Munamato wamangwanani

Posted by MC on March 30, 2019
Posted in: Mimamato, Minamato yaMangwanani. 2 Comments

Verenga Nziyo 34, 103 ne 145

Mwari Baba vedu vokudenga, makatisika tinokupfugamirai. Ndinokutendai Tenzi nokuti nyangwe ndiri mutadzi, mandikomborerazve nerimwe zuva roupenyu. Ndinokupai kufunga kwangu kwose, mazwi namabasa. Ndibatsirei Tenzi kuti ndikuitirei nhasi ndiine kutenda kwakadzama nechido chinoririma, mugondipawo kukunda muna zvose zvandichaita.

Imi Jesu makaroverwa paMuchinjikwa, tambanudzai maoko enyu akakuvadzwa mundikomborere. Chimbidzai kundidzosa pose pandinorasika nokutsauka pamuri.

Ndinokupai kusuwa nokutambudzika kwangu, marwadzo angu panyama napamweya, ndichizvibatanidza nokutambudzika kufa nokumuka kwenyu, pamwe neMiteuro yeMisa iri kuitwa nhasi uno. Zvose nomumwoyo usina mhaka waMaria, kuti vatadzi vatendeuke, uye kuti mweya iri kurasika pazuva ranhasi iponeswe.

Mweya Mutsvene nditungamirirei uye fambai neni zuva ranhasi. Vhenekerai njere dzangu mundisimbaradze nokundidzidzisa kuda Jesu zvakadzama. Itai kuti ndive chapupu chorudo rwenyu, ndirwuparadzire kwose kwandinoenda ndichikupai mbiri mune zvose zvandinoita. Amen.

KUTANGISA ZUVA

Posted by MC on March 30, 2019
Posted in: Mimamato. Leave a comment

Muzita raBaba, neraMwanakomana neroMweya Mutsvene. Amen.

Baba vari kudenga, Abba Baba vangu, ndinokutendai nokuti mandisvitsazve kuzuva idzva. Nerubatsiro rwaMweya Mutsvene, nditungamirireiwo mumakwara akanaka. Ndibatei maoko kuti ndisatsauke pamuri.

Tenzi itai kuti rudo rwenyu rwuzare nokutekeshera mandiri kuti ndigogona kugara ndichichengeta mirau yoUmambo hwenyu.

Tenzi Jesu, itaiwo kuti zvuru nezvuru zvavanhu zvitongwe norudo rwenyu rwunogara nokusingaperi, zvikugamuchirei imi moga saTenzi naChangamire.

Mweya Mutsvene ndipeiwo simba rokuita zvose zvinodiwa naBaba kuti ndiite.

RUSARIRO RWETSITSI DZAMWARI DZINOERA2

Posted by MC on March 30, 2019
Posted in: Uncategorized.

Namatai muchishandisa Rusariro

  1. Chiratidzo chechipiyaniso: Muzita raBaba neMwanakomana namweya mutsvene. Amen.

2.                 Baba vedu

3.                 Kaziwai Maria

4.                 Ndinotendera Mwari

  • Patsanga hombe namati muchiti:

Baba musina mugumo, ndinokupai muviri neropa, Mweya neuMwari hweMwanakomana wenyu wapamwoyo, Mambo wedu Yesu Kristo, achiripira matadzo edu neayo evanhu vose vepasi pose.

6.                 Patsanga gumi duku namatai muchiti:

Nepamusana pedambudziko rake rinosuwisa, tinzwireiwo tsitsi, isu nepasi pose.

7.           Pekupedzisira (katatu) namatai muchiti:

Mwari Mutsvene, Mutsvene saMasimba ose, Mutsvene musina mugumo, tinzwireiwo tsitsi isu navanhu vose vepasi pose.

  • Dzokorora ‘Baba musina mugumo’ na ‘Nepamusana pedambudziko rake’ (5 & 6) patsanga hombe nediki dzasara.
  • Mushure metsanga shanu unoita munamato unotevera katatu: Mwari Mutsvene, Mutsvene Munamasimba, Mutsvene musina mugumo, tinzwireiwo tsitsi, isu navanhu vose vepasi pose.

