Mwari haana rusaruro

Posted by MC on January 12, 2019
Posted in: Gore C, Mharidzo, Mharidzo dzamasvondo. Leave a comment

Mazuva ayo Jesu akanga achangobva kumuka muvafi, vadzidzi vari pakati pokuparidza Dama Rakanaka, Pita akaona mufananidzo wemhuka dzakan’ora nedzisina. Akanzwa izwi richimuti idya nyama yakan’ora. akamboedza kuramba asi izwi iri rakamuti, ‘Zvinenge zvacheneswa naMwari usazviti zvakan’ora.’

Pita aifunga nezvehope idzi, shoko parakasvika kwaari richiti mumwe mukuru wezana ramauto echiRoma ainzi Koniriyasi aida kuombekwa naye. Akambotanga nekuzengurira nokuti Koniriyasi aive mutorwa uye mumwe weuto ravapambepfumi. Pfungwa dzake dzaimuti munhu akadai hazviite kuti adaidzwe naMwari. Asi Pita akatondera hope dzake, akaziva zvadzaireva akati, ‘Chokwadi Mwari haana rusaruro.’ Naizvozvo Pita akagamuchira mutorwa uyu akamupapatisa.

Tinodzidza zvinhu zviviri parungano urwu. Chekutanga, tose tiri vanaKoniriyasi. hatina kuchena, tiri vatadzi, tine mhosho dzedu, kukoniwa kwedu. SaPita, tinogona kufunga kuti hatikodzere kuva varurami asi vamwe ndivo vanokodzera. Tinogona kufunga kuti makomborero aMwari haakodzerane nesu.

Mumwe murume akabvunza mudzidzisi wechitendero achiti, ‘Sei Mwari akasarudza chigwenzi chemunzwa pane zvimwe zvose kuti azviratidze kuna Mhozisi?’ Mufundisi akati, ‘Chero Mwari dai akasarudza gwenzi raunoti riri nani ungadai usina kugutsikana, asi sezvo uri kuda mhinduro ziva kuti Mwari akasarudza chigwenzi chemunzwa kuti akudzidzise kuti hapana nzvimbo isina huvepo hwaMwari kusanganisira gwenzi remunzwa.’

Rungano urwu runotiudza uti tose tinokodzera huvepo hwaMwari. Mwari anoda kuuya mutuupenyu twedu tunenge chigwenzi chemunzwa. Inga Jesu anotaura wani kuti ‘Ndakauya kwete kuzoporesa vatano asi vanorwara.’

‘Zvechokwadi ndadzidza kuti Mwari haana rusaruro’ akadaro Pita. Izvi zvinoreva kuti mhosho dzedu, matadzo edu, kusarurama kwedu zvose izvi hazvifanire utitadzisa kugamuchira makomborero aMwari. Chero munhu asina kururama anowana mweya waMwari.

Chechipiri tinodzidza kuti zvipo zvedu zvisina kururama zvinofanira kubataidza nezvevamwewo zvisina kururama kuitira kuti zvirurame. Tose tine kukoniwa kwedu. Asi ichi hachisi chikonzero chokuti tingoti go. Zvipo zvedu zvinofanira kubatanidzwa nezvevamwe kuitira kuti tiite zvinhu zvikuru.

Svondo rekuratidzwa (Ephiphany) C

Posted by MC on January 3, 2019
Posted in: Gore C. Leave a comment

Chinangwa

Munhu wose kubva paanozvarwa anodaidzwa kuti ave nechinangwa chekutevedzera, chinangwa chinoda kuzadziswa, pfungwa dzinoda kuzadziswa. Tose tinozvarwa tiine daidzo yedu. Ingava daidzo yokuva engeneer, makanika, mudzidzisi, mutambi, cheru chii zvacho. Vamwe chinangwa chavo ndechekuwana rudo rwechokwadi. tose tinozvarwa tiine chinangwa chinoda kuzadziswa. Chinangwa chikuru kutsvaga Mwari. naizvozvo tinofanana navachenjeri vokumabvazuva nokuti vaive nechinangwa chavo.

