Svondo 11C reGore – Kuona Chakanaka

Posted by MC on June 12, 2016
Posted in: Mharidzo dzamasvondo, Uncategorized. Leave a comment

© Musakope mharidzo iyi musina mvumo

MuShoko Rakanaka tiri kusangana nomudzimai anemukurumbira worutadzo. Mudzimai uyu anopinda mumba yokudyira izere vanhurume osvikoratidza rudo rwake kunaJesu. Ndiye oga watinonzwa mumaShoko Akanaka ose kuti anouya kuna Jesu akagadzirira kumushandira nokumuratidza chido chakanyanya. Misodzi yake inosuka tsoka dzaJesu idzo dzaanopukuta nebvudzi rake; anotsoda dzoka dzaJesu kakawanda; anozora tsoka idzi namafuta. Anoita zvose izvi muchinyararire. Kutaura kwake kuri muzviito apo anoratidza rudo kuna Jesu.

Mushanyirwi waJesu anoshamisika nechiitiko ichi. Kwaari kuva mutadzi zvinoreva kun’ora. Asi izvi zvose zviri kuitika mumba yake yokudyira! Sei Jesu abvumidza zvinhu zvakadai?

Jesu anobvunza Simioni mubvunzo wakakosha: ‘Simioni, urikuona mudzimai uyu here?’ ipapo ndopane dambudziko. Simioni haaone mudzimai. Simioni anoona chirwere. Ichokwadi kuti mudzimai uyu mutadzi anemukurumbira. Asi kana tikashandisa chokwadi chatinoziva pamusoro pavanhu kuvadzikisira tinovanza chokwadi chinovakoshesa. Pane mashandisiro echokwadi anovanza chokwadi chizere. Uye pane musiyano mukuru pakati pokutaura chokwadi nokutaura chokwadi murudo. Simioni anoona chokwadi chinoparadza ochimbambashira.

Tinoona vamwe saJesu here – kuvaona nomutoo unovabvumidza kuva naramangana rakajeka? Ruregerero runokurudzira vanhu kuti vashanduke; ruregerero runobatsira vanhu kuti vavambe upenyu utsva. Dai waro ukama hwedu nevamwe hwava hwokuvabatsira kuva naramangwana rakajeka.

Svondo 11C reGore -Nyasha dzaMwari

Posted by MC on June 10, 2016
Posted in: Mharidzo dzamasvondo, Uncategorized. Leave a comment

© Musakope mharidzo iyi musina mvumo

Muzviverengo zvedu zviri pamusoro pokutendeuka, kusiya zvivi, kuregererwa pamwe nokuvamba upenyu utsva. Ruregerero runotipa upenyu utsva. Simba raMwari rokuregerera rinosunungura kubva kunezvakare richitiita vana vake pamwe nokutipa simba rokusarudza zvatinoda kuva. Ruregerero runoburitsa kubva kuupenyu hwakare ruchitipindza muupenyu utsva hwomufaro norusununguko.

MuChiverengo Chokutanga tinonzwa nezvorutadzo rukuru rwaMambo Dhaviti. Dhavhiti anoshandisa simba rake kuuraya mumwe wavatungamiri veuto rake anonzi Uraya napamusana poundyire. Chinangwa chake chaiva chokupfudza umboo hwokuti akanga atorera Uraya mudzimai wake, Bhatishebha. Asi vakuru vanoti rinemanyanga hariputirwi. Utsinye hwake hwakabuda pachena. Dhavhiti aikodzera mutongo mukurusa. Nathani mutumwa waMwari anomuvinga omubvunza pamusoro pemhosva iyi. Dhavhiti anobvuma mhosva yake oratidza kupfidza nomwoyo wose. Mwari anomuregerera. Iye anogamuchira ngoni dzaTenzi achizova mambo anemukurumbira munhororondo yavaIziraeri. Nyasha dzaTenzi dzinogonesa Dhavhiti kuvamba upenyu utsva. Mubvunzo ndewokuti: ‘Nderupi rutadzo rungatitadzisa kuwana rudo rwaMwari kana tichinge tatendeuka tapfidza matadzo edu sezvakaita Dhavhiti?’

MuChiverengo Chechipiri tinosangana naPauro. Pauro muupenyu hwake hwakare aiva muFarisiya. Akanga akadzidza zvikuru ari muzvinafundo pamutemo waMhozisi. Asi zvino arikutaura navatenderi vachangovamba boka paGaratiya achivati mutemo unonongedzera rutadzo asi haunongedzere ruregerero nenyasha dzaMwari. Mutemo unoratidza zvinorambidzwa asi unogona kutadza kusvitsva parudo, ngoni, noruregerero rwaMwari. Pane musiyanao pakati pokurarama mumutemo nokurarama munyasha nomurudo. Iye Pauro pachake akambenge achirarama mumutemo asi asingararame munyasha. Upenyu hwake hwakavamba patsva paakaziva kuti nyasha norudo zvinokosha kupinda mutemo. Chinhu chikurusa muupenyu kuziva kuti Mwari vanotida uye vanotiitira nyasha.

