Minyengetero

© Musakope mharidzo iyi musina mvumo

Mariya naMarita vanoratidza kuti vakasunungurwa noukama hwavo naJesu. Marita aigona kukoka Jesu navadzidzi vake mumba mavo. Jesu auya Marita aigona kumuudza zvokuita, nyange Jesu aizoramba zvake. Norumwe rutivi Mariya aigona kugara zvake munyasi maJesu achiteerera savamwe vadzidzi. Anoteerera achidzidza zvakawanda kubva kunaJesu. Mazuva iwayo vashoma madzimai aidzidza kubva kunana Rabhi. Basa ravo raiva rokugara mudzimba vachibika nokurera vana kana kuenda kumunda kunosakura.

Asi Jesu aive nenzira yake yokushamwaridzana namadzimai. Tinoudzwa kuti boka ramadzimai raimutevera mukushumira kwake. Madzimai aya anofanira kuva aimubatsira iye navadzidzi vake, asi vanofanira kuva vaiyeuka zviito zvake namabasa ake namazwi ake.

Murungano rwedu rwanhasi, Mariya naMarita mienzaniso makuru yemutsa. Kupa vamwe nguva chinhu chakakosha zvikuru muupenyu. Kugamuchira vanhu kuva navo murudo sezvakaitwa namadzimai maviri aya kuna Jesu. Maitiro akadai anofanira kukosheswa. Haisi nyaya yokungodya: inyaya yokusangana tichisimbisa ukama hwedu noushamwari hwedu.

© Musakope mharidzo iyi musina mvumo.

Vachiparidza nezverungano rwoMuSamariya Akanaka, Papa Furanzisi vakarududzira paChikatorike. Vakati Mupriste akanga ari murume akatsvinda akazviti ‘Ndikamira iye zvino ndichanonoka kuMisa.’ Akapfuurira uye akatadza kunzwa izwi raMwari pachiitiko ichi. MuRevhi akazviti ‘Ndikapindira panyaya iyi ndinosvika pakupedzerwa nguva nemibvunzo yamapurisa.’ Iyewo akapfuurira, haana kunzwa izwi raMwari pachiitiko ichi.

Munhu chete akakwanisa kunzwa izwi raMwari ndeuyo aiita seanogarotiza izwi raMwari. Mumaziso avaJudha MuSamariya akanga ari kure naMwari, asi iye chete ndiye akakwanisa kunzwa izwi raMwari raimukoka. Mumaziso avaJudha MuSamariya akanga asingagone zvechitendero nezveunhu. MaSamariya aisanzwisisa nezvechitendero nokuti vaishumira kunzvimbo yaisadiwa naMwari. Asi zvisinei nazvose izvi, akazwisisa zvaidiwa naMwari, zvaaida kunzi aite naMwari. Akapedzera mari yake nenguva yake pamunhu aida rubatsiro.

Zvichidai izvi mupriste akasvika kumisa nenguva, vatenderi vakafara kuti baba vabata nguva; MuRevhi akagutsikana zuva raitevera nokuti zvinhu zvose zvakafamba samarongero ake nokuti haana kupedzerwa nguva nomunhu akanga oda kufa zvake.

Dzimwe nguva ndinombozvibvunza kuti murume wokukuvara uyu akanzwa sei paakasvinura akaona kuti munhu ari kugeza maronda ake ndeweboka ravanhu vaakaraidzwa kutya, kuvenga nokufuratira? Dzimwe nguva tinosvika pakuziva muvakidzani wedu chaiye kana tabatsirwa nemunhu watanga tisingafungire.

‘Muvakidzani wangu ndiani’ mubvunzo wakaoma. Vavakidzani vangu havasi mabvakure here? Muvakidzani wangu haasi mhunhu asina musha here, kana mwana anosvikorombeya nemigwagwa yeguta? Muvakidzani wangu haasi mupenhi here anotambanudza ruoko rwakabata ndiro yokupemha  ini ndichipfuura ndichiedza kunzvengesa maziso angu? Kakatikazi kekudhara kanoti, ‘Muvakidzani wangu vanhu vose, nyangwe avo vanondirwadzisa, vasingapindirane neni pachitendero kana vasiri verudzi rwangu, ruvara rwangu. Muvakidzani wangu munhu asingawane samawaniro angu.