Kutora matano anotyisa (risks)

KUti tizadzise zvinangwa zvedu dzimwe nguva tinofanira kutora matanho anotyisa. Savachenjeri vokumabvazuva tinofanira kusiya kutya kwedu toida zvimwe zvinhu zvitsva zvatisingazivi. Muhupenyu, kubva pakuzvarwa kusvika tikure tine matanho asiri nyore atinofanira kutora.

Mhingidzo

Murwendu, rwendo rwupi zvarwo mune mhingidzo. Mhingidzo yavachenjeri vokumabvazuva aiva Herodhi. Herodhi akada kushandisa tsvete kuti avarasire paakati, ‘Ndapota endai munotsvaga mwana uyu kana mamuwana mouya nepano muchindiudzawo. Ndinoda kuzomuremekedzawo nokumupfugamira.’ Herodhi akadaro achisvimha misodzi yamanyepo, achinyatsoziva zvake kuti aida kuuraya mwana.

isu tinosanganawo nemhingidzo dzakasiyana-siyana. kungava kuraradza, kusazvibata, nezvimwe zvinotibvisa pachinangwa chedu.

Rubatsiro

Murwendo urwu mune rubatsiro zvekare. Varumwe vokumabvazuva vakachenjedzwa nengirozi kuti vasadzokere nokunaHerodhi. Isu tine ngirozi dzedu dzakawanda. Vanogona kuva vabereki vedu vanotiunza nzira yekusatora.

Magumo erwendo

Varume vokumabvazuva vakasvika kumagumo erwendo rwavo vakaona chiso chaJesu vakamuremekedza nokumupa zvipo. Isuwo tinosvika kumagumo nenzira dzakasiyana-siyana. Pose patinopa vanenzara vane nyota, nevasina zvipfeko tinenge tatoona chiso chaJesu. Tinenge tazadzisa chinagwa cherwendo.

Goredzva – Zuva Guru raMariya C

Posted by MC on December 31, 2018
Posted in: Gore C, Mharidzo dzamasvondo. Leave a comment

Nhasi tinodzidza zvinhu zviviri zvakakosha chose. Chekutanga tinodzidza kuti Mariya havasi amai vaJesu chete asi kuti ndimai veduwo. Savana vavo vanoda kutibatsira pane zvose zvatinosangana nazvo.

Chechipiri tinodzidza kuti Mariya mucherechedzo wedu watinofanira kuvavarira kuteedzera. Pane zvakawanda zvatinodzidza kubva kwaari. Chimwe chezvinhu izvi kuvimba naMwari.

Mutumwa waMwari paakauya kuna Mariya achiti ‘uchava napamuiri ugopina mwana wauchatumidza zita rokuti Jesu,’ aiziva kuti izvi zvinogona kugumbusa Josefa zvigoputsa muchato wavo. Asi zvakadaro Mariya akavimba naMwari.

Vafudzi pavakamuturira zvaiva zvataurwa nemutumwa waMwari, Mariya haana kuzvinzwisisa. Zvakadaro akavimba naMwari.

Mariya paakaenda nerusvava rwake kutembere, Simioni akamuti ‘kusuwa kuchabaya mwoyo wake sepfumo.’ Zvakare, Mariya haana kunzwisisa mashoko aya asi akavimba naMwari.

Jesu paaive ave namakore gumi namaviri, akasara mutembere vabereki vake vakatambura nokumutsvaga. Mariya paakakumbira kutsanangurirwa, Jesu akati ‘Hamuzivi here kuti ndinofanira kunge ndiri mumba mababa vangu?’ Mariya haana kunzwisisa mhinduro iyi asi akavimba naMwari.

Mariya anotibatsirawo kuti tivimbe. Savaberiki tinogona kuva tichitambura nevana vakoomana kana vasikana. Pamwe mwana haachadi kuuya kuchechi. Pamwe aneukama hwamuri kutyira kuti huchamupinza munjodzi. Makaedza kunamata, mukaedza zvakawanda. Mariya anokudzidzisai kunamata nokuvimba naMwari panguva yakadai.

Unogona kuva wechidiki ari kushungurudzika nokuda kweramangwana risina kujeka. Hauchaziva kuti wodii. Wakambotsvaga mazano kubva kuvabereki nokune vamwe asi wapererwa. Uchiri kufamba uri murima. Vimba naMwari.