10.            Munamato wekupedzisira:

Mwari musina mugumo, mamuri tsitsi hadzina mugumo, zvakare hupfumi hwengoni hauperi mamuri, titarirei norupfave, mugowedzera tsitsi dzenyu matiri, kuitira kuti munguva dzakatiomera tisaore mwoyo, asi kuti nechivimbo tizviwisire muzvido zvenyu zvinova rudo netsitsi. Amen.

NOVHENA YE TSITSI DZAMWARI

Posted by MC on March 30, 2019
Posted in: Manovhena, Mimamato. Leave a comment

ZUVA REKUTANGA

Zuva ranhasi uisa kwandiri vanhu vamarudzi ose, zvikuru vatadzi vose uvanyudze mudziva retsitsi dzangu.

Yesu muzere netsitsi, zviri mamuri kutiitira rupfave uye kutiregerera, naizvozvo musatarise matadzo edu asi tarisai ruvimbo rwedu rwatakaisa kuunaki hwenyu husingaperi. Tigamuchirei tose murudo rweMoyo wenyu uzere netsitsi dzine rupfave,uye musatirega tichitiza kubva mauri. Tinoteterera izvi kwamuri nerudo rwenyu runokubatanidzai naBaba naMweya Mutsvene.

Baba musina magumo tendeutsirai meso enyu etsitsi kumarudzi ose zvikuru kuvatadzi, vose vanova vakambundikirwa muMoyo waYesu uzere tsitsi norupfave. Nemapusana pedambudziko rake rinoisvosuwisa tiratidzei tsitsi,kuti tizorumbidza simba risina mugumo retsitsi dzenyu kwemisi isingaperi. Amen.

ZUVA RECHIPIRI

Nhasi uisa kwandiri mweya yavapriste navapikiri uvanyudze muhudzamu hwetsitsi dzangu.

Yesu muzere netsitsi,mamuri munobva zvinhu zvose zvakanaka, wedzerai girasiya renyu kuvanhurume navanhukadzi vakateketerwa kubasa renyu kuti vagoita mabasa etsitsi namazvo kuitira kuti avo vanovaona vagokudza Baba vetsitsi vari Kudenga.

Baba musina mugumo, tendeutsirai meso enyu etsitsi kune mweya yeavo vakasarudzwa kuzoshanda mumunda wenyu – vapriste navapikiri; vazadzeyi nesimba remakomborero enyu. Nekuda kwerudo rwemwoyo weMwanakomana wenyu munova mavakambundikirwa, vapeiwo simba nechiedza kuti vagokwanisa kutungamirira vamwe munzira yeruponeso, uye nezwi rimwechete vaimbe nekurumbidza tsitsi dzenyu kwemisi isingaperi. Amen.

ZUVA RECHITATU

Nhasi uisa kwandiri mweya yose yakazvipira uye yakatendeka, uinyudze mudziva retsitsi dzangu.

Yesu muzere netsitsi, munopa magirasiya enyu akawandisa kune mumwe nemwe uye kuvanhu vose kubva kuupfumi hwetsitsi dzenyu. Titambireiwo murudo rwemwoyo wenyu uzere netsitsi norupfave uye musatirega tichibudamo. Tinokumbira girasiya iri pamusana perudo rwenyu kuna Mwari Baba vekudenga, rwunoita kuti mwoyo wenyu utsve zvinotyisa.

Baba musina mugumo, tendeutsirai meso etsitsi kune mweya yose yakatendeka, senhaka yeMwanakomana wenyu. Pamusana pedambudziko rake rinoisvosuwisa, vapeiwo chikomborero chenyu uye muvadzivirire nguva dzose. Ndiko kuti varege kurasa rudo rwenyu kana upfumi hwechitendero chisande, asi kuti pamwe navangere navasande, vakudze tsitsi dzenyu dzisina mugumo kwemisi isingaperi. Amen.