MuShoko Rakanaka tinosangana nomuzvinafundo womutemo uye mukuru wechitendero chechiJudha. Zvisinei nedzidzo yake anoratidza kusava norudo, rugare uye mwoyo munyoro. Muenzi wake Jesu afamba rwendo rurefu muguruva naizvozvo ava nenyota, adikitira uye arukutika. Kunze kwokuti amugamuchire nemvura, amugamuchire netsvodi uye amuzore mafuta anodzinga gwema nokurapa maronda hapana zvaanoita. Anoita searikuti ‘Handinei newe, handikupi rugare rwangu, handina hanya newe.’

Zvinotadzikwa nomurume uyu zvinoitwa nomudzimai asina kufunda, anembiri yorutadzo asi azere norudo. Mudzimai uyu anogamuchira Jesu nomwoyo wake wose. Izvi zvinokonzera muzvinafundo wemutemo kusvora Jesu kuti atadza kuona rutadzo rwomudzimai, zvinomukonzera kutongera mudzimai uyu. Asi Jesu kunze kwokuona rutadzo anoona rudo, anoregerera mudzimai uyu, anomuitira nyasha. Jesu haamutonge anomunzwira tsitsi. Varipo vanotitonga, asi Tenzi anotigamuchira sezvatiri anotiitira nyasha.

Tingava tine mhosho dzakawanda. Tingava tine zvivi zvakawanda. Hazvinei kuti takaita sei tinofanira kuva vanhu vanerudo somudzimai uyu. Hatifaniri kutya. Tinofanira kusvedera padyo naTenzi iye achatiitira nyasha. Kazhinji tinosangana naye muSakaramende roruwadzano maanoda kutidira ngoni dzake dzizere.

 

Svondo 10C reGore – Kuunza Mutsauko

Posted by MC on June 5, 2016
Posted in: Mharidzo dzamasvondo, Uncategorized. Leave a comment

© Musakope mharidzo iyi musina mvumo

MuShoko Rakanaka Jesu anoswedera padyo nekamwe kaguta kadiki paanosangana nemudungwe wavanhu vari pamariro. Mufi anonzi ijaya rakanga riri zai regondo reimwe shirikadzi. Shirikadzi iyi iri pakati pokunyaradzwa negurumwandira ravavakidzani vayo. Hapana anokumbira Jesu kuti abatsire nokudaro Jesu anogona kungotarisawo savamwe. Anogona kuokera mudungwe uchipfuura kuenda kumarinda. Hapana anodaidzira achimukumbira kuti abatsire. Haatarisirwi kubatikana nekurasikirwa kweshirikadzi iyi.

Asi Ruka anotiudza kuti Jesu anobatwa mwoyo paanoona shirikadzi iyi iine misodzi pamatama. Jesu anotora matanho nokuti anehanya. Anoudza shirikadzi iyi kuti isacheme obata rukukwe rwakaradzikwa chitunha. Mudungwe wemariro unomira. Nokuda kwezwi rinobva mumuromo make chitunha chinosimuka chotanga kutaura zvekare. Jesu anodzorera jaya kunamai varo. Vanhu vanopemberera vachirumbidza Mwari vachibvuma kuti Jesu muporofita wechokwadi nokuda kwezvaaita.

Nguva zhinji tinoona zvivhitivhiti nokuverenga mapepanhau pamusoro pemarwadzo nokurasikirwa kwavazhinji pasi rose. Kazhinji tinongotarisa vanhu vachitambura asi tichipererwa nezvekuita. Hatina simba rokudzorera upenyu hwavafi kuhama dzavo dzinenge dzichichema. Hatina simba rokududza mazwi okumutsa zvitunha saJesu. Asi pane mazwi atinogona kutaura kuburikidza neminamato yedu tichinamatira vanorwadziwa navanorasikirwa. Sokutaura kwaTeresa wokuRisu: ‘Ngatisanete kunamata: ushingi kunounza zvishamiso.’

Svondo 10C reGore -Kudzorerwa Upenyu

Posted by MC on June 4, 2016
Posted in: Mharidzo dzamasvondo, Uncategorized. Leave a comment

© Musakope mharidzo iyi musina mvumo

Vamwe mai vakafirwa nemwanakomana. Vari pakati pokuchema vakakumbira baba vezvomweya kuti vavape mushonga unodzosera upenyu hwemwana wavo. Baba vezvomweya vakafunga ndokuzoti kuna mai vaya ‘endai munotsvaga tsanga yechibage pamhuri isingazive rufu, isina kuwirwa nenhamo. Tsanga iyoyo ndiyo yatichashandisa kugadzira mushonga wamunoda.’ Mai vaya vakatenderera  mumisha yakasiyana-siyana, varombo navapfumi asi vaingoudzwa nonhorondo yenhamo. Pokupedzisira vakati chokwadi hapana musha usina kunanzwa rufu. Muchidzidzo chokutanga mune rufu, chechipiri chine rufu, Shoko Rakanaka rine rufu.

Dingindira riri kubuda muzvidzidzo zvanhasi zviri zvitatu nderekufa nokudzorerwa kweupenyu utsva. Muchiverengo chechipiri Pauro anotaura nezvokutendeuka kwake. Pauro akanga akafanana nomunhu akafa. Asi nokuda kwekusangana kwaakaita naKristo akadzorerwa upenyu hwake. Akanga akafa nokuda kweunhu hwake. Akadzorerwa upenyu nokuda kwerudo rwaKristo. Saka muzvidzidzo zvedu zvose tiri kusangana navanhu vakafa. Vaviri vakafa panyama. Mumwechete akafa pamweya.