Unogona kunge ungoriwo munhu ari kunetseka nokuda kwechitendero chake chisisina kusimba. Izvi zviri kukushungurudza. Uri kuona sokunge Mwari haasi kukuratidza gwara. Hausisina chokwadi chokuti Mwari wacho ariko here. Namata uvimbe naMwari saMariya.

Mhemberero yanhasi inotiyeuchidza kuti Mariya mucherechedzo wedu. Ngativavarirei mugore rinotevera kuedza kutodzana naMariya.

Zuva reMhuri Tsvene Gore C

Posted by MC on December 28, 2018
Posted in: Gore C, Mharidzo, Mwaka woKuuya C. Leave a comment

Mhinzo

Mhuri yaJesu yakamanikidzwa kupatsanurana nevamwe vehukama nokuda kwaHerodhi aida kuuraya mwana Jesu. Josefa akanzi nengirozi yaMwari atizire kuIjipita nemwana akateerera.

Tinoona pachiitiko ichi kuti Jesu haana kuzvitsaura asi kuti akararama upenyu hunoraramwa navamwe vose kubva pakuzvarwa kusvika avambe basa rake.

  • Akasangana nedambudziko rekupatsanurwa nehama dzake;
  • Sakapenda, aiita mabasa amaoko savamwe muNazareta;
  • Akarwadziwawo norufu paakashaikirwa nababa vake Josefa;
  • Vakaita vapoteri kuIjipita.

  • Isuwo pose patinopatsanurwa navadikanwi vedu;
  • patinoraswa nehama dzedu
  • patinorasiswa neshamwari dzedu;

Tinofanira kutondera kuti mhuri sande yakasangana nematambudziko mamwechete.

Jesu akakurira mumhuri yakanaka

Pavakadzoka kubva kuIjipita, Mhuri Tsvene yakagara muNazareta. Jesu akakurira muNazaret – mumusha wakanaka. Musha wakanaka chipo chikuru. Jesu akarerwa zvakanaka naamai vake vakanaka. Pane akati ‘Mai vakanaka vanokunda maheadmaster zana.’ Vanamai vanofanira kunzwisisa kana vachirera vana vavo. Ngavatarisire zvinogoneka. Ngavasambunyikidza vana.

Jesu airemekedza vabereki vake

Jesu akagamuchira mabasa anofanira kuitwa nemwana pamba. akaremekedza baba vake naamai vake. Tsika dzose dzinokurudzira kuti mwana aremekedze baba naamai. Asi mazuvaano zviri nyore kushaira vabereki navamwe vanhu vakuru nguva.

Sira anoyeuchidza vana kuti vane basa rokuremekedza vabereki vavo chero zvakaoma. Anoti kana mukaremekedza vabereki venyu muchawana zvinoshuvirwa nemunhu wese – hupfumi nehupenyu hwakareba.

Mhemberero yanhasi inotidaidza kuti tidzidzise vana kuremekedza vanhu vakuru. Pauro MuTsvene anoti, ‘Varerei muchivaratidza nzira dzaTenzi.’

Jesu akadzidza mugariro wavanhu nhando

Tamboti Jesu aishanda sakapenda. Izvi ndizvo zvaimuraramisa. Aiziva nyika yaaigara. Akadzidza nezvevanhu vaive vakamutenderedza. Akanzwisisa vanhu vaaizoparidzira shoko.

Isu tineshungu dzokuti vana vedu vawane dzidzo yepamusoro kusvika pakuti vasaone kusadzidza kwavamwe.

Tinoda kuti vasatambure vadye zvakanaka kusvika pakuti vasaone hurombo hwakavatenderedza.

Tinoda kuvaitira zvakanaka chose, zvekuti hatidi kuti vaone matambudziko ari munyika. Muchazoona vamwe vakuita saMambokadzi wekuFrance anonzi Marie Antoinette. Vanhu vairatidzira padyo nemba yake. Akabvunza kuti bongozozo raiva rei zvikanzi ‘vanhu vanoda chingwa’. iye akati ‘kana pasina chingwa vapei nyama’. Airarama upenyu hwekuwana zvekuti aisanzwisisa kutambura kwavanhu.