ZUVA RECHINA

Nhasi uisa kwandiri vose vasingatenderi Mwari naavo vasingandizivi.

Yesu mune tsitsi norupfave muri chiedza chepasi pose. Gamucharai muMwoyo menyu muzere netsitsi norupfave mweya yaavo vasati vatendera Mwari nemweya yaavo vasati vakuzivai. Itai kuti miranzi yamagirasiya enyu ivavhenekere kuti ivowo, pamwechete nesu, vagorumbidza tsitsi dzenyu dzinoshamisa. Musavarega vachitiza panzvimbo iyo inouya mwoyo wenyu uzere netsitsi norupfave.

Baba musina magumo, tendeutsirayi meso enyu etsitsi kune avo vasingatenderi mamuri naavo vasati vakuzivayi, asi vakapfigirwa muMwoyo wa Yesu muzere netsitsi norupfave. Vakwevereyi kuchiedza cheDama Rakanaka. Mweya iyoyi haizive kuti mufaroyi kukudai imi. Itai kuti naivowo vave vanozokudza mwoyochena wetsitsi dzenyu kwemisi isingaperi. AMEN.

ZUVA RECHISHANU

Mhasi uisai kwandiri mweya yaavo vakazvitsaura kubva muKirike.

Yesu muzere netsitsi, muri runako pacharwo, hamurambi kupa chiedza kune vanochitsvaka kwamuri. Gamuchirai mumwoyo wenyu uzere netsitsi norupfave meya yaavo vakazvitsaura kubva muKirike. Vadhonzei nesimba rechiedza chenyu mukubatana neKirike, uye musavarega vachitiza muugaro hweMwoyo wenyu uzere netsitsi dzine rupfave, asi itai kuti naivowo vazorumbidza huwandu hwetsitsi dzenyu.

Baba musina mugumo tendeutsirai meso enyu kune mweya yaavo vakazvitsaura muKirike roMwanakomana wenyu, vakashandisa zvisakarurama magirasiya nemakomborero amakavapa vachishingirira muzvikanganiso zvavo. Musatarise kukanganisa kwavo, asi tarisai pane rudo rweMwanakomana wenyu, uye pamarwadzo ake anosuwisa aakasangana nawo pamusana pavo, nokuti naivowo vakambundikirwa muMwoyo wake uzere rudo netsitsi norupfave. Itai kuti naivowo vagozorumbidza tsitsi dzenyu huru kwemisi isingaperi. AMEN.

ZUVA RECHITANHATU

Nhasi uisa kwandiri mweya yavakazvidukupisa neyevana vadiki uinyudze mutsitsi dzangu.

Yesu muzere netsitsi, imi pachenyu makati ‘Dzidzai pandiri nokuti ndakapfava uye ndakazvidukupisa muMwoyo.’ Gamuchirai muMwoyo wenyu uzere netsitsi norupfave mweya yaavo vakazvidukupisa naavo vakapfava, pamwe nemweya yavana vadiki. Mweya iyi inounza mufaro mukuru kudenga uye inofarirwa naBaba vokudenga. Vanounza munhuwi unonhiwirira pamberi pechigaro chamambo. Mwari pachake anofadzwa nekunhuwirira kwavo. Mweya iyi ine nzvimbo narini narini muMwoyo wenyu uzere nerudo netsitsi norupfave uye inoramba ichiimba rwiyo rwerudo nengoni.

Baba vasina mugumo, tendeutsirai meso enyu etsitsi kune avo vakazvidukupisa navakapfava pamwe nevana vadiki, avo vakambundikirwa muMwoyo wa Yesu uzere nerudo netsitsi norupfave. Mweya iyoyo yakafanana zvikuru neMwanakomana wenyu. Kunhuwirira kwavo kunosimuka kubva panyika kuchisvika pachigaro chenyu. Baba vetsitsi neunaki ndinokumbirisa kwamuri pamusana perudo rwamunarwo kumweya iyi, uye nemufaro wamunowana kubva pairi; komborerai pasi rose kuti mweya yose pamwechete iimbe nekukudza tsitsi dzenyu kwemisi isingaperi. AMEN.