Kufa kuri pakawanda. Izvi tinozviona murungano runotevera. Zuva rokunamatira varwere Baba vezvomweya vakadaidza shirikadzi kuti dziuye mberi vagodzinamatira. Vamwe mai vakasimuka ndokufamba vachienda mberi. Murume wacho akatanga kudaidzira achiti ‘Iwe Orifa! Iwe Orifa! Baba vati shiri kadzi kwete vanhu vane varume.’ Mai vaya vakati ‘Unofunga kuti uri mupenyu here ipapa.’ Umwe hunhu hunotiita zvitunha. Pakati pedu pane vakawanda vanofamba asi vakafa kare. Neimwe nzira mhuri imwe neimwe ine zvitunha zvayo.

 

Muno muchechi vakawanda vari kuchema rufu kana kuti vakatofa ivo pachavo:-

  • Vamwe vari kuchema muchato wavo.
  • Vamwe vari kuchema mwana akarasika.
  • Vamwe vari kuchema ukama hwakaparara.
  • Vamwe vari kuchema basa rakapera.
  • Vamwe vari kuchema mwana, murume, mudzimai kana hama yakafa panyama.

Mukuchema kwedu ngatizivei kuti Mwari ndiye anodzorera upenyu. Sekutaura kwaPauro, nekuda kwenyasha dzaMwari tinopiwa upenyu. Upenyu hwedu chipo chinobva kuna Mwari. Chipo chatinopiwa kuti tizadzise chinangwa chedu panyika.

Pauro akadzoserwa upenyu kuti ave chapupu chaKristo, kuti ave mudziyo waKristo, kuti ape vanhu mufaro, rugare nechitarisiro. Isu Mwari vanoda kutidzosera upenyu.

  • Vanoda kudzosera muchato wako.
  • Vanoda kudzosera mwana wako.
  • Vanoda kudzosera ukama hwako.
  • Vanoda kudzosera basa rako.

Kana waitirwa izvi usazokanganwa kutenda Mwari. ‘Kana wakomborerwa usasokanganwa kutenda Mwari.’ Tinotenda sei? Nekuzadzisa chinangwa chako panyika. Kumuda, kuda vamwe, kuva muddziyo wakristo. Kuva chapupu chakristo. Kuva mudziyo werugare. Ndosaka tichiimba tichiti: ‘Ndiiteiwo mudziyo worugare.’

Zuva roMuviri neRopa raKristu

Posted by MC on May 25, 2016
Posted in: Mazuva Makuru, Muviri neRopa raKristu. Leave a comment

©Musakope mharidzo iyi musina mvumo

Nhasi tiri kupemberera zuva guru remuviri neropa raKristo. Ini ndinoda kuongorora zuva iri ndakanangana neMisa. Pamisa tine chiitiko chakakosha chatinoti Konzekiresioni. Pachiitiko ichi muPriste anotaura akamirira Jesu kuti ‘Torai mudye uyu muviri wangu, torai munwe iri iropa rangu.’

Uyu muviri wangu

Pachirairo chokugumisira Jesu akabata chingwa akatenda ndokuti ‘Uyu muviri wangu, torai mudye.’ Izwi rokuti ‘muviri’ harireve nhengo yemunhu kwete asi rinoreva munhu wese sezvaari kana kuti upenyu hwose hwomunhu. Naizvozvo kana Jesu achiti ‘Uyu muviri wangu, torai’ anoreva kuti ndinokupai upenyu hwangu hwose. Ndinokupai dikita rangu, ndinokupai rufaro rwangu, ndinokupai matarenda angu. Ndinokupai zvose zvandiri.

Iri iropa rangu

Jesu akazobatawo mukombe uzere newaini ndokutendazve akaupa kuvadzidzi vake achiti ‘iri iropa rangu, torai munwe.’ Ropa haingori nhengo yomuviri chete, asi rinomirira rufu. Kudeuka kweropa, zvinoreva rufu. Naizvozvo kana Jesu achiti ‘Torai, iri iropa rangu’ anoreva kuti ndinokupai zvose zvinomirira rufu muupenyu hwangu. Ndinokupai kunyadziswa kwangu, ndinokupai kusvorwa kwangu, ndinokupai kusekwa kwangu namarwadzo angu.

Muchidimbu pamisa tinopira chishamiso choupenyu norufu rwaKristo.

Isu tiri vapriste

Jesu akati itai izvi kuti mundiyeuke nazvo. Tinopirawo upenyu norufu rwedu pamwe naye. Mupriste paanoti ‘Torai mudye uyu muviri wangu, torai munwe iri iropa rangu’ anofanira kureva zvaanenge achitaura. Anofanira kupa upenyu hwake kuvatenderi, nokufa pazvido zvake achizvipira kuvatenderi.

Isu takaitwawo vapriste nepapatisimo. Tinogona kuita muchinyararise kuti ‘uyu muviri wangu, torai’ tichitopira upenyu hwedu sezvo tati muviri unomirira upenyu hwose hwemunhu. Panguva iyoyo unofanira kupira nguva yako, midziyo yako, mhuri yako, utano hwako, matarenda ako, simba rako, kugona kwako. Unofanira kupira zvose zvinechekuita neupenyu hwako.