Muenzaniso wemhuri

Mhuri sande tinoipihwa semucherechedzo wezvatinofanira kuita. Pauro anopa zano rinoti:

‘Madzimai remekedzai varume venyu sezvamunofanira kuita. Varume idai madzimai enyumuvabata zvakanaka. Vana teererai vabereki venyu nekuti izvi ndizvo zvinofadza Tenzi. Vabereki musavhiringa vana nokuita zvinovasundira kure.’

Svondo 4 Mwaka woKuuya C – Kufara nevanofarawo

Posted by MC on December 21, 2018
Posted in: Mharidzo, Mharidzo dzamasvondo, Mwaka woKuuya C. 1 Comment

Mariya anoenda kunogoverana mufaro nehamayake iri kufara anova Erizabeta. Asi zvinoitika ndezvekuti Erizabeta nemwana wake arimmbu, Jowani, ndivo vanozadzwa nomufaro vachiona Mariya naJesu! Panosangana vachazove anamai, Erizabeta naMariya, vanavavo vasati vazvarwa vanosanganawo zvekare.

Munyika yokuti vanhu vanotarisirana pasi nokuda kwezera, chiitiko ichi chinotipa chidzidzo chakakosha. Erizabeta, aiva mukurusa kupinda Mariya, anozviona seakakomborerwa kushanyirwa naMwariya mwanamudiki kwaari. Jowani aivawo mukuru kunaJesu nemwedzi mitanhatu anonzi akakwakuka nomufaro paakashanyirwa naJesu naMariya.

Mufaro wakadai unogoneka chete kana pasina shanje. Paisava neshanje pakati pamadzimai maviri aya. Mumwe nemumwe wavo anogamuchira chinhano chakapihwa mumwe wake naMwari. Shanje kazhinji inoputsa ukama hwedu. Dai tikadzidza kuyemurana pazvipo zvedu.

Svondo 4 Mwaka woKuuya

Posted by MC on December 18, 2018
Posted in: Mharidzo, Mharidzo dzamasvondo, Mwaka woKuuya C. Leave a comment

Zviroto

Pane dzimwe nguva dzatinenge tiine zviroto zvedu. Tinorota tichikunda kuraradza pamwe nokuvamba upenyu huneutano. Tinorota tichiita nyanzvi dzokuimba kunyange pasina vanoona tarenda ratiinaro. Tinorota tichiva vanhu vanoendeka. tinorota tichiita mabasa anoshamisa anoita kuti nyika ibudirire zvinhu zvifambe zvakanaka.

Zviroto izvi zvinenge zviri matiri. Vamwe vanotiona tichizama padiki patinogona vagotadza kutendera kuti tichaita zvinhu zvinoshamisa. Panguva yakadai pane vamwe vanhu vatingati vanaMariya vanotinzwisisa. Mariay akashanyira hama yake Erizabeta akainzwisisa. Isuwo tinogona kuva vanhu vanopa chitarisirio kune avo vane zviroto zvavo. Uyewo isu kana tiine zviroto zvedu panana Mariya vanotikurudzira nokutipa chitarisiro. Ngatinamatirei vanhu vakadaro.

Makwazisiro

Pane zviri mumakwazisiro aMariya zvinodarika mashoko aanotaura. Makwazisiro ake anopa chitarisiro kuna Erizabeta agoita seanozadzisa zviroto zvake. Pane vamwe vanhu vanoti vakapinda muhupenyu hwedu pane zvinoitika. Zviroto zvedu zvinotanga kutozadziswa ipapo. Sokukwakuka kwakaita mwana Jowani nomufaro tinozadzwa nemufaro nechitarisiro. Tinova nechokwadi chokuti zvatinoshuvira zvavakuzoitika.

Vana nanepamiviri

Nhasi hama dzadiwa ngatitonderei mwana sikana ari kumwe ane pamuviri uye ari kudemba kuti akazviitirei. Pamwe mwana iyeye haana waanochemera anomunzwa mumhuri yaanobva. Pamwe anedambudziko guru remari kana kuti pamuviri apa pavakumutadzisa kuenda kuchikoro kana kuzviriritira. Ngatinamatei kuti Mwari atumire vanhu vakaita saMariya, vane vane matambudziko avo asi vanofunga vamwe. Vanhu vanoti kana vakakwazisa mumwe ane dambudziko, vanomumhoresa nenzira yokuti mwana ari mudumbu anokwakuka nomufaro mai vacho vachizadzwa naMweya Mutsvene.

