Minyengetero

Nhanganyaya

Rungano rwemuDama Rakanaka ranhasi rungano rwako neni zvekare? Rungano rwunoti: dzikisa usvasvi hwako, shandura upenyu hwako.

Vavariro

Mumwe muPsychologist akati, “Mumwe nemumwe wedu asikwa zvokuti avavarire kuva munhu azere uye akayaruka asi vazhinji vedu tinozosara tosvika pakati pohupenyu hwedu tazvitiza!”

Vangani vedu vakazvitiza, vave kurarama pfungwa dziri kure nemiviri yavo, mweya uri kure nemiviri yavo? Vangani vedu vari kuvarira kuita savamwe vanhu – kurarama savamwe, kuita savamwe, kutaridzika savamwe uye kupfeka savamwe?

Nyaya

Mumwe murume akauya kwandiri achishungurudzika zvikuru. Aivenga basa rake uye aidemba kuti dai zvake asina kukwidziridzwa pabasa. Muhurukuro dzedu akati asati aporomotwa aiva nemufaro – aifarira zvaaiita, uye aiwirirana nevashandipamwe vake. Paakakwidziridzwa pabasa zvinhu zvakatanga kubhenda. Akatanga kushaya simba rekumukira kubasa, akatanga kushaya hope dzakanaka uye mhuri yake yakatanga kusava nomufaro.

Ndakamubvunza kuti adii hake kudzokera pachinhano chaaiva zvikanzi “Ndinoda mari inouya nekukwidziridzwa pabasa.” Mari yaiita kuti arambe ari paasina mufaro. Kazhinji tinosarudza kutambura nezvisingatipe upenyu tichiti vanhu vanozoti kudii? Zvinonyadzisa munyika yatiri kurarama kuwana chigaro chepasi kwete chepamusoro. Takafanana nevanhu vanoramba vachiraura mhiri Kunyange vachidzoka vakabata maoko.

Asi hupenyu hwakadzama kupinda zviwanikwa. Ndosaka Jesu ari kuti kwatiri dzikisai husvasvi kuburikidza neminamato. Wanai mufaro munaMwari uye kuburikidza nomwanakomana wake, wanai mufaro muhukama hwakanaka nemhuri dzenyu uye neshamwari dzakanaka, wanai mufaro mumarwadzo anouya nekuzvipira. Dzikisai husvasvi hwenyu muhupenyu hutsva.

“Dai”

Mashoko aJesu anonanganawo navose vanoimba rwiyo rwokuti ‘Dai’: dai ndiine vabereki vakasiyana nevandiinavo, dai ndakareba, dai ndiri mupfupi, dai ndisina kudaro. Kusatoti tadzidza kugamuchira zvatiri hapana kwatinoenda.

Gamuchira zvauri

Tinofanira kuzvigamuchira sezvatiri. Tinofanira kugamuchira marwadzo edu, mhosho dzatakaita kare, kukundikana kwatakasangana nako nezvimwe zvakatidzorera shure. Jesu ari kuti kandai husvasvi hwenyu kune rimwe divi. Anoziva kuti kune humwe hupenyu hwakanaka uye humwe huwandi huriko hwatisingafi takawana kana tikaramba tiri divi rimwe rehupenyu tichingochema kuti “dai”.

Vadzidzi vaJesu

Vadzidzi vaJesu vanofanira kuva vaidemba kuti “dai” vasina kutiza Jesu mugadheni regetsimani. Dai vasina kumutiza pamuchinjikwa. Pitawo anofanira kuva aiti, dai ndisina kuramba Jesu katatu.

Asi Jesu anotaura naPita. Haamuti wakanditizirei? Wakaitirei zvakaipa kudaro? Wakahugona sei hutsinye hwakadai? Jesu haamurangaridze zvekare. Anotanga kutaura naye zvanhasi nekuti ndizvo zvakakosha. Anomuti, “Unondida here?” Kanganwa zvakapfuura, usademba uchiti “dai”. Kanganwa zvedivi iro rohupenyu. Kanganwa zvekuti dai zvakadai kana kuti ndai ndisina kuita munyama. Dzikisa kusvasvi hwako.

Stephen Hawking aiva chirema asi akava muscientist wembiri. Paul Matavire aiva bofu asi akaita muimbi womukurumbira. Jarosi Jiri aiva bofu asi akaita mabasa anoshamisa. Moses Chunga anonzi haana kudzidza asi akava mutambi mukuru wenhabvu. Dzikisa husvasvi hwako.

Chero kune vanozviti takakunda, tine mari zviri kunzi dzikisai husvasvi. Dzikisai mupinde kwakadzika kune mhuri dzenyu, hukama nehama dzenyu, kuzvipira, kushandira. Musaramba muri kudivi rezviwanikwa chete. Chii chaunowana ukadzikisa husvasvi? Unowana zvakawanikwa navadzidzi: mambure akazara.