Unofanira zvakare kubatana nomupriste uchiita muchinyararire kuti ‘iri iropa rangu.’ Sezvo ropa richimirira rufu unofanira kupira zvose zvinomirira rufu muupenyu hwako. Unofanira kupira kunyadziswa kwako, kukoniwa kwako, urwere hwako, kunyeyewa kwako. Unofanira kupira zvose zvinomirira rufu muupenyu hwako.

Ita sezvawareva pamisa

Kana uchinge wazvipira zvechokwadi pamisa sezvizvi unofanira kuti uchibuda muMisa wonozvipira zvechokwadi. Ngazvirege kuperera pamuromo. Jesu paakati kuvadzidzi vake ‘torai uyu muviri wangu, torai iri iropa rangu’ haana kuzombopedza nguva akabva aenda kunoita zvaareva. Akabva aenda kunopira upenyu hwake nokudeura ropa rake pamuchinjikwa.

Iwe unofanirawo kuti uchipedza kuti ‘torai mudye, torai munwe’ wobuda muchechi woenda kunozvibvumidza kudyiwa navamwe vanhu, zvikuru sei vavengi vako kana kuti vausinganzwisisane navo. Jesu anoti iye muna Mateo 5:46-47, ‘ko kana muchida vanokudai, munowana mubairo wei, ko vateresi havaite saizvozvo here? Ko kana muchingokwazisa hama dzenyu chete, chii chamunokunda vamwe nacho ipapo?’

Iginashiyasi wekuAndioku akatongerwa rufu rwokudyiwa neshumba, akati ari munzira ndokuti, ‘ini ndiri tsanga yaKristo yakamirira kugaiwa nezvikara kuti igova chingwa chakatsetseka chaKristo.’ Iwe ukazvitarisa unogona kutaura kuti pane mazino akapinza ari kunditsenga. Mazino eruvengo, mazino ekupikiswa. Nyange zvakadaro zvibvumidze kugaiwa nemazino iwayo, zviite yukaristiya. Dzimwe nguva vanhu vanokupikisa vakakosha muupenyu hwako kupinda avo vanokureverera. Ignitius anonyora mune imwe tsamba zvakare achiti ‘vanhu vanondireverera vachindirumbidza vanondirova neshamhu.’

Kurarama Yukaristiya

Kana tikatanga kurarama Yukaristiya nematsananguriro andaita upenyu hwedu hunotanga kushanduka. Kana baba vagere muno muchechi vakati ‘torai mudye, torai munwe’ voenda kumba kwavo vonodyiwa nevana vavo, vonoitwa Yukaristiya nemudzimai wavo, nehama dzavo upenyu hwavo hunenge hwava misa. Kana ini somupriste ndikati ‘torai mudye, torai munwe’ ndoenda kunoita basa rangu, ndichinamata, ndichiparidza, ndichiita maconfessions, ndichiona vanhu, ndichitara varwere upenyu hwangu hunenge hwava Yukaristiya, hunenge hwava misa. Hanzi nemurume anonzi Oliviant ‘Pamisa yamangwanani ini ndinenge ndiri mupriste, Kristo anenge ari chibayiro. Asi pakati pezuva Kristo anenge ari mupriste, ini ndinenge ndiri chibairo.’ Ngativei yukaristiya, ngativei chibayiro kune vamwe.

Muviri neRopa raKristu- Pfugamiro

Posted by MC on May 25, 2016
Posted in: Mazuva Makuru, Muviri neRopa raKristu. 1 Comment

© Musakope mharidzo iyi musina mvumo

Kana Kristo arimo zvirokwazvo musakaramende rearitari zvinoreva kuti tinofanira kumushanyira nguva nenguva. Dai zvaibvira waitora maminitsi 10 kana 15 zuva roga roga uchikurukurirana naKristo musakaramende dzvene.

Ini ndinoona izvi zvichindibatsira zvikuru. Pose pandinoshanyira sakaramende dzvene ndinoona ukama hwangu naMwari huchisimba. Ndinowanzoti kana ndava kushanyira sakaramende dzvene ndotakura kabhuku kemunamato kana bhaibheri kuitira kuzvibatsira kana pfungwa dzave kutetereka. Dzimwe nguva ndinongoita munamato unobva mumwoyo mangu ndichiuudza Jesu zvandiri kunzwa nemifungo yangu. Kana ndiine dambudziko gukutu ndinoudza Jesu. Kazhinji kana ndave kubuda muchechi ndinobatwa nepfungwa inobva yandipa zano padambudziko rangu. Izvi zvakaitika kakawanda saka ndinotendera kuti iyi ndiyo nzira yandinodairwa nayo naKristo.

Dzimwe nguva kana ndakaneta ndisina chekutaura ndinongogara pamberi paKristo ndichiziva kuti iye aneni. Vamwe sista vanonzi Bridge Makenna vanofamba nyika dzakasiyana-siyana vanotora maawa 3 zuva roga roga rakasikwa naTenzi vari pamberi pesakaramende. Vane basa rakawanda asi vanototi vawane nguva yekukurukurirana naKristo. Sista ava vanoti ‘haisi nyore kupfugama pamberi pesakaramende. Kazhinji unoshaya zvekutaura kana kuti pfungwa dzinotanga kutetereka. Panogonawo kuita sepasina chiri kuitika. Asi nyange pakaita sepasina chiri kuitika iwe ziva kuti shanduko ichauya muupenyu hwako.’

