Svondo 4C roMwaka woKutsanya – Baba vaneRudo

Posted by MC on March 4, 2016
Posted in: Mwaka woKutsanya. Leave a comment

© Musakope mharidzo iyi musina mvumo

Mumwe mudzimai aidiwa zvikuru nomukomana wake. mukomana akamuti agadzirise ringi remhando iri pamusoro raanoda raizoshandiswa pamuchato wavo. Izvi zvakaitika. Asi rimwe gore ringi iri rakarasika. Mudzimai uyu chaakangorangarira ndechekuti apedzisira kutiona mukicheni maanga achimenya makarotsi. Aiziva kuti akaribvisa achida kunorigadzirisa masikati acho asi rakabva ratsakatika. Akabatsirwa navashandi kubvisa zvinhu zvose zvaiva mumba vakaritsvaga asi vakarishaya. Nmumba makatsvairwa asi ringi harina kuwanikwa. Zuva rakapfuura, svondo rakadarika, mwedzi yakapindana asi ringi harina kuwanikwa. Imba yakasvika pakudzururwa patsva pakugadzurudzwa asi zvose izvi hazvina kubatsira. Mudzimai uyu akasvika pakuora mwoyo, pakushaya chitarisiro chekuti ringi richawanikwa.

Asi rimwe zuva mugore re2013 mudzimai uyu akapinda mubindu ndokutanga kudzurira makarotsi ake. Nechekare paiva nekakaroti kaive nekanhu kanotaima kakakamonera. Akasverera padyo ndokuona kuti iringi. Akatadza kutendera zvaaiona. Akabata kuti anyatsoona kuti ichokwadi here. Chaiva chokwadi. Yaiva ringi yake yaakanga ashaya makore akawanda adarikaa. Mufaroi wakamubata. Akashaya kuti odaidzira here, iota sei. Akagara pasi ndokutanga kusvimha misodzi yomufaro. Murume wake achingosvika mudzimai akatadza kuzvidzora ndokudaidzira kuti ringi rakanga rawanikwa. Vakanga varasa chitarisiro asi pakaita chishamiso. Ringi rakawanikwa mufaro wafo ukava mukuru.

Rungano urwu runotibatsira kunzwisisa zviri kuitika muShoko Rakanaka. Mufaroi wakazadza baba zvavakawana mwana wafo akanga arasika? Kazhinji tinofunga nezvemwana – kurasika kwake, kupengenuka nokudzoka kumusha kuna baba. Asi chokwadi ndechekuti rungano urwu nderwababa, nderwomubereki anoshuvira kudi dai mwana wangu akatetereka adzoka. Rungano rwomubereki anomirira nomwoyo murefu kwenguva ndefu achitarisira kudzoka kwomwana wake. Kana mwana aching adzoka mubereki anozadzwa nomufaro mukurusa usingatsananguriki kuti mwana wangu adzoka. Rungano urwu runotipa mufananidzo waMwari – Mwari asingadi kuona ani zvake achirasika, anoda munhu wose norudo rwakakura zvisingatsananguriki. Mwari anoshuvira kuti dai wose akarasika dai adzoka kwaari, aching adzoka iye anofara somunhu ahwina rotary nokuti mwana wake anenge adzoka, anenge atendeuka anenge awana nzira yokunababa, nzira yokumusha.

Svondo 3C Mwaka woKutsanya: Tsaona

Posted by MC on February 28, 2016
Posted in: Mwaka woKutsanya. Leave a comment

© Musakope mharidzo ino nechinangwa chokutsvagisa mari musina kukumbira mvumo

Kune vamwe vanhu vanongoona divi rimwechete rezviitiko. Somuenzaniso, vhokano ikaputika kana kuti nyika ikadengenyeka guta richiparadzwa vanhu ivava vanoti vanhu vawirwa netsaona yakadai vari kurangwa naMwari. Kana chamupupuri chikavhuvhuta nesimba chichiparadza miti nemidhuri vanhu vakadai vanomhanyira kuti Mwari vaita hasha vakapanicha vanhu nokuda kwokutadza kwavo. Kangani katinonzwa vanhu vachiti mvura haisi kunaya nokuda kwamakunakuna atsamwisa Mwari. Pfunga yokuti ‘Hapana chinoitika pasina chikonzero’ yakapinda ikatyokera mupfungwa dzavamwe vanhu. Mumaonero avo zvose zvinoitika kwatiri [zvakanaka nezvakaipa] zvinoitika nokuti Mwari anechikonzero chakavandika, shatisingazivi, chatinofanira kugamuchira. Vadzidzi vaJesu vaivewo namaonero akadaro. Vakaedza kutsanangura upofu hwomurume akazvarwa asingaoni vachibvunza kuti: ‘Ndiani akatadza .. kuti murume uyu ave bofu’ (Johani 9:2).

Maonero aya anonetsa kupikisa nokuti zvinobva zvaita sokunge usingatenderi muna Mwari. Asi muShoko Rakanaka Jesu ari kupikisana zvachose namafungiro akadai. Anoti pane zvinhu zvakawanda zvinongoerekana zvaitika zvisingadi kuti timanikidzire kutsvaga chikonzero. Jesu anopa mienzaniso miviri: unechekuita nezvematongerwo neunechokuita namasikirwo ezvinhu. Anoti vanhu vakapondwa naPirato navanhu vakafa mutsaona yokutsitsirirwa neshongwe havana kupinda mutsaona iyi nokuti vaikodzera kutambura zvavakaita. Ari kusimbisa kuti zvinhu zvakawanda zvinongoerekana zvaitika pasina chikonzero. Muupenyu vanhu vatsvene vakawanda vanogona kuwirwa netsaona, uye vanhu vakaipa vakawanda vanogona kuita rombo rakanaka ravasingakodzeri. Mwari akapa rusununguko kunyika saka paine chakanaka nechakaipa.

Jesu anotidzidzisa kuti tishandure nzira dzedu zvikuru maonero atinoita kutamabura kwavamwe. Ngatinamatirei zvikuru nguva ino yoMwaka woKutsanya kuti tisiye katsika kokutongavamwe maererano nokukodzera kana kusakodzera kwavo. Ngativavarire kunyaradza munhu watinoziva ari pakati pamarwadzo kana kutambura kukuru, munhu akawirwa netsaona.

Svondo 3C Mwaka woKutsanya-Michero

Posted by MC on February 27, 2016
Posted in: Mwaka woKutsanya. Leave a comment

©Musakope maridzo iyi nechinangwa chokutsvagisa mari musina kukumbira mvumo

‘Ndichapa muonde nguva ndichiuchengeta asi ukasabereka michero ndichauparadza’
Shoko Rakanaka riri kutiyambira kuti ndishandise nguva nomazvo tichiri pano pasi. Upenyu hupfupi-pfupi nhambo yoga yoga haifaniri kutambiswa. Tinofanira kurangarira kuti chakakosha hausi huwandi hwemakore atinorarama pano pasi, asi mhando yokurarama kwatinoita.