Kuyemura vamwe

Iu musangano redu tine zvakawanda zvatinodada nazvo kusanganisira hupfumi. Tine zvikoro zvakanaka zvinodzidzwa zvekuti mubereki wose anoda kuti mwana wake adzidze pazvikoro izvozvo. Tine hukama hwakadzama nemamwe masangano edu ari mhiri anotibatsira nenzira dzakawanda. Zvose izvi zvinogona kutiita kuti tizvikudze. Ngatinamatei kuti saMariya, tiremekedze vemamwe masangano, tigone kuvashanyira saMariya tichiumba hushamwari navo.

Takakomborerwa

ISu tine makomborero atinopihwa muhupenyu hwedu. vamwe tinokwiridzirwa kubasa. vamwe takakwanisa kukunda katsika kakaipa. Dai waro takwanisa kuona kukomborerwa kwatakaita sezvakaita Mariya. Makomborero anowedzerwa nokuona kukomborerwa kwatakaitwa.

Kunamatira vanaMai

Hama dzangu ngatirangarireiwo vanamai vakasiyana-siyana vanovavarira nokushanda nesimba kurera vana vavo nyange zviome sei. Chinovagonesa kuramba vakatsunga chitendero chakaita sechaMariya, chokuziva kuti Mwari achakomborera zvibereko zvemimba dzavo.

Svondo 3 Mwaka woKuuya C – Tine mhosva

Posted by MC on December 14, 2018
Posted in: Mharidzo, Mharidzo dzamasvondo, Mwaka woKuuya C. Leave a comment

Mumwe murume wekuAmerika akanyora kabhuku kake kanonzi, ‘Rutadzo Rwakazodii?’ Mukabhuku aka anotaura rungano rwemumwemuparidzi womumugwagwa anoonekwa mangwanani. Vanhu vanenge vachifamba vachimhanyira kumabasa avo iye osimudza kaoko kake kakaonda achinongedzera wose anopfuura nepaari achiti ‘Unemhosva!’ Anotura befu opamhazve ‘Unemhosva!’ Vaya vanenge vachipfuura vanoonekwa vachizvengesa maziso, asi vozocheuka, votangakufambisa nekutiza savanhu vari kutya.

Tinoona zvakada kufanana neizvi panaJowani. Anoonekwa mumahombekombe aJorodhani munenge muzere vanhu vachiita mabasa avo. Iye anotanga kutaura navanhu vakasiyana-siyana achivaratidza kutadza kwavo. Anoti kuvateresi muri kubhadharisa vanhu mari yakapfurikidza. Kumasoja anoti musatyisidzira vanhu. Kuvapfumi anoti musabatirira vanhu.

Vazhinji vedu tine mhosva. Iri handiro dambudziko. Dambudziko nderekuti hana dzedu hadzicharova. Vazhinji vedu hatichabvuma kuti tiri kutadza. Jowani anouya sokuuya kwaakaita kuvanhu venguva yake achiti bvumai matadzo enyu. Tarisai moyo yenyu muone zvamungaite nezvazvo. Anoti tendeukai kubva kuzvivi zvenyu mudzokere kuna Mwari.

Mumwe mudzimai anoti iye akanga agere zvake paruvanze ndokuona mwana wake achiisa rimwe gumo mubhavhu rekugezera asi rimwe rakaramba riri mumatope. Pfungwa dzake dzakatanga kumhanya. Akaona kuti uyu waive mufananidzo wohupenyu hwake. Aive munhu anoda kuzvipira kuna Mwari, asi akanga asina kuzvipira nomwoyo wose. Aive nerimwe gumbo muna Mwari rimwe riri panze. Asi iye zvino akanga abatwa moyo. Anoti iye akazhamba achiti ‘Ndaneta! Mwari nhasi ndinokusarudzai!’