ZUVA RECHINOMWE

Nhasi uisa kwandiri mweya yose inonyanya kukudza nekurumbidza tsitsi dzangu uvanyudze mutsitsi dzangu.

Yesu muzere netsitsi, Mwoyo wenyu rudo pacharwo, gamuchirai mumwoyo wenyu uzere netsitsi norupfave, mweya yoseinonyanya kukudza nekurumbidza hukuru hwetsitsi dzenyu. Mweya iyi yakazadzwa nesimba raMwari pachake. Pakati pamatambudziko neminyama, inofambira mberi iine ruvimbo netsitsi dzenyu. Zvakare yakabatana nemi, Jesu wangu, inotakura vanhu vamarudzi ose pamafudzi ayo. Mweya yose iyi haizotongwi zvinorwadza asi tsitsi dzenyu dzichaigumbatira apo inenge yobva murupenyu rwapasi pano.

Baba musina mugumo, tendeutsirai meso enyu azere netsitsi kumweya ino remekedza nekukudza zvakakosha pamuri zvekuva nemwoyo uzere netsitsi, uye uye yakavharirwa mumwoyo waJesu uzere norudo netsitsi norupfave. Mweya iyi ndiyo Dama Rakanaka mhenyu. Maoko ayo azere namabasa etsitsi dzenyu uye mweya yavo ichifashukira norudo vanoimba rwuyo rwekurumbidza tsitsi dzenyu, imi Vokumusoro! Ndinokuteterera, Mwari wangu, varatidzei tsitsi dzenyu pamusana pechitarisiro neruvimbo zvavakaisa mamuri. Itai kuti chitsidzo chaYesu, chizadzikiswe mavari, apo akati kwavari, panguva yeupenyu hwavo asi zvikuru panguva yekufa kwavo; mweya yose inoremekedza tsitsi dzake, iye pachake achaimirira semudziviriri. AMEN.

ZUVA RECHISERE

Nhasi uisa kwandiri Mweya yose yakamirira iri muPurugatoriyo uinyudze mugomba retsitsi dzangu.

Yesu muzere netsitsi, imi pachenyu makataura kuti munoshuvira tsitsi, zvino ndinouisa muMwoyo wenyu uzere netsitsi norupfave, mweya yose iri muPurigatoriyo, mweya yamunodisa kwazvo, asi inofanira kuripira kuruenzaniso rwenyu. Dai waro ropa nemvura zvakayerera zvichibva kuMwoyo wenyu zvadzima marimi emoto wePurigatoriyo, kuti ikowo, emoto unochenesa kuti simba retsitsi dzenyu rirumbidzwe ikokowo.

Baba musina mugumo tendeutsirai meso enyu azere netsitsi kumweya iri kutambudzika iri muPurigatoriyo iyo yakambundikirwa muMwoyo waYesu uzere netsitsi norupfave. Ndinokutetererai kuti nepamusana pedambudziko raJesu Mwanakomana wenyu rinosuwisa nekurwadziwa kakwe kukuru kwakazadza Mwoyo wake Musande zadzai tsitsi dzenyu kumweya yose iri pasi peruongororo rwenyu.

Musavatarire neimwe nzira asi atarisei chete kuburikidza nemumaronda eMwanakomana wenyu wadiwa, nekuti tinotendera kuti runako netsitsi zvamuinazvo hazvina mugumo. AMEN.

 ZUVA RECHIPFUMBAMWE

Nhasi uisai kwandiri mweya yose inodziya, muinyudze mugomba retsitsi dzangu.

Yesu mune tsitsi dzizere, muri rupfave pacharwo. Ndinouyisa mweya inodziya muMwoyo wenyu une tsitsi norupfave. Mumoto uyu werudo rwenyu rwusina tsvekwa, itai kuti mweya iyi yakadziya, inoita kunge zvitunha, yakakuzadzai nekusema kukuru, izadzwe zvakare nemoto wenyu. O Mambo Yesu mune rupfave rukuru, ratidzai simba nerudo rwenyu, mugoikwevera kumunhuwi werudo rwenyu, mugoipa chipo cherudo rutsvene nekuti kwamuri hakuna chisingagoneke.