Iwe unorarama upenyu hwakaita sei? Unoshandisa sei chipo chenguva chawakapiwa naMwari? Tiri mionde wakadyarwa pano pasi naTenzi kuti ibereke michero. Tenzi anotiitira zvose zvatinoda, anotichengetedza uye anotiratidza hanya nenzira dzakasiyana-siyana. Asi anotarisira kuti tibereke michero. Nguva yatinayo ndeyaMwari; tiri kushandisa sei nguva yaMwari? Iri ndiro dama reShoko Rakanaka. Shoko iri riri kutirangaridza kuti chinangwa chedu ndechekurwa nouipi tichigamuchira unaku; kutendeuka, kubereka michero. Hanzi tikasabereka michero tinofa.

Hondo huru nouipi iri mudzimba dzedu. Tinofanira kumira tichirwisa unhu hunokanganisa chimiro chedu saVaKristu. Somurume nomukadzi tinofanira kurwisa kuti tinzwane. Murume chaiye kana mudzimai chaiye anogoverana nemumwe wake zviri muninga romwoyo wake – zvaanonzwa, zvinomutyisa nezvaanofarira. Iyi ndonzira yatinokurira uipi nayo. Pakati pavawanani pakava nokunyengedzana kuremekedzana kunobva kwaperawo. Zvikadaro uipi hunenge hwakunda. Michero iri kutaurwa naTenzi panenge pasisina.

Muupenyu mune hondo dzevechidiki. Upenyu ruremekedzo. Asi zvinogona kuti vechidiki vanomira kuremekedza vabereki vavo pamwe nevamwe vechikuru. Vanogona kutanga kupindura vabereki nomutoo unovadzikisira. Vanogona kuva nhunzvatunzva vagova chirwadzo kuvabereki. Kana zvinhu zvakadai zvikange zvaitika uipi hunenge hwakunda, unhu hunenge hwatorerwa nounyangadzi. Saka chokutanga vabereki vane hondo huru yokurera vana nenzira inovapa chiremera. Kurera mwana ibasa guru rinorema. Rinosanganisira kuvadzivirira kunezvinokuvadza nokuvaratidza rudo ruzere. Asi rinosanganisirawo kuvarera pachitendero, kuona kuti vabereka michero yakanaka paunhu, padzidzo pamweya napachitendero. Chechipiri vana vane hondo yokuziva kuti naivowo vachakura, ndivo vatungamiri vamangwana. Vanofanira kuumba unhu hwavo, kubereka michero yakanaka kuitira mangwana.

Hondo inowanikwa zvekare mumabasa atinoshanda nemunharaunda dzatinogara. Mumabasa nomumaraini munoda mienzaniso yavanhu vakatendeka, vamire pachokwadi, uye vanechitendero chakasimba. Mumabasa nomumaraini uipihwatekeshera. Mumabasa mune muzere kurongerana, kudzikisirana, kuitirana makuhwa nokuda kuputsirana pasi. Hanzi nabob Nyabinde mune ‘Kupingana netambo dzezvipingaidzo.’ Isu savaKristu tikapinda muunhu ihwohu uipi hunenge hwakunda. Mumaraini mune kusavimbika kunoitika muukama hworudo. Vazhinji vakaroora kana kuroorwa vanotadza kuvimbika pamhiko dzavo dzomuchato. Panguva yakadai ndopanoda kuti muKristu chaiye amire pachokwadi, atendeke achengete chiremera chake, achengete muchato wake. Akadaro anenge akunda, nenge abereka michero yataurwa naTenzi.

Muzvikoro mune hondo zvekare. Vana vazhinji mazuvano vanotofanira kutirira kunyadziswa nokusekwa kana vakasarudza kuita chakanaka. Akasarudza kuva nounhu dzimwe nguva anenge watosarudza kurasikirwa neshamwari dzake. Zvinotoda chivindi chikuru kuti azvimiririre atendeke nyange zvichireva kuti acharasikirwa neshamwari uye achatarisirwa pasi. Zvinotoda kuti mwana azive kuti zviri nani kusara neshamwari shoma kana kusara woga pane kurasikirwa nounhu hwako. Ramangwana rakakosha kupinda kubvuma kurasiswa nokuda kugamuchirwa neshamwari. Kana mwana akaziva izvi anenge akunda, anenge achibereka michero yataurwa naTenzi.

Hondo iyi irimowo munyika matinofanira kurwa nazvose zvinobvisa unhu zvisinei nokuti tinorasikirwa nomukurumbira kana kuwana vavengi vakawanda. Chokwadi hatingaiti shamwai kana tichirwisana nepfungwa namaitiro okubvisa pamuviri. Vamwe vanotishora vachiti tiri kutorera munhu kodzero dzake. Chokwadi hatingava nomukurumbira tikati uori ngahupere. Vamwe vachatishora vachiti tavakuona, tavakupindira nyaya dzisiri dzedu. Chokwadi hatingave nomukurumbira tikati varombo navanoshaya ngavapiwe kodzero dzavo, pane vanovhiringwa neshoko iroro. Mbiri yenyika iri mumabatiro ainoita zvizvarwa zvayo, kuzviremekedza nokuzvikoshesa. Kana tikamiririra izvozvi tinenge tichibereka michero iri kutaurwa naTenzi.

Mumwe nemumwe wedu muonde unofanira kubereka michero. MuShoko Rakanaka nhasi Jesu ari kutiyeuchidza kuti upenyu hupfupi. Tinofanira kushandisa mukana watiinawo iwoyu kuita zvine pundutso. Nguva ndiyoyi. Ngative nechivindi chokushandisa nguva yatinayo nomazvo. Dai tabereka michero.

Svondo 3C Mwaka woKutsaya – Marwadzo

Posted by MC on February 26, 2016
Posted in: Mwaka woKutsanya. Leave a comment

©Musakope maridzo iyi nechinangwa chokutsvagisa mari musina kukumbira mvumo

MuShoko Rakanaka tanzwa nezveVaGareriya nevakafira paSiromu nokuda kwokuita kwavo. Tenzi ataurawo kuti muonde unopiwa mukana wokuita zvakanaka asi akasashanduka unowana mubairo waizvozvo. Vazhinji mazuva ano vanoti ko sei Mwari achimbobvumira matambudziko kuti aitike. sei vamwe vachiita sevanorangwa. Chokutanga Mwari haatiitire utsinye asi tinokohwa zvatinorima. tinowana mubairo wokuita kwedu watinozvitsvagira.

Imbozvitora sachiremba. Waenda kubasa nekamwana kako kadiki. Waita musikanzwa, wapinda nekamwana aka mumba inoitirwa oparesheni. Kamwana aka kaona chiremba namanesi vachisimudza munhu vomuradzika patafura. Chiremba uyu anobaya munhu uya nejekiseni obva ati tasa. Chiremba anopfeka magirovhosi, otora chigero obva atanga kuvhiya munhu uya. Anopinza ruoko rwake padumbu oburitsa chinyama maoko ake azere neropa. Unofunga kuti mwana achiona zvose izvi anoti kudii? Anofanira kuva anoti chiremba vane utsinye. Chiremba vamanikidza munhu kurara pamubhedha, vamubaya nejekiseni achibva afa, vatanga kumuvhiya maoko avo achibva azara ropa.