Sista Makenna vanopa muenzaniso. Hanzi rimwe zuva ndakati ndaenda kunokurukurirana naJesu ndakaneta ndikanoti kwaari nhasi handina chekutaura asi ndinoda kuti uzive kuti ndinokuda. Jesu akandipindura akati hausungirwe kutaura chinhu kwandiri nguva dzose, ini ndini ndine zvandinoda kukuitira. Hanzi ipapo ndakaona mufananidzo wemurungu aibuda mumba achinogara pazuva kuti adziye mushana. Mushure mechinguva ruvara rweganda rake rwakatanga kushanduka. Vanhu vaipfuura nepo vaizviona. Iyewo ainzwa shanduko iyi asi hapana chaaita sechiri kuitika. Izwi raMwari rakabva rati kwandiri izvi ndizvo zvimwechete newe. Ukauya kwandiri panoita sepasina shanduko asi vanhu vanoonashanduko muzviito zvako nehunhu hwako.

Saka nhasi ndinoda kuti tikurukurirane naKristo Musakaramende dzvene. Arimo zviro kwazvo musakaramende iri. Akamirira anoda kutaura nesu.

Muviri neRopa raKristu-Chishamiso

Posted by MC on May 25, 2016
Posted in: Mazuva Makuru, Muviri neRopa raKristu. Leave a comment

© Musakope mharidzo iyi musina mvumo

Kuti tinzwisise zvinoreva chiitiko chokupamhidzirwa kwechingwa tinofanira kuverenga Jowani 6. Ipapo tinonzwa kuti vanhu vakakwira zvikepe ndokutanga kutsvaga Jesu vachida chimwe chingwa. Jesu akaedza kuvatsanangurira dzidziso yakanga yakaoma yokuti iye ndiye chingwa chinopa upenyu:

Ndini chingwa choupenyu. Madzitateguru enyu akadya mana murenje asi vakafa. Ichi ndicho chingwa chakaburuka chichibva kudenga chokuti anenge achidya haazofa. Ini ndini chingwa choupenyu chakaburuka chichibva kudenga munhu anodya chingwa ichi achararama nokusingaperi. Chingwa chandichapa kuti chive upenyu hwapasi pose inyama yangu pachangu. (Jowani 6:48-51)

Jesu paakataura mashoko aya vanhu vakaremerwa nawo. Vakakahadzika kuti anorevei kana achiti ‘kudya nyama yangu nekunwa ropa rangu.’ Vakati ‘zviri kutaurwa izvi zvakaoma. Ndiani angateedzere zvakadai?’

Chishamiso chaJesu waive mucherechedzo wechingwa newaini zvaaizopira pazuva rechirariro chekugumisira. Zvino mazuva ano tinoona kuti varipo vanhu vanonetseka nekutendera chimisteriya chekuti chingwa newaini zvatinopira pamisa inyama neropa raJesu.

Ini ndiri mudiki ndichidzidzira kugamuchira ndichiri kurangarira mudzidzisi wechitendero achiedza kutsanangudza kuti panguva yekonzekresioni chingwa newaini zvinoshandurwa zvichiva muviri neropa raKristo. Mudzidzisi uyu aiti mumaziso edu tinenge tichiona chingwa newaini asi kana zvakomborerwa zvinenge zvatova muviri neropa raKristo. Ini ndakaedza nepfungwa dzangu dzemwana mudiki kunzwisisa dzidziso iyi asi yakandiremera. Ndaizvinetsa kuti ko munhu wenyama angagokwana mukachingwa kadiki aka chirudzii? Ko doro ringagoita ropa remunhu chirudzii? Mudzidzisi uyu akaona kunetseka kwangu zvikanzi ‘Mwanangu haugone kunzwisisa dzidziso iyi nepfungwa dzako asi nemwoyo wako.’ Mwari haana here kodzero yekuzviratidza nenzira yaanoda?

Munhororondo yeKirike mune vanhu vakawanda vakanyunyuta kuti chingwa newaini zvinoshandurwa zvichiva muviri neropa raKristo. Zvino Mwari akaita zvishamiso zvakawanda zvinopa umboo hwokuti dzidziso iyi ndeyechokwadi. Ndichangokutaurirai zvitatu chete nekuda kwenguva.

Mugore re700 paive nemumwe mupriste wechita chaBhasiri aigara muguta reRanziano kunyika yavaTariana ainzi Bhateri. Murume uyu aisatendera kuti chingwa newaini zvinoshanduka panguva yekonzekresioni zvichiva muviri neropa raKristo. Zvisinei akaramba achingoita muteuro weMisa kunyange aisatendera. Mumwe musi ari pakati pekuita muteuro weMisa panguva yeKonzekresioni chingwa chakashanduka kuita denderedzwa renyama waini ndokushanduka kuita ropa.

Mupriste uyu akambotanga nekurohwa nehana ndokuzozadzwa nemufaro mukuru. Akadaidza vatenderi vaive muchechi kuti vauye mberi vazvionere. Vatenderi vakauya vakaona vakazadzwa nomufaro ndokubuda kunodaidza vamwe vakazvionerawo. Ropa rakazogwamba rikaita tubhora tushanu twakakura zvakasiyana-siyana. Tubhora utwu twakaerwa pachikero zvikashamisa vanhu kuona kuti twaiera zvakafanana kunyange twaive twakasiyana.

