzi akanakisa wemwoyo inosurikirwa, diziro munjodzi, mudziviriri mumatambudziko.
Uyai Mweya Mutsvene,
Imi munochenesa mweya nokubvisa tsvina uye munoporesa pose pane ronda.
Uyai Mweya Mutsvene, simba revakaneta, rubatsiro rwevarikuputsika.
Uyai Mweya Mutsvene, mudzidzisi wemwoyo inozvininipisa; munodukupisa vanozvitutumadza mumwoyo.
Uyai Mweya Mutsvene,
Baba venherera, tarisiro yavarombo, mudzidzisi wavanoshaya.
Uyai Mweya Mutsvene,
Nyenyedzi inotungamirira vapenyu vose, ruponeso rwavakarofa.
Uyai Mweya Mutsvene,
Ndinzwireiwo tsitsi.
Munamato: Zuva rechipiri
Ndifemereiwo Imi Mweya Mutsvene, kuti ndifunge zvitsvene.
Shandai mandiri Imi Mweya Mutsvene, kuti mabasa angu ave matsvene.
Kwezverai mwoyo wangu Imi Mweya Mutsvena, kuti ndide chete zvinhu zvitsvene.
Ndisimbaradzeiwo Imi Mweya Mutsvene, kuti ndirwire zvitsvene zvose.
Ndichengetedzei Imi Mweya Mutsvene, kuti ndigare ndiri mutsvene.
Munamato: Zuva rechitatu
Mweya Mutsvene kwazvo murevereri, onai ndinozvivanzaridza pamberi penyu. Ndinokupfugamirai norudo rwakadzama. Ndinokutendai zvikuru nokukurumbidzai pamwe nechita chikuru chavavatumwa vaserafi vanomira pamberi pechigaro chenyu.
Iniwo ndino danidzira ndichiti, “Munoera, Munoera, Munoera”. Ndinotsidza kutenda kuti Imi muri Mwari muhumwe naBaba naMwanakomana. Ndinotarisira kuti murunako rwenyu, muchandinatsa uye muchaponesa mweya wangu.
Ndinokudai Imi Mwari Rudo nomwoyo wangu wose uye kupinda zvose zviri panyika, nokuti imi moga ndimi runako rusina mugumo, munokodzera kudiwa kwazvo.
Muupofu uye kusatenda kwangu, ndinogaro kukanganisirai nezvitadzo zvangu. Ndinokumbira kuti mundiregererewo. Ndinokupai mwoyo wangu uyu wakasviba usina rudo, ndichikumbira kuti muuvhenekere nechiedza chenyu uye muudziise nemoto worudo rwenyu.
Munamato: Zuva rechina
Mweya Mutsvene mupi worudo, imi makaburukira pana vapositori muri mumhepo ine simba nemumoto, makazadza imba yavaive mukavapa chipo chendimi kuti vaparidze kushamisa kwaMwari, chiburukiraiwo muneni.
Ndizadzei nemweya wenyu mundiite tembere yenyu yamunogara. Vhurai muromo wangu kuti ukurumbidzei, ukumbire kutungamirirwa nemi uye usarudze rudo rwenyu. Chiedza chitsvene, mwenje mutsvene, simba risingagumi, jekeserai pfungwa dzangu kuti dzikuzivei; zadzai mwoyo wangu kuti ukudei; simbisai chido changu kuti ndikutsvagei nekukuwanai.
Ivai kwandiri femo mhenyu raMwari rinondipa upenyu, rinondipa mweya wandinofema, denga rangu rinotandarira mweya wangu.
Munamato: Zuva rechishanu
Mweya Mutsvene, Mweya waMwari wechiedza norudo, ndinoteketera kwamuri, runzwisiso rwangu, mwoyo wangu, kuda kwangu nazvose zviri mandiri zvino nokusingaperi.
Daiwaro ndaisa runzwisiso rwangu pasi pezvose zvandinonyeverwa nedenga uye zvandinodzidziswa neSangano dzvene iro rinemi somutungamiri kuchokwadi. Itaiwo kuti mwoyo wangu ugare uine moto wechido kuna Mwari wangu nokunevamwe. Kuda kwangu, kugarowirirana nokuda kwaMwari.
Daiwo upenyu hwangu hwose, hukatodza nokutendeka, upenyu netsika dzakanaka dzaTenzi nomuponesi wedu Jesu Kristu uyo anogara achikudzwa nokurumbidzwa pamwe naBaba, kwemisi isingaperi. Amen.
Munamato: Zuva rechitanhatu
Mweya Mutsvene, munogara pamwe naBaba naMwanakomana, itai kuti denga napasi rose zviteketerwe kwamuri uye kuti mumwoyo yose yamugere imi rudo, itongwe norugare nohumwe.