Advent inguva yokubvuma kutadza kwedu. Inguva yokutendeuka kubva kuzvivi zvedu, tichizvireurura nokuzarurira Mwari hanadzedu. Inguva yokusarudza Mwari nomwoyo wose kwete kuita gumbo mumba gumbopanze. Inguva yokutura befu Nokuti ‘Mwari ndaneta! Ndinosarudza imi!’

Ndiani achasara achipima nyama

Posted by MC on December 14, 2018
Posted in: Nyambo. Leave a comment

Paivapo navamwe vaarume vaviri, Timi naBhonzo, vakaisa musoro pamwechete ndokuvamba bhucha ravo. Bhizimusi ravo rakabudirira chose. Mumwe musi muparidzi akavamedurira shoko Timi ndokutendeuka akapira upenyu hwake kuna Kristu. Timi akaedza kukurudzira Bhonzo kuita zvimwechetezvo asi zvakashaya basa. Timi akati ‘Ko nhai Bhonzo, sei uri kuomesa musoro?’Bhonzo ndokuti, ‘Inzwa shamwari, kana tese tikatendeuka ndiani achasara achiera nyama?’

Dzidzo: vamwe vanotya kutendeuka nekuti vanotya kurasikirwa nezvenyama.

Svondo 3 Mwaka woKuuya C – Ivai noruenzaniso

Posted by MC on December 14, 2018
Posted in: Mharidzo, Mharidzo dzamasvondo, Mwaka woKuuya C. Leave a comment

Jowani anoparidza nezvekutendeuka. Ruzhinji rwavanhu parunomunzwa runobvunza kuti ndezvipi chaizvoizvo zvinofanira kuitwa. Jowani anopindura nokuvapa zvinobatika zvavanofanira kuita.

  1. Ruzhinji rwavanhu anoruudza kuti rugoverane zvokudya nezvokupfeka navarombo;
  2. Vateresi anovati vasabiridzire vanhu asi kuti vaite zvine ruenzaniso;
  3. Masoja anovati vasashungurudze vanhu asi kuti vabate vanhu zvakanaka.

Muchidimbu, mharidzo yaJowani inoti kutendeuka kunoreva kuva noruenzaniso.

Svondo 3 Mwaka woKuuya C – Todii?

Posted by MC on December 14, 2018
Posted in: Mharidzo, Mharidzo dzamasvondo, Mwaka woKuuya C. Leave a comment

MuDama Rakanaka ranhasi pane mubvunzo wakakosha uri kubvunzwa namapoka matatu avanhu. Mhinduro iri kupihwa inotibatsirawo isu muhupenyu hwedu. Mapoka aya ndeanoti:

  • Mhomho yavaJudha yaitevera Jowani;
  • Vateresi vaivengwa navanhu (vokunze);
  • Mauto (kazhinji vaiva vaRoma; vatorwa).

Mhomho yavaJudha

Jowani ari kuti kuvanhu ava, ivai noruenzaniso. Musazvifunge asi kuti goveranai navamwe zvamuinazvo. Isuwo savatenderi, tine basa guru rokugoverana zvokudya nezvokupfeka navarombo. Isuwo tinofanira kuvavarira kufunga vamwe zvikurusei munguva ino yeMwaka wokugadzirira kuuya kwaTenzi.

Vateresi

Jowani ari kuti kuvateresi, regai zvokutora mari yakapfuurikidza yemutero. Vimbikai mumashandiro amunoita mubasa renyu musava nehuori. Gutsikanai nemuhoro wamunopihwa musada zvekubira vanhu. Ko isu savatenderi takavimbika here mumabasa edu, muhukama hwedu navamwe, mumabhizimusi edu nemudzimba dzedu?

Masoja

Jowani anoudza mauto kuti asashandise simba rawo kuitira vanhu utsinye, kudzvanyirira vanhu nokuvabira mari, kupomera vanhu mhaka dzavasina, nokushungurudza vanhu. Isu tinoshandisa simba ratiinaro chirudzii mumabasa edu nemudzimba dzedu? Tinoita zvinhu zvinongobatsira isu toga here kana kuti tinorangarirawo vamwe mukuita kwedu? Tinobata vari pasi pedu noruenzaniso here tichifunga zvido zvavo kana kuti tinongozvifugna chete?