© Musakope mharidzo iyi musina mvumo

MuShoko Rakanaka Jesu anotuma vanhu makumi manomwe namanomwe. Anovati endesai chipo chorugare muvanhu. Rapai varwere. Paridzai Dama Rakanaka rokuti umambo hwaMwari hwava padyo. Muchidimbu arikuvati dzidzisai, paridzai, rapai sezvandinoita ini pachangu. Ini handirapi panyama chete, asi ndinorapa pamweya zvakare. Ndinodzinga madhimoni. Imi endaiwo munorapa nokudzinga madhimoni.

Basa rakapiwa vanhu ava ibasa ratinopiwawo isu nhasi uno. Pane vakawanda varikurwiswa namasimba ouipi. Mudzimba mune urwere hurimo hunoda kurapwa

Hanzi endai munorapa. Varikuzvidya moyo nokuda kwokurasikirwa nehama. Vari kutambura. Vari kuvhiringika. Vari kuodzwa moyo. Vasisina chokwadi noupenyu. Ukama hausisina kumira zvakanaka. Zvitarisiro zvabhenda. Urongwa hwaparara

Pane vakawanda vari kutambudzwa namadhimoni oupenyu huno. Muno matigere vana vangani varikurwiswa namadhimoni okuraradza? Madhimoni okuputa zvakashata zvinodhaka? Variko vakaputirwa namadhimoni emhirizhonga, vanorova vadikanwi vavo mudzimba. Vazhinji vari pakati pamadhimoni oudzvanyiriri. Madhimoni akawanda. Mumwe nemumwe anedhimoni rake rinomutambudza.

Mubvunzo ndowekuti toita sei pamusoro pechivi ichi chiri munyika? Tinobatsira varimumatambudziko aya sei? Tongogara here takatarisa pasina zvatiri kuita? Kana kuti towana chatingaita chinounza mutsauko? SaVaKristu tinodaidzwa kuti tiunze pundutso. Savatumwa vataurwa tiri kupiwawo basa rokuita.

Vazhinji tinotadza kuita basa iri nokuti tinofunga kuti igukutu uye rinorema. Unonzwa munhu achiti ‘Ini handingazvigone.’ Ichi hachisi chokwadi. Asi padiki paunoita panounza shanduko.

Pane rungano runotaurwa pamusoro pechikomana chakaenda nasekuru vacho kunofamba munyasi megungwa. Vakaona hove dzaikandirwa mumahombekombe nemasaisai egungwa. Pano neapo sekuru vaimira vonhonga hove vachiikandira mugungwa. Mushure mechinguva chikomana chakati kuna sekuru, ‘Pane zviuru nezviuru zvehove dziri kukandirwa mumahombekombe egungwa. Kudzosera imwe chete hapana zvakunobatsira.’ Sekuru vakatora imwe ndokukandira mugungwa vachiti, ‘Zvinounza mutsako kune iyi.’

Chinotitadzisa kubatsira kufunga kuti mutsauko unounzwa nokuita zvinoshamisira zvakaita sokupikira. Asi nzira huru yokuparidza shoko mararamiro edu, zvikuru mararamiro oruenzaniso. Dzimwe nzira huru dzokuparidza shoko dzinouya muzvinhu zvidiki zvakaita semabasa etsitsi. Kubatsira chembere iri kuremerwa nebhegi, kudziuka kuti mukuru agare pasi. Aya ndiwo makundiro atinoita uipi huri munyika. Iwe neni tinogona kuwana chatingaitawo pakurwisa huipi.

Hanzi naJesu kuvanhu vaya makumi manomwe namanomwe ‘Ndakaona Satani achidonha kubva kudenga semheni.’ Iwewo unogona kuita chinhanho chako kuti Satani akoromoke. Jesu ari kuti ndiri kuona Satani achidonha semheni musangano renyu pose pamunounganidza zvokupa kune vasina misha. Ndinoona Satani achidonha semheni pose pamunodzidzisa vechidiki zvechitendero. Ndinoona Satani achidonha pose pamunobatana nevamwe muminamato nemumisangano. Ndinoona Satani achidonha pose pamunogamuchira munhu mutsva nomufaro musangano renyu kana muchita chenyu. Ndinoona Satani achidonha pose pamunoregerera uyo anenge akutadzirai.

