Minyengetero

Wasvika pane nzvimbo ine imbwa iri kuhukura stereki munhu waunovimba naye oti rega hako kutya, imbwa yacho haina mazino. Kutya kose kuri mauri kunobva kwabuda, kwete nekuti imbwa yabatwa kuti isakurume asi nokuti wapiwa mashoko anokusunungura. Chero imbwa yacho ikazoda kukuruma hapana chaunonzwa nokuti mukanwa hamuna kana zino rimwe. Mashoko ekuti imbwa haina mazino akakwana kukusunungura kubva mukutya.

Vanhu vazhinji vanorarama mukutya nokuda kwekuti havana mashoko pamusoro pezvinhu zvavanotya. Vanhu varikutya zvinhu zvakawanda muupenyu nokuti havana ruzivo pamusoro pezvinhu izvozvo.

Jesu anoti ‘Muchaziva chokwadi uye chokwadi chichakusunungurai’ (Jowani 8:32). Chimwe chezvinhu chaunosunungurwa kubva pachichiri nechokwadi (shoko raMwari) kutya. Shoko raMwari rakafanana nekii inokuvhurira gonhi kuti ubude mukutya.

Mumwe arikutya mbiya dzaakaona pamharadzano nechijira chitvuku. Inyaya yekuti haasati averenga Izaya 54:17 inoti, ‘Hapana chombo chawakagadzirirwa chichakukunda.’ Mumwe anotya vaanoti varoyi vanofamba manheru chikonzero ndechekuti haasati averenga Nziyo 91:5 inoti ‘Hauchazotyi zvinotyisa usiku.’ Mumwe arikutya vaanotimasatanists nokuti haasati averenga 1 Jowani 4:4 inoti ‘Mukuru ndeari mauri pane ari munyika.’ Mumwe arikutya kuti zvaakanzi ane chirwere zvakureva kuti ave kufa, asi Nziyo 103:3 inoti ‘Tenzi anorapa matenda ose.’ Chero chete usina ruzivo pamusoro pechinhu chauri kutya, ucharamba uchitya kusvika waziva chokwadi. Jowani 8:32 inoti, ‘Ipapo muchaziva chokwadi, uye chokwadi chichakusunungurai.’

⁠⁠⁠Nerimwe zuva shiri yakasvika pakubvunza nyuchi kuti, ‘Nhai shamwari zuva nezuva ndinokuona uri pamaruva uchitora muto wekunogadzira uchi, asi vanhu vanongokutorera uchi hwako. Ko hazvikurwadze here?’

Nyuchi ndokupindura ichiti, ‘Vanhu chavanogona kutora uchi chete, asi havakwanise kunditorera chipo chekugadzira uchi hwacho.’

Nyange vanhu vakatorera nyuchi uchi hwayo haife yakaregera kugadzira humwe, uye haiwore moyo. Gara uchiita zvakanaka nguva dzose. Usateerera vanoda kuodza moyo. Pose pane chakanaka chakaipa hachishaikwe. Usaore moyo nyange ukakundikana. Ukaramba uchiita zvakanaka mubairo wako uchave mukuru kudenga.

Mozisi anorova gungwa dzvuku netsvimbo kuti ayambukire mhiri nevana veIveIziraeri! Eriya anorova Jorodhani nehembe yake kuti ayambukire mhiri. Erisha akaitawo zvimwe chetezvo. Asi Jesu akamusoro pemvura yacho.

Mozisi naEriya vakapfura napakati pemvura, pakati pemamiriro ezvinhu, pakati pedambudziko. Asi Jesu akafamba pamusoro pemvura, pamusoro pemamiriro ezvinhu, pamusoro pedambudziko.

Kana ukava naJesu uchava pamusoro pemamiriro ezvinhu. Kana uina Jesu unofamba pamusoro pematambudziko ako.

Mwari haana kubvisa mvura pamberi pevana veIziraeri kana pamberi paErisha naEriya. Asi akavapfuudza nepakati payo. Jesu zvekare haana kutambisa simba rake achinamatira kuti mvura ibviswe paaida kufambira nokuti aiziva kuti anesimba rekufamba pamusoro payo.

Newewo nhasi ziva izvi: dzimwe nguva usanamatire kuti matambudziko abviswe pamberi pako. Rega vanokufuridzira mamhepo vaite, vanokuvenga vaite , nevane godo vaite uchiziva kuti uchafamba pamusoro pazvose nokuda kwaJesu

Hazvinei kuti gungwa rakadzika zvakaita sei. Jesu akafamba pamusoro pemvura yakadzika. Newewo uchafamba pamusoro pematambudziko zvisinei nokuti akakura sei.

Dhavhiti anoudza Goriati kuti ‘Ndinouya kwauri nezita raTENZI.’ Chinoshamisa ndechekuti ainge akabata rekeni (1 Samueri 17:45). Ndakazvibvunza kuti ‘Nhai iwe Dhavhiti unotaura kuti unoenda kuna Goriati nezita raTENZI ko rekeni unoidi?’

Ndakazoona kuti chero Tenzi ari kudivi rako unotoda rekeni. Unoda chinobatika chokutsigira minamato yako. Hongu ndiMWARI vanokupa basa, asi unoda rekeni. Pamwe rekeni yako mapepa akakwana okutsvagisa basa. MWARI ndivo vanokupa murume kana mudzimai asi unoda rekeni. Pamwe rekeni yako inonzi kugeza nekutsvinda nokuzvidukupisa. Tenzi vanoita kuti upase kuchikoro asi unoda rekeni inonzi kuverenga zvakakwana kuti upase.

Rekeni yako iripi? Rangarira: Goriati haafe nemunamato woga, anofa nedombo rabva parekeni.

Kuno vanodiridzira nzimbe. Ndaona murume anga achidiridza nehosipaipi yakareba chaizvo. Pese panga pachimira mvura kubuda murume anga achitanga kutevedza paipi achitsvaga pabhenda paipi. Ndamubvunza kuti ‘Sei uchimhanyira kuti ipaipi yabhenda? Ko sei usina kufunga kuti mvura yapera kwainobva?’ Murume uyu andiudza kuti, ‘Mvura yokuno haiperi uye kubva ndiberekwa haina kumbopera.’

Murume uyu anoziva kuti muna Save mvura haiperi uye kuti chingatotadzisa kuti mvura isabuda kubhenda kwepaipi chete. Zvinobva kuna Tenzi hazviperi. Rugare rwaTenzi haruperi. Mari inobva kunaMwari haiperi. Mufaro unobva kunaTenzi hauperi. Pfuma inobva kunaMwari haiperi. Kana paine charegera kuuya muupenyu hwako haisi nyaya yokuti kuna Mwari hakuchina. Ukaona washaya zvaunoshuvira tevedza paipi ugadzirise pakabenda.
Tevedza paipi utarise pavhara. Tevedza paipi youpenyu hwako utsvage pabenda mufaro utange kuuya. Usamhanyira kutuka Mwari. Usamanyira kusvora kereke. Usamhanyira kusvora vafundisi vekereke yako. Tevedza paipi youpenyu hwako utsvage pagonya.