Mumaziso ekamwana chiremba vane utsinye. Asi iwe somunhu mukuru unoziva kuti chiremba havana utsinye, vari kutobatsira murwere neoparesheni kuti apone. Isu muupenyu hwuno dzimwe nguva kana takatarisana nemarwadzo ari mudzimba, marwadzo ari muupenyu hwedu tinoita sevana vadiki. Tinogumbukira Mwari tichiti Mwari ane utsinye, anotiregera tichirwadziwa haana hanya nesu. Tinotadza kuziva kuti mwari anotipa rusununguko rwokuzvirarudzira kuitira kuti tidzidze kubva musarudzo dzatinotora. Anoziva kuti mamwe marwadzo atinosangana nawo ioparesheni inotiponesa.

Dzimwe nguva marwadzo ari muupenyu hwedu ane chinangwa, chinangwa chokutidzidzisa. Mumwe muzvinafundo akati hapana chinhu pasi pano chinogona kuvhiringa munhu chogomubatanidza zvekare kupinda marwadzo. Marwadzo ndiye mudzidzisi mukuru muupenyu hwuno. Kunyika yeChina vane tsumo inoti ‘Kana mudzidzisi agadzirira mudzidzisi anouya oita basa rake.’ Kana iwe mudzidzi wechidzidzo choupenyu wagadzirira mudzidzisi marwadzo vanouya voita basa ravo, vokudzidzisa zvoupenyu.

Hatikurudzire kuti vanhu vatsvage marwadzo. Asi pane mamwe marwadzo akatinakira. Ngatimbotorei somuenzaniso munhu anonzwa musoro. Kune vakawanda vane dambudziko rekurwadziwa nemuroso. Marwadzo ako emusoro anogona kukudzidzisa zvinhu zvikuru. Pamwe dzidziso yaunowana ndeyekuti kune katsika karimo muupenyu hwako kaunoita kanoita kuti musoro wako ugare uchitema; katsika ikako kanofanira kuregerwa. Dzimwe nguva musoro iwoyo unotema nokuda kwekuti unoda kugara uchifadza vanhu pose paunenge uri; unoda kuti ukaita chinhu vanhu vakuti wagona. Kana pakashaya anokuti wagona unoshatirwa wotanga kutemwa nemusoro. Dzimwe nguva musoro wako unorwadza nokuti unenhongwa, unoda kuti zvinhu zvose zvigare zvichifamba zvakanaka pasakanganisike. Unoda kuti vanhu vabate nguva, unoda kuti zvinhu zvigare zvakachena, unoda kuti vanhu vataure chokwadi, unoda kuti vanhu vaimbe zvinofanira kuitwa. Saka kana pakaitwa misteki unovira nehasha. Kana uri munhu akadaro musoro wako unogona kukudzidzisa kuti vanhu havana kururama, kukanganisa kuri muvanhu.

Mamwe marwadzo anokonzerwa noruvengo kana kuti kushaya rudo. Tose tinoziva kuti kana munhu asingavimbe nezvaari, asingazvide iye pachake hapana chinhu kana munhu pasi pano anogona kumufadza. Kuzvivenga kunorwadza. Kana munhu asina rudo navamwe uye asingadiwe navamwe anosurikirwa uye anogara achizvidya mwoyo asina mufaro. Saka ruvengo runorwadza. Kana munhu asina rudo naMwari asina ukama hwakasimba hwerudo naMwari upenyu hwake hunoshaya chirevo uye anoshaya chitarisiro. Naizvozvo kuzvivenga, kuvenga vamwe uye kushaya rudo naMwari zvinounza marwadzo muupenyu hwemunhu. Chinhu chakanaka dzimwe nguva kuzvibvunza kuti marwadzo angu anokonzerwa nei. Ukateerera dzidziso yamarwadzo ako uchadzidza kuti dzimwe nguva uri munhu woruvengo.

Pane mumwe wechidiki aidzidzira zvoupikiri asi akanga asina mufaro. Akaenda kune mumwe mupriste wechikuru ndokumutaurira dambudziko rake. Muhurukuro dzavo akaudza mupriste wechikuru kuti kune mumwe munhu waakavenga. Munhu iyeye aimusvota. Aiti akamuona onzwa kushushikana. Asi kutaura chokwadi hapana chaaive amutadzira; aingomuvenga chete. Mupriste wechikuru uyu akamuti, ‘Kusvotwa kwako kuri kukonzerwa nezviri kuitika mukati mako kwete nemunhu nowawakavenga.’ Akatanga kuzvibvunza kuti zvii zviri kuitika mukati mangu? Chii chinoita kuti ndisvotwe nemunhu uyu asina kunditadzira? Akati pengenu ndokuona kuti iye somuKristo haana kuteedzera daidzo yake. Kristo anoti ida mumwe wako sokuda kwaunozviita asi iye mwoyo wake uzere noruvengo, asina rudo.

Ruvengo ndirwo rwainditambudza. Ruvengo ndirwo rwaiita kuti arware. Ruvengo ndirwo rwaindishaisa mufaro. Zvimwe tinozvisorera. ZViri kwatiri kufuka kana kuwarira. Zviri kwatiri nzira yatinotora.