Mweya Mutsvene musiki, tarisai norupfave sangano, nesimba renyu rokudenga mugoripa simba nekurichengetedza parinorwiswa nemhandu. Vandudzai muchido nenyasha mweya yavaranda venyu vamakazodza kuti vape mbiri kwamuri pamwe naBaba noMwanakomana wavo mumwechete oga.
Mweya Mutsvene, Mweya wechokwadi, uyai mupinde mumwoyo yedu muvhenekere marudzi ose nechiedza chenyu kuti tose tive nechitendero chimwechete chinokufadzai.
Munamato: Zuva rechinomwe
Mweya Mutsvene, rudo rusina mugumo rwaBaba naMwanakomana, nomuna Maria nepaatari yomwoyo waJesu, ndinokupai Tenzi, mabasa angu amazuva ose. Mashongedzei nomweya worudo rwepaMuchinjikwa.
Ndinokupai upenyu hwangu, kufa, musoro nemaoko angu, nhano yose yandinofamba, femo rangu rose, rudo rwose rwemweya wangu, kurova kwehana yangu, ndichitsidza nokutenda kuti ndichagaroteerera izwi renyu munazvose nokuita kuda kwenyu.
Munamato: Zuva rechisere
Ndinopfugama pamberi penyu Imi Mweya unogara narinhi, chita chose chedenga chichiona, ndichikupai muviri nomweya wangu. Ndinopfugamira mbiri yenyu huru. Ndinofara mukupenya kweukuru hwenyu uye chishamiso chesimba rorudo rwenyu.
Ndimi chiedza nesimba romweya wangu. Mamuri ndinogara nokurarama. Ndinoramba kuzokurwadzisai nokusatendeka kunyasha dzenyu. Ndinokumbira kuti mundichengetedze ndisakutadzirei. Itai kuti nditendeke kwamuri muna zvose nguva dzose. Muitezve kuti ndinzwe izwi renyu nokuteerera zvamunoda kuti ndiite.
Ndinokumbira kuti mundigonese kugara ndakatarisira kuchiedza chenyu nokubvuma kutungamirwa nenyasha dzenyu. Ndinozvidzemetedza pamuri ndichikumbira kuti mutsitsi dzenyu, mundichengetedzewo kuutera hwangu.
Munamato: Zuva rechipfumbamwe
Mweya Mutsvene, Mweya waJesu, makamuzodza pamusi wokuombekwa kwake naJohani, makazodza sangano rinova ndiro muviri wake nomoto pakuburukira kwenyu zuva rePendekosti, zvino burukiraiwo pasangano renyu uye napane avo vakateketerwa kwamuri, vose vakakugamuchirai pavakaombekwa, vose vakabatwa nemi pakusimbiswa, naavo vose vamakatsaura kutivavevapristi vanoshandira Mwari navanhu vose.
Tivandudzei nenyasha dzose dzatakanatswa nadzo, mutishambidze kuzvivi zvedu, tigova temberi dzenyu dzinokodzera kuti mugare. Itai kuti tikudei norudo rwunodirwa mumwoyo yedu nokuuya kwenyu kwatiri.
Munamato kuna Mweya Mutsvene
Mweya Mutsvene, ndimi wechitatu muUtatu Hutsvene hwaMwari! Ndimi Mweya wechokwadi noutsvene, munobva munaBaba noMwanakomana, makangoenzana navo munazvose! Ndinokupfugamirai ndinokudai nomwoyo wangu wose. Ndidzidzisei kuziva nokutsvaga Mwari akandisika uye wandakasikirwa. Zadzai mwoyo wangu nokutya Mwari uye rudo kwaari. Itai kuti ndirwadziwe kukutadzirai uye ndive nomwoyo murefu. Musandirega ndichiwira muchitadzo.
Wedzerai mandiri kutenda, chitarisiro norudo ndikure mutsika dzakanaka dzinofambirana nezvandiri pakukurarama. Ndibatsireizve kukura mumadzimai etsika dzakanaka (ururami, uchenjeri, usimbarari, kuzvibata), uye zvipo zvenyu zvinomwe nemichero yazvo.
Ndiitei muteveri waJesu akatendeka, mwana anoteerera sangano uye anobatsirana navamwe. Ndipeiwo nyasha dzokuti ndigone kuchengetedza mirau yenyu uye kugamuchira masakaramende ndakakodzera.
Ndisvitsei kuutsvene mukurarama daidzo yamakandishevedzera, mugondisvitsawo kumugumo wakanaka wokuzofara muupenyu husingaperi, nomuna Jesu Kristu Tenzi wedu.
