Svondo 33 reGore A

Posted by MC on November 19, 2017
Posted in: Mharidzo, Mharidzo dzamasvondo. Leave a comment

© Musakope mharidzo iyi musina mvumo

Mumwe murume anemukurumbira mubandiko rezveChimiro Chapasi (Physics) akashandura zvachose maonero atioita pasi rino. Semunhu aidisa maitiro aVanhu (humanist) akataura zvikuru pamusoro pokukosha kwezvematongerwo nezviitiko zvoukama zvenguva yake. Murume uyu anonzi Albert Einstein.

Einstein akatozotanga kugona kutaura ava namakore mana uye akatozogona kunyora ava namakore manomwe. Vabereki vake vaifunga kuti akanga asina kunyatsoti kwesere. Mumwe wavadzidzisi vake akanyora pamusoro pake achiti, ‘anononoka kufunga, haagoni kushamwaridzana navamwe uye ane katsika kokunyangarikira muzviroto zvoupenzi. Akadzingwa pachikoro akasagamuchirwawo pachikoro chamaoko cheZurich. Akanetseka zvakanyanya pakutsvaga basa. Asi akatsungirira munazvose.

Einstein akabatsira kupinda vamwe vose vanoita zvesayinzi pamanzwisisiro edu ezvemamiriro epasi. Ndiye akabatsira kuti pave nebomba rinoparadza zvakanyanya, ndiye akabuda nedzidziso yokuvamba kwenyika inonzi big Bang, akabatsirawo maererano ne quantum physics nezvemagetsi.

Vamwe vedu tkamirira nechitarisiro kuti tiite rombo rakanaka, kuti muupenyu hwedu muitike chimwe chinhu chikurusa. Tinoshuvira kuva mumwe munhu kana kuita zvimwe zvinhu zvinoshamisa. Asi zvishuvo zvedu kazhinji zvinoperera mukurota. Kana zvatinoshuvira zvikasaitika tinoodzwa moyo nokudzokera kumashure. Ikana iripo asi tinotadza kuiona.

Pane matarenda akawandisa ari matiri atisiri kuona. Une matarenda akawandisa akavandika mauri. Ukanyora pasi matarenda ako ose, zvipo zvako zvose nokugona kwako kwose uchaona kuti une mikana yakawanda yakamisira kushandiswa. Simba rako zhinji hausi kurishandisa. Rakamirira kushandiswa zvizere.

Rungano rwanhasi runoburitsa pachena kuti Mwari anotitambanudzira maoko. Anogarotipa makomborrero ake. Anotarisira kuti tose tishandise kugona kwedu nesimba redu ratakapihwa naye. CHinokanganiswa navazhinji kurarama somurume ataurwa nezvake muShoko Rakanaka akagamuchira chipo akachiviga muvhu. Akakunyuta achiti aitya tenzi wake. Kutya kwaifanira kumuita kuti awane zvaanoita. Asi kutya kwake kwakamutadzisa kuita, kushandisa chipo.

Muranda ari muShoko Rakanaka haasi mutadzi bodo, haana unhu hwakaipa uye haana kuparadza upfumi hwomukuru wake. Mhosva yake yaiva yokuti haana kuedza kugamuchira makomborero aaipihwa naMwari. Haana kuvimba nwzvaari pamwe nokuvimba naMwari. HOngu MWari anotipa pachena nomwoyo unotambanudza asi zvipo zvake hazvifaniri kuvigwa kana kufuratirwa.

Dzidziso yanhasi iri kuti ziva zvaunokwanisa. Zvaunokwanisa pakurarama, kushanda, kuda nokushandira. Ona simba rako sokunge uri zvaunofanira kuva kuitira kuti ukwanise kuva zvaunogona kuva. Mauri mune zvose zvinodikana kuti usadzise zvishuvo zvako.

Lincoln Steferns anokukurudzira kuziva chipo chako paanoti, ‘Mufananidzo unokkunda yose hausari wapendwa; nhetembo inokunda dzose haisati yaimbwa; nziyo dzinokunda dzose hadzisati dzaungwa nezvadzo.’

Unogona chete kuva zvaunokwanisa kana ukava zvauri. Pane simba, upenyu, kufambisa kunoshandurwa kuburikedza nomauri kuchiva zviito zvinoshamisa.

Hapana bhiza rinotiendesa pasi rose

Hapana masai-sai anotitakura kubva kudivi rimwe renyana achitiisa kune rimwe.

Hapana mutambo unogutsa meso edu.

Tinonzwa setine miganhu kumativi ose.

Asi takasikirwa kuita zvisina miganhu

MUPRISTI,

Posted by MC on November 18, 2017
Posted in: Nhetembo. Leave a comment

MUPRISTI,

Hapana anoziva:

Zvinonzwikwa nomupristi

 

Zvaanoona,

Zvakavanzika zvaanofanira kuchengeta,

Miedzo yaanosangana nayo,

Misodzi yaanochururudza,

kushungurudzika kwaanotsungirira,

kusurukirwa kwaanoita,

Hasha dzaanoita,

Nhema dzaanoitirwa nevamwe vevanhu vaanoshumira!

 

Kugamuchira avo vanonyepedzera kuti vanomuda asi shure kwake vachimuparadza.

Kuedza kwaanoita kurarama kupfuura vanhu

Kushaiwa kwaanoita,

Rusarura rwaasingafanire kuitira hanya,

Kupomerwa kwaanofanira kunyararira,

Zvitarisiro zvaanoedza kurarama nazvo,

Kunyange vamwe vake havazive zvaanosangana nazvo.

Iye mupenyu nokuda kwaMwari asi anoraramira vanhu!

 

Mupritsi uye upristi hapana anogona kunyatsozvinzwisisa!