Svondo 2C Mwaka woKutsanya

Posted by MC on February 21, 2016
Posted in: Mwaka woKutsanya. Leave a comment

©Musakope maridzo iyi nechinangwa chokutsvagisa mari musina kukumbira mvumo

                                                                      Kudaidzwa murudo

Rungano
Kune imwe parishi yandakashanda, ndaisangana neboka ramadzimai gumi namashanu kamwechete pasvondo. Pamisangano yedu taigoverana zvinetsva zvinetswa zvomudzimba tichipana mazano. Mutemo weboka waiva wokuti kana dambudziko rako rapera wobuda uchipa vamwe mukana wekubatsirwa.
Asi takaita mumwe mudzimai akaramba achingouya asi aigara mukona akati zii pasina chaaitaura. Akatishamisa rimwe zuva paakagoverana nesu rungano rungano runobata mwoyo (Akati udzai zvenyu vamwe vagobatsirika). Zita rake ainzi Kupenya. Aia neshamwari inonzi Munyaradzi uye akanga akaroorwa negweta rine mukurumbira rainzi Mudiwa.
Hanzi naKupenya murume wangu aishanda nesimba. Aibva pamba runganangwana ndirere dzimwe nguva odzoka usiku ndirere. Dzimwe nguva aidzoka akapakatira mabhegi maviri azere nemafaera ekubasa. Aingopinda mumba akananga pakombiuta yake ini ndomuunzira chikudya ikoko otanga kudya achipedzisa basa rake. Aizosara ozopedza ndatorara. Mazuva aainge asina basa ainge akarukutika zvokuti aingoti rabada pasofa tichiona chivhitivhiti. Kupenya anoti ndakatanga kuzviona seruva rinopenya, rinoevedza rakagadzikwa ndokukanganikwa muvharanda kusvikira rasvava, rauna kupenya kwose kwapera.
Kupenya anoti rimwe zuva Munyaradzi akandishanyira akanzwa tsitsi achindiona. Akanditi nhai Kupenya hindava kuzvibata huyanga. Nhumbi dzako hadzisi kuyevedza, chiso chako hachisi kuvaima. Akanditi ndigeze, ndokuoenda neni kunogadzirwa musoro. Ndakatora nguva ndichiiswa wivhi. Tabvapo ndakanopodeswa nokukwenenzverwa kumeso. Tsiye nenzara zvakapendwa. Ndakazoendwa neni zvekare kunotengerwa hanzu, shangu dzegogo neheti yemurara ine munhenga zvemari yepamusoro ndikapfekedzwa. Ndakatengerwawo hendibhegi ndokubatiswa muruwoko.
Hanzi tadzokera kumba ndakagariswa musofa ndichiita kunge mudzimai wemutungamiri wenyika akamirira kukwira ndege. Zvose izvi zvaindipusisa asi Kupenya aifara zvisina ani ati amboona. Akatanga kukanga kanga nokufurayafuraya ini ndakangoti go ndichizvidya mwoyo. Ndiri kufunga kudaro murume wangu akati pfacha hana yangu ndokurova. Akanditi ba ndokukanda mabhurifikesi ake pasi, ndokusvikondimbundira akatanga kuchema. Akati, ‘Kupenya ndineurombo. Kupenya ndinokuda nemwoyo wose.’
Hanzi panguva iyoyo chiso changu chakabva chabwinya. Chakapenya kwete nokuda kwehembe, shangu kana heti yomurara yandakanga ndakapfeka. Kwete nokuti ndaive ndagadzirwa musoro nokupendwa nokukwenenzverwa. Chiso changu chakapenya nokuti kekutanga mushure memakore akawanda ndakanzwa zita rangu richidaidzwa murudo.
Dzidziso
Chinoshandura zvizere hazvisi zvinhu asi kuziva kuti ndinodiwa zvechokwadi, rudo. Chinopenyesa munhu kuziva kuti mudikani wangu kana vadikani vangu vane hanya neni. Rudo nehanya ndizvo zvinoshandura nokupenyesa. Izvi ndozvakaitika pana Kupenya, akashandurwa nokuziva kuti ndinodiwa mumwe wangu ane hanya neni.
Izvi ndozvakaitika kuna Jesu ari pagomo. Jesu aive nechinangwa muupenyu chokutendeutsa hwai dzakarasika dzevana veIsraeri. Chinangwa chake chokuunza umambo hwedenga pasi pano, kuitira varombo vanorwara nevakadzvanyirirwa. Dambudziko raiva rekuti vazhinji vaisamunzwisisa. Vadzidzi vake chaivo vaisamunzwisisa. Vakuru vakuru vaisamunzwisisa. Vamwe vavo vaitomuvenga nokumurongera. Akatiwo adzinge mweya yakaipa ainzi mabasa aSatani. Akati aregerere matadzo ainzi kuzvidza Mwari. NOkuda kwazvose izvi akazvika pakunetseka nokuva nemibvunzo yakawanda. Pada ndosaka akati ava paKesariya Firipi akabvunza vadzidzi vake kuti vanhu vanombonditi ndini ani. Hapana akagona kunyatsomutsanangura, hapana aimunzwisisa.
Ipapo Jesu ndipo paanokwira mugomo naPita naJemisi naJowani kuti anonamata. Zvinonzi vari ipapo pamusoro pegomo pakanzwikwawo izwi richiti ‘Uyu ndiye Mwanakomana wangu wandinodisa.’ Ari pakati pokunetseka, ari pakati pokuvhiringika, asisina chokwadi nedaidzo yake izwi rake rinodaidzwa murudo. Chiso chake chinobva chashanduka chopenya. Paanozoburuka kubva mugomo anenge azara noruvimbo rwezvaari, anenge azvipira kuenderera mberi nerwendo rwoupenyu, kushandira chinangwa chake.
Mashoko akanaka anoshandura. Mashoko erudo anoshandura, Kana munhu ari mumatambudziko, ari achivhiringika anoshandurwa neruzivo rwokuti ndinodiwa; mudikani wangu navadikanwi vangu vanhu vane hanya neni. Shoko rinobva mumukanwa rinogona kuputsa kana kuvaka, kudzima kana kubatidza, kunyangadza kana kunakisa, kusakisa rima kana kupenyesa. Varipo vane unyadzvi hwokudzima mufaro wavamwe. Varipo vanotaura mashoko anogodora nokunyangadza. Charenji yedu muMwaka uno woKutsanya ndeiyi: ndiri munhu anoshandura vanhu nemashoko akanaka here? Zvii zvandingaite muMwaka uno woKutsanya kushandura vamwe ndichivaita kuti vafare? Ndiri munhu anodaidza mazita avamwe murudo here?