Ngatibvisei mweya wokuti zvandinoita hapana zvazvingashandure. Unogona kuunza shanduko muzvinhu zvidiki. Nyika izere nemarwadzo. Vanhu varikutsvaga mwenje nechitarisiro. Dai waro wava chiedza nechitarisiro kunyika. Savanhu makumi manomwe namanomwe pane zvaunogona kuita zvinounza shanduko.

© Musakope mharidoz iyi musina mvumo

Mumwe muimbi anemukurumbira anonzi Paganini akanga ari pakati pekugazirira kuimbira gungano guru ravanhu apo mudziyo wake wekuridza mutsva wevhayorino wakabiwa muhombodo yawo kuchsiiwa mutsaru. Vanhu vakanga vatomirira kumuona achiimba pasisina nguva yokuti anotsvaga mumwe mudziyo wekuridza. Zvisinei hazvo Paganini akatora mudziyo uya mutsaru ndokuenda mberi kwavanhu muchinyararire, ndokutanga kuridza achiimba. Vanhu vakafadzwa vakasimuka, vakauchira nokuridza mhururu nemuridzo vachifarira zvakanga zvaitwa naPaganini. Nezwi raidedera, Paganini akati kuvanhu vaivapo: ‘Nhasi mudziyo wangu mutsva wabiwa. Ndashandisa mudziyo mutsaru. Unyanzvi hwokuimba huri mumuimbi kwete mumudziyo!’ Nhasi tiri kudzidza kuti unyanzvi huri munaJesu kwete mumidziyo.

MuChiverengo choKutanga Yawe ari kuti kuvanhu vake: Ndichatumira rugare rwangu ruchierera semvura yerwizi. Rugare ndo ‘shalom’. ‘Shalom’ ndokugarisara zvakanaka murudo nokuyanana. Saka Mwari ari kuvimbisa kutumira kugarisara, utano, kugutsikana nebudiriro kuvanhu vake. Basa iri anoriita kuburikidza nemidziyo yake, nhume dzake. Basa iri rokuunza rugare kuvanhu ndere munhu wose.

MuChiverengo cheChipiri Pauro anozviti ini ndiri mudziyo waKristu. Mbiri yangu haibvi mukuchecheudzwa kwete asi inobva mumuchinjikwa waKristu. Pauro anokokawo vanhu vose kuti vave zvisikwa zvitsva. Zvisikwa zvitsva, kwete nokuda kwezvekunze zvakaita sekuchecheudzwa, zvipfeko nezvimwe zvinoonekwa asi nokuda muchinjikwa waKristu. Pauro anoenderera mberi achiti somudziyo waKristu anoshuvira rugare nenyasha kuna vose vanotevera mutemo waKristu. Sokudanwa Kwakaita Pauro kuti ave mudziyo, Mwari anoramba achitidana kuti tiendese mberi basa iri rokuunza rugare kuvanhu. Tiparidze nezvoupenyu hwomuchinjikwa.

MuShoko Rakanaka ranhasi Kristu ari kusarudza nhume makumi manomwe nemaviri achivatuma kunoparidza Shoko Rakanaka kumarudzi ose avanhu. Vadzidzi ava pavanodzoka vanoratidza mufaro mukuru pamusoro pezvavanosangana nazvo. Asi Jesu anovayeuchidza kuti vanofanira kufara kwete nokuti zvose izvi zvaitwa nesimba ravo asi kuti mazita avo anyorwa kudenga. Zvose izvi zvaitwa nesimba raMwari. Ivo midziyo chete yashandiswa naMwari. Hatifanire kutya kugamuchira basa iri, daidzo iyi nokuti zvose zvinoitwa nesimba raMwari.