Hupristi,

Hwakavanzika.

Mupritsi munhu akavanzika zvakare!

Chakavanzika zvinoreva chisingazwisisiki!

 

Saka zvaunogona kungomuitira kumunamatira.

Zuva harifaniri kupfuura usina kumumiririra.

Itai kuti afare zvikuru, nokuti muprista asingafari injodzi KuChechi yaMwari!

Dai Mhandara Yedu Yakaropafadzwa uye Amai Mariya vanyengeterera vaprista vedu vose nokuropafadza ushumiri hwavo.

Chikomborero chaAroni – Kuverengwa 6:24-26

Posted by MC on November 18, 2017
Posted in: Mitsara YoMubhaibheri. Leave a comment

TENZI akuropafadze, akuchengete;

TENZI akuvhenekere nechiso chake, akunzwire nyasha;

TENZI akusimudzire chiso chake, akupe rugare.

Chikomborero chomusha

Posted by MC on November 18, 2017
Posted in: Minamato yakasiyana-siyana. Leave a comment

Pagedhi iri

Ngapasapinda kusuwa

Pamusha uno

Ngapasauya matambudziko

Pamusuwo uyu

Ngapasapinda nekutya munzvimo ino

Ngapasapinza kukakavara

Dai nzvimbo ino yangova nzvimbo yemakomborero norugare chete-chete

 

Muchato unoda vatatu

Posted by MC on November 18, 2017
Posted in: Kurudziro. Leave a comment

Muchato unoda vaviri kuti uzadzisike

Hazvina kukwana kuti vaviri vaonane

Vanofanira kubatanidzwa murudo nemusiki worudo, Mwari woga.

Muchato unoteedzera urongwa hwaMwari haudi mudzimai nomurume chete.

Unoda humwe hunobva kuna Kristu chete

Muchato unoda vatatu.

Muchichikwa wakabenda

Posted by MC on November 18, 2017
Posted in: Nhetembo. Leave a comment

naGeorge Bennard

Pachikomo chiri kure-kure
Paive pamire muchinjikwa wakasakara wakabenda
Chiratidzo chokutambura uye nyadzi

Uye ini ndinoda muchinjikwa uyu wakasakara wakabenda
Wokuti mudikanwi mukuru wapamwoyo
Munyika yavatadzi vakarasika akaurairwapo

Saka ndichadzivirira nokuchenegetedza
Muchinjikwa wakasakara wakabenda
Kusvika pokupedzisira nasiya matambudziko angu

Ndichanamatira pamuchinjikwa wakasakara wakabenda
Ndichizochinjinjanisa nendaza rimwe zuva

Ngatidzidzei kubatana

Posted by MC on October 31, 2017
Posted in: Nyambo. Leave a comment

Rimwe zuva gonzo akaona munhu achiteya chikirimbani ndobva adaidza huku, mbudzi namombe achivaudza kuti, ‘Paita dambudziko hombe saka poitwa sei kuti chikirimbani chidhingurwe.’

Huku akati, ‘Idambudziko rako iwe gonzo nekuti ndiwe usirikudiwa nemunhu.

Ini anotondipa mvura nechikafu uye akatondiisira mwenje kuti ndidye neusiku saka ona yekutamba.’

 

Mbudzi akati, ‘Ini ndinodiwa nekuti ndinotofudzwa uye ndakavakirwa chikwere, saka iyi ndeyako wega gonzo.’

Mombe akati, ‘Ini ndinodiwa chose kupinda mose zvokuti ndakatounganidzirwa mashanga echibage. Ndinotoperekedzwa kumvura kana rwizi rwapwa ndinotodhayirwa chibhorani uye ndakatotengerwa munyu wekupota ndichinanzva. Chikirimbani chiri mumba ini handikwane pamusiwo saka iwe gonzo ona zvekuita.’

Gonzo akarwadziwa kwazvo akati nhasi nemhuri yangu hatifambifambi.

Manheru nyoka akabva apinda mumba umu achiteera makonzo nekuti akanga asina kubuda panze. Nyoka akabva arohwa nechikirimbani nechokumuswe.

Munhu paakanzwa chikirimhani kuti pwa-a, akabva amuka ndokutsvanzvadzira murima achiti gonzo abatwa. Akabva akoborwa nanyamubobo uyo aitovira nehasha ndiye mukabika idyai.

Vanhu vakaungana zvikanzi ‘Takamirira hama dzemufi ngatifanobata mbudzi kuti tiwane usavi.’

Pakazouya hama dzemufi dzakati ‘Bayai mombe nekuti pafa munhu mukuru mombe ndokuurawa.’

Vapedza kuviga munhu madzisahwira akati ‘Tinoda poto yedu tega’ huku ndokuurawa.

Izvi zvese zvaiva mumaziso agonzo.

Dzidziso: Dzidza kutora dambudziko remumwe serako nekuti tikasabatana rinozotipedza tese.

Usafungira vamwe

Posted by MC on October 31, 2017
Posted in: Nyambo. Leave a comment

Mumwe murume aityaira mumugwagwa wekumusha paakapfuudzana nemumwe mudzimai aityairawo munzira imwecheteyo achienda kudivi rakafuratira. Pavakange voda kupesana murume aadzikisa hwindo remota yake ndokusheedzera kuti ‘Dhongi!’

 

Mudzimai uya nekusada kukundwa akasheedzerawo achiti, ‘Tsoko!’ akanzwa zvakanaka achiti ndamutukirirawo. Asi achangodarika rimwe gonyo akarova dhongi motokari ikakunguruka katatu kose. Paakanga achizviburitsa mumota yapwanyika akarangarira zvairehwa nomurume uya.