Baba musina mugumo, tendeutsai meso enyu etsitsi kumweya yakadziya asi iyo yakambundikirwa muMwoyo waYesu uzere tsitsi norupfave. Baba vetsitsi, ndinokutetererai pamusana pedambudziko reMwanakomana wenyu nekurwadziwa uko kwaakaita kwamaawa matatu ari pachipiyaniso. Itai kuti naivowo vakudze, varumbidze udzamu hwetsitsi dzenyu. Amen

Svondo 4 Mwaka woKutsanya C

Posted by MC on March 30, 2019
Posted in: Gore C, Mwaka woKutsanya. Leave a comment

Pane mumwe murume aiva nemukurumbira wokuimba anonzi Marvin Gaye. Akafa rufu rwunorwadza musiwa 1 Kubvumbi muna 1983. Akaita zvekupfuurwa nababa vake.

Upenyu hwaMarvig Gaye achikura hwakanga hwakaoma. Baba vake vaimushungurudza zvisingabviri. Mumwe munyori anoti, ‘Mavin Gaye aitendera munaJesu zvikuru, asi aitadza kurarama dzidziso yaJesu yokuti aregerere baba vake. Pekupedzisira izvi zvakauraya iye pamwe nababa vake!

Dambudziko raiva pana Marvin Gaye nababa vake ndiro dambudziko ratekeshera mazuva ano. Vanhu vava kuremerwa nekuregererana. Dambudziko rekusada kuregerera riri kunyanyoonekwa pavanhu vanenge varambana.

Pane vamwe vari kupedzera simba ravo nemari yavo pakuda kusota murume kana mukadzi akavaramba. Vazhinji vacho vava namavanga makuru kudarika avakapihwa nanyakuvaramba anokonzerwa nehasha. Veduwee siyanai nehasha, dzinokuparadzai. fambirai mberi nohupenyu hwenyu.

Kutenda Kudzivirirwa

Posted by MC on March 27, 2019
Posted in: Mimamato. Leave a comment

Jeradhi Mutsvene wakanaka “Murevereri wamadzimai” ndibatsireiwo mukutenda Mwari nechipo chikuru choumai. Nguva yandakanga ndakazvitakura ndakadzidza kukumbira nokwauri uye ndakaisa kuchengetedzwa kwemwana wangu nekwangu mukudzivirirwa kwenyu kune simba. Dzidziso yenyu huru yekuvimba naMwari yakandisimbisa; mutsara (motto ) wenyu wekuti, “Mwari vachapa”, yakava tarisiro yangu. Nditendereiwo Mwari pamusana pemwana ane hutano uye akasvika uyewo utano hwangu hwakanaka.

Ndibatsireiwo kukoshesa chipo chikuru ichi choumai uye ndiwanirewo kuna Mwari magrasia ekurera mwana wangu semwana waMwari. Mukutenda kwangu ndicharamba ndichikumbira nekwamuri uye ndichitaurira vamwe vana amai nezve murevereri wavo neshamwari yakakosha. AMEN.

Munamato Wokudzivirirwa

Posted by MC on March 27, 2019
Posted in: Mimamato. Leave a comment

Jeradhi Mutsvene mukuru, muranda mudiwa kwazvo waJesu Kristo, mutevedzeri mutsvene womununuri wenyu munyoro nyakuzvidukupisa, uye mwana wakazvipira wamai vaMwari, tungidzaiwo mumoyo mangu kamoto kedenga kemoto werudo uyo wakapfuta mumoyo menyu ukakuita ngirozi yorudo. Jeradhi Mutsvene wembiri nokuti apo makapomerwa mhosva musina mhaka , makatirira saMambo venyu vokudenga, hamuna kunyunyuta kana kupopota kunhema dzevaipi, Mwari vakakusimudzirai somurevereri nomudziviriri wamadzimai akazvitakura ndidzivirireiwo kunjodzi nemarwadzo makuru anonzwika pakusunuguka. Dziviriraiwo mwana wandakatakura kuti agokwanisa kuona chiedza chezuva uye agowanawo mvura yebhabhatisimo inochenesa nokupa upenyu nokuna Kristo Mambo wedu. AMEN.