Francis Mutsvene anodetemba achiti ‘ndiiteiwo mudziyo worugare rwenyu.’ Isu nhasi ngatikumbirei kuitwa midziyo yaMwari. Ngatibvumei kushandiswa naMwari. Hongu basa iri harisi nyore. Jesu akayambira nhume 72 nezvekuoma kwebasa iri. Akati vanoita basa iri vachange vasina musha wavanoti wavo, vachasiya mhuri dzavo, vachava varombo. Vanoita basa iri havatakuri misengwa uye havapedzere nguva pane zvisina mature. Vanhu vanogutsikana nezvishoma zvavainazvo.

Basa iri rinoomera vazhinji nekuti vadaidzwi havafanire kuva vanhu vanoda kuonererwa kana kuti vanhu vanoda simba. Basa iri nderekutakura muchinjikwa, kuva murombo nekugamuchira utera. Pauro anoti ‘mbiri yangu iri pachipiyaniso.’

 © Musakope mharidzo iyi musina mvumo

Jesu adaira daidzo yamubvisa mumhuri yake iri kuNazareta. Kubva paanovamba basa rokushumira vanhu, anoswedera kure nemhuri yake zvishoma-nezvishoma. Basa rake roushumiri rinomuendesa munhandare yakakura: hama dzake dzinova avo vose vanonzwa shoko vachirichengeta. Mhuri yake itsva inechekuita nebasa rake roushumiri. Pakutanga kweSHoko Rakanaka ranhasi tinoona Jesu achifuratira dunhu rake reGareriya achivamba rwendo rwokuJerusarema.

Ari pakati perwendo urwu anobvunzwa navanhu vatatu vanoda kumutevera. Jesu anoyambira wokutanga kuti kumutevera kutevera munhu anongombeya asina pake chaipo. Wechipiri nowechitatu vanoda kutevera Jesu asi vane zviri kuvabata: mumwe anoda kuda kunooneka baba vake mumwe achida kunooneka vabereki vake. Asi Jesu ari kuti ‘kwete’ kuzvinhu zvinovadzosera shure kwavakabva. Jesu arikuda kuti vanhu vatarise mberi vasacheuke cheuke: mudzidzi anofanira kusarudza zvaanoda kukoshesa. Anoda kukoshesa mhuri here kana daidzo yaJesu? Kuti asununguke kuisa basa raakadanirwa, mudzidzi anofanira kusununguka kubva kunezvinomusunga. Mudzidzi anofanira kugadzirira kurasikirwa nechengetedzo, zvisungo zvapasi, nezvishuvo zvapasi kana achida kuzvipira zvizere kushandira umambo hwedenga.

Jesu anoda vateveri vake kuti vave nechinangwa chimwechete uye vatidzemere nechinangwa ichocho vasatsauke tsauke. Zvaanoda hazvisi nyore. Asi zvakanga zvisiri nyore kwaariwo iye pachake. Naizvozvo tikamutarisa tichaona kwokuenda nezvokuita.

© Musakope mharidzo iyi musina mvumo

Svondo rino ndaiona rimwe firimu rinonzi Chariots of Fire riri pamusoro perungano rwechokwadi rwakaitikira kuBritain makore akawanda adarika. Mufirimu umu mune murume anonzi Eric Liddell aive nemukurumbira wemujawo wokumhanya. Vanhu vose vekuBritain vaitarisira kuti achamiririra nyika yake mumakwikwi eOlympics agohwina. Vaidada naye, aive rudadiso kunyika yake. Asi pakaita dambudziko. Urongwa hwemamhanyiro aizoitwa pamaOlympics pahwakabuda Eric aifanira kumhanya musi weZuva raMambo musi weSvondo. Zvino Eric aive munhu ane chitendero chakadzama aikoshesa zuva ramambo. Akaudza vakuru vake kuti haakwanise kumhanya musi weSvondo nekuti izuva rinoremekedzwa. Eric akasarudza kurasikirwa nemedhari yegoridhe, kurasikirwa nembiri nokuda kwechitendero chake. Iri ndiro dingindira rezvidzidzo zvedu zvanhasi – tungamidza Mwari kupinda zvose.