Mweya Mutsvene, mupi wazvose zvakanaka, kuti zvakakodzera rukudzo nembiri yenyu, uye zvichindibatsirawo ini, ndinokumbira kuti mundipewo …
(Taura chaunokumbira).
Vakudzwe Baba …
Uyai Mweya Mutsvene, bvisai kushushikana kuri matiri mutizadze nezororo renyu rinoera.
Bvisai dutu riri matiri mutizadze nerunyararo rwenyu rwunoera.
Bvisai kusagadzikana kuri matiri mutizadze nechivimbo chenyu.
Bvisai kutya kuri matiri mutizadze nechitendero chakasimba.
Bvisai kuvava kuri matiri mutizadze nekutapira kwenyasha dzenyu.
Bvisai rima riri matiri mutizadze nechiedza chenyu chakapfava.
Bvisai kutonhora kuri matiri mutizadze nemadziya erudo rwenyu.
Bvisai usiku huri matiri mutivhenekere nomwenje wenyu.
Bvisai chando muupenyu hwedu mutipewo madziya.
Titwasanudzei kuti nzira dzedu dzakatsveyama dzishaye basa’
Gomeresai kuzvida kwedu murodze kuzvininipisa kwedu. Vesai moto worudo matiri mudzime marimi oruchiva.
Itai kuti tizvione sekutiona kwamunotiita, kuti tigokuonai sekuvimbisa kwamakaita mumashoko enyu okuti: “Vakakomborerwa vakachena pamwoyo nokuti vachaona uso hwaMwari”.
Uyai Mweya Mutsvene, pindai muzadze mwoyo yavenyu.
Tumai Mweya wenyu zvose zvinobva zvasikwa,
Imi munobva mavandudza pasi.
Uyai Mweya Mutsvene, uyai …
Ngatinamatei
Mwari makadzidzisa nechiedza chaMweya Mutsvene, mwoyo yavanotenda mamuri. Itai kuti nechipo chaMweya iyeyu tigare muchokwadi choungwaru nomufaro wokunyaradza kwaanotiita, nomuna Kristu Tenzi wedu. Amen.
Kurevererwa naMweya Mutsvene
Uyai Mweya Mutsvene, burukirai pasangano, murisimbaradze nokurivhenekera kuti rigone kunyatsoshandira ruponeso rwavose.
Uyai Mweya Mutsvene, uyai …
Uyai Mweya Mutsvene, ipai zano noungwaru kuna Papa vedu, namabhishopi ose, kuti vatungamire hwai dzenyu zvakanaka.
Uyai Mweya Mutsvene, uyai …
Uyai Mweya Mutsvene, dururirai nyasha pamusoro pevanhu venyu, dzidzisai, nyaradzai uye vhenekerai vose vakaitwa venyu.
Uyai Mweya Mutsvene, uyai …
Uyai Mweya Mutsvene, vhenekerai vanotitonga. Itai kuti vaone zvakanaka uye muvape simba rokuita zvakanaka.
Uyai Mweya Mutsvene, uyai…
Kukumbira ungwaru kuna Mweya Mutsvene
Mweya Mutsvene, pakutanga, pasi pasati panyatsoumbwa, pasina chinhu, imi muina Baba naMwanakomana, maidzengerera pamusoro pemvura. Makasika zvinhu zvose mukafemera upenyu kune chisikwa chose chipenyu. Zvino chidzikai muuye kubva kuchigaro chenyu chembiri chokudenga. Uyai.
Imi munoziva zvose, saka nditungamirirei ndive nouchenjeri munezvose zvandinoshanda uye mundidzivirire nembiri yenyu. Kuti nenzira iyi chete, zvose zvandinoita zvigamuchirwe nemi.
Kuzvipa pachena
Mweya Mutsvene, Mwari worudo ivaiwo neni, mugamuchire kuzvipa kwangu pachena kwandinoita kwamuri. Ndinokupai maoko angu, tsoka, maziso, rurimi nemhangwa dzangu dzose.
Gamuchirai ndangariro yangu, kuda kwangu, runzwisiso rwangu, befu rangu, zvishuvo uye zvinokarirwa nomweya wangu. Gamuchirai chinhambo chose choupenyu hwangu uye zvose zviri kuitika mahuri.
Mweya Mutsvene, Mwari worudo rukirai mweya wangu pamuri. Rudo rwenyu ngarwugare pandiri zvizere, mumhangwa namapangiro angu, musimba rangu, mune zvose zvandinodisa uye muupenyu hwangu. Itai kuti rudo rwenyu rwutonge pamusoro pekushanda nokuzorora kwangu. Pandinobuda nepandinodzoka, fambai neni sokuda kwenyu. Rudo rwenyu ngarwundishungurudze kana kundinyaradza, ngarwundidzikisire kana kundikwidziridza uye ngarwubvise zvikanganiso zvangu zvose.