Svondo 1C Mwaka woKutsanya

Posted by MC on February 14, 2016
Posted in: Mwaka woKutsanya. Leave a comment

©Musakope maridzo iyi nechinangwa chokutsvagisa mari musina kukumbira mvumo

Rungano
Pane anorwadza akataurwa imwe nguva nemumwe mudzimai anorwira kodzero dzamadzimai. Mashoko ake anotambudza, kwete chete nokuti anopa chimiro chisina kunaka pamusoro pamadzimai, asi anopadzidziso yakaipa maererano noupenyu. Zvakaitika ndozvekuti mumwe mutungamiri akaroora akatorwa mwoyo netsvarakadenga ndokuiita chikomba. Nyaya iyi yakaita mukurumbira pasi rose nokuti vanhu vakashamiswa kuti mutungamiri ane chiremera kudai apindwa nei kuti aite ‘small house.’
Nyaya iyi yakati ichiri kupisa-pisa mudzimai anorwira kodzero dzamadzimai ndokubvunzurudzwa pachivhiti-vhiti. Akabvunzwa maonero ake ndokupindura achiti, ‘Mudzimai uyu (small house) hapana chaakatadza. Mazuva ano kuti munhukadzi abudirire muupenyu anofanira kushandisa simba rake, muviri wake kuwana chose chaanoda.’ Iyi ndiyo miedzo makuru yatinotarisana nayo mazuva ano: Kushandisa simba redu namatarenda edu kuwana chose chatinoda!
Zviwanire zvaunoda
MuShoko Rakakana ranhasi Jesu ari kupikisana nemudzimai uyu. Ririkudzidziswa kuti hapana chakaipa kuzviwanira zvaunoda, asi unofanira kutungamidza Mwari mukuzviwanira zvaunoda. Nguva dzose zvibvunze kuti Mwari anoti kudii nemawaniro andiri kuita zvinhu? Nzira dzandiri kushandisa kuwana zvandinoda dzine Umwari mukati here?
Tikaongorora kuedzwa kwaJesu tinoona kuti aiedzwa nezvinhu zvaanofarira. Aiedzwa kuti ashandise nzira dzokudimbudzira pakuwana zvaanoda. Jesu akanga agara mugwenga kwenguva yakareba, aziya nenzara, saka Muedzi aimuti shandisa nzira dzokudimbudzira kuti uwane chokudya (Ruka 4:3). Jesu aida kuti vanhu vazive kuti ndimambo saka Muedzi aimuti shandisa nzira yokudimbudzira; ndipfugamire, kuti uwane umambo (Ruka 4:6). Jesu aida kuti vanhu vateerere zvaaitaura saka Muedzi aimuti shandisa nzira yokudimbudzira; ita mapipi kuti vanhu vakuteerere (Ruka 4:9). Neimwe nzira Jesu ainzi bvuma kushandiswa neni Muedzi kuti uwane zvose zvaunoda.
Jesu akakunda miedzo yose iyi. Mhinduro yake yaiva imwechete: Ndinofanira kushandisa nzira dzoUmwari kuzviwanira zvose zvandinoda. Miedzi anouya kwatiri nguva nenguva, tinokunda here? Zvokudya zvedu tinozviwana nenzira dzipi? Mabasa edu tinomawana sei? Zvigaro zvedu tinozviwana nomutoo upi? Upfumi hwedu tinohuwana nenzira dzakati twasa here? Pokupera kwezuva: ‘Munhu haararame nechingwa choga asi neshoko rinobva kunaMwari,’ ‘Unofanira kugwadamira Tenzi oga,’ ‘Usaedze Mwaryi wako.’
Shandisa tarenda zvisiri izvo
Miedzo iyi miedzo zvakare yokuti tishandise zvipo zvedu kana kana kuti matarenda edu nenzira dzisiriidzo. Muedzi anogona kuuya okuti shandisa tarenda rako kuti uzviwanire zvaunoda. Jesu akanzi, ‘Shandisa tarenda rako kuti uwane chokudya. Ndipe mwoyo wako kuti uwane umambo. Shandisa tarenda rako kuti vanhu vakuteerere. Iwe une zvipo zvakawanda. Muedzi anogona kuuya kwauri oti, ‘Shandisa tarenda rako rokuparidza kurasisa vanhu. Shandisa chipo chako chokutaura kupesanisa vanhu. Shandisa tarenda rako renjere kudzvanyirira vanhu.Shandisa tarenda rako kuzviwanira zvose zvaunoda.
‘Puruvha’
Nyatsoongororai muedzo wekutanga nowechitatu muone. Pamuedzo wekutanga Jesu akanga apedza mazuva makumi mana ari mugwenga achitsanya. Akati aziya nenzara Muedzi ndokuuya kwaari zvikanzi, ‘Kana uri mwana waMwari sandura matombo ave chingwa.’ Pamuedzo wechitatu Jesu akanzi, ‘Kana uri mwana waMwari svetuka kubva pamusoro petembere Mwari achatumira ngirozi dzokugamha.’ Simba remiedzo iyi riri pakuti ‘Kana uri …’ Muedzi ndokuedza kwaanoita. Anoti ‘Kana uri … puruvha kuti.’ Kana uri mwana waMwari puruvha. Vechidiki vazhinji vari kukurirwa nemuedzo iwoyu. Vakomana vazhinji vakarasikirwa noupenyu hwavo nokuda kwekuti vaida kupuruvha kuti varume chaivo. Vasikana vazhinji vakapinda muna taisireva nekuti vainzi ‘Kana uri … puruvha.’ ‘Kana uchindida puruvha.’
Mhedziso
Jesu akakunda miedzo yose iyi nokuda kwechikonzero chimwechete: kuzviziva. Aiziva kuti ndiani, aizviziva. Jesu aiziva kuti mwana waMwari. Iwe kana uchida kukunda miedzo iyi unofanira kuzviziva. Unofanira kuziva kuti uri mwana waMwari. Jesu akati kuguta kana nzara ndiri mwana waMwari. Kuwana kana kushaya ndiri mwana waMwari. Umambo kana uranda ndiri mwana waMwari. Mapipi kana kushaya mapipi ndiri mwana waMwari. Ukaziva zvauri, ukaziva zvaunoda hausairirwe kwose kwose.

Svondo 5 reGore C: Kuzviziva

Posted by MC on February 7, 2016
Posted in: Mharidzo dzamasvondo, Uncategorized. Leave a comment

Kana iwe ukatarisa zvitadzo zvako dzimwe nguva unopererwa nokushaya simba. Ukatarisa zvawakataura nomuromo wako unobva wazviona uri munhu ane muromo wakan’ora. Ukatarisa nzira dzawakafamba unoti handikonzeri kunzi mwana waMwari. Ukatarira zvawakabata unoti Mwari ibvai pandiri ndiri mutadzi. Varipo pakati pedu vanozvisvora. Varipo vakamira kugamuchira Yukaristiya nokuda kwezvavakasenga mumwoyo yavo. Vamwe vakasvika pakukanda mapfumo pasi, vakarega kuuya kukereke, vakarasa chivimbo nezvavari.
Mumwe akanyora achiti:
Vanoshaya kunzvimbo dzakasiyana-siyana
Vanoenda kunyika dzakasiyana-siyana
Vanonoona matongo eZimbabwe
Ini handina chikonzero chekunoona matongo eZimbabwe
Nokuti zviri mukati mangu zvakaoma
Ndine matongo mandiri
Mandiri mune nzvimbo dzasakara
Handifungi kuti Mwari achine chekuita neni
Ichokwadi, pakati pedu pane vazhinji vasina chikonzero chekuenda kure kumatongo eKami, matongo eZimbabwe. Vane matongo makuru aripadyo, arimukati. Kana vakazvitarisa vanoti Mwari ndakan’ora, handikodzeri kunzi mwana wenyu. Mwari siyanai neni, ndiri mutadzi!
Izaya, Pauro naPita
Muzviverengo zvanhasi tiri kusangana navanhu vatatu vane utera hwavo, vane zvitadzo zvavo, vane matongo avo. Vanhu ava vanoti kana vakazvitarisa voti takan’ora, hatikodzeri, tiri vatadzi. Vanhu ava vanozvitarisira pasi, havavimbi nezvavari nokuda kwamatongo ari muupenyu hwavo.

Wokutanga, Izaya, tinosangana naye muchiverengo chokutanga. Izaya ari mutembere maanosangana naMwari mutsvene, Mwari anoera. Anozvitarisa obva aona tsvina dzake, uye kutadza kwake. Mwari paanomudaidza anoti, ‘Mwari handikodzeri nokuti ndiri murume wemiromo yakan’ora. Zvandakataura nemiromo yangu zvakakomba zvekuti handikodzeri kuita muporofita wenyu, handikodzeri kuita basa renyu.’

Wechipiri, Pauro, tinosangana naye muchiverengo chechipiri. Pauro anotondera zvaaibata namaoko ake, kushusha kwaaiita vana vaMwari. Anorangarira kushandiswa kwaaiitwa naSatani kuita mabasa eumhondi. Anotarisa zvose izvi obva atarisa nyasha dzaMwari norudo rwaMwari oti, ‘Ini ndini wokupedzisira, ndini mudiki pavapositori vose. Handitokodzeri kunzi mupositori nokuti ndakashungurudza sangano raMwari.’