Kutungamidza Kriso kupinda upfumi

MuChiverengo chokutanga Erisha akanga ari munhu mupfumi zvikuru. Akanga aine vashandi gumi nerimwe. Akanga aine mombe gmi nembiri dzaakawanikwa naEriya achirimisa uye akanga aine magejo gumi namaviri, namajoko gumi namaviri. Ari paakadaidzwa akapisa gejo rake ndokuriita huni achigocha nyama yemombe dzaairimisa. Izvi zvinoratidza kuti Erisha akasiya upenyu hwake hwakare, akasiya izvo zvaimupa upenyu ndokutanga upenyu hutsva.

Isu nhasi tiri kudzidziswa zvekare kuti tinofanira kutungamidza Jesu kupinda upfumi hwapasi pano. Izvi zvinosanganisira makuhwa, siya hasha, siya rutadzo.

MuMushoko Rakanaka ranhasi Jesu akatarisa Jerusarema guta raakanga akamirirwa navavengi vake ndokutanga kuendako asingazezi! Akatumira nhume dzavadzidzi vake kuti dzinogadzirira kusvika kwake kudunhu reSamaria. Vagari veSamariya vakafara vachiona nhume dzake asi pavakanzwa kuti ari kuenda kuJerusarema vakabva vatsamwa vakaramba kumugamuchira. Ari munzira mumwe murume akadaidzira kuna Jesu achiti ndinoda kuteverawo kwese kwamunoenda Jesu akamuti asi ziva kuti hauna chaunowana murume uya ndokubva asara. Mumwe akati ndinoda kuteverawo asi regai ndimbonoviga baba vangu Jesu ndokuti rega vafi vavige vafi vavo murume uya ndobva aora mwoyo. Mumwe ndiye akati ndinoda kuteverawo asi regai ndimbonooneka hama neshamwari asi Jesu paakati usacheuke cheuke murume uya akabva arega kutevera Jesu.

Tungamidza Jesu kupinda zvamatongerwo

Mushoko Rakanaka, chekutanga tinodzidza kuti haufanire kutungamidza nyika yako, bato rako kana rudzi rwako kupinda Jesu. Nhumwa dzaJesu padzakatungamira kuguta reSamariya kunogadzirira kuuya kwake dzakagamuchirwa nomufaro mukuru asi vanhu veSamariya pavakaziva kuti ari kuenda kuJerusarema guta ravaJudha vavengi vevaSamariya vakabva varamba kumugamuchira. VaSamariya vakatadza kugamuchira Jesu nekuda kwezvematongerwo kunyange zvavo vaive neshungu dzekumutevera. Hapana chakaipa kuda bato rako, kana nyika yako, kana rudzi rwako asi unofanira kutungamidza chitendero chako mberi. Zvinhu izvi hazvifanire kukutadzisa kutevera Kristo.

Tungamidza Jesu kupinda mhuri

Chimwe chidzidzo chakaoma chatinowana muShoko Rakanaka ndechokuti tinofanira kutungamidza Jesu kupinda zvose kunyange mhuri chaiyo. Murume wemuShoko Rakanaka aive neshungu dzekutevera Kristo asi akakumbira kumbonoviga baba vake setsika yechiJudha. Jesu akamupindura achiti rega vafi vavige vafi vavo.

Kune madzimai akawanda anoda kuchata navarume vavo asi mubereki anoti hauchate kana usati wapedza kubvisirwa. Ivo vanobva vati mambo ndinoda kukuteverai asi regai ndimbotanga ndagadzirisa nyaya dzepfuma. Variko vakawanda pakati pedu vanoda kutevera Kristo asi vane nyaya dzechivanhu dzakawanda dzinoda kugadziriswa. Vanhu ivava vanoti regai ndimbotanga ndakadzirisa twekwedu – hapana chinofamba kana ini ndisipo. Shoko raMwari riri kuti tungamidzai Kristo kupinda zvose – zvose!