Kaziwai Maria x 9

Munamato Woumai

Posted by MC on March 27, 2019
Posted in: Mimamato. Leave a comment

Jeradhi Mutsvene ane mukurumbira murevereri ane simba kwazvo pamberi paMwari uye mushandi anoshamisa wanhasi. Ndinoya kwamuri ndichikumbira rubatsiro rwenyu. Imi makazadzisa kuda kwaMwari nguva dzose muchiri pasi pano, ndibatsireiwo kuita kuda kwaMwari kutsvene. Ndikumbirireiwo kuvaridzi voupenyu kunobva uBaba hwose kuti vandipewo mbereko uye kuti ndigorera vana vana vanofadza Mwari muupenyu huno vagozovewo vagari venhaka muuMambo hwedenga. AMEN.

Litani kuna Jeradhi Mutsvene

Posted by MC on March 27, 2019
Posted in: Madetembo. Leave a comment

Mambo tinzwireiwo tsitsi

Mambo tinzwireiwo tsitsi

Kristo tinzwireiwo tsitsi

Kristo tinzwireiwo tsitsi

Kristo tinzweiwo

Kristo tidavireiwo

Mwari Baba muri kudenga

Tinzwireiwo tsitsi

Mwari mwanakomana mununuri wapasi Tinzwireiwo tsitsi

Mwari Mweya mutsvene

Tinzwireiwo tsitsi

Utatu usnde Mwari mumwechete

Tinzwireiwo tsitsi

Maria Mutsvene amai vorubatsiro rusingagumi Tireverereiwo

Josefa Mutsvene muchengeti waKristo Tireverereiwo

Arifonzo Mutsvene mutangi wechita choMununuri Mutsvene kwazvo

Tireverereiwo

Jeradhi Mutsvene akapihwa makomborero anoshamisa kubvira pahuduku hwake

Tireverereiwo

Jeradhi Mutsvene mushandi akarurama akavimbika Tireverereiwo

Jeradhi Mutsvene muenzaniso wechiedza kuvashandi vose

Tireverereiwo

Jeradhi Mutsvene mudi mukuru werunamato nekushanda

Tireverereiwo

Jeradhi Mutsvene mupfugamiri mukuru wesakaramende matsvene kwazvo reatari

Tireverereiwo

Jeradhi Mutsvene muenzaniso muupenyu wemununuri akarovererwa pamuchinjikwa

Tireverereiwo

Jeradhi Mutsvene akazvipira zvikuru kune muvirigo Tireverereiwo

Jeradhi Mutsvene chiringiro cheutsvene nokuzviranga Tireverereiwo

Jeradhi Mutsvene muenzaniso unoyemurika wokuteera Tireverereiwo

Jeradhi Mutsvene akatambudzwa nenyadziswa

muchinyararire

Tireverereiwo

Jeradhi Mutsvene mukuru pamberi paMwari mukuzvidukupisa kukuru

Tireverereiwo

Jeradhi Mutsvene mungwaru wechokwadi mukuzvirereka somwana muduku

Tireverereiwo

Jeradhi Mutsvene makavhenekerwa nesimba raMwari muzvimisterio zvouMwari

Tireverereiwo

Jeradhi Mutsvene wechisuwo chimwechete chekufadza Mwari

Tireverereiwo

Jeradhi Mutsvene mukurudziri wokupinduka kwavatadzi

Tireverereiwo

Jeradhi musande mubatsiri anohungwaru pakusarudza zvoupenyu mukushandira Mwari

Tireverereiwo

Jeradhi Mutsvene mutungamiri akavhenekwa pakutungamirira zvemweya

Tireverereiwo

Jeradhi Mutsvene shamwari yakanaka yevarombo nevatamburi

Tireverereiwo

Jeradhi Mutsvene diziro yavanorwara nevakasuruvara Tireverereiwo

Jeradhi Mutsvene mudziviriri anoshamisa wevana vasina kubhabhatidzwa