Wokupedzisira, Pita, tinosangana naye muShoko Rakanaka. Vakuru vakati hove huru dzinodyira rovira. Pita navamwe vake vainzwisisa izvozvo ndosaka vakabinduka usiku hwose vachiedza kubata hove, asi hapana chavakabata. Akati ava manganani Jesu akauya kwavari zvikanzi nyudzai mambure enyu kwakadzika tione. Vakanyudza ndokubata hove dzakawandisa. Pita achiona izvi kuti hove dzakawanda kudai dzabatwa masikati machena akabva aona kuti uku kuita kwaMwari chete. Akabva azvitarisa ndokuona kukoniwa kwake, ndokuona kutadza kwake akati, ‘Tenzi ibvai zvenyu pandiri nokuti ndiri mutadzi.’
Kuzviziva
Kana takatarisa varume vatatu ava tinoona kuti vakazviongorora vakaona zvavari. Vakazvitarisa vakaona kuti netsvina dzavo, nematongo avo, nezvitadzo zvavo havana kukodzera kumira pamberi paMwari mutsvene. Vanhu vatatu ava vakazviziva. Kuzviziva uku ndokwakaita kuti vagamuchire utera hwavo, ndokwakaita kuti vazive pavanotangira nepavanogumira; vazive zvavanogona nezvavasingagone.

Vazhinji vedu hatizvizivi. Kune vakawanda vanofunga kuti vanoziva. Kune vakawanda vanofunga kuti vatsvene. Vanhu vakadai vane njodzi. Vanotyisa nokuti vanogona kuita zvinhu zvinokuvadzisa vamwe vachifunga kuti vari kugona. Vanhu ivava vari nyore kurasika nokuti havadzoreke, ndivanamaziva zvose. Chinhu chinotonga muupenyu hwavo kuzvikudza, vanozvitutumadza.

Shoko raMwari riri kuti kune uyo wose ari kutambudzika nezvaakataura, nenzira dzaakafamba, nezvaakabata kuzviziva chinhu chakanaka, chisina kuipa. Kuzviziva ndohwaro hwokuti ufambire mberi. Pauro ari kuti, ‘Kana ndiine utera ndopandine simba.’ (2 VaKorinde 12:10). Kana ukaziva utera hwako unoziva paunotangira nepaunogumira. Ukaziva utera hwako unozvidukupisa. Mumwe mupikiri akati, ‘Ukaziva utera hwako unozvidukupisa uye unoita shungu dzekudzidza. Munhu anofunga kuti ndichamangwiza anoputirwa nokuzvikudza otadza kuona kukosha kwaMwari muupenyu hwake.’ Sokireti akatiwo, ‘Munhu, zvizive.’
Todii?
Kuziva zvauri kana kuti kuziva utera hwako hakufanire kuva chikonzero chinokutadzisa kudaira daidzo yaMwari kana kuenderera mberi noupenyu. Izaya paakati muromo wangu wakan’ora haana kuramba achingodzengaira achizvidemba achizvisvora. Akagamuchira ruregerero rwaMwari ndokuenderera mberi neupenyu hwake. Izaya akagamuchira ruregerero rwaMwari zvikanzi ‘Ndiri pano nditumei henyu.’
Pauro zvaakaziva kuti upenyu hwake hwakare hwaisemesa, zvaakaziva kuti nzira dzaakafamba dzinonyadzisa haana kuramba achingozvidemba. Akati ‘Hapana chingaitike kwandiri chinokurira kuziva Kristo. Zvandingataure ndezvokuti ndinokanganwa zvakare ndichifambira mberi.’

Upenyu hwaPita hwakasandurwa kubva musi waakasangana naJesu pagungwa. Haana kuramba ari pagungwa achingoti ndiri mutadzi, ndiri mutadzi kwete. Pita akatevera Jesu akava muredzi wavanhu akava ruware rwakatakura sangano. Iye zvino tinorangarira Pita semutsvene akaita zvinhu zvinoshamisa.

Iwe nhasi uno simuka ufambire mberi neupenyu hwako. Ita savanhu vemujawo wokumhanya vachijamba matanda. Usati kana wadonha woramba ugere uchizvichema. Simuka! Mhanya! Mwari haanei neutera hwako anotoda kukushandisa kuti uite zvinhu zvikuru. Paunenge uine utera ndipo paunotofanira kuita simba. Chigamuchira ruregerero raMwari. Ita saIzaya. Ita saPauro. Ita saPita.

Svondo 5 reGore C: Kukoniwa

Posted by MC on February 7, 2016
Posted in: Mharidzo dzamasvondo, Uncategorized. Leave a comment

©Musakope maridzo iyi nechinangwa chokutsvagisa mari musina kukumbira mvumo

Pita aive muredzi wehove. Aive nebasa rake rakanaka rokuraura raimuraramisa. Upenyu hwake noupenyu hwemhuri yake zvaimira netarenda rake rokuraura. Vashandi vake nemhuri dzavo vaiwana mufaro unobva pabasa raitungamirirwa naPita.

Pita anofanira kuva aine nguva dzaaibudirira, bhizimusi richifamba zvinhu zvichifamba. Asi tiri kusangana naye zvinhu zvakaoma, achikoniwa pabasa rake rokuredza. Anofanira kuva aishungurudzika, achizvibvunza mibvunzo yakawanda. Zvichabuda here? Zvichafamba here? Ndozvirega here? Vazhinji vedu tinoziva zvinoitika kana zvinhu zvisingafambe, uchikundikana. Zvinorwadza zvekuti dzimwe nguva unosvika pakuti ndozvirega. Unosvika pakuora mwoyo.

Vangani vedu vakapinda musvitsa vazere nechitarisiro? Zvinhu zvichifaya. Rudo ruzere. Mhuri ichikura. Asi zvakasvika pakuoma, takasvika pakukundikana mibvunzo ikatanga kunaya. Ndoenderera mberi here? Zvinobuda here? Pamwe pacho takasvika pakuzvitonga nokuzvipa mhosva.

Vangani vedu vakatanga mabhizimusi vazere nechitarisiro nomufaro mukuru? Nematangiro azvakaita taiti ramangwana rakajeka, tichabudirira. Asi takasvika pakukoniwa, zvakangoti mbombombo. Takasvika pakuodzwa mwoyo nokushunguridzika, tikatanga kuzviona samadofo.

Upenyu hune mhingidzo dzakawanda dzinotidzorera shure. Pauro achinyorera VaEfeso anoti, ‘Hondo yedu haisi hondo yenyama neropa asi yasimba asingaonekwi, masimba erima.’ Aiyeuchidza vagari vomuEfeso kuti hondo dzoupenyu ihondo namasimba enyika, masimba akatikomberedza, masimba anoda kutiparadza, anoda kukanganisa mweya yedu. Masimba anoda kutiita vanhu vakakoniwa, vanhu vakaruza. Masimba anotidzosera shure.

