Munda ngauiswe ruzhowa

Posted by MC on January 22, 2018
Posted in: Kurudziro, Ngano. 1 Comment

Kana wapihwa munda nasabhuku unogona kumbogara usina kuisa ruzhowa vanhu vachingogurira nepavanoda. Gore raunoisa ruzhowa vanhu vanotsamwa vachiti ‘avhara nzira yedu’ asi munda ndewako uye haisi nzira yavo.

Ndozvine upenyu hwakowo. Usati waisa ruzhowa rwaMweya Mutsvene muipi anoita madiro. Asi paunongoisa ruzhowa satani anogumbuka.

Usamutendera kusenerera, batanidza waya (Munamato), wokaka zvakasimba (namata nomwoyo wose). Uchamuona achipopota ari kunze asi haakusvikiri. Gadzirisa waya nguva nenguva (namata nguva-nenguva).

Madzikirira, hope dzokuvhumuka, kurwara-rwara, kugara uchishungurudzika etc, twunzira twekugurira, tuvhare nemminamato, kutsanya, kutenda, kunamata muzvokwadi, kuverenga shoko etc.

Rangarira kuti munda une waya yakakaka unoyevedza zvikuru zvokuti mombe nembudzi zvinoti idai tambopindamo. Pazvinongowanira mukana chete munda waparara. Satani ari kungomirira musi waunopererwa netariro chete kuti akutsokodzere. Tsungirira mukunamata. Usadzokere shure.

Usachema

Posted by MC on January 22, 2018
Posted in: Kurudziro, Ngano. Leave a comment

Zvinonzi, Jesu achizvifambira hake, aine mavadzidzi vake vakuda kunopinda muguta reNeini vakati dhuma-dhuma nemhomho yevanhu ichichema yakatakura mwanakomana weimwe chirikadzi akange afa. Vaitoenda kunomuviga (Ruka 7:11-15).

Jesu paakaona chirikadzi iya akangoti, ‘Musacheme …’

Ndinechokwadi kuti vazhinji vakauya parufu rwemukomana iyeye vaingoti nematambudziko vochemawo nechirikadzi yafirwa. Vamwewo ndovaiti ‘Zvemukadzi uyu zvanyanya, akafirwa nemurume manje manje iye zvino mwana afa futi, hatichazvinzwisisa.’

Vamwe vaive mubishi kuronga zuva renyaradzo. Ukapinda mudambudziko  nyika ine maonero ayo. Upenyu hunongoenderera. Asi jesu paakasvika akatanga nokuti kushirikadzi yaichema, ‘Usachema’.’ Ndokudzosa mwanakomana wayo kuupenyu.

Iwe, kana Jesu akapfuura nepauri, ‘Usachema’ nokuti anosiya amutsa zvakafa izvozvo. Kana muhomweyako yokubhengi musina chinhu ‘Usachema.’ Ukapomerwa zvausina kupara ‘Usachema.’ Vakakudzinga basa ‘Usachema.’ Wagumirwa nepfungwa ‘Usachema.’ Furiji isina kana chii ‘Usachema.’

Jesu mupenyu!

Nyange vakurase uchatumbuka

Posted by MC on January 22, 2018
Posted in: Kurudziro, Ngano. Leave a comment

Makambozvicherechedza here?

Nguva yemango tinodzidya asi chinoraswa imhodzi hatidzidi. Nyatsofungisisa marasiro aunoita mhodzi yemango. Patinorasa mhodzi yemango mundangariro dzedu tinenge tisingati here haichisina basa?

Kune hama, shamwari kana muvakidzani anokufarira kana uinezvinhu, uchiri ‘mango’ asi kana usisina chinhu anokurasa semhodzi.

Asi tarira uone … zhizha rasvika unoona mhodzi iya yakaraswa yotanga kuzvimbisa ivhu gare gare yotova muti. Mushure memakore mashoma muti uya unenge wava kutobereka dzimwe mango.

Kune vanhu wanokusveta vakaona wapera, vanokurasira kure. Vanofunga kuti tamupedza vasingazive kuti vatokudyara. Vanokuparadza vasingaziwe kuti unemukuru waunonamata, Mwari.