Mweya Mutsvene, Mwari worudo, ndikwezverei kwamuri. Itai zvamunoda neni. Hapana chandichatya nokuti rudo rwenyu rwakandikomberedza. Ndinokumbira ndiine chivimbo nokuti kudisa kwenyu kupa kwakapfuura kudisa kwangu kugamuchira. Ndisandurei kuti ndisazvizive kana kuzviona pachangu, asi imi mandiri.
Munamato kuna Mweya Mutsvene
Itai kuti michero yedenga yokuzvibata, kuzvinyima noutsvene ishongedze temberi yamakasarudza kugara. Imi Mweya woUtsvene, daiwaro simba renyasha dzenyu ratiita vatsvene pano pasi nokutitungamirazve kumufaro usinamugumo.
Mweya Mutsvene tungamirai marudzi ose kuchokwadi chenyu, muvazadze nechiedza uye mupe simba kuvatumwa veShoko Rakanaka sezvamakaita vapositori pazuva rePendekosti. Dururirai Mweya worudo mumwoyo yaVaKristu vose kuti vave vamwe pamwoyo napamweya!
Mweya Mutsvene ndifemerei kuti pfungwa dzangu dzive tsvene, shandai nomandiri kuti ndiite mabasa matsvene, ndisimbaradzei kuti ndichengetedze zvinhu zvitsvene. Ndichengetedzei, kuti ndisazomborasikirwe noutvene zvakare.
Tenzi, ndipeiwo chipo chokunzwisisa, mutsa uye kushinga mukushanda pamwe nenyasha dzenyu. Tinokoka gungano ravatsvene vose uye vatumwa kuti vazotibatsira.
Muponesi wedu, inzwaiwo minamato yedu migoitawo kuti zuva ranhasi rive rakakwana
Kunamatira kuwana zvipo zvinomwe zvaMweya Mutsvene
Tenzi Jesu Kristu, musati makwira kudenga, makavimbisa kutumira Mweya Mutsvene kuti azopedzisa basa renyu mumweya yaVapositori navadzidzi venyu. Ndinokumbira kuti munditumirewo Mweya Mutsvene iyeye kuti aruramise mumweya wangu, basa renyasha norudo rwenyu.
Ndinokumbira kuti mundipewo Mweya woungwaru ndigone kusema zvinhu zvisina maturo zvapasi pano, nokuvavarira chete zvinhu zvisina mugumo.
Ndinokumbira kuti mundipewo Mweya woRunzwisiso, kuti uvhenekere pfungwa dzangu nechiedza chechokwadi chenyu.
Ndinokumbira kuti mundipewo Mweya weZano Rakanaka, kuti ndisarudze zvakanaka nzira yokufadza Mwari nokupinda denga.
Ndinokumbira kuti mundipewo Mweya woRutsungo, kuti nditakurewo pamwe nemi Muchinjikwa wangu ndiine chivindi chokukunda zvinhingamipinyu zvoruponeso rwangu.
Ndinokumbira kuti mundipewo Mweya woRuzivo, kuti ndizive Mwari uye ndizvizive pachangu, kuti ndigone kukura mukunaka mumeso aMwari.
Ndinokumbira kuti mundipewo Mweya woRunamato, kuti ndinakidzwe nokufadzwa mukuitira Mwari.
Ndinokumbira kuti mundipewo Mweya woKutya Mwari, kuti ndizadzwe norudo rwokumuremekedza nokutya kumutadzira.
Tenzi wadiwa, ndiiseiwo rupawo rwechiratidzo chavadzidzi venyu vechokwadi, Mweya wenyu uonekwe mandiri mukuita kwangu muna zvose. Amen.
KUZVITEKETERA KUNA MWARI BABA
Baba vedu …
Baba vedu vokudenga vazere norudo,
nhasi tinouya kwamuri
tichizviturira mumaoko enyu erudo.
Tinokupai kufunga kwedu,
mwoyo yedu,
kuda kwedu uye upenyu hwedu,
kuti mutishandise sokuda kwenyu.
Itai zvamunoda nesu.
Tishandisei kuti muzivikanwe,
murumbidzwe nokudiwa nepasi rose.
Itai kuti mabasa edu apupure rudo rwenyu rukuru,
miromo yedu ikurumbidzei
uye mafungiro edu abatsirwe nokufemerwa nemi bedzi.
Tinokurumbidzai, tinokupfugamirai,
tinokutendai imi moga Baba vedu vazere rudo. Amen.