Izaya, watanzwa muchiverengo chokutanga, akasangana nehondo dzimwechetedzo. Nyika yake kakanga yapatsanurwa napakati. Hurumende youdzvanyiriri yakapamba chimwe chitsuwa vamwe ndokuendeswa kuupoteri kuBhabhironi kunobatiswa chibharo. Chitsuwa chakasara chakanga chava pakati pehondo yokupandukirana. Chitendero chakanga chadzikira. Unhu hwakanga hwarasika. Mambo Uzaya akanga arasika achiita zvinosvodesa. Vatungamiri vehurumende vaisada kumuteerera. Vanhu vaisada kumunzwa. Vamwe vaida kumuuraya. Panguva iyoyo Izaya anosvika pakuda kukanda mapfuumo pasi. Mweya wake wakaremerwa. Anotanga kuzvidya mwoyo. Asi Mwari anotaura naye. Anomuti ndinoda kukutuma uite basa rangu. Izaya aizviziva, aiziva kukoniwa kwake, aiziva paanogumira. Asi akaisa ruvimbo rwake muna Mwari akati hongu nditumei.

Pita panguva yaakanga akaomerwa akapiwa mukana. Akanzi naKristu imboedza zvandinokuudza. Akatora mukana iwoyo. Akapa Mwari chinhu choga chaaive nacho, chitarisiro noruvimbo kukundwa kwake kukashanduka kuva kukunda. Pita akabvuma kuti mutadzi, ndokuva dombo rakava hwaro hwakavakirwa Sangano naJesu. Jesu aiti kuna Pita, ‘Ndinoziva utera hwako. Ndinoziva kukoniwa kwako. Asi ndipe zvauinazvo ndikupe zvakakosha zvandiinazvo.’

Tikatarisa rungano rwaPauro, Pita naIzaya tinodzidza chidzidzo chikuru: kupa Mwari mukana. Izaya nounyanzvi hwake hwouporofita akapa Mwari mukana. Pita nounyanzvi hwake hwokuredza akapa Mwari mukana. Vamwe vedu nounyanzi hwedu tinotadza kupa Mwari mukana. Muchato wnagu haufi wakashanda ndinozviziva. Zvakakona. Vana vangu havadzoreki ndinozviziva zvakakona. Bhizimusi rangu harina kwarinoenda. Zvekwedu nzinozviziva. Mari yandinotambira ishoma handifi ndakatenga imba. Muvengi wangu ndinomuziva hapana chinoshanduka.

Asi Izaya naPita varikutiratidza kuti panaMwari hapana chisingagoneki. Vanhu vane mavanga kazhinji vanova varapi vakuru. Vanhu vaisiraradza kazhinji vanova vanunuri vevari mudambudziko redoro. Vanhu vanononoka kubata kazhinji vanoita varairidzi vembiri. Vakawanda vakanzi hauna tarenda rokumhanya vakazove nyadzvi. Vakawanda vainzi haugoni kuimba vakazova nomukurumbira.

Mukundi haakande mapfumo pasi, anoramwa haakundi. Mukundi anoisa zvose mumaoko aMwari. Kana tikasapa zvatiinazvo kuna Mwari tichatadza kukunda. Izaya saPita akapiwa mikana pakati pokukoniwa kwake. Akatora mukana iwoyo akati, ‘Ndiri pano, nditumei Tenzi.’ Pita akareurura matadzo ake akanzwa iwi raJesu richiti, ‘Usatya. Kubva nhasi uchava muredzi wavanhu.’ Pita akagamuchira mukana waakapiwa akava mutungamiriri wavapositori.

Mubvunzo ndowekuti iwe uchaita sei watarisana nokukoniwa kwako? Uchaona kukoniwa somukana wokukunda here? Uchaita saIzaya naPita here? Rangarira zviri kwauri kukunda kana kufoira. Hapana anokuitira basa. Chitendero chako ndochinokukundisa. Ukafunga kuti uri dofo uchava dofo. Ukatenda muna Mwari womupa zvose uchakunda. Pana Mwari hapana chisingagoneki. Asi zvose zviri mumaoko ako, kufuga kana kuwarira.

Minamato yaManheru

Posted by MC on February 5, 2016
Posted in: Minamato yaManheru. Leave a comment

Vhesi: Mwari uyai kuzotiyamura.
Daviro: Chimbidzai kuzotibatsira.
Vakudizwe Baba …

Rwiyo rwakafanira panguva yezuva kana mhemberero runogona kutevera, somuenzanisi:
Utatu usande hwechiedza,
kubatana korunoko runesimba
Zuva rinopisa zvino roenda
whenekerai mumoyo yedu miranzi yenyu

kwamuri rumbo rwamanganani rwokurumbidza
kwamuri rumbo rwamauro rwokurumbidza

Mbiri izere tinoremekedza
nemisi isingaperi.

Rukudzo rwose ngaruve kuna Mwari Baba
Kurumbidza kwose kuMwanakomana anorarama narini
kutunhidza kuna Mwari Mutsigiri Mutsvene. Amen.

Nziyo 16
Ndichengetei Mwari
nokuti ndinopotera kwamuri.
Ndinoti kuna TENZI,
‘Imi ndimi TENZI wangu.
Kunze kwenyu imi
handina chimwe chakanaka.’

Varurami vari munyika
ndivo vokumba huru.
Ndinofadzwa kwazvo navo.
Vanozvisarudzira mumwe mwari,
vanozviwanzira nhamo.
Handisi kuzopira kwavari miteuro yeropa.
Handifi ndadaidza mazita avo nomuromo wangu.

TENZI ndiye mugove wangu nenhaka yangu.
Nhaka yangu iri mumaoko ake.
Muganhu wangu waenda napakanaka.
hakusi kunaka ikoko kwakaita nhaka yangu.
Ndinorumbidza TENZI
anondipa mazano kunyange usiku,
mwoyo wangu unondinyevera.
Ndinoisa TENZI mberi kwangu nguva dzose;
nokuti ari kurudyi rwangu handitsuduguki.
naizvozvo moyo wangu unofara,
mweya wangu unopemberera;
kana muviri wangu uchava norugare.
hamungandiregi ndichienda kunzvimbo yavakafa;
kana kurega mururami wenyu achienda muguva.
Munondiratidza nzira youpenyu;
pamuri ndipo pane rufaro ruzere
kurudyi kwenyu kune rufaro nokusingaperi.
Vakudziwe baba …

Chiverengo
(Imwewo ndima inogona kushandiswa)
Ngaarumbidzwe Mwari Baba vatenzi wedu Jesu Kristu, Baba vetsitsi, Mwari anonyaradza muna zvose!=, anotinyaradza mumatambudziko edu ose, kuti tikwanisewo kunyaradza vamwe vanenge vari mumatambudziko api naapi zvawo nokunyaradzwa ikoko kwatinenge taitwa naMwari. (2 Vakorinde 1:3-4)