Ikaita dzungu icharasika

Posted by MC on January 19, 2018
Posted in: Nyambo. Leave a comment

Mumwe murume akatumwa nehuku kuendesa pamwe pamba kuMbare. Ari munzira huku yakapunyuka iye kwava kutanga kuseka zvake huku ichitiza. Mumwe mukomana akabvunza ‘Ko mudhara munosekei muchisiya huku ichienda’ zvikanzi ‘Ini ndini ndapihwa adhiresi siya iite dzungu icharasika.’

Dzidzai kuvaka dzimba dzenyu

Posted by MC on January 19, 2018
Posted in: Nyambo. Leave a comment

Mumwe mudhara akati orwara akadana vanakomana vake vaviri ndokuti kwavari, ‘Vanangu ndarwara, kana ndafa muputse imba kusvika pahwaro mufukunure muchaona bhegi rinemari. Mari iyoyo munozoigovana kuti murarame upenyu hwakanaka.’

Vana vafara. Nechomumoyo vaiti dai Mudhara achifa. Baba vaya vakazofa zvavo vana ndokudhiritsa imba iya. Vakaona bhegi zveshuwa. Vakarivhura ndokuwana muine bepa rakanzi ‘Dzidzai kuvaka dzimba dzenyu yangu ndofa nayo.’

Panhepfenyuro ndochinja chaneri

Posted by MC on January 19, 2018
Posted in: Nyambo. Leave a comment

Wakanga uri musi weSvondo mukadzi achizviimbira zvake.

Murume : Mai mwana.

Mudzimai : Matii?

Murume: Kamuimbiro kenyu dai zvenyu muchitoimba pa nhepfenyuro.

Mudzimai : kkkkk matanga ba’mwana.

Murume: Aaaa kwazvo.

Mudzimai: Asi ndoimba zvinodakadza kani 😄

Murume: Kwete, asikuti panhepfenyuro ndokwanisa kuchinja chaneri.

Uri kufamba nedzaAdhamu

Posted by MC on January 19, 2018
Posted in: Nyambo. Leave a comment

Hurombo hunoita kuti vanhu vangokuona sekuti hauna chako chaunombova nacho. Chero zvinhu zvako zvinogona kutonzi ndezveumwewo munhu. Unotonzwa wakutonzi ‘Urikufamba nedza Adhamu wotoshaya kuti ko hadzisi dzako here?’

Hakuna masaisai

Posted by MC on January 19, 2018
Posted in: Nyambo. Leave a comment

[1/11, 08:45] Mudiwa: Mudiwa, mesekji yangu haina kusvika here?

[1/11, 08:46] Mufesi: Yawati unoda mari yekugadzirwa musoro here?

[1/11, 08:46] Mudiwa: Ehe

[1/11, 08:48] Mufesi: Haina kusvika hakuna masaisai.

Mari inotenga rudo here?

Posted by MC on January 16, 2018
Posted in: Nyambo. Leave a comment

Baba T: Ndeipi chidamwoyo?

Mai T: Haiwa, unopinda nemazibhutsu ako mumba mandashaina izvezvi, asi hauone? Hauna kukwana. Uri benzi chairo iwe. Isa bhutsu  dzako panze apo!

Baba T: Ndine urombo mai mwana ndavarairwa.

Mai T: Ndokudzungaira ikoko nxaaaa!

Baba T: Waswera sei hako?

Mai T: Kuswera chii iwe wasiya $1?

Baba T: Oyi $100 iyi.

Mai T: Aaah, ndosaka ndichikuda mhani. Uri mudiwa wemwoyo wangu. Ndateda chidamwoyo. Usazvinetsa hako nebhutsu ndanga ndichingoseka newe. Isa shangu patafura apo ndichadziporisha manje manje.

Baba T: Inzwaka Mai T.

Mai T: Chii dhedhi?

Baba T: Undipe chenji yangu $99 ndisati ndarara.

Mai T: Zidzetse remunhu. Ita ugeze. Benzi, uri kunhuwa doro.

Mari inotenga rudo here?