Nyama iyi neropa iri zvakachengetedzwa pakanaka. Makore aitevera nyanzvi zhinji dzakaongorora nyama iyi neropa iri kuti vaone kuti chishamiso chiri kutaurwa ndechechokwadi here. Pane imwe ongororo yakaitwa munguva pfupi yadarika mugore re1970 nachiremba ane mukurumbira anonzi Odhowadho Rinori wepaKorichi yapamusoro ye Rorenzo. Chiremba uyu akatora chidimbu chidiki padenderedzwa renyama iyi ndokunochiongorora murabhoritori achibva anyora zvaakabuda nazvo mune rimwe gwaro.

Chiremba uyu akaona kuti nyama iyi inyama yemunhu zvechokwadi. Inyama inobva pamwoyo wemunhu uye haina kushandisirwa mishonga kuti isaore zvakare haina kubviswa pachitunha nekuti ingadai yakakurumbidza kuora. Izvi zvinoreva kuti chishamiso chepaRanziano ndechechokwadi.

Denderedzwa iri renyama richiri rakachengetedzwa pachechi yeRanziano munyika yavaTariana. Vanhu vakasununguka kupinda muchechi iyi vachizvionera. Ini ndakazvionera pamhuno sefodya pandakaenda kuItaly mugore re2007.

Svondo roUtatu Utsvene

Posted by MC on May 21, 2016
Posted in: Mazuva Makuru, Utatu Utsvene. Leave a comment

© Musakope Mharidzo iyi musina mvumo

Mazuva ano vanhu vane apu iri padzinhare mhozha yavanoshandisa mudzimotokari. Uyo anoshandisa apu iyi nomazvo inomutungamirira kusvika kwaanoda kuenda.

Mumwe nemumwe wedu ane apu younhu iri maari: apu inonzi hana. Hana inotiudza zvokuita nezvokusaita. Inotiratidza gwara. Asi vazhinji vedu hatinyatsoteerera zvinotaura hana dzedu kana kuita zvadzinotirairidza kuitira kuti tifambirane nenguva. Tinofanira kukoshesa hana dzedu. Izvi zvinogona kunetsa nokuti mazuva ano pane mazwi akawanda akatikomberedza anoda kuteererwa nesu.

Vamwe vanhu vanongoteedzera zvinoitwa negurumwandira. Vanoteedzera zvavanofurirwa nevamwe. Vanoshandisa zvinoitwa nevamwe pakupa sarudzo dzakakoshesesa muupenyu. Maitiro aya akanyanya muzvikoro. Zvinongonzi munhu wose ari kuzviita saka ini ndakuzviitawo. Kana vamwe vakapfeka nhumbi dziri kupisa pisa, ‘label’, kana kuita chinhu chiri kutonga, kana kuteerera mhanzi iri kukurumbira zvonzi neniwo ndakutotevedzera. Zvinoita sokunge vamwe vanhu vari kundisarudzira zvokuita. Asi mangana vanhu vanogona kushanduka voita zvimwe zvinhu. Ini ndoita sei? Ndongoteedzerawo zvekare here?

Vamwe vanhu vanotungamirirwa nehavi. Ndinoita chero zvandada. Ndinoita chero zvandinonzwa kuda. Kana ndisingadi kuenda kubasa nhasi nekuti handisi kungoda handiendi. Kana ndikangonzwa kuti hama dzangu dzakandikanya handichadi kutaura nadzo, handitauri nadzo. Asi tingatevedzere havi nguva dzose here pakuita sarudzo dzakanaka?

Chii chinofanira kutitungamirira?

Mushoko Rakanaka ranhasi Jesu ari kutipa vimbiso. Ari kutaurira vadzidzi vake kuti nyange zvake ari kuvasiya muchinguvana havasari vari nherera kwete. Mwari achavatumira Mweya Mutsvene kuti ave navo uye avatungamirire, ‘kuvatungamirira kuchokwadi chizere.’

Mweya Mutsvene ndiyo apu yedu. Muvavariro yedu yokutsvaga nzira kwayo, Mwari akatipa mweya anova ndiye mutungamiri wedu. Kana tisina chokwadi chekuti toitei kana kuti toendepi Mweya Mutsvene aripo kuti atipinze mugwara.

Asi, sezvinongoitawo apu, tinofanira kuvhura apu inonzi MWeya Mutsvene. Izvi zvinoreva kuti tinofanira kuchenjerera kuvapo kwaMweya Mutsvene muupenyu hwedu nguva dzose. Kuziva kuti hatifi takasiiwa toga tichirasika. Tina Mweyna Mutsvene ari matiri. Tine chombo chakakosha chiri matiri. Tinofanira chete kutendeukira kuchipo ichi nokuchishandisa.

Chechipiri tinofanira kukumbira iye Mweya Mutsvene uyu kuti atibatsire. Pose patinenge tisina chokwadi chekuti tofamba sei, gwara chairo nderipi tinofanira kunamata kuna Mweya Mutsvene kuti atitungamirire. Mweya Mutsvene aakagadzirira nguva dzose kutiratidza kuna Jesu anova ndiye ‘Nzira, chokwadi noupenyu.’

Iri ndiro basa raMWeya Mutsvene – mutungamiriri wedu muupenyu, munongedzo unotisvitsa kuupenyu husingaperi tiri pamwe noUtatu Utsvene.