Rwiyo rwaMariya (Ruka 1: 46-55)
Mutungamiri: Ngatichirumbidzai nokutenda Mwari namazwi akaiswa pamuromo paMariya.
Ini ndinokurumbidzai Tenzi nomwoyo wangu wose, mweya wanguwo unopemberera Mwari muponesi wangu,
Nokuti akatarisa netsiye nyoro murandanhando wake,
Chionai, kubvira zvino marudzi ose achanditi munatswi,
Nokuti Samasimba akandiitira zvinhu zvikuru,
zita rake rinoera.
Anonzwira tsitsi avo vanomutya,
kubvira chizvarwa nechizvarwa,
Anoita zvina masimba noruoko rwake,
anoparadza vanozvikudza nendangariro dzemwoyo yavo.
Anobvisa vanyamasimba pazvigaro zvavo,
achisimudzira vanhunhando.
Vane nzara anovagutsa nezvinhu zvakanaka,
vapfumi anovaendesa vasina.
Akabatsira Isiraeri muranda wake,
sezvaakatsidzira madzibaba edu.
Akayeukawo tsitsi dzake kuna Abhurahamu nokuna vedzinza rake nemisi isingaperi.
Vakudziwe Baba …

Mikumbiro
(Munogona kusevenzesa mikumbiro iri pano kana mimwewo)

Umambo hwenyu hworugare noruenzaniso ngauzadziswe pasi sokudenga-
Tenz, inzwai minamato yedu.
(Daviro iyi inogona kudzokororwa mushure memutsara woga woga)
Zviratidzei kuna vose vanokutsvagai nomwoyo wose –
Tenzi Jesu Kristu, chiedza chenyika dzose, whenekerai vose vanofamba murima nomumumvuri worufu.
– ivai navose vanotambudzwa nepfungwa, muviri kana mweya.
– ratidzai tsitsi kuvafi; itai kuti vagopemberera pamwe naMariya Mhandara yakakomborerewa naVaTsvene venyu –
Baba vedu …

Munamato wokupedzisira
Tenzi, munamato wedu ngaukwire kwamuri sechipfungautsi, uye makomborere enyu ngaadururwe patiri kuitira kuti nyasha dzenyu dzitirape nokutinunura zvino narini. Tinokmbira izvi nomunaKristu Tenzi wedu. Amen. + Tenzi ngaatikobmorere, atichengetedze kubva kuuipi nokutisvitsva kuupenyu husingaperi.

Mimwewo minamato yokusviitira inogona kusanganisira:
Baba vedu. Kwaziwai Mariya. Vakudziwe Baba. Ndinotendera.

Mwari wangu, ndinokutendai nezvipo zvose zvandakagamuchira kazhinji kubva kwamuri, zvikuru sei zuva ranhasi. Ndipei chiedza chokuona matadzo andapara, uye ndipei nyasha dzokuapfidza nomoyo wose. (Mungazvibvunza hana kwekanguva kapfupi).

Mwari wangu, nokuti makanakisa, ndine urombo zvikuru kuti ndakakutadzirai uye norubatsiro rwenyasha dzenyu handichakutadzirei zvakare.

Pakuenda kunorara
Tenzi mumaoko enyu ndinoisa mweya wangu: Tenzi Jesu Kristu gamuchirai mweya wangu. Muzita raTenzi Jesu akarovererwa pamuchinjikwa ndizorodzei. Ndikomborerei, Tenzi, mundidzivirire; ndichengetedzei kubva kurufu runokaruka rauya ndisina kugadzirira nokunjodzi dzose; uye ndisvitsei kuupenyu husingapesi pamwe nemi.

Svondo 4 reGore C

Posted by MC on January 31, 2016
Posted in: Mharidzo dzamasvondo, Uncategorized. Leave a comment

Zvinopa hasha zvikuru kuziva kuti wanyeperwa, wabatwa kumeso. Tinoda chokwadi Kunyange chokwadi chacho chichirwadza. Unoda kuti chiremba akubudire pachena kuti une chirwere chegomarara. Unonzwa sei kana chiremba akaziva kuti unegomarara urega kukuudza? Zviri nani kuudzwa chokwadi pane kuvanzirwa uchiudzwa manyepo.

Zvinorwadza kuziva kuti mwana wako haasi kukona muchikoro. Asi unonzwa sei kana murairidzi wake akasakuudza chokwadi kuti mwana idofo achida kukufadza nenhema?

Shoko Rakanaka ranhasi rinotiudza nezvaJesu adzokera kwaakakurira. Anotanga nokugamuchirwa nomufaro mukuru. Zvanzi, ‘Vose vaivapo vakataura zvakanaka pamusoro pake. Vaka shamiswa nemashoko ake anofadza.’ Asi nenguva isipi ruyemuro rwavo runoshanduka ruchiva ruvengo. Nenguva isipi vanomutora voenda naye vachida kunomusairira pamusoro pegomo kuti afe. Vaida kusairira chokwadi kuti chitsakatike. Vakapandukira Jesu Nokuti akavaudza chokwadi chavakanga vasingade kunzwa.

Akanga avati kudii? Akavarangaridza nezva Eriya muporofita. Pane nguva yavakaona nhamo mugore renzara vanhu vachifa. Asi Eriya akaenda kushirikadzi yaive nechitendero kwete kumuJudha akanomununura. Ruponeso rwakaenda kumutorwa anechitendero kwete kumuJudha. Akavaudzawo rungano rwaErisha. CHirwere chamaperembudzi chakakondombera muIziraeri asi Eriya akabatsira munhu mumwe, mutorwa kwete mumwe wavo.

Chokwadi ichi chakavarwadza zvikuru. Akanga apfurikidza mwero. Aitaura nezverudo kumunhu wese kwete kuvaJudha chete. Aivaudza kuti Mwari haazi wavo voga. Mashoko aya aigodora.

TInogona kutarisana nedambudziko rimwechetero nhasi uno. Tinogona kuda kunzwa mashoko anotifadza chete nokuagamuchira asi tigoviruka nehasha kana tikaudzwa mashoko anopikisana nesu. Panogona kuita dambudziko tikaudzwa chokwadi chinotiti tishanduke, tishandure maonero edu, mafungiro edu zviito zvedu. Panogona kuita dambudziko tikanzi ida vorumwe rudzi, madzimai anofanir akuremekedzwa. Zivi ndozvakaitika kuna Jesu. Aivati vashandure hunhu hwavo, maonero avo avanozviita, avanoita Mwari, avanoita vamwe vanhu. Chakabva chabvondoka!

Asi Shoka Rakanaka rine dama riri pachena. Jesu ari kuti Mwari anoda munhu wose. Pauro ari kutaura murwiyo rwake achiti Mwari rudo. Mwari haana rusaruro. Mwari anoda munhu wose norudo rusina mhondwa. Rudo rune mowyo munyoro, rudo rune rupfave … Izvi ndozviri Mwari.

Maperero anoita Shoko Rakanaka anonakidza. Mushure mokuvaudza chokwadi, rusaruro rwavo runovadzimaidza, runovapofomadza. Vakaputirwa nehasha. Jesu akasvika kufamba napakati pavo asi Havana kumbomuona nokuda korusaruro rwakavadzimaidza. Jesu anouya kwatiri nenzira nhando nguva zhinji asi tinogona kutadza kumuona nokuda korusaruro. Anouya nomuvarombo, muvanhukadzi, munevanematambudziko akasiyana-siyana, muvatorwa. Tichamuona here? Pafunge.