Kutsunga

Tinodzidza zvakare kutsunga, usacheuka cheuka muchitendero chedu. Kutsunga ndirwo runofanira kuva rupawo rwaKristo. Iri ndodambudziko rakaita mumwe wevaya vaida kutevera Kristo. Akati Kristo ndinoda kukuteverai Asi regai ndimbonooneka nehama neshamwari. Kristo akamupindura achiti uyo wose anorima negejo achicheukira shure haana kodzero yekupinda muumambo hwedenga. Hatifanire kucheuka pachitendero chedu.

Simba raMweya Mutsvene

Tinoda simba rinobva kuna Mweya Mutsvene. Tiri toga hatigone kutevera Kristo nenzira yaanoda nekuti zvakaoma. Zvakaoma kumutungamidza kupinda vabereki, zvakaoma kumutungamidza kupinda upfumi, zvakaoma kumutungamidza kupinda mapato kana marudzi edu. Pauro musande anoti ‘Regai muchitungamirirwa namweya kuti murege kuita zvinodiwa nenyama’ (gal 5:18). Tinofanira kutungamirirwa namweya zuva nezuva.

© Musakope mharidoz iyi musina mvumo

Tambudzai aiziva kuti pane zvisina kumira zvakanaka. Ainetseka kufema. Akaenda kunoona chiremba uyo akamutumira kunamazvikokota. Masvindo matatu aitevera akanga ava muchipatara mazvikokota ndokuti murume wake adaidzwe. Tambudzai aiva negomarara pamapapu raisagona kubviswa nokuvhiyiwa (oparesheni).

Akambotanga nokurohwa nehana asi kuvhunduka kwake kwakaguma kwava kushatirwa. Akava nemisodzi isingaperi. Tambudzai aida upenyu hwake zvikuru. Zvaimuomera kugamuchira kuti ava nechirwere chisingarapiki. Asi panguva yose iyi Tambudzai akaramba akabatirira parusariro rwake. Ainyanyonangana nemuchinjikwa zvikuru sei chiso chaJesu ari pamuchinjikwa. Izvi ndozvakamupa chitarisiro.

Jesu ndiani? Uyu ndiwo mubvunzo uri muShoko Rakanaka nhasi.

Ukapinda mumba inodzidzira vapwere wobvunza mubvunzo mumwechetewo unofunga kuti vana vanopindura vachiti kudii? Pada vanoti:

Ishamwari yangu

Anondida

NdiMwari

Ane mwoyo munyoro

Anondiregerera

Aneni nguva dzose

Ko iwe? Kana ukabvunzwa kuti Jesu ndiani kwauri unoti kudii? Uyu ubvunzo wakakosha. Jesu chaiye ndiani kwandiri uye ndinomuziva sei? Kana ndamuziva ndingakudza sei ukama hwangu naye mukufara nokupemberera uye munhamo nemumatambudziko?

Kutevera Jesu handinyore. Tambudzai akabatirira parusariro rwake asi izvi hazvina kumudzivisa kubva mukuodzwa mwoyo nokuchema. Tose tinodaidzwa kuti titakure michinjikwa yedu yamazuva ose tifambe muchokwadi chokuziva kuti Jesu anesu, ari parutivi rwedu.

©Musakope mharidzo iyi musina mvumo

Chiverengo chokutanga chirikuporofita nezve ‘chizvarwa chaDhavhiti’ chataurwa kunzi: ‘Mwanakkomana mumwechete’ uye ‘dangwe’. Zvanzi iye nyakuporofitwa uyu ndiye achava gomo ramangwana rinosukirwa zvivi nezvinongo zvenyika dzose. Nyika dzose dzichamutendera nokumuremekedza sedangwe nomununuri wapasi.

MuChiverengo Chechipiri Pauro arikutiyeuchidza kuti Kristu ndiye anotibatanidza tose. Krstu ndiye chitubu choruombeko chinotiunganidza pamwechete semhuri yaMwari. Tinova vamwari kuburikidza noruombeko uye tinogoverana upenyu hwaKristo nokuda kokuombekwa muzita rake. Pauro anoti, ‘Mose muri vana vaMWari nomunaKristu Jesu. Mose makaombekwa muna Kristu … hapana mutsauko pakati pavaJudha navaGiriki … asi mose muri vamwe muna Kristu.’