Svondo roKuuya kwaMweya Mutsvene

Posted by MC on May 12, 2016
Posted in: Pasika. Leave a comment

© Musakope Mharidzo iyi musina mvumo

`Kana Mwari ave kuda kuita chinhu chakakosha muupenyu hwedu anotanga nokutipa mucherechedzo unova ndiwo unotigadzirira kugamuchira zvaanenge oda kuita. Pachiitiko chePendekosti Mwari akatanga nekupa micherechedzo miviri: mucherechedzo waiitirwa nzeve nomucherechedzo waiitirwa maziso. Mucherechedzo wokutanga kwaiva kutinhira kwaibva kudenga kuchinge kuvhuvhuta kwemhepo ine simba.

Mucherechedzo wokutanga uyu chaiva chiratidzo chokuvapo kwaMweya nokuti zita raMweya nezita remhepo zvimwechete muchiHebheru. Zvakare mhepo mucherechedzo wekuvapo kwaMweya nokuti pane imwe nguva Jesu anoti kuvadzidzi vake: ‘Mhepo inovhuvhuta kwainoda, unonzwa kuvhuvhuta kwayo asi hauzivi kwainobva kana kwainoenda. Ndizvo zvimwechetezvo nomunhu anoberekwa naMweya’.

Mucherechedzo wechipiri waiitirwa maziso aiva marimi omoto akapararana achinogara pane mumwe nomumwe wavo. Moto waiva chiratidzo chokuvapo kwaMweya Mutsvene. Ndosaka Jowani mubhabhatidzi achiti: ‘Hongu ini ndinokuombekai nemvura kuti mupinduke asi ari kuuya mushure mangu ane simba kupinda ini. Ini handikodzere kutakura shangu dzake, uye achakuombekai naMweya Mutsvene uye nomoto’ (Mt 3:11).

Micherechedzo miviri iyi yaiva yokugadzirira kuuya kwaMweya Mutsvene asi hatingati micherechedzo iyi yaiva Mweya Mutsvene. Ruzha runenge mhepo rwaiva mucherechedzo, asi rwakanga rusiri Mweya Mutsvene. Marimi anenge moto aiva mucherechedzo asi akanga asiri Mweya Mutsvene. Kuuya chaiko kwaMweya Mutsvene kwakatsanangurwa nemazwi asingasviki vhesi: ‘Vakabva vazadzwa naMweya Mutsvene’ (Mabasa 2:4).

Ko iwo mazwi mashoma aya anomborevei? ‘Vakabva vazadzwa naMweya Mutsvene.’ Isu tinoziva kuti Mwari Baba, Mwari Mwanakomana naMwari Mweya Mutsvene ndiMwari mumwechete. Saka kana munhu akazadzwa naMweya anenge azadzwa neUtatu Utsvene. Utatu Utsvene ndihwo upenyu, ndivo rudo. Saka kuti ‘vapositori vakazadzwa naMweya Mutsvene’ zvinoreva kuti vakazadzwa norudo noupenyu hweUtatu Utsvene. Vakazadzwa norudo nemifaro namakomborero eUtatu Utsvene. Saka pendekosti zvinoreva kuzadzwa norudo noupenyu hwaMwari. Hanzi naPauro Pendekosti zvinoreva kusandurwa norudo rwaMwari uchiva munhu mutsva, uchisiya kuzeza nokutya uchiva noushingi nekuparidza Shoko Rakanaka usingatye.

Izvi hazvisirizvo here zvinoita rudo? Rudo harushandure here? Pane chimwe chikomana chaigarorarama upenyu hwemusikanzwa. Ainwadoro achiputa mbanje, achinonoka kuuya kumba. Asi rimwe zuva akashamisa vabereki vake nokuuya nenguva ndokutogarawo pasi akadya sadza richipisa navamwe. Vachiri kuvhunduka kudaro amai vake vakamubvunza kuti zvaive zvaita sei, iye akati akanga asangana naSuzi. Suzi akamukomeresa kuti kana achimuda anofanira kushanduka, anofanira kusandura unhu hwake.

RUDO RWUNOSHANDURA. Rudo rwunokonzera pendekosti. Rudo rwaMwari rwunoshandura zvakare munhu achisara ave munhu mutsva. Ndakamboona imwe chembere yakaita Pendekosti yakati ‘ndakasangana norudo rwaMwari, ndiri kunzwa kunge kamusikana.’ Mumwewo ndiye akati, ‘Muupenyu hwangu hwose ndainzwa kusadiwa, uye handaimbofunga kuti ndinodikika. Asi nhasi ndasangana norudo rwaMwari.’ Pendekosti zvinoreva kushandurwa norudo rwaMwari. Ndosaka Pauro achiti ‘Rudo rwaMwari rwakadururirwa mumwoyo yedu naMweya Mutsvene watakapiwa’ (VaRoma 5:5). Izvi ndizvo zvinoreva Pendekosti kudururirwa kwerudo rwaMwari mumwoyo yedu.

Svondo 6C rePasika

Posted by MC on April 27, 2016
Posted in: Pasika. Leave a comment

© Musakope mharidzo iyi musina mvumo

MuChiverengo cheChipiri Jowani akaratidzwa guta reJerusarema rina maghedhe gumi namaviri ari mumativi mana. Jerusarema rinomirira Kirike. Maghedhe mana anomirira mukana wokupinda muKirike. Mativi mana anomirira mativi mana epasi rino. Saka zviri kurehwa ndezvokuti Jowani akaratidzwa Kirike rakazarurirwa vanhu vose vemativi mana enyika kuti vapinde mariri pasina rusarura. Kirike harifanire kusarura vanhu vanopinda mariri.