Tireverereiwo

Jeradhi Mutsvene murevereri ane nyasha mudambudziko ripi zvaro

Tireverereiwo

Jeradhi Mutsvene wakasimudzirwa naMwari mukuita zvishamiso zvinkatyamadza

Tireverereiwo

Jeradhi Mutsvene chishongo nembiri yechita cheMununuri

Tireverereiwo

Hwayana yaMwari munobvisa matadzo apasi Tidzivirireiwo Mambo

Hwayana yaMwari munobvisa matadzo apasi Tinzweiwo Mambo

Hwayana yaMwari munobvisa matadzo apasi Tinzwireiwo tsitsi

Tireverereiwo Jeradhi Mutsvene kuti tikodzere kuwana zvatakapikirwa naKristo

Ngatinamatei

Mwari muna asimba ose makakwevera kwamuri Jeradhi Mutsvene kubvira pahuduku hwake, makaita kuti afanane nemwanakomana wenyu akarovererwa pamuchinjikwa , tinokukumbirai kuti tichitevedzera muenzaniso wake tifananewo nemwanakomana wenyu nokuna Kristo Mambo wedu. AMEN.

Jeradhi Mutsvene

Posted by MC on March 27, 2019
Posted in: Uncategorized. Leave a comment

Jeradhi Mutsvene mumwe weavo vane mukurumbira wokuita zvishamiso munhoroondo yeKirike Katorike. Paiongororwa kuti aitwe Mutsvene zvishamiso zvakawanda zvakaratidzwa zvakaitwa kuburikidza nekuna Jeradhi Mutsvene.

Kubvira musi wokuzvarwa kwake 6 Kubvumbi 1726, kusvikira musi waakafa ave nemakore makumi maviri ane mapfumbamwe Jeradhi Mutsvene aiva ndonda. Pamusana paizvozvo akarambwa katatu kutambirwa muupenyu hwokupikira. Mushure mokunge agamuchirwa muchita cheMununuri (maRedemptorist) nokuratidza undonda hwake pachiso chake zvakazoonekwa kuti iye ari oga aikwanisa kuita basa raiitwa nevanhu vana. Mushure mekutambirwa semubrother muchita ichi akafamba mumaruwa emuItaly somuparidzi weshoko raMwari akazove mudziyo wokuti masimba aKristo okurapa aibuda nemaari. Kunyangwe nanhasi uno nokureverera kwake anoenderera mberi achibatsira vatenderi vanokumbira minato yake.

Hakuna munhu akakwanisa kutsanangura zvinogutsa kuti pamusana pei Jeradhi Mutsvene achitorwa somurevereri wanamai. Muupenyu hwake muzviitiko zvakawanda munamato wake wakaponesa upenyu hwamai nemwana wavo achangobva mukuzvarwa. Mushure mekufa kwake zvakaonekwa kuti tsika huru yaive nemukurumbira muupenyu hwake yaive yokuti, “Ruvimbo mune zvinobva kuna Mwari.” Pamusana paizvozvi vanhu vakawanda vakakweverwa kukumbira nekwaari. Aiwanzofarira kutaura achiti, “Mwari achatipa.”zvinova zvinopikisana nemararamiro, mafungiro nokutya kwevanhu vanofunga nezvepasi pano.

Kwapfuura makore mazana maviri apo Jeradhi Mutsvene akamboti, “Kana pane munhu asingakwanisi kutakura matambudziko anobva kuna Mwari , kumbira kwandiri kuti ndikubatsire kana kuti

ndikanzwa nezvemunhu ane dambudziko irori ndinomunamatira kuti Mwari amupe girasiya rokutambira kuda kwaMwari.

Zuva raJeradhi Mutsvene rinopembererwa musi wa16 Gumiguru.