MuShoko Rakanaka mubvunzo waJesu wakauya panguva iyo vazhinji vaisanzwisisa kuti ndiani uye akavingei. Nyange vamwe vateveri vake vaivhiringika vachitadza kumunzwisisa. Asi Pita akaratidza kumunzwisisa paakati ‘Ndimi Kristu mwana waMwari.’ Pita akanzwisisa kuti Jesu ndiye uya akavimbiswa navaporofita kuti achauya kuzonunura pasi.

Mubvunzo waJesu wakakosha nyange nanhasi uno. TInogona kuzvibvunza kuti ‘Kristu ndiani, uye izvi zvinorevei kwandiri?’ Tinogona kuda Kristu zvizere chete kana tikamunzwisisa. Kumunzwisisa kunotipa chitarisiro, chitendero noruvimbo maari. Kumunzwisisa kunotibatsira kumupfugamira nokumuremekedza zvizere. Kumunzwisira kunovandudza ukama hwedu naye kuchitisvitsa padyo padyo naye.

© Musakope mharidzo iyi musina mvumo

Jesu navadzidzi vake vari nechekuchamhembe nechekunze kwenyika yavo. Vari padyo neguta raSIrariya Firipi. Zita areguta iri rinoreva kuti vagary vemo havatenderi. Saka Jesu navadzidzi vake vari voga muguta iri ravanhu vasingatendere. Iye pachake ari kunzwa kusadiwa kukuru nokuda kwendondo yaaioneswa navakuru vakuru vavaJudha.

Panguva yakaoma kudai Jesu anoda kuva nechokwadi pamusoro pokuti ndiani. Naizvozvo anobvunza vadzidzi vake ‘Vanhu vanonditi ndini ani?’ Zvisinei nemukurumbira waaiva nawo mushure mokuita zvishamiso zvakawanda zvakaita sokuwedzera zvingwa vanhu vaimunzwisisa zvizere here. Chishuvo chake chaiva chokunzwisiswa kuitira kuti aenderere mberi nebasa rake aine chitarisiro chizere. Asi mhinduro inobva kuvadzidzi inoti vanhu vanoti Jesu ndiJowani muombeki, Eriya kana mumwe wavaporofita. Jesu aipesaniswa navanhu vanotaura pamusoro pezvematongerwo enyika. Mafungiro aya aifanira kushandurwa. Naizvozvo Jesu anotendeukira kuvadzidzi ovabvunza kuti ‘Ko imi munonditi ndini ani?’

Ava ndovarume vaiva padyo naye nguva dzose. Ndovaiva vadzidzi vake. Ndovaiva shamwari dzake. Pita akakwanisa kupindura kuti Jesu ndiye zvitarisiro zvavaIziraeri – Jesu ndiye Kristu waMwari. Jesu akafadzwa nemhinduro iyi nokuti yaitaura chokwadi. Akatora mukana iwoyo kutsanangura zvinoreva kuva Kristu waMwari. Akavaudza nhamo yaaiva achazotirira uye firo yaaiva achazoita. Akavatsanangurira zvinoreva kukunda kwechokwadi. Akavadzidzisa zvinoreva kuva muteveri wake: kuzviramba, kutakura muchinjikwa nokumutevera. Pane mubairo wokuva muKristu. Kuva muKristu harisi dambe uye hausi mutepfetepfe. Anogauchira dzidziso iyi anova noupenyu, anoiramba anorasikirwa noupenyu. Chakanaka chine kuzvipira mukati.

Mubvunzo uyu wakabvunzwa vadzidzi mubvunzo watiri kubvunzwawo zvekare ‘Jesu ndiani?’ hapadi kupindura zvinotaurwa nevamwe, panoda mhinduro inobva mumwoyo. Kristu izwi raMwari. Kristu ndiye hwayana yaMwari, muyananisi uye muzadzisi womurau. Kristu ndiye nyakutinunura. Kumutevera kunoreva kuzvipira nokutakura michinjikwa yedu. KUmutevera haisi dambe; kune zvitarisiro zvinofanira kuzadziswa.