Asi muChiverengo Chokutanga tiri kuona muine makakatanwa. Kirike rokutanga raiumbwa namapoka maviri avanhu. Raiumbwa nevanhu vakatanga Kirike vechiHebheru. Raiumbwa zvakare neboka ravauyi vechirudzi vakatendeukira kuchiKristo. Ukama pakati pamapoka maviri aya hwakanga husina kumira zvakanaka. Kune dzimwe nzvimbo vaitoita muteuro wemisa vakatsaurana.

VaHebheru vaizviti isu ndisu takavamba Kirike, tiri verudzi rwakasarudzwa naMwari saka vechirudzi vanofanira kuteedzera mitemo yedu yechinyakare nemitemo yevakuru-vakuru vedu yechiJudha. Vechirudziwo vaiti kwete, ruponeso haruuye nokuteedzera unhu netsika dzavaHebheru, ruponeso runouya nomuna Kristo Jesu chete. Vaiti munhu wose ane kodzero yekuchengetedza tsika nounhu hwamadzitateguru ake asi haafanire kumanikidza vamwe kuteedzera tsika neunhu dzake. Vechirudzi vaiti kana vaHebheru vachida kurega musiya nenyama isina kusinzwa ngavarege zvavo. Kana vaHebheru vasingade kudya nyama yenguruve ngavarege zvavo asi havana kodzero yekumanikidza vamwe kuteedzera tsika dzavo.

Vakuru vakuru vekutangawo vakanga vasingapindirane panyaya iyi. Pauro aive kudivi revechirudzi nokuti ndivo vaaishanda vavo. Muna vaGaratiya 5: 13 anoti iye ‘Makadanirwa rusununguko kwete mutemo! Zvisungo zvose zvemutemo zvinozadziswa nechirevo chimwechete chokuti “Ida mumwe wako sokuda kwaunozviita.” Mitemo yose inokurirwa nerudo.’

Pita naJemisi vakaenda kudivi ravaHebheru. Pauro anonyora achiratidza kunyunyuta kwake achiti: ‘Asi Pita paakauya kuAndiyoku ndakamutsiura pachena nokuti akanga akanganisa. Zvaivapo ndezvokuti, vamwe varume vasati vauya kubva kuna Jemisi, aidya nevechirudzi. Asi asi pavakangouya akarega avakuzvitsaura pamusana pekutya vebato rokudzingiswa’ (Gal 2:11).

Nokuda kwegakava iri kwakasheedzerwa musangano mukuru wokutanga unozivikanwa iwo kuti The Council of Jerusalem. Ruka anotaura maonero ake pane zvakabuda pamusangano uyu. Pauro anotaurawo maonero ake muna vaGaratiya. Ruka anoti iye zvakawiriranwa kuti vechirudzi varege zvinhu zvitatu zvinoti: kusiya zvinhu zvakabairwa zvifananidzo zvokunamata, kurega musiya wenyama isina kusinzwa uye kurega upombwe. Pauro anoti iye pandakaona kuti vakanga vasingaite zvinoenderana neShoko Rakanaka ndakavaudza kuti chinhu chakakosha rudo, uye ruponeso rwunouya nokuteedzera zvinodiwa naJesu kwete nemitemo yechiJudha.

Kana takateerera gakava iri ndinofunga tinoyeuchidzwa makakava anowanikwa pakati pedu. Mukati medu mune vechikuru uye mune vechidiki. Vechikuru vanoti munhu kana achiuya kuchechi anofanira kupfeka zvine ruremekedzo, zvine unhu. Neimwe nzira vamwe vari kudivi raPita vamwe vari kudivi raPauro. Vamwe vanomiririra tsika dzemugamuchidzwanwa, chinyakare chedu nekukosha kwacho, vamwe vachiti rusununguko ndorwakakosha.

Kana takazvitarisa tinoona kuti nguva dzose panoita kusawirirana pakati pezvakare nezvitsva, mutemo nerusununguko, tsika dzakare netsika itsva. Mumasangano umu makakava mazhinji ane chekuita nekupikisana kwenhengo itsva nenhengo dzekudhara. Kunyange kudzimba dzedu chaiko tinoona kuti muroora mutsva anonetseka kupinda mumusha wake mutsva nekuti anenge achisungirwa kugamuchira maitirwo anoitwa zvinhu mumusha imomo.

Zvinhu zvakadai zvinhu zvinowanikwa. Zvinhu zvatinofanira kugara nazvo. Hatifanire kutadza kudya nekuti tatadza kupindirana. Chinodiwa ndechekupota tichigara pasi tichikumbira Mweya Mutsvene kuti atiratidze gwara. Kristo muShoko Rakanaka ranhasi ari kuti handikusiyei muri nherera kwete ndichakupai mweya munyaradzi mweya musimbisi anozogara nemi. Mweya iyeyi ndiye achatibatsira kutsvaga kuda kwaMwari. VaPostori vakaramba vasinganyatsopindirana asi vakatanga kugarisana nekuti vakabvumidza Mweya Mutsvene